صباح الخير , في عاداتنا وتقاليدنا وموروثاتنا
القديمه بيقولو ( الكدب مالوش رجلين ) , إنما الإخوان لما وصلو للسلطه وبما إنهم
بيغيرو المناهج فبيغيرو الأمثال كمان , ومنهجهم بيقول ( الكدب له 9 رجول ) , وكل
ماتحاول تقطع رجل الكدبه بتاعة الإخوان يطلع لك رجل تانيه وهكذا وقبل ما تخلص على
ال 9 رجول تلمح بعينك كدبه جديده ب 9 رجول برضه , لحد ما سيادتك تزهق , خد مثلا
وزير العدل , وده قاضي شامخ ( من الشموخ يعني ) وبيبقى قاعد على المنصه ووراه
ميزان له كفتين مظبوطين بالتمام ولا كأنهم حلاوة الرشيدي ,وزير العدل كان بيعتصم
قبل الثوره مع المعارضه من أجل ( إلغاء قانون الطوارئ ) وبعد ما الإخوان ركبو على
ضهرنا طلع وقال ( قانون الطوارئ مذكور في القرأن ) , وأمريكا عندها قانون طوارئ !!
, طيب يا مولانا ماهي أمريكا عندها قانون طوارئ من 50 سنه , يعني حضرتك كنت بتعتصم
وهي عندها قانون طوارئ , إنما حضرتك مقولتش إن أمريكا دوله ديموقراطيه عريقه من
100 سنه وعندها مؤسسات وقوانين ودساتير قويه وشعب مثقف تضمن عدم اساءة إستخدام
قانون الطوارئ , وهتلاقي وزير العدل اللي كان بيطالب أيام مبارك بالإشراف القضائي
على الإنتخابات دلوأتي بيقولك مش ضروري وأمريكا معندهاش إشراف قضائي , وبرضه
ميقولش إحنا مين وأمريكا مين ؟ , وكل ماتحاول تقطع رجل الكدبه بتاعة الوزير يطلع
لك بكدبه تانيه , لحد ما وصلنا لليوم اللي فيه وزير العدل من لبخته ولخبطته بيقول
إن مرسي أخطأ في تعيين النائب العام ( تصريح بعد حكم القاضي بعدم قانونية عزل عبد
المجيد محمود ) وفي نفس الوقت بيهدد القاضي اللي أصدر , أنا مشفق عليك يا وزير عدل
الإخوان , والله مشفق عليك , الحمد لله على نعمة الإسلام والعقل والضهر المفرود
!!.
.
محمد حسين
ليست هناك تعليقات:
إرسال تعليق