Mohamed
Hussein
4
أغسطس 2016·
خبر عجيب أوي
, صحيفه تركيه بتقول : نفاذ وقود مقاتله F16
حال دون إسقاط طائرة أردوغان أثناء الإنقلاب الفاشل !! .
.
لو ده شكل الصحافه
في تركيا , و لو العته و التخلف العقلي ده له زبون هناك بيقراه و يصدقه , يبقى واضح
جدا ان أردوغان صارف جامد عالتعليم , بس يبدو إنه كان بيصرف من فلوس الدعاره , عشان
كده مكانشي فيه بركه , بالك يا صحيفه يا تركيه لو كنتي قولتي إن الفتيس بتاع ال F16 قفش و الطيار سايقها في الجو , أو إن الطيار قبل
مايوصل طيارة أردوغان بدقيقتين جاله إسهال مفاجئ من أكلة درة مشوي اشتراه من على عربية
دره راكنه جنب سحابه و جاري التحقيق مع عربية الدره المشوي و السحابه ؟ كان بقى الكلام
منطقي اكتر .
.
نفاذ وقود ال F16 ؟!! يعني محاولة انقلاب في جيش , قيادات و رتب و
عشرات الظباط , و تحريك 40 طياره و معرفشي كام قطعه بحريه و حصار العاصمه في ساعه
, بس مكانشي معاهم لترين وقود ؟!! .
..................................................................................................................
Mohamed
Hussein
4
أغسطس 2016 ·
مقتل زعيم أنصار
بيت المقدس في سيناء ( أبو دعاء الأنصاري ) و معاه 45 كلب ارهابي , احنا واجب علينا
نبل الشربات .
رجالتنا بتشتغل
و تنتقم و ترد و تنضف و تطهر , لا هاممهم حر ولا برد و لا مشغولين بتويتر ولا فيس بوك
, و مش مستنيين لايكات من حد .
...................................................................................................................
Mohamed
Hussein
4
أغسطس 2016·
أحمد زويل حاصل
على قلادة النيل , أعلى وسام مصري , و بموجب الوسام ده بيستحق الحاصل عليه جنازه عسكريه
في حال وفاته , الكلام ده معناه ايه ؟ معناه ان أحمد زويل لازم يتعمله جنازه عسكريه
, و معناه كمان ان البرادعي هيتعمله جنازه عسكريه لأنه حاصل على قلادة النيل , أعتقد
( و الله أعلم ) مفيش في القوانين المصريه اي شئ يمنع كده إلا إنه يصدر حكم قضائي مثلا
ضد الشخص و تتسحب منه قلادة النيل .
.
انا مابحبش البرادعي
و مع ذلك لما يموت لازم يتعمله جنازه عسكريه ( طالما مات و هو محتفظ بالوسام ) , مهما
كان اختلافي معاه , عشان احترامي لبروتوكولات دولتي أهم ,و احترامي لقيمة الجايزه و
أهميتها , احنا مش دوله صغيره ولا دولة هفأ , و لا دوله ينفع تتحكم بطريقة ( أحبووووش
) , ياريت الناس تفهم إن بوستاتها و تويتاتها و عواطفها و حكاية بحب فلان و بكره فلان
ملهاش علاقه خالص بحكم الأوطان الكبيره اللي زي مصر .
..........................................................................................................................
Mohamed
Hussein
4
أغسطس 2016·
مرحلة ما بعد الكائن
الزومبي ............. الكائنات البارازومبيه .
.
- الكائن البارا
زومبي اللي بقاله سنتين تلاته بيسب و يلعن في البلد و يقول ( يارب هجره ) , يارب أسيبها
, لا مش ممكن ابدا , دي بلد محدش يعيش فيها .
هو نفسه الكائن
اللي قعد يعيط و يتشحتف على ليليان داوود لما السلطات المصريه قررت ترحلها من مصر
, مع انه المفروض يفرح لها انا هتسيب مصر ( اللي محدش يقدر يعيش فيها ) و اللي كيلو
الليمون فيها ب 4 الاف دولار , و هتروح لبنان اللي كيلو اللمون فيها بشلن
و هو نفسه اللي
قلبها مندبه لما واحد عبيط اقترح في البرلمان تعديلات على قوانين الجنسيه , و رغم ان
العبيط ده خد على دماغه من الكل بس الكائن البارازومبي كان لازم يدلي بدلوه و يتشحتف
عالجنسيه المصريه ( اللي بقاله 3 سنين بيقول مش عايزها !! ) .
.
- الكائن البارا
زومبي التاني , هو الكائن اللي عمل صفحه ( لخدمة المرضى ) زي مرضى السكر مثلا , و يأبى
هذا الكائن إلا انه يمارس دوره ككائن بارازومبي حتى في صحة الناس و ألامهم و ماعندوش
مانع ينشر خبر قذر زيه إن الإنسولين محدش لاقيه و اللي يلاقي انسولين يخزنه يا جدعان
!! .
.
- الكائن البارا
زومبي التالت , هو الكائن اللي بيكسل يصلي و بيكسل يتوضا و نفسه يخربها مداين بس مش
عارف يعمل ايه ؟ لحد ما فكر إنه يقول على نفسه ملحد , اهي كلمة ملحد دي لها وجاهتها
برضه عند المثقفين و المتعمقين في الفكر الجواني , فيقوم في وقت الفراغ يسب سيدنا النبي
( من باب الوجاهه الفكريه ) و مفيش مانع من تريأه على جيش و على هويه و على اسم بلد
حتى , مفكر بقى و ملحد و متعمق و كده , على فكره اغلب اللي بيقولو على نفسهم ملحدين
في الوطن العربي لا عندهم فكر ولا تأمّل ولا عمق ولا ثقافه ولا فلسفه ولا نيله , هما
بس بيحاولو يلاقو منفذ له وجاهته ( عند الحمقى ) في حكاية انهم يخربوها مداين .
.
- الكائن البارزومبي
الرابع , هو الكائن اللي بيتشعلق في توب الكائنات التلاته اللي فوق و بيعتقد انهم مهمين
أوي و جامدين أخر حماده ولازم يحكمو مصر بقى و إلا هينزل علينا سخط و غضب من ربنا
, قصدي سخط و غضب من الطبيعه و من ثقب الأوزون .
.......................................................................................................
Mohamed
Hussein
4
أغسطس 2016·
لو نزلت الشارع
و عملت استفتاء على شعبية السيسي , أو حتى عملته عالفيس بوك , هتلاقي النتيجه بتبهرك
, نتيجه من اللي بيقولو عليها كاشفه , او نتيجه بتشرح و بتوصف حاله و بتجاوب على كل
الأسئله , و رقم ممكن يختزل المشهد كله , للي عايز يفهم أو يستوعب .
.
النتيجه هتكون
بالشكل ده تقريبا , مؤيدين السيسي من الرجال بصفه عامه ( 70 % ) , من الستات بصفه عامه
( 90 % ) .
.
هتلاقي النسبه
في الستات أعلى بكتير من الرجاله , ليه بقى ؟ مش عشان السيسي جان و أموّر و كيوت ,
لا خالص , السيسي مش احمد عز ولا احمد زكي ولا عبد الحليم حافظ , إنما الحكايه كلها
ان الستات , المتجوزين تحديدا و اللي عندهم أطفال هما اكتر ناس بيحسو بالخوف , و في
لحظة الخوف بيرمو أي حاجه ورا ضهرهم , و الخوف هنا مش خوف من انفلات أمني في الشارع
, لأ , الإنفلات الامني كان في أعلى درجاته في 2011 , هما حسو بالخوف في 2013 ( كان
الوضع الأمني أفضل بكتير ) , إنما الخوف كان من تغيير شكل البلد دي و هويتها , الخوف
من اللعب في جيناتها , خوف على ولادها و بناتها من الأشكال ( و السحنه ) اللي كنا بنشوفها
, مين دول ؟ ناس مش شكلنا خالص ولا شبهنا , ولا نعرفهم ولا عايزين نعرفهم , ده كان
السؤال في عقل كل ست مصريه في 2013 و لحد النهارده .
.
الستات لقو في
السيسي الفارس اللي ممكن يكون الأب أو الأخ الأكبر , يعني الضهر و السند اللي هيضمن
لهم ان البلد دي مايتلعبش في هويتها , لو مش عايز تفهم الحقيقه دي و معناها انت حر
, خليك خروف و اشتم في ستات مصر ( اللي هما أمي و أمك و أختي و أختك ) , او خليك شمام
كوله و اقعد اخترع سيناريوهات وهميه للي حصل و برر فشلك و غمّي عنيك و استنى تويتة
البرادعي .
...............................................................................................................
Mohamed
Hussein
3
أغسطس 2016·
ماعنديش أي شغف
مستقبلي للمعرفه و القرايه أكتر من إني أقرا مذاكرات يكون كاتبها عبد الفتاح السيسي
بإديه , بعد عشرين تلاتين سنه ( لما يخلص رئاسته لمصر يعني ) , عايز إجابه على ألف
سؤال ياريس , الفتره من 2010 ل 2016 دي , ايه اللي حصل فيها بالظبط ؟ ازاي قدرتو تسجنو
مبارك وليه رفض انه يهرب ؟ ايه كان بيحصل في الكواليس , انتو ازاي عرفتو تعدّو ببلد
فيها 90 مليون بني أدم و حدودها 4 ألاف كيلو منهم ألفين كيلو ملناش جيران فيهم , يعني
الناحيه التانيه خرابه تقريبا .
.
مين كان بيساعدنا
من غير غرض , و مين كان بيساوم و هو بيساعدنا ؟ , بعد ثورة 30 يونيو لميتو قيادات الجماعه
الإرهابيه في ساعتين زمن ازاي ؟ دول كانو بيحسسونا انهم عباقره و جامدين و بيمشو عالحيط
وعندهم جيش خاص بيهم و استخبارات و حبشتكانات , ازاي شاركنا في عاصفة الحزم من غير
جنود عالأرض , و ازاي مشينا عالحبل في موضوع سوريا , لا خسرنا السعوديه ولا ضربنا طلقه
واحده على عسكري في الجيش العربي السوري , وجودنا في شرق ليبيا كان شكله عامل ازاي
؟ و امتى كنا بننسحب و نرجع لحدودنا ؟ .
.
امريكا كانت بتضغط
في كام اتجاه و بتلوي دراعنا ازاي ؟ قلت ايه لرئيس وزراء بريطانيا لما كنت عنده ؟ ايه
خلاه ينفعل أوي و يخرج عن الأطر الدبلوماسيه ؟ و ليه وزير خارجية أمريكا كل مابيجي
عندنا بتبعتو أصغر موظف في الخارجيه يقابله و هو جاي و لما يمشي ياخد هدومه في كيس
بلاستيك ؟ الرئيس الفرنسي لما جه مصر كان عايز ايه بالظبط ؟ وليه كان الكلام كله عن
الملف الليبي ؟ ليه أردوغان كل ما بينام بتطلع له انت في أحلامه ؟! .
.
و أهم سؤال على
الإطلاق , انت ازاي شايل الليله دي كلها في وقت عصيب زي ده و في بلد يا طولها يا عرضها
, بلد فيها مليون خروف و كولجي ( و ناس فارطه منهم عالأخر ) , و مع ذلك لما بتطلع في
مؤتمر أو تفتتح مشروع بتبقى مبتسم و بتهزر و تقول بكره تشوفو مصر و الخير جاي ؟ يا
راجل انا عندي بنتين اد كداهو ( و قطه اسمها بيري ) , و كل مشاكلي في الحياه ان النت
يبقى ضعيف لمدة نص ساعه , وقتها بروح البيت و انا ضارب بوز شبرين و مش ببقى طايق حد
يكلمني , و لو حد سألني عن بكره هقوله زي الهباب .
...........................................................................................................
Mohamed
Hussein
3
أغسطس 2016·
من امبارح و انا
شايف التايم لاين كله بيدعي بالرحمه للعالم الكبير أحمد زويل الله يرحمه , بس ماتوقعتش
إني ألاقي الخرفان بيدلو بلدوهم كالعاده , قلت أحمد زويل مكانشي مهتم بالشأن السياسي
أوي , و مع ذلك مفيش فايده , اللعنات و السباب لمجرد إنه كان مؤيد ل 30 يونيو , و طبعا
مع شوية تحابيش بقى زي انه طور منظومة الصواريخ بتاعة اسرائيل اللي بيقتلو بيها الفلسطينيين
و كده يعني ,.... أكادُ من فرطِ الجمالِ أبيضُ !! .
.
عندي اقتراح حلو
و الله لقطيع الخرفان اللي بيتشعلق في توب أيات عرابي ( قصدي في البيبي دول بتاعها
) و بيستنى منها الفتاوى الدينيه و التنسيق اللي بتنزله عشان يعرفو مين هيدخل الجنه
و مين هيدخل النار , اقتراحي انكو تاخدو الموضوع كله ( لوكشه واحده ) عشان توفرو وقتكو
و مجهودكو و توفرو بنزين , اللوكشه دي بتقول ايه باختصار , بتقول ان عمر الجماعه الارهابيه
داخل على 90 سنه , في الوقت ده مصر خرج منها من المشاهير والقامات نقول ألف واحد ,
في كل المجالات , العلم و الأدب و الشعر و الفكر و الفلسفه و الموهبه و الإبداع و الطب
و خلافه , نقول العقاد و طه حسين و نجيب محفوظ و زويل و مجدي يعقوب و غنيم و الباز
و ام كلثوم و عبد الوهاب و السنباطي و أنيس منصور و فاتن حمامه و عمر الشريف و احمد
زكي و غيرهم كتير .
.
اجمالا بقى , الألف
بني أدم دول , و انت مغمض عنيك كده تأكد إن مفيش واحد فيهم كان شايف في الجماعه الإرهابيه
دي أكتر من انها جماعه وثنيه صهيونيه , يبقى من باب التوفير و بدل ما تلعنو كل واحد
على حده فانا رأيي انكو تلعنو العلم و الأدب و الفكر و الفن و الإبداع و تقولو انهم
هيدخلو النار , و ان الجنه ( من وجهة نظركو ) لن يدخلو إلا قطيع الخرفان الضاني , و
ماتنسوش تقولو إن فاروق جويده طوّر منظومة الشعر العمودي عند الصهاينه و مد الصهاينه
بال ( قوافي ) اللي بيستخدموها في قتل أطفال فلسطين .
..............................................................................................................
Mohamed
Hussein
2
أغسطس 2016·
أصعب حاجه انك
تدخل عالفيس بوك , تكتب و تتناقش و تناهد طول النهار و الليل , مش عشان تدافع عن رئيس
أو حكومه , لأ خالص , انت من كُتْر خوفك عالبلد و احساسك بالخطر بتبقى عامل زي المخابيل
اللي دايرين في الشوارع يكلّمو الناس , يشرحو و يفهّمو , يعيدو و يزيدو , يابني ماتنشرش
صور مجهوله ماتخليش حد يضحك عليك , يا بنتي ماتصدقيش الأخبار دي , يابني اصبر هتُفرج
و الله , يا بنتي ماتستعجليش كل اللي بنحلم بيه هييجي بس الصبر , يا حبيبي مفيش خير
بييجي من ورا أمريكا , يا حبيبتي مش كل حاجه تتكتب أو تتقال , يا عم الحاج اكتب كلمتين
عن التفاؤل , يا حاجه الإكتئاب هو أول خطوات الهزيمه , يا ابن عمي البلد دي في خطر
حقيقي و مش باقي غيرها , هي عمود الخيمه .
.
يا بنت عمي احنا
غلطنا في حقها كتير و بقالنا 5 سنين بنعك نصبر شويه بقى , يا خالي الجيوش بتاعة أي
دولة هي محل فخر و تقدير مش محل سخريه و تريأه , يا حبيبتي دي هي الحيطه اللي مسنودين
عليها , يابني خيانه الاوطان عمرها ما كانت وجهة نظر ولا منهج فكري , يا بنتي لو معندكيش
جيش قوي و شعب واعي لا هيكون عندك تعليم ولا بحث علمي ولا اقتصاد , يابه الحاج ده مخطط
صهيوني بتنفذه أمريكا و بريطانيا و طايح في الكل , يا بنت أخويا الجزيره اتعملت عشان
كده , عشان وقت التنفيذ , يابن اختي تركيا دي دوله عدوه حاليا زيها زي الصهاينه و الحكايه
مش كيميا , يا عالم يا هوووه , يا خلق الله خافو عالبلد دي شويه .
.
أهو المخابيل اللي
بحكي لكو عنهم دول أبقى أنا واحد منهم , تعب و مناهده طول اليوم , بس و الله فخور إني
من المخابيل , و اليوم اللي هبطل فيه أكون من المخابيل و اناهد في السياسه هو اليوم
اللي هحس فيه ان البلد دي وصلت لبر الأمان , وقتها هسيب اللي يعك و يزربح يزربح براحته
, و ممكن كمان أعك و أزربح معاه من باب التغيير .
..........................................................................................................................
Mohamed
Hussein
2
أغسطس 2016·
قولا واحداً
.............. ضد أي تعديل في قوانين منح الجنسيه المصريه , و رئيس البرلمان المصري
لازم يمنع فورا استخدام الكولّه في المجس الموقر !! .
.
- طب ماحنا ممكن
نعمل تحريات أمنيه قبل منح الجنسيه ؟ و ماله نعمل , و نمنح الناس الجنسيه بقى لو حطو
وديعه دولاريه بأد كده و عاشو في مصر كذا سنه ؟ لا طبعا .
.
- ليه بس ؟ ما
فيه دول كتير و غنيه جدا و مايلزمهاش بتمنح الجنسيه للأجانب و المستثمرين , أه صح معاك
حق , طب ما نعمل زيهم بقى , لا طبعا .
.
- ليه لأ ؟ عشان
احنا مش زيهم .
- مش زيهم ازاي
؟, داحنا حالنا واقف و محتاجين دولارات ؟ لا مش زيهم , لا كنا زيهم ولا هنكون .
.
- يابني فّهمني
بس انت رافض ليه ؟
- بص يا عم الحاج
, مصر غير أي دولة في الدنيا , تاريخيا و جغرافيا غير , و مش كل تجربه نجحت في بلاد
أجنبيه ينفع نعملها عندنا , من كام سنه العيال شمامين الكوله كان من ضمن أهدافهم الثوريه
العبيطه إن وزير الدفاع المصري يبقى منصب مدني و ينفع يكون واحده ست و حبذا لو كانت
حامل !! عشان أصل وزيرة الدفاع كده في أسبانيا ولا ماعرفش فين , حاجه في منتهى التيت
يعني , و ريقنا نشف و احنا بنشرح لهم ان مصر مش زي أسبانيا , و النهارده شم الكوله
اتنقل للبرلمان , يا مولانا تاريخ البلد دي بيقول اننا بندخل في حروب أكتر ما بنستحمى
, و جالنا كيان صهيوني اتزرع جنب مننا , انا حتى ضد تمليك الأراض و العقارات لغير المصريين
إلا بقيود صارمه , و إلا في ظرف كام سنه هنلاقي تلتين البلد دي اتباع لليهود .
.
و من كام يوم برضه
شمام كوله عظيم ( بدرجة عالم ) كان بيسأل هو احنا بنشتري سلاح ليه ؟ هو ايه بيحصل في
البلد دي بالظبط ؟ هي الحكومه نزّلت الكوله على بطاقة التموين ؟!! .
.
بص يا مولانا من
الأخر , أي مواطن مصري عاقل و غيور على بلده هيبقى عنده 3 محرمات , 3 خطوط حمره , الجنسيه
المصريه , تمليك الأراض للأجانب , التفريط في السلاح , بعد كده كل شئ يهون , ناكل كافيار
و استاكوزا و جمبري جامبو , او ناكل عيش و جبنه قديمه و سريس , والله ما بتفرق معانا
.
.................................................................................................................
Mohamed
Hussein
2
أغسطس 2016·
لقيت عيل منهم
عندي في الصفحه , العيال دي اللي لسه لحد النهارده بيشيرو خبر ال 70 مليار دولار بتوع
مبارك و خبر ال 65 مليار دولار اللي هربو من مصر أخر شهرين ببصمة الصوت ( بحسب تصريحات
وزيرة الماليه السويسريه ) !! , العيال بتوع حزب الدستور اللي فيه 200 نفر , العيال
اللي معاهم دكتوراه في الحموريه و عاملين نفسهم مثقفين و سابقين كوكب الأرض بمليون
فدان , العيال بتوع ( يقرأ لمحمود درويش ) و ( يسمع لفيروز ) , مع ان درويش و فيروز
صنف عالي جدا , صنف لو بيشربه الحمار كان زمانه بقى جينتلمان .
.
يابني انتو عاله
على كوكب الأرض , عاله على أبجديات العقل البشري , عاله على كلمة وطن و كلمة ثوره
, اللي يصدق ان فيه مسئول سويسري ممكن يطلع تصريح زي ده و يفضح عملائه و يشوه سمعة
بلده اللي اقتصادها قايم بشكل كبير على استثمار أموال المودعين , اللي يصدق العبط ده
لا ينفع يحكم مصر ولا يشارك في حكمها ولا ياكل معانا في طبق واحد ولا تنفع له حتى شهادة
قدام المحكمه , انتو أخركو تتباسو و تتحطو جنب الحيط .
.......................................................................................................................
Mohamed
Hussein
1
أغسطس 2016·
إضحك مع الحكومه
الليبيه .
.
رئيس حكومة الوفاق
الوطني الليبيه طلب من الأمريكان إنهم يشنو هجمات على مواقع داعش الإرهابيه في مدينة
سرت , اه و الله زي ما بقول لكو كده , طلب من الأمريكان يضربو داعش !! , و طبعا الأمريكان
بتحارب الإرهاب و كده زي ما كلنا عارفين , و احتمال يعني و إذ ربما طياراتهم بدل ما
تضرب مواقع داعش ترمي سلاح و أكل و شنط دولارات ( بالغلط يا سيدي ) , سهوا , و جل من
لا يسهو .
.
و الأجمل في نهاية
تصريح ( حماده ) رئيس حكومة الوفاق الوطني الليبيه إنه بيقول : نرفض رفضا تاما و نهائيا
تدخل أي دوله في الشأن الليبي !! , اه و الله هو اللي قال , هنجيب طيران الأمريكان
و نرفض تدخل أي دوله , حليب قلبي معاليك .
.
بالنسبه للي كان
بيشرب سيجاره في البلكونه من 5 سنين و جاي يسأل حصل ايه في ليبيا ؟ هقولك , ليبيا نجح
فيها الربيع العربي , مبقاش فيها جيش ولا أسلحه , و الربيع العربي جاب حكومة ( حماده
) في طرابلس و داعش في الشرق بتحتل الأرض و طيران أمريكا من فوق بيحتل السما , كده
تبقى الثوره نجحت في ليبيا و جابت مجموع يدخلها طب و صيدله و هي حاطه رجل على رجل
.
.
لو ليبيا دي بقى
فيها عالم فذ و عظيم زي عصام حجي أكيد مكانشي هيسأل احنا بنشتري أسلحه ليه ؟ عشان باختصار
ليبيا مابتشتريش أسلحه , ليبيا باعت سلاحها بعد ما خربت و لما باعت سلاحها باعت البنطلون
معاه , أكيد ليبيا باعت السلاح و البنطلون عشان تعرف تصرف كويس عالتعليم و العلم و
العلماء و البحث العلمي , حتى اسألو حماده , أو اسألو عصام .
..................................................................................................................
Mohamed
Hussein
1
أغسطس 2016·
الواد اللي بقاله
شهور بيحاول بكل جهده يشوّه صورة مصر بره , و يبعت صور لمقالب الزباله و تقارير مترجمه
عشان السياحه تنضرب اكتر ماهي مضروبه , هو نفسه الواد اللي شاف المصريين بيروحو شرم
و الغردقه و يشجعو السياحه الداخليه قام مركّز في نشر صورهم تحت شعارات الشعب اللي
مش متحضر , و شوفو شرم حصل فيها ايه .
.
الواد ده مش صاحب
فكر ولا صاحب قضيه , ده صاحب مرض , و مش هيرتاح إلا لما يوصل للحظة الإنتصار العبيطه
الساذجه اللي بيحلم بيها , و هي إن البلد دي تتهد تماما و تتحرق و تبقى خرابه و أهله
كلهم يموتو و مايفضلش في مصر غيره , يقوم هو قاعد على كوم تراب طالع منه دخانه ( على
تلّها يعني ) و ماسك في إيديه سيجارة بانجو و يقول لنفسه أنا كان معايا حق و السيسي
فاشل , و بعدين و هو قاعد بيشرب سيجارة البانجو يلاقي 2 دواعش داخلين عليه , واحد فيهم
يقول الواد ده ناعم و ملامحه مسمسمه و عايزين ناخده في خيمة ( الغلمان ) و التاني يقول
لا لا ناخده للجهاد ضد الجيوش العربيه الكافره , و بما انهم دواعش ديموقراطيين و كيوت
هيسيبو له الإختيار , و أكيد اختياره معروف .
.................................................................................................................
Mohamed
Hussein
1
أغسطس 2016·
في فقه و عقيدة
الفيس بوك , 3 حاجات ممكن يخلّو صفحتك مشهوره جدا و الزباين بعشرات الألاف , و انت
تبقى أشهر من محمد رمضان في مسلسل الأسطوره , و أشهر من البناطيل الجينز المقطوعه و
من ساندوتشات الهامبورجر و أشهر من جون مجدي عبد الغني في كاس العالم .
.
1- تخلي صفحتك
مخصصه للخرافات بتاعة عباية سيدنا النبي و نعل سيدنا النبي و نضارة الشمس بتاعة سيدنا
النبي , و إلهي تتشك في معاميعك ياللي ما تعمل لايك و شير و بالمره تصلي على سيدنا
النبي , مع شوية تحابيش بقى زي البيضه اللي عليها لفظ الجلاله و الشجره اللي لقوها
في البرازيل بتسجد و بتتوضى من الترعه , و السمكه اللي لقوها في المكسيك و بيفتحو بطنها
ملقوش فيها حاجه .
.
2- تخلي صفحتك
مخصصه للسيكو سيكو , انزل بقى بصور عريانه , ركّز عالصدر و السمانه و الركبه ( عشان
التلاته دول بيعملو مع الرجاله شغل حلو ) , و خلي الأكاونت بإسم ريري التعبانه أوي
, سونه الهايجه , يعني إسم من اللي بينتزع أهات الشباب و الجماهير , مع رقم موبايل
و هئ و مئ و تخلص الليله بكام كارت شحن .
.
3- تخلي صفحتك
مخصصه لخلط العبط و السذاجه في إطار ثوري تحرري منفلوطي , يعني تفرش بماية لفت عالناصيه
و تقول انها ماية لفت ثورجيه مبروكه و سابقه المايه المعدنيه بمليون سنه ضوئيه , و
تشتم في أي حد و كل حاجه , و تحط أبو قرش على ابو قرشين و عيشه على أم الخير , يعني
باختصار تبقى محمود حجازي , و تكتب ان الدولار بقى ب 13 جنيه و السياحه نزلت لأقل معدل
لها في 20 سنه مع ان السيسي معاه كل مؤسسات الدوله و معاه المغول و المماليك و الفرنساويين
, يبقى ليه بقى ؟ .
.
بص يا حماده ,
الأسعار زادت عشان الدولار غلي , و الدولار غلي عشان السياحه انضربت ( و ليبيا كمان
) و السياحه انضربت عشان بلدك قصدي بلدنا في حالة حرب و لوي دراع متعمد , ماهو اكيد
السيسي ماصحاش من النوم و قال يا رجاله روحو اضربو الطياره الروسيه و اقتلو الشاب الايطالي
و اوقفو حال السياحه اللي بتمثل المصدر الأهم للعمله الصعبه , وفي اللحظه دي مابتنفعكشي
مؤسسات الدوله بحاجه , إلا إذا كنت بتقترح اننا نجيب وفود من وزارة البيئه مثلا و نلبسهم
برانيط بتاعة خواجات و نسمّيهم جاك و جاكي و ناتاشا , و نبعتهم شرم و الغردقه و نديهم
شوية دولارات يصرفوها عشان السياحه تنتعش !! .
.
في رأيي الشخصي
, اللي بيعملو صفحات ريري التعبانه و سونه الهايجه أشرف و أنضف ألف مره من بتوع عباية
سيدنا النبي و بتوع ماية اللفت .
.................................................................................................................
Mohamed
Hussein
1
أغسطس 2016·
العبيط بس هو اللي
يتخيل ان جميله اسماعيل و باسم يوسف مشتركين في حملة هيلاري كلينتون عشان هما مقتنعين
بفكرها و مشروعها الإنتخابي و حرفنتها السياسيه و كده , و إن نجاحها هيجيب لنا الخير
في مصر زكايب زكايب , و أصل داهون أحسن من دكهوا , و عشان كده احنا لازم ندعم داهون
عشان ينجح هو و ماينجحش دكهوا , نياهاهاهاها , يابني الشغلانه دي شغلانة فلوس مش اكتر
, دولارات , و شوية امتيازات و وعود مستقبليه .
.
يعني مثلا , نفتح
لك برنامج عندنا , نعتبرك واحد من القيادات الشبابيه و كل ما نبعت وزير لمصر نخليه
يقابلك و يتصور معاك سيلفي ( انت و خالد علي ) و تطلع لك بعزومه أوبن بوفيه , لو جالك
شوية مغص من أكلة دره مشوي نقلب عشانك الدنيا و نبعت تقرير مخصوص من أكبر مركز حقوق
انسان و نتهم السيسي بتعذيبك و اغتصابك انت و جيرانك , نلمّعك في جرايدنا و نسنفرك
, نخليك تكتب مقال في الواشنطن بوست ( بس حاول ماتسرقوش ) , نفتح لك كشك سجاير عالناصيه
في أكبر شارع فيكي يا واشنطن , و لو رضينا عنك أوي ممكن تبقى واحد من صبيانا في مصر
و تنزل أي انتخابات و ندعمك , لو سقطت ماتقلقش هنقول الانتخابات اتزورت و عندنا ألف
دليل يثبت انها اتزوت ( الأدله موجوده من دلوأتي لو تحب تشوفها ) .
.
أسف جدا أيها الشاب
العبيط الساذج , ألهتك العوالي ممكن يعملو نوم العازب و عجين الفلاحه عشان شوية فلوس
و امتيازات و وعود مستقبليه ( لما الأسياد يبقو راضيين عنهم ) , و ممكن تتأكد بنفسك
, اسألهم إيه علاقة المواطن المصري بأم الإنتخابات الأمريكيه أساسا ؟ و إمتى امريكا
جابت رئيس و اكتشفنا بعد كده انه كان مقطّع حُصر الجامع و حج بيت الله 400 مره ؟ إمتى
الحدّايه كانت بترمي لنا كتاكيت ؟ إمتى يعني متى ؟ يعني سنة كام حصل الكلام ده ؟ ,
فاسألوهم إن كانو ينطقون .
..........................................................................................................................
Mohamed
Hussein
31
يوليو 2016·
ماعتقدش فيه دوله
في الدنيا يلزمها تسليح حديث و متطور أكتر من مصر , مش بس بحكم العداوه التاريخيه مع
كيان صهيوني استعماري , ولا بس عشان المؤامره اللي طايحه في المنطقه و اللي حرقت جيوش
( كان لها شنه و رنه ) ولا بس عشان موضوع سد النهضه اللي ممكن نوصل في يوم يكون فيه
ان الخيار الوحيد المتاح هو الحل العسكري , ولا بس عشان المناوشات مع دول تخلت عن دبلوماسيتها
( و قلعت برقع الحيا ) زي تركيا و بريطانيا , إنما إجمالا عشان مصر أكتر دوله في تاريخ
البشريه دخلت في حروب , أغلب الحروب دي كانت دفاع عن ارضها , اكتر دوله اتعرضت لمحاولات
استعماريه , يعني الموضوع تاريخي و جغرافي و أزلي و قدر لا بد منه , و الإهم انه بيكون
إضطرار , يعني بنبقى مضطرين نحارب , مش غاويين ولا حاجه , يعني مابنصحاش من النوم نلاقي
نفسنا زهقانين و مش لاقيين حاجه نعملها فنقترح اننا نروح نحارب .
.
دكتور عصام حجي
العالم الشاب , لو ماقريتش تاريخ مصر ( مكانشي عندك وقت يعني ) مش مشكله , ممكن تبص
عالخريطه حوالينا , و لو قريت تاريخ مصر و بصيت عالخريطه و مافهمتش حاجه تبقى حمار
, و لو قريت و بصيت و فهمت و لسه بتسأل بنشتري سلاح ليه تبقى خاين , يعني قدامك اختيار
من اتنين , إما انك حمار أو خاين , أنا شخصيا بقيت مؤخرا أستبعد فرضية إنك حمار !!
.
...............................................................................................................
Mohamed
Hussein
31
يوليو 2016·
عن الفريق الرئاسي
بتاع عصام حجي
.
في حراسة المرمى
عصام حجي ( من أمريكا ) , خط الدفاع , باسم يوسف ( في حملة هيلاري كلينتون في أمريكا
) , وائل غنيم ( في أمريكا برضه...حملة هيلاري كلينتون ) , جميله اسماعيل ( في أمريكا
كمان ...حملة هيلاري كلينتون ) , خط الوسط , أيمن نور , محمد ناصر ( في بلاط الأغا
التركي ) , خط الهجوم , وجدي غنيم , عاصم عبد الماجد , احمد منصور ( في بلاط الأغا
القطري ) .
.
يعني باختصار فريق
أمريكي تركي قطري و عايز يترشح لرئاسة مصر !! , فكره مكاره و عبيطه بدرجة جيد جدا مع
مرتبة الشرف , مكاره و كأنها محاولة بائسه لعودة الخرفان للمشهد السياسي تحت اسم فريق
علمي بقى و بتاع أبحاث و كده ( حط لنا عصام حجي في الواجهه يابني ) , بعد ما فشلت حكاية
الفريق الثوري , و عبيطه عشان هي عبيطه و أذكى واحد في الفريق ده بيحمل درجة عبيط جدا
بما فيهم الكوتش كابتن هيلاري كلينتون , لو مش مصدقاني يا كوتش جرّبي , لا انتخابات
رئاسه ايه بس , انزلي بالفريق بتاعك انتخابات مجلس محلي مركز و مدينة بلبيس و لو طلعتي
في مركز قبل ال 17 يبقى أبو زيد خالك .
..........................................................................................................................
Mohamed
Hussein
30
يوليو 2016·
أردوغان هيقفل
الكليات العسكريه و يعمل مكانها جامعه للدفاع الوطني ( و فاسقيه تقريبا ) .
.
الترجمه بقى ,
كل اللي عمله أردوغان في الإسبوعين اللي فاتو و لحد النهارده ملهوش غير ترجمه واحده
, إن القرد التركي بيقضي تماما على فكرة الجيش النظامي , هيعمل ميليشيات من أنصاره
و خرفانه , حاجه شبه الحرس الثوري , و بالنسبه للي كان مستني يشوف الإخوان هيعملو ايه
لو استمرو في السلطه في مصر , ممكن حضرتك تشوف الإعاده دلوأتي في تركيا و اهو بالمرّه
تقرالها الفاتحه .
.......................................................................................................................
Mohamed
Hussein
30
يوليو 2016·
في العاده تحضُّر
الشعوب و قوة الأجهزه الامنيه في الدول مش بتتقاس في الوقت الطبيعي , يعني في وقت تكون
فيه الدنيا طراوه و الجو بيس , عايز تعرف مستوى تحضر الشعوب و قوة الأجهزه الأمنيه
للدول حطهم في وضع قاسي , وضع صعب , وضع انفلات أمني , حطهم في اختبار حقيقي .
.
يعني مثلا , أمريكا
, أظن مفيش بعد كده تحضّر ولا بعد كده أجهزه أمنيه , و كاميرات في كل مكان و ملايات
عالحيط و بحث جنائي و أقمار صناعيه و رادارت و بصمة صوت و بيعرفو الواحد من شكل سمّانة
رجليه , و حاجات عنب اللوز , تمام كده ؟
.
تخيل بقى أمريكا
مرّت بظروف زي اللي مرت بيها مصر بعد 2011 بكل الأبعاد و الحيثيات , يعني تخيل إن كندا
( دوله حدوديه ) حصل فيها انهيار تام و ترسانة الأسلحه بتاعتها اتنهبت و بقى بيحكمها
17 عصابه ( مبقاش فيه دوله ) , و المكسيك ( دوله حدوديه برضه ) اتقسمت نصين , شمال
المكسيك و جنوب المكسيك , و وزير الدفاع في دولة شمال المكسيك بيقول الطيار الفلاني
اخترق الأجواء بتاعتنا عشان كان طافي النور و الرادار بتاعنا ماعرفش يشوفه .
.
و تخيل فيه دوله
صغيره كده في شمال شرق أمريكا و أمريكا اتفحتت في حروب و قدمت ألاف الشهداء عشانها
و كان رد الجميل انهم يعملو أنفاق و يهربو منها السلاح و الإرهابيين لداخل أمريكا
.
.
و تخيل ان أمريكا
فيها خمسه سته مليون بني أدم تحت خط الفقر , و فيها عالأقل 500 ألف إرهابي تحت الطلب
, ملهمشي علاقه بإسم دولة أمريكا ولا يعترفو بعلم الدوله ولا حدودها , أعضاء في تنظيم
دولي , و فيها عشرات قول مئات من الحلنجيه اللي شغالين في مراكز حقوق الإنسان و حقوق
العصافير , اللي مرتباتهم بتجيلهم من دوله تانيه معاديه لأمريكا .
.
و تخيل بعد كل
ده ان حصلت ثوره في أمريكا في 2011 و حالة هياج شعبي و انفلات أمني و تخطيط جاي من
بره و تمويل و فلوس زي الرز , حاول تتخيل الصوره كامله , جوه البيت و بره البيت في
البلاد اللي حواليك , هه ؟ تخيلت ؟ قابل معازيمك بقى و قعّدهم , و ابقى سلّم لي على
تحضر الشعب الأمريكي و قوة أجهزته الأمنيه وقتها .
................................................................................................................
Mohamed
Hussein
30
يوليو 2016·
عصام حجي : احنا
بنشتري سلاح ليه ؟ .
.
أنا هقولك ليه
يا دكتور عصام ( بس حاول ماتزعلش ) , احنا بنشتري سلاح عشان نحمي زراعة الطماطم في
مصر , كل فدان أرض مزروع طماطم بنعيّن عليه دبابه و طياره رافال حراسه و المسترال بنعمل
لها قناية حوالين الأرض عشان تاخد جوله تأمينيه تفقديه , و كل قفصين طماطم لما بنيجي
ننقلهم من ميت غمر ل بنها بنحميهم بقارب صواريخ روسي و حته f16
, و لما نحمي زراعة الطماطم تقوم الطماطم تكتر في السوق و ترطرط و الكيلو منها يبقى
ببريزه و بالتالي ماتقومشي ثورات تاني ( عشان طبعا و حضرتك سيد العارفين الثورات بتقوم
لما الطماطم سعرها بيغلى ) , أظن كده الرساله وصلت ؟!! .... رساله بتقول خليك في شغلك
و النبي , ماهو أصله عادي إنك تبقى إنسان بيض , بس لما تكون إنسان بيض يبقى لازم ماتقعدش
في الشمس كتير , ليه بقى ؟ عشان البيض لما يتلطع في الشمس كتير بيوصل للمرحله دي ,
مرحلة إنه يسأل هو الجيش المصري محتاج يشتري سلاح ليه ؟ و في التوقيت ده تحديدا , التوقيت
اللي الدول فيه بتختفي و تدوب زي ( غزل البنات ) .
...............................................................................................................
Mohamed
Hussein
30
يوليو 2016·
الوطن العربي فيه
عدد كبير من الدول , مش عارف دلوأتي كام , هما كانو 22 من ييجي عشرين سنه ( أيوه خدتها
في أولى اعدادي انا فاكر في حصة الأبله أمينه ) , دلوأتي بقو 25 مثلا ؟ و بعد سنتين
يبقو 30 ؟ بس هو عدد الدول العربيه بيزيد ليه ؟ إذا كانت الدول لا بتبيض ولا بتولد
, تبقى الزياده جت منين ؟ أكيد بالتقسيم , يعني بالخراب , لا لا ماتصدقش ان فيه مؤامره
, صدق البرادعي , البرادعي أصدق أنباءً من كتاب الجغرافيا و كتاب المنطق و كتاب الجبر
, ربنا يجبر بخاطركو اللهم أمين .
.
المهم من بين ال
30 دوله عربيه ( قول 35 ) اللي هيترمو عالخريطه بعد كام سنه هتفضل جوانا محبه خاصه
لدولتين اتنين , حاجه كده ماتعرفش لها سبب , هما مش دول جوار , وأغلبنا مازارهمش ولا
مره , سبب المحبه ايه ؟ الله اعلم , جايز البعد التاريخي و الحضاري , جايز البعد الثقافي
, جايز الدولتين اللي بتحط عليهم أمل مع دولتك ( مع احترامنا لباقي الدول و اللامؤاخذه
الدويلات و الأكشاك ) , الدولتين هما باختصار العراق و سوريا , و للأسف الإتنين ندهتهم
النداهه الأمريكاني , إنما عشمان إن ولادهم هيتماسكو تاني و بلادهم هتعدّي من المعجنه
دي عالأقل من غير تقسيم , و إن جيوشهم هترجع تاني تتماسك و تحمي الأرض و العرض , و
يا سيدي خدها مني كلمة و نصيحه ( أبصم عليها بالعشره ) , ملعون أبوها الديموقراطيه
الأمريكاني .
...................................................................................................................
Mohamed
Hussein
29
يوليو 2016·
أمريكا .... حبي
الأول و الأخير و الوسطاني و الفوقاني و التحتاني و دكان الزلباني .
.
أوباما خد هيلاري
كلينتون حضن مطارات , يعني كداهو , و عم الحاج بيل مبسوط و راضي و مستكنيص , و إذ ربما
يكون أوباما مؤيد لكلينتون , و كلينتون بتتخانق مع ترامب خناقه و عاركه لرب السما
, وبيفرشو الملايات لبعض , هو يقول لها , يا بتاعة الشرق الأوسط ياللي خربتيها و قعدتي
على تلها , و هي تقوله يا عنصري يا فاشي يا بتاع الكراهيه و الحقد الدفين , ياللي قلبك
شبه قرن الخرّوب , و شوباش .
.
الحقيقه المسرحيه
الجميله دي مابقتش تأثر فيا , و هذا العبد لله الماثل أمامكم مؤمن تماما ب 3 حاجات
بس في الليله الأمريكاني دي
.
أولا : ان مفيش
حاجه اسمها ديموقراطيه في أمريكا , و الصناديق بتجيب زيد او عبيد حسب ما الأكابر يقولو
.
.
ثانيا : هيلاري
و ترامب مايفرقوش عن بعض , يعني زيد زي عبيد , لا الوش المسمسم اللي عليه صباح الخير
ولا الوش الخشب , كلهم ولاد تيت , و احنا في النهايه بتبقى مصائر شعوبنا زي ما النكته
الأبيحه بتقول : إما تتقتل و تموت و إما هونجا , و في الغالب بيبقى القرار ( هونجا
حتى الموت ) .
.
ثالثا : لشمامين
الكوله اللي نفسهم اتقطع من شمها بإسم الثورات و الحبشتكانات , زعيمتكم المناضله اللي
نضالها طرطش في كل حته جميله اسماعيل ماتفرقش كتير عن زعيمكم المناضل أيمن نور , و
الإتنين أخرهم زي مانتو شايفين , واحد شغال ضمن الجواري ( و الغلمان) في بلاط الأغا
التركي و التانيه شغاله كومبارس صامت في حملة هيلاري كلينتون , يعني بتشيل لها الهدوم
و الفوطه , و زعيمكم الثورجي العبقري باسم يوسف شغال حاليا أراجوز في الانتخابات الأمريكيه
, و ممكن يعمل نوم العازب و عجين الفلاحه عشان شوية دولارات من سته و تاج راسه هيلاري
كلينتون .
.
يا ترى لما الأشكال
دي ترجع مصر هتقابلوهم بالهتاف و تشيلوهم على كتافكو و ترسمو على بيوتهم جمل و نخله
و طياره زي اللي راجع من الحجاز ؟ ولّا هتضربوهم بالجزمه ؟!
.................................................................................................................
Mohamed
Hussein
29
يوليو 2016·
و يحدث إن أردوغان
ينشغل في المعجنه اللي عنده ( في تركيا ) تقوم حلب تتحرر من قبضة الإرهابيين ( في سوريا
) و يقوم مذيع الجزيره معيّط عالهوا ( في قطر ) !! .
.
لو لسه لحد النهارده
فاهم ان الحكايه ثورات شعوب ضد أنظمه فاسده تبقى انت عار عالبشريه و عاله على كوكب
الأرض و كان خساره فيك صباع الطباشير اللي اتعلّمت بيه و انت صغير .
..........................................................................................................................
Mohamed
Hussein
29
يوليو 2016·
الأشكال اللي زي
البغدادي و الزرقاوي و البنهاوي و البهنساوي , الأشكال اللي بتدبح الأطفال و بتدبح
الجنود و تلعب براسهم كوره , الأشكال اللي بنسمع عنها دلوأتي و نتفرج عليها كأننا بنتفرج
على فيلم رعب 3D , بس و احنا بعيد , يعني بنتفرج في شاشه كبيره
و احنا قاعدين في التكييف و قدامنا طبق التسالي , الأشكال دي كانت بتحكم مصر لمدة سنه
و لو كنا صبرنا شويه كنا شوفنا فيلم الرعب ده في شوارعنا و حوارينا , مش في شاشات التلفزيون
, الأشكال دي حكمت مصر بسبب بلال فضل و يسري فوده و علاء الأسواني و كل الصيّع أبطال
معركة اللمون , اللي بيتصورو دايما و هما ساندين راسهم على صباعين من ايديهم , قال
يعني بيفكرو و كده , مفكرين بقى , و متعمقين جدا و متوغلين في الفكر الجوّاني ( و بحبك
في البُعْد الباعد ) , الصيّع اللي سابقين كوكب الأرض بمليون سنه ضوئيه , النخبجيه
اللي أخرهم يسرحو بعربية بطاطا .
......................................................................................................................
Mohamed
Hussein
29
يوليو 2016·
حبيبتي يا غاليه
.
أمي مربّيه شوية
فراخ حلوين في حتة أرض فاضيه جنب بيتنا اللي في البلد , و كل ماروح لها تدّيني و انا
راجع كام فرخه مدبوحين و متنضفين ( مارجعش بإيدي فاضيه أبدا ) , و تحسب بالظبط 3 ساعات
و تتصل بيا , و قبل ما تتطمن اني وصلت بالسلامه تتطمن إني شيلت الفراخ من شنطة العربيه
و حطيتها في الفريزر .
.
الفراخ البلدي
عند أمي أهميتها من أهمية القنابل النوويه عند فلاديمير بوتين .
...........................................................................................................................
ليست هناك تعليقات:
إرسال تعليق