Mohamed Hussein
24 أبريل
الأزهر فقط يمثّلني كمسلم
.
وجدي غنيم في فيديو أخير له بيسب السيسي وانصاره اللي هما بتاع 50 مليون مصري بأبشع الألفاظ , الفيديو ده ظهر بعد فتوى ياسر برهامي اللذيذه بتاعة الإغتصاب , الأولاني شيخ إخوانجي كبير والتاني شيخ سلفي كبير , وفيه شباب من أنصار الإخوان فاهمين ان وجدي غنيم أعلم أهل الأرض وناس من شباب السلفيين شايفين إن ياسر برهامي أعلم أهل الأرض , وانا رأيي إن الإتنين أزبل من بعض , وللأمانه مش عارف مين فيهم أزبل من التاني , عشان كده وعشان ابقى ( فير ) يعني بقترح نعمل مباراه نهائيه بينهم في الوقاحه والسفاله , لقاء السحاب , واللي يفوز ياخد لقب ( أزبل أهل الأرض ) , مباراه تحت عنوان ( صراع في الزريبه ) !!.
.
ولما يكونو الإتنين دول اسمهم مشايخ و صيتهم مسمّع في أخر الدنيا , يبقى المفروض مؤسسة نوبل تستحدث جايزه جديده للمصريين اللي لسه ماكفروش ولا ألحدو لحد دلوأتي , أنا هاخدها أول واحد .
Mohamed Hussein
25 أبريل
سؤال عميق اوي جه على بالي , ليه كل مابتفرج على شقه نص تشطيب , والاقي صورها نازله عالنت , بشوف في الصور محاره وحلوق وواحد مشخبط عالحيطه بتاعة الرسبشن بطباشيره وكاتب ( للذكرى الأبديه , حسن بيحب نوسه , ورسمة قلب و سهم مثلا ؟ ) , شقق دي ولا حمامات رمسيس العمومي ؟ يكونشي الشخبطه بالطباشير على حيطة الرسبشن هي مرحلة من مراحل تشطيب الشقه ؟ , يعني البايع يقولك دي نص تشطيب يا باشا يعني محاره وحلوق بيبان ووصلات كهربا وسهم و حسن بيحب نوسه !!.
Mohamed Hussein
25 أبريل
هي لله
.
و هو هو ياسر برهامي بتاع فتوى الإغتصاب هو اللي أفتى من كام شهر إن المسلم من حقه يتجوز قبطيه بس يبغضها في الله ويعاشرها كأنه بيغتصبها !!.
.
تعالو بقى على جنب وانا هشرح لكو الليله دي في كام سطر , أه نسيت , لو كنت حضرتك من الناس اللي عندهم هسهس بتاع مشايخنا وعلماء الأمه ولحمتهم مسمومه يبقى خليك في الجنب التاني وانا هنادي عليك لما اخلص , يعني في فقرة الأوبن بوفيه ( رز بلبن ) .
.
بقى يا سيدي فتاوى ياسر برهامي وأمثاله لا ترتكز على قاعده دينيه ولا قاعده فقهيه ولا قاعدة فيثاغورث ولا حتى قاعدة المصطبه , كل الحكايه وما فيها إنهم بيرتكزو على النظره الدونيه للمرأه , جواهم اعتقاد إن ربنا خلق الذكر عشان يستمتع بالأنثى وبالتالي يبقى دور الأنثى في الحياه إنها تمتّع الدكر ولا مؤاخذه .
.
هبسطهالك , راجع فتاويهم هتلاقي 17 نوع من الجواز وكل نوع فيه أوفة مشايخ منهم بيقولو حلال , رسمي بقى على عرفي على مسيار على متعه على مصياف على عفريت أزرق , أهم حاجه الدكر يستمتع , هبسطهالك اكتر , في فتوى الإغتصاب هتلاقي الركيزه بتقول إن اللي بتغتصب دي هي مجرد زوجه من 4 ربنا أحلهم لك , وطبعا بعد ما تسيبها تٌغتصب مش هتبقى طايق تلمسها وأكيد أكيد هتطلقها عشان الفاجره ماقدرتش تحافظ على شرفها !! , وتاني يوم تتجوز غيرها , واحده جديده لانج بالكرتونه , ولو اتعرضت هي كمان للإغتصاب طلقها يا جدع , وارميها وشوف غيرها , تاني يوم أجوزك بنت مزه كده 18 سنه , شامورت يعني , تطلع الرطوبه من جتتك , أصلك مش واخد بالك , الراجل ممكن يتجوز تاني يوم بعد ما يطلق أصل مالهوش عده , وانا كنت خايف لا يشيلو العده مع إني ماعنديش عده .
.
وبما إني واحد من الحمقى والغوغاء وعامة الشعب , لا انا عالم من علماء الأمه ولا لحمتي مسمومه فانا متضامن تماما مع المرأه ضد هذا العبث البرهامي , متضامن مع المرأه الإنسان , الأم والأخت والصديقه , المرأه بغض النظر عن لونها وجنسيتها وديانتها , متضامن مع المرأه الكموديه والمرأه القبطيه والمرأه السمراء , وبما إني متضامن معاهم ( معهن ) فكان لازم اسأل فضيلة الشيخ الجليل ياسر برهامي سؤال من باب رد الإعتبار : يا شيخهم , ماذا تفعل الزوجه إذا شاهدت زوجها يُغتصب أمام عينها ؟ يتهيألي إنت غالبا أفضل واحد يفتينا في السؤال ده .
.
الخلاصه بقى , أصعب اغتصاب في الدنيا هو اغتصاب العقول , وانت مُغتصَب يا شيخ ياسر , your brain is not virgin .
Mohamed Hussein
25 أبريل · تم التعديل
توب علينا يا رب من زباين يوم الجمعه
.
هو : عندك فيفادول شراب ؟
أنا : أيوه...اتفضل
.
هو : هذا للحراره ؟
أنا : بالظبط للحراره
.
هو : بنتي عندها حراره واسهال ومغص وتطريش ( ترجيع )
أنا : ألف سلامه عليها , لازم توديها المستشفى لازم دكتور يشوفها
.
هو : لا مافي داعي للمستشفى , بيكفي فيفادول
أنا : فيفادول هيعالج الحراره بس
.
هو : لأ وبيريّح الإسهال والمغص والتطريش
أنا : طيب انت أدرى .
.
هو ( بيدفع ال 8 ريال ) : بيكفي الفيفادول صحيح ؟
أنا : بيكفي جدا
.
هو : يعني بيريح الإسهال والمغص والتطريش اللي عند البنت ؟
أنا : طبعا , وبيعالج البواسير وحب الشباب والضعف الجنسي , وبيجوز العازب ويفك السحر و بيعوم في البحر والبر والجو .
.
هو : إيش ؟
أنا : لا ماتخدش في بالك , اتفضل ريالين باقي , ألف سلامه عليك .
.
.
أمي قالت لي مثل زمان ( لو نصحت صاحبك من الصبح للعصر وماتنصحش , كمّله بقية اليوم فساد ) .
Mohamed Hussein
26 أبريل
خالد versus حمدين
.
.
اليوم السابع بتاع خالد صلاح ناشر تصريح لحمدين بيقول فيه انه هيحاكم السيسي لو بقى رئيس !!.
.
يعني الحكايه خالد صلاح versus حمدين ؟! , رأيي الشخصي إن التصريح لا يعيب حمدين صباحي , يعني مش مشكله خالص لما يقول هحاكم السيسي وهحط السيخ المحمي في صرصور ودنه , عادي مفهاش حاجه , ده شغل انتخابات ومرشحين رئاسه ممكن أتفهمه , أي مرشح رئاسه من حقه يهلفط بالكلام شويتين في فترة الدعايه الإنتخابيه , وطبعا لكل مقامٍ مقال , يعني لما تقعد مع شوية ناس غلابه تقول لهم هعمل لكو البحر طحيه وهدخل جاكوزي في كل بيت في قرى مصر , ولما تقعد مع شوية عيال ثورجيه تقول هحاكم السيسي ومبارك وشجرة الدر , ولما تقعد مع نادر بكار وحزب النور تضرب الدقن التمام والزبيبه وتمسك السبحه في ايدك وبارك الله فيك يا أخي الكريم .
خالد صلاح هو محمد حسان بتاع الليبراليين , يعني واحد من الأكلين على كل الموائد , وانا مش لاقي أي منطق أو مبرر من أنصار السيسي لتشويه حمدين بالشكل ده , شعبية السيسي مايلزمهاش الكلام ده والأمور محسومه تماما بالصناديق , يا ساده احتفظو ببعض الإحترام لحمدين صباحي , لان دوره الحالي محترم جدا , ومهم أوي يكون عندنا معارضه قويه لو كنا عايزين بلد واقفه على رجلين مش رجل واحده .
.
بالمناسبه حمدين مش عيل صغير وعارف كويس أوي إنه يوم ما يفكر يحاكم السيسي لازم يحاكم قبل منه 30 مليون مصري عملو له تفويض في الثوره وتفويض في محاربة إرهاب الإخوان .
Mohamed Hussein
26 أبريل
أقصى تفاعل على بوست ليا كان 250 لايك و 100 شير مثلا !! , 250 لايك يعملو إيه في الزمن المهبب ده ؟ دانا حرمت نفسي من العشا عشان تستعشو , إنت ياض ياللي هناك , أيوه ياخويا انت , كل مره تعدّي عالبوست وتقعد تقلّب في البضاعه وعمرك ما عملت لايك , العيشه بقت نار , 250 لايك هيكفو مصاريف مدارس ولا اكل وشرب وفواتير كهربا ونت وتليفونات , شوفو الحديد النهارده بكام وكيلو اللحمه بكام ؟ مراتي قالت لي كيلو اللحمه في كارفور المعادي ب 95 جنيه , أيوه ماهي كانت بتعمل سيرش عن اللحمه عالنت , وبما إننا نازلين مصر خلاص فهنبقى نعرف أخبار اللحمه من عالنت ونشوف صورتها كمان , ربنا يسمّعنا عنها سمع خير , أنا بقول أوّل مانزل مصر أشتري نص كيلو لحمه بلدي واتصور جنبه وانزل صورته عالفيس بوك , واحضنه حضن مطارات واقول له مع السلامه يا صاحبي , محدش عارف الوشوش هتتقابل ولا لأ .
Mohamed Hussein
26 أبريل ·
و هتلاقي صاحبك البرادعاوي يقولك ( لو حمدين انسحب من مسرحية انتخابات الرئاسه احنا هنجيبه رئيس !! , واخدلي بالك من ( إحنا ) دي يا حاج محمد ؟! ) , نفس فكرة مصطفى لا مؤاخذه النجار , إحنا هنجيب فلان رئيس وفلان نائب ونعينّ فلان واتصلنا بفلان وكلمنا البت فلانه دي شاطره ولهلوبه , انتو مين يا عم الحاج ؟ إحنا مين يا عم اسماعين ؟! .
.
بفطس أنا بقى على روحي من الضحك , بحس إني واقف قدام واحد عنده عربية فيات 127 حمره موديل 78 و مصّر يدخل بيها رالي السيارات قدام الفيراري , و تحس انه واثق أوي من الفوز , كل ده عشان عنده في ال 127 دبدوب صغير حاطه في التابلوه وكلب لولو تحت الإزاز الوراني , أه بالظبط زي البنات الكيوت بتوع الرحاب والتجمع الخامس .
الحكايه مش غرور ولا تعالي , ولا انا تبع حد أساسا , إنما اللي ليه جوز عيون بيشوف واللي مايشوفشي من الغربال يبقى أعمى أو ناشط سياسي , والحقيقه بتقول إن أنصار السيسي كتير اوي وقادرين عالسباق و انصار حمدين كتير وقادرين عالسباق , أما أنصار البرادعي حاليا , ف مممممممممممممممممم عندهم دبدوب وكلب لولو في العربيه ال 127 !!.
.
باختصار يعني , صاحبك البرادعاوي اللي شايف إن ال 30 ألف واحد اللي بيأيدو البرادعي حاليا هيقدرو يغيرو خريطة السياسه المصريه وشكل الكره الأرضيه والتوازن البيئي في غابات السافانا , و هيقدرو يجيبو و يحطو و يشيلو و يرفعو مايختلفش كتير عن الإخوانجي اللي بيبقى قاعد في مندرة بيتهم في البلد بالجلابيه البيضا وبنطلون الترنج والشبشب البلاستيك و بيحلم بأستاذية العالم .
Mohamed Hussein
26 أبريل
العامل بييجي مره في الأسبوع يمسح الصيدليه , بقى عندي كمية نمل وناموس صغير زي الفل , بنتعايش سوا عادي , وحشرات تانيه كده صغيره وغريبه , ناموسه دي ولا نملايه ؟ شبه النملايه بس بتطير , يعني تكونشي نملايه وعامله نفسها ناموسه ؟ ..و لما بسيب اللاب شويه باجي ألاقي ناموس صغير واقف عالزراير , هش , هش , هش يلعن أبوكي , قصدي يلعن السيد باباكي لا تكوني بنت ناس ومن عيله ولا حاجه .
بالك إنت لو جيت قعدت معايا شويه في الصيدليه دي ممكن أشرح لك درس عملي عن دورة تكاثر حشرة الدروسوفيلا و موقف خالد على من انتخابات الرئاسه !!.
Mohamed Hussein
26 أبريل ·
و كل ماقول لواحد هنا إني نازل نهائي يقولي لأ لأ لأ , إوعى تعمل كده إوعى تغلط الغلطه دي , مممممم بيحسسوني إننا قطيع من الفيله وقرر فجأه السفر لمنطقه تندر فيها المراعي والكلأ !! , مش بني أدمين متغربين وقررو الرجوع لبلدهم .
على فكره لما سافرت من مصر ماكنتش سايبها سويسرا , ولا سافرت وانا زهقان من دلدلة رجليا في الجاكوزي , مانا عارفها وحافظها بناموسها وشوارعها ومطباتها و بلاعتها , وبحبها زي ماهي كده بطينها وعبلها .
قطيعه تقطع المروحه والكاسيت أبو روحين والقلمين الفرنساوي وعلبة السجاير المارلوبورو الأحمر اللي بيتحطو في جيب الجلابيه البيضا .
Mohamed Hussein
27 أبريل
ياسر برهامي في أحدث فتاويه + 18: تجرد الزوجين من ملابسهم أثناء العلاقه الزوجيه يبطل عقد الزواج و فيه تشبه بالكفار !! .
مممممممممممم يعني المصريين كلهم كده طالق بالتلاته , وانا اقول البلد دي حالها مش بيتصلح ليه ؟ أتاري عشان الشعب عايش في الحرام .
.
ياسر برهامي يستحق بلا منازع لقب السوبكي بتاع السلفيين أو حتى لقب الريس برايز بتاع حزب النور .
Mohamed Hussein
27 أبريل
صورة عبد الفتاح السيسي مع شوبير ومرتضى منصور بعد ما صالحهم استفزتني جدا , يا عم عبفتاح احنا عايزين رئيس دوله مش شيخ عرب .
و بعدين يعني إنت مالقتشي غير الإتنين دول وتصالحهم على بعض ؟ أديك وسّخت إيديك الإتنين , و قابل بقى يا حاج , قابل معازيمك وقعّدهم , هتشوف تريقه للركب .......... بتحطو نفسكو في مواقف بايخخخخخخخخه .
Mohamed Hussein
27 أبريل
طول عمري بكره في شغلتي دي التعامل مع ( الكوزموتيكس ) , مستحضرات التجميل يعني , والشامبوهات و هاش ولا جاش , بحب التعامل مع الأدويه وبحترمها جدا , إنما في الكوزموتيك و الميش ماتلاقينيش .
وغالبا كده لو ربنا أراد وسيبت أم الشغلانه دي هيبقى بسبب الكوزموتيك وزباينها , ضيّعت سنين كتير من عمري في انتظار شامبو هيد اند شولدرز اتنين في واحد عشان الزباين بتسأل عليه , وماعرفشي والله الفرق بي سويت ازالة الشعر الفلانيه والعلانيه , و عهد الله ماعرف يا ستي , وانا لو اعرف هخبي ليه يعني ؟ وصبغة الشعر تستخدميها إزاي ؟ اسألي أم غاده الكوافيره , أنا كاتب رقمها على إزاز الصيدليه مخصوص أما بقى الشامبو اللي بيمنع تساقط الشعر وبيطوله وينعّمه فده تلاقيه في الصيدليه اللي جنبنا , هو و بيضة الكتكوت أبو 7 رجول !!.
Mohamed Hussein
27 أبريل
من وانا صغير أد كده وانا رأسمالي كُحت , و من عيله أرستقراطيه عريقه , عشان كده تلاقيني بشجع الرأسماليه المتوحشه , و متعاطف جدا مع الأرستقراطيين والرأسماليين اللي حقهم مهضوم في البلد دي , فاكر لما كان عمري 7 سنين , كنت بزهق من البانيو والجاكوزي وانزل استحمى في الترعه جنباً إلى جنب مع البلهاريسيا !!.
Mohamed Hussein
27 أبريل
يتهيألي بعد اللي شوفناه في السنتين تلاته اللي فاتو دول من حرق وقتل وتخريب وانفلات أمني و تثبيت للناس عالطرق بالألي , و مظاهرات وثورات ومناقشات وحوارات وحبشتكانات وانتخابات وصداااااااع زي السهم له أول ومالوش أخر , لو حد في الجيل بتاعنا ده سمع في يوم من الأيام إن وباء الطاعون وصل بلاد جنبنا وقرّب من حدود مصر هيضحك بسخريه ( هه ) ويقول الطاعون ده العيال الشبّيحه عندنا بيستخدموه مزيل عرق .
ولو أمريكا اتهفت في عقلها وقررت ترمي قنبله ذريه على مصر هتلاقي راجل ومراته ماشيين في الشارع كده والزوجه بتسأل زوجها : إيه اللي مرمي هناك ده يا حبيبي ؟ هيبص الزوج ويقول لها : أه دي تقريبا قنبله ذريه و هتنفجر بعد شويه يا حياتي , وهي تقول له : الله , من زمان وانا كان نفسي اشوف قنبله ذريه , ممكن تصوّرني جنبها عشان انزل صورتها عالفيس بوك واغيظ صاحباتي ؟!!.
Mohamed Hussein
28 أبريل
حظر نشاط حركة 6 لا مؤاخذه إبريل , ياااااااااااه أخيرا , اللهم لك الحمد , كده مش باقي غير إنهم يصادرو أفلام السبكي و يعتقلوه هو و ياسر برهامي وتبقى اتعشت و جبرنا .
.
واحد يسألني و يقولي يا كابتن لطيف , أومال قيادات حركة 6 ابريل هيشتغلو إيه بعد ماتحظر نشاط الحركه ؟ مممممممممم والله يابني ماعرف , بس كل اللي أعرفه وكتبت عنه زمان , إن سوسو الرقاصه كانت في كباريه النجوم بتشتغل و تعرق , و بعدين صاحب الكباريه مات والورثه اختلفوو و قررو في النهايه إنهم يبنو بدل الكباريه برج كبير وفاسقيه و يعملو كولدير مايه كبير , صدقه جاريه على روح المرحوم , فقامت سوسو الرقاصه تاني يوم راحت اشتغلت في كباريه الورده الحمره ( بتشتغل وتعرق ) , ولما حصل حريق في كباريه الورده الحمره , سوسو راحت كباريه ( المزاج العالي ) و برضه بتشتغل وتعرق ..... عايز أقولك يعني باختصار , ماتشغلش بالك إنت , الرقاصه مابتغلبش !!.
Mohamed Hussein
28 أبريل
بالمناسبه يا شباب , وانا صغير 7 سنين كده , كنت بسرح بالغنم مع جدي حسين الله يرحمه , علّمني الامانه , كنا بننزل الغنم في أرض دره مثلا بعد ما يكون صاحبها قطّع العيدان ولم الكيزان والأرض فاضيه بس لو لقينا كوز دره منسي كنا بنرجعه لصاحب الأرض , و لما كان عمري 10 سنين لقيت فلوس في الشارع , مبلغ كبير حوالي 300 جنيه , كان كبير أوي أياميها , روحت إديتهم لراجل كبير كان واقف بعيد وقلت له يا عم أنا لقيت الفلوس دي ومش عارف هي بتاعة مين !!.
كده الماضي بتاعي زي الفل أهو , منتهى الأمانه , إيه رأيكو بقى أنا عايز أعمل حزب سياسي أو حركه سياسيه , ولو عكّيت الدنيا وخدت تمويل ولا خدت عفريت أزرق محدش يحاسبني , أنا نبهت عليكو أهو , أومال الماضي بتاعي بيعمل إيه ؟ ماهو لازم يشفع لي !! .
اللي عايز يعرف عن قيادات حركة 6 ابريل وقيادات ألتراس أهلاوي قبل مايتحمق بقى بشعارات ثورجيه يقولي كانو فين أيام حكم الإخوان ؟ دوّر كويس وانت تعرف كانو فين ؟
و إذا كان الماضي بتاعهم النضيف يشفع لهم في وساخات مستقبليه فانا أولى من الغريب , بالمناسبه مبارك بدأ حكمه زي الفل أول 10 سنين , المفروض الماضي بتاعه يشفع له بقى في نهب البلد وتجريفها , ولو دوّرتو في تاريخ ريا وسكينه مش بعيد تلاقو لهم حاجه حلوه عملوها وهما صغيرين , أنا حاسس إني بكلم أموات .
Mohamed Hussein
28 أبريل
تررن تررن تررن تررن
.
عندي تحفظات كتير على شغل القضاه في مصر , إنما ده مايمنعشي من اعتقادي إن المشكله الأكبر في التقاضي بصفه عامه بتبقى عند بتوع النيابه والبحث الجنائي والمحامين طبعا , حكاية اللعب في الأحراز والمستندات والبحث في ثغرات القانون , وفي النهايه القضيه بتوصل للقاضي متستفه بشكل معين وفي اتجاه معين , يعني من الأخر بتوصل له ممصوصه وممضوغه تماما .... قضايا مبارك هي اكبر دليل على كده , والقاضي بيلاقي قدامه ورق فلوسكاب فاضي وفي النهايه مضطر يحكم بالورق .
.
مش عارف أقتنع أنا بحكاية تسييس أحكام القضاء دي , يعني حضرتك عايز تقولي إن مصر فيها 10 ألاف قاضي وكل يوم الصبح , الساعه 7 , سبعه سبعه ونص يعني , يوصل لمكتب عبد الفتاح السيسي ( اللي هو مش رئيس ولا حتى وزير حاليا ) 10 ألاف مكالمة تليفون , تررن تررن تررن تررن , ألو , مكتب المشير السيسي , أيوه مين حضرتك ؟ أنا المستشار أحمد البحبحاني , أهلا وعايز ايه ؟ يافندم عندي قضيه النهارده فيها متهمين من الإخوان , أه مممممممممممممم طب اديلهم إعدام , إعدام كتير يافندم طب نمشيها 17 سنه سجن ؟ إنت هتفاصل معايا يا سيادة المستشار , إنت نسيت نفسك ولا إيه ؟ لا يا فندم مستحيل , حاضر هنديهم إعدام .
.
تررن تررن تررن تررن , مكتب المشير السيسي , أيوه أنا المشير مين معايا ؟ أنا المستشار إبراهيم البحبحاني , يا فندم عندي قضيه النهارده وفيها حركة 6 ابريل , ممممممممممم أه اعمل لهم حظر العيال دول أنا أصلا مش بحب شكلهم , بس يافندم الأحكام مش بنصدرها بالحب والكره , إنت هتتناقش معايا يافندي وهتعلمني ؟ هات اسمك واسم المحكمه اللي انت شغال فيها , لا خلاص خلاص يا فندم نعملهم حظر حاضر .
.
تررن تررن تررن تررن , مكتب المشير السيسي , أيوه انا المشير زفت , أنا المستشار عبد السلام البحبحاني , كان عندنا قضية لواحد من الفلول , احكم فيها بإيه سيادتك ؟ لا طالما فلول اديله براءه , براءه ازاي يا فندم ده سارق ملايين وفيه مستندات , انت بتعارضني يافندي انت ؟ قلتلك براءه يعني براءه , تحت أمرك يافندم
.
تررن تررن تررن تررن , تررن تررن تررن تررن , يا رفاعي يا رفاعي , تعالي رد على بقية القضاه انا دماغي صدعت , قول لهم المشير السيسي بيقول لكو تخربو بيت العيال بتوع 6 ابريل والتراس والإخوان وتطلعو الباقي براءه !!.
.
للأسف الشديد , للأسف , أنا مش مقتنع بحكاية تررن تررن دي , إنما لو حضرتك مقتنع إيتس أوكيه , مفيش مشكله , بس مكانك مش هنا , البنك الأهلي هيوفرلك مكان أمن في صفحة الحريه والعداله وشبكة رصد , وهناك تقدر تتكرع وتكتب قناعاتك براحتك .
Mohamed Hussein
28 أبريل
ولو حضرتك مش عاجبك حكم القاضي وشايفه أوفر أوي , بسيطه خالص ممن تحط صورته على صفحتك و تلعن جدود أهله , مع إن لا انا ولا انت بنفهم في القضاء والإستئناف والليله دي , إنما ماشي , إعمل حفله عالقاضي مايجراش حاجه , لكن قولي بقى عشان أنا فهمي على أدي , قاضي أصدر حكم قضاء بتلعن جدود أبو السيسي ليه ؟!.
طب لو المتهمين دول خدو براءه في الإستئناف أو أحكام مخففه تماما هتحط صورة البرادعي وتشكره على الحكم ولا هتحط صورة القاضي اللي انت لعنت جدود أهله ؟! أكيد مش هتحط صورة السيسي !!.
Mohamed Hussein
28 أبريل
خلف خلفالله خِلف خلاف المحامي
.
ومن عجائب القدر في المشهد المصري إنك هتلاقي عقل صاحبك الكولّجي مايختلفشي ذرّه عن عقل صاحبك الإخوانجي , الإتنين بيؤمنو تماما بالحاجه وعكسها .
.
الإخوانجي مؤمن إن الجماعه اللي بتقتل وتحرق وتكدب وتنصب عايزه تطبق شرع ربنا وتقيم دولة الخلافه الإسلاميه .
والكولجي مؤمن تماما إن أحكام القضاء مسيسه وإن السيسي إدى تعليماته للقضاه بإعدام بلطجية الإخوان بما فيهم المرشد العام وهو هو نفس الكولجي اللي بينشر كل يوم على صفحته إن السيسي هيتصالح مع الإخوان وبيدعو للمصالحه معاهم , يعني عايز يعدمهم بس عايز يتصالح معاهم , إنما لأ إنما أه , أنا مش عاجبني أنا مش عارفني أنا توهت مني .
Mohamed Hussein
29 أبريل
طب يعني ياسر برهامي مايرزعناش فتوى كده عن العلاقه بين أمريكا ومراكز حقوق الإنسان ومنظمات المجتمع المدني في مصر ؟ يقول لنا العلاقه دي حرام ولا حلال ولا يجوز ؟ ولو كانت بالهدوم يبقى الوضع ايه ولو من غير يبقى الوضع ايه ؟ وما حكم الدين في استخدام امريكا ليدها في مداعبة بعض النشطاء السياسيين في مصر ؟ الفتوى دي مستنيها من ياسر برهامي من زمان , باعتباره متخصص و فقيه و ضليع في الفتاوي البورنو .
Mohamed Hussein
29 أبريل
صوتي ليك
مش عشان لمسة جمالك
أو عشان نظرة عنيك
.
الغلابه في بلدي ياما
اللي قطر الجوع قاطرهم
وامّا تنجح بالسلامه
افتكرهم
هما ناسها أولى بيها
و أولى بيك
صوتي ليك .
.
بس حاذر م الديابه
اللي ساكنين القصور
والديابه الصنف تاني
اللي ماليين الجحور
إوعى يوم هتمدّ إيدك
يقطعوها
دول باعونا ألف مره
وان صبرنا كانو بالتأكيد باعوها
خلِّي نبض الناس شريكك
في الشوارع والحواري
لو في يوم محتاج شريك
صوتي ليك .
.
.
محمد حسين
.jpg)
Mohamed Hussein
29 أبريل
شوف حضرتك الحكايه سهله خالص , إنت تلبس بدله وكرافته ... كويس ؟ و تتصور بيها .....كويس ؟ , وتنزل صورتك عالفيس ... هارش ؟ وكل ماتدخل تعلق على اي بوست هات كلمة الذكاء في جمله مفيده , الكلمه وعكسها طبعا.... هارش ؟ مفيش مانع تخبط كلمتين من المقعرين زي مثلا ( كيف يتأتى له ؟ ... من الأهميه بمكان أن نفعل كذا.... ولو اتزنقت أوي قول تخرصات , أهي شغاله برضه ولها زبونها ) ....هارش ؟ , كده باقي لك خطوه أخيره ويكتمل تحميل الناشط السياسي اللي مجابتهوش ولاده , إنك تكتب على بروفايلك المهنه صحفي أو كاتب صحفي أو كاتب سياسي أو عضو جمعية الأعضاء ورئيس جمعية الرؤساء المنبثقه من اللجنه العليا لأي حاجه , هات ايدك يابني , ألف ألف مبروك , إنت كده نجحت , إلهي يارب أعيش لحد ماشوفك واخد جايزة نوبل للسلام زي توكل كرمان , هي كمان واخده , مش واخده ست , لا واخده , واخده الجايزه يعني .
Mohamed Hussein
30 أبريل
حكاية بني أدم
.
أبويا اسمه العقل و أمي اسمها المنطق , ماليش باشا ولا سيد , ولا عيني بتشوف حد على راس أبوه ريشه , لا شخص ولا حزب ولا جماعه , مابفهمش في حكاية شيك على بياض في الوطنيه , ولا بعرف يعني إيه صكوك غفران أدّيها لإنسان عشان يدخل الجنه إذا كنت أنا إنسان زيه ومش عارف أنا داخل فين ؟ مش لما أبقى أضمن لنفسي الأول أبقى اضمن لغيري !!.
- حصل إني كنت شايف الإخوان جماعه مضطهده وناسها طيبين لما كانو في المعارضه قلت كويس الناس دول يتحبّو بقى ونديهم فرصه ( الواد يتحب يا رمضان ) , فرصه في التانيه في التالته وبانت الوشوش العكره , أزبل مخاليق ربنا , حاجه كده لا ترقى لمستوى الكلاب وان كنت ناسي أفكرك !!.
- قلت العيال القيادات بتوع 6 ابريل دول زي الفل , اللهم صل عالنبي , بيدعو الناس للنزول والثوره ضد فساد مبارك والبلد اللي اتجرفت , وماله ننزل معاهم , أو بمعنى أصح ننزل زي ماهما قالولنا , ونزلنا واتقتلنا واتجرحنا واتوجعنا وعملنا ثوره محترمه , بعد شويه كده , الله ؟ , العيال دي بقى شكلها ملزّق كده ليه ؟ مالهم كده عاملين زي الست اللي مش على بعضها ؟ , الإخوان بيحكمو مصر وبيخطفوها لصالح تنظيمهم الإرهابي الدولي , فين أحمد ماهر , فين قيادات 6 ابريل , إنتو فين يا رجاله , إيه ؟ بترمو ملابس داخليه على بيت وزير الداخليه ؟ قول والمصحف ؟ وبترمو برسيم على بيت مرسي ؟ بجد ؟ ده أخركو ؟ قمت حطيت كام علامة استفهام , مايجراش حاجه لما تحط علامات استفهام , العلامات دي عندك عالكيبورد وحاجه ببلاش كده .
.
حصلت ثورة 30 يونيو والشعب فاق وحس إن بلده بتتخطف خطف , مممممممم فين أحمد ماهر و قيادات 6 إبريل يا جدعان ؟ ماشوفتش أحمد ماهر يا كابتن ؟ ماشربشي عندك برتقان الأقرع ده يا عمنا ؟!.
.
- نهايته , لو حضرتك شايف إن القاضي ماعندهوش مستندات كفايه للحكم على ماهر وغيره وبالتالي هيطلع براءه وده دليل إنه شريف ( يا عزيزه صدقيني دانا مواطن شريف ) ابقى ساعتها بقى ماتصرخش وتولول لما تلاقي مبارك طلع براءه برضه , القاضي اللي بيحكم في قضيته مش هيلاقي مستندات تدينه ( إزاي مفيش مستندات ؟ وانا مال أمي ) , وابقى قول إن حكم القاضي دليل على إن مبارك مواطن شريف .
.
أحيانا كده لما بفكر في عقول الناس حواليا , المتعلمين بتوع المدارس , اللي بيشيلو الموبايل وعندهم حساب عالفيس بوك , بقول يا خسارة الساندوتشات اللي كانت بتتعملك كل يوم , والمريله والكراريس والمسطره والسبوره والمدرس وحضرة الناظر و رايح فين رايح المدرسه جاي منين جاي م المدرسه , يا خسارة الشهادات المتلتله , و روب التخرج , يا خساره البطاقه اللي اتغيرت للمهنه مهندس ولا دكتور , يا ريتك كنت فضلت زي مانت , تلميذ في ابتدائي بمريله , كنت جايز عذرتك .
-
Mohamed Hussein
30 أبريل
خبر مهم جدا : اعلنت قناة الجزيرة القطرية الاثنين انها طلبت 150 مليون دولار كتعويض من مصر بسبب الاضرار اللاحقة بها منذ تموز/يوليو 2013 عندما عزل الجيش الرئيس الاسلامي محمد مرسي.
.
الكلام ده مهم جدا , الجزيره عايزه مليار جنيه عشان الخسائر بتاعتها بعد ثورة 30 يونيو !! , حد لسه جحش ومافهمش ؟ حد لسه عايز يعرف اتوبيس كام بيروح فين ؟ وبكره حماس تطلب تعويض مماثل من مصر عن هدم الأنفاق ومش بعيد الصهاينه يطلبو تعويض عن خسايرهم في حرب اكتوبر هما والإخوان !!.
.
انت بقى عايز مصر ولا عايز الجزيره وقطر والصهاينه والإخوان ؟ ماتعملشي نفسك واد مكّار وتقول انا مش مع ده ولا ده , أصلك بتبقى مفضوح في حكاية على الحياد دي , وانا بشوفك بالظبط زي اللي زهق من كونه راجل و في نفس الواد محرج يبقى ست فقرر إنه يكون ( ..... ) مممممممممممممممممم , قرر إنه يكون علاء صادق !!.
Mohamed Hussein
30 أبريل
و حاجتين مهمين أوي لازم تعملهم عشان تبقى محلل سياسي واسترا (تيجي زي ماتيجي ) , أولا إنك تشكك في نصر أكتوبر المجيد , قول كانت صفقه بين مصر واسرائيل برعائه أمريكيه , أو صفقه بين مصر وأمريكا برعايه اسرائيليه أو صفقه بين أي حد وأي حد برعايه موزمبقيه , المهم إنك تقول الكلمتين دول ( صفقه ..رعايه ) , إوعى تنسى بقى .
تاني حاجه إنك تسب وتلعن في أبو جمال عبد الناصر والتجربه الناصريه , أومال هتبقى محلل استراتيجي إزاي ؟ قول : دعونا ننفض عن كاهل هذا الوطن أثار التجربه الناصريه بما لها وما عليها ( حلو البؤ ده وشغال ) .
لو عملت الحاجتين دول يا معلم أضمنلك إنك هتظهر في التلفزيون المصري وبرامج التوك شوز ( شوز يعني جزمه بالإنجليزي ) أكتر من إعلانات البلهاريسيا بتاعة زمان بتاعة عبد السلام محمد ومحمد رضا وأكتر كمان من إعلانات تنظيم الأسره بتاعة الست كريمه مختار ( لو روحتي الوحده الصحيه وسمعتي كلامي يا شلبيه ) .
وكان معكم في الأستوديو المحلل السياسي والإستراتيجي الأستاذ الدكتور : نورمنست حديد !!.
Mohamed Hussein
30 أبريل
العاصفه الرمليه اللي كانت في الرياض امبارح وصلت عندنا النهارده ( مسافة السكه يعني ) , النخل قدام الصيدليه عمّال يرقص فشر الست سهير ذكي في زمانها , أهي دي الحاله الوحيده اللي بيسمحو فيها بالرقص في السعوديه !!.
Mohamed Hussein
1 مايو
في دين ربنا هنتحاسب عن كل كلمه بنقولها حساب الملكين ( ما يلفظ من قولٍ إلا لديه رقيبٌ عتيد ) . , وفي السياسه في الدنيا ممكن أنا والغوغاء والدهماء أمثالي نقول ونهلفط بأي كلام وأي تشبيه ونعمل شألباظات براحتنا , ده عادي إنما المسئول بيتحاسب على كل كلمه حساب الملكين في الدنيا قبل الأخره , هو المسئول لازم يبقى فاهم كده , معالي وزير الخاريه المصري اللي قبل مايبقى وزير خارجيه كان أغلب الشعب مجمع عليه ومستنيه بيقول ( العلاقه بين مصر وأمريكا جواز شرعي مش نزوه عابره !! ) , يا ريتها كانت نزوه وخلصنا يا مولانا , إنما جواز شرعي ؟ طب مين فيهم اللي بيلبس قميص النوم ؟! أنا ابن مين يا داده ؟! .
.
لمعالي وزير الخارجيه المصري أقول :
.
تنويه هام :
( هذا المقطع بتاع البلاط والسيراميك تم حذفه من قِبل الرقابه ) !!.
Mohamed Hussein
1 مايو
ولو كانت أمريكا متجوزه مصر جواز رسمي مش علاقه عابره يبقى احنا الشعب المصري بالكتير بنمثّل طقم الجيلي في الليله دي , عشان كده تلاقينا اتركنا عالرف سنين طويله جنب برطمانات المربى الفاضيه .
والنبي يا خوانا حد يبقى يفهم وزير الخارجيه لما يطلع في أي زياره بره يبقى يعمل زي إنعام سالوسه و ماينطقش خالص , يقول بس ( إن شاء الله , ألف مبروك , وربنا يتمم بخير ) .
Mohamed Hussein
1 مايو
كيس عيش فينو بايت بقاله 3 ايام , و خياره دبلانه و عدمانه العافيه , وعلبة زبادي مارضتشي ابص على تاريخها عشان مش اتصدم , أصلي جعان أوي وده اللي لقيته في السوبرماركت اللي جنبي , أدي أخرة اللي مايسمعش كلام مراته ويروح البيت عشان ياخد الساندوتشات بتاعته .
كويس إن أمي مش عندها حساب عالفيس بوك وإلا كان زمانها فضحتني و بستفتني , وقالت لي ترجع مصر دلوأتي حالا , أصل الأكل ده سعادتك عندنا في البلد بنعمله ( بسيسه ) للبط اللي مربيينه جنب البيت ..... يالله , اللهم لك الحمد , اللهم دمها نعمه واحفظها من الزوال .
Mohamed Hussein
1 مايو
ظاهرة غريبه جدا بدأت في الإنتشار , هي مش بدأت هي تقريبا جابت أخرها , ظاهرة الكاتبه الصحفيه المزه أو الكاتبه المزه الصحفيه أو بمعنى أصح المزه الكتابه الصحفيه
............. تحس إن رؤساء تحرير الصحف في مصر كل واحد فيهم جواه ( سبكي ) صغير بيحاول يطلّعه , صورة للمزه بحجم صغير و تحتها مقال , أي هري في الحماده , شوفت يا جدع المقال بتاع الأستاذه المزه الكاتبه الفلانيه ؟ لأ شوفت رقبتها اللي شبه رقبة ورده في زمانها , طب إيه رأيك في إسلوبها في الكتابه ؟ إيه رأيك إنت في البودي اللي متصوره بيه ؟ طب شوفت السلاسه اللي في كتاباتها ؟ لأ , شوفت إنت السلسله اللي نازله على صدرها ؟ .
.
ممممممممم اللي قبلينا قالو ( اللي بيزمر مابيخبيش دقنه ) , عشان كده عندي رررجاء من الساده الأفاضل رؤساء التحرير , ياريت الله يكرمكو ترحمو العقل البشري من هرتلة الكاتبات المزز وبدل ماتبقى صورتها 4 في 6 , والمقال متر ونص أد قماشة البنطلون على رأي عم جلال , أنا بقترح تلغو المقال خالص وتنزلو للمزه صوره بحجم المقال , وياريت لو تكون لابسه بنطلون سترتش , ساعتها أضمن لكو ملايين القراء والمتابعين ( زباين السبكي على قفا من يشيل ) , وممكن تغيّرو اسم الجريده لمجلة ( الشبكه اللبنانيه ) .
............. مين اللي قال البرادعي هو ضمير الأمه ؟ , السبكي هو ضمير الأمه !!.
24 أبريل
الأزهر فقط يمثّلني كمسلم
.
وجدي غنيم في فيديو أخير له بيسب السيسي وانصاره اللي هما بتاع 50 مليون مصري بأبشع الألفاظ , الفيديو ده ظهر بعد فتوى ياسر برهامي اللذيذه بتاعة الإغتصاب , الأولاني شيخ إخوانجي كبير والتاني شيخ سلفي كبير , وفيه شباب من أنصار الإخوان فاهمين ان وجدي غنيم أعلم أهل الأرض وناس من شباب السلفيين شايفين إن ياسر برهامي أعلم أهل الأرض , وانا رأيي إن الإتنين أزبل من بعض , وللأمانه مش عارف مين فيهم أزبل من التاني , عشان كده وعشان ابقى ( فير ) يعني بقترح نعمل مباراه نهائيه بينهم في الوقاحه والسفاله , لقاء السحاب , واللي يفوز ياخد لقب ( أزبل أهل الأرض ) , مباراه تحت عنوان ( صراع في الزريبه ) !!.
.
ولما يكونو الإتنين دول اسمهم مشايخ و صيتهم مسمّع في أخر الدنيا , يبقى المفروض مؤسسة نوبل تستحدث جايزه جديده للمصريين اللي لسه ماكفروش ولا ألحدو لحد دلوأتي , أنا هاخدها أول واحد .
Mohamed Hussein
25 أبريل
سؤال عميق اوي جه على بالي , ليه كل مابتفرج على شقه نص تشطيب , والاقي صورها نازله عالنت , بشوف في الصور محاره وحلوق وواحد مشخبط عالحيطه بتاعة الرسبشن بطباشيره وكاتب ( للذكرى الأبديه , حسن بيحب نوسه , ورسمة قلب و سهم مثلا ؟ ) , شقق دي ولا حمامات رمسيس العمومي ؟ يكونشي الشخبطه بالطباشير على حيطة الرسبشن هي مرحلة من مراحل تشطيب الشقه ؟ , يعني البايع يقولك دي نص تشطيب يا باشا يعني محاره وحلوق بيبان ووصلات كهربا وسهم و حسن بيحب نوسه !!.
Mohamed Hussein
25 أبريل
هي لله
.
و هو هو ياسر برهامي بتاع فتوى الإغتصاب هو اللي أفتى من كام شهر إن المسلم من حقه يتجوز قبطيه بس يبغضها في الله ويعاشرها كأنه بيغتصبها !!.
.
تعالو بقى على جنب وانا هشرح لكو الليله دي في كام سطر , أه نسيت , لو كنت حضرتك من الناس اللي عندهم هسهس بتاع مشايخنا وعلماء الأمه ولحمتهم مسمومه يبقى خليك في الجنب التاني وانا هنادي عليك لما اخلص , يعني في فقرة الأوبن بوفيه ( رز بلبن ) .
.
بقى يا سيدي فتاوى ياسر برهامي وأمثاله لا ترتكز على قاعده دينيه ولا قاعده فقهيه ولا قاعدة فيثاغورث ولا حتى قاعدة المصطبه , كل الحكايه وما فيها إنهم بيرتكزو على النظره الدونيه للمرأه , جواهم اعتقاد إن ربنا خلق الذكر عشان يستمتع بالأنثى وبالتالي يبقى دور الأنثى في الحياه إنها تمتّع الدكر ولا مؤاخذه .
.
هبسطهالك , راجع فتاويهم هتلاقي 17 نوع من الجواز وكل نوع فيه أوفة مشايخ منهم بيقولو حلال , رسمي بقى على عرفي على مسيار على متعه على مصياف على عفريت أزرق , أهم حاجه الدكر يستمتع , هبسطهالك اكتر , في فتوى الإغتصاب هتلاقي الركيزه بتقول إن اللي بتغتصب دي هي مجرد زوجه من 4 ربنا أحلهم لك , وطبعا بعد ما تسيبها تٌغتصب مش هتبقى طايق تلمسها وأكيد أكيد هتطلقها عشان الفاجره ماقدرتش تحافظ على شرفها !! , وتاني يوم تتجوز غيرها , واحده جديده لانج بالكرتونه , ولو اتعرضت هي كمان للإغتصاب طلقها يا جدع , وارميها وشوف غيرها , تاني يوم أجوزك بنت مزه كده 18 سنه , شامورت يعني , تطلع الرطوبه من جتتك , أصلك مش واخد بالك , الراجل ممكن يتجوز تاني يوم بعد ما يطلق أصل مالهوش عده , وانا كنت خايف لا يشيلو العده مع إني ماعنديش عده .
.
وبما إني واحد من الحمقى والغوغاء وعامة الشعب , لا انا عالم من علماء الأمه ولا لحمتي مسمومه فانا متضامن تماما مع المرأه ضد هذا العبث البرهامي , متضامن مع المرأه الإنسان , الأم والأخت والصديقه , المرأه بغض النظر عن لونها وجنسيتها وديانتها , متضامن مع المرأه الكموديه والمرأه القبطيه والمرأه السمراء , وبما إني متضامن معاهم ( معهن ) فكان لازم اسأل فضيلة الشيخ الجليل ياسر برهامي سؤال من باب رد الإعتبار : يا شيخهم , ماذا تفعل الزوجه إذا شاهدت زوجها يُغتصب أمام عينها ؟ يتهيألي إنت غالبا أفضل واحد يفتينا في السؤال ده .
.
الخلاصه بقى , أصعب اغتصاب في الدنيا هو اغتصاب العقول , وانت مُغتصَب يا شيخ ياسر , your brain is not virgin .
Mohamed Hussein
25 أبريل · تم التعديل
توب علينا يا رب من زباين يوم الجمعه
.
هو : عندك فيفادول شراب ؟
أنا : أيوه...اتفضل
.
هو : هذا للحراره ؟
أنا : بالظبط للحراره
.
هو : بنتي عندها حراره واسهال ومغص وتطريش ( ترجيع )
أنا : ألف سلامه عليها , لازم توديها المستشفى لازم دكتور يشوفها
.
هو : لا مافي داعي للمستشفى , بيكفي فيفادول
أنا : فيفادول هيعالج الحراره بس
.
هو : لأ وبيريّح الإسهال والمغص والتطريش
أنا : طيب انت أدرى .
.
هو ( بيدفع ال 8 ريال ) : بيكفي الفيفادول صحيح ؟
أنا : بيكفي جدا
.
هو : يعني بيريح الإسهال والمغص والتطريش اللي عند البنت ؟
أنا : طبعا , وبيعالج البواسير وحب الشباب والضعف الجنسي , وبيجوز العازب ويفك السحر و بيعوم في البحر والبر والجو .
.
هو : إيش ؟
أنا : لا ماتخدش في بالك , اتفضل ريالين باقي , ألف سلامه عليك .
.
.
أمي قالت لي مثل زمان ( لو نصحت صاحبك من الصبح للعصر وماتنصحش , كمّله بقية اليوم فساد ) .
Mohamed Hussein
26 أبريل
خالد versus حمدين
.
.
اليوم السابع بتاع خالد صلاح ناشر تصريح لحمدين بيقول فيه انه هيحاكم السيسي لو بقى رئيس !!.
.
يعني الحكايه خالد صلاح versus حمدين ؟! , رأيي الشخصي إن التصريح لا يعيب حمدين صباحي , يعني مش مشكله خالص لما يقول هحاكم السيسي وهحط السيخ المحمي في صرصور ودنه , عادي مفهاش حاجه , ده شغل انتخابات ومرشحين رئاسه ممكن أتفهمه , أي مرشح رئاسه من حقه يهلفط بالكلام شويتين في فترة الدعايه الإنتخابيه , وطبعا لكل مقامٍ مقال , يعني لما تقعد مع شوية ناس غلابه تقول لهم هعمل لكو البحر طحيه وهدخل جاكوزي في كل بيت في قرى مصر , ولما تقعد مع شوية عيال ثورجيه تقول هحاكم السيسي ومبارك وشجرة الدر , ولما تقعد مع نادر بكار وحزب النور تضرب الدقن التمام والزبيبه وتمسك السبحه في ايدك وبارك الله فيك يا أخي الكريم .
خالد صلاح هو محمد حسان بتاع الليبراليين , يعني واحد من الأكلين على كل الموائد , وانا مش لاقي أي منطق أو مبرر من أنصار السيسي لتشويه حمدين بالشكل ده , شعبية السيسي مايلزمهاش الكلام ده والأمور محسومه تماما بالصناديق , يا ساده احتفظو ببعض الإحترام لحمدين صباحي , لان دوره الحالي محترم جدا , ومهم أوي يكون عندنا معارضه قويه لو كنا عايزين بلد واقفه على رجلين مش رجل واحده .
.
بالمناسبه حمدين مش عيل صغير وعارف كويس أوي إنه يوم ما يفكر يحاكم السيسي لازم يحاكم قبل منه 30 مليون مصري عملو له تفويض في الثوره وتفويض في محاربة إرهاب الإخوان .
Mohamed Hussein
26 أبريل
أقصى تفاعل على بوست ليا كان 250 لايك و 100 شير مثلا !! , 250 لايك يعملو إيه في الزمن المهبب ده ؟ دانا حرمت نفسي من العشا عشان تستعشو , إنت ياض ياللي هناك , أيوه ياخويا انت , كل مره تعدّي عالبوست وتقعد تقلّب في البضاعه وعمرك ما عملت لايك , العيشه بقت نار , 250 لايك هيكفو مصاريف مدارس ولا اكل وشرب وفواتير كهربا ونت وتليفونات , شوفو الحديد النهارده بكام وكيلو اللحمه بكام ؟ مراتي قالت لي كيلو اللحمه في كارفور المعادي ب 95 جنيه , أيوه ماهي كانت بتعمل سيرش عن اللحمه عالنت , وبما إننا نازلين مصر خلاص فهنبقى نعرف أخبار اللحمه من عالنت ونشوف صورتها كمان , ربنا يسمّعنا عنها سمع خير , أنا بقول أوّل مانزل مصر أشتري نص كيلو لحمه بلدي واتصور جنبه وانزل صورته عالفيس بوك , واحضنه حضن مطارات واقول له مع السلامه يا صاحبي , محدش عارف الوشوش هتتقابل ولا لأ .
Mohamed Hussein
26 أبريل ·
و هتلاقي صاحبك البرادعاوي يقولك ( لو حمدين انسحب من مسرحية انتخابات الرئاسه احنا هنجيبه رئيس !! , واخدلي بالك من ( إحنا ) دي يا حاج محمد ؟! ) , نفس فكرة مصطفى لا مؤاخذه النجار , إحنا هنجيب فلان رئيس وفلان نائب ونعينّ فلان واتصلنا بفلان وكلمنا البت فلانه دي شاطره ولهلوبه , انتو مين يا عم الحاج ؟ إحنا مين يا عم اسماعين ؟! .
.
بفطس أنا بقى على روحي من الضحك , بحس إني واقف قدام واحد عنده عربية فيات 127 حمره موديل 78 و مصّر يدخل بيها رالي السيارات قدام الفيراري , و تحس انه واثق أوي من الفوز , كل ده عشان عنده في ال 127 دبدوب صغير حاطه في التابلوه وكلب لولو تحت الإزاز الوراني , أه بالظبط زي البنات الكيوت بتوع الرحاب والتجمع الخامس .
الحكايه مش غرور ولا تعالي , ولا انا تبع حد أساسا , إنما اللي ليه جوز عيون بيشوف واللي مايشوفشي من الغربال يبقى أعمى أو ناشط سياسي , والحقيقه بتقول إن أنصار السيسي كتير اوي وقادرين عالسباق و انصار حمدين كتير وقادرين عالسباق , أما أنصار البرادعي حاليا , ف مممممممممممممممممم عندهم دبدوب وكلب لولو في العربيه ال 127 !!.
.
باختصار يعني , صاحبك البرادعاوي اللي شايف إن ال 30 ألف واحد اللي بيأيدو البرادعي حاليا هيقدرو يغيرو خريطة السياسه المصريه وشكل الكره الأرضيه والتوازن البيئي في غابات السافانا , و هيقدرو يجيبو و يحطو و يشيلو و يرفعو مايختلفش كتير عن الإخوانجي اللي بيبقى قاعد في مندرة بيتهم في البلد بالجلابيه البيضا وبنطلون الترنج والشبشب البلاستيك و بيحلم بأستاذية العالم .
Mohamed Hussein
26 أبريل
العامل بييجي مره في الأسبوع يمسح الصيدليه , بقى عندي كمية نمل وناموس صغير زي الفل , بنتعايش سوا عادي , وحشرات تانيه كده صغيره وغريبه , ناموسه دي ولا نملايه ؟ شبه النملايه بس بتطير , يعني تكونشي نملايه وعامله نفسها ناموسه ؟ ..و لما بسيب اللاب شويه باجي ألاقي ناموس صغير واقف عالزراير , هش , هش , هش يلعن أبوكي , قصدي يلعن السيد باباكي لا تكوني بنت ناس ومن عيله ولا حاجه .
بالك إنت لو جيت قعدت معايا شويه في الصيدليه دي ممكن أشرح لك درس عملي عن دورة تكاثر حشرة الدروسوفيلا و موقف خالد على من انتخابات الرئاسه !!.
Mohamed Hussein
26 أبريل ·
و كل ماقول لواحد هنا إني نازل نهائي يقولي لأ لأ لأ , إوعى تعمل كده إوعى تغلط الغلطه دي , مممممم بيحسسوني إننا قطيع من الفيله وقرر فجأه السفر لمنطقه تندر فيها المراعي والكلأ !! , مش بني أدمين متغربين وقررو الرجوع لبلدهم .
على فكره لما سافرت من مصر ماكنتش سايبها سويسرا , ولا سافرت وانا زهقان من دلدلة رجليا في الجاكوزي , مانا عارفها وحافظها بناموسها وشوارعها ومطباتها و بلاعتها , وبحبها زي ماهي كده بطينها وعبلها .
قطيعه تقطع المروحه والكاسيت أبو روحين والقلمين الفرنساوي وعلبة السجاير المارلوبورو الأحمر اللي بيتحطو في جيب الجلابيه البيضا .
Mohamed Hussein
27 أبريل
ياسر برهامي في أحدث فتاويه + 18: تجرد الزوجين من ملابسهم أثناء العلاقه الزوجيه يبطل عقد الزواج و فيه تشبه بالكفار !! .
مممممممممممم يعني المصريين كلهم كده طالق بالتلاته , وانا اقول البلد دي حالها مش بيتصلح ليه ؟ أتاري عشان الشعب عايش في الحرام .
.
ياسر برهامي يستحق بلا منازع لقب السوبكي بتاع السلفيين أو حتى لقب الريس برايز بتاع حزب النور .
Mohamed Hussein
27 أبريل
صورة عبد الفتاح السيسي مع شوبير ومرتضى منصور بعد ما صالحهم استفزتني جدا , يا عم عبفتاح احنا عايزين رئيس دوله مش شيخ عرب .
و بعدين يعني إنت مالقتشي غير الإتنين دول وتصالحهم على بعض ؟ أديك وسّخت إيديك الإتنين , و قابل بقى يا حاج , قابل معازيمك وقعّدهم , هتشوف تريقه للركب .......... بتحطو نفسكو في مواقف بايخخخخخخخخه .
Mohamed Hussein
27 أبريل
طول عمري بكره في شغلتي دي التعامل مع ( الكوزموتيكس ) , مستحضرات التجميل يعني , والشامبوهات و هاش ولا جاش , بحب التعامل مع الأدويه وبحترمها جدا , إنما في الكوزموتيك و الميش ماتلاقينيش .
وغالبا كده لو ربنا أراد وسيبت أم الشغلانه دي هيبقى بسبب الكوزموتيك وزباينها , ضيّعت سنين كتير من عمري في انتظار شامبو هيد اند شولدرز اتنين في واحد عشان الزباين بتسأل عليه , وماعرفشي والله الفرق بي سويت ازالة الشعر الفلانيه والعلانيه , و عهد الله ماعرف يا ستي , وانا لو اعرف هخبي ليه يعني ؟ وصبغة الشعر تستخدميها إزاي ؟ اسألي أم غاده الكوافيره , أنا كاتب رقمها على إزاز الصيدليه مخصوص أما بقى الشامبو اللي بيمنع تساقط الشعر وبيطوله وينعّمه فده تلاقيه في الصيدليه اللي جنبنا , هو و بيضة الكتكوت أبو 7 رجول !!.
Mohamed Hussein
27 أبريل
من وانا صغير أد كده وانا رأسمالي كُحت , و من عيله أرستقراطيه عريقه , عشان كده تلاقيني بشجع الرأسماليه المتوحشه , و متعاطف جدا مع الأرستقراطيين والرأسماليين اللي حقهم مهضوم في البلد دي , فاكر لما كان عمري 7 سنين , كنت بزهق من البانيو والجاكوزي وانزل استحمى في الترعه جنباً إلى جنب مع البلهاريسيا !!.
Mohamed Hussein
27 أبريل
يتهيألي بعد اللي شوفناه في السنتين تلاته اللي فاتو دول من حرق وقتل وتخريب وانفلات أمني و تثبيت للناس عالطرق بالألي , و مظاهرات وثورات ومناقشات وحوارات وحبشتكانات وانتخابات وصداااااااع زي السهم له أول ومالوش أخر , لو حد في الجيل بتاعنا ده سمع في يوم من الأيام إن وباء الطاعون وصل بلاد جنبنا وقرّب من حدود مصر هيضحك بسخريه ( هه ) ويقول الطاعون ده العيال الشبّيحه عندنا بيستخدموه مزيل عرق .
ولو أمريكا اتهفت في عقلها وقررت ترمي قنبله ذريه على مصر هتلاقي راجل ومراته ماشيين في الشارع كده والزوجه بتسأل زوجها : إيه اللي مرمي هناك ده يا حبيبي ؟ هيبص الزوج ويقول لها : أه دي تقريبا قنبله ذريه و هتنفجر بعد شويه يا حياتي , وهي تقول له : الله , من زمان وانا كان نفسي اشوف قنبله ذريه , ممكن تصوّرني جنبها عشان انزل صورتها عالفيس بوك واغيظ صاحباتي ؟!!.
Mohamed Hussein
28 أبريل
حظر نشاط حركة 6 لا مؤاخذه إبريل , ياااااااااااه أخيرا , اللهم لك الحمد , كده مش باقي غير إنهم يصادرو أفلام السبكي و يعتقلوه هو و ياسر برهامي وتبقى اتعشت و جبرنا .
.
واحد يسألني و يقولي يا كابتن لطيف , أومال قيادات حركة 6 ابريل هيشتغلو إيه بعد ماتحظر نشاط الحركه ؟ مممممممممم والله يابني ماعرف , بس كل اللي أعرفه وكتبت عنه زمان , إن سوسو الرقاصه كانت في كباريه النجوم بتشتغل و تعرق , و بعدين صاحب الكباريه مات والورثه اختلفوو و قررو في النهايه إنهم يبنو بدل الكباريه برج كبير وفاسقيه و يعملو كولدير مايه كبير , صدقه جاريه على روح المرحوم , فقامت سوسو الرقاصه تاني يوم راحت اشتغلت في كباريه الورده الحمره ( بتشتغل وتعرق ) , ولما حصل حريق في كباريه الورده الحمره , سوسو راحت كباريه ( المزاج العالي ) و برضه بتشتغل وتعرق ..... عايز أقولك يعني باختصار , ماتشغلش بالك إنت , الرقاصه مابتغلبش !!.
Mohamed Hussein
28 أبريل
بالمناسبه يا شباب , وانا صغير 7 سنين كده , كنت بسرح بالغنم مع جدي حسين الله يرحمه , علّمني الامانه , كنا بننزل الغنم في أرض دره مثلا بعد ما يكون صاحبها قطّع العيدان ولم الكيزان والأرض فاضيه بس لو لقينا كوز دره منسي كنا بنرجعه لصاحب الأرض , و لما كان عمري 10 سنين لقيت فلوس في الشارع , مبلغ كبير حوالي 300 جنيه , كان كبير أوي أياميها , روحت إديتهم لراجل كبير كان واقف بعيد وقلت له يا عم أنا لقيت الفلوس دي ومش عارف هي بتاعة مين !!.
كده الماضي بتاعي زي الفل أهو , منتهى الأمانه , إيه رأيكو بقى أنا عايز أعمل حزب سياسي أو حركه سياسيه , ولو عكّيت الدنيا وخدت تمويل ولا خدت عفريت أزرق محدش يحاسبني , أنا نبهت عليكو أهو , أومال الماضي بتاعي بيعمل إيه ؟ ماهو لازم يشفع لي !! .
اللي عايز يعرف عن قيادات حركة 6 ابريل وقيادات ألتراس أهلاوي قبل مايتحمق بقى بشعارات ثورجيه يقولي كانو فين أيام حكم الإخوان ؟ دوّر كويس وانت تعرف كانو فين ؟
و إذا كان الماضي بتاعهم النضيف يشفع لهم في وساخات مستقبليه فانا أولى من الغريب , بالمناسبه مبارك بدأ حكمه زي الفل أول 10 سنين , المفروض الماضي بتاعه يشفع له بقى في نهب البلد وتجريفها , ولو دوّرتو في تاريخ ريا وسكينه مش بعيد تلاقو لهم حاجه حلوه عملوها وهما صغيرين , أنا حاسس إني بكلم أموات .
Mohamed Hussein
28 أبريل
تررن تررن تررن تررن
.
عندي تحفظات كتير على شغل القضاه في مصر , إنما ده مايمنعشي من اعتقادي إن المشكله الأكبر في التقاضي بصفه عامه بتبقى عند بتوع النيابه والبحث الجنائي والمحامين طبعا , حكاية اللعب في الأحراز والمستندات والبحث في ثغرات القانون , وفي النهايه القضيه بتوصل للقاضي متستفه بشكل معين وفي اتجاه معين , يعني من الأخر بتوصل له ممصوصه وممضوغه تماما .... قضايا مبارك هي اكبر دليل على كده , والقاضي بيلاقي قدامه ورق فلوسكاب فاضي وفي النهايه مضطر يحكم بالورق .
.
مش عارف أقتنع أنا بحكاية تسييس أحكام القضاء دي , يعني حضرتك عايز تقولي إن مصر فيها 10 ألاف قاضي وكل يوم الصبح , الساعه 7 , سبعه سبعه ونص يعني , يوصل لمكتب عبد الفتاح السيسي ( اللي هو مش رئيس ولا حتى وزير حاليا ) 10 ألاف مكالمة تليفون , تررن تررن تررن تررن , ألو , مكتب المشير السيسي , أيوه مين حضرتك ؟ أنا المستشار أحمد البحبحاني , أهلا وعايز ايه ؟ يافندم عندي قضيه النهارده فيها متهمين من الإخوان , أه مممممممممممممم طب اديلهم إعدام , إعدام كتير يافندم طب نمشيها 17 سنه سجن ؟ إنت هتفاصل معايا يا سيادة المستشار , إنت نسيت نفسك ولا إيه ؟ لا يا فندم مستحيل , حاضر هنديهم إعدام .
.
تررن تررن تررن تررن , مكتب المشير السيسي , أيوه أنا المشير مين معايا ؟ أنا المستشار إبراهيم البحبحاني , يا فندم عندي قضيه النهارده وفيها حركة 6 ابريل , ممممممممممم أه اعمل لهم حظر العيال دول أنا أصلا مش بحب شكلهم , بس يافندم الأحكام مش بنصدرها بالحب والكره , إنت هتتناقش معايا يافندي وهتعلمني ؟ هات اسمك واسم المحكمه اللي انت شغال فيها , لا خلاص خلاص يا فندم نعملهم حظر حاضر .
.
تررن تررن تررن تررن , مكتب المشير السيسي , أيوه انا المشير زفت , أنا المستشار عبد السلام البحبحاني , كان عندنا قضية لواحد من الفلول , احكم فيها بإيه سيادتك ؟ لا طالما فلول اديله براءه , براءه ازاي يا فندم ده سارق ملايين وفيه مستندات , انت بتعارضني يافندي انت ؟ قلتلك براءه يعني براءه , تحت أمرك يافندم
.
تررن تررن تررن تررن , تررن تررن تررن تررن , يا رفاعي يا رفاعي , تعالي رد على بقية القضاه انا دماغي صدعت , قول لهم المشير السيسي بيقول لكو تخربو بيت العيال بتوع 6 ابريل والتراس والإخوان وتطلعو الباقي براءه !!.
.
للأسف الشديد , للأسف , أنا مش مقتنع بحكاية تررن تررن دي , إنما لو حضرتك مقتنع إيتس أوكيه , مفيش مشكله , بس مكانك مش هنا , البنك الأهلي هيوفرلك مكان أمن في صفحة الحريه والعداله وشبكة رصد , وهناك تقدر تتكرع وتكتب قناعاتك براحتك .
Mohamed Hussein
28 أبريل
ولو حضرتك مش عاجبك حكم القاضي وشايفه أوفر أوي , بسيطه خالص ممن تحط صورته على صفحتك و تلعن جدود أهله , مع إن لا انا ولا انت بنفهم في القضاء والإستئناف والليله دي , إنما ماشي , إعمل حفله عالقاضي مايجراش حاجه , لكن قولي بقى عشان أنا فهمي على أدي , قاضي أصدر حكم قضاء بتلعن جدود أبو السيسي ليه ؟!.
طب لو المتهمين دول خدو براءه في الإستئناف أو أحكام مخففه تماما هتحط صورة البرادعي وتشكره على الحكم ولا هتحط صورة القاضي اللي انت لعنت جدود أهله ؟! أكيد مش هتحط صورة السيسي !!.
Mohamed Hussein
28 أبريل
خلف خلفالله خِلف خلاف المحامي
.
ومن عجائب القدر في المشهد المصري إنك هتلاقي عقل صاحبك الكولّجي مايختلفشي ذرّه عن عقل صاحبك الإخوانجي , الإتنين بيؤمنو تماما بالحاجه وعكسها .
.
الإخوانجي مؤمن إن الجماعه اللي بتقتل وتحرق وتكدب وتنصب عايزه تطبق شرع ربنا وتقيم دولة الخلافه الإسلاميه .
والكولجي مؤمن تماما إن أحكام القضاء مسيسه وإن السيسي إدى تعليماته للقضاه بإعدام بلطجية الإخوان بما فيهم المرشد العام وهو هو نفس الكولجي اللي بينشر كل يوم على صفحته إن السيسي هيتصالح مع الإخوان وبيدعو للمصالحه معاهم , يعني عايز يعدمهم بس عايز يتصالح معاهم , إنما لأ إنما أه , أنا مش عاجبني أنا مش عارفني أنا توهت مني .
Mohamed Hussein
29 أبريل
طب يعني ياسر برهامي مايرزعناش فتوى كده عن العلاقه بين أمريكا ومراكز حقوق الإنسان ومنظمات المجتمع المدني في مصر ؟ يقول لنا العلاقه دي حرام ولا حلال ولا يجوز ؟ ولو كانت بالهدوم يبقى الوضع ايه ولو من غير يبقى الوضع ايه ؟ وما حكم الدين في استخدام امريكا ليدها في مداعبة بعض النشطاء السياسيين في مصر ؟ الفتوى دي مستنيها من ياسر برهامي من زمان , باعتباره متخصص و فقيه و ضليع في الفتاوي البورنو .
Mohamed Hussein
29 أبريل
صوتي ليك
مش عشان لمسة جمالك
أو عشان نظرة عنيك
.
الغلابه في بلدي ياما
اللي قطر الجوع قاطرهم
وامّا تنجح بالسلامه
افتكرهم
هما ناسها أولى بيها
و أولى بيك
صوتي ليك .
.
بس حاذر م الديابه
اللي ساكنين القصور
والديابه الصنف تاني
اللي ماليين الجحور
إوعى يوم هتمدّ إيدك
يقطعوها
دول باعونا ألف مره
وان صبرنا كانو بالتأكيد باعوها
خلِّي نبض الناس شريكك
في الشوارع والحواري
لو في يوم محتاج شريك
صوتي ليك .
.
.
محمد حسين
Mohamed Hussein
29 أبريل
شوف حضرتك الحكايه سهله خالص , إنت تلبس بدله وكرافته ... كويس ؟ و تتصور بيها .....كويس ؟ , وتنزل صورتك عالفيس ... هارش ؟ وكل ماتدخل تعلق على اي بوست هات كلمة الذكاء في جمله مفيده , الكلمه وعكسها طبعا.... هارش ؟ مفيش مانع تخبط كلمتين من المقعرين زي مثلا ( كيف يتأتى له ؟ ... من الأهميه بمكان أن نفعل كذا.... ولو اتزنقت أوي قول تخرصات , أهي شغاله برضه ولها زبونها ) ....هارش ؟ , كده باقي لك خطوه أخيره ويكتمل تحميل الناشط السياسي اللي مجابتهوش ولاده , إنك تكتب على بروفايلك المهنه صحفي أو كاتب صحفي أو كاتب سياسي أو عضو جمعية الأعضاء ورئيس جمعية الرؤساء المنبثقه من اللجنه العليا لأي حاجه , هات ايدك يابني , ألف ألف مبروك , إنت كده نجحت , إلهي يارب أعيش لحد ماشوفك واخد جايزة نوبل للسلام زي توكل كرمان , هي كمان واخده , مش واخده ست , لا واخده , واخده الجايزه يعني .
Mohamed Hussein
30 أبريل
حكاية بني أدم
.
أبويا اسمه العقل و أمي اسمها المنطق , ماليش باشا ولا سيد , ولا عيني بتشوف حد على راس أبوه ريشه , لا شخص ولا حزب ولا جماعه , مابفهمش في حكاية شيك على بياض في الوطنيه , ولا بعرف يعني إيه صكوك غفران أدّيها لإنسان عشان يدخل الجنه إذا كنت أنا إنسان زيه ومش عارف أنا داخل فين ؟ مش لما أبقى أضمن لنفسي الأول أبقى اضمن لغيري !!.
- حصل إني كنت شايف الإخوان جماعه مضطهده وناسها طيبين لما كانو في المعارضه قلت كويس الناس دول يتحبّو بقى ونديهم فرصه ( الواد يتحب يا رمضان ) , فرصه في التانيه في التالته وبانت الوشوش العكره , أزبل مخاليق ربنا , حاجه كده لا ترقى لمستوى الكلاب وان كنت ناسي أفكرك !!.
- قلت العيال القيادات بتوع 6 ابريل دول زي الفل , اللهم صل عالنبي , بيدعو الناس للنزول والثوره ضد فساد مبارك والبلد اللي اتجرفت , وماله ننزل معاهم , أو بمعنى أصح ننزل زي ماهما قالولنا , ونزلنا واتقتلنا واتجرحنا واتوجعنا وعملنا ثوره محترمه , بعد شويه كده , الله ؟ , العيال دي بقى شكلها ملزّق كده ليه ؟ مالهم كده عاملين زي الست اللي مش على بعضها ؟ , الإخوان بيحكمو مصر وبيخطفوها لصالح تنظيمهم الإرهابي الدولي , فين أحمد ماهر , فين قيادات 6 ابريل , إنتو فين يا رجاله , إيه ؟ بترمو ملابس داخليه على بيت وزير الداخليه ؟ قول والمصحف ؟ وبترمو برسيم على بيت مرسي ؟ بجد ؟ ده أخركو ؟ قمت حطيت كام علامة استفهام , مايجراش حاجه لما تحط علامات استفهام , العلامات دي عندك عالكيبورد وحاجه ببلاش كده .
.
حصلت ثورة 30 يونيو والشعب فاق وحس إن بلده بتتخطف خطف , مممممممم فين أحمد ماهر و قيادات 6 إبريل يا جدعان ؟ ماشوفتش أحمد ماهر يا كابتن ؟ ماشربشي عندك برتقان الأقرع ده يا عمنا ؟!.
.
- نهايته , لو حضرتك شايف إن القاضي ماعندهوش مستندات كفايه للحكم على ماهر وغيره وبالتالي هيطلع براءه وده دليل إنه شريف ( يا عزيزه صدقيني دانا مواطن شريف ) ابقى ساعتها بقى ماتصرخش وتولول لما تلاقي مبارك طلع براءه برضه , القاضي اللي بيحكم في قضيته مش هيلاقي مستندات تدينه ( إزاي مفيش مستندات ؟ وانا مال أمي ) , وابقى قول إن حكم القاضي دليل على إن مبارك مواطن شريف .
.
أحيانا كده لما بفكر في عقول الناس حواليا , المتعلمين بتوع المدارس , اللي بيشيلو الموبايل وعندهم حساب عالفيس بوك , بقول يا خسارة الساندوتشات اللي كانت بتتعملك كل يوم , والمريله والكراريس والمسطره والسبوره والمدرس وحضرة الناظر و رايح فين رايح المدرسه جاي منين جاي م المدرسه , يا خسارة الشهادات المتلتله , و روب التخرج , يا خساره البطاقه اللي اتغيرت للمهنه مهندس ولا دكتور , يا ريتك كنت فضلت زي مانت , تلميذ في ابتدائي بمريله , كنت جايز عذرتك .
-
Mohamed Hussein
30 أبريل
خبر مهم جدا : اعلنت قناة الجزيرة القطرية الاثنين انها طلبت 150 مليون دولار كتعويض من مصر بسبب الاضرار اللاحقة بها منذ تموز/يوليو 2013 عندما عزل الجيش الرئيس الاسلامي محمد مرسي.
.
الكلام ده مهم جدا , الجزيره عايزه مليار جنيه عشان الخسائر بتاعتها بعد ثورة 30 يونيو !! , حد لسه جحش ومافهمش ؟ حد لسه عايز يعرف اتوبيس كام بيروح فين ؟ وبكره حماس تطلب تعويض مماثل من مصر عن هدم الأنفاق ومش بعيد الصهاينه يطلبو تعويض عن خسايرهم في حرب اكتوبر هما والإخوان !!.
.
انت بقى عايز مصر ولا عايز الجزيره وقطر والصهاينه والإخوان ؟ ماتعملشي نفسك واد مكّار وتقول انا مش مع ده ولا ده , أصلك بتبقى مفضوح في حكاية على الحياد دي , وانا بشوفك بالظبط زي اللي زهق من كونه راجل و في نفس الواد محرج يبقى ست فقرر إنه يكون ( ..... ) مممممممممممممممممم , قرر إنه يكون علاء صادق !!.
Mohamed Hussein
30 أبريل
و حاجتين مهمين أوي لازم تعملهم عشان تبقى محلل سياسي واسترا (تيجي زي ماتيجي ) , أولا إنك تشكك في نصر أكتوبر المجيد , قول كانت صفقه بين مصر واسرائيل برعائه أمريكيه , أو صفقه بين مصر وأمريكا برعايه اسرائيليه أو صفقه بين أي حد وأي حد برعايه موزمبقيه , المهم إنك تقول الكلمتين دول ( صفقه ..رعايه ) , إوعى تنسى بقى .
تاني حاجه إنك تسب وتلعن في أبو جمال عبد الناصر والتجربه الناصريه , أومال هتبقى محلل استراتيجي إزاي ؟ قول : دعونا ننفض عن كاهل هذا الوطن أثار التجربه الناصريه بما لها وما عليها ( حلو البؤ ده وشغال ) .
لو عملت الحاجتين دول يا معلم أضمنلك إنك هتظهر في التلفزيون المصري وبرامج التوك شوز ( شوز يعني جزمه بالإنجليزي ) أكتر من إعلانات البلهاريسيا بتاعة زمان بتاعة عبد السلام محمد ومحمد رضا وأكتر كمان من إعلانات تنظيم الأسره بتاعة الست كريمه مختار ( لو روحتي الوحده الصحيه وسمعتي كلامي يا شلبيه ) .
وكان معكم في الأستوديو المحلل السياسي والإستراتيجي الأستاذ الدكتور : نورمنست حديد !!.
Mohamed Hussein
30 أبريل
العاصفه الرمليه اللي كانت في الرياض امبارح وصلت عندنا النهارده ( مسافة السكه يعني ) , النخل قدام الصيدليه عمّال يرقص فشر الست سهير ذكي في زمانها , أهي دي الحاله الوحيده اللي بيسمحو فيها بالرقص في السعوديه !!.
Mohamed Hussein
1 مايو
في دين ربنا هنتحاسب عن كل كلمه بنقولها حساب الملكين ( ما يلفظ من قولٍ إلا لديه رقيبٌ عتيد ) . , وفي السياسه في الدنيا ممكن أنا والغوغاء والدهماء أمثالي نقول ونهلفط بأي كلام وأي تشبيه ونعمل شألباظات براحتنا , ده عادي إنما المسئول بيتحاسب على كل كلمه حساب الملكين في الدنيا قبل الأخره , هو المسئول لازم يبقى فاهم كده , معالي وزير الخاريه المصري اللي قبل مايبقى وزير خارجيه كان أغلب الشعب مجمع عليه ومستنيه بيقول ( العلاقه بين مصر وأمريكا جواز شرعي مش نزوه عابره !! ) , يا ريتها كانت نزوه وخلصنا يا مولانا , إنما جواز شرعي ؟ طب مين فيهم اللي بيلبس قميص النوم ؟! أنا ابن مين يا داده ؟! .
.
لمعالي وزير الخارجيه المصري أقول :
.
تنويه هام :
( هذا المقطع بتاع البلاط والسيراميك تم حذفه من قِبل الرقابه ) !!.
Mohamed Hussein
1 مايو
ولو كانت أمريكا متجوزه مصر جواز رسمي مش علاقه عابره يبقى احنا الشعب المصري بالكتير بنمثّل طقم الجيلي في الليله دي , عشان كده تلاقينا اتركنا عالرف سنين طويله جنب برطمانات المربى الفاضيه .
والنبي يا خوانا حد يبقى يفهم وزير الخارجيه لما يطلع في أي زياره بره يبقى يعمل زي إنعام سالوسه و ماينطقش خالص , يقول بس ( إن شاء الله , ألف مبروك , وربنا يتمم بخير ) .
Mohamed Hussein
1 مايو
كيس عيش فينو بايت بقاله 3 ايام , و خياره دبلانه و عدمانه العافيه , وعلبة زبادي مارضتشي ابص على تاريخها عشان مش اتصدم , أصلي جعان أوي وده اللي لقيته في السوبرماركت اللي جنبي , أدي أخرة اللي مايسمعش كلام مراته ويروح البيت عشان ياخد الساندوتشات بتاعته .
كويس إن أمي مش عندها حساب عالفيس بوك وإلا كان زمانها فضحتني و بستفتني , وقالت لي ترجع مصر دلوأتي حالا , أصل الأكل ده سعادتك عندنا في البلد بنعمله ( بسيسه ) للبط اللي مربيينه جنب البيت ..... يالله , اللهم لك الحمد , اللهم دمها نعمه واحفظها من الزوال .
Mohamed Hussein
1 مايو
ظاهرة غريبه جدا بدأت في الإنتشار , هي مش بدأت هي تقريبا جابت أخرها , ظاهرة الكاتبه الصحفيه المزه أو الكاتبه المزه الصحفيه أو بمعنى أصح المزه الكتابه الصحفيه
............. تحس إن رؤساء تحرير الصحف في مصر كل واحد فيهم جواه ( سبكي ) صغير بيحاول يطلّعه , صورة للمزه بحجم صغير و تحتها مقال , أي هري في الحماده , شوفت يا جدع المقال بتاع الأستاذه المزه الكاتبه الفلانيه ؟ لأ شوفت رقبتها اللي شبه رقبة ورده في زمانها , طب إيه رأيك في إسلوبها في الكتابه ؟ إيه رأيك إنت في البودي اللي متصوره بيه ؟ طب شوفت السلاسه اللي في كتاباتها ؟ لأ , شوفت إنت السلسله اللي نازله على صدرها ؟ .
.
ممممممممم اللي قبلينا قالو ( اللي بيزمر مابيخبيش دقنه ) , عشان كده عندي رررجاء من الساده الأفاضل رؤساء التحرير , ياريت الله يكرمكو ترحمو العقل البشري من هرتلة الكاتبات المزز وبدل ماتبقى صورتها 4 في 6 , والمقال متر ونص أد قماشة البنطلون على رأي عم جلال , أنا بقترح تلغو المقال خالص وتنزلو للمزه صوره بحجم المقال , وياريت لو تكون لابسه بنطلون سترتش , ساعتها أضمن لكو ملايين القراء والمتابعين ( زباين السبكي على قفا من يشيل ) , وممكن تغيّرو اسم الجريده لمجلة ( الشبكه اللبنانيه ) .
............. مين اللي قال البرادعي هو ضمير الأمه ؟ , السبكي هو ضمير الأمه !!.
ليست هناك تعليقات:
إرسال تعليق