الجوافه

لما بدخل أي سوبر ماركت كبير , بسيب الدنيا والليله كلها وأطلع أجري على الجوافه المصريه , عشان بتفكرني اوي بمصر , هي بس , وأمسك جوافايه كده وأفضل أشم فيها ذي المدمنين , أصل انا عاشق ولا مؤاخذه , ومع إن كيلو الجوافه في السعوديه بتمن 3 كيلو تفاح أمريكاني معرفش ليه ؟ , بقول مش مهم , ما هو الحلو يتدلع برده , في مره اشتريت 6 كيلو , كانت حلوه أوي , ورجعت البيت وأنا مبسوط أوي كأني جايب معايا كاس العالم , إنما أحلى جوافه كلتها في حياتي كانت وانا صغير في ابتدائي , كانت المدرسه في قريه تانيه , وانا راجع في الطريق مع صحابي نقوم محودين على جنينة عم الحاج رزق , نفضل نسرق جوافه وناكلها لحد ما ننفجر , لا غسيل ولا يحزنون , الجوافه المسروقه لها طعم تاني , سامحني يا عم رزق والنبي .

.

محمد حسين