Mohamed Hussein
1 مايو 2019 ·
السنه اللي فاتت ابننا صلاح لعب نهائي دوري أبطال أوروبا ضد ريال مدريد ( كرستيانو رونالدو ) و أصيب بفعل فاعل من الحيوان راموس و خرج من نص الشوط الأول , إصابة صلاح كانت أهم سبب في هزيمة ليفربول للنهائي , و الحركه بتاعة راموس علق عليها حتى الإتحاد الأوروبي للمصارعه وقال انها ( اتلغت من ملاعب المصارعه لخطورتها ) .
.
النهارده صلاح هيلعب قبل نهائي أبطال أوروبا ضد برشلونه ( ليونيل ميسي ) , الصحف العالميه اعتبرت اصطدام ليفربول ببرشلونه نهائي مبكر للبطوله , صلاح و ماني و فرمينيو ضد ميسي و سواريز و كوتينيو , الليفل ده اللي بيلعب فيه صلاح اسمه ليفل الوحوش و الديناصورات .
.
نقول تاني و تالت و عاشر , مفيش أي وجه للمقارنه بين صلاح و أبو تريكه , المحيط فيه مايه و البحيره فيها مايه بس البحيره ماينفعش تتقارن بالمحيط , و رأيي الشخصي إن أسطورة كرة القدم في مصر في القرن العشرين هو محمود الخطيب يليه حسن شحاته , و حتى الخطيب و حسن شحاته ماينفعش نقارنهم بمحمد صلاح .
..........................................................................................................
Mohamed Hussein
1مايو 2019 ·
فكرة إنك تتفرج على ماتش الأهلي و الطلائع وتشوف حسام عاشور و سعد سمير و علولو و بعدها على طول تتفرج على برشلونه و ليفربول في الكامب نو و تشوف ميسي و صلاح و كوتينيو و سواريز وفرمينيو و فان دايك و أليسون بتبقى عامله بالظبط بالظبط كأنك ماشي في صحرا و معاك نعيمة الصغير و بعد شوية ربنا يكرمك و ييجي ديناصور يخطفها من إيدك و يطير بيها بعيد , و فجأه تطلع لك نرمين الفقي من ورا الجبل , تقرّب منك و تقولك أنا خايفه , ممكن لو سمحت أمشي معاك ؟.
..................................................................................................................
Mohamed Hussein
1 مايو 2019 ·
دولة 30 يونيو
.
مصر و السعوديه
- بعد 30 يونيو كانت مصر بتمر بظروف اقتصاديه صعبه جدا على مستوى الدوله , احتياطي نقدي بيتأكل و أوشكنا كدوله على إعلان إفلاسنا , و سياحه مضروبه بفعل فاعل عمدا مع سبق الإصرار و الترصد , في الوقت ده السعوديه كانت مستعده تدفع أي مبلغ في مقابل مشاركة الجيش المصري في الهبل اللي كانت شغاله فيه في سوريا و اليمن , مصر رفضت , ليه رفضنا ؟ عشان عندنا ثوابت مانقدرش نتجاوزها , مهما كانت الظروف ؟ أه مهما كانت الظروف .
.
مصر و روسيا
- في نفس التوقيت و من ضمن الضرب المتعمد للسياحه انضربت طيارة روسيا في سينا , بوتين منع السياحه عن مصر عشان يهدي الرأي العام عنده , و بوتين و السيسي الاتنين عارفين مين اللي ورا الحكايه , بعدها بوتين و كطبيعة كل انظمة الحكم في أوروبا و أمريكا حبّ إنه يستفيد من الموقف وقعد شويه حلوين يساومنا على عودة السياحه , سمعنا وقتها إن روسيا طلبت يكون لها مكتب أمني في كل مطار مصري , مصر رفضت ( لأن ده انتقاص للسياده ) , سمعنا ان روسيا طلبت انها تعمل قاعده عسكريه في شمال مصر , مصر رفضت عشان عندنا ثوابت و عقيده معينه ( احنا مش كشك عالخليج ولامؤاخذه ) , في الوقت ده كنا في أشد الحاجه لعودة السياحه الروسيه , إنما مش على حساب ثوابتنا .
.
مصر و أمريكا
- بعد خبر رغبة أمريكا في إعلان تنظيم الإخوان جماعه إرهابيه , فيه ناس ربطت بين الخبر و بين صفقة القرن , ماهو زي ماقولنا أمريكا ( الأم اللي ربت ) مع بريطانيا ( الأم اللي خلفت ) مش هيتنازلو عن ابنهم المدلل بسهوله كده , والحاله الوحيده اللي تخلي أمريكا تفرط في ابنها ضناها هي انه يكون كارت اتحرق تماما ( سبوبة الجماعات الارهابيه استفادت منها امركيا و بريطانيا على مدار أربعين خمسين سنه استفاده مكانوش يحلمو بيها ) وفي نفس الوقت أمريكا تقول لنا عايزين المقابل بقى و ندخّل مثلا حته من سينا في صفقة القرن ( تحاول تستفيد من الكارت المحروق لأخر مره قبل ماترميه في الزباله ) , وارد يكون تفكيرهم كده , طب مصر هتعمل ايه ؟ اقرا السطور اللي فوق تاني وانت تعرف , دولة 30 يونيو هي دولة 30 يونيو , الدوله اللي عاشت 4 سنين في أسوأ علاقات مع القوى العظمى اللي بتحكم العالم ( أيام أوباما ), لا موتنا من الجوع ولا حد عرف يلوي دراعنا وقتها .
.
عايزين تعملو سلام شامل و دوله فلسطينيه و نخلص من قصة عنب ديبو ؟ أهلا و سهلا و إيدينا ممدوده قبل إيديكو , عايزينها على حساب حباية رمل من أرض سينا ؟ يبقى هنغير اسم الصفقه من ( صفقة القرن ) ل( صفقة على جثتنا ) , طب بالنسبه لتنظيم الإخوان و قياداتهم اللي عايشين عندنا في أمريكا ؟ والله ممكن تشبعو بيهم وتفتحو لهم شقة دعارة في قلب الكونجرس ذات نفسه و مسجد صغير و محندق كده عشان يبقو يصلو بعد ما يستحمو .
........................................................................................................
Mohamed Hussein
1 مايو 2019 ·
ماتش غريب و عجيب , ليفربول مسيطر معظم الوقت و بيتحكم في ريتم الماتش , بس مابيجيبش اجوان , اللمسه الاخيره مفهاش تركيز مع شوية سوء حظ حلوين , و برشلونه يجيب 3 اهداف منهم هدفين على طريقة هبلوله الشغاله , يعني أي هبل في الجبل , و على عكس كل الناس بقى انا متوقع تأهل ليفربول , 3 اهداف مش حدوته ولا حاجه , في أنفيلد هيبقى فيه حفله و بإذن الله ليفربول يتأهل , إنما ده مايمنعش برضه إنه زياده في الإحتياط نشوف حد يخطف الواد ميسي قبل الماتش أو يرمي له حتة حشيش في العربيه و يبلغ عنه .
................................................................................................................
Mohamed Hussein
2 مايو 2019 ·
البرستيج ب 35 جنيه , اه و عهد الله
.
فيه فسخاني فاتح قدام البيت عندي , روحت له قبل شم النسيم بيوم أجيب رنجه و سردين , لقيت واقف قدامه طوابير و أمم ولا أمم أفريقيا , وصلت للكاشير و جه الدور عليا , عايز كيلو رنجه و كيلو سردين , الحساب كام حضرتك , اللهم صل عالنبي , كيلو الرنجه 70 , كيلو السردين 80 , يبقى الحساب 150 يا سعادة الباشا
, خدت الطلب بتاعي و العامل حط الرنجه و السردين كل واحد منهم في طبق فويل و لفّه بالبلاستيكه بتاعة التغليف دي اللي عند الجزارين , و قالي اتفضل يا سعادة الباشا ( اه مرتين كده ) .
.
خرجت من المحل و انا مبتسم و أشعر بالفخر و الفخار و الإنتصار المبين , وبعد دقايق عرفت ان الرنجه في المناطق الشعبيه ب 32 جنيه و أخرها 35 , نفس اللي انا جبتها بالظبط , قعدت أفكر , هي ليه الحاجه أم 32 تتباع ب 70 ؟ وانا طبعا ماحبش حد أبدا يضحك عليا و يستكردني , اه ماهو كله إلا كده , و بعد تفكير طويل وصلت للحل والتقسيمه , طبق الفويل و البلاستيكه ب 3 جنيه يبقو كده 35 , و كلمة سعادة الباشا ب 17.5 , هما قالوها مرتين يعني 35 كمان , كده يبقى المجموع 70 وانا محدش ظلمني ولا حاجه , ماهو البرستيج غالي برضه , و لعلمكو بقى , كل طابور الناس الواقفين دول كانو جايين ياخدو فسيخ و رنجه و سردين و برستيج .
..........................................................................................................
Mohamed Hussein
2 مايو 2019 ·
أنا أقولك اللي أعرفه بقى عن صفقة القرن يا ابن الباشا , بدل مانت ماشاء الله تبارك الله عاملنا فيها جيفارا عبد الحميد جيفارا
.........................
صفقة القرن الحقيقيه هي إن راجل اسمه عبد الفتاح السيسي و جيشه و شعبه بيحاربو جماعه ارهابيه دوليه كبرت و ربربت و عملت امبراطورية اقتصاديه و توغلت في كل حته في عهد السيد الوالد .
.
صفقة القرن الحقيقيه هي اننا نلاقي نفسنا في يوم من الأيام باحتياطي نقدي 13 مليار و دولة على وشك الإفلاس عشان السيد الوالد دمر زراعة القطن و دمر الصناعه و التصدير و عمل لنا ملاعب جولف .
.
صفقة القرن الحقيقه هي الفساد اللي بقى دوله موازيه داخل الدوله و اللي لسه بنعاني منه لحد النهارده و ده طبعا بفضل بابا وشلته .
.
صفقة القرن الحقيقيه هي فيروس سي اللي هرى كبد ملايين المصريين و عالجناه و بنعالجه و البركه طبعا في الحاج .
.
صفقة القرن الحقيقيه هي شبكة الطرق اللي كانت بتترصف و يعاد رصفها عالورق أيام أبوك واللي خلتنا نعملها من الأول خالص , لما كنا فعلا في شبه دوله .
.
صفقة القرن الحقيقيه هي اننا نسلح جيشنا من أول و جديد و نحل مشكلة كهربا كانت بتقطع اكتر ما بتيجي , هو بابا كان مشغول في ايه بالظبط طول التلاتين سنه؟ لعل المانع يكون خير .
.
صفقة القرن الحقيقيه هي الحياه السياسيه اللي دمرها سعادة الباشا و اللي خلتنا نوصل لمرحلة أحزاب كرتونيه و شوية سياسيين صيّع مابين هجاص و طبّال و شمام كوله
.
صفقة القرن الحقيقيه هي التخلص من متاهة دعم الوقود و الدولار و هشتكه الزبون و احيينا النهارده و موتنا بكره و عاش السيد القائد محمد حسني مبارك , و المنحه ياريس .
.
باختصار , صفقة القرن الحقيقيه هي التفويض اللي عمله المصريين للسيسي عشان ينقذ مصر بعد ما أبوك خربها و قعد على تلها .
.
أما شغل التلقيح زي اللامؤاخذه فعايز أقولك برضه , جيش مصر العظيم اللي شال البلد في السنين اللي فاتت , اللي شالها في وقت الطوفان , مابيعرفش يخون ولا يبيع و لا يتنازل , و إلا كان ساب أبوك في الحكم بعد 25 يناير أو سابك انت و اخوك تورثو التكيه و العزبه .
...................................................................................................................................
Mohamed Hussein
3مايو 2019·
رئيس الوزراء اللبناني سعد الحريري :
- نتمنى في لبنان أن نستطيع تكرار التجربه المصريه التي قادها الرئيس عبد الفتاح السيسي .
.
- عبد الفتاح السيسي بدأ في إنقاذ مصر و هيكلة و تحرير الاقتصاد و تطوير منظومة القوانين و حل مشاكل الطاقه والكهرباء و الغاز في ظروف صعبه جدا , ظروفنا في لبنان أسهل و لذلك من الممكن لنا تكرار النموذج المصري ( فاتورة الكهرباء في لبنان تكلفهم 40 مليار دولار سنويا ) .
.
- أتمنى ان تصبح التجربه المصريه عدوى تنتقل إلى كل الدول العربيه , لأن كل يوم تأخير بيكلفنا كتير , الناس هتعاني شويه في الأول و طبيعة البشر انهم بيحبو ال safe zone , لكن التجربه المصريه هي الحل لإنقاذ مستقبل الأجيال القادمه وبناء الأوطان بشكل يليق بنا .
.
- عبد الفتاح السيسي في خلال عشر سنين هيرجع لمصر سابق مجدها .
........................
........................
مممممممممم بس بقى يا طبال يا أمنجي , تفهم إنت ايه في الإقتصاد و حكم الاوطان و مستقبل الشعوب ؟ دانت حياله رئيس وزراء لبنان , بذمتك بذمتك واحد زيك هيكون بيفهم أكتر من أم نحمده بتاعة الكرشه ؟
........................................................................................................................
Mohamed Hussein
4 مايو 2019 ·
الأرض بتتكلم مصري
.
اللي جرب من حضراتكو الغربه في أي بلد من بلاد ربنا , حتى البلاد العربيه و الإسلاميه , حتى البلد اللي نزل فيها الإسلام , مش هيلاقي أي مظهر من مظاهر رمضان , رمضان عندهم زي رجب زي ربيع أول زي أكتوبر و سبتمبر وبؤنه , رمضان فقط و حصريا تلاقيه في مصر وبس , له طعم و شكل و لون , له هيبه و شخصيه , ماركة مسجله , زينه و فوانيس , مدفع الإفطار إضرب , خشاف و كنافه و قطايف , مسلسلات و خيم رمضانيه .
.
شباب و أطفال و رجاله كبار واقفين في الشوراع وقت أدان المغرب و عالطرق الزراعيه , يوقفو الناس و العربيات , يفطرّوهم بالعافيه , هتفطر يعني هتفطر , و أحيانا موائد عالطريق بشوفها وانا رايح المنصوره , والراجل يحلف بالطلاق انه طالما المغرب أدن هتركن عربيتك و تنزل تفطر معانا , اللي بيعملو الموائد دي ممكن يكونو سالفين فلوسها أو مجمعين من بعض , و اللي بيقفو يرمو عليك بلح و مايه و عصاير وساندوتشات وقت الأدان ممكن مايكونشي في جيبهم عشره جنيه على بعضها .
.
ميريام و ميلاد بيعزمو أصحابهم المسلمين عالفطار كل سنه , بيعملو وليمه تبهرك , و ممكن في يوم تضرب في دماغهم و يفطرو كلهم في معبد أبو سمبل أو جنب الأهرامات أو في قلعة قايتباي , يعني في حضرة أسيادنا الأجداد , ماحنا أصلنا بلد ملهاش كتالوج , أو كان لها كتالوج و ضاع , لما بنحب نفرح بنفرح و محدش بيعرف يفرح زينا , و اللقمه اللي تكفي اتنين بنقسمها على سبعه و نشبع , عشان احنا باختصار أُمّه و دوله حقيقيه , مش دوله بلاستيك ولا دولة بنت إمبارح .
................................................................................................................
Mohamed Hussein
4 مايو 2019 ·
مصر تحذر تركيا من أي نوايا للبدء في الحفر في حقول بحرية غرب قبرص !! .
...............
...............
نقول تاني
عملنا ترسيم حدود في البحرين الأحمر و المتوسط ليه ؟
- عشان نعرف ننقب عن ثرواتنا و بترولنا و غازنا و نستخرجهم و نتحول من دوله مستهلكه و مستورده لدولة منتجه و مصدره ( الخطوه دي تحديدا كانت محتاجه فارس مش رئيس بدرجة موظف حكومه او بدرجة عرضحالجي ) .
.
تركيا سرحت خرفانها و الصيع بتوعها وقت ترسيم الحدود لتشويه مصر ليه ؟
- عشان ماكنتش عايزانا نعمل كده , و تفضل حقول الغاز دي مشاع و ينهبو منها زي ماهما عايزين .
.
بنشتري سلاح و حاملات مروحيات و غواصات وطيارات رافال وندفع فيهم مليارات الدولارات ليه ؟
- عشان نحمي حدودنا البحريه و نحمي ثرواتنا في شرق المتوسط , ثروات أولادنا و أحفادنا و الأجيال اللي جايه .
.
تركيا لامه الخرفان عندها و بتعلفهم و تفتح لهم قنوات ليه ؟
- عشان عارفه ان حرب الغاز مع مصر قادمه لا محاله , وبتستخدم الخرفان كورقة ضغط و ورقة تشويه لمصر و جيشها ( يعني سلاح في إيديهم حتى لو كان فشنك , ماهو العيار اللي مابيصبش بيدوش ) .
.
تركيا بتدعم الربيع العربي اللي حصل في المنطقه اخر 10 سنين ؟
- تركيا دوله استعماريه قذره قديما و حديثا , و مكانش فيه ربيع عربي ولا ربيع ياسين , كل الحكايه مؤامره لإسقاط جيوش و هدم دول ( عشان مصلحة الكيان الصهيوني ) و أطراف المؤامره دخلوها لأسباب اقتصاديه ( خطوط غاز و بترول , يعني مصادر الطاقه ) .
.
عملنا تعديل للدستور و سمحنا للرئيس بفتره استثنائيه تالته ليه ؟
- عشان مصر في التوقيت الحالي و في السنين الجايه ماينفعش يحكمها غير السيسي ( ربنا يبارك في عمره ), لا انا انفع ولا حضرتك ولا الأستاذ اللي هناك ولا الأبله اللي قاعده ورا , مصر في حالة حرب متواصله من 2013 , حرب بناء و حرب سياده و حرب ثروات و حرب مستقبل .
.
لو قامت حرب نظاميه حقيقيه واضحه زي الشمس بين مصر و تركيا , يا ترى الخرفان و شمامين الكوله و الصيع و عمرو واكد وخالد ابو النجا هيقفو فين ؟
- الخونه لهم صف واحد بيقفو فيه , ماينفعش يقفو في مكان تاني
.
طب هنعمل ايه مع احتمالية تنقيب تركيا عن الغاز في شرق المتوسط ؟
- احنا مش هنعمل , احنا هنصوم و نصلي و نجيب فوانيس و كنافه و قطايف و نغني وحوي يا وحوي و نعيش حياتنا عادي خالص , إنما جيشنا و رئيسنا هيعملو و جاهزين و مستعدين لكل الاحتمالات و بشتي الطرق و الكباري , و ممكن يكونو بيحاربو حاليا و احنا قاعدين نكتب جدول لمسلسلات رمضان اللي هنتابعها و مستنيين الريمونتادا بتاعة ليفربول في ماتش العوده .
.......................................................................................................................
Mohamed Hussein
5 مايو 2019 ·
المعجزه
.
اتنقلنا خلاص من مرحلة أحلام سيادة الرئيس أوامر لمرحلة أحلام سيادة الشعب و سيادة البلد أوامر .
.
كان عندنا حتة أرض غاليه أوي علينا , أهملناها و سيبناها بايره , ليه ؟ عشان الحاج صاحب البيت لقى الأرض دي بينه و بينها مجرى مائي , قنايه مليانه مايه , و عشان يعمرها لازم يعمل كباري كتير و أنفاق و يصرف مليارات متلتله و هو كان مشغول بملاعب الجولف و ( بالمنحه ياريس ) و بافتتاح مدرسة سوزان مبارك الإبتدائيه المشتركه , ولما الحاج أهمل حتة الأرض اللي مساحتها شاسعه قد مساحة خمس ست دول حصل فيها ايه ؟ حصل فيها اللي منطقي جدا إنه يحصل , الأرض اتحولت لمستنقعات , طلع فيها حشائش و سحالي و تعابين و إرهابيين و تجار سلاح و تجار مخدرات و عصابات دوليه و اتعمل فيها شبكة أنفاق بحجم مدينه , و ليلة كبيره أوي سعادتك , ماهو ابنك لما تهمله و ماتربيهوش و ماتسألش عنه ماتبقاش تستغرب لما تلاقيه اتربى في بيت غريب أو حتى في بيت عدوك الخواجه .
.
و في يوم من الأيام اتبدل الحال و بقى غير الحال , و جالنا واحد مصري للنخاع , مصري حتى الثماله , لقى نفسه مضطر يحارب الإرهابيين و التعابين اللي كبرو و ربربو في الأرض بتاعتنا اللي اتحولت ببركة الحاج لمستنقع , قال طب هنحارب و ندافع عنها بدمنا , بس تنميتها و تنضيفها من الحشائش ماتقلش أهميه عن محاربة تعابينها و سحاليها , وبدأ يا مؤمن يشتغل بإيديه الإتنين , إيد تحارب و إيد تبني و تعمر و تحفر تحت المايه و تنحت في الصخر , نوصل لها ازاي الأرض دي ؟ العربيات بتاخد 5 ايام عشان تعدي القناه , خلاص نعمل أنفاق , 4 أنفاق و كباري عايمه , هيكلفونا كتير أوي , مش مهم , نستورد ايه ؟ ماكينات الحفر بس و هتبقى بتاعتنا نستخدمها في مليون حاجه بعد كده , طب نستورد كذا و كذا لزوم الحفر ؟ لا نعمل مصانع و مانستوردش , و لما نعمل الحكايه دي نوصل لحتة الأرض بتاعتنا في قد إيه ؟ في 20 دقيقه سيادتك , مش 5 أيام .
.
وفي الأرض نفسها اللي الحاج سابها بايره نعمل ايه ؟ نعمل تنميه بقى بما إننا فتحنالها طرق تكفي لعبور عشرات الألاف من البني أدمين و السيارات يوميا , نعمل مدن جديده ونشجع الناس يعيشو هناك , نديهم أراضي يزرعوها , نعمل جامعات و مصانع و مستشفيات و طرق و محطات طاقه , نبنيها من جديد .
.
بالمناسبه ,صاحب البيت الجديد لما عمل الأنفاق دي عملها لأغراض مدنيه عسكريه , يعني تنقل عربيات و بضاعه و ناس و بني أدمين و تنقل برضه دبابات و مدرعات و تنقل أم اللالي لو عايزين , ده طبعا عشان زي مانتو عارفين قدمنا ألاف الشهداء في ال 5 سنين اللي فاتو و صرفنا تريليون جنيه أنفاق و مشاريع قوميه في سينا عشان نسيبها للصهاينه و الفلسطينيين و المغول و قبائل الكوتوموتو الأفريقيه .
.......................................................................................................................
Mohamed Hussein
6 مايو 2019 ·
عارف يا صالح ؟ الألف طن نسكافيه و بن برازيلي وبحيرة الشاي بلبن و ال 15 مليون سيجاره اللي بنشربهم في مصر بعد الفطار , بيفوقونا من جوه .
..................................................................................................................
Mohamed Hussein
6 مايو 2019 ·
مش عارف أتعاطف
.
عندي قلب والله و ضمير من الحجم الكومبو و جوايا أخضر بلون الزرع , لا انا بلاستيك ولا حديد مسلح , و مع ذلك مش عارف أتعاطف مع اللي بيحصل في قطاع غزه , مش عارف أغمي عيني و ألغي عقلي و أقعد أتعاطف كده مع نفسي و أعيط و أتشحتف .
أنا المصري يا مولانا , من البلد دي اللي حاربت الصهاينه 5 مرات , 48 في أرض فلسطين نفسها و قدمنا ألاف الشهداء , في 56 والعدوان الثلاثي , في 67 و النكسه , في الإستنزاف , في نصر 73 , عدونا الأزلي والتاريخي و الأبدي حديثا هو الكيان الصهيوني , ده عدونا كشعب بغض النظر عن حسابات السياسه و السياسيين , فشلت معانا كل محاولات تطبيعنا , احنا بينا و بينهم دم للركب , فوالنبي يعني محدش من الصيع و الأوباش و الحنجوريين يزايد علينا .
.
مؤخرا و أخر 13 سنه تحديدا ظهر لنا عدو جديد , إيدينا اتمدت له دايما بكل خير , بس عضها , اسمه حركه حماس اللي بتدير قطاع اسمه قطاع غزه الحدودي .
.
القضيه الفلسطينيه ماتت موتتها الأولى يوم ماتقسمت فلسطين لدولتين برعاية صهيونيه ( لو مش مصدق انها برعاية صهيونيه اتحرق بجاز مش مهم ) .
.
القضيه الفلسطينيه بالنسبالي كمواطن مصري ماتت يوم ما أشاوس حماس و الجهاد حفرو أنفاق مع سينا و بقو يبعتو الإرهابيين بتوعهم لقتال جنودنا في الجيش و الشرطه المصريه , يوم مانسيو اننا الأخ الكبير اللي خيره عليهم وعاللي جابوهم و يوم مانسيو إن عدوهم و عدونا في الشمال .
.
القضيه الفلسطينيه بالنسبالي ماتت يوم ماسيطرت حماس على قطاع غزه و اتحولت لمجرد جماعه إرهابيه مرتزقه بتحارب بفلوس الشاذ القطري و بسلاح الشاذ التركي , و بتحارب الأخ الأكبر مش العدو .
.
اللي بيحصل في قطاع غزه هو المشهد المكرر من المسرحيه الهزليه , المسرحيه اللي من حقك كمواطن عاقل تشك في كل تفاصيلها و أحداثها .
.
من حقي كمواطن عاقل أشك في كل الأرقام , الشهداء و القتلى و المصابين , أشك في الصور , مانا شوفت بعيني الخوذ البيضاء و اللي بيهببوه , من حقي أشك في التوقيت , من حقي أقول إن المشهد المكرر ده بعلم الطرفين و مباركتهم و إن الغرض ممكن يكون طرف تالت أو حاجه تالته .
.
يارب يا سيدي يارب , ربنا يخيب ظني , ربنا يهدي الصيع و الحنجوريين بتوع حماس و الجهاد و يعرفو عدوهم فين و يروحو يولعو في تل أبيب بكره الصبح , قولو أمين ( بس ده مش هيحصل على فكره ولا بعد 100 سنه ) .
.
أما انا كمواطن مصري بشوف اللحظه دي على إنها كلبين بيمثلو مشهد خناق , ممكن يكون فيه شوية ضحايا من الأبرياء ربنا يرحمهم ( و يخلصهم من حكم المرتزقه ).
.
لو المشهد الهزلي ده معمول عشان صفقة القرن بمفهومها الأمريكي الصهيوني ( الحمساوي ) يبقى يتحرقو بجاز هما التلاته , مصر ترعى القضيه الفلسطينيه و تشارك كطرف أو وسيط في الوصول لحل نهائي عشان نخلص من قصة عنب ديبو و من السبوبه اللي عايش على حسها صيع و عربجية المنطقه ؟ ماشي أهلا وسهلا , تتعمل صفقه على حساب متر من أرضنا ؟ لأ , طب على حساب تهجير و تسكين لمليون فلسطيني ( حمساوي ) في مصر ؟ برضه لأ , احنا بلد تستوعب 100 مليون مواطن عربي و نشيلهم على راسنا , لكن لو مليون خروف حمساوي فهما كفيلين إنهم يخربو قاره و يبيعوها لكلاب السكك و لأي حد يدفع .
.
ده عهدي بالرئيس عبد الفتاح السيسي اللي بثق فيه تماما و بثق إن رأيه نفس رأيي و يمكن الفرق الوحيد بينا إني بتكلم بمنتهى الحريه ( كمواطن ) و إن سيادته بيتكلم بمنتهى الدبلوماسيه ( كرئيس دوله ) .
...........................................................................................................................
Mohamed Hussein
7 مايو 2019 ·
يالله بقى بالدور , كل واحد يجيب 50 جنيه و نص بطه و قفص جوافه , و بعد كده تسمعو كلامي من سكات , قلت لكو برشلونه في ماتش الذهاب جاب جونين بطريقة هبلوله الشغاله و ان ليفربول أفضل بكتير و هيعمل ريمونتادا تاريخيه , أهو ليفربول فاز من غير صلاح و فرمينيو , 4/0 بالبدلاء على برشلونه و ميسي , 4/0 و ليفربول من غير تلتين قوته الهجوميه .
.
ألف مليون مبروك يا صلاح , نهائي أبطال أوروبا مستنيك , وشك حلو يا أم مكه
...............................................................................................
Mohamed Hussein
8 مايو 2019 ·
عائض القرني , بعد أربعين سنه من الهبد بإسم الإسلام و اللامؤاخذه الصحوه , بعد تجريف عقول ألاف من الشباب , بعد ما بعت ألاف من المعاتيه للجحيم تحت إسم الجهاد و حور العين و الفول الحريتي و هو نايم في قصره و عايم في ماية البطيخ , بعد ما شارك مع غيره في حرق و خراب بلاد و أوطان , رجع و اعتذر و قال سوري يا جماعه , حقكو عليا والله , أصلي اكتشفت فجأه إن قطر بتتأمر هي و إيران و تركيا وقناة الجزيره على دولنا العربيه , أصلي اكتشفت فجاه ان الإسلام و الصحوه اللي خربت بيهم عقول و أجيال كانو تايواني مش أصلي .
.
عمل شوية فلوس حلوين عائض القرني ده , و شوية قصور و فيلات و شاليهات زيه زي محمد حسان و الحويني و القرضاوي و عمرو خالد و غيرهم , و شوية ملايين من المتابعين يتشحتفو وراهم .
.
طب خلاص ما تزعلش يا اخ عائض , دموعك غاليه علينا اوي , خد هات لك عسليه
.........................................................................................................................
Mohamed Hussein
8 مايو 2019 ·
يا نهار أبيييييييض , دي مش كوره , ده سرك قومي عالمي , مدرب توتنهام بيقع في الأرض و يعيط , لاعبي أياكس هيجيلهم سكته قلبيه و جمهورهم , اللي بنشوفه النهارده من توتنهام و أياكس و اللي شوفناه امبارح من ليفربول و برشلونه يقول باختصار إحنا نلغي الدوري بتاعنا و نجيب سعد سمير و علولو و الونش و الجنش و نقعد كلنا في ميدان عام نشرب معسل و نتفرج عالدوري الانجليزي و دوري أبطال أوروبا و نفرح و ننبسط .
.........................................................................................................................
Mohamed Hussein
11 مايو 2019 ·
على سيرة البيض المدحرج و شاي البلكونه , لما خلصت جيش اشتغلت شويه في الدقي قبل السفر , و في يوم من الأيام حبيت أعزم ( أخت فاضله ) , وبصفتي فلاح مش من هنا سألت اللي شغالين معايا , لو عايز أعزم أخت فاضله إيه أفضل مكان أروحه ؟ واحد منهم ربنا يسامحه كان محامي من الدقي نفسها , قال تطلع بيها على ماريوت الزمالك , قلت مش مشكله , ماريوت ماريوت هو احنا يهمنا , استلفت جاكيت البدله بتاعه عشان مكانش عندي بدله , و خدت الاخت الفاضله لماريوت الزمالك في تاكسي , تخيلو واحد فلاح كان بيشتغل راعي غنم و هو صغير فجأه يلاقي نفسه في لوبي فندق اسمه ماريوت عالنيل و معاه أخت فاضله
.
دخلت بكل ثقه وكبرياء , مانا في جيبي 70 جنيه ولابس جاكيت بدله بتاعة نبيل المحامي اللي لبسني في الحيطه , الكلام ده كان سنة 2001 , هي قالت أشرب عصير و أنا طلبت شاي , ( سعادة الباشا ) الجارسون جاب الطلب , طب العصير بتاعها باين انه عصير أهو , فين الشاي بتاعي أنا بقى ؟ الشاي اللي أعرفه يا سعادة البيه بييجي كوبايه إزاز فيها بتاع اسمه شاي و غالبا جواه معلقه , قعدت أفرك و أحرك وانا شايفها بتشرب العصير و جاي معاه طقم صيني ماعرفش لزمته ايه , براد فخيم و حاجات فخيمه كده , قلت يمكن الطقم ده من طقوس الفندق , و سألتها هو الشاي بتاعي اتأخر كده ليه ؟ قالت لي مالشاي أهو , وشاورت على طقم الصيني اللي قدامي ( اللي هو طقوس الفندق ) , وشربت الشاي عالنيل وقت الغروب و طلبت الحساب , وقتها كانت أتخن كوباية شاي في أتخن قهوه في مصر تعمل لها نص جنيه أو 75 قرش ده لما يكون صاحب القهوه حرامي , جت الفاتوره و لقيت إن الشاي بتاعي اللي هو طقوس الفندق ب 35 جنيه وإجمالي الفاتوره 60 ج , دفعت زي الجزمه طبعا مانا مش هتخانق قدام الأخت الفاضله و جنبي سياح أجانب و عرب .
.
و لما سافرت البلد حكيت لأمي الحكايه , قعدت تعايرني بالشاي ده لحد ماماتت الله يرحمها و البلد كلها عرفت , و أمي قالت لي جمله مش بنساها , يا محمد يابني ال 35 جنيه بنشرب بيهم شاي أنا و اخواتك في سنه بحالها , من يوميها بطلت أشرب شاي في فنادق , حتى لو كان معايا أخت فاضله .
..................................................................................................................................
Mohamed Hussein
12 مايو 2019 ·
مش عايز أحرق لكو مسلسل زلزال بتاع محمد رمضان , بس واضح كده انه البطل محمد حربي هينجح اوي في شغله و حياته و يكبر و يغتني و بنتين يحبوه , واحده من توبه زي حلا شيحه و واحده تانيه مش من توبه زي بنت خليل بيه ( نفس اللي حصل السنه اللي فاتت بالظبط ) , ومحمد رمضان هيقرر انه ينتقم من الأشرار كلهم في العياط و خط الجيزه و لحد أخر فيصل , من أول خليل بيه اللي سرق أرض أبوه لحد الراجل اللي بيفرض إتاوه على أبو حلا شيحه , هيضربه علقه موت في الموقف و يقف بعدها يركن على ميكروباص و يشرب سيجاره وسط انبهار من حلا شيحه وأبوها و أمها و الجماهير الغفيره .
.
في رمضان 2020 , محمد رمضان هيعمل مسلسل جديد خالص , هيطلع فيه بدورين , دور الأب و دور الإبن , واحد هيقولي بس الحكايه دي اتهرست في مسلسلين قبل كده ( زلزال و نسر الصعيد ) , أقوله يا غبي فيه تفاصيل مختلفه , محمد رمضان الأب هيخلي المزه مراته ترقص له ( زي ما حصل قبل كده ) و بعدين لما يحبو يعملو ( إحم إحم ) هيغير الجمله بتاعته بقى , مش هيقول لها القضيب لازم يكون حديد عشان يعرف يشيل القطر , ولا هيقول لها ألوه يا مانجه يا مانجه ألوه , أكيد هيلاقو حاجه جديده , يعني مثلا يبص لها ويقول لها , ماتيجي نتناقش في أسباب انهيار الاتحاد السوفيتي , تقوم هي ضاحكه و غامزاله و تقوله عيب ياراجل العيال قاعدين
.
و بعد ما يتناقشو مرتين تلاته في أسباب انهيار الاتحاد السوفيتي ( ماهو الإتحاد السوفيتي مانهرش بسهوله كده و المناقشات أحيانا بتطول ) , يصحو من النوم و يركبو توكتوك كلهم عشان يزور أخته اللي عيانه في البدرشين , التوكتوك لجل السميع العليم يتقلب بيهم في الترعه , كلهم يموتو ماعدا عيل صغير يعيش , الواد ده هيكبر و يغتني و يتشهر ويبقى محمد رمضان برضه , و بنتين يحبوه , واحده من توبه و واحده مش من توبه , وهو يقرر انه ينتقم من كل الأشرار في كوكب الأرض و من سواقين التكاتك لأنهم كانو السبب في إنه اتيتم بدري , و هينتقم كمان من كل اللي بيشتغلو في خدمة العملا بتاعة تي إي داتا , واحد هيسألني ويقولي ايه علاقة تي اي داتا بالمسلسل ؟ أقوله مش عارف , بس أكيد المؤلف متضايق من الشركه دي و النت بيفصل عنده كتير فقرر إن بطل المسلسل ينتقم منهم .
......................................................................................................................................
Mohamed Hussein
12 مايو 2019 ·
صلاح السنادي مستواه أقل من السنه اللي فاتت , ده لما نقارن صلاح ب صلاح مش بحد تاني
..................
و مع ذلك :
- صلاح السنادي هداف الدوري الإنجليزي الأقوى في العالم و للمره التانيه على التوالي .
.
- صلاح السنادي مع فريقه ليفربول بيحتل وصافة الدوري الانجليزي بفارق نقطه ولولا رعونة و سخافة يورجن كلوب كانو حسمو اللقب من بدري .
.
- صلاح السنادي وصل مع فريقه ليفربول لنهائي دوري أبطال أوروبا , للموسم التاني على التوالي , وصلو على حساب بايرن ميونخ و برشلونه و ميسي شخصيا و بإذن الله يفوزو بالبطوله الأقوى و الأشهر في العالم .
.
- صلاح السنادي أحسن لاعب في أفريقيا للعام التاني على التوالي برضه
.
- الحقيقه يعني , مع احترامي للجميع و للأسماء و النجوم و المحللين و المغول و البيزنطيين , الحقيقه بتقول إن الدوري الإنجليزي و دوري أبطال أوروبا مكناش أصلا نسمع عنهم ولا في الحواديت , كان أخرنا شوية الحوكشه اللي بنشوفهم عندنا و اللي بنعتبرهم كوره و بطولات .
.
- والحقيقه إنه لما يذكر مثلا أفضل 5 لاعبين في العالم على مدار السنتين اللي فاتو في أي قاعده و أي قهوه في أي مكان في كوكب الأرض لازم يتقال منهم محمد صلاح , زيه زي ميسي و رونالدو و نيمار .
.
- فاللي عايز أقوله للساده أعضاء ألتراس محمد أبو تريكه و سيد أبو شفه و حسن أبو لُغد , إنه الواد ده اللي اسمه محمد صلاح , لا جه زيه في مصر والوطن العربي ولا هييجي زيه عشان تبقو عارفين .
...............................................................................................................................
Mohamed Hussein
13 مايو 2019 ·
إيران و الخليج و مصر و مضيق هرمز
.
مبقاش عندي إرتباك ولا لخبطه , ولا بقى فيه صوره بشوفها ضبابيه , كل الحكايه انك تشوف بوصلة مصر رايحه فين و تمشي وراها , مش مهم تثق في الأخرين و في الحلفاء و تصرفاتهم , بس مهم جدا انك تثق في الموقف المصري الرسمي .
.
مصر في 6 سنين كانو كلهم شألباظات في المنطقه و هبل و هري و هبد و تواطؤ و طفوليه و عنتريه و إرهاب و مخططات و مؤامرات و مئات المليارات بتتصرف عالخراب و كوكب راكبه 100 عفريت , مصر الوحيده اللي خرجت من الليله دي صاغ سليم و إيديها نضيفه , كل كلمه بتتكتب في بيانات الخارجيه و الرئاسه و الجيش بتبقى موزونه بميزان دهب و متراجعه ألف مره , مصر اللي تجاوزت مرحلة الطوفان بمنتهى الإحترافيه و بكلمة سر هيتكتب فيها كتب و مجلدات و تبقى مناهج سياسيه في المستقبل , كلمة السر المصريه البحته إنك تكون أنضف و أقوى , أنضف من إنك تلعب دور الديب أو القاتل السفاح البلطجي و أقوى من إنك تلعب دور الخروف أو الضحيه .
.........................................................................................................................................
Mohamed Hussein
14 مايو 2019 ·
قواعد اللعبه
.
أي رئيس عصابه في الدنيا بيكون له صبيان بشكل متسلسل , حلقات يعني , و بيكون دارس صبيانه كويس زي ماهو دارس أعداؤه و دارس خطته و دارس الغرض منها و عامل كمان خطط بديله .
.
حلقات الصبيان بتكون مختلفه , و مش بالضروره تكون جايب الصبي عشان تديله شوية فلوس و يقوم بمهمه معينه , بالعكس , الذكاء و الإحترافيه إنك تشغل صبيان كتير تحت ايدك من غير ماتصرف عليهم دولار واحد , دانت ممكن تاخد منهم كمان , أهم حاجه تكون دارسهم كويس , دارس عقولهم و جيناتهم و أطماعهم و تعرف تستغلها لتحقيق أهدافك إنت .
.
اللي حصل في الشرق الأوسط أخر عشره عشرين سنه هو لعبه من رئيس العصابه اللي بيحكم العالم ( اللوبي الأمريكي البريطاني الصهيوني ) , و الصبيان هنا كانو بشكل ما , تركيا و قطر و طبعا التنظيم الإرهابي الدولي , حتى إيران كانت بتلعب دور الصبي من غير ماتحس , تركيا عندها جينات استعماريه زي ايران و أمريكا عارفه , عندها رغبه باستمرار في التعملق , و ماله يا حبيبي , اتعملق شويه في سوريا و العراق و ليبيا , اخرب فيهم على قد ماتقدر , ده جزء من خطتنا اصلا , اعمله بايديك و احنا هنقعد في التكييف نقولك برافو
.
قطر الكشك الخليجي عنده عقدة نقص أزليه , باستمرار حاسس انه صغير و تافه و حقير , في أي اجتماعات مهمه مكانش بيبقى له كرسي , محدش معترف بوجوده , عنده أرض مساحتها قد مساحة السنبلاوين و عدد سكان قد عدد سكان كفر غنام , و غاز و بترول مالهمش اول من اخر , يصرف فلوسه فين ؟ يدور له على دور و كرسي , يشتري لنفسه تاريخ , أي تاريخ , يحاول ان اسمه يكون بيتردد باستمرار ( حتى لو في صفحات الحوادث ) , يصرف شوية مليارات مش مشكله , برضه و ماله , اشتغل يا حبيبي اشتغل ( بصوت العظيم الراحل استفان روستي ) .
.
اللي مايعرفهوش قطر و تركيا و إيران , إن قاعده مهمه من قواعد اللعبه بتقول , في أخر جوله لو حبيت كرئيس عصابه تتخلص من حد وانت بتنضّف المكان , بتبقى أسهل حاجه هي انك تتخلص من صبيانك , رئيس العصابه بيقتل صبيانه عشان سرهم يندفن معاهم , و في لحظه ما بيقتلهم بيكون قابض تمن دمهم , رئيس العصابه اجمالا مش عبيط ولا برياله عشان يثق في صبي لعب دور الكلب القاتل على أخوه وابن عمه
.
السعوديه وقعت في اخطاء كارثيه في الفتره اللي فاتت , لكن اقتصاد السعوديه و حجم مدخراتها و استثماراتها في أمريكا و أوروبا و الأهم بترولها بيحموها , بيحموها حتى من رئيس العصابه نفسه , و إيران واقعه في فخ مش بسهوله هتعرف تخرج منه .
.
أما مشكلة قطر و تركيا فهي باختصار إنهم دخلو لعبه بتاعة الكبار و هما صغيرين أوي , بالمناسبه ضرب الصبي التركي مش محتاج حرب نظاميه ولا صواريخ و دبابات , كل الحكايه تويتتين تلاته و قرارين تلاته تلاقو الليره بتتشألب و الإقتصاد التركي اللي عامل زي جبل من الحلاوه النيفا ( غزل البنات ) يطلع عليه النهار و يسيح , كان صرحا من خيال فهوى .
.
مصر بقى , دولة 30 يونيو , ملهاش دراع عشان يتلوي ولا إيد تتمسك منها , بالعكس , نفس رئيس العصابه و هو بينضف المكان و بيرتب أوراقه الجديده بيقعد قدامك باحترم لأنك من البدايه و في وقت ذروة الازمه كنت بتتعامل بندّيه , مالعبتش دور العدو الغشيم اللي بيضرب راسه في الحيطه ولا لعبت دور الصبي التافه .
............................................................................................................................
Mohamed Hussein
15 مايو 2019 ·
فيه حاجات كتير أوي مابينفعش فيها الكلام ولا الوصف , هتتكلم تقول ايه و لو حبيت توصف هتوصف إزاي ؟ إزاي كام كلمه و كام بوست و كام مقاله يوصفو عمل تم على الأرض بالشكل ده ؟ .
.
- محور تحيا مصر , الكوبري المعلق اللي دخل موسوعة جينيس للأرقام القياسيه بصفته أعرض كوبري ملجم في العالم , بطول اكتر من 500 متر و عرض أكتر من 60 متر .
.
- المشروع تم في وقت قياسي بإيد مصريه بحته , على رأسها شركة المقاولون العرب , الشركه الأكبر في أفريقيا , أكتر من 4000 مهندس وعامل بيشتغلو في صمت و بيسلمو المشروع قبل معاده ب 10 شهور .
.
- الكوبري المعلق اللي فيه ممشى زجاجي عشان تشوف النيل تحتك و انت ماشي هو جزء من محور روض الفرج , و محور روض الفرج هو جزء من الطريق الحر اللي بيبدأ من عند الزعفرانه و البحر الأحمر و يوصل لقلب القاهره و يطلع لاسكندريه الصحراوي و يمشي ناحية الغرب يفوت على مطروح و الضبعه و يوصل لحد السلوم على حدود ليبيا , مانا قلت لكو مفيش حاجه تنفع للوصف , محور بيربط البحر الأحمر بالقاهره بالاسكندريه بالبحر المتوسط بحدودك مع ليبيا , بطول 600 كيلو , و بتكلفه هتتجاوز 160 مليار جنيه , و لو كنت من بتوع ( فلوس البلد بتروح فين ) فأحب أقولك إن ده مشروع من ضمن ألف مشروع مماثل بتروح فيهم فلوس البلد .
.
- طب ليه نعمل كده و مش كنا بالفلوس دي جبنا فوانيس رمضان و ساندوتشات حلاوه بالقشطه ؟ بتعمل كده عشان مفيش استثمار ولا صناعه ولا تجاره بدون شبكة طرق قويه محترمه , بتعمل كده عشان السيوله المروريه مش بتيجي ببركة دعا الوالدين , بتعمل كده عشان توفر عالناس و الشركات وقت و فلوس , الحسبه بتقول ان المشروع ده هيوفر 200 ألف لتر بنزين يوميا , يعني هيوفر عالمواطنين و الدوله بنزين ب مليون جنيه في اليوم ( في اليوم مش في الشهر ولا في السنه ) .
.
- طيب ليه المواطن يدفع رسوم ؟ عشان ببساطه امكانيات الدوله بالكتير تعمل المشاريع دي , عندها مشاريع تانيه عايزه تكمل , طب نعمل المشروع و نسيبه من غير صيانه عشان نركز في غيره ؟ يبقى هتخسر المليارات اللي دفعتها خلال 10 سنين بالكتير , الرسوم هنا عشان تضمن للمحور و الطريق الإستمراريه بنفس الجوده , يتعمل له صيانه باستمرار , و انت كمواطن لك الاختيار , عندك الطرق القديمه موجوده زي ماهي , مستكتر ال 20 جنيه امشي في الطرق اللي اتعودت عليها , بس شوف هتضيع وقت قد ايه و تضيع بنزين و فلوس قد ايه ؟ أنا جربتها في طريق شبرا بنها الحر و لقيتني بوفر 40 دقيقه و 6 لتر بنزين قيمتهم 40 ج و بدفع رسوم 15 ج
.
أجمل حاجه بقى على الاطلاق في كل المشاريع الضخمه اللي عملها السيسي إنه مفيش ولا مشروع بيحمل اسمه ولا اسم مراته ولا اسم حد من عياله اللي احنا مانعرفش أساميهم أصلا , الله يرحم أيام ما كنا لما نعمل مكتبه ولا مدرسه ولا فاسقيه حتى نسميها بإسم الحاجه مرات الحاج .
.....................................................................................................................................
1 مايو 2019 ·
السنه اللي فاتت ابننا صلاح لعب نهائي دوري أبطال أوروبا ضد ريال مدريد ( كرستيانو رونالدو ) و أصيب بفعل فاعل من الحيوان راموس و خرج من نص الشوط الأول , إصابة صلاح كانت أهم سبب في هزيمة ليفربول للنهائي , و الحركه بتاعة راموس علق عليها حتى الإتحاد الأوروبي للمصارعه وقال انها ( اتلغت من ملاعب المصارعه لخطورتها ) .
.
النهارده صلاح هيلعب قبل نهائي أبطال أوروبا ضد برشلونه ( ليونيل ميسي ) , الصحف العالميه اعتبرت اصطدام ليفربول ببرشلونه نهائي مبكر للبطوله , صلاح و ماني و فرمينيو ضد ميسي و سواريز و كوتينيو , الليفل ده اللي بيلعب فيه صلاح اسمه ليفل الوحوش و الديناصورات .
.
نقول تاني و تالت و عاشر , مفيش أي وجه للمقارنه بين صلاح و أبو تريكه , المحيط فيه مايه و البحيره فيها مايه بس البحيره ماينفعش تتقارن بالمحيط , و رأيي الشخصي إن أسطورة كرة القدم في مصر في القرن العشرين هو محمود الخطيب يليه حسن شحاته , و حتى الخطيب و حسن شحاته ماينفعش نقارنهم بمحمد صلاح .
..........................................................................................................
Mohamed Hussein
1مايو 2019 ·
فكرة إنك تتفرج على ماتش الأهلي و الطلائع وتشوف حسام عاشور و سعد سمير و علولو و بعدها على طول تتفرج على برشلونه و ليفربول في الكامب نو و تشوف ميسي و صلاح و كوتينيو و سواريز وفرمينيو و فان دايك و أليسون بتبقى عامله بالظبط بالظبط كأنك ماشي في صحرا و معاك نعيمة الصغير و بعد شوية ربنا يكرمك و ييجي ديناصور يخطفها من إيدك و يطير بيها بعيد , و فجأه تطلع لك نرمين الفقي من ورا الجبل , تقرّب منك و تقولك أنا خايفه , ممكن لو سمحت أمشي معاك ؟.
Mohamed Hussein
1 مايو 2019 ·
دولة 30 يونيو
.
مصر و السعوديه
- بعد 30 يونيو كانت مصر بتمر بظروف اقتصاديه صعبه جدا على مستوى الدوله , احتياطي نقدي بيتأكل و أوشكنا كدوله على إعلان إفلاسنا , و سياحه مضروبه بفعل فاعل عمدا مع سبق الإصرار و الترصد , في الوقت ده السعوديه كانت مستعده تدفع أي مبلغ في مقابل مشاركة الجيش المصري في الهبل اللي كانت شغاله فيه في سوريا و اليمن , مصر رفضت , ليه رفضنا ؟ عشان عندنا ثوابت مانقدرش نتجاوزها , مهما كانت الظروف ؟ أه مهما كانت الظروف .
.
مصر و روسيا
- في نفس التوقيت و من ضمن الضرب المتعمد للسياحه انضربت طيارة روسيا في سينا , بوتين منع السياحه عن مصر عشان يهدي الرأي العام عنده , و بوتين و السيسي الاتنين عارفين مين اللي ورا الحكايه , بعدها بوتين و كطبيعة كل انظمة الحكم في أوروبا و أمريكا حبّ إنه يستفيد من الموقف وقعد شويه حلوين يساومنا على عودة السياحه , سمعنا وقتها إن روسيا طلبت يكون لها مكتب أمني في كل مطار مصري , مصر رفضت ( لأن ده انتقاص للسياده ) , سمعنا ان روسيا طلبت انها تعمل قاعده عسكريه في شمال مصر , مصر رفضت عشان عندنا ثوابت و عقيده معينه ( احنا مش كشك عالخليج ولامؤاخذه ) , في الوقت ده كنا في أشد الحاجه لعودة السياحه الروسيه , إنما مش على حساب ثوابتنا .
.
مصر و أمريكا
- بعد خبر رغبة أمريكا في إعلان تنظيم الإخوان جماعه إرهابيه , فيه ناس ربطت بين الخبر و بين صفقة القرن , ماهو زي ماقولنا أمريكا ( الأم اللي ربت ) مع بريطانيا ( الأم اللي خلفت ) مش هيتنازلو عن ابنهم المدلل بسهوله كده , والحاله الوحيده اللي تخلي أمريكا تفرط في ابنها ضناها هي انه يكون كارت اتحرق تماما ( سبوبة الجماعات الارهابيه استفادت منها امركيا و بريطانيا على مدار أربعين خمسين سنه استفاده مكانوش يحلمو بيها ) وفي نفس الوقت أمريكا تقول لنا عايزين المقابل بقى و ندخّل مثلا حته من سينا في صفقة القرن ( تحاول تستفيد من الكارت المحروق لأخر مره قبل ماترميه في الزباله ) , وارد يكون تفكيرهم كده , طب مصر هتعمل ايه ؟ اقرا السطور اللي فوق تاني وانت تعرف , دولة 30 يونيو هي دولة 30 يونيو , الدوله اللي عاشت 4 سنين في أسوأ علاقات مع القوى العظمى اللي بتحكم العالم ( أيام أوباما ), لا موتنا من الجوع ولا حد عرف يلوي دراعنا وقتها .
.
عايزين تعملو سلام شامل و دوله فلسطينيه و نخلص من قصة عنب ديبو ؟ أهلا و سهلا و إيدينا ممدوده قبل إيديكو , عايزينها على حساب حباية رمل من أرض سينا ؟ يبقى هنغير اسم الصفقه من ( صفقة القرن ) ل( صفقة على جثتنا ) , طب بالنسبه لتنظيم الإخوان و قياداتهم اللي عايشين عندنا في أمريكا ؟ والله ممكن تشبعو بيهم وتفتحو لهم شقة دعارة في قلب الكونجرس ذات نفسه و مسجد صغير و محندق كده عشان يبقو يصلو بعد ما يستحمو .
........................................................................................................
Mohamed Hussein
1 مايو 2019 ·
ماتش غريب و عجيب , ليفربول مسيطر معظم الوقت و بيتحكم في ريتم الماتش , بس مابيجيبش اجوان , اللمسه الاخيره مفهاش تركيز مع شوية سوء حظ حلوين , و برشلونه يجيب 3 اهداف منهم هدفين على طريقة هبلوله الشغاله , يعني أي هبل في الجبل , و على عكس كل الناس بقى انا متوقع تأهل ليفربول , 3 اهداف مش حدوته ولا حاجه , في أنفيلد هيبقى فيه حفله و بإذن الله ليفربول يتأهل , إنما ده مايمنعش برضه إنه زياده في الإحتياط نشوف حد يخطف الواد ميسي قبل الماتش أو يرمي له حتة حشيش في العربيه و يبلغ عنه .
................................................................................................................
Mohamed Hussein
2 مايو 2019 ·
البرستيج ب 35 جنيه , اه و عهد الله
.
فيه فسخاني فاتح قدام البيت عندي , روحت له قبل شم النسيم بيوم أجيب رنجه و سردين , لقيت واقف قدامه طوابير و أمم ولا أمم أفريقيا , وصلت للكاشير و جه الدور عليا , عايز كيلو رنجه و كيلو سردين , الحساب كام حضرتك , اللهم صل عالنبي , كيلو الرنجه 70 , كيلو السردين 80 , يبقى الحساب 150 يا سعادة الباشا
, خدت الطلب بتاعي و العامل حط الرنجه و السردين كل واحد منهم في طبق فويل و لفّه بالبلاستيكه بتاعة التغليف دي اللي عند الجزارين , و قالي اتفضل يا سعادة الباشا ( اه مرتين كده ) .
.
خرجت من المحل و انا مبتسم و أشعر بالفخر و الفخار و الإنتصار المبين , وبعد دقايق عرفت ان الرنجه في المناطق الشعبيه ب 32 جنيه و أخرها 35 , نفس اللي انا جبتها بالظبط , قعدت أفكر , هي ليه الحاجه أم 32 تتباع ب 70 ؟ وانا طبعا ماحبش حد أبدا يضحك عليا و يستكردني , اه ماهو كله إلا كده , و بعد تفكير طويل وصلت للحل والتقسيمه , طبق الفويل و البلاستيكه ب 3 جنيه يبقو كده 35 , و كلمة سعادة الباشا ب 17.5 , هما قالوها مرتين يعني 35 كمان , كده يبقى المجموع 70 وانا محدش ظلمني ولا حاجه , ماهو البرستيج غالي برضه , و لعلمكو بقى , كل طابور الناس الواقفين دول كانو جايين ياخدو فسيخ و رنجه و سردين و برستيج .
..........................................................................................................
Mohamed Hussein
2 مايو 2019 ·
أنا أقولك اللي أعرفه بقى عن صفقة القرن يا ابن الباشا , بدل مانت ماشاء الله تبارك الله عاملنا فيها جيفارا عبد الحميد جيفارا
.........................
صفقة القرن الحقيقيه هي إن راجل اسمه عبد الفتاح السيسي و جيشه و شعبه بيحاربو جماعه ارهابيه دوليه كبرت و ربربت و عملت امبراطورية اقتصاديه و توغلت في كل حته في عهد السيد الوالد .
.
صفقة القرن الحقيقيه هي اننا نلاقي نفسنا في يوم من الأيام باحتياطي نقدي 13 مليار و دولة على وشك الإفلاس عشان السيد الوالد دمر زراعة القطن و دمر الصناعه و التصدير و عمل لنا ملاعب جولف .
.
صفقة القرن الحقيقه هي الفساد اللي بقى دوله موازيه داخل الدوله و اللي لسه بنعاني منه لحد النهارده و ده طبعا بفضل بابا وشلته .
.
صفقة القرن الحقيقيه هي فيروس سي اللي هرى كبد ملايين المصريين و عالجناه و بنعالجه و البركه طبعا في الحاج .
.
صفقة القرن الحقيقيه هي شبكة الطرق اللي كانت بتترصف و يعاد رصفها عالورق أيام أبوك واللي خلتنا نعملها من الأول خالص , لما كنا فعلا في شبه دوله .
.
صفقة القرن الحقيقيه هي اننا نسلح جيشنا من أول و جديد و نحل مشكلة كهربا كانت بتقطع اكتر ما بتيجي , هو بابا كان مشغول في ايه بالظبط طول التلاتين سنه؟ لعل المانع يكون خير .
.
صفقة القرن الحقيقيه هي الحياه السياسيه اللي دمرها سعادة الباشا و اللي خلتنا نوصل لمرحلة أحزاب كرتونيه و شوية سياسيين صيّع مابين هجاص و طبّال و شمام كوله
.
صفقة القرن الحقيقيه هي التخلص من متاهة دعم الوقود و الدولار و هشتكه الزبون و احيينا النهارده و موتنا بكره و عاش السيد القائد محمد حسني مبارك , و المنحه ياريس .
.
باختصار , صفقة القرن الحقيقيه هي التفويض اللي عمله المصريين للسيسي عشان ينقذ مصر بعد ما أبوك خربها و قعد على تلها .
.
أما شغل التلقيح زي اللامؤاخذه فعايز أقولك برضه , جيش مصر العظيم اللي شال البلد في السنين اللي فاتت , اللي شالها في وقت الطوفان , مابيعرفش يخون ولا يبيع و لا يتنازل , و إلا كان ساب أبوك في الحكم بعد 25 يناير أو سابك انت و اخوك تورثو التكيه و العزبه .
...................................................................................................................................
Mohamed Hussein
3مايو 2019·
رئيس الوزراء اللبناني سعد الحريري :
- نتمنى في لبنان أن نستطيع تكرار التجربه المصريه التي قادها الرئيس عبد الفتاح السيسي .
.
- عبد الفتاح السيسي بدأ في إنقاذ مصر و هيكلة و تحرير الاقتصاد و تطوير منظومة القوانين و حل مشاكل الطاقه والكهرباء و الغاز في ظروف صعبه جدا , ظروفنا في لبنان أسهل و لذلك من الممكن لنا تكرار النموذج المصري ( فاتورة الكهرباء في لبنان تكلفهم 40 مليار دولار سنويا ) .
.
- أتمنى ان تصبح التجربه المصريه عدوى تنتقل إلى كل الدول العربيه , لأن كل يوم تأخير بيكلفنا كتير , الناس هتعاني شويه في الأول و طبيعة البشر انهم بيحبو ال safe zone , لكن التجربه المصريه هي الحل لإنقاذ مستقبل الأجيال القادمه وبناء الأوطان بشكل يليق بنا .
.
- عبد الفتاح السيسي في خلال عشر سنين هيرجع لمصر سابق مجدها .
........................
........................
مممممممممم بس بقى يا طبال يا أمنجي , تفهم إنت ايه في الإقتصاد و حكم الاوطان و مستقبل الشعوب ؟ دانت حياله رئيس وزراء لبنان , بذمتك بذمتك واحد زيك هيكون بيفهم أكتر من أم نحمده بتاعة الكرشه ؟
........................................................................................................................
Mohamed Hussein
4 مايو 2019 ·
الأرض بتتكلم مصري
.
اللي جرب من حضراتكو الغربه في أي بلد من بلاد ربنا , حتى البلاد العربيه و الإسلاميه , حتى البلد اللي نزل فيها الإسلام , مش هيلاقي أي مظهر من مظاهر رمضان , رمضان عندهم زي رجب زي ربيع أول زي أكتوبر و سبتمبر وبؤنه , رمضان فقط و حصريا تلاقيه في مصر وبس , له طعم و شكل و لون , له هيبه و شخصيه , ماركة مسجله , زينه و فوانيس , مدفع الإفطار إضرب , خشاف و كنافه و قطايف , مسلسلات و خيم رمضانيه .
.
شباب و أطفال و رجاله كبار واقفين في الشوراع وقت أدان المغرب و عالطرق الزراعيه , يوقفو الناس و العربيات , يفطرّوهم بالعافيه , هتفطر يعني هتفطر , و أحيانا موائد عالطريق بشوفها وانا رايح المنصوره , والراجل يحلف بالطلاق انه طالما المغرب أدن هتركن عربيتك و تنزل تفطر معانا , اللي بيعملو الموائد دي ممكن يكونو سالفين فلوسها أو مجمعين من بعض , و اللي بيقفو يرمو عليك بلح و مايه و عصاير وساندوتشات وقت الأدان ممكن مايكونشي في جيبهم عشره جنيه على بعضها .
.
ميريام و ميلاد بيعزمو أصحابهم المسلمين عالفطار كل سنه , بيعملو وليمه تبهرك , و ممكن في يوم تضرب في دماغهم و يفطرو كلهم في معبد أبو سمبل أو جنب الأهرامات أو في قلعة قايتباي , يعني في حضرة أسيادنا الأجداد , ماحنا أصلنا بلد ملهاش كتالوج , أو كان لها كتالوج و ضاع , لما بنحب نفرح بنفرح و محدش بيعرف يفرح زينا , و اللقمه اللي تكفي اتنين بنقسمها على سبعه و نشبع , عشان احنا باختصار أُمّه و دوله حقيقيه , مش دوله بلاستيك ولا دولة بنت إمبارح .
................................................................................................................
Mohamed Hussein
4 مايو 2019 ·
مصر تحذر تركيا من أي نوايا للبدء في الحفر في حقول بحرية غرب قبرص !! .
...............
...............
نقول تاني
عملنا ترسيم حدود في البحرين الأحمر و المتوسط ليه ؟
- عشان نعرف ننقب عن ثرواتنا و بترولنا و غازنا و نستخرجهم و نتحول من دوله مستهلكه و مستورده لدولة منتجه و مصدره ( الخطوه دي تحديدا كانت محتاجه فارس مش رئيس بدرجة موظف حكومه او بدرجة عرضحالجي ) .
.
تركيا سرحت خرفانها و الصيع بتوعها وقت ترسيم الحدود لتشويه مصر ليه ؟
- عشان ماكنتش عايزانا نعمل كده , و تفضل حقول الغاز دي مشاع و ينهبو منها زي ماهما عايزين .
.
بنشتري سلاح و حاملات مروحيات و غواصات وطيارات رافال وندفع فيهم مليارات الدولارات ليه ؟
- عشان نحمي حدودنا البحريه و نحمي ثرواتنا في شرق المتوسط , ثروات أولادنا و أحفادنا و الأجيال اللي جايه .
.
تركيا لامه الخرفان عندها و بتعلفهم و تفتح لهم قنوات ليه ؟
- عشان عارفه ان حرب الغاز مع مصر قادمه لا محاله , وبتستخدم الخرفان كورقة ضغط و ورقة تشويه لمصر و جيشها ( يعني سلاح في إيديهم حتى لو كان فشنك , ماهو العيار اللي مابيصبش بيدوش ) .
.
تركيا بتدعم الربيع العربي اللي حصل في المنطقه اخر 10 سنين ؟
- تركيا دوله استعماريه قذره قديما و حديثا , و مكانش فيه ربيع عربي ولا ربيع ياسين , كل الحكايه مؤامره لإسقاط جيوش و هدم دول ( عشان مصلحة الكيان الصهيوني ) و أطراف المؤامره دخلوها لأسباب اقتصاديه ( خطوط غاز و بترول , يعني مصادر الطاقه ) .
.
عملنا تعديل للدستور و سمحنا للرئيس بفتره استثنائيه تالته ليه ؟
- عشان مصر في التوقيت الحالي و في السنين الجايه ماينفعش يحكمها غير السيسي ( ربنا يبارك في عمره ), لا انا انفع ولا حضرتك ولا الأستاذ اللي هناك ولا الأبله اللي قاعده ورا , مصر في حالة حرب متواصله من 2013 , حرب بناء و حرب سياده و حرب ثروات و حرب مستقبل .
.
لو قامت حرب نظاميه حقيقيه واضحه زي الشمس بين مصر و تركيا , يا ترى الخرفان و شمامين الكوله و الصيع و عمرو واكد وخالد ابو النجا هيقفو فين ؟
- الخونه لهم صف واحد بيقفو فيه , ماينفعش يقفو في مكان تاني
.
طب هنعمل ايه مع احتمالية تنقيب تركيا عن الغاز في شرق المتوسط ؟
- احنا مش هنعمل , احنا هنصوم و نصلي و نجيب فوانيس و كنافه و قطايف و نغني وحوي يا وحوي و نعيش حياتنا عادي خالص , إنما جيشنا و رئيسنا هيعملو و جاهزين و مستعدين لكل الاحتمالات و بشتي الطرق و الكباري , و ممكن يكونو بيحاربو حاليا و احنا قاعدين نكتب جدول لمسلسلات رمضان اللي هنتابعها و مستنيين الريمونتادا بتاعة ليفربول في ماتش العوده .
.......................................................................................................................
Mohamed Hussein
5 مايو 2019 ·
المعجزه
.
اتنقلنا خلاص من مرحلة أحلام سيادة الرئيس أوامر لمرحلة أحلام سيادة الشعب و سيادة البلد أوامر .
.
كان عندنا حتة أرض غاليه أوي علينا , أهملناها و سيبناها بايره , ليه ؟ عشان الحاج صاحب البيت لقى الأرض دي بينه و بينها مجرى مائي , قنايه مليانه مايه , و عشان يعمرها لازم يعمل كباري كتير و أنفاق و يصرف مليارات متلتله و هو كان مشغول بملاعب الجولف و ( بالمنحه ياريس ) و بافتتاح مدرسة سوزان مبارك الإبتدائيه المشتركه , ولما الحاج أهمل حتة الأرض اللي مساحتها شاسعه قد مساحة خمس ست دول حصل فيها ايه ؟ حصل فيها اللي منطقي جدا إنه يحصل , الأرض اتحولت لمستنقعات , طلع فيها حشائش و سحالي و تعابين و إرهابيين و تجار سلاح و تجار مخدرات و عصابات دوليه و اتعمل فيها شبكة أنفاق بحجم مدينه , و ليلة كبيره أوي سعادتك , ماهو ابنك لما تهمله و ماتربيهوش و ماتسألش عنه ماتبقاش تستغرب لما تلاقيه اتربى في بيت غريب أو حتى في بيت عدوك الخواجه .
.
و في يوم من الأيام اتبدل الحال و بقى غير الحال , و جالنا واحد مصري للنخاع , مصري حتى الثماله , لقى نفسه مضطر يحارب الإرهابيين و التعابين اللي كبرو و ربربو في الأرض بتاعتنا اللي اتحولت ببركة الحاج لمستنقع , قال طب هنحارب و ندافع عنها بدمنا , بس تنميتها و تنضيفها من الحشائش ماتقلش أهميه عن محاربة تعابينها و سحاليها , وبدأ يا مؤمن يشتغل بإيديه الإتنين , إيد تحارب و إيد تبني و تعمر و تحفر تحت المايه و تنحت في الصخر , نوصل لها ازاي الأرض دي ؟ العربيات بتاخد 5 ايام عشان تعدي القناه , خلاص نعمل أنفاق , 4 أنفاق و كباري عايمه , هيكلفونا كتير أوي , مش مهم , نستورد ايه ؟ ماكينات الحفر بس و هتبقى بتاعتنا نستخدمها في مليون حاجه بعد كده , طب نستورد كذا و كذا لزوم الحفر ؟ لا نعمل مصانع و مانستوردش , و لما نعمل الحكايه دي نوصل لحتة الأرض بتاعتنا في قد إيه ؟ في 20 دقيقه سيادتك , مش 5 أيام .
.
وفي الأرض نفسها اللي الحاج سابها بايره نعمل ايه ؟ نعمل تنميه بقى بما إننا فتحنالها طرق تكفي لعبور عشرات الألاف من البني أدمين و السيارات يوميا , نعمل مدن جديده ونشجع الناس يعيشو هناك , نديهم أراضي يزرعوها , نعمل جامعات و مصانع و مستشفيات و طرق و محطات طاقه , نبنيها من جديد .
.
بالمناسبه ,صاحب البيت الجديد لما عمل الأنفاق دي عملها لأغراض مدنيه عسكريه , يعني تنقل عربيات و بضاعه و ناس و بني أدمين و تنقل برضه دبابات و مدرعات و تنقل أم اللالي لو عايزين , ده طبعا عشان زي مانتو عارفين قدمنا ألاف الشهداء في ال 5 سنين اللي فاتو و صرفنا تريليون جنيه أنفاق و مشاريع قوميه في سينا عشان نسيبها للصهاينه و الفلسطينيين و المغول و قبائل الكوتوموتو الأفريقيه .
.......................................................................................................................
Mohamed Hussein
6 مايو 2019 ·
عارف يا صالح ؟ الألف طن نسكافيه و بن برازيلي وبحيرة الشاي بلبن و ال 15 مليون سيجاره اللي بنشربهم في مصر بعد الفطار , بيفوقونا من جوه .
Mohamed Hussein
6 مايو 2019 ·
مش عارف أتعاطف
.
عندي قلب والله و ضمير من الحجم الكومبو و جوايا أخضر بلون الزرع , لا انا بلاستيك ولا حديد مسلح , و مع ذلك مش عارف أتعاطف مع اللي بيحصل في قطاع غزه , مش عارف أغمي عيني و ألغي عقلي و أقعد أتعاطف كده مع نفسي و أعيط و أتشحتف .
أنا المصري يا مولانا , من البلد دي اللي حاربت الصهاينه 5 مرات , 48 في أرض فلسطين نفسها و قدمنا ألاف الشهداء , في 56 والعدوان الثلاثي , في 67 و النكسه , في الإستنزاف , في نصر 73 , عدونا الأزلي والتاريخي و الأبدي حديثا هو الكيان الصهيوني , ده عدونا كشعب بغض النظر عن حسابات السياسه و السياسيين , فشلت معانا كل محاولات تطبيعنا , احنا بينا و بينهم دم للركب , فوالنبي يعني محدش من الصيع و الأوباش و الحنجوريين يزايد علينا .
.
مؤخرا و أخر 13 سنه تحديدا ظهر لنا عدو جديد , إيدينا اتمدت له دايما بكل خير , بس عضها , اسمه حركه حماس اللي بتدير قطاع اسمه قطاع غزه الحدودي .
.
القضيه الفلسطينيه ماتت موتتها الأولى يوم ماتقسمت فلسطين لدولتين برعاية صهيونيه ( لو مش مصدق انها برعاية صهيونيه اتحرق بجاز مش مهم ) .
.
القضيه الفلسطينيه بالنسبالي كمواطن مصري ماتت يوم ما أشاوس حماس و الجهاد حفرو أنفاق مع سينا و بقو يبعتو الإرهابيين بتوعهم لقتال جنودنا في الجيش و الشرطه المصريه , يوم مانسيو اننا الأخ الكبير اللي خيره عليهم وعاللي جابوهم و يوم مانسيو إن عدوهم و عدونا في الشمال .
.
القضيه الفلسطينيه بالنسبالي ماتت يوم ماسيطرت حماس على قطاع غزه و اتحولت لمجرد جماعه إرهابيه مرتزقه بتحارب بفلوس الشاذ القطري و بسلاح الشاذ التركي , و بتحارب الأخ الأكبر مش العدو .
.
اللي بيحصل في قطاع غزه هو المشهد المكرر من المسرحيه الهزليه , المسرحيه اللي من حقك كمواطن عاقل تشك في كل تفاصيلها و أحداثها .
.
من حقي كمواطن عاقل أشك في كل الأرقام , الشهداء و القتلى و المصابين , أشك في الصور , مانا شوفت بعيني الخوذ البيضاء و اللي بيهببوه , من حقي أشك في التوقيت , من حقي أقول إن المشهد المكرر ده بعلم الطرفين و مباركتهم و إن الغرض ممكن يكون طرف تالت أو حاجه تالته .
.
يارب يا سيدي يارب , ربنا يخيب ظني , ربنا يهدي الصيع و الحنجوريين بتوع حماس و الجهاد و يعرفو عدوهم فين و يروحو يولعو في تل أبيب بكره الصبح , قولو أمين ( بس ده مش هيحصل على فكره ولا بعد 100 سنه ) .
.
أما انا كمواطن مصري بشوف اللحظه دي على إنها كلبين بيمثلو مشهد خناق , ممكن يكون فيه شوية ضحايا من الأبرياء ربنا يرحمهم ( و يخلصهم من حكم المرتزقه ).
.
لو المشهد الهزلي ده معمول عشان صفقة القرن بمفهومها الأمريكي الصهيوني ( الحمساوي ) يبقى يتحرقو بجاز هما التلاته , مصر ترعى القضيه الفلسطينيه و تشارك كطرف أو وسيط في الوصول لحل نهائي عشان نخلص من قصة عنب ديبو و من السبوبه اللي عايش على حسها صيع و عربجية المنطقه ؟ ماشي أهلا وسهلا , تتعمل صفقه على حساب متر من أرضنا ؟ لأ , طب على حساب تهجير و تسكين لمليون فلسطيني ( حمساوي ) في مصر ؟ برضه لأ , احنا بلد تستوعب 100 مليون مواطن عربي و نشيلهم على راسنا , لكن لو مليون خروف حمساوي فهما كفيلين إنهم يخربو قاره و يبيعوها لكلاب السكك و لأي حد يدفع .
.
ده عهدي بالرئيس عبد الفتاح السيسي اللي بثق فيه تماما و بثق إن رأيه نفس رأيي و يمكن الفرق الوحيد بينا إني بتكلم بمنتهى الحريه ( كمواطن ) و إن سيادته بيتكلم بمنتهى الدبلوماسيه ( كرئيس دوله ) .
...........................................................................................................................
Mohamed Hussein
7 مايو 2019 ·
يالله بقى بالدور , كل واحد يجيب 50 جنيه و نص بطه و قفص جوافه , و بعد كده تسمعو كلامي من سكات , قلت لكو برشلونه في ماتش الذهاب جاب جونين بطريقة هبلوله الشغاله و ان ليفربول أفضل بكتير و هيعمل ريمونتادا تاريخيه , أهو ليفربول فاز من غير صلاح و فرمينيو , 4/0 بالبدلاء على برشلونه و ميسي , 4/0 و ليفربول من غير تلتين قوته الهجوميه .
.
ألف مليون مبروك يا صلاح , نهائي أبطال أوروبا مستنيك , وشك حلو يا أم مكه
Mohamed Hussein
8 مايو 2019 ·
عائض القرني , بعد أربعين سنه من الهبد بإسم الإسلام و اللامؤاخذه الصحوه , بعد تجريف عقول ألاف من الشباب , بعد ما بعت ألاف من المعاتيه للجحيم تحت إسم الجهاد و حور العين و الفول الحريتي و هو نايم في قصره و عايم في ماية البطيخ , بعد ما شارك مع غيره في حرق و خراب بلاد و أوطان , رجع و اعتذر و قال سوري يا جماعه , حقكو عليا والله , أصلي اكتشفت فجأه إن قطر بتتأمر هي و إيران و تركيا وقناة الجزيره على دولنا العربيه , أصلي اكتشفت فجاه ان الإسلام و الصحوه اللي خربت بيهم عقول و أجيال كانو تايواني مش أصلي .
.
عمل شوية فلوس حلوين عائض القرني ده , و شوية قصور و فيلات و شاليهات زيه زي محمد حسان و الحويني و القرضاوي و عمرو خالد و غيرهم , و شوية ملايين من المتابعين يتشحتفو وراهم .
.
طب خلاص ما تزعلش يا اخ عائض , دموعك غاليه علينا اوي , خد هات لك عسليه
.........................................................................................................................
Mohamed Hussein
8 مايو 2019 ·
يا نهار أبيييييييض , دي مش كوره , ده سرك قومي عالمي , مدرب توتنهام بيقع في الأرض و يعيط , لاعبي أياكس هيجيلهم سكته قلبيه و جمهورهم , اللي بنشوفه النهارده من توتنهام و أياكس و اللي شوفناه امبارح من ليفربول و برشلونه يقول باختصار إحنا نلغي الدوري بتاعنا و نجيب سعد سمير و علولو و الونش و الجنش و نقعد كلنا في ميدان عام نشرب معسل و نتفرج عالدوري الانجليزي و دوري أبطال أوروبا و نفرح و ننبسط .
.........................................................................................................................
Mohamed Hussein
11 مايو 2019 ·
على سيرة البيض المدحرج و شاي البلكونه , لما خلصت جيش اشتغلت شويه في الدقي قبل السفر , و في يوم من الأيام حبيت أعزم ( أخت فاضله ) , وبصفتي فلاح مش من هنا سألت اللي شغالين معايا , لو عايز أعزم أخت فاضله إيه أفضل مكان أروحه ؟ واحد منهم ربنا يسامحه كان محامي من الدقي نفسها , قال تطلع بيها على ماريوت الزمالك , قلت مش مشكله , ماريوت ماريوت هو احنا يهمنا , استلفت جاكيت البدله بتاعه عشان مكانش عندي بدله , و خدت الاخت الفاضله لماريوت الزمالك في تاكسي , تخيلو واحد فلاح كان بيشتغل راعي غنم و هو صغير فجأه يلاقي نفسه في لوبي فندق اسمه ماريوت عالنيل و معاه أخت فاضله
.
دخلت بكل ثقه وكبرياء , مانا في جيبي 70 جنيه ولابس جاكيت بدله بتاعة نبيل المحامي اللي لبسني في الحيطه , الكلام ده كان سنة 2001 , هي قالت أشرب عصير و أنا طلبت شاي , ( سعادة الباشا ) الجارسون جاب الطلب , طب العصير بتاعها باين انه عصير أهو , فين الشاي بتاعي أنا بقى ؟ الشاي اللي أعرفه يا سعادة البيه بييجي كوبايه إزاز فيها بتاع اسمه شاي و غالبا جواه معلقه , قعدت أفرك و أحرك وانا شايفها بتشرب العصير و جاي معاه طقم صيني ماعرفش لزمته ايه , براد فخيم و حاجات فخيمه كده , قلت يمكن الطقم ده من طقوس الفندق , و سألتها هو الشاي بتاعي اتأخر كده ليه ؟ قالت لي مالشاي أهو , وشاورت على طقم الصيني اللي قدامي ( اللي هو طقوس الفندق ) , وشربت الشاي عالنيل وقت الغروب و طلبت الحساب , وقتها كانت أتخن كوباية شاي في أتخن قهوه في مصر تعمل لها نص جنيه أو 75 قرش ده لما يكون صاحب القهوه حرامي , جت الفاتوره و لقيت إن الشاي بتاعي اللي هو طقوس الفندق ب 35 جنيه وإجمالي الفاتوره 60 ج , دفعت زي الجزمه طبعا مانا مش هتخانق قدام الأخت الفاضله و جنبي سياح أجانب و عرب .
.
و لما سافرت البلد حكيت لأمي الحكايه , قعدت تعايرني بالشاي ده لحد ماماتت الله يرحمها و البلد كلها عرفت , و أمي قالت لي جمله مش بنساها , يا محمد يابني ال 35 جنيه بنشرب بيهم شاي أنا و اخواتك في سنه بحالها , من يوميها بطلت أشرب شاي في فنادق , حتى لو كان معايا أخت فاضله .
..................................................................................................................................
Mohamed Hussein
12 مايو 2019 ·
مش عايز أحرق لكو مسلسل زلزال بتاع محمد رمضان , بس واضح كده انه البطل محمد حربي هينجح اوي في شغله و حياته و يكبر و يغتني و بنتين يحبوه , واحده من توبه زي حلا شيحه و واحده تانيه مش من توبه زي بنت خليل بيه ( نفس اللي حصل السنه اللي فاتت بالظبط ) , ومحمد رمضان هيقرر انه ينتقم من الأشرار كلهم في العياط و خط الجيزه و لحد أخر فيصل , من أول خليل بيه اللي سرق أرض أبوه لحد الراجل اللي بيفرض إتاوه على أبو حلا شيحه , هيضربه علقه موت في الموقف و يقف بعدها يركن على ميكروباص و يشرب سيجاره وسط انبهار من حلا شيحه وأبوها و أمها و الجماهير الغفيره .
.
في رمضان 2020 , محمد رمضان هيعمل مسلسل جديد خالص , هيطلع فيه بدورين , دور الأب و دور الإبن , واحد هيقولي بس الحكايه دي اتهرست في مسلسلين قبل كده ( زلزال و نسر الصعيد ) , أقوله يا غبي فيه تفاصيل مختلفه , محمد رمضان الأب هيخلي المزه مراته ترقص له ( زي ما حصل قبل كده ) و بعدين لما يحبو يعملو ( إحم إحم ) هيغير الجمله بتاعته بقى , مش هيقول لها القضيب لازم يكون حديد عشان يعرف يشيل القطر , ولا هيقول لها ألوه يا مانجه يا مانجه ألوه , أكيد هيلاقو حاجه جديده , يعني مثلا يبص لها ويقول لها , ماتيجي نتناقش في أسباب انهيار الاتحاد السوفيتي , تقوم هي ضاحكه و غامزاله و تقوله عيب ياراجل العيال قاعدين
.
و بعد ما يتناقشو مرتين تلاته في أسباب انهيار الاتحاد السوفيتي ( ماهو الإتحاد السوفيتي مانهرش بسهوله كده و المناقشات أحيانا بتطول ) , يصحو من النوم و يركبو توكتوك كلهم عشان يزور أخته اللي عيانه في البدرشين , التوكتوك لجل السميع العليم يتقلب بيهم في الترعه , كلهم يموتو ماعدا عيل صغير يعيش , الواد ده هيكبر و يغتني و يتشهر ويبقى محمد رمضان برضه , و بنتين يحبوه , واحده من توبه و واحده مش من توبه , وهو يقرر انه ينتقم من كل الأشرار في كوكب الأرض و من سواقين التكاتك لأنهم كانو السبب في إنه اتيتم بدري , و هينتقم كمان من كل اللي بيشتغلو في خدمة العملا بتاعة تي إي داتا , واحد هيسألني ويقولي ايه علاقة تي اي داتا بالمسلسل ؟ أقوله مش عارف , بس أكيد المؤلف متضايق من الشركه دي و النت بيفصل عنده كتير فقرر إن بطل المسلسل ينتقم منهم .
......................................................................................................................................
Mohamed Hussein
12 مايو 2019 ·
صلاح السنادي مستواه أقل من السنه اللي فاتت , ده لما نقارن صلاح ب صلاح مش بحد تاني
..................
و مع ذلك :
- صلاح السنادي هداف الدوري الإنجليزي الأقوى في العالم و للمره التانيه على التوالي .
.
- صلاح السنادي مع فريقه ليفربول بيحتل وصافة الدوري الانجليزي بفارق نقطه ولولا رعونة و سخافة يورجن كلوب كانو حسمو اللقب من بدري .
.
- صلاح السنادي وصل مع فريقه ليفربول لنهائي دوري أبطال أوروبا , للموسم التاني على التوالي , وصلو على حساب بايرن ميونخ و برشلونه و ميسي شخصيا و بإذن الله يفوزو بالبطوله الأقوى و الأشهر في العالم .
.
- صلاح السنادي أحسن لاعب في أفريقيا للعام التاني على التوالي برضه
.
- الحقيقه يعني , مع احترامي للجميع و للأسماء و النجوم و المحللين و المغول و البيزنطيين , الحقيقه بتقول إن الدوري الإنجليزي و دوري أبطال أوروبا مكناش أصلا نسمع عنهم ولا في الحواديت , كان أخرنا شوية الحوكشه اللي بنشوفهم عندنا و اللي بنعتبرهم كوره و بطولات .
.
- والحقيقه إنه لما يذكر مثلا أفضل 5 لاعبين في العالم على مدار السنتين اللي فاتو في أي قاعده و أي قهوه في أي مكان في كوكب الأرض لازم يتقال منهم محمد صلاح , زيه زي ميسي و رونالدو و نيمار .
.
- فاللي عايز أقوله للساده أعضاء ألتراس محمد أبو تريكه و سيد أبو شفه و حسن أبو لُغد , إنه الواد ده اللي اسمه محمد صلاح , لا جه زيه في مصر والوطن العربي ولا هييجي زيه عشان تبقو عارفين .
...............................................................................................................................
Mohamed Hussein
13 مايو 2019 ·
إيران و الخليج و مصر و مضيق هرمز
.
مبقاش عندي إرتباك ولا لخبطه , ولا بقى فيه صوره بشوفها ضبابيه , كل الحكايه انك تشوف بوصلة مصر رايحه فين و تمشي وراها , مش مهم تثق في الأخرين و في الحلفاء و تصرفاتهم , بس مهم جدا انك تثق في الموقف المصري الرسمي .
.
مصر في 6 سنين كانو كلهم شألباظات في المنطقه و هبل و هري و هبد و تواطؤ و طفوليه و عنتريه و إرهاب و مخططات و مؤامرات و مئات المليارات بتتصرف عالخراب و كوكب راكبه 100 عفريت , مصر الوحيده اللي خرجت من الليله دي صاغ سليم و إيديها نضيفه , كل كلمه بتتكتب في بيانات الخارجيه و الرئاسه و الجيش بتبقى موزونه بميزان دهب و متراجعه ألف مره , مصر اللي تجاوزت مرحلة الطوفان بمنتهى الإحترافيه و بكلمة سر هيتكتب فيها كتب و مجلدات و تبقى مناهج سياسيه في المستقبل , كلمة السر المصريه البحته إنك تكون أنضف و أقوى , أنضف من إنك تلعب دور الديب أو القاتل السفاح البلطجي و أقوى من إنك تلعب دور الخروف أو الضحيه .
.........................................................................................................................................
Mohamed Hussein
14 مايو 2019 ·
قواعد اللعبه
.
أي رئيس عصابه في الدنيا بيكون له صبيان بشكل متسلسل , حلقات يعني , و بيكون دارس صبيانه كويس زي ماهو دارس أعداؤه و دارس خطته و دارس الغرض منها و عامل كمان خطط بديله .
.
حلقات الصبيان بتكون مختلفه , و مش بالضروره تكون جايب الصبي عشان تديله شوية فلوس و يقوم بمهمه معينه , بالعكس , الذكاء و الإحترافيه إنك تشغل صبيان كتير تحت ايدك من غير ماتصرف عليهم دولار واحد , دانت ممكن تاخد منهم كمان , أهم حاجه تكون دارسهم كويس , دارس عقولهم و جيناتهم و أطماعهم و تعرف تستغلها لتحقيق أهدافك إنت .
.
اللي حصل في الشرق الأوسط أخر عشره عشرين سنه هو لعبه من رئيس العصابه اللي بيحكم العالم ( اللوبي الأمريكي البريطاني الصهيوني ) , و الصبيان هنا كانو بشكل ما , تركيا و قطر و طبعا التنظيم الإرهابي الدولي , حتى إيران كانت بتلعب دور الصبي من غير ماتحس , تركيا عندها جينات استعماريه زي ايران و أمريكا عارفه , عندها رغبه باستمرار في التعملق , و ماله يا حبيبي , اتعملق شويه في سوريا و العراق و ليبيا , اخرب فيهم على قد ماتقدر , ده جزء من خطتنا اصلا , اعمله بايديك و احنا هنقعد في التكييف نقولك برافو
.
قطر الكشك الخليجي عنده عقدة نقص أزليه , باستمرار حاسس انه صغير و تافه و حقير , في أي اجتماعات مهمه مكانش بيبقى له كرسي , محدش معترف بوجوده , عنده أرض مساحتها قد مساحة السنبلاوين و عدد سكان قد عدد سكان كفر غنام , و غاز و بترول مالهمش اول من اخر , يصرف فلوسه فين ؟ يدور له على دور و كرسي , يشتري لنفسه تاريخ , أي تاريخ , يحاول ان اسمه يكون بيتردد باستمرار ( حتى لو في صفحات الحوادث ) , يصرف شوية مليارات مش مشكله , برضه و ماله , اشتغل يا حبيبي اشتغل ( بصوت العظيم الراحل استفان روستي ) .
.
اللي مايعرفهوش قطر و تركيا و إيران , إن قاعده مهمه من قواعد اللعبه بتقول , في أخر جوله لو حبيت كرئيس عصابه تتخلص من حد وانت بتنضّف المكان , بتبقى أسهل حاجه هي انك تتخلص من صبيانك , رئيس العصابه بيقتل صبيانه عشان سرهم يندفن معاهم , و في لحظه ما بيقتلهم بيكون قابض تمن دمهم , رئيس العصابه اجمالا مش عبيط ولا برياله عشان يثق في صبي لعب دور الكلب القاتل على أخوه وابن عمه
.
السعوديه وقعت في اخطاء كارثيه في الفتره اللي فاتت , لكن اقتصاد السعوديه و حجم مدخراتها و استثماراتها في أمريكا و أوروبا و الأهم بترولها بيحموها , بيحموها حتى من رئيس العصابه نفسه , و إيران واقعه في فخ مش بسهوله هتعرف تخرج منه .
.
أما مشكلة قطر و تركيا فهي باختصار إنهم دخلو لعبه بتاعة الكبار و هما صغيرين أوي , بالمناسبه ضرب الصبي التركي مش محتاج حرب نظاميه ولا صواريخ و دبابات , كل الحكايه تويتتين تلاته و قرارين تلاته تلاقو الليره بتتشألب و الإقتصاد التركي اللي عامل زي جبل من الحلاوه النيفا ( غزل البنات ) يطلع عليه النهار و يسيح , كان صرحا من خيال فهوى .
.
مصر بقى , دولة 30 يونيو , ملهاش دراع عشان يتلوي ولا إيد تتمسك منها , بالعكس , نفس رئيس العصابه و هو بينضف المكان و بيرتب أوراقه الجديده بيقعد قدامك باحترم لأنك من البدايه و في وقت ذروة الازمه كنت بتتعامل بندّيه , مالعبتش دور العدو الغشيم اللي بيضرب راسه في الحيطه ولا لعبت دور الصبي التافه .
............................................................................................................................
Mohamed Hussein
15 مايو 2019 ·
فيه حاجات كتير أوي مابينفعش فيها الكلام ولا الوصف , هتتكلم تقول ايه و لو حبيت توصف هتوصف إزاي ؟ إزاي كام كلمه و كام بوست و كام مقاله يوصفو عمل تم على الأرض بالشكل ده ؟ .
.
- محور تحيا مصر , الكوبري المعلق اللي دخل موسوعة جينيس للأرقام القياسيه بصفته أعرض كوبري ملجم في العالم , بطول اكتر من 500 متر و عرض أكتر من 60 متر .
.
- المشروع تم في وقت قياسي بإيد مصريه بحته , على رأسها شركة المقاولون العرب , الشركه الأكبر في أفريقيا , أكتر من 4000 مهندس وعامل بيشتغلو في صمت و بيسلمو المشروع قبل معاده ب 10 شهور .
.
- الكوبري المعلق اللي فيه ممشى زجاجي عشان تشوف النيل تحتك و انت ماشي هو جزء من محور روض الفرج , و محور روض الفرج هو جزء من الطريق الحر اللي بيبدأ من عند الزعفرانه و البحر الأحمر و يوصل لقلب القاهره و يطلع لاسكندريه الصحراوي و يمشي ناحية الغرب يفوت على مطروح و الضبعه و يوصل لحد السلوم على حدود ليبيا , مانا قلت لكو مفيش حاجه تنفع للوصف , محور بيربط البحر الأحمر بالقاهره بالاسكندريه بالبحر المتوسط بحدودك مع ليبيا , بطول 600 كيلو , و بتكلفه هتتجاوز 160 مليار جنيه , و لو كنت من بتوع ( فلوس البلد بتروح فين ) فأحب أقولك إن ده مشروع من ضمن ألف مشروع مماثل بتروح فيهم فلوس البلد .
.
- طب ليه نعمل كده و مش كنا بالفلوس دي جبنا فوانيس رمضان و ساندوتشات حلاوه بالقشطه ؟ بتعمل كده عشان مفيش استثمار ولا صناعه ولا تجاره بدون شبكة طرق قويه محترمه , بتعمل كده عشان السيوله المروريه مش بتيجي ببركة دعا الوالدين , بتعمل كده عشان توفر عالناس و الشركات وقت و فلوس , الحسبه بتقول ان المشروع ده هيوفر 200 ألف لتر بنزين يوميا , يعني هيوفر عالمواطنين و الدوله بنزين ب مليون جنيه في اليوم ( في اليوم مش في الشهر ولا في السنه ) .
.
- طيب ليه المواطن يدفع رسوم ؟ عشان ببساطه امكانيات الدوله بالكتير تعمل المشاريع دي , عندها مشاريع تانيه عايزه تكمل , طب نعمل المشروع و نسيبه من غير صيانه عشان نركز في غيره ؟ يبقى هتخسر المليارات اللي دفعتها خلال 10 سنين بالكتير , الرسوم هنا عشان تضمن للمحور و الطريق الإستمراريه بنفس الجوده , يتعمل له صيانه باستمرار , و انت كمواطن لك الاختيار , عندك الطرق القديمه موجوده زي ماهي , مستكتر ال 20 جنيه امشي في الطرق اللي اتعودت عليها , بس شوف هتضيع وقت قد ايه و تضيع بنزين و فلوس قد ايه ؟ أنا جربتها في طريق شبرا بنها الحر و لقيتني بوفر 40 دقيقه و 6 لتر بنزين قيمتهم 40 ج و بدفع رسوم 15 ج
.
أجمل حاجه بقى على الاطلاق في كل المشاريع الضخمه اللي عملها السيسي إنه مفيش ولا مشروع بيحمل اسمه ولا اسم مراته ولا اسم حد من عياله اللي احنا مانعرفش أساميهم أصلا , الله يرحم أيام ما كنا لما نعمل مكتبه ولا مدرسه ولا فاسقيه حتى نسميها بإسم الحاجه مرات الحاج .
ليست هناك تعليقات:
إرسال تعليق