سلاح الجهل

السنتين اللي فاتو دول أكدولي على حاجه مهمه جدا , إن أهم سلاح وأخطر سلاح في الترسانه العسكريه الأمريكيه هو غباءنا احنا وجهلنا , عشان كده أهم من إننا نطالب أمريكا بتفكيك أسلحة الدمار الشامل بتاعتها لازم نتخلص إحنا من سلاحها الخطير الموجود في عقولنا , جرّب حضرتك كده وركزّ , شوف أبو اسمعاين بيكدب من إمتى وبينافق إزاي وبيتلون إزاي ؟ ومع ذلك لسه أنصاره بكرتونتهم لا نقصو خياريه ولا زادو خياريه , دكاتره ومهندسين وأنصار عنب , هتلاقيه بيقولك أبو اسماعيل أسد الأمه !! , بزمتك أبو اسماعيل وأنصاره مش أخطر علينا من قنبله ذريه أمريكيه ؟! , طيب شوف بديع وهو واقف وراه تابوتين واحد منهم فاضي وبيقول ال 10 اللي ماتو في الإتحاديه منهم 14 إخوان !! , وألاف الشيرات والتكبيرات من أنصار الإخوان اللي لسه برضه بكرتونتهم , طيب بلاش , بص كده في سحنة صبحي صالح وركز شويه واسمعه وهو بيقول اللهم أمتني على الإخوان !! وكام إخوانجي بقى شير الفيديو الخرافي بتاع صالح ؟ بزمتك بديع وصبحي صالح وأنصارهم مش أخطر علينا من قاعدة صواريخ بالستيه أمريكيه ؟ , طيب شوف العريان اللي كان بيشيل الميكرفون للبرادعي ودلوأتي بيقول نحاكمه دوليا , وشوف عشاق العريان ومحبيه , هما أكتر ضرر ولا 3 ألاف قنبله عنقوديه أمريكيه ؟!
.
يا ساده , يا أشاوس مصر والعرب , أمريكا هتحرص دائما على امتلاك سلاح ( جهلنا ), وعشان كده دعمت الإخوان في الحكم , هننتصر إزاي حضرتك ؟ هننتصر إزاي في مصر ونتقدم واحنا نص الشعب جاهل ( يعني دود) بياكل في لحم النص التاني ؟!!.

.

محمد حسين