Mohamed Hussein
1 مارس 2019
بعد الهري
.
بعد مالناس تكون خلصت هري و شألباظات , بعد ما تجار الفقرا و أدعياء اليساريه و أشباه البني أدمين يخلصو البؤين اللي حافظينهم على طريقة صلاح عبد الله في فيلم كباريه ( عارف يا صالح , أنا السطرين اللي بكتبهم عن الغلابه و أتاجر بيهم بينضفوني من جوه ) .
.
بعد ما حبايبنا بتوع ثورة كل يوم تلات و لساها ثورة بؤونه يكونو خلصو برضه البؤ الثوري و هرموناتهم ارتاحت شويه و رجعت للمستويات الطبيعيه .
.
و بعد ما حبايبنا التانيين بتوع الصقور لا تنام و النسور لا تبيض , اللي عارفين القرد مخبي ابنه فين يكونو خلصو الهبد بتاعهم .
......
بعد ما ربنا يكرمنا و نخلص الهري المعتاد في كل حادث و نلم الكهارب , ممكن أقول لحضراتكو حاجتين اتنين بشوفهم مهمين , بهدوء شديد
.
1- أدخل على جوجل و اكتب حوادث في أمريكا ( أو أي دوله تانيه ) , قطارات و سيارات و طيارات و بيوت بتقع و عفاريت بتتنطط و شوف كام حادثه في السنه و ضحاياهم كام ؟ سواء بسبب الأهمال او عنصر بشري قذر أو أو أو , و لما تدخل اختار أي حادثه عشوائيه و هات أي سته سبعه أمريكان اسألهم عليها , يا ترى قولتو احنا دمنا رخيص ؟ قولتو الحكومه بتضحي بالغلابه ؟ قولتو بيبنو مش عارف ايه و ماطوروش مش عارف ايه ؟ قولتو يرحل الرئيس الأمريكي و الحكومه الأمريكيه ؟
.
مش عايز أقولك التقيله , لو انفجر قطر في امريكا و اتقلب بيجو 7 راكب في مصر في نفس التوقيت , الإعلام الأمريكي هيسلط الضوء عالبيجو ال 7 راكب اللي عندنا و هيعمل لقاءات من أمام البيجو و من خلفها و من جوه الشكمان لو تحب , و وقتها لو سألت مواطن امريكي أخبار القطر اللي انفجر عندكو في ولاية كذا ايه ؟ يقولك معندناش قطر انفجر انت اكيد تقصد البيجو ال 7 راكب اللي اتقلب قبل قرية شبرا قباله على طريق السنبلاوين ؟ ( يارب الناس تركز و تفهم أصول اللعبه ) .
.
2- الحاجه التانيه , حادث محطة رمسيس خطورته مش في عدد الشهداء ( العدد ده يساوي نفس العدد اللي بيحصل في حادثة ميكروباص عندنا مره كل اسبوعين تلاته ) , انما خطورته في المكان ( محطة مصر ) و الشكل ( إنفجار مدوي و ناس تتحرق ) و خطورته كمان في التوقيت !! .
.
و ده اللي مخليني عندي يقين ان السواق السمج اللي طلع عالهوا طلع بموافقه أمنيه عشان الناس تهدى و تعرف أصل الحكايه ايه , انما اللي ورا الحكايه و الحدوته ( إن وُجد ) ف ده برضه اللي عندي يقين انه بيتم حاليا , نفس السواق و اللي فوقه و اللي تحته و اللي جنبه يكونو بيتعصرو زي البرتقانه في التوقيت الحالي و من أكتر من جهه أمنيه عشان لو فيه أي احتماليه لعمل إرهابي ( استهدو بالله بس و اعرفو إن النيابه و الأجهزه الأمنيه و السياديه و البحث الجنائي و الطب الشرعي مابيشتغلوش بطريقة الهبد بتاعة الفيس بوك )
.
بالمناسبه و حاجه أخيره عايز أقولها , في نهاية التحقيق ممكن يتوصلو لحقايق و مصايب معينه و مايتمش الإعلان عنها , كل الدول المحترمه بتعمل كده يا مولانا , لو كان عدم الإعلان هيفيدها في طريق معين أو لغرض ما ( ماهي الاوطان برضه مابتتحكمش بطريقة إدارة كشك سجاير ) .
.........................................................................................................................
Mohamed Hussein
2 مارس 2019
الإبره و المنْجل
.
صباح الخير
- عندنا مثل جميل في بلدنا يقولك فلان بيفتي عالإبره و يبلع المنجل !! , اللي هو بيقوله أهل السياسه فلان بيكيل بمكيالين , ده الشكل الدبلوماسي للجمله لما تكون بتخاطب منظمات أو جرايد شهيره أو قنوات أو حكومات و مسئولين في دول عظمي ( سيادتك يافندم بتكيل بمكيالين ) و الترجمه انت ابن تيت و أمك عارفه
.
الكائن الإخوانجي رباية الصهيونيه و المخابرات الأمريكيه والبريطانيه بيعيش بنفس المبدأ ده , يقتل و يحرق و يحرض عالقتل و يخون بلده بمنتهى الأريحيه و يمارس كل أنوع الإرهاب و لما بس تكتب عنه بوست يقولك انت ازاي تقول لفظ ( وسخه ) في البوست بتاعك , اه والنبي مليش حق أبدا , و تلاقيني بشرب سجاير كمان , هو انا هروح من ربنا فين
.
الإبره و المنجل هتلاقيهم في الأحداث و طريقة تغطيتها , تعديل الدستور في مصر كارثه ضد الديموقراطيه و ضد الحريه و ضد النار و ضد الحشره وضد الفار , إنما لما المرحوم بوتفليقه يترشح للإنتخابات ( ربنا يرحمه و يبارك في عمره ) عادي ممكن يعملو نفسهم من بنها أو من شيكاغو .
.
السيسي يحكم مصر أكتر من 8 سنين ليه ؟ دي تبقى فاشيه و ديكتاتوريه و بطاطس مقليه , إنما نوعى عالدنيا نلاقي أردوغان بيحكم تركيا و بوتين بيحكم روسيا و ميركل بتحكم ألمانيا و الصين عامله تعديل يسمح بحكم الرئيس مدى الحياه , تبقى دي قمة الديموقراطيه و قمة تداول السلطه , ماهو أصل السلطه مداوله مش مناوله
.
الإبره و المنجل لما تلاقي الدويلات و الأكشاك اللي بتتحكم بالتوريث و اللي بيصحى من النوم فيها بيبقى أمير أو يقفل الحمام على أبوه و ياخد مفاتيح القصر , لما الأكشاك دي تديك دروس في الديموقراطيه و الصناديق و تجيب خبراء و تعمل لقاءات و شألباظات .
.
الإبره و المنجل يعني يعملو focus على حادثه عندك و يكبروها و يفخموها magnification فتقوم تشوف السحليه على انها ديناصور بيطلع نار من ودانه و يعملو العكس في بلاد تانيه , تقوم تشوف النمر على انه قطه شيرازي .
.
الإبره و المنجل يعني قناة الخنزيره تجيب راجلين واقفين على شط ترعه و معاهم عيل صغير و موتوسكل و تقولك ثوره عارمه ضد الإنقلاب في مصر , ولما يخرج مئات الألاف ضد البشير في السودان ماتلاقيش كاميراتهم خدت بالها , جل من لا يسهو يا أخي .
.
الإبره و المنجل لعبة عقل , لعب بالمصطلحات و الاحداث , تكبير و تصغير وليّ للحقايق , طُعم يترمي لك بشكل حلو , أو شوية عسل في ساندوتش مسموم
.................................................................................................................
Mohamed Hussein
2 مارس 2019
كل مابمشي بالعربيه في شارع و أشوف سيده سوريه فاضله واقفه في اشاره بتتبيع مخبوزات عاملاها أو حاجه طبخاها أو حتى بتمد إيديها للناس , بقول لمراتي و انتي مغمضه كده تأكدي إن الست العظيمه دي في يوم من الأيام كان لها بيت فيه أوضة نوم و انتريه و مطبخ و حمام و تلاجه فيها أكل , و عندها أولاد و خير و فلوس و ستر و 4 حيطان و أهل و جيران و حلم جميل بتحلمه , فجأه صحيت من النوم لقت نفسها واقفه في اشارة مرور في دوله تانيه بتتحايل عالناس يشترو الحاجه اللي هي عملاها عشان بس تعرف تعيش .
.
دي الإجابه ببساطه و باختصار شديد و من غير أي فزلكه عالسؤال ده , هو جيش مصر عمل ايه بالظبط في السنين اللي فاتت ؟ و مصر اشترت سلاح و طورت ترسانتها العسكريه ليه ؟ .
.
الأوطان يا حماده مش بيحميها ويستر أهلها تويتات البرادعي ولا سفسطه الأسواني ولا هبد عصام حجي ولا حزق معتز مطر ولا شعارات حمدين صباحي ولا يمكن أبدا أبدا هتحميها بمر*عة خالد لامؤاخذه أبو النجا .
...............................................................................................................................
Mohamed Hussein
3 مارس 2019
عاجل , صرح مصدر قريب الصله من مصدر مسئول رفض الإفصاح عن إسمه بأن جهة سياديه ما قد وقع اختيارها الأول لتولي حقيبة وزارة النقل بشكل سري على أبويا الأستاذ الدكتور الحاج أحمد أبو حسين , نحن في انتظار الإعلان الرسمي و حلف اليمين , بس ماتقلقوش ماتقلقوش عمر البدله ما هتغيرني و لا هعمل لكو بلوك , هفضل أتكلم معاكو عادي كده كأننا أصحاب .
.
يا أستاذ يا استاذ !! .
- نعم يا حبيبي ؟
.
بس أبوك الله يرحمه مات من 25 سنه
- يابني التفاصيل الصغيره دي مابتفرقش معانا , بقولك جهه سياديه وقع اختيارها , انت ايه مابتفهمش ؟ و بعدين يعني هو عمر سليمان أحسن من أبويا في ايه ؟ أهو الراجل مات من سنين هو كمان و مع ذلك لسه لحد دلوأتي بيعمل اجتماعات سريه و يبلّغ نتيجتها لصفحة صقور لا تنام و للأدمن بتاعة الصفحه , ست أم شوشو .
..............................................................................................................................
Mohamed Hussein
4 مارس 2019
تحليل المخدرات لقى أستروكس , و عصاية التشغيل بتاعة الجرار كانت على وضع السرعه القصوى !! .
.
كده قشطه , و السواق السمج اللي طلع عالهوا وراه حدوته , و حدوته نفسه هيتجاب و يتعلق على عمود النور .
.
حبايبنا شمامين الكوله ماتنسوش لما تشوفو السواق متعلق على العمود هو و ( حدوته ) تتعاطفو معاهم و تقولو ده السيسي مدبر الحادثه عشان يداري على ماعرفش ايه , او تقولو انه السواق مناضل ( و مدون ) و نام في التحرير 18 يوم , أو تقولو انه اعترف تحت التعذيب والصعق بالكهربا و الضرب بالمنجنيق .
.
حبايبنا الخرفان ماتنسوش بقى , السواق ده أصلا كان مجاهد و ضد الإنقلاب و النظام بيترعب منه و ملفق له التهمه , و قبضو عليه و هو بيصلي وانه حافظ القرأن الكريم و بيحج بيت الله كل يوم تلات , و كان الأول على دفعته في الثانويه العامه .
.
يوووه كنت هنسى حاجه مهمه , حبايبنا التنويرين اللي بيحملو شعلة النور في بحر البطيخ , ماتنسوش انتو كمان , السواق ده أكيد أكيد متأثر بكتب التراث و بمناهج الازهر الشريف , فرع غمره .
........................................................................................................................................
Mohamed Hussein
5 مارس 2019
شوفتو مصطفى النحاس بقى رايق و وشة نور إزاي لما شالو الحارتين بتوع الميكروباص اللي في النص و الطريق بقى 5 حارات في كل اتجاه ؟
الله يعمر بيتك ياريس و يخرب بيت غطا الحله اللي كان بيحكم مصر
مورنينج عليك يا مصطفى , قلبي يارب
....................................................................................................................................
Mohamed Hussein
5 مارس 2019
حُريّتك , بتقف فين ؟!
.
1- بتحب تشغل اغاني في العربيه وانت سايق ؟ و ماله , بتسمع أم كلثوم أو حمو بيكا ؟ انت حر , شغل الكاسيت على قدك انت وبس , مش تسمّع اخر الشارع , حريتك بتقف هنا .
.
2- وانت راكب القطر بتحب تتسلى و تقرا في المصحف ؟ اقرا , بتحب تقرا بصوت ؟ و ماله , صوت عالي يوصل لأخر العربيه ؟ لا , حريتك بتقف هنا , غيرك عايز ينام أو مش مسلم أو أو , حتى في القرأن ؟ أه حتى في القرأن .
.
3- نفسك تربي كلب جيرمان ؟ وماله , و هتنزل تتمشى بيه في الشارع ؟ انزل , لقيت ناس كتير مش بتخاف من الكلاب ؟ زي الفل , لقيت ستات و أطفال عندهم فوبيا من الكلاب , و ممكن يترعبو أو حد منهم يجري مايخدش باله تقوم عربيه تخبطه ؟ هنا ستوب , مالكش حريه , خد الكلب مشيه في مكان مفهوش ستات و اطفال ممكن يخافو أو ماتنزلوش من بيتك .
.
4- غاوي تربي كلاب و الكلاب بتنبح طول الليل وانت عادي متعود على صوتهم و مستمتع بيه ؟ ماشي , حد من جيرانك اشتكى انه مابيعرفش ينام بسبب كده ؟ ستوب , حريتك تقف هنا .
.
5- معجب ببنت ؟ جميل , انت حر , بتحبها ؟ زي الفل , تروح تصارحها ؟ روح صارحها , رحبت بيك ؟ أهلا وسهلا , خير و بركه , رفضتك ؟ ستوب , حريتك بتقف هنا .
.
6- كلمت بنت و استجابت معاك في الكلام ؟ انت و هي أحرار , قالت لك أسفه مش قادره أكمل ؟ هنا ستوب , حريتك بتقف .
.
7- غاوي نوع شجر معين و نفسك تزرع شجرة منه قدام العماره اللي انت ساكن فيها ؟ جميل أوي , عارف ان الشجره هتكبر و تطول و توصل لبلكونة شقتك و مرحب بكده ؟ تمام , جارتك اللي تحت جت قالت لك انا ست كبيره و عايشه لوحدي و الشجره ممكن تكون منط لحراميه او يدخل بسببها تعابين ؟ هنا ستوب , تقطع الشجره .
.
8- بتشرب مخدرات ؟ هتضر نفسك بس انت حر , ممكن تسوق و انت بتشرب مخدرات ؟ أه سوق عربيتك وفي طريق تكون ماشي فيه لوحدك , لما يحصل مصيبه هتحصلك انت , ينفع تسوق قطر أو ميكروباص فيه أرواح ناس و تبقى حر؟ لا انت مش حر .
.
9- متعود تصلي كل فرض في نص ساعه و تصلي السنن و تقرا شوية قرأن بعدها ؟ وماله زي الفل , عايز تعمل كده في صلاة الضهر وانت بتشتغل موظف حكومه و تسيب الناس ملطوعه ؟ لا انت هنا مش حر .
.
10- عندك محل و عايز تملاه بضاعه من ساسه لراسه ؟ انت حر , طب عايز تخليه فاضي و بينش ؟ برضه انت حر , ينفع تطلع بالمحل بتاعك مترين لقدام و تحط فتارين والناس ماتلاقيش مكان تمشي فيه ؟ لا انت مش حر .
...............................................................................................................................
Mohamed Hussein
6 مارس 2019
لعبة الدين ............. بالورقه و القلم
.
يابني ماتتخضش كده , مش انا اللي حولت الدين و الأديان لمجرد لعبه و مجرد ( مطيه ) و العياذ بالله لخدمة اغراض شيطانيه , أنا بوصف لك أحداث مش أكتر , بورّيك الصوره المنحطه , بشاور لك عالطعم اللي بتبلعه و غيرك بيبلعه من قديم الأزل عشان يمكن ربنا يكرمك و تبطل تبلعه.
.
بص يا مولانا
- من مئات السنين دول الغرب الاستعماريه قصدي الكيوت الجميله حبّت انها تحتل و تغزو و تستعمر بقية دول العالم , تنهب ثرواتهم و خيراتهم و تأمّن مصالحها و تبسط نفوذها , طب تحتل الدول دي ازاي ؟ وقتها مكانش فيها فيس بوك و ميديا عالميه يسيطرو بيها عالعقول , لازم غزو مباشر و جنود نحشدهم بعشرات الألاف , هنحشد الجنود ازاي ؟ نقول لهم والنبي ياخوانا تعالو معانا نستعمر و نقتل و ننهب ثروات و ممكن تموتو ؟ لا ماينفعش طبعا , احنا نقول لهم تعالو معانا حرب بإسم الصليب !! , و كأن سيدنا المسيح قال لهم روحو اقتلو و احرقو و اسرقو في مصر و الشرق الأوسط عشان ربنا يكرمكو , و مش بعيد يكونو قالو للجنود انت ياض يا ريتشارد لو اتقتلت هناك هتدخل الجنه و تلاقي طابور من حور العين مستنيك بلانجريهات ايطالي , و من النهارده هيبقى اسمك اخونا المجاهد , أبو جاك ..
.
خلصت اللعبه بتاعة اوروبا و مبقوش يتاجرو بالصليب و بالدين المسيحي , عشان ريتشارد أبو جاك مبقاش خروف زي زمان , و هما أصلا مبقوش محتاجين خرفان عندهم لان الحرب شكلها اختلف و يكفي جدا انهم يسيطرو عالخرفان عندنا .
.
افتكرت الأحداث دي وانا بتفرج على فيديو لأردوغان خليفة الشواذ و الصيع و الإرهابيين و هو بيتاجر بالدين بنفس الطريقه , بس المرادي بيتاجر بالدين الإسلامي , لقيت مولانا بيقول ايه ؟ انه لما كان في الطياره وقت الإنقلاب المزيف بتاع تركيا قال المتمردين دخلو عليه الطياره وهو قاعد و فتشوها حته حته و ماشافوش أردوغان و نزلو , و هنا بيشبه نفسه بسيدنا النبي و سيدنا أبوبكر , و جعلنا من بين أيديهم سدا و من خلفهم سدا !! ,اتأثرت يا خروف ياللي قاعد هناك ؟ اتشحتفتي يا حاجه ؟ كبّرت يا مولانا كبير المؤخره ؟ برافو , انتو كده هايلين , قطيع من الخرفان زي الفل , نفس القطيع بتاع ريتشارد أبو جاك .
.
ايه رأيكو بقى بما انكو بتتأثرو بافتكاسات أردوغان ( الولي اللي عنده كرامات ) و ان ربنا عمى عيون المتمردين عنه و قلبي الصغير لا يحتمل , ايه رأيكو تقتلو الجنود ( المسلمين ) في سوريا و ليبيا و مصر والعراق و تسرقو بترول سوريا و العراق و تجيبوه لحد عندي و نستخدمكو زي كلاب السكك لبسط نفوذنا و نهب ثروات الشعوب ومساومة الدول و الحكومات , و لو اتقتلت يا مولانا كبير المؤخره هتبقى شهيد و تدخل الجنه و تتقابل انت و ريتشارد أبو جاك في النهائي , اللي يفوز منكو ياخد حور العين واللي يخسر يقعد على جنب و يشرب بانجو .
.........................................................................................................................
Mohamed Hussein
6 مارس 2019
معتز مطر : جحافل من الأمن الوطني تحاصر النادي الأهلي فرع مدينة نصر لاعتقال أمي !! .
................
ممممممم مساء الخير يا أستاذ معتز .
- مساء النور , الله غالب
.
سيادتك قلت لنا ان الست الوالده عمرها 75 سنه
- مظبوط , الله غالب .
.
طب واحده عمرها 75 سنه معناها ان لو شخص عطس في وشها هيغمى عليها و يجيلها كساح وانكلستوما
- أيوه مظبوط , الله غالب .
.
أومال باعتين لها جحافل أمن وطني ليه ؟
- ماعرفش , مانا لازم أهبد وأفتكس و أخترع قصص و أحلل القرشين , الله غالب
.
بس معاليك كمان قلت لنا ان جحافل أمن وطني اقتحمت شقة امك و اعتقلتها امبارح , هي الشرطه بتعتقلها على مرتين ليه ؟ هي أمك تقيله أوي والبوكس مايشيلهاش على مره واحده ؟
- مش عارف , الله غالب .
.
أفهم من كده إن فيه جحافل أمن وطني ممكن تعتقل أمك بكره برضه من كوافير ست أم شوشو للمره التالته ؟
- وارد جدا , الله غالب
.
طب خد هات لك عسليه
.....................................................................................................................................
Mohamed Hussein
6 مارس 2019
عاجل , بيان هام
.
تعتذر وزارة الداخليه لجموع الشعب المصري عن القيام بمهامها في الفتره القادمه من تأمين للطرق و الشوارع و الوزارات و الهيئات و البلاد و العباد , حيث ترغب الوزاره في التفرّغ بكامل قواتها و كامل جحافلها لمطاردة أم معتز مطر , كما تهيب الوزاره بالساده المواطنين الشرفاء بمد يد العون في هذه المهمه الصعبه و الظروف العصيبه التي تمر بها البلاد , و الله الموفق و المستعان .
.
إمضاء / معالي سعادة الباشا وزير الداخليه .
,.....................................................................................................................................
Mohamed Hussein
6 مارس 2019
ذهبت إلى النادي الأهلي فرع مدينة نصر , فأرسلو خلفها جيش جرّار و جحافل من الأمن الوطني , كيف ستهرب منهم ؟ هذا ما ستشاهدونه , next على mbc2
..................................................................................................................................
Mohamed Hussein
7 مارس 2019
إضرب في سويداء القلب
.
زمان سألو زكي بدر وزير الداخليه وقتها , هو صحيح المساجين بيتعاملو معاملة قاسيه و غير أدميه ؟ فقال لهم , ماحنا عشان كده بننصح الناس ماتدخلش السجن !! .
.
النهارده رجالة الداخليه صفّو 7 إرهابيين خونه كانو بيخططو لتنفيذ عمليه ارهابيه في الجيزه , المطارده كانت على دائري الجيزه و بعد تحريات كامله , ظابط أصيب في تبادل إطلاق النار , إنما قتلنا 7 ارهابيين قبل ماينفذو عمليتهم الإرهابيه , قتلناهم قبل تنفيذ العمليه الإرهابيه و قتلناهم من غير محاكمه ؟ أه , ماحنا عشان كده بننصح الناس , ماتشتغلوش إرهابيين .
..................................................................................................................................
Mohamed Hussein
7 مارس 2019
عندي خطة محكمة ذكيه جهنميه ماتخرش المايه لإسقاط عبد الفتاح السيسي و نظامه , الخطه ببساطه إننا نيجي يوم التلات كلنا و نعطس عطستين و بعدهم نكح مره واحده و بعدها نهرش هرشتين في صباع رجلنا الصغير, لاحظو ان الترتيب مهم جدا , عطستين و كحه و هرشتين , الكلام ده يكون يوم التلات الساعه 11 بالليل و نوحد التوقيت يا جماعه لو سمحتو , انتو ماتعرفوش العطستين و الكحه و الهرشتين ممكن يعملو ايه ؟ الحاجات دي أسقطت أنظمة عتيده و دول عظمي و اتسببت في ثقب الأوزون , يالله كلنا نشارك في الهاشتاج #اتطمن_مش_هتهرش_لوحدك
.
و قد يسأل سائل , هل يجوز إني اعطس و أكح و أهرش و انا قاعد في بيتنا ؟ الإجابه نعم يجوز , سائل أخر بعت يسألني , هل يجوز إني أشارك في خطة العطس وفي نفس الوقت ماشتريش طماطم يوم التلات و في نفس اللحظه أجيب زماره و أزمر بيها ؟ الإجابه لا , قطعا لا يجوز , لأن دي هتبقى قوه ثلاثيه مفرطه و مدمره, مش بس هتسقط نظام السيسي إنما ممكن تسقط أنظمة أفريقيا كلها و تسقط فلاديمير بوتين في روسيا و تطيح بإمبراطور اليابان وتطرطش في كل مكان , مش عايزين نعمل قلق في كوكب الأرض لو سمحتو .
.
#المعارضه_الملبن_رزق.
................................................................................................................................
Mohamed Hussein
7 مارس 2019
وكيل النيابه : إسمك و سنك و عنوانك و مهنتك
حوكشة : حوكشة الهبدجي , 21 سنه , 9 حارة الزياطين , ناشط سياسي , احنا الصوت لما تلاقو الدنيا سكوت .
.
وكيل النيابه : مفهوم مفهوم , و تخصصك ايه في النشاط السياسي يا أخ حوكشه ؟
حوكشه : مش فاهم سؤال سعادتك .
.
وكيل النيابه : يعني يابني تخصصك غطا حله و زماره ولّا امتناع عن شرا الطماطم يوم التلات ؟!
حوكشه : اه فهمت , غطا حله و زماره .
.
وكيل النيابه : تمام تمام , ينادي بصوت عالي , فرج , يا فرج , انت يا فاااراج
حوكشه مرعوب : ايه ؟ ليه ؟ بتنادي فرج ليه ؟
.
وكيل النيابه : يابني ماتخافش , فرج ده التمرجي بتاع السرايا الصفرا , هياخدك معاه عشان تتعالج هناك
حوكشه : أتعالج ؟ يعني هتعالجوني مش هتغتصبوني ؟
.
وكيل النيابه يولع سيجاره : لا مش هنغتصبك
حوكشه بصوت واطي : يا خساره .
.
وكيل النيابه بابتسامه : بتقول حاجه يا حوكشه ؟
حوكشه : لا أبدا , بقول قشطه , أكيد هتيجي فرصه تانيه .
................................................................................................................................
Mohamed Hussein
8 مارس 2019
بالورقه و القلم ........ هتعمل ايه و يعملو ايه ؟
.
الكلمه مسئوليه , الكلمه بتبقى حاجه من اتنين , إما بذره بتزرعها و تطلع شجره يعيش عليها و في ضلها الناس أو عبوه ناسفه بتزرعها ويموت بيها و عليها الناس , و حيث إن السباخ اتراكم في العقول و بقى طبقات بنحتاج إننا نشرح من أول ألف باء , نشرح حتى أبجديات العقل البشري , أبجديات البني ادمين .
.
بص يابني
- هتخطط لعمليه إرهابيه وتجيب عبوات ناسفه و رشاشات و تشارك في التخطيط أو التستر أو أو , يبقى حقك رصاصه ب 8 جنيه , في الرأس أو في القلب أيهما أقرب , الكلام ده في مصر و أمريكا و اليابان و موزمبيق و كل مكان في العالم .
.
- طب ما نستنى لحد ماتنفذ العمليه الإرهابيه و تقتل عشره خمستاشر واحد مدنيين على عسكريين , نستنى عشان تبقى متلبس , لا يا مولانا أرواح الناس مش لعبه , و مجرد التفكير و التخطيط بيكون سبب كافي للطلقه أم 8 جنيه .
.
- ماهو أصل انا متأثر بكلام شيخ الزاويه , أصل ابن عمي ارهابي قد الدنيا و هو اللي غرر بيا , أصل البلد دي كافره و جيشها و شرطتها كافرين , هي الطلقه أم 8 جنيه , عشان القانون لا يحمي المغفلين ولا يحمي المغرر بيهم ولا الصيع والعواطليه .
.
- طب ماتخلي الظابط و هو بيطاردني و انا معايا عبوات ناسفه, خليه يقبض عليا , لا هيقبض عليك لو مفيش خطر يقع عليه وقتها ( ماهو بني أدم والله و له روح برضه ) , لو فيه خطر تبقى هي الطلقه , و اجمالا هو مش هيقبض عليك صاحي عشان خايف على حياتك , انت بيتقبض عليك صاحي عشان يعصروك و يعرفو مين اللي وراك .
.
- مين اللي من حقه يشيل سلاح ؟ رجل الشرطه و رجل الجيش و بس , ده برضه في كل دول العالم , و مجرد ما تشيل سلاح و ترفعه على حد منهم أو حد من المدنيين يبقى اخرك الطلقه , حتى لو استخدمت السلاح ده للتهويش أو التهديد .
.
- الظابط و وكيل النيابه و القاضي ماعندهمش أي عداوه مسبقه ولا لاحقه معاك , هي ناس بتنفذ القانون و تطبقه مش اكتر, لو معاليك اشتغلت مهندس أو دكتور أو عامل هيحبوك و هتعيش و تموت وانت ماتسعمش عنهم ولا تشوفهم , اشتغلت ارهابي بأي شكل هيطبقو عليك القانون .
.
- ليه يطبقو عليك القانون ؟ عشان يحمو البلد و الناس من شرك و يحمو حتى اهلك من شرك , إزاي ؟ مش انت بإرهابك و سلاحك ممكن تقتل مدنيين يكونو موجودين في المكان بالصدفه ؟ و إرهابي غيرك ممكن يقتل أبوك وامك و عيالك عشان موجودين في نفس المكان بالصدفه , سهله خالص أهي .
.
- البرادعي و هيومان رايتس واتش و الميديا الغربيه و الخنزيره و قنوات الخرفان و أردوغان بيدعموك ؟ بيخلقو لك قضيه ؟ بيصوروك في دور البطل ؟ عشان انت بالنسبالهم مجرد مطيه , إنت مطيه بتستخدمها أمنا الغوله و صبيانها في العالم لتحقيق أغراضهم السياسيه و الإقتصاديه و لوي دراع الحكومات والأنظمه , يعني انت مجرد حمار بيركبوه لحد مايموت , يموت في مطارده أو يموت بحبل عشماوي , و بالمناسبه بما إنك حمار فلازم تفهم كويس أوي إن الحمير مابيدخلوش الجنه , يعني الحكايه لا هيبقى فيها حور عين ولا فيها بطيخ .
.
خلصانه بهدوء و بشوية عقل .
..............................................................................................................................
Mohamed Hussein
9 مارس 2019
أنا والمطاعم الغربيه
.
كنت جعان أوي في شارع التسعين اللي في التجمع , ركنت على جنب و دخلت مطعم من فروع المطاعم الغربيه , المطعم مليان موظفات مختارينهم عالفرازه ( من فصيلة المزز ) , طلبت ساندوتش شكله باين في الصوره قد غطا الحلّه النحاس بتاعة زمان , بعد شوية جالي الأوردر عباره عن ساندوتش أقسم بالله قد قرص الطعميه أبو نص جنيه , و جنبه شوية بطاطس صوابع , الحساب كام يا مولانا ؟ 55 جنيه .
.
مسكت الساندوتش بين أول عُقله في الإبهام و أول عقله في السبابه كداهو , و بصيت له بتركيز و حسره و شفقه , مانا عايز أعرف هو ب 55 جنيه ليه ؟ معاه دكتوراه من هارفارد مثلا ؟ فكرت كتير و في النهايه عشان أنا مابحبش حد يضحك عليا و يستكردني لقيت الحل و التقسيمه الصح , الساندوتش ده ب 55 , شيل منهم 5 جنيه ضريبه , يبقى باقي 50 , و ال 50 عباره عن 2 جنيه تكلفة الساندوتش , 1 جنيه بطاطس , 47 جنيه مزز و رُكب و سمانات ( و طباشير ملون ) , ماهي الحاجات دي بتكلّف برضه .
...........................................................................................................................................
Mohamed Hussein
10 مارس 2019
كامل الوزير بقى وزير
.
صباح الخير
.
امبارح عرفت بالصدفه إن اللوا كامل الوزير هو وزير النقل القادم فعلا , ومانشرتش الخبر حتى لا يفت ذلك في عضد الجنود ( ماعرفش يابني الجمله اللي فاتت دي معناها ايه بس انا حافظها كده من كتاب التاريخ بتاع أولى اعدادى ), قصدي يعني عشان محدش يعمل حفله عليا و العيال يتريأو و يجيبو ناس تتريأ معاهم .
.
مين بقى كامل الوزير ؟ ده الراجل اللي مابيقعدش على مكتب ولا يعرف ورق ولا ختم في الدرج ولا بناء على تعليمات فلان ولا شلوت سيادتك دفعه للأمام , هتلاقوه على قضبان سكه حديد في رمسيس و بعد ساعتين عند مزلقان في السنبلاوين و بعد نص ساعه راكب قطر في بني سويف , وهو ماشي هتلاقوه بيفكر و بيحسب و معاه دايما ناس , مش ناس تشيل له الشنطه ولا تظبط له رابطة الكرافته , هو أصلا مابيلبسشي كرافته , إنما ناس متخصصين يفكرو و يحسبو معاه , المخطط و المستهدف و المتاح و وقت التنفيذ , هنشوف في السكه الحديد و وزارة النقل ملحمه زي اللي شوفناها في مشاريع الهيئه الهندسيه في ال 5 سنين اللي فاتو .
.....................
يا أستاذ يا أستاذ
- نعم يا حبيبي ؟
.
هو انتو بتعسكرو السكه الحديد ؟
- أه , ليه ؟
.
طب و صورتنا قدام العالم ؟
- والله اللي واخد عننا صوره وحشه ممكن يبروزها عادي ويطبع منها كذا نسخه و يقف يوزعهم في إشارات المرور بتاعة شيكاغو .
.
طب و الكوادر و العقول الألماظات اللي في وزارة النقل ؟
- ماتقلقش , هنخزنهم في مخازن غمره جنب الجرارات و العربيات المتهالكه و بعد 5 سنين لما نظبط الدنيا نبقى نفك التخزين , صدقني هتلاقيهم وقتها بنفس سحنتهم و معاهم نفس الختم و نفس فرخ الكربون , يعني بحطّة إيدك , بس وقتها مش هيبقى لهم مكان , هيرجعو يلاقو دنيا غير الدنيا , و حماده اللي سابوه قبل التخزين هيرجعو يلاقوه بقى حماده بيه .
...........................................................................................................................
Mohamed Hussein
10 مارس 2019
·
ولاد بهيه
.
أتمنى مع اللوا كامل ان احنا أأأ , بالمناسبه يا كامل , اسمح لي إني أرقيك لرتبة فريق !! .
.
مشهد ترقية كامل الوزير من لواء إلى فريق ده مشهد مصري عظيم لرجل يستحق , و مصر زي مافيها أبطال عالجبهه بسلاحهم فيها بطل عظيم في البناء إسمه كامل الوزير , ماهو ده شعار جيشنا المصري من زمان أوي ( يد تبني و يد تحمل السلاح ) .
.
مشهد كلمة كامل الوزير لما يقول أخويا و معلمي عبد الفتاح السيسي ( اللي هحكي و أكتب عنه بعد عمر طويل ) , مشهد السيسي و هو بيقول لكامل اسمح لي أرقّيك , بيستأذنه !! , مشهد تحية و شكر كامل الوزير لوزير الدفاع المصري و يقف احتراما للتحيه , مشهد تحية كامل الوزير لرئيس أركان حرب القوات المسلحه المصريه و يقف احتراما للتحيه , مشهد القاده و الجنود و الظباط و التصفيق احتراما للكبير و للقائد , مشهد عبد الفتاح السيسي و هو واقف على جنب عشان كامل الوزير عايز يقول كلمه , يقف هادي و مبتسم و يسأّف .
.
المشاهد اللي فاتت مشاهد للمصريين أحفاد مينا و أحمس و كليوباترا و جمال عبد الناصر , ولاد بهيه , الناس اللي بتعرف تحب بلدها و تعرف تحترم نفسها و تحترم غيرها , و تعرف يعني ايه رتبه أعلى و يعني إيه مؤسسه و يعني ايه كيان و يعني ايه دوله و يعني إيه مسئوليه .
.
المشاهد اللي فاتت بتقول للصيع و العواطليه اللي فاهمين ان الحريه شتايم للكبير و الصغير و كوميكس و تريأه عالرجاله اللي بيحمو البلد و يبنوها , بتقول للصايع اللي شتم وزير الدفاع المشير طنطاوي قبل كده , بتقول لهم خدتو وقتكو و أثبتو مايكفي من الفشل و الجهل و التفاهه و الإنحطاط , بتقول لهم كمان , هننزل بقى بلوحة النهايه , و نهاية يعني end .
.................................................................................................................
Mohamed Hussein
11 مارس 2019
الراجل كامل الوزير طلع بلدياتي من المنصوره , وانا أقول يا ربي جاب الجدعنه و الرجوله و الشهامه و الوطنيه و الجمال و الحلاوه دي منين ؟ و على فكره بقى , دي أقل حاجه عندنا .
.......................................................................................................................
Mohamed Hussein
12 مارس 2019
واحد من الخرفان
.
صباح الخير
.
الاخوانجي صابر مشهور بيقول في فيديو
ان الايمان بعوده مرسي ركن من اركان الدين وجزء من عقيده المسلم ومن يشكك فيها عليه ان يراجع ايمانه لانها تتعارض مع لا اله الا الله .
.......................
من زمان و انا بقول و مش هبطل أقول
- تنظيم الإخوان تنظيم وثني صهيوني أنشأته المخابرات البريطانيه في نفس توقيت نشأة اسرائيل ( و مش بالصدفه ) , مهم جدا للدول العربيه لما نخلق وسطهم دولة صهيونيه إننا في نفس الوقت نزرع كيان صهيوني جواهم و نلاعبهم بنفس نقطة ضعفهم ( الدين ) .
.
طب ليه نعمل كده ؟ عشان مش عايزينهم يبقو متحدين , لا على أديان معينه ولا على مفهوم الوطن والمواطنه , عايزين نفرّغ المعنيين من محتواهم , و مفيش حد يقدر على كده أكتر من تنظيم الإخوان , اللي هو شعاراته: الوطن حفنة من تراب عفن ( يعني ملهوش لازمه ) و الدين عند الله يبقى دين حسن البنا ( اللهم أمتني على دين الإخوان ...دعوة قيادي اخوانجي مشهور ).
.
و يمكن ده السبب اللي بيخليني دايما مُصرّ إن أعظم ثوره في تاريخ العالم الحديث هي ثورة 30 يونيو , الفكره هنا مش إزاحة مرسي برغبة شعب و مباركة جيش , الفكره هي القضاء على الصهيونيه اللي جوه أوطانا , عشان هي ألعن ألف مره من الكيان الصهيوني نفسه .
.
لشباب الإخوان اللي لسه في مرحلة التدريب و الإعداد , واللي لسه فيهم بواقي عقل , عايز أقول لهم كلمتين لوجه الله , وأكيد فيه منهم كتير في الفولورز
.
- ألعن التجارات على الإطلاق , مش تجارة المخدرات ولا السلاح ولا حتى الدعاره , ألعن التجارات على الإطلاق هي التجاره بالأديان و بالدم , انك تحول دين و عقيده لمجرد مطيه لوصول جماعتك للحكم والسلطه , جبريل نزل عليكو في رابعه و أردوغان دخلو عليه الطياره وقت الانقلاب و ماشافوهوش ( زي محمد بن عبد الله و أبو بكر),و اخيرا اللي بيشكك في عودة مرسي محتاج يراجع عقيدته !!.
.
انت كبني أدم اتولدت لقيت نفسك عايش في بيت اخوانجي , هتفضل معذور لحد ما تبلغ سن معين , سن النضج و التفكير و العقل, ربنا هيحاسبك من وقت السن ده .
.
كلمتين هقولهم و باختصار , عمرك هتعيشه مره واحده , وانت مُخيّر مش مُسير ,هتعيشه في كدب و تأليف و تزييف و تكفير و قتل و تجاره بالدين كل يوم ؟ انت حر , في النهايه هتقف قدام ربنا في الأخره , و مش هينفع تقول لربنا أصل وصايا حسن البنا بتقول , أصل انا كنت بكدب و أزيف و أحرق و اتاجر بدينك يارب عشان غرض نبيل , أصل مفهوم التقيه و فقة الأسر , تأكد تماما يابني انك مش هتخدع ربنا ولا هتخدع الملايكه , الإسلام دين المسلمين مش دين الإخوان , الإسلام عمره 15 قرن مش 90 سنه, الإسلام نزل على محمد بن عبد الله مش على حسن البنا ولا محمد بن عبد الوهاب .
.
اللهم قد بلغت , اللهم فاشهد.
............................................................................................................
Mohamed Hussein
12 مارس 2019
و في إطار خطة الحكومه و النظام المصري لعسكرة كل حاجه , دي صورة بتجمع 8 وزراء في الحكومه المصريه , لواءات و عساكر أمن مركزي متنكرين زي مانتو شايفين كده .
.
شوفت مصر السيسي يابني ؟ لا أكيد ماشوفتهاش , طب شوفها في الصوره دي , مصر اللي رجعت سالمه غانمه لينا , مصر اللي ما بتلبسشي محزق و عريان عشان يرضى عنها الأمريكان , و لا بتلبس نقاب عشان يرضى عنها العُرْبان
.
مصر اللي موقعها في الجغرافيا في منتصف الكون و موقعها في التاريخ قبل ما يتعمل له كتاب بيومين , ماينفعش تقلّد ولاد إمبارح ولا ولاد أول أمبارح .
............................................................................................................
Mohamed Hussein
13 مارس 2019
مرحبا , أنا مارك مدير عام الفيس بوك و العضو المنتدب و أمين الصندوق و نجم الجيل و كبير مشجعي مانشستر يونايتد , نخبركم أمرا , أنه حدث عطل فني في الفيس بوك و الماسينجر و إذا لم تقم بإرسال هذه الرساله لكل أصدقائك و لخالتك شربات في البدرشين و تبعت لمحمد حسين حلة محشي و ققص جوافه وبرطمان لمون مخلل , فسوف لن تستطيع استخدام الماسينجر مره اخرى و تكلم المزه بتاعتك حتى لو كنت ابن طاهر القويري ذات نفسه , والله الموفق و المستعان
.
إمضاء / مارك بن زوكنبرج
.......................................................................................................................
Mohamed Hussein
14 مارس 2019
من أقوال الزعيم الراحل أدولف هتلر
.
كان بإمكاني أن أعمل حظر رسائل لكل الأصدقاء اللي بعتو الرسالة بتاعة ( حدث عطل فني في الفيس بوك وإن لم ترسلها لكافة أصدقائك مش هيحصل لك كويس و هتموت في حادثة موتوسكل بعد ساعتين ) و لكني تركت بعضهم لأني مابقيتش ملاحق و إيدي وجعتني بصراحه .
.......................................................................................................................
Mohamed Hussein
15 مارس 2019
هجوم ارهابي على مصلين في أحد مساجد نيوزيلندا و مقتل 50 شخص داخل المسجد , اللي نفذ الهجوم صوّره فيديو بث مباشر .
....................
فين يابني الأمن بتاع نيوزيلندا ولا أبو 50 % النيوزلندي شاطرين بس يزودو له المرتب كل يوم تلات ؟ ( خروف و شمام كوله بيقولو و يغنو على بعض)
.
تلاقي الإرهابي كرمش لأمين شرطه نيوزلندي 20 دولار لما قال له شخلل جيبك عشان تعدي ( عيل نيوزلندي نايم على بطنه عالسرير و بيفتكس عادي ) .
.
انا من زمان بقول ان الكماين الثابته كارثه و لازم كماين متحركه و تغيير في خطة و استراتيجية المواجهه الأمنيه ( ست أم شوشو بتاعتهم خريجة ثانوي تطريز بعد ما ركنت سبت الغسيل على جنب و قررت تهبد هبده من اللي بتنتزع أهات الجماهير ).
.
أين عبد الفتاح السيسي مما يحدث في نيوزيلندا ؟ ( واحد شارب جردلين ماية جوزه عالريق وعامل بيهم دماغ ) .
.
مش بعيد تكون السلطات هناك هي اللي عملت كده عشان تمرر تعديلات دستوريه أو تداري على فرّه أصابت الأبقار النيوزلنديه و أسفرت عن نفوق 7 بقرات و معزتين ( خروف نيوزلندي هربان من 7 احكام اعدام و عايش في دوله تانيه ).
.
المواطن النيوزلندي ده معذور لانه كان الأول عالثانويه العامه و مع ذلك قدم على وظيفه و سابوه وخدو عيل فاشل ابن ناس مهمين ( شمام كوله نيوزلندي على قهوه من قهاوي وسط البلد وهو بيشرب معسل لحد مانفسه اتقطع ) .
.
العمليه دي وراها ناس كبار أوي و تجار أبقار و ناس تقال بتوع سمنه و جبنه ( شمام كوله سابقنا بمليون سنه ضوئيه )
.
الواد ده اتعرض لضغوطات كبيره بسبب ان اهله مختفين قسريا بقالهم نص ساعه و محدش يعرف عنهم حاجه و هو اتسجن قبل كده عشان قال (احنا الصوت لما تلاقو الدنيا سكوت ) و في السجن خد 715 طلقة خرطوش في اماكن متفرقه , و حطو العصايا في مؤخرته و طلعوها من ودانه ( علاء الأسواني بتاعهم )
.
- كان لازم نحتويه و نتفاوض معاه و نعالجه نفسيا و نعمل له مراجعه فكريه و نجيب فكريه تراجع معانا ( البوب النيوزلندي )
.
انما المؤكد و الأكيد ان اللي نفذ الهجوم ده متأثر بكتب التراث و بمناهج الأزهر الشريف فرع ولينجتون ( شوية الصيع اللي بيسمو نفسهم تنويرين وبيحملو شعلة النور في بحر البطيخ ) .
..........................................................................................................................................
1 مارس 2019
بعد الهري
.
بعد مالناس تكون خلصت هري و شألباظات , بعد ما تجار الفقرا و أدعياء اليساريه و أشباه البني أدمين يخلصو البؤين اللي حافظينهم على طريقة صلاح عبد الله في فيلم كباريه ( عارف يا صالح , أنا السطرين اللي بكتبهم عن الغلابه و أتاجر بيهم بينضفوني من جوه ) .
.
بعد ما حبايبنا بتوع ثورة كل يوم تلات و لساها ثورة بؤونه يكونو خلصو برضه البؤ الثوري و هرموناتهم ارتاحت شويه و رجعت للمستويات الطبيعيه .
.
و بعد ما حبايبنا التانيين بتوع الصقور لا تنام و النسور لا تبيض , اللي عارفين القرد مخبي ابنه فين يكونو خلصو الهبد بتاعهم .
......
بعد ما ربنا يكرمنا و نخلص الهري المعتاد في كل حادث و نلم الكهارب , ممكن أقول لحضراتكو حاجتين اتنين بشوفهم مهمين , بهدوء شديد
.
1- أدخل على جوجل و اكتب حوادث في أمريكا ( أو أي دوله تانيه ) , قطارات و سيارات و طيارات و بيوت بتقع و عفاريت بتتنطط و شوف كام حادثه في السنه و ضحاياهم كام ؟ سواء بسبب الأهمال او عنصر بشري قذر أو أو أو , و لما تدخل اختار أي حادثه عشوائيه و هات أي سته سبعه أمريكان اسألهم عليها , يا ترى قولتو احنا دمنا رخيص ؟ قولتو الحكومه بتضحي بالغلابه ؟ قولتو بيبنو مش عارف ايه و ماطوروش مش عارف ايه ؟ قولتو يرحل الرئيس الأمريكي و الحكومه الأمريكيه ؟
.
مش عايز أقولك التقيله , لو انفجر قطر في امريكا و اتقلب بيجو 7 راكب في مصر في نفس التوقيت , الإعلام الأمريكي هيسلط الضوء عالبيجو ال 7 راكب اللي عندنا و هيعمل لقاءات من أمام البيجو و من خلفها و من جوه الشكمان لو تحب , و وقتها لو سألت مواطن امريكي أخبار القطر اللي انفجر عندكو في ولاية كذا ايه ؟ يقولك معندناش قطر انفجر انت اكيد تقصد البيجو ال 7 راكب اللي اتقلب قبل قرية شبرا قباله على طريق السنبلاوين ؟ ( يارب الناس تركز و تفهم أصول اللعبه ) .
.
2- الحاجه التانيه , حادث محطة رمسيس خطورته مش في عدد الشهداء ( العدد ده يساوي نفس العدد اللي بيحصل في حادثة ميكروباص عندنا مره كل اسبوعين تلاته ) , انما خطورته في المكان ( محطة مصر ) و الشكل ( إنفجار مدوي و ناس تتحرق ) و خطورته كمان في التوقيت !! .
.
و ده اللي مخليني عندي يقين ان السواق السمج اللي طلع عالهوا طلع بموافقه أمنيه عشان الناس تهدى و تعرف أصل الحكايه ايه , انما اللي ورا الحكايه و الحدوته ( إن وُجد ) ف ده برضه اللي عندي يقين انه بيتم حاليا , نفس السواق و اللي فوقه و اللي تحته و اللي جنبه يكونو بيتعصرو زي البرتقانه في التوقيت الحالي و من أكتر من جهه أمنيه عشان لو فيه أي احتماليه لعمل إرهابي ( استهدو بالله بس و اعرفو إن النيابه و الأجهزه الأمنيه و السياديه و البحث الجنائي و الطب الشرعي مابيشتغلوش بطريقة الهبد بتاعة الفيس بوك )
.
بالمناسبه و حاجه أخيره عايز أقولها , في نهاية التحقيق ممكن يتوصلو لحقايق و مصايب معينه و مايتمش الإعلان عنها , كل الدول المحترمه بتعمل كده يا مولانا , لو كان عدم الإعلان هيفيدها في طريق معين أو لغرض ما ( ماهي الاوطان برضه مابتتحكمش بطريقة إدارة كشك سجاير ) .
.........................................................................................................................
Mohamed Hussein
2 مارس 2019
الإبره و المنْجل
.
صباح الخير
- عندنا مثل جميل في بلدنا يقولك فلان بيفتي عالإبره و يبلع المنجل !! , اللي هو بيقوله أهل السياسه فلان بيكيل بمكيالين , ده الشكل الدبلوماسي للجمله لما تكون بتخاطب منظمات أو جرايد شهيره أو قنوات أو حكومات و مسئولين في دول عظمي ( سيادتك يافندم بتكيل بمكيالين ) و الترجمه انت ابن تيت و أمك عارفه
.
الكائن الإخوانجي رباية الصهيونيه و المخابرات الأمريكيه والبريطانيه بيعيش بنفس المبدأ ده , يقتل و يحرق و يحرض عالقتل و يخون بلده بمنتهى الأريحيه و يمارس كل أنوع الإرهاب و لما بس تكتب عنه بوست يقولك انت ازاي تقول لفظ ( وسخه ) في البوست بتاعك , اه والنبي مليش حق أبدا , و تلاقيني بشرب سجاير كمان , هو انا هروح من ربنا فين
.
الإبره و المنجل هتلاقيهم في الأحداث و طريقة تغطيتها , تعديل الدستور في مصر كارثه ضد الديموقراطيه و ضد الحريه و ضد النار و ضد الحشره وضد الفار , إنما لما المرحوم بوتفليقه يترشح للإنتخابات ( ربنا يرحمه و يبارك في عمره ) عادي ممكن يعملو نفسهم من بنها أو من شيكاغو .
.
السيسي يحكم مصر أكتر من 8 سنين ليه ؟ دي تبقى فاشيه و ديكتاتوريه و بطاطس مقليه , إنما نوعى عالدنيا نلاقي أردوغان بيحكم تركيا و بوتين بيحكم روسيا و ميركل بتحكم ألمانيا و الصين عامله تعديل يسمح بحكم الرئيس مدى الحياه , تبقى دي قمة الديموقراطيه و قمة تداول السلطه , ماهو أصل السلطه مداوله مش مناوله
.
الإبره و المنجل لما تلاقي الدويلات و الأكشاك اللي بتتحكم بالتوريث و اللي بيصحى من النوم فيها بيبقى أمير أو يقفل الحمام على أبوه و ياخد مفاتيح القصر , لما الأكشاك دي تديك دروس في الديموقراطيه و الصناديق و تجيب خبراء و تعمل لقاءات و شألباظات .
.
الإبره و المنجل يعني يعملو focus على حادثه عندك و يكبروها و يفخموها magnification فتقوم تشوف السحليه على انها ديناصور بيطلع نار من ودانه و يعملو العكس في بلاد تانيه , تقوم تشوف النمر على انه قطه شيرازي .
.
الإبره و المنجل يعني قناة الخنزيره تجيب راجلين واقفين على شط ترعه و معاهم عيل صغير و موتوسكل و تقولك ثوره عارمه ضد الإنقلاب في مصر , ولما يخرج مئات الألاف ضد البشير في السودان ماتلاقيش كاميراتهم خدت بالها , جل من لا يسهو يا أخي .
.
الإبره و المنجل لعبة عقل , لعب بالمصطلحات و الاحداث , تكبير و تصغير وليّ للحقايق , طُعم يترمي لك بشكل حلو , أو شوية عسل في ساندوتش مسموم
.................................................................................................................
Mohamed Hussein
2 مارس 2019
كل مابمشي بالعربيه في شارع و أشوف سيده سوريه فاضله واقفه في اشاره بتتبيع مخبوزات عاملاها أو حاجه طبخاها أو حتى بتمد إيديها للناس , بقول لمراتي و انتي مغمضه كده تأكدي إن الست العظيمه دي في يوم من الأيام كان لها بيت فيه أوضة نوم و انتريه و مطبخ و حمام و تلاجه فيها أكل , و عندها أولاد و خير و فلوس و ستر و 4 حيطان و أهل و جيران و حلم جميل بتحلمه , فجأه صحيت من النوم لقت نفسها واقفه في اشارة مرور في دوله تانيه بتتحايل عالناس يشترو الحاجه اللي هي عملاها عشان بس تعرف تعيش .
.
دي الإجابه ببساطه و باختصار شديد و من غير أي فزلكه عالسؤال ده , هو جيش مصر عمل ايه بالظبط في السنين اللي فاتت ؟ و مصر اشترت سلاح و طورت ترسانتها العسكريه ليه ؟ .
.
الأوطان يا حماده مش بيحميها ويستر أهلها تويتات البرادعي ولا سفسطه الأسواني ولا هبد عصام حجي ولا حزق معتز مطر ولا شعارات حمدين صباحي ولا يمكن أبدا أبدا هتحميها بمر*عة خالد لامؤاخذه أبو النجا .
...............................................................................................................................
Mohamed Hussein
3 مارس 2019
عاجل , صرح مصدر قريب الصله من مصدر مسئول رفض الإفصاح عن إسمه بأن جهة سياديه ما قد وقع اختيارها الأول لتولي حقيبة وزارة النقل بشكل سري على أبويا الأستاذ الدكتور الحاج أحمد أبو حسين , نحن في انتظار الإعلان الرسمي و حلف اليمين , بس ماتقلقوش ماتقلقوش عمر البدله ما هتغيرني و لا هعمل لكو بلوك , هفضل أتكلم معاكو عادي كده كأننا أصحاب .
.
يا أستاذ يا استاذ !! .
- نعم يا حبيبي ؟
.
بس أبوك الله يرحمه مات من 25 سنه
- يابني التفاصيل الصغيره دي مابتفرقش معانا , بقولك جهه سياديه وقع اختيارها , انت ايه مابتفهمش ؟ و بعدين يعني هو عمر سليمان أحسن من أبويا في ايه ؟ أهو الراجل مات من سنين هو كمان و مع ذلك لسه لحد دلوأتي بيعمل اجتماعات سريه و يبلّغ نتيجتها لصفحة صقور لا تنام و للأدمن بتاعة الصفحه , ست أم شوشو .
..............................................................................................................................
Mohamed Hussein
4 مارس 2019
تحليل المخدرات لقى أستروكس , و عصاية التشغيل بتاعة الجرار كانت على وضع السرعه القصوى !! .
.
كده قشطه , و السواق السمج اللي طلع عالهوا وراه حدوته , و حدوته نفسه هيتجاب و يتعلق على عمود النور .
.
حبايبنا شمامين الكوله ماتنسوش لما تشوفو السواق متعلق على العمود هو و ( حدوته ) تتعاطفو معاهم و تقولو ده السيسي مدبر الحادثه عشان يداري على ماعرفش ايه , او تقولو انه السواق مناضل ( و مدون ) و نام في التحرير 18 يوم , أو تقولو انه اعترف تحت التعذيب والصعق بالكهربا و الضرب بالمنجنيق .
.
حبايبنا الخرفان ماتنسوش بقى , السواق ده أصلا كان مجاهد و ضد الإنقلاب و النظام بيترعب منه و ملفق له التهمه , و قبضو عليه و هو بيصلي وانه حافظ القرأن الكريم و بيحج بيت الله كل يوم تلات , و كان الأول على دفعته في الثانويه العامه .
.
يوووه كنت هنسى حاجه مهمه , حبايبنا التنويرين اللي بيحملو شعلة النور في بحر البطيخ , ماتنسوش انتو كمان , السواق ده أكيد أكيد متأثر بكتب التراث و بمناهج الازهر الشريف , فرع غمره .
........................................................................................................................................
Mohamed Hussein
5 مارس 2019
شوفتو مصطفى النحاس بقى رايق و وشة نور إزاي لما شالو الحارتين بتوع الميكروباص اللي في النص و الطريق بقى 5 حارات في كل اتجاه ؟
الله يعمر بيتك ياريس و يخرب بيت غطا الحله اللي كان بيحكم مصر
مورنينج عليك يا مصطفى , قلبي يارب
....................................................................................................................................
Mohamed Hussein
5 مارس 2019
حُريّتك , بتقف فين ؟!
.
1- بتحب تشغل اغاني في العربيه وانت سايق ؟ و ماله , بتسمع أم كلثوم أو حمو بيكا ؟ انت حر , شغل الكاسيت على قدك انت وبس , مش تسمّع اخر الشارع , حريتك بتقف هنا .
.
2- وانت راكب القطر بتحب تتسلى و تقرا في المصحف ؟ اقرا , بتحب تقرا بصوت ؟ و ماله , صوت عالي يوصل لأخر العربيه ؟ لا , حريتك بتقف هنا , غيرك عايز ينام أو مش مسلم أو أو , حتى في القرأن ؟ أه حتى في القرأن .
.
3- نفسك تربي كلب جيرمان ؟ وماله , و هتنزل تتمشى بيه في الشارع ؟ انزل , لقيت ناس كتير مش بتخاف من الكلاب ؟ زي الفل , لقيت ستات و أطفال عندهم فوبيا من الكلاب , و ممكن يترعبو أو حد منهم يجري مايخدش باله تقوم عربيه تخبطه ؟ هنا ستوب , مالكش حريه , خد الكلب مشيه في مكان مفهوش ستات و اطفال ممكن يخافو أو ماتنزلوش من بيتك .
.
4- غاوي تربي كلاب و الكلاب بتنبح طول الليل وانت عادي متعود على صوتهم و مستمتع بيه ؟ ماشي , حد من جيرانك اشتكى انه مابيعرفش ينام بسبب كده ؟ ستوب , حريتك تقف هنا .
.
5- معجب ببنت ؟ جميل , انت حر , بتحبها ؟ زي الفل , تروح تصارحها ؟ روح صارحها , رحبت بيك ؟ أهلا وسهلا , خير و بركه , رفضتك ؟ ستوب , حريتك بتقف هنا .
.
6- كلمت بنت و استجابت معاك في الكلام ؟ انت و هي أحرار , قالت لك أسفه مش قادره أكمل ؟ هنا ستوب , حريتك بتقف .
.
7- غاوي نوع شجر معين و نفسك تزرع شجرة منه قدام العماره اللي انت ساكن فيها ؟ جميل أوي , عارف ان الشجره هتكبر و تطول و توصل لبلكونة شقتك و مرحب بكده ؟ تمام , جارتك اللي تحت جت قالت لك انا ست كبيره و عايشه لوحدي و الشجره ممكن تكون منط لحراميه او يدخل بسببها تعابين ؟ هنا ستوب , تقطع الشجره .
.
8- بتشرب مخدرات ؟ هتضر نفسك بس انت حر , ممكن تسوق و انت بتشرب مخدرات ؟ أه سوق عربيتك وفي طريق تكون ماشي فيه لوحدك , لما يحصل مصيبه هتحصلك انت , ينفع تسوق قطر أو ميكروباص فيه أرواح ناس و تبقى حر؟ لا انت مش حر .
.
9- متعود تصلي كل فرض في نص ساعه و تصلي السنن و تقرا شوية قرأن بعدها ؟ وماله زي الفل , عايز تعمل كده في صلاة الضهر وانت بتشتغل موظف حكومه و تسيب الناس ملطوعه ؟ لا انت هنا مش حر .
.
10- عندك محل و عايز تملاه بضاعه من ساسه لراسه ؟ انت حر , طب عايز تخليه فاضي و بينش ؟ برضه انت حر , ينفع تطلع بالمحل بتاعك مترين لقدام و تحط فتارين والناس ماتلاقيش مكان تمشي فيه ؟ لا انت مش حر .
...............................................................................................................................
Mohamed Hussein
6 مارس 2019
لعبة الدين ............. بالورقه و القلم
.
يابني ماتتخضش كده , مش انا اللي حولت الدين و الأديان لمجرد لعبه و مجرد ( مطيه ) و العياذ بالله لخدمة اغراض شيطانيه , أنا بوصف لك أحداث مش أكتر , بورّيك الصوره المنحطه , بشاور لك عالطعم اللي بتبلعه و غيرك بيبلعه من قديم الأزل عشان يمكن ربنا يكرمك و تبطل تبلعه.
.
بص يا مولانا
- من مئات السنين دول الغرب الاستعماريه قصدي الكيوت الجميله حبّت انها تحتل و تغزو و تستعمر بقية دول العالم , تنهب ثرواتهم و خيراتهم و تأمّن مصالحها و تبسط نفوذها , طب تحتل الدول دي ازاي ؟ وقتها مكانش فيها فيس بوك و ميديا عالميه يسيطرو بيها عالعقول , لازم غزو مباشر و جنود نحشدهم بعشرات الألاف , هنحشد الجنود ازاي ؟ نقول لهم والنبي ياخوانا تعالو معانا نستعمر و نقتل و ننهب ثروات و ممكن تموتو ؟ لا ماينفعش طبعا , احنا نقول لهم تعالو معانا حرب بإسم الصليب !! , و كأن سيدنا المسيح قال لهم روحو اقتلو و احرقو و اسرقو في مصر و الشرق الأوسط عشان ربنا يكرمكو , و مش بعيد يكونو قالو للجنود انت ياض يا ريتشارد لو اتقتلت هناك هتدخل الجنه و تلاقي طابور من حور العين مستنيك بلانجريهات ايطالي , و من النهارده هيبقى اسمك اخونا المجاهد , أبو جاك ..
.
خلصت اللعبه بتاعة اوروبا و مبقوش يتاجرو بالصليب و بالدين المسيحي , عشان ريتشارد أبو جاك مبقاش خروف زي زمان , و هما أصلا مبقوش محتاجين خرفان عندهم لان الحرب شكلها اختلف و يكفي جدا انهم يسيطرو عالخرفان عندنا .
.
افتكرت الأحداث دي وانا بتفرج على فيديو لأردوغان خليفة الشواذ و الصيع و الإرهابيين و هو بيتاجر بالدين بنفس الطريقه , بس المرادي بيتاجر بالدين الإسلامي , لقيت مولانا بيقول ايه ؟ انه لما كان في الطياره وقت الإنقلاب المزيف بتاع تركيا قال المتمردين دخلو عليه الطياره وهو قاعد و فتشوها حته حته و ماشافوش أردوغان و نزلو , و هنا بيشبه نفسه بسيدنا النبي و سيدنا أبوبكر , و جعلنا من بين أيديهم سدا و من خلفهم سدا !! ,اتأثرت يا خروف ياللي قاعد هناك ؟ اتشحتفتي يا حاجه ؟ كبّرت يا مولانا كبير المؤخره ؟ برافو , انتو كده هايلين , قطيع من الخرفان زي الفل , نفس القطيع بتاع ريتشارد أبو جاك .
.
ايه رأيكو بقى بما انكو بتتأثرو بافتكاسات أردوغان ( الولي اللي عنده كرامات ) و ان ربنا عمى عيون المتمردين عنه و قلبي الصغير لا يحتمل , ايه رأيكو تقتلو الجنود ( المسلمين ) في سوريا و ليبيا و مصر والعراق و تسرقو بترول سوريا و العراق و تجيبوه لحد عندي و نستخدمكو زي كلاب السكك لبسط نفوذنا و نهب ثروات الشعوب ومساومة الدول و الحكومات , و لو اتقتلت يا مولانا كبير المؤخره هتبقى شهيد و تدخل الجنه و تتقابل انت و ريتشارد أبو جاك في النهائي , اللي يفوز منكو ياخد حور العين واللي يخسر يقعد على جنب و يشرب بانجو .
.........................................................................................................................
Mohamed Hussein
6 مارس 2019
معتز مطر : جحافل من الأمن الوطني تحاصر النادي الأهلي فرع مدينة نصر لاعتقال أمي !! .
................
ممممممم مساء الخير يا أستاذ معتز .
- مساء النور , الله غالب
.
سيادتك قلت لنا ان الست الوالده عمرها 75 سنه
- مظبوط , الله غالب .
.
طب واحده عمرها 75 سنه معناها ان لو شخص عطس في وشها هيغمى عليها و يجيلها كساح وانكلستوما
- أيوه مظبوط , الله غالب .
.
أومال باعتين لها جحافل أمن وطني ليه ؟
- ماعرفش , مانا لازم أهبد وأفتكس و أخترع قصص و أحلل القرشين , الله غالب
.
بس معاليك كمان قلت لنا ان جحافل أمن وطني اقتحمت شقة امك و اعتقلتها امبارح , هي الشرطه بتعتقلها على مرتين ليه ؟ هي أمك تقيله أوي والبوكس مايشيلهاش على مره واحده ؟
- مش عارف , الله غالب .
.
أفهم من كده إن فيه جحافل أمن وطني ممكن تعتقل أمك بكره برضه من كوافير ست أم شوشو للمره التالته ؟
- وارد جدا , الله غالب
.
طب خد هات لك عسليه
.....................................................................................................................................
Mohamed Hussein
6 مارس 2019
عاجل , بيان هام
.
تعتذر وزارة الداخليه لجموع الشعب المصري عن القيام بمهامها في الفتره القادمه من تأمين للطرق و الشوارع و الوزارات و الهيئات و البلاد و العباد , حيث ترغب الوزاره في التفرّغ بكامل قواتها و كامل جحافلها لمطاردة أم معتز مطر , كما تهيب الوزاره بالساده المواطنين الشرفاء بمد يد العون في هذه المهمه الصعبه و الظروف العصيبه التي تمر بها البلاد , و الله الموفق و المستعان .
.
إمضاء / معالي سعادة الباشا وزير الداخليه .
,.....................................................................................................................................
Mohamed Hussein
6 مارس 2019
ذهبت إلى النادي الأهلي فرع مدينة نصر , فأرسلو خلفها جيش جرّار و جحافل من الأمن الوطني , كيف ستهرب منهم ؟ هذا ما ستشاهدونه , next على mbc2
..................................................................................................................................
Mohamed Hussein
7 مارس 2019
إضرب في سويداء القلب
.
زمان سألو زكي بدر وزير الداخليه وقتها , هو صحيح المساجين بيتعاملو معاملة قاسيه و غير أدميه ؟ فقال لهم , ماحنا عشان كده بننصح الناس ماتدخلش السجن !! .
.
النهارده رجالة الداخليه صفّو 7 إرهابيين خونه كانو بيخططو لتنفيذ عمليه ارهابيه في الجيزه , المطارده كانت على دائري الجيزه و بعد تحريات كامله , ظابط أصيب في تبادل إطلاق النار , إنما قتلنا 7 ارهابيين قبل ماينفذو عمليتهم الإرهابيه , قتلناهم قبل تنفيذ العمليه الإرهابيه و قتلناهم من غير محاكمه ؟ أه , ماحنا عشان كده بننصح الناس , ماتشتغلوش إرهابيين .
..................................................................................................................................
Mohamed Hussein
7 مارس 2019
عندي خطة محكمة ذكيه جهنميه ماتخرش المايه لإسقاط عبد الفتاح السيسي و نظامه , الخطه ببساطه إننا نيجي يوم التلات كلنا و نعطس عطستين و بعدهم نكح مره واحده و بعدها نهرش هرشتين في صباع رجلنا الصغير, لاحظو ان الترتيب مهم جدا , عطستين و كحه و هرشتين , الكلام ده يكون يوم التلات الساعه 11 بالليل و نوحد التوقيت يا جماعه لو سمحتو , انتو ماتعرفوش العطستين و الكحه و الهرشتين ممكن يعملو ايه ؟ الحاجات دي أسقطت أنظمة عتيده و دول عظمي و اتسببت في ثقب الأوزون , يالله كلنا نشارك في الهاشتاج #اتطمن_مش_هتهرش_لوحدك
.
و قد يسأل سائل , هل يجوز إني اعطس و أكح و أهرش و انا قاعد في بيتنا ؟ الإجابه نعم يجوز , سائل أخر بعت يسألني , هل يجوز إني أشارك في خطة العطس وفي نفس الوقت ماشتريش طماطم يوم التلات و في نفس اللحظه أجيب زماره و أزمر بيها ؟ الإجابه لا , قطعا لا يجوز , لأن دي هتبقى قوه ثلاثيه مفرطه و مدمره, مش بس هتسقط نظام السيسي إنما ممكن تسقط أنظمة أفريقيا كلها و تسقط فلاديمير بوتين في روسيا و تطيح بإمبراطور اليابان وتطرطش في كل مكان , مش عايزين نعمل قلق في كوكب الأرض لو سمحتو .
.
#المعارضه_الملبن_رزق.
................................................................................................................................
Mohamed Hussein
7 مارس 2019
وكيل النيابه : إسمك و سنك و عنوانك و مهنتك
حوكشة : حوكشة الهبدجي , 21 سنه , 9 حارة الزياطين , ناشط سياسي , احنا الصوت لما تلاقو الدنيا سكوت .
.
وكيل النيابه : مفهوم مفهوم , و تخصصك ايه في النشاط السياسي يا أخ حوكشه ؟
حوكشه : مش فاهم سؤال سعادتك .
.
وكيل النيابه : يعني يابني تخصصك غطا حله و زماره ولّا امتناع عن شرا الطماطم يوم التلات ؟!
حوكشه : اه فهمت , غطا حله و زماره .
.
وكيل النيابه : تمام تمام , ينادي بصوت عالي , فرج , يا فرج , انت يا فاااراج
حوكشه مرعوب : ايه ؟ ليه ؟ بتنادي فرج ليه ؟
.
وكيل النيابه : يابني ماتخافش , فرج ده التمرجي بتاع السرايا الصفرا , هياخدك معاه عشان تتعالج هناك
حوكشه : أتعالج ؟ يعني هتعالجوني مش هتغتصبوني ؟
.
وكيل النيابه يولع سيجاره : لا مش هنغتصبك
حوكشه بصوت واطي : يا خساره .
.
وكيل النيابه بابتسامه : بتقول حاجه يا حوكشه ؟
حوكشه : لا أبدا , بقول قشطه , أكيد هتيجي فرصه تانيه .
................................................................................................................................
Mohamed Hussein
8 مارس 2019
بالورقه و القلم ........ هتعمل ايه و يعملو ايه ؟
.
الكلمه مسئوليه , الكلمه بتبقى حاجه من اتنين , إما بذره بتزرعها و تطلع شجره يعيش عليها و في ضلها الناس أو عبوه ناسفه بتزرعها ويموت بيها و عليها الناس , و حيث إن السباخ اتراكم في العقول و بقى طبقات بنحتاج إننا نشرح من أول ألف باء , نشرح حتى أبجديات العقل البشري , أبجديات البني ادمين .
.
بص يابني
- هتخطط لعمليه إرهابيه وتجيب عبوات ناسفه و رشاشات و تشارك في التخطيط أو التستر أو أو , يبقى حقك رصاصه ب 8 جنيه , في الرأس أو في القلب أيهما أقرب , الكلام ده في مصر و أمريكا و اليابان و موزمبيق و كل مكان في العالم .
.
- طب ما نستنى لحد ماتنفذ العمليه الإرهابيه و تقتل عشره خمستاشر واحد مدنيين على عسكريين , نستنى عشان تبقى متلبس , لا يا مولانا أرواح الناس مش لعبه , و مجرد التفكير و التخطيط بيكون سبب كافي للطلقه أم 8 جنيه .
.
- ماهو أصل انا متأثر بكلام شيخ الزاويه , أصل ابن عمي ارهابي قد الدنيا و هو اللي غرر بيا , أصل البلد دي كافره و جيشها و شرطتها كافرين , هي الطلقه أم 8 جنيه , عشان القانون لا يحمي المغفلين ولا يحمي المغرر بيهم ولا الصيع والعواطليه .
.
- طب ماتخلي الظابط و هو بيطاردني و انا معايا عبوات ناسفه, خليه يقبض عليا , لا هيقبض عليك لو مفيش خطر يقع عليه وقتها ( ماهو بني أدم والله و له روح برضه ) , لو فيه خطر تبقى هي الطلقه , و اجمالا هو مش هيقبض عليك صاحي عشان خايف على حياتك , انت بيتقبض عليك صاحي عشان يعصروك و يعرفو مين اللي وراك .
.
- مين اللي من حقه يشيل سلاح ؟ رجل الشرطه و رجل الجيش و بس , ده برضه في كل دول العالم , و مجرد ما تشيل سلاح و ترفعه على حد منهم أو حد من المدنيين يبقى اخرك الطلقه , حتى لو استخدمت السلاح ده للتهويش أو التهديد .
.
- الظابط و وكيل النيابه و القاضي ماعندهمش أي عداوه مسبقه ولا لاحقه معاك , هي ناس بتنفذ القانون و تطبقه مش اكتر, لو معاليك اشتغلت مهندس أو دكتور أو عامل هيحبوك و هتعيش و تموت وانت ماتسعمش عنهم ولا تشوفهم , اشتغلت ارهابي بأي شكل هيطبقو عليك القانون .
.
- ليه يطبقو عليك القانون ؟ عشان يحمو البلد و الناس من شرك و يحمو حتى اهلك من شرك , إزاي ؟ مش انت بإرهابك و سلاحك ممكن تقتل مدنيين يكونو موجودين في المكان بالصدفه ؟ و إرهابي غيرك ممكن يقتل أبوك وامك و عيالك عشان موجودين في نفس المكان بالصدفه , سهله خالص أهي .
.
- البرادعي و هيومان رايتس واتش و الميديا الغربيه و الخنزيره و قنوات الخرفان و أردوغان بيدعموك ؟ بيخلقو لك قضيه ؟ بيصوروك في دور البطل ؟ عشان انت بالنسبالهم مجرد مطيه , إنت مطيه بتستخدمها أمنا الغوله و صبيانها في العالم لتحقيق أغراضهم السياسيه و الإقتصاديه و لوي دراع الحكومات والأنظمه , يعني انت مجرد حمار بيركبوه لحد مايموت , يموت في مطارده أو يموت بحبل عشماوي , و بالمناسبه بما إنك حمار فلازم تفهم كويس أوي إن الحمير مابيدخلوش الجنه , يعني الحكايه لا هيبقى فيها حور عين ولا فيها بطيخ .
.
خلصانه بهدوء و بشوية عقل .
..............................................................................................................................
Mohamed Hussein
9 مارس 2019
أنا والمطاعم الغربيه
.
كنت جعان أوي في شارع التسعين اللي في التجمع , ركنت على جنب و دخلت مطعم من فروع المطاعم الغربيه , المطعم مليان موظفات مختارينهم عالفرازه ( من فصيلة المزز ) , طلبت ساندوتش شكله باين في الصوره قد غطا الحلّه النحاس بتاعة زمان , بعد شوية جالي الأوردر عباره عن ساندوتش أقسم بالله قد قرص الطعميه أبو نص جنيه , و جنبه شوية بطاطس صوابع , الحساب كام يا مولانا ؟ 55 جنيه .
.
مسكت الساندوتش بين أول عُقله في الإبهام و أول عقله في السبابه كداهو , و بصيت له بتركيز و حسره و شفقه , مانا عايز أعرف هو ب 55 جنيه ليه ؟ معاه دكتوراه من هارفارد مثلا ؟ فكرت كتير و في النهايه عشان أنا مابحبش حد يضحك عليا و يستكردني لقيت الحل و التقسيمه الصح , الساندوتش ده ب 55 , شيل منهم 5 جنيه ضريبه , يبقى باقي 50 , و ال 50 عباره عن 2 جنيه تكلفة الساندوتش , 1 جنيه بطاطس , 47 جنيه مزز و رُكب و سمانات ( و طباشير ملون ) , ماهي الحاجات دي بتكلّف برضه .
Mohamed Hussein
10 مارس 2019
كامل الوزير بقى وزير
.
صباح الخير
.
امبارح عرفت بالصدفه إن اللوا كامل الوزير هو وزير النقل القادم فعلا , ومانشرتش الخبر حتى لا يفت ذلك في عضد الجنود ( ماعرفش يابني الجمله اللي فاتت دي معناها ايه بس انا حافظها كده من كتاب التاريخ بتاع أولى اعدادى ), قصدي يعني عشان محدش يعمل حفله عليا و العيال يتريأو و يجيبو ناس تتريأ معاهم .
.
مين بقى كامل الوزير ؟ ده الراجل اللي مابيقعدش على مكتب ولا يعرف ورق ولا ختم في الدرج ولا بناء على تعليمات فلان ولا شلوت سيادتك دفعه للأمام , هتلاقوه على قضبان سكه حديد في رمسيس و بعد ساعتين عند مزلقان في السنبلاوين و بعد نص ساعه راكب قطر في بني سويف , وهو ماشي هتلاقوه بيفكر و بيحسب و معاه دايما ناس , مش ناس تشيل له الشنطه ولا تظبط له رابطة الكرافته , هو أصلا مابيلبسشي كرافته , إنما ناس متخصصين يفكرو و يحسبو معاه , المخطط و المستهدف و المتاح و وقت التنفيذ , هنشوف في السكه الحديد و وزارة النقل ملحمه زي اللي شوفناها في مشاريع الهيئه الهندسيه في ال 5 سنين اللي فاتو .
.....................
يا أستاذ يا أستاذ
- نعم يا حبيبي ؟
.
هو انتو بتعسكرو السكه الحديد ؟
- أه , ليه ؟
.
طب و صورتنا قدام العالم ؟
- والله اللي واخد عننا صوره وحشه ممكن يبروزها عادي ويطبع منها كذا نسخه و يقف يوزعهم في إشارات المرور بتاعة شيكاغو .
.
طب و الكوادر و العقول الألماظات اللي في وزارة النقل ؟
- ماتقلقش , هنخزنهم في مخازن غمره جنب الجرارات و العربيات المتهالكه و بعد 5 سنين لما نظبط الدنيا نبقى نفك التخزين , صدقني هتلاقيهم وقتها بنفس سحنتهم و معاهم نفس الختم و نفس فرخ الكربون , يعني بحطّة إيدك , بس وقتها مش هيبقى لهم مكان , هيرجعو يلاقو دنيا غير الدنيا , و حماده اللي سابوه قبل التخزين هيرجعو يلاقوه بقى حماده بيه .
...........................................................................................................................
Mohamed Hussein
10 مارس 2019
·
ولاد بهيه
.
أتمنى مع اللوا كامل ان احنا أأأ , بالمناسبه يا كامل , اسمح لي إني أرقيك لرتبة فريق !! .
.
مشهد ترقية كامل الوزير من لواء إلى فريق ده مشهد مصري عظيم لرجل يستحق , و مصر زي مافيها أبطال عالجبهه بسلاحهم فيها بطل عظيم في البناء إسمه كامل الوزير , ماهو ده شعار جيشنا المصري من زمان أوي ( يد تبني و يد تحمل السلاح ) .
.
مشهد كلمة كامل الوزير لما يقول أخويا و معلمي عبد الفتاح السيسي ( اللي هحكي و أكتب عنه بعد عمر طويل ) , مشهد السيسي و هو بيقول لكامل اسمح لي أرقّيك , بيستأذنه !! , مشهد تحية و شكر كامل الوزير لوزير الدفاع المصري و يقف احتراما للتحيه , مشهد تحية كامل الوزير لرئيس أركان حرب القوات المسلحه المصريه و يقف احتراما للتحيه , مشهد القاده و الجنود و الظباط و التصفيق احتراما للكبير و للقائد , مشهد عبد الفتاح السيسي و هو واقف على جنب عشان كامل الوزير عايز يقول كلمه , يقف هادي و مبتسم و يسأّف .
.
المشاهد اللي فاتت مشاهد للمصريين أحفاد مينا و أحمس و كليوباترا و جمال عبد الناصر , ولاد بهيه , الناس اللي بتعرف تحب بلدها و تعرف تحترم نفسها و تحترم غيرها , و تعرف يعني ايه رتبه أعلى و يعني إيه مؤسسه و يعني ايه كيان و يعني ايه دوله و يعني إيه مسئوليه .
.
المشاهد اللي فاتت بتقول للصيع و العواطليه اللي فاهمين ان الحريه شتايم للكبير و الصغير و كوميكس و تريأه عالرجاله اللي بيحمو البلد و يبنوها , بتقول للصايع اللي شتم وزير الدفاع المشير طنطاوي قبل كده , بتقول لهم خدتو وقتكو و أثبتو مايكفي من الفشل و الجهل و التفاهه و الإنحطاط , بتقول لهم كمان , هننزل بقى بلوحة النهايه , و نهاية يعني end .
.................................................................................................................
Mohamed Hussein
11 مارس 2019
الراجل كامل الوزير طلع بلدياتي من المنصوره , وانا أقول يا ربي جاب الجدعنه و الرجوله و الشهامه و الوطنيه و الجمال و الحلاوه دي منين ؟ و على فكره بقى , دي أقل حاجه عندنا .
.......................................................................................................................
Mohamed Hussein
12 مارس 2019
واحد من الخرفان
.
صباح الخير
.
الاخوانجي صابر مشهور بيقول في فيديو
ان الايمان بعوده مرسي ركن من اركان الدين وجزء من عقيده المسلم ومن يشكك فيها عليه ان يراجع ايمانه لانها تتعارض مع لا اله الا الله .
.......................
من زمان و انا بقول و مش هبطل أقول
- تنظيم الإخوان تنظيم وثني صهيوني أنشأته المخابرات البريطانيه في نفس توقيت نشأة اسرائيل ( و مش بالصدفه ) , مهم جدا للدول العربيه لما نخلق وسطهم دولة صهيونيه إننا في نفس الوقت نزرع كيان صهيوني جواهم و نلاعبهم بنفس نقطة ضعفهم ( الدين ) .
.
طب ليه نعمل كده ؟ عشان مش عايزينهم يبقو متحدين , لا على أديان معينه ولا على مفهوم الوطن والمواطنه , عايزين نفرّغ المعنيين من محتواهم , و مفيش حد يقدر على كده أكتر من تنظيم الإخوان , اللي هو شعاراته: الوطن حفنة من تراب عفن ( يعني ملهوش لازمه ) و الدين عند الله يبقى دين حسن البنا ( اللهم أمتني على دين الإخوان ...دعوة قيادي اخوانجي مشهور ).
.
و يمكن ده السبب اللي بيخليني دايما مُصرّ إن أعظم ثوره في تاريخ العالم الحديث هي ثورة 30 يونيو , الفكره هنا مش إزاحة مرسي برغبة شعب و مباركة جيش , الفكره هي القضاء على الصهيونيه اللي جوه أوطانا , عشان هي ألعن ألف مره من الكيان الصهيوني نفسه .
.
لشباب الإخوان اللي لسه في مرحلة التدريب و الإعداد , واللي لسه فيهم بواقي عقل , عايز أقول لهم كلمتين لوجه الله , وأكيد فيه منهم كتير في الفولورز
.
- ألعن التجارات على الإطلاق , مش تجارة المخدرات ولا السلاح ولا حتى الدعاره , ألعن التجارات على الإطلاق هي التجاره بالأديان و بالدم , انك تحول دين و عقيده لمجرد مطيه لوصول جماعتك للحكم والسلطه , جبريل نزل عليكو في رابعه و أردوغان دخلو عليه الطياره وقت الانقلاب و ماشافوهوش ( زي محمد بن عبد الله و أبو بكر),و اخيرا اللي بيشكك في عودة مرسي محتاج يراجع عقيدته !!.
.
انت كبني أدم اتولدت لقيت نفسك عايش في بيت اخوانجي , هتفضل معذور لحد ما تبلغ سن معين , سن النضج و التفكير و العقل, ربنا هيحاسبك من وقت السن ده .
.
كلمتين هقولهم و باختصار , عمرك هتعيشه مره واحده , وانت مُخيّر مش مُسير ,هتعيشه في كدب و تأليف و تزييف و تكفير و قتل و تجاره بالدين كل يوم ؟ انت حر , في النهايه هتقف قدام ربنا في الأخره , و مش هينفع تقول لربنا أصل وصايا حسن البنا بتقول , أصل انا كنت بكدب و أزيف و أحرق و اتاجر بدينك يارب عشان غرض نبيل , أصل مفهوم التقيه و فقة الأسر , تأكد تماما يابني انك مش هتخدع ربنا ولا هتخدع الملايكه , الإسلام دين المسلمين مش دين الإخوان , الإسلام عمره 15 قرن مش 90 سنه, الإسلام نزل على محمد بن عبد الله مش على حسن البنا ولا محمد بن عبد الوهاب .
.
اللهم قد بلغت , اللهم فاشهد.
............................................................................................................
Mohamed Hussein
12 مارس 2019
و في إطار خطة الحكومه و النظام المصري لعسكرة كل حاجه , دي صورة بتجمع 8 وزراء في الحكومه المصريه , لواءات و عساكر أمن مركزي متنكرين زي مانتو شايفين كده .
.
شوفت مصر السيسي يابني ؟ لا أكيد ماشوفتهاش , طب شوفها في الصوره دي , مصر اللي رجعت سالمه غانمه لينا , مصر اللي ما بتلبسشي محزق و عريان عشان يرضى عنها الأمريكان , و لا بتلبس نقاب عشان يرضى عنها العُرْبان
.
مصر اللي موقعها في الجغرافيا في منتصف الكون و موقعها في التاريخ قبل ما يتعمل له كتاب بيومين , ماينفعش تقلّد ولاد إمبارح ولا ولاد أول أمبارح .
............................................................................................................
Mohamed Hussein
13 مارس 2019
مرحبا , أنا مارك مدير عام الفيس بوك و العضو المنتدب و أمين الصندوق و نجم الجيل و كبير مشجعي مانشستر يونايتد , نخبركم أمرا , أنه حدث عطل فني في الفيس بوك و الماسينجر و إذا لم تقم بإرسال هذه الرساله لكل أصدقائك و لخالتك شربات في البدرشين و تبعت لمحمد حسين حلة محشي و ققص جوافه وبرطمان لمون مخلل , فسوف لن تستطيع استخدام الماسينجر مره اخرى و تكلم المزه بتاعتك حتى لو كنت ابن طاهر القويري ذات نفسه , والله الموفق و المستعان
.
إمضاء / مارك بن زوكنبرج
.......................................................................................................................
Mohamed Hussein
14 مارس 2019
من أقوال الزعيم الراحل أدولف هتلر
.
كان بإمكاني أن أعمل حظر رسائل لكل الأصدقاء اللي بعتو الرسالة بتاعة ( حدث عطل فني في الفيس بوك وإن لم ترسلها لكافة أصدقائك مش هيحصل لك كويس و هتموت في حادثة موتوسكل بعد ساعتين ) و لكني تركت بعضهم لأني مابقيتش ملاحق و إيدي وجعتني بصراحه .
.......................................................................................................................
Mohamed Hussein
15 مارس 2019
هجوم ارهابي على مصلين في أحد مساجد نيوزيلندا و مقتل 50 شخص داخل المسجد , اللي نفذ الهجوم صوّره فيديو بث مباشر .
....................
فين يابني الأمن بتاع نيوزيلندا ولا أبو 50 % النيوزلندي شاطرين بس يزودو له المرتب كل يوم تلات ؟ ( خروف و شمام كوله بيقولو و يغنو على بعض)
.
تلاقي الإرهابي كرمش لأمين شرطه نيوزلندي 20 دولار لما قال له شخلل جيبك عشان تعدي ( عيل نيوزلندي نايم على بطنه عالسرير و بيفتكس عادي ) .
.
انا من زمان بقول ان الكماين الثابته كارثه و لازم كماين متحركه و تغيير في خطة و استراتيجية المواجهه الأمنيه ( ست أم شوشو بتاعتهم خريجة ثانوي تطريز بعد ما ركنت سبت الغسيل على جنب و قررت تهبد هبده من اللي بتنتزع أهات الجماهير ).
.
أين عبد الفتاح السيسي مما يحدث في نيوزيلندا ؟ ( واحد شارب جردلين ماية جوزه عالريق وعامل بيهم دماغ ) .
.
مش بعيد تكون السلطات هناك هي اللي عملت كده عشان تمرر تعديلات دستوريه أو تداري على فرّه أصابت الأبقار النيوزلنديه و أسفرت عن نفوق 7 بقرات و معزتين ( خروف نيوزلندي هربان من 7 احكام اعدام و عايش في دوله تانيه ).
.
المواطن النيوزلندي ده معذور لانه كان الأول عالثانويه العامه و مع ذلك قدم على وظيفه و سابوه وخدو عيل فاشل ابن ناس مهمين ( شمام كوله نيوزلندي على قهوه من قهاوي وسط البلد وهو بيشرب معسل لحد مانفسه اتقطع ) .
.
العمليه دي وراها ناس كبار أوي و تجار أبقار و ناس تقال بتوع سمنه و جبنه ( شمام كوله سابقنا بمليون سنه ضوئيه )
.
الواد ده اتعرض لضغوطات كبيره بسبب ان اهله مختفين قسريا بقالهم نص ساعه و محدش يعرف عنهم حاجه و هو اتسجن قبل كده عشان قال (احنا الصوت لما تلاقو الدنيا سكوت ) و في السجن خد 715 طلقة خرطوش في اماكن متفرقه , و حطو العصايا في مؤخرته و طلعوها من ودانه ( علاء الأسواني بتاعهم )
.
- كان لازم نحتويه و نتفاوض معاه و نعالجه نفسيا و نعمل له مراجعه فكريه و نجيب فكريه تراجع معانا ( البوب النيوزلندي )
.
انما المؤكد و الأكيد ان اللي نفذ الهجوم ده متأثر بكتب التراث و بمناهج الأزهر الشريف فرع ولينجتون ( شوية الصيع اللي بيسمو نفسهم تنويرين وبيحملو شعلة النور في بحر البطيخ ) .
..........................................................................................................................................
ليست هناك تعليقات:
إرسال تعليق