Mohamed Hussein
22 مايو
حال مكتب الإرشاد مع شباب الإخوان
.
حمار كان ماشي وعلى ضهره ( غبيط ) و الغبيط زي مانتو عارفين بيبقى له فتحتين يعني جرابين , واحده عالشمال و التانيه عاليمين , الحمار قابل في طريقه اتنين شباب صغيرين , واحد منهم قال اللي في اليمين ده دهب واللي في الشمال مرجان والتاني قال لأ لأ وربي لأ , اللي في اليمين ده لولي واللي في الشمال كهرمان , الغبيط أصلا كان مليان تبن و التبن عمّال يطير منه على عنيهم ومناخيرهم فعماهم قالو لأ شوية التبن دول جايين من بعيد بس الهوا رماهم , الإتنين كسّلو يمدو إيدهم في الجرابين ويمسكو التبن بإديهم الحلوين , و لما اختلفو فكّرو و فكرو وفكرو و في النهايه أخدو القرار , و قالو خلاص يبقى نسأل الحمار !!.
Mohamed Hussein
22 مايو
البت بنتي الصغيره لسه ماكمّلتش 4 سنين بس بقت تعرف تزعق لي في التليفون , إمبارح قالت لي يا بابا انت كل يوم كل يوم كل يوم تقولي هجيب لك شوكلاته كندرجوي و مابتجبش , وانا احلف لها بأيمانات المسلمين إني مش لاقيها لا في الهايبر ماركتات ولا في السوبرماركتات الصغيره وهي تقولي لأ هتلاقيها , بس روح السوبر ماركت التاني وانت هتلاقيها , يعني يا لمار لازم شوكلاته على شكل بيضه و يكون نوعها كندر جوي ؟ طب ماينفعش كندر جوي الطويله دي مش البيضه ؟ أو شوكلاته تانيه على شكل بيضه بس مش كندر جوي ؟ لأ ما ينفعش .
.
الله يرحم أبوكي , كنت بوفّر شلن بالعافيه من مصروفي و اروح اشتري بيه عسليه من خالتك توحيده , كانت عسليه ناشفه زي الحطب , لا تتاكل ولا نيله , بس أهو على أد فلوسي و كنت بخبيها من أمي عشان ماتقولشي عليا مبذّر و بصرف فلوسي عالفاضي !!.
.
عموما يا لمار إحنا نازلين مصر بإذن الله , وهناك هتتظبّطو التظبيطه التمام , وأخركو هيبقى بسكوت الشمعدان بتاع طاهر القويري
Mohamed Hussein
21 مايو
و سمعت خير اللهم اجعله خير إن نتيجة فرز الأصوات في مركز و مدينة ستوكهولم بتاعة السويد بتقول إن عدد الأصوات 715 , حصل السيسي على 714 وحمدين على صوات واحد , مممممممممم أنا أول مره أعرف إن أخت حمدين عايشه في السويد , صحيح يا ولاد ( ما منِّك إلّا اللي من لحمك ) , ربنا يرجعها بألف سلامه .
.
بس دي كده مش تبقى انتخابات ديموقراطيه دي تبقى انتخابات عائليه , يعني المرشح من دول ياخد أصوات عيلته و صحابه الأنتيم , 6 % حلوين يا حمدين , شكلك من عيله كبيره و معارفك كتير !!.
.
طب والله كويس إن خالد على إنسحب , إذا كان حمدين بجلالة قدره خد 6% يبقى خالد على كان هياخد 0.00001 % ( بوينت أو أو أو أو وان بيرسنت ) , حاجه كده زي نسبة الإصابه بمرض كاواساكي في العالم ( مرض جلدي نادر نسبة الإصابي فيه تعمل لها بتاع 1 في الكذا مليون ) !!.
....................
أو جايز السيسي يكون بعت للمصريين اللي عايشين في السويد و السوايده لمبات موفره و جايز برضه يكون الكفيل بتاعهم ضغط عليهم وجايز اللي شغالين في السويد عمال تراحيله ومش فاهمين وجايز وجايز وجايز ( أنا معاك أهو لحد أخر حلقه من مسلسل : جايز ) بس يارب نعجب !!..
Mohamed Hussein
21 مايو
و بقى يجيلي طلبات صداقه من المزز بتوع أوروبا الشرقيه , أيوه الشقراوات دول , اللي هما من العبّ بتاع السويد و بندر سويسرا و الحتت دي , دخلت عالحساب لقيته حقيقي مش مضروب , معمول من سنين وعليه بوستس كتير و لايكات و كومنتات من صحابها الأنتيم ( شقراوات برضه ) , ممممممممممممم هو أنا صيتي وصل لبعيد كده ؟................... إنت بقيت إنترناشونال يا ثامح .
.
شوفتو كرم ربنا ؟ يعني كل ماعمل بلوك لخروف ألاقي طلب صداقه من مزه اوروبيه شرقاويه , و الخير لما بييجي بييجي مره واحده و يتعبّى في زكايب , إنما لأ , لأ , لأ , مش انا اللي أضعف قدام الحاجات دي , أنا متماسك أهو , مش جايز يكونو تبع المخابرات النمساويه مثلا و البرادعي زاققهم عليا ؟ , و بعدين هما في الأول والأخر بيبقو عاملين شبه عروسة المولد كده , مش فيهم روح , يعني بلاستيك , بالاستيك .
Mohamed Hussein
21 مايو
أحلام العصافير
.
نفسي في لحوقي ( طاجن ) رز معمر معمول في الفرن أبو قش بتاع أمي و جنب منك ديك بلدي صغير ( شامورت ) يكون مطبوخ على الكانون أبو حطب و جنبهم لمونتين مخللين من بلاص المش و عودين سريس , و بعد الغدا اشوي كوزين دره في نفس الفرن من فوق أو حباية بطاطا في الرماد بتاع الفرن من تحت و اكلها .
.
و بعد ماشرب كوباية شاي تقيله أخد صفيحة سمنه كبيره فاضيه واطلع عالترعه واشوف حته يكون فيها سمك وانزل المايه اعمل سدّين طين وانضح المايه اللي بينهم ( اسمها أوضبه ) بالصفيحه , و لما المايه تكون قربت تنشف يبدأ السمك الي في الأوضبه يظهر بقى ويبلبط ( مشهد يجنن ) , وامسكه بإيدي زي ما كنت بعمل زمان ( صيد السمك غيّه ).
كل اللي فات ده حلم سهل أوي ما عدا حكاية الصيد في الترعه دي , الناس كلها هتتريأ عليا و أولهم أمي , واللي رايح واللي جاي هيقولي اطلع يا دكتور ما يصحّش كده ..... بس مش مشكله , هبقى أروح اصطاد سمك في أي بلد بعيده مايعرفونيش فيها , يعني هي قريتنا بس اللي فيها ترعه ؟.
.
.............. مصر جميله خليك فاكر , مصر جميله .
Mohamed Hussein
21 مايو
العالم الكبير المهندس هاني عاذر اللي صمم مشاريع عملاقه في ألمانيا في مجال خطوط السكك الحديديه , مش الراجل ده مصري برضه ؟ يبقى أكيد عانى الأمرّين في مصر , ده مسيحي كمان يعني يا سواد السواد عاللي شافه قبل ما يسافر هو وأهله و أكيد يعني مايكون حضر تفجير كنستين تلاته وهو في مصر و أكيد مايكون لقى نفسه ماتعيّنش معيد وهو الأول عالدفعه واللي اتعين واحد مسلم وكان لازم يرفع قضيه عالجامعه عشان يعرف يتعين , مطلوب بقى من المهندس هاني عاذر انه يطلع في الجزيره ويلعن أبو جدود مصر أسوة بالعالم الكبير ( الواد عبد الله ) , بس هو مش هيعمل كده , عشان هو مصري ( مسحيي ولا مسلم مش بتفرق) بس مش إخوانجي .... أسيادنا الأشاوس اللي بيمشو عالحيط فهمو أنا بقصد ايه ولا لسه لهم مزاج يتكرّعو عندي في الصفحه بشعارات البحث العلمي و المحافظه على علماء مصر و شباب مصر هم زهرة المستقبل والكلام ده ؟!.
Mohamed Hussein
21 مايو
اعتذار واجب
.
حقك عليا يا عبد الله , هات يابني راسك ابوسها , انت معاك حق , لما تسافر بره مصر عشان تكمل دراستك لازم تطلع في الجزيره وتلعن أبو جدود مصر , وماتنساش ماتنساش في أي ندوه أو مؤتمر أو حتى قاعدة مصطبه عندك في شيكاغو تبقى تلعن فيها أبو جدود مصر برضه , ساعتها هتلاقي مصور الجزيره ظهر قدامك فجأه و هتلاقي نفسك بقيت بطل قومي عالفيس بوك , دانت عالم يا جدع هو انت أي حد , عالم كبير ومصر بنت الحرام دي بتطرد العلماء الكبار أمثالك و بتهتم بعبد العاطي بتاع الكفته و الهام شاهين , يموت البحث العلمي من بعدك يا عبد الله يا ولدي , يا خساره مصر من بعدك يا عبدالله ( إيموشن : بتشحتف ) , هه مبسوطين مني كده يا شباب ؟.
.
و يا عبد الله , لو جت لك فرصه خد الجنسيه الأمريكيه أو حتى الإسرائيليه و برضه هتفضل بطل قومي عندنا و هيبقى العيب على مصر بنت الحرام اللي ماسابتشي الغسيل اللي في اديها و العيال اللي هفتانين من الجوع و قعدت تغسلك رجلك بمايه وملح قل ماتنام .
ماهو شوف , طالما انت وصلت للجزيره و بتعرف تهين بلدك كويس تبقى اكيد وصلت لصفحات الإخوان و طالما وصلت لصفحات الإخوان يبقى هيتعاطف معاك الكولجيه وبس كده لعبت معاك يا معلم , بحث علمي ايه بقى ؟ ولا يلزمك الكلام ده , دانت بقيت اشهر من محمد غنيم اللي ضيع عمره كله فيها وشاف فيها السواد بس ماعملش زيك , ييجي ايه جنبك محمد غنيم ده ؟ ابن مين في مصر محمد غنيم ؟ قصدي ابن مين في قطر !!.
Mohamed Hussein
20 مايو
الحمد لله الحمد لله , ياااااااه دانا كان قلبي هيقع في رجلي , أصلي قريت خبر بيقول نتيجة الإنتخابات في قنصلية جده وحمدين خد 4 % , بس الحمد لله بعدها على طول قريت خبر إن حمدين خد في انتخابات السعوديه بالكامل 6 % , أيوه كده بقى , 6% غير 4 % خالص !! مممممممممم طب والله مانا عارف أقول إيه ؟ أنا صحيح مؤيد للسيسي لكن بحترم حمدين وشايف إنه مايستاهلش كده , إنما العيب مش عليه , العيب على أنصاره اللي مقضينها جعجعه عالفيس بوك .
يعني أنصار السيسي يجيبو له مجموع يدخله طب و انصار حمدين يجيبوله مجموع يدخله فصول محو الأميه ؟! , أومال فين بقى التيار الشعبي وحزب الدستور والثوريين واللي واللي واللي واحنا هنكسر الدنيا ونزلزل الزنازين ؟ عرفتو بقى إن أخركو ظاهره حنجوريه فيسبوكيه مالهاش وجود في الشارع و إن المحترم حمدين صباحي كان مسنود على حيطه مايله ؟!.
............... وانا كل خوفي لا شمللتكو دي توصل حمدين للمركز التالت !!.
Mohamed Hussein
20 مايو
كنت عايز اقول باختصار بس يارب يارررررب الناس تفهم , مصر فيها ألاف بيلعبو كوره , مش مشكله لما يكون فيها لاعب اخوانجي زي ابو تريكه , وفيها ألاف الشباب المخترعين مش مشكله لما يكون فيها شاب اخوانجي مخترع زي عبد الله , إنما نلف نلف نلف ونرجع لنفس الدايره أو لنفس الحقيقه اللي بنعمي عينا عليها , حكاية الإنتماء , مصر عمرها عمرها عمرها ما هتتقزّم وتبقى إخوانجيه و الإخوان عمرهم ما هيكبرو ويفهمو و يبقو مصريين ( صدّق أو لا تصدق ) , مش هنبطل احنا بقى لعب كوره باسم مصر عشان خاطر أبو تريكه إخوانجي ولا هنبطل نحلم ببحث علمي محترم عندنا عشان عبد الله قال انه مش عايز يرجع مصر .
.
إحنا دوله وهما عصابه , والحل بسيط خالص , أبو تريكه ياخد عبد الله في إديه ومعاهم شوية الإخوانجيه ويروحو يعملو لنفسهم دوله في قطر ولا مؤاخذه , أهي على أدّهم و كل فوله ولها كيّالها , أو على رأي المثل ... جحا أولى بلحم طوره !!.
Mohamed Hussein
20 مايو
و قالو السيسي قابل أنصاف الفنانين و أرباع الفنانين !! ......... مممممممممم أه مانا شوفتهم بنفسي , فاتن حمامه و حلمي بكر ومحمد صبحي , هما دول أنصاف الفنانين مش كده ؟!!.
Mohamed Hussein
20 مايو
مش بعرف أرد على شتيمة حد ليا بشتيمه مماثله , مش قلة حيله ولا قاموس الأباحه عندي ورق أبيض فاضي , بس مش عايز أقلب صفحتي ل حمامات رمسيس العمومي , فيه ناس بتغمض عينيها قبل ما بتقرا بوستاتي أو بتروح تقرا بوست في حته تانيه وتيجي تعلّق عندي ( تقريبا الصفحه عندي شرحه وبرحه ) , أو بيقرو البوستات بأماكن تانيه في جسمهم مش بعنيهم , مفيش مشكله كل يوم أحذف اتنين تلاته من المتدينين اللي بيشتمو بالاب والأم , يا ريتني كنت متدين زيهم عشان كنت اعرف العن سلسفيل أبوهم , لكني مش متدين و اهو بلوك بيكفي .
مش هوجع دماغي كتير في إني أحوّل واحد خروف لجينتل مان , و مؤمن تماما إنك لو قفلت عالخروف أوضه و شغّلت له موسيقى كلاسيك و أشعار نزار قباني لمدة 15 سنه برضه هيطلع منها غبي وارهابي .
Mohamed Hussein
20 مايو
عبد الله عاصم , شاب مصري مخترع , أهلا وسهلا , فيه زيه ألاف الشباب على فكره ( بس مش بيطلعو في الجزيره ) , سافر أمريكا ( وماله مش عيب ) , عادي لما يروح يكمل دراسته وابحاثه هناك , لحد ما ربنا ينفخ في صورة مصر ويبقى عندها بحث علمي حقيقي وتتبنّي للمواهب الشابه , طب يا عبد الله انت سافرت تكمل دراستك وانت لسه كتكوت في عالم البحث العلمي ( يعني في ألف باء على فكره ) , إيه بقى حكاية انا مش راجع مصر ولو رجعت مصر هيرموني في السجن ( البؤ ده بتاع الجزيره وموزه دانا حافظهم زي كف ايدي ) وأكيد ما تكون اتظبطت بقرشين حلوين عشان تقول البؤ ده ( أكبر منك واتظبط عادي , حتى اسال وائل قنديل وعلاء صادق ومحمد محسوب علينا راجل ) .
يعني انت يا عبد الله هتبقى قاعد في مدرستك أو بيتك بتخترع وييجي ناس يقبضو عليك في مصر ؟ عشان بتخترع ؟ ولا انت لازم بعد ما تخترع تروح تحرق عربيتين أمن مركزي ؟ طب انت عارف ان فيه زيك ألاف ابحاثهم اندفنت أو سافرو وكملوها وحصلو على أكبر الجوايز بس مقالوش البؤين بتوع الجزيره دول ؟ طب تعرف ان حلمهم انهم يرجعو مصر عشان يفيدو بلدهم ؟ لأ ماتعرفش .
.
طب انت قررت انك مش راجع مصر يعني ؟ قرار نهائي ؟ وفاكر ان مصر هتقعد ترفّص برجليها ومش هيجيلها نوم طول الليل بسبب بعد جنابك عنها ؟ متخيّل إن نهر النيل هيبطل يجري ونسمه العصاري هتختفي منها وابو الهول هنصحى مش نلاقيه ؟ طب فاهم إن الأرض هتكف عن الدوران و الشمس هتبطّل تتعامد على أنف ملوك الفراعنه ؟ طب فكرك يعني اني مش هتعشى النهارده بسبب إنك مش راجع مصر ؟
.
يا عبد الله , خليني أتنبأ بمستقبلك طالما طلعت شاب اخوانجي يعني متربي في زريبة السمع والطاعه , إنت هتكبر وتكبر وتكبر لحد ماتوصل للمستوى اللي تشيل فيه جزمة المرشد و ده أخرك على فكره , ملعون أبوها البطن اللي شالتك
Mohamed Hussein
20 مايو
أوِِّل الرقص حنجله , اللي تخاف من العِرسه ماتربيش كتاكيت , كان فاكر تحت القبه شيخ , يموت الزمار وصوابعه بتلعب , التاجر لما يفلّس بيدور في دفاتره القديمه , جاب الديب من ديله , بيت النتّاش ما يعلاش , وان كان لك صاحب لا تحاسبه ولا تناسبه !!.
.
هل تعلم إن عدد الأمثال والحكم المصريه أكبر من عدد سكان قطر ؟ وإن بعض الأمثال دي بيرجع تاريخها ل مئات وربما ألاف السنين ؟ هل تعلم إن الأشعار والقصائد والأزجال اللي اتكتبت عن مصر لو طبعتها على ورق أبيض و رصيت الورق ده ورقه جنب ورقه جنب ورقه مش هتكفيهم مساحه أد قطاع غزه ؟ هل تعلم إن أغلب الدول العربيه لحد النهارده ماشيين بالأمثال والحكم المصريه وعايشين عليها من غير حتى مايكونو فاهمين معناها بالظبط أحيانا ؟ .
.
و عشان حضرتك تبقى وطني بجد لازم تحب البلد دي على بعضها كده يعني لوكشه واحده , تحت تاريخها وحاضرها ومستقبلها , شوارعها و حواريها , تحب شكل الشيخ ابو عمه و شكل القسيس أبو عمه وشكل النيل أبو فرعين و شكل العسكري أبو بياده , شكل الكنيسه والهرم والجامع والبيت النوبي و العماره العاليه والبيت اللي معمول بالطين في الفلاحين .
بعد كده تقدر تعمل مظاهرات أو تعمل ثوره أو تعمل شألباظ مش مشكله , لكن ماتوصلش ليوم إنك تصغّر فيه بلدك لا قدام نفسك ولا قدام الغريب , بلدك وجيشها هما الحيطه اللي ساترانا والعكّاز اللي بنتعكّز عليه , لا تهد حيطتك وتعرّى نفسك ولا توقّع عكازك عشان بعدها على طول هتلاقيك نايم على بطنك ومش قادر !! .
.
باختصار يعني ماينفعشي تكون وطني اوي وانت ودنك طولها 25 سم , يعني ما ينفعشي تبقى وطني وحمار , اختار حاجه من الإتنين وانت اللي في إيدك القرار .
Mohamed Hussein
19 مايو
ليبيا بتتحرك , ربنا يكتب لها السلامه و يرحمها من ميليشيات الإخوان وفلوس موزه و تميم , مش بستبعد يكون لجيشنا المصري دور في اللي بيحصل في ليبيا , على الأقل في الدعم , ماهو مش معقول ابدا نسيب دوله عربيه مجاوره لينا وكل شويه يخطفو رئيس وزاره أو يهرب منها مسئول أو يطلع شوية ارهابيين صيّع يعملو عرض عسكري , من بعد رحيل القذافي وليبيا مافهاش دوله و ده طبعا مردوده علينا بيكون في تهريب سلاح وارهابيين وتبقى حدودك الغربيه مشاع , ولو حصل وكان فيه تدخل مننا فده طبيعي جدا ومقبول , إنت بتنقذ دوله عربيه من مستقبل زي الهباب و في نفس الوقت بتأمن حدودك , يعني المسأله فيها أمن قومي والجيوش المحترمه بتعمل كده عادي , و طالما قولنا الجيوش المحترمه يبقى أكيد جيشنا عمل كده .
Mohamed Hussein
19 مايو
الناس عايزه تفرح , مشتاقه تفرح , بيدوّرو عالفرحه زي اللي بيدور على ابره في كوم قش , هما دول المصريين , الراجل اللي بيرقص ده ممكن ماتلاقيش في جيبه جوز جنيهات على بعض , بس مش هتلاقيه جعان للأكل , هتلاقيه جعان للفرحه .
أغنية ( بشرة خير ) , تسلم الإيد اللي كتبت و يسلم صوتك و إحساسك يا جسمي .
Mohamed Hussein
19 مايو
أستاذتي الكاتبه المصريه الأصيله الرائعه فريده الشوباشي حصل إنها دايما مش بتقبل أي إهانه لإسم الزعيم الراحل جمال عبد الناصر , لا على صفحتها ولا حتى لما بتكون ضيفه في أي برنامج , وفيه ناس بيحلو لهم إنهم يجيبو في سيرة ناصر عمّال على بطال كنوع من استعراض الثقافه الديموقراطيه العميقه و الليبراليه اللي ماتخرّش المايه .
وفيه برامج وقنوات مفتوحه وفاتحه أحضانها لأي حد يهين اسم عبد الناصر , دي فيها لقمة عيش حلوه يعني و سبوبه جايز , وعبد الناصر الله يرحمه مات من نص قرن تقريبا , مات ولسه صوره متعلقه في بيوت وبرلمانات في دول مانسمعش عنها , يابني الزعامه دي مش لعب عيال ولا هي الحكايه ظاهره صوتيه حنجوريه .
.
فريده الشوباشي من عجينة الشعراء اللي معجونين بتراب البلد دي , زي الأبنودي و نجم , اللي بيشوفو مصر دي مهره ( فرسه ) ممكن تتعب شويه و ترقد و يتنطط على ضهرها شوية كلاب لكن لما بتقوم و تفز بتدوس على كلاب السكك .
.
اللي يعرف حجم مصر وقيمتها يعرف إنك ماينفعشي تقارنها بقطر راس براس وتقول دي دوله ودي دوله , ويعرف إن مصر اللي حكمها محمد على وعبد الناصر و مينا وعمرو بن العاص وكليوباترا ماتتحكمشي بتويتات من وراء البحار يا مثقفين !!.
Mohamed Hussein
19 مايو
من أجمل الحاجات اللي قالها السيسي في حواره امبارح إن مش كل التفاصيل ينفع تتقال .
معاك حق يا سيسي , وشغل هبلوله الشغاله ده مالوش أي تلاتين لزمه , دانا شوفت ناس من النشطاء الفيسبوكيين كانت عايزه تعرف خطة الجيش في محاربة الإرهاب في سينا و بيقولك نعرضها في حوار ولا مؤاخذه مجتمعي , و المفروض بقى المتحدث العسكري يطلع كل يوم بعد نشرة 9 يقول لنا عملو ايه من ساعة ما صحيو من النوم و طلعو بكام غاره جويه و قتلو كام ارهابي وحرقو كام مزرعة بانجو و عملو كام تدريب رمايه و اشترو كام بندقيه وكام مسدس وجابو المسدس بكام , مممممممم طب ما تاخد تليفون وزير الدفاع وتكلمه انت يا صاحبي و تسأله حتى المدام طابخه ايه النهارده عشان تتطمن بنفسك .... حريه دي ولا أتامه ؟!
Mohamed Hussein
19 مايو
حمل كاذب
.
و بعد سنه واتنين نكتشف إن التنظيم الدولي الهلامي اللزج اللي اسمه الإخوان قعد 84 سنه يربّي في بالونه مش أكتر , وكل اللي كان محتاجه ( سن إبره ) وتلاقيه بح , و بح يعني بح , وقالك أنصارنا 5 مليون لأ لأ دول 50 مليون , لا العدد الأصلي 15 مليار بحسب أخر احصاء لقناة الجزيره , وقالك منتشرين في كل شبر في العالم والمجموعه الشمسيه و لنا رجالتنا في درب التبانه و جاهزين , وعندنا مكاتب اقليميه وكوادر , وقالك لنا هدف وعندنا عقيده ولا مؤاخذه , وفي النهايه تحسهم عاملين زي واحده ست افتكرت نفسها حامل , 84 سنه وهي حامل في مشروع عملاق ضخم , وكل شويه بطنها تكبر و تروح هي تشتري لبس للبيبي اللي جاي و تقول هانت , و بطنها تكبر تروح تشتري له بافيتات و تقول قرّبنا خلاص , بطنها تكبر تروح تشتري له شوية ألعاب و في النهايه تكتشف إن حملها كاذب , يعني مجرد إنتفاخ !!.
.
فين الإخوان يا إخوان ؟ ورّوني نفسكو كده , فين قوتكو و جبروتكو ؟ ماهي مصيبتكو السوده والأكبر على الأطلاق و غلطتكو اللي جابت ضٌلفها من البدايه إنكو اخترتو مصر تحديدا عشان تبقى المركز الرئيسي لتنظيمكو الهلامي الوثني , مصر يا ولاد الهبله ؟ مصر يا بهايم ؟ مانتو لو كنتو بتقرو تاريخ مكانشي ده بقى حالكو , طب كنتو اسألو هولاكو و نابليون بونابرت , اسألو جماجم الغزاه اللي مدفونه في ترابها !!.
Mohamed Hussein
18 مايو
طب أنا ليا ساعه مادخليش ولا زبون الصيدليه , هو السيسي يطلع في برنامج في مصر يقوم يوقف حالنا إحنا هنا في السعوديه ؟ شعبيه دي ولا زعامه ؟ .... اللهم صل عالنبي , اللهم صل عالنبي , عشان محدش يقول بنحسد ولا حاجه , شكلك بقيت أشهر من شيكابالا يا سيسي .
Mohamed Hussein
18 مايو
طول عمري براهن عالحصان الخسران , تقولشي غيّه يا جدع , لما خلصت الثانويه العامه اخترت صيدليه مش طب , و لما شجعت فريق كوره اخترت الزمالك مش الأهلي و لما انتخبت في الإنتخابات اللي فاتت اخترت حمدين , المره ده قلت صوتي للسيسي ( رغم اني ماعرفتش أنتخب ) , خايف عليك يا عبفتاح ياخويا تصيبك نفحه من نفحاتي !!.
Mohamed Hussein
18 مايو
الصبر مفتاح 14
.
طب والله صدق اللي قال ( ضاقت فلما استُحكمت حلقاتها فُرجت... وكنت أظنها لا تفرج ) , و هنروح بعيد ليه ؟ , مره وانا في الأجازه اللي فاتت كانت حصلت أزمه كبيره في المايه المعدنيه في مصر , واحد هيسألني ويقولي إنتو بتشربو مايه معدنيه ليه ؟ هقول له والله يا كابتن ماعرف , اسأل مراتي .
.
تقريبا كده والله أعلم عشان ماية الحنفيه بينزل معاها طحالب و فطريات وسمك سردين صغير أحيانا , داحنا كمان مش بنشرب أي نوع مايه معدنيه , ماهو انت مش واخد بالك , إحنا عملنا عالنت سيرش و ميرش وسألنا اللي رايح واللي جاي على أنواع المايه المعدينه , ولاد الحلال قالو إن النوع الفلاني اتعمل عليه تحاليل وطلع مليان بلاوي و لا يصلح للإستهلال الأدمي , والنوع العلاني فيه نسبة الصوديوم عاليه أوي , يعني علو كده , واستقر بينا المطاف عند ماية نستله تحديدا .
.
في الوقت ده كان فيه مصنع من مصانع نستله اتسرق ولا اتحرق بجاز مش فاكر , المهم المايه كانت شبه مقطوعه من السوق , كنا وقتها في رمضان وصابحين رايحين البلد عشان نفطر هناك يومين , انا نزلت من ليلتها أدور على نستله في المحلات مالقتشي , رجعت لمراتي وانا موطّي راسي في الأرض ومش عارف أرفع عيني , قالت لي بس تبقى مالقتشي ماية نستله , حلفت لها بكل أيمانات المسلمين والهندوس إني لفيت لحد ما كاوتش العربيه اتنحل ومش لاقي .
.
و صبحا الصبح ركبنا العربيه عشان نروح المنصوره , مراتي كانت عامله شبه الإخوان يوم 30 يونيو , نزل عليها سهم الله , وقاعدين بقى نفكر , هنروح ازاي من غير ماية نستله ؟ هنعيش ازاي من غير نستله ؟ هنصوم ازاي هنفطر إزاي ؟ وفضلنا كده لحد ما وصلنا ميت غمر , وهناك يشاء السميع العليم إننا نلاقي كراتين نستله مرصوصه قدام المحلات عالطريق , وفي نفس ذات الوقت ألمح بطرف عيني عربية نستله معدّيه , يافرج الله , يامانت كريم يارب , أنا شوفت العربيه من هنا و كسرت عليها من هنا , ونزلت دخلت راسي من إزاز السواق وعملت بإيدي في مناخيري حركه كده بتاعة الشمامين , يعني كداهو , قربت من ودن السواق وسألته بالراحه : معاك ماية نستله اللي هي لتر نص يا معلم ؟ السواق قعد يبص يمين وشمال لحد ما اتأكد إن الطريق أمان , وقال لي معايا يا معلم , تقدر تشيل كام كرتونه ؟ قلت له أشيل 4 يا معلم , هتحسبهم بكام ؟ السواق بص يمين وشمال تاني وقال لي الكرتونه على 45 مقفوله ؟ ليه كده بس يا معلم , إنت كده سعرك حراق أوي وانا هبقى زبونك هو أنا زبون طيّاري ؟ قال لي أنا مديك صنف إكسترا معتبر واسأل في السوق أو دوق لو تحب , قلت له خلاص يا معلم أنا اشتريت .
.
المهم دخلنا في شارع جانبي متداري ونقلت ال 4 كراتين في عربيتي , في اللحظه دي الدمويه ردت في وش مراتي واحساسها كان زي إحساس المصريين لما عبرنا خط بارليف , أنا نفسي حسيت بالفخر والفخار , وقلت والله لما أكبر وابقى جد هحكي لأحفادي عن بطولاتي دي وهقول لهم إني حضرت ثورتين في 11 و 13 وقدرت اجيب 4 كراتين مايه أيام أزمة المايه المعدنيه سنه 12.
.
عايز أقول إن مصر مليانه خير يا ولاد بس عايزه اللي يلفّ , لأ يا جدع حشيش إيه بس ؟ بقولك اللي يلف يعني يدور في شوارعها وحواريها , وعايز أنصح كل زوج و زوجه مش لاقيين ماية نستله في القاهره إنهم يطلعو على طريق بنها المنصوره وهيلاقوها , الحكايه بس محتاجه صبر , و علي رأي اللي قال : الصبر مفتاح 14.
Mohamed Hussein
17 مايو
أيام ناشفه زي الحطب
.
و بالنسبه لشغلنا يعني و مهنتنا الساميه دي بيبقى الزبون اللي هو الشباب السلفي الكيوت المتدين اللي لابس جلابيه قصيره كزبون يعني مالهوش أي تلاتين لزمه , بييجي الصيدليه مره كل شهر ياخد لبن للعيال و بامبرز و كان الله بالسر عليم , لكن تعب و ما تعب و دكاتره ماتلاقيش , غالبا بيقضّيها بقدونس مغلي للمغص وكسبره مغليه للإسهال و شبت مغلي للحموضه و أي ورقه خضره تغليها في المايه تبقى علاج لحاجه معينه من مختلف الحاجات .
إنما نادرا ما بيكتشف الشاب الجميل إن الشبت والكسبره و البقدونس دول بيُستخدمو MAINLY في عمايل المحشي و الممبار , و بيضطر يروح لدكتور بعد ما يكون فرفر و جاب أخره , وبعدها يجيلي بقى عشان ياخد الدوا , وهنا بتبدأ ملحمة صرف الدواء لشاب سلفي متدين , هو أنا كرهت أم المهنه الساميه دي من شويه ؟
.
بيبقى شكاك جدا , غالبا عنده وسواس قهري وحاسس إن فيه مؤامره كونيه ضده , يمسك كل علبة دوا يقلبها يمين وشمال يشوف التاريخ و السعر , وبعدين يطلع النضاره ويحاول يقارن اسم الدوا بالإسم اللي في الروشته يلاقي نفسه مش عارف يقوم يشيل النضاره تاني , يسألني نفس السؤال 4 مرات , هو غالبا عنده اعتفاد إني عايز أسمّ مراته , ويقولي هي الجرعه دي اللي كتبها الدكتور ؟ أه والله يا حاج ؟ طب هي مكتوبه فين الجرعه ؟ أهي يا حاج في الحته دي , أه طب سعر الدوا ده ثابت في كل الصيدليات ؟ أه ثابت يا حاج , أومال انا ليه بلاقي البامبرز عندكو ارخص من الصيدليه اللي جنبك بريالين ؟ عشان ده بامبرز يا حاج مش دوا , وهو البامبرز مش بيبقى مسعر ؟ لا يا حاج ؟ تبقى الصيدليه التانيه حراميه ؟ أه يا حاج غالبا كده , طب أنا هاخد الدوا أورّيه للدكتور , وماله يا حاج ياكشي توريه لعبفتاح السيسي حتى , طب هات فاتوره عشان احتمال أرجع الدوا ده شكله عندي , حاضر يا حاج .
.
المهم إني بعد 37 سؤال بفصل تماما و أقوم راجع لورا واسيبه يقلّب في البضاعه براحته , إلهي ربنا يكرمه ويعرف علبة الدوا دي دكر ولا نتايه ؟ مصيبه لو طلعت نتايه و هو لمسها بإيده , و بسرح أنا بقى في أي حاجه عشان مش أنفعل , أي حاجه أي حاجه , هو فيه حد بيسرح و بيبقى عارف هيسرح على فين ؟ أهو , كان عندي واحد منهم من شويه , ذهني خدني لاعلان بتاع شاي و تخيلت نفسي الست التخينه دي ( مالك يا راجل ؟ أعملك شاي ؟ ) و بعدها مباشرةً تخيلت نفسي عمر بن أبي ربيعه وقعدت أردد بيت الشعر ده ( ألا ليتَ قبري يومَ تُقضى منيّتي .... بتلكَ التي بينَ عينيكِ و الفمِ !! )......... أنا شكلي كده اتجننت باين , والنبي يا حاج ألاقيش عندك زوربيح مغلي لعلاج الجنون ده ؟!
Mohamed Hussein
17 مايو
التقارير كلها بتقول إن السيسي مكتسح ومسيطر , يعني حكاية توقعاتي و ال 60 % اللي انا قلت عليها دي طلعت فطشه ( 60/40 ) , وانا يا عبقتاح يابني كنت عايزك تنجح وادخّلك معهد لا سلكي , أتاريك حاطط عينك عالشهاده الكبيره يا ضاكتور , كنت هضيع مستقبلك بإيدي يا ولدي .
Mohamed Hussein
17 مايو
مش هنسى أبدا قبل 30 يونيو 2013 بكام يوم , أخويا سألني : إنت فاكر مرسي هيمشي فعلا يوم 30 ؟ قلت له أه هيمشي , قال لي عشان الناس مش عايزاه ؟ قلت له لأ : الناس والشوارع والحواري , وتراب الأرض مش طايقهم !!... ده كان إحساس جوايا واصل لدرجة اليقين .
كنت أياميها في مصر و نزلت الثوره و شوفت فرحت الناس واعلام مصر ماليه البلكونات , الناس بتغني وترقص , العائلات جايه بأطفالها كأنه كارنافال , اللي جاي ماشي واللي جاي في عربيته واللي راكب هو ومراته وولاده موتوسيكل ب 3 عجلات ,كأننا في اليوم ده انتصرنا عالصهاينه تاني .
و بنفس الشعور حاسس إن الأرض في مصر دلوأتي بتتنفس , بتاخد نفسها بعمق , بتتنهّد جايز بعد رحلة سفر شاقه و بتشرب بؤ مايه , لما الشعب ينزل وهو راكن ضهره على جيش حاميه و يبقى الإختيار بين اتنين مصريين رجاله بجد , إنتخب حمدين ولا انتخب السيسي , مش مهم , المهم إن الأرض هتتكلم مصري !!.
Mohamed Hussein
16 مايو
أنا السابق جنون الناس
بكام فدّان
و ساعة الحاله بتجنن
حاجات فيكي تجنني
.
و بس الفرق مش بنسى
و في الحالتين أكون إنسان
و لو عقلي ده راح مني
.
أنا الإنسان أنا بالذات
و لا بتفرق معايا حالات
و إكمني بموت فيكي
و اموت من قهرتي فيكي
و إكمني و إكمني !!.
.
.
محمد حسين
Mohamed Hussein
16 مايو
حكاية اسمها الكفر على سجادة الصلاه !!.
.
طبيبة سودانية اسمها (مريم يحيى إبراهيم) عمرها 27 سنة، اتولدت لأب سودانى (مسلم) وأم أثيوبية (مسيحية)، أبوها تركها مع أمها وهى عمرها 6 سنوات، أمها ربتها و كبرت وهى مسيحية، بيحاكموها دلوقتى فى السودان بتهمتى (الارتداد عن الإسلام) و (الزنا) لزواجها من رجل مسيحى، أعطتها محكمة الخرطوم مهلة لحد النهاردة للعودة للإسلام - اللى هى لم تعتنقه أصلاً - وإلا تُواجه عقوبة الإعدام ! اليوم تم الحكم عليها بالإعدام وتطبيق حد الردة، مريم الآن محتجزة وهى حامل فى الشهر الثامن مع طفلتها البالغ عمرها 20 شهراً.
.
إنتهت المأساه أو الحكايه , عرفتو ليه انا فرحت أوي بثورة 30 يونيو أكتر من فرحي ب 25 يناير ؟ عشان هو ده دين ربنا اللي بيفهمه عمر البشير , وهو ده دين ربنا اللي بيفهمه الإخوان وكانو هيطبقوه على أهل مصر الطيبين .
.
المسيحي في أرضنا دايما مدان ومتهم بالكفر , وعيشته بينا هي محض تكرّم وتفضل من جنابنا عليه حتى لو كان سابقنا في اعمار نفس الأرض ب 600 سنه ؟ حتى لو كان هو جدنا و جد جدنا , يدفع ضرايب ولا يدفع جزيه ؟ احنا اللي بنقرر , يدخل الجيش و يحارب و يدافع عن ارضنا بس وقت الجد هو كافر و مالهوش ديه , قتله حلال , ونساؤهم سبايا لنا .
.
ولما البني أدم يبقى مولود لأب مسلم وأم مسيحيه و يتربى مع الأم المسيحيه لازم يبقى مسلم , إزاي ماعرفش , طب لو مابقاش مسلم ؟ يبقى كافر و زاني وابن صرمه .
.......... ده دين ربنا ولا دين الشيطان يا ولاد الكلب ؟!.
.
أعظم حاجه في إسلامنا هي العقيده و أسوأ حاجه هي معتقديها !! , في السودان : فقر وجوع و مرض و أرض اتقسمت و بتتقسم و هتتقسم , ورئيس من أغنى أغنياء العالم بس بيطبق شرع ربنا و لا مؤاخذه ,............ تبّت يدا عمر البشير وتبّ !!
Mohamed Hussein
15 مايو
بعد ما شوفت جزء من الحلقه بتاعة ريهام سعيد مع الدكتوره نهى الملحده , وخصوصا الفقره اللي ريهام البسكوته بتطرد فيها نهى البسكوته برضه و تقول لها : إمشي اطلعي بره من هنا , شيلي المايك بره مش هنا , وهي ترد : الدكتوره نهى مايتقالشي لها الكلام ده !!.
و أأأأأه يا مراري ياني , قال يعني الدكتوره نهى بنت السبعاوي طه ولا التمنياوي طه , المهم بقى وخلاصة الكلام انا لما شوفت الفقره دي عرفت الحل الأمثل والنموذجي للي زي البسكوته ريهام والبسكوته نهى .
.
أنا لما أنزل مصر هاخدهم معايا في العربيه , كويس ؟ واروح بيهم البلد عند أمي , كويس ؟ عندنا قدام البيت نص فدان معمول فيه مشتل رز , كويس ؟ في الوقت ده تحديدا هيكون موسم تشتيل الرز , يعني توزيع الرز من أرض المشتل لكامل النص فدان , المهمه دي بيعملها الستات , كويس ؟
و بس بقى نشوف جلابيتين قدام لريهام و نهى و ننزلهم في قلب الأرض اللي غرقانه مايه ( يعني في الطين والوحل ) , يشتّلو النص فدان رز , شتله شتله جنب بعض بمستوى معين , الحكايه دي هتاخد منهم 12 ساعه , هيبقو موطيين أغلب الوقت .
المهم بعد ما يخلصو تشتيل النص فدان هيرجعو البيت خلصانين , هتقوم البسكوته ريهام تبطّل نحنحه وسهوكه وغرغره في الكلام وهتلاقي الدكتوره نها سألت أمي عن سجادة الصلاه , و صلت العشا و حمدت ربنا على نعمة الصحه ونامت زي القتيله .
.
فيه ناس كتير في مصر بتبقى مشكلتهم الأكبر والأعظم على الأطلاق إن ماعندهمشي مشكله !! , عشان كده بتبقى بني أدمه كويسه وبسبب الفراغ القاتل ده تتحول وتبقى ريهام سعيد أو تتحول و تبقى نهى السبعاوي طه , ملحده وأفتخر !!.
Mohamed Hussein
15 مايو
أجمل حاجه في انتخابات 2014 إن مفيش شحن للناس في اتوبيسات و جرارات زراعيه ومقاطير و عربيات نص نقل زي اللي رايحين سوق أبو شقوق بتاع المواشي , فيه بني أدمين بيتحركو من نفسهم و يختارو بإرادتهم , فيه أسر مصريه جايه تقول البلد دي بلدنا احنا , نفس مشهد ثورة 30 يونيو بيتكرر بالظبط , ستات مصر الهوانم اللي راسهم مرفوعه دايما ( مش بيروحو الغيطان عشان يُغتصبو ) , و شباب مصر الرجاله أوي ( مش اللي بيسيب مراته تُغتصب عشان يحمي روحه ) , وأطفال شايلين علم مصر ( مش علم القاعده ولا حماس ) , هي دي الأسره المصريه , اللي بتيجي بريحة شوارعها و حواريها , هما دول ملح الأرض .
...... مصر دي جميله أوي من غير الإخوان والسلفيين , مصر جميله أوي بالمصريين اللي فيها , مش مهم تنتخب مين طالما هتنتخب بلدك و علمها ونشيدها .
22 مايو
حال مكتب الإرشاد مع شباب الإخوان
.
حمار كان ماشي وعلى ضهره ( غبيط ) و الغبيط زي مانتو عارفين بيبقى له فتحتين يعني جرابين , واحده عالشمال و التانيه عاليمين , الحمار قابل في طريقه اتنين شباب صغيرين , واحد منهم قال اللي في اليمين ده دهب واللي في الشمال مرجان والتاني قال لأ لأ وربي لأ , اللي في اليمين ده لولي واللي في الشمال كهرمان , الغبيط أصلا كان مليان تبن و التبن عمّال يطير منه على عنيهم ومناخيرهم فعماهم قالو لأ شوية التبن دول جايين من بعيد بس الهوا رماهم , الإتنين كسّلو يمدو إيدهم في الجرابين ويمسكو التبن بإديهم الحلوين , و لما اختلفو فكّرو و فكرو وفكرو و في النهايه أخدو القرار , و قالو خلاص يبقى نسأل الحمار !!.
Mohamed Hussein
22 مايو
البت بنتي الصغيره لسه ماكمّلتش 4 سنين بس بقت تعرف تزعق لي في التليفون , إمبارح قالت لي يا بابا انت كل يوم كل يوم كل يوم تقولي هجيب لك شوكلاته كندرجوي و مابتجبش , وانا احلف لها بأيمانات المسلمين إني مش لاقيها لا في الهايبر ماركتات ولا في السوبرماركتات الصغيره وهي تقولي لأ هتلاقيها , بس روح السوبر ماركت التاني وانت هتلاقيها , يعني يا لمار لازم شوكلاته على شكل بيضه و يكون نوعها كندر جوي ؟ طب ماينفعش كندر جوي الطويله دي مش البيضه ؟ أو شوكلاته تانيه على شكل بيضه بس مش كندر جوي ؟ لأ ما ينفعش .
.
الله يرحم أبوكي , كنت بوفّر شلن بالعافيه من مصروفي و اروح اشتري بيه عسليه من خالتك توحيده , كانت عسليه ناشفه زي الحطب , لا تتاكل ولا نيله , بس أهو على أد فلوسي و كنت بخبيها من أمي عشان ماتقولشي عليا مبذّر و بصرف فلوسي عالفاضي !!.
.
عموما يا لمار إحنا نازلين مصر بإذن الله , وهناك هتتظبّطو التظبيطه التمام , وأخركو هيبقى بسكوت الشمعدان بتاع طاهر القويري
Mohamed Hussein
21 مايو
و سمعت خير اللهم اجعله خير إن نتيجة فرز الأصوات في مركز و مدينة ستوكهولم بتاعة السويد بتقول إن عدد الأصوات 715 , حصل السيسي على 714 وحمدين على صوات واحد , مممممممممم أنا أول مره أعرف إن أخت حمدين عايشه في السويد , صحيح يا ولاد ( ما منِّك إلّا اللي من لحمك ) , ربنا يرجعها بألف سلامه .
.
بس دي كده مش تبقى انتخابات ديموقراطيه دي تبقى انتخابات عائليه , يعني المرشح من دول ياخد أصوات عيلته و صحابه الأنتيم , 6 % حلوين يا حمدين , شكلك من عيله كبيره و معارفك كتير !!.
.
طب والله كويس إن خالد على إنسحب , إذا كان حمدين بجلالة قدره خد 6% يبقى خالد على كان هياخد 0.00001 % ( بوينت أو أو أو أو وان بيرسنت ) , حاجه كده زي نسبة الإصابه بمرض كاواساكي في العالم ( مرض جلدي نادر نسبة الإصابي فيه تعمل لها بتاع 1 في الكذا مليون ) !!.
....................
أو جايز السيسي يكون بعت للمصريين اللي عايشين في السويد و السوايده لمبات موفره و جايز برضه يكون الكفيل بتاعهم ضغط عليهم وجايز اللي شغالين في السويد عمال تراحيله ومش فاهمين وجايز وجايز وجايز ( أنا معاك أهو لحد أخر حلقه من مسلسل : جايز ) بس يارب نعجب !!..
Mohamed Hussein
21 مايو
و بقى يجيلي طلبات صداقه من المزز بتوع أوروبا الشرقيه , أيوه الشقراوات دول , اللي هما من العبّ بتاع السويد و بندر سويسرا و الحتت دي , دخلت عالحساب لقيته حقيقي مش مضروب , معمول من سنين وعليه بوستس كتير و لايكات و كومنتات من صحابها الأنتيم ( شقراوات برضه ) , ممممممممممممم هو أنا صيتي وصل لبعيد كده ؟................... إنت بقيت إنترناشونال يا ثامح .
.
شوفتو كرم ربنا ؟ يعني كل ماعمل بلوك لخروف ألاقي طلب صداقه من مزه اوروبيه شرقاويه , و الخير لما بييجي بييجي مره واحده و يتعبّى في زكايب , إنما لأ , لأ , لأ , مش انا اللي أضعف قدام الحاجات دي , أنا متماسك أهو , مش جايز يكونو تبع المخابرات النمساويه مثلا و البرادعي زاققهم عليا ؟ , و بعدين هما في الأول والأخر بيبقو عاملين شبه عروسة المولد كده , مش فيهم روح , يعني بلاستيك , بالاستيك .
Mohamed Hussein
21 مايو
أحلام العصافير
.
نفسي في لحوقي ( طاجن ) رز معمر معمول في الفرن أبو قش بتاع أمي و جنب منك ديك بلدي صغير ( شامورت ) يكون مطبوخ على الكانون أبو حطب و جنبهم لمونتين مخللين من بلاص المش و عودين سريس , و بعد الغدا اشوي كوزين دره في نفس الفرن من فوق أو حباية بطاطا في الرماد بتاع الفرن من تحت و اكلها .
.
و بعد ماشرب كوباية شاي تقيله أخد صفيحة سمنه كبيره فاضيه واطلع عالترعه واشوف حته يكون فيها سمك وانزل المايه اعمل سدّين طين وانضح المايه اللي بينهم ( اسمها أوضبه ) بالصفيحه , و لما المايه تكون قربت تنشف يبدأ السمك الي في الأوضبه يظهر بقى ويبلبط ( مشهد يجنن ) , وامسكه بإيدي زي ما كنت بعمل زمان ( صيد السمك غيّه ).
كل اللي فات ده حلم سهل أوي ما عدا حكاية الصيد في الترعه دي , الناس كلها هتتريأ عليا و أولهم أمي , واللي رايح واللي جاي هيقولي اطلع يا دكتور ما يصحّش كده ..... بس مش مشكله , هبقى أروح اصطاد سمك في أي بلد بعيده مايعرفونيش فيها , يعني هي قريتنا بس اللي فيها ترعه ؟.
.
.............. مصر جميله خليك فاكر , مصر جميله .
Mohamed Hussein
21 مايو
العالم الكبير المهندس هاني عاذر اللي صمم مشاريع عملاقه في ألمانيا في مجال خطوط السكك الحديديه , مش الراجل ده مصري برضه ؟ يبقى أكيد عانى الأمرّين في مصر , ده مسيحي كمان يعني يا سواد السواد عاللي شافه قبل ما يسافر هو وأهله و أكيد يعني مايكون حضر تفجير كنستين تلاته وهو في مصر و أكيد مايكون لقى نفسه ماتعيّنش معيد وهو الأول عالدفعه واللي اتعين واحد مسلم وكان لازم يرفع قضيه عالجامعه عشان يعرف يتعين , مطلوب بقى من المهندس هاني عاذر انه يطلع في الجزيره ويلعن أبو جدود مصر أسوة بالعالم الكبير ( الواد عبد الله ) , بس هو مش هيعمل كده , عشان هو مصري ( مسحيي ولا مسلم مش بتفرق) بس مش إخوانجي .... أسيادنا الأشاوس اللي بيمشو عالحيط فهمو أنا بقصد ايه ولا لسه لهم مزاج يتكرّعو عندي في الصفحه بشعارات البحث العلمي و المحافظه على علماء مصر و شباب مصر هم زهرة المستقبل والكلام ده ؟!.
Mohamed Hussein
21 مايو
اعتذار واجب
.
حقك عليا يا عبد الله , هات يابني راسك ابوسها , انت معاك حق , لما تسافر بره مصر عشان تكمل دراستك لازم تطلع في الجزيره وتلعن أبو جدود مصر , وماتنساش ماتنساش في أي ندوه أو مؤتمر أو حتى قاعدة مصطبه عندك في شيكاغو تبقى تلعن فيها أبو جدود مصر برضه , ساعتها هتلاقي مصور الجزيره ظهر قدامك فجأه و هتلاقي نفسك بقيت بطل قومي عالفيس بوك , دانت عالم يا جدع هو انت أي حد , عالم كبير ومصر بنت الحرام دي بتطرد العلماء الكبار أمثالك و بتهتم بعبد العاطي بتاع الكفته و الهام شاهين , يموت البحث العلمي من بعدك يا عبد الله يا ولدي , يا خساره مصر من بعدك يا عبدالله ( إيموشن : بتشحتف ) , هه مبسوطين مني كده يا شباب ؟.
.
و يا عبد الله , لو جت لك فرصه خد الجنسيه الأمريكيه أو حتى الإسرائيليه و برضه هتفضل بطل قومي عندنا و هيبقى العيب على مصر بنت الحرام اللي ماسابتشي الغسيل اللي في اديها و العيال اللي هفتانين من الجوع و قعدت تغسلك رجلك بمايه وملح قل ماتنام .
ماهو شوف , طالما انت وصلت للجزيره و بتعرف تهين بلدك كويس تبقى اكيد وصلت لصفحات الإخوان و طالما وصلت لصفحات الإخوان يبقى هيتعاطف معاك الكولجيه وبس كده لعبت معاك يا معلم , بحث علمي ايه بقى ؟ ولا يلزمك الكلام ده , دانت بقيت اشهر من محمد غنيم اللي ضيع عمره كله فيها وشاف فيها السواد بس ماعملش زيك , ييجي ايه جنبك محمد غنيم ده ؟ ابن مين في مصر محمد غنيم ؟ قصدي ابن مين في قطر !!.
Mohamed Hussein
20 مايو
الحمد لله الحمد لله , ياااااااه دانا كان قلبي هيقع في رجلي , أصلي قريت خبر بيقول نتيجة الإنتخابات في قنصلية جده وحمدين خد 4 % , بس الحمد لله بعدها على طول قريت خبر إن حمدين خد في انتخابات السعوديه بالكامل 6 % , أيوه كده بقى , 6% غير 4 % خالص !! مممممممممم طب والله مانا عارف أقول إيه ؟ أنا صحيح مؤيد للسيسي لكن بحترم حمدين وشايف إنه مايستاهلش كده , إنما العيب مش عليه , العيب على أنصاره اللي مقضينها جعجعه عالفيس بوك .
يعني أنصار السيسي يجيبو له مجموع يدخله طب و انصار حمدين يجيبوله مجموع يدخله فصول محو الأميه ؟! , أومال فين بقى التيار الشعبي وحزب الدستور والثوريين واللي واللي واللي واحنا هنكسر الدنيا ونزلزل الزنازين ؟ عرفتو بقى إن أخركو ظاهره حنجوريه فيسبوكيه مالهاش وجود في الشارع و إن المحترم حمدين صباحي كان مسنود على حيطه مايله ؟!.
............... وانا كل خوفي لا شمللتكو دي توصل حمدين للمركز التالت !!.
Mohamed Hussein
20 مايو
كنت عايز اقول باختصار بس يارب يارررررب الناس تفهم , مصر فيها ألاف بيلعبو كوره , مش مشكله لما يكون فيها لاعب اخوانجي زي ابو تريكه , وفيها ألاف الشباب المخترعين مش مشكله لما يكون فيها شاب اخوانجي مخترع زي عبد الله , إنما نلف نلف نلف ونرجع لنفس الدايره أو لنفس الحقيقه اللي بنعمي عينا عليها , حكاية الإنتماء , مصر عمرها عمرها عمرها ما هتتقزّم وتبقى إخوانجيه و الإخوان عمرهم ما هيكبرو ويفهمو و يبقو مصريين ( صدّق أو لا تصدق ) , مش هنبطل احنا بقى لعب كوره باسم مصر عشان خاطر أبو تريكه إخوانجي ولا هنبطل نحلم ببحث علمي محترم عندنا عشان عبد الله قال انه مش عايز يرجع مصر .
.
إحنا دوله وهما عصابه , والحل بسيط خالص , أبو تريكه ياخد عبد الله في إديه ومعاهم شوية الإخوانجيه ويروحو يعملو لنفسهم دوله في قطر ولا مؤاخذه , أهي على أدّهم و كل فوله ولها كيّالها , أو على رأي المثل ... جحا أولى بلحم طوره !!.
Mohamed Hussein
20 مايو
و قالو السيسي قابل أنصاف الفنانين و أرباع الفنانين !! ......... مممممممممم أه مانا شوفتهم بنفسي , فاتن حمامه و حلمي بكر ومحمد صبحي , هما دول أنصاف الفنانين مش كده ؟!!.
Mohamed Hussein
20 مايو
مش بعرف أرد على شتيمة حد ليا بشتيمه مماثله , مش قلة حيله ولا قاموس الأباحه عندي ورق أبيض فاضي , بس مش عايز أقلب صفحتي ل حمامات رمسيس العمومي , فيه ناس بتغمض عينيها قبل ما بتقرا بوستاتي أو بتروح تقرا بوست في حته تانيه وتيجي تعلّق عندي ( تقريبا الصفحه عندي شرحه وبرحه ) , أو بيقرو البوستات بأماكن تانيه في جسمهم مش بعنيهم , مفيش مشكله كل يوم أحذف اتنين تلاته من المتدينين اللي بيشتمو بالاب والأم , يا ريتني كنت متدين زيهم عشان كنت اعرف العن سلسفيل أبوهم , لكني مش متدين و اهو بلوك بيكفي .
مش هوجع دماغي كتير في إني أحوّل واحد خروف لجينتل مان , و مؤمن تماما إنك لو قفلت عالخروف أوضه و شغّلت له موسيقى كلاسيك و أشعار نزار قباني لمدة 15 سنه برضه هيطلع منها غبي وارهابي .
Mohamed Hussein
20 مايو
عبد الله عاصم , شاب مصري مخترع , أهلا وسهلا , فيه زيه ألاف الشباب على فكره ( بس مش بيطلعو في الجزيره ) , سافر أمريكا ( وماله مش عيب ) , عادي لما يروح يكمل دراسته وابحاثه هناك , لحد ما ربنا ينفخ في صورة مصر ويبقى عندها بحث علمي حقيقي وتتبنّي للمواهب الشابه , طب يا عبد الله انت سافرت تكمل دراستك وانت لسه كتكوت في عالم البحث العلمي ( يعني في ألف باء على فكره ) , إيه بقى حكاية انا مش راجع مصر ولو رجعت مصر هيرموني في السجن ( البؤ ده بتاع الجزيره وموزه دانا حافظهم زي كف ايدي ) وأكيد ما تكون اتظبطت بقرشين حلوين عشان تقول البؤ ده ( أكبر منك واتظبط عادي , حتى اسال وائل قنديل وعلاء صادق ومحمد محسوب علينا راجل ) .
يعني انت يا عبد الله هتبقى قاعد في مدرستك أو بيتك بتخترع وييجي ناس يقبضو عليك في مصر ؟ عشان بتخترع ؟ ولا انت لازم بعد ما تخترع تروح تحرق عربيتين أمن مركزي ؟ طب انت عارف ان فيه زيك ألاف ابحاثهم اندفنت أو سافرو وكملوها وحصلو على أكبر الجوايز بس مقالوش البؤين بتوع الجزيره دول ؟ طب تعرف ان حلمهم انهم يرجعو مصر عشان يفيدو بلدهم ؟ لأ ماتعرفش .
.
طب انت قررت انك مش راجع مصر يعني ؟ قرار نهائي ؟ وفاكر ان مصر هتقعد ترفّص برجليها ومش هيجيلها نوم طول الليل بسبب بعد جنابك عنها ؟ متخيّل إن نهر النيل هيبطل يجري ونسمه العصاري هتختفي منها وابو الهول هنصحى مش نلاقيه ؟ طب فاهم إن الأرض هتكف عن الدوران و الشمس هتبطّل تتعامد على أنف ملوك الفراعنه ؟ طب فكرك يعني اني مش هتعشى النهارده بسبب إنك مش راجع مصر ؟
.
يا عبد الله , خليني أتنبأ بمستقبلك طالما طلعت شاب اخوانجي يعني متربي في زريبة السمع والطاعه , إنت هتكبر وتكبر وتكبر لحد ماتوصل للمستوى اللي تشيل فيه جزمة المرشد و ده أخرك على فكره , ملعون أبوها البطن اللي شالتك
Mohamed Hussein
20 مايو
أوِِّل الرقص حنجله , اللي تخاف من العِرسه ماتربيش كتاكيت , كان فاكر تحت القبه شيخ , يموت الزمار وصوابعه بتلعب , التاجر لما يفلّس بيدور في دفاتره القديمه , جاب الديب من ديله , بيت النتّاش ما يعلاش , وان كان لك صاحب لا تحاسبه ولا تناسبه !!.
.
هل تعلم إن عدد الأمثال والحكم المصريه أكبر من عدد سكان قطر ؟ وإن بعض الأمثال دي بيرجع تاريخها ل مئات وربما ألاف السنين ؟ هل تعلم إن الأشعار والقصائد والأزجال اللي اتكتبت عن مصر لو طبعتها على ورق أبيض و رصيت الورق ده ورقه جنب ورقه جنب ورقه مش هتكفيهم مساحه أد قطاع غزه ؟ هل تعلم إن أغلب الدول العربيه لحد النهارده ماشيين بالأمثال والحكم المصريه وعايشين عليها من غير حتى مايكونو فاهمين معناها بالظبط أحيانا ؟ .
.
و عشان حضرتك تبقى وطني بجد لازم تحب البلد دي على بعضها كده يعني لوكشه واحده , تحت تاريخها وحاضرها ومستقبلها , شوارعها و حواريها , تحب شكل الشيخ ابو عمه و شكل القسيس أبو عمه وشكل النيل أبو فرعين و شكل العسكري أبو بياده , شكل الكنيسه والهرم والجامع والبيت النوبي و العماره العاليه والبيت اللي معمول بالطين في الفلاحين .
بعد كده تقدر تعمل مظاهرات أو تعمل ثوره أو تعمل شألباظ مش مشكله , لكن ماتوصلش ليوم إنك تصغّر فيه بلدك لا قدام نفسك ولا قدام الغريب , بلدك وجيشها هما الحيطه اللي ساترانا والعكّاز اللي بنتعكّز عليه , لا تهد حيطتك وتعرّى نفسك ولا توقّع عكازك عشان بعدها على طول هتلاقيك نايم على بطنك ومش قادر !! .
.
باختصار يعني ماينفعشي تكون وطني اوي وانت ودنك طولها 25 سم , يعني ما ينفعشي تبقى وطني وحمار , اختار حاجه من الإتنين وانت اللي في إيدك القرار .
Mohamed Hussein
19 مايو
ليبيا بتتحرك , ربنا يكتب لها السلامه و يرحمها من ميليشيات الإخوان وفلوس موزه و تميم , مش بستبعد يكون لجيشنا المصري دور في اللي بيحصل في ليبيا , على الأقل في الدعم , ماهو مش معقول ابدا نسيب دوله عربيه مجاوره لينا وكل شويه يخطفو رئيس وزاره أو يهرب منها مسئول أو يطلع شوية ارهابيين صيّع يعملو عرض عسكري , من بعد رحيل القذافي وليبيا مافهاش دوله و ده طبعا مردوده علينا بيكون في تهريب سلاح وارهابيين وتبقى حدودك الغربيه مشاع , ولو حصل وكان فيه تدخل مننا فده طبيعي جدا ومقبول , إنت بتنقذ دوله عربيه من مستقبل زي الهباب و في نفس الوقت بتأمن حدودك , يعني المسأله فيها أمن قومي والجيوش المحترمه بتعمل كده عادي , و طالما قولنا الجيوش المحترمه يبقى أكيد جيشنا عمل كده .
Mohamed Hussein
19 مايو
الناس عايزه تفرح , مشتاقه تفرح , بيدوّرو عالفرحه زي اللي بيدور على ابره في كوم قش , هما دول المصريين , الراجل اللي بيرقص ده ممكن ماتلاقيش في جيبه جوز جنيهات على بعض , بس مش هتلاقيه جعان للأكل , هتلاقيه جعان للفرحه .
أغنية ( بشرة خير ) , تسلم الإيد اللي كتبت و يسلم صوتك و إحساسك يا جسمي .
Mohamed Hussein
19 مايو
أستاذتي الكاتبه المصريه الأصيله الرائعه فريده الشوباشي حصل إنها دايما مش بتقبل أي إهانه لإسم الزعيم الراحل جمال عبد الناصر , لا على صفحتها ولا حتى لما بتكون ضيفه في أي برنامج , وفيه ناس بيحلو لهم إنهم يجيبو في سيرة ناصر عمّال على بطال كنوع من استعراض الثقافه الديموقراطيه العميقه و الليبراليه اللي ماتخرّش المايه .
وفيه برامج وقنوات مفتوحه وفاتحه أحضانها لأي حد يهين اسم عبد الناصر , دي فيها لقمة عيش حلوه يعني و سبوبه جايز , وعبد الناصر الله يرحمه مات من نص قرن تقريبا , مات ولسه صوره متعلقه في بيوت وبرلمانات في دول مانسمعش عنها , يابني الزعامه دي مش لعب عيال ولا هي الحكايه ظاهره صوتيه حنجوريه .
.
فريده الشوباشي من عجينة الشعراء اللي معجونين بتراب البلد دي , زي الأبنودي و نجم , اللي بيشوفو مصر دي مهره ( فرسه ) ممكن تتعب شويه و ترقد و يتنطط على ضهرها شوية كلاب لكن لما بتقوم و تفز بتدوس على كلاب السكك .
.
اللي يعرف حجم مصر وقيمتها يعرف إنك ماينفعشي تقارنها بقطر راس براس وتقول دي دوله ودي دوله , ويعرف إن مصر اللي حكمها محمد على وعبد الناصر و مينا وعمرو بن العاص وكليوباترا ماتتحكمشي بتويتات من وراء البحار يا مثقفين !!.
Mohamed Hussein
19 مايو
من أجمل الحاجات اللي قالها السيسي في حواره امبارح إن مش كل التفاصيل ينفع تتقال .
معاك حق يا سيسي , وشغل هبلوله الشغاله ده مالوش أي تلاتين لزمه , دانا شوفت ناس من النشطاء الفيسبوكيين كانت عايزه تعرف خطة الجيش في محاربة الإرهاب في سينا و بيقولك نعرضها في حوار ولا مؤاخذه مجتمعي , و المفروض بقى المتحدث العسكري يطلع كل يوم بعد نشرة 9 يقول لنا عملو ايه من ساعة ما صحيو من النوم و طلعو بكام غاره جويه و قتلو كام ارهابي وحرقو كام مزرعة بانجو و عملو كام تدريب رمايه و اشترو كام بندقيه وكام مسدس وجابو المسدس بكام , مممممممم طب ما تاخد تليفون وزير الدفاع وتكلمه انت يا صاحبي و تسأله حتى المدام طابخه ايه النهارده عشان تتطمن بنفسك .... حريه دي ولا أتامه ؟!
Mohamed Hussein
19 مايو
حمل كاذب
.
و بعد سنه واتنين نكتشف إن التنظيم الدولي الهلامي اللزج اللي اسمه الإخوان قعد 84 سنه يربّي في بالونه مش أكتر , وكل اللي كان محتاجه ( سن إبره ) وتلاقيه بح , و بح يعني بح , وقالك أنصارنا 5 مليون لأ لأ دول 50 مليون , لا العدد الأصلي 15 مليار بحسب أخر احصاء لقناة الجزيره , وقالك منتشرين في كل شبر في العالم والمجموعه الشمسيه و لنا رجالتنا في درب التبانه و جاهزين , وعندنا مكاتب اقليميه وكوادر , وقالك لنا هدف وعندنا عقيده ولا مؤاخذه , وفي النهايه تحسهم عاملين زي واحده ست افتكرت نفسها حامل , 84 سنه وهي حامل في مشروع عملاق ضخم , وكل شويه بطنها تكبر و تروح هي تشتري لبس للبيبي اللي جاي و تقول هانت , و بطنها تكبر تروح تشتري له بافيتات و تقول قرّبنا خلاص , بطنها تكبر تروح تشتري له شوية ألعاب و في النهايه تكتشف إن حملها كاذب , يعني مجرد إنتفاخ !!.
.
فين الإخوان يا إخوان ؟ ورّوني نفسكو كده , فين قوتكو و جبروتكو ؟ ماهي مصيبتكو السوده والأكبر على الأطلاق و غلطتكو اللي جابت ضٌلفها من البدايه إنكو اخترتو مصر تحديدا عشان تبقى المركز الرئيسي لتنظيمكو الهلامي الوثني , مصر يا ولاد الهبله ؟ مصر يا بهايم ؟ مانتو لو كنتو بتقرو تاريخ مكانشي ده بقى حالكو , طب كنتو اسألو هولاكو و نابليون بونابرت , اسألو جماجم الغزاه اللي مدفونه في ترابها !!.
Mohamed Hussein
18 مايو
طب أنا ليا ساعه مادخليش ولا زبون الصيدليه , هو السيسي يطلع في برنامج في مصر يقوم يوقف حالنا إحنا هنا في السعوديه ؟ شعبيه دي ولا زعامه ؟ .... اللهم صل عالنبي , اللهم صل عالنبي , عشان محدش يقول بنحسد ولا حاجه , شكلك بقيت أشهر من شيكابالا يا سيسي .
Mohamed Hussein
18 مايو
طول عمري براهن عالحصان الخسران , تقولشي غيّه يا جدع , لما خلصت الثانويه العامه اخترت صيدليه مش طب , و لما شجعت فريق كوره اخترت الزمالك مش الأهلي و لما انتخبت في الإنتخابات اللي فاتت اخترت حمدين , المره ده قلت صوتي للسيسي ( رغم اني ماعرفتش أنتخب ) , خايف عليك يا عبفتاح ياخويا تصيبك نفحه من نفحاتي !!.
Mohamed Hussein
18 مايو
الصبر مفتاح 14
.
طب والله صدق اللي قال ( ضاقت فلما استُحكمت حلقاتها فُرجت... وكنت أظنها لا تفرج ) , و هنروح بعيد ليه ؟ , مره وانا في الأجازه اللي فاتت كانت حصلت أزمه كبيره في المايه المعدنيه في مصر , واحد هيسألني ويقولي إنتو بتشربو مايه معدنيه ليه ؟ هقول له والله يا كابتن ماعرف , اسأل مراتي .
.
تقريبا كده والله أعلم عشان ماية الحنفيه بينزل معاها طحالب و فطريات وسمك سردين صغير أحيانا , داحنا كمان مش بنشرب أي نوع مايه معدنيه , ماهو انت مش واخد بالك , إحنا عملنا عالنت سيرش و ميرش وسألنا اللي رايح واللي جاي على أنواع المايه المعدينه , ولاد الحلال قالو إن النوع الفلاني اتعمل عليه تحاليل وطلع مليان بلاوي و لا يصلح للإستهلال الأدمي , والنوع العلاني فيه نسبة الصوديوم عاليه أوي , يعني علو كده , واستقر بينا المطاف عند ماية نستله تحديدا .
.
في الوقت ده كان فيه مصنع من مصانع نستله اتسرق ولا اتحرق بجاز مش فاكر , المهم المايه كانت شبه مقطوعه من السوق , كنا وقتها في رمضان وصابحين رايحين البلد عشان نفطر هناك يومين , انا نزلت من ليلتها أدور على نستله في المحلات مالقتشي , رجعت لمراتي وانا موطّي راسي في الأرض ومش عارف أرفع عيني , قالت لي بس تبقى مالقتشي ماية نستله , حلفت لها بكل أيمانات المسلمين والهندوس إني لفيت لحد ما كاوتش العربيه اتنحل ومش لاقي .
.
و صبحا الصبح ركبنا العربيه عشان نروح المنصوره , مراتي كانت عامله شبه الإخوان يوم 30 يونيو , نزل عليها سهم الله , وقاعدين بقى نفكر , هنروح ازاي من غير ماية نستله ؟ هنعيش ازاي من غير نستله ؟ هنصوم ازاي هنفطر إزاي ؟ وفضلنا كده لحد ما وصلنا ميت غمر , وهناك يشاء السميع العليم إننا نلاقي كراتين نستله مرصوصه قدام المحلات عالطريق , وفي نفس ذات الوقت ألمح بطرف عيني عربية نستله معدّيه , يافرج الله , يامانت كريم يارب , أنا شوفت العربيه من هنا و كسرت عليها من هنا , ونزلت دخلت راسي من إزاز السواق وعملت بإيدي في مناخيري حركه كده بتاعة الشمامين , يعني كداهو , قربت من ودن السواق وسألته بالراحه : معاك ماية نستله اللي هي لتر نص يا معلم ؟ السواق قعد يبص يمين وشمال لحد ما اتأكد إن الطريق أمان , وقال لي معايا يا معلم , تقدر تشيل كام كرتونه ؟ قلت له أشيل 4 يا معلم , هتحسبهم بكام ؟ السواق بص يمين وشمال تاني وقال لي الكرتونه على 45 مقفوله ؟ ليه كده بس يا معلم , إنت كده سعرك حراق أوي وانا هبقى زبونك هو أنا زبون طيّاري ؟ قال لي أنا مديك صنف إكسترا معتبر واسأل في السوق أو دوق لو تحب , قلت له خلاص يا معلم أنا اشتريت .
.
المهم دخلنا في شارع جانبي متداري ونقلت ال 4 كراتين في عربيتي , في اللحظه دي الدمويه ردت في وش مراتي واحساسها كان زي إحساس المصريين لما عبرنا خط بارليف , أنا نفسي حسيت بالفخر والفخار , وقلت والله لما أكبر وابقى جد هحكي لأحفادي عن بطولاتي دي وهقول لهم إني حضرت ثورتين في 11 و 13 وقدرت اجيب 4 كراتين مايه أيام أزمة المايه المعدنيه سنه 12.
.
عايز أقول إن مصر مليانه خير يا ولاد بس عايزه اللي يلفّ , لأ يا جدع حشيش إيه بس ؟ بقولك اللي يلف يعني يدور في شوارعها وحواريها , وعايز أنصح كل زوج و زوجه مش لاقيين ماية نستله في القاهره إنهم يطلعو على طريق بنها المنصوره وهيلاقوها , الحكايه بس محتاجه صبر , و علي رأي اللي قال : الصبر مفتاح 14.
Mohamed Hussein
17 مايو
أيام ناشفه زي الحطب
.
و بالنسبه لشغلنا يعني و مهنتنا الساميه دي بيبقى الزبون اللي هو الشباب السلفي الكيوت المتدين اللي لابس جلابيه قصيره كزبون يعني مالهوش أي تلاتين لزمه , بييجي الصيدليه مره كل شهر ياخد لبن للعيال و بامبرز و كان الله بالسر عليم , لكن تعب و ما تعب و دكاتره ماتلاقيش , غالبا بيقضّيها بقدونس مغلي للمغص وكسبره مغليه للإسهال و شبت مغلي للحموضه و أي ورقه خضره تغليها في المايه تبقى علاج لحاجه معينه من مختلف الحاجات .
إنما نادرا ما بيكتشف الشاب الجميل إن الشبت والكسبره و البقدونس دول بيُستخدمو MAINLY في عمايل المحشي و الممبار , و بيضطر يروح لدكتور بعد ما يكون فرفر و جاب أخره , وبعدها يجيلي بقى عشان ياخد الدوا , وهنا بتبدأ ملحمة صرف الدواء لشاب سلفي متدين , هو أنا كرهت أم المهنه الساميه دي من شويه ؟
.
بيبقى شكاك جدا , غالبا عنده وسواس قهري وحاسس إن فيه مؤامره كونيه ضده , يمسك كل علبة دوا يقلبها يمين وشمال يشوف التاريخ و السعر , وبعدين يطلع النضاره ويحاول يقارن اسم الدوا بالإسم اللي في الروشته يلاقي نفسه مش عارف يقوم يشيل النضاره تاني , يسألني نفس السؤال 4 مرات , هو غالبا عنده اعتفاد إني عايز أسمّ مراته , ويقولي هي الجرعه دي اللي كتبها الدكتور ؟ أه والله يا حاج ؟ طب هي مكتوبه فين الجرعه ؟ أهي يا حاج في الحته دي , أه طب سعر الدوا ده ثابت في كل الصيدليات ؟ أه ثابت يا حاج , أومال انا ليه بلاقي البامبرز عندكو ارخص من الصيدليه اللي جنبك بريالين ؟ عشان ده بامبرز يا حاج مش دوا , وهو البامبرز مش بيبقى مسعر ؟ لا يا حاج ؟ تبقى الصيدليه التانيه حراميه ؟ أه يا حاج غالبا كده , طب أنا هاخد الدوا أورّيه للدكتور , وماله يا حاج ياكشي توريه لعبفتاح السيسي حتى , طب هات فاتوره عشان احتمال أرجع الدوا ده شكله عندي , حاضر يا حاج .
.
المهم إني بعد 37 سؤال بفصل تماما و أقوم راجع لورا واسيبه يقلّب في البضاعه براحته , إلهي ربنا يكرمه ويعرف علبة الدوا دي دكر ولا نتايه ؟ مصيبه لو طلعت نتايه و هو لمسها بإيده , و بسرح أنا بقى في أي حاجه عشان مش أنفعل , أي حاجه أي حاجه , هو فيه حد بيسرح و بيبقى عارف هيسرح على فين ؟ أهو , كان عندي واحد منهم من شويه , ذهني خدني لاعلان بتاع شاي و تخيلت نفسي الست التخينه دي ( مالك يا راجل ؟ أعملك شاي ؟ ) و بعدها مباشرةً تخيلت نفسي عمر بن أبي ربيعه وقعدت أردد بيت الشعر ده ( ألا ليتَ قبري يومَ تُقضى منيّتي .... بتلكَ التي بينَ عينيكِ و الفمِ !! )......... أنا شكلي كده اتجننت باين , والنبي يا حاج ألاقيش عندك زوربيح مغلي لعلاج الجنون ده ؟!
Mohamed Hussein
17 مايو
التقارير كلها بتقول إن السيسي مكتسح ومسيطر , يعني حكاية توقعاتي و ال 60 % اللي انا قلت عليها دي طلعت فطشه ( 60/40 ) , وانا يا عبقتاح يابني كنت عايزك تنجح وادخّلك معهد لا سلكي , أتاريك حاطط عينك عالشهاده الكبيره يا ضاكتور , كنت هضيع مستقبلك بإيدي يا ولدي .
Mohamed Hussein
17 مايو
مش هنسى أبدا قبل 30 يونيو 2013 بكام يوم , أخويا سألني : إنت فاكر مرسي هيمشي فعلا يوم 30 ؟ قلت له أه هيمشي , قال لي عشان الناس مش عايزاه ؟ قلت له لأ : الناس والشوارع والحواري , وتراب الأرض مش طايقهم !!... ده كان إحساس جوايا واصل لدرجة اليقين .
كنت أياميها في مصر و نزلت الثوره و شوفت فرحت الناس واعلام مصر ماليه البلكونات , الناس بتغني وترقص , العائلات جايه بأطفالها كأنه كارنافال , اللي جاي ماشي واللي جاي في عربيته واللي راكب هو ومراته وولاده موتوسيكل ب 3 عجلات ,كأننا في اليوم ده انتصرنا عالصهاينه تاني .
و بنفس الشعور حاسس إن الأرض في مصر دلوأتي بتتنفس , بتاخد نفسها بعمق , بتتنهّد جايز بعد رحلة سفر شاقه و بتشرب بؤ مايه , لما الشعب ينزل وهو راكن ضهره على جيش حاميه و يبقى الإختيار بين اتنين مصريين رجاله بجد , إنتخب حمدين ولا انتخب السيسي , مش مهم , المهم إن الأرض هتتكلم مصري !!.
Mohamed Hussein
16 مايو
أنا السابق جنون الناس
بكام فدّان
و ساعة الحاله بتجنن
حاجات فيكي تجنني
.
و بس الفرق مش بنسى
و في الحالتين أكون إنسان
و لو عقلي ده راح مني
.
أنا الإنسان أنا بالذات
و لا بتفرق معايا حالات
و إكمني بموت فيكي
و اموت من قهرتي فيكي
و إكمني و إكمني !!.
.
.
محمد حسين
Mohamed Hussein
16 مايو
حكاية اسمها الكفر على سجادة الصلاه !!.
.
طبيبة سودانية اسمها (مريم يحيى إبراهيم) عمرها 27 سنة، اتولدت لأب سودانى (مسلم) وأم أثيوبية (مسيحية)، أبوها تركها مع أمها وهى عمرها 6 سنوات، أمها ربتها و كبرت وهى مسيحية، بيحاكموها دلوقتى فى السودان بتهمتى (الارتداد عن الإسلام) و (الزنا) لزواجها من رجل مسيحى، أعطتها محكمة الخرطوم مهلة لحد النهاردة للعودة للإسلام - اللى هى لم تعتنقه أصلاً - وإلا تُواجه عقوبة الإعدام ! اليوم تم الحكم عليها بالإعدام وتطبيق حد الردة، مريم الآن محتجزة وهى حامل فى الشهر الثامن مع طفلتها البالغ عمرها 20 شهراً.
.
إنتهت المأساه أو الحكايه , عرفتو ليه انا فرحت أوي بثورة 30 يونيو أكتر من فرحي ب 25 يناير ؟ عشان هو ده دين ربنا اللي بيفهمه عمر البشير , وهو ده دين ربنا اللي بيفهمه الإخوان وكانو هيطبقوه على أهل مصر الطيبين .
.
المسيحي في أرضنا دايما مدان ومتهم بالكفر , وعيشته بينا هي محض تكرّم وتفضل من جنابنا عليه حتى لو كان سابقنا في اعمار نفس الأرض ب 600 سنه ؟ حتى لو كان هو جدنا و جد جدنا , يدفع ضرايب ولا يدفع جزيه ؟ احنا اللي بنقرر , يدخل الجيش و يحارب و يدافع عن ارضنا بس وقت الجد هو كافر و مالهوش ديه , قتله حلال , ونساؤهم سبايا لنا .
.
ولما البني أدم يبقى مولود لأب مسلم وأم مسيحيه و يتربى مع الأم المسيحيه لازم يبقى مسلم , إزاي ماعرفش , طب لو مابقاش مسلم ؟ يبقى كافر و زاني وابن صرمه .
.......... ده دين ربنا ولا دين الشيطان يا ولاد الكلب ؟!.
.
أعظم حاجه في إسلامنا هي العقيده و أسوأ حاجه هي معتقديها !! , في السودان : فقر وجوع و مرض و أرض اتقسمت و بتتقسم و هتتقسم , ورئيس من أغنى أغنياء العالم بس بيطبق شرع ربنا و لا مؤاخذه ,............ تبّت يدا عمر البشير وتبّ !!
Mohamed Hussein
15 مايو
بعد ما شوفت جزء من الحلقه بتاعة ريهام سعيد مع الدكتوره نهى الملحده , وخصوصا الفقره اللي ريهام البسكوته بتطرد فيها نهى البسكوته برضه و تقول لها : إمشي اطلعي بره من هنا , شيلي المايك بره مش هنا , وهي ترد : الدكتوره نهى مايتقالشي لها الكلام ده !!.
و أأأأأه يا مراري ياني , قال يعني الدكتوره نهى بنت السبعاوي طه ولا التمنياوي طه , المهم بقى وخلاصة الكلام انا لما شوفت الفقره دي عرفت الحل الأمثل والنموذجي للي زي البسكوته ريهام والبسكوته نهى .
.
أنا لما أنزل مصر هاخدهم معايا في العربيه , كويس ؟ واروح بيهم البلد عند أمي , كويس ؟ عندنا قدام البيت نص فدان معمول فيه مشتل رز , كويس ؟ في الوقت ده تحديدا هيكون موسم تشتيل الرز , يعني توزيع الرز من أرض المشتل لكامل النص فدان , المهمه دي بيعملها الستات , كويس ؟
و بس بقى نشوف جلابيتين قدام لريهام و نهى و ننزلهم في قلب الأرض اللي غرقانه مايه ( يعني في الطين والوحل ) , يشتّلو النص فدان رز , شتله شتله جنب بعض بمستوى معين , الحكايه دي هتاخد منهم 12 ساعه , هيبقو موطيين أغلب الوقت .
المهم بعد ما يخلصو تشتيل النص فدان هيرجعو البيت خلصانين , هتقوم البسكوته ريهام تبطّل نحنحه وسهوكه وغرغره في الكلام وهتلاقي الدكتوره نها سألت أمي عن سجادة الصلاه , و صلت العشا و حمدت ربنا على نعمة الصحه ونامت زي القتيله .
.
فيه ناس كتير في مصر بتبقى مشكلتهم الأكبر والأعظم على الأطلاق إن ماعندهمشي مشكله !! , عشان كده بتبقى بني أدمه كويسه وبسبب الفراغ القاتل ده تتحول وتبقى ريهام سعيد أو تتحول و تبقى نهى السبعاوي طه , ملحده وأفتخر !!.
Mohamed Hussein
15 مايو
أجمل حاجه في انتخابات 2014 إن مفيش شحن للناس في اتوبيسات و جرارات زراعيه ومقاطير و عربيات نص نقل زي اللي رايحين سوق أبو شقوق بتاع المواشي , فيه بني أدمين بيتحركو من نفسهم و يختارو بإرادتهم , فيه أسر مصريه جايه تقول البلد دي بلدنا احنا , نفس مشهد ثورة 30 يونيو بيتكرر بالظبط , ستات مصر الهوانم اللي راسهم مرفوعه دايما ( مش بيروحو الغيطان عشان يُغتصبو ) , و شباب مصر الرجاله أوي ( مش اللي بيسيب مراته تُغتصب عشان يحمي روحه ) , وأطفال شايلين علم مصر ( مش علم القاعده ولا حماس ) , هي دي الأسره المصريه , اللي بتيجي بريحة شوارعها و حواريها , هما دول ملح الأرض .
...... مصر دي جميله أوي من غير الإخوان والسلفيين , مصر جميله أوي بالمصريين اللي فيها , مش مهم تنتخب مين طالما هتنتخب بلدك و علمها ونشيدها .
ليست هناك تعليقات:
إرسال تعليق