Mohamed
Hussein
13
سبتمبر 2018·
قالو له هنعتصم
و نوقف لك حال البلد و نجيب القنوات العالميه تصورنا و مش هنعترف بثورة شعب ولا يهمنا
شعب ولا جيش ولا تقدر تعمل لنا حاجه .
- قال لهم قدامكو
يومين تروّحو بيوتكو فيهم , واللي هيفضل هو حر .
.
قالو له هنقلب
عليك الدنيا و أمريكا و أوباما و أوروبا و كل المنظمات والحبشتكانات .
- قال لهم أعلى
ما في خيلكو و خيلهم إركبوه .
.
قالو له هنقلبها
إرهاب و دم
- قال لهم لو شطار
قرّبو .
.
قالو له هنفتح
قنوات و جرايد في بلاد الخوا*ات و نتشألب على سرايرهم و نفضل ليل و نهار نشتمك و نشوه
فيك و في بلدك و جيشك
- قال لهم افتحو
عالأخر ( افتحو قنوات و جرايد يعني ) .
.
قالو له هنضرب
لك الإقتصاد و السياحه و الإستثمار و نلم الدولارات من المصريين اللي شغالين بره لحد
ما مصر تعلن إفلاسها
- قال لهم احنا
بناكل قش و بنبات شبعانين .
.
قالو له انت خايف
مننا و عايز تصالحنا و احنا حاسين كده انك عايز تصالحنا
- قال لهم القضاء
المصري أصدر حكم على قياداتكو بالإعدام .
.
قالو له مش هنسكت
و هنزنزن الزنازين
- قال لهم وانا
هتحفّظ على كل ممتلكاتكو, يعني هجيبكو ملط .
.............................
.............................
عارفين بقى
أنا وصلت لقناعه
معينه بتقولي التالي :
- انت محتاج تكون
فارس و قلبك جرئ أوي عشان تطرد استعمار بريطاني و تركي عاش يحكم و يتحكم في مصر سنين
طويله و عشان تأمم قناة السويس و تجر شكل دوله بحجم فرنسا و عشان تأمم ممتلكات بتاعة
بشوات و أكابر, محتاج تكون فارس و قلبك جرئ أوي عشان يبقى إسمك جمال عبد الناصر .
.
إنما لو عايز تقضى
على تنظيم إرهابي دولي عمره 90 سنه متوغل في كل مفاصل الدوله و في الشوارع و البيوت
و المدارس و الحواري و كل واحد فيهم معاه بطاقه مصريه و بيحمل الجنسيه المصريه ؟ لو
عايز يبقى اسمك عبد الفتاح السيسي فانت بالتأكيد محتاج يكون قلبك ميت .
.
عشان باختصار
, محاربة استعمار أجنبي أسهل بكتير من محاربة تنظيم إرهابي عايش وسطينا .
...............................................................................................................
Mohamed
Hussein
13
سبتمبر 2018·
البنت الكيوت اللي
قلبها قلب خسايه بتاعة الرحاب اللي اشتركت مع أبوها في استدراج شاب محترم و قتله ,
البنت دي من كام يوم مالقيتش حاجه تقولها قدام النيابه قامت خبط في دماغها تقول إنها
اتعرضت للإغتصاب من الشاب القتيل و أبوها كان بيدافع عن شرفه .
.
النهارده الطب
الشرعي أثبت إن البنت عذراء !! و بالتالي أبوها هيلبس بدله حمره ويروح لأحضان عشماوي
و الفراشه الرقيقه هتاخد مؤبد بالمستريح .
.
أقطع دراعي من
هنا إن البت دي و أبوها إخوان , محدش في الكون بالغباوه دي غيرهم , ماركه مسجله يعني
( ما هما برضه اللي جابو واحد يلعب دور قتيل في مشهد فض اعتصام رابعه و صورو القتيل
ده و هو نايم و غرقان في الدم و ميت خالص و بيتكلم في الموبايل !! ) .
.
بتتهمي القتيل
باغتصابك و انتي لسه عذراء يا هبله يابنت الهبله ؟! .
..................................................................................................................
Mohamed
Hussein
12
سبتمبر 2018·
التحفظ على شركات
لأكتر من 1500 عضو من أعضاء الجماعه الإرهابيه الدوليه , شركات و مدارس و مستشفيات
و جمعيات لامؤاخذه أهليه
.
هي الحكايه ايه
بالظبط ؟ بص يا سيدي
- الحاج مبروك
لما حكم مصر لمدة 30 سنه , جه في أخر عشر سنين و صحته خسعت شويه , قامت مراته الحاجه
مبروكه قالت له عايزين الواد حماده ابننا يمسك الحكم من بعدك , نجهزه كده و نظبطه و
يبقى رئيس مصر و انا ابقى مرات الرئيس و أم الرئيس , والنبي دي حاجه لها شمخه حلوه
أوي .
.
- الحاج مبروك
قال لها يا وليه مايصحش , واقول للناس ايه و اعمل ايه مع الكبارات اللي بره ؟ قالت
له الكبارات اللي بره احنا عارفين ديتهم , تفتح المجال للإخوان و تخليهم يشاركو في
الحياه السياسيه و ياخدو كام كرسي في البرلمان و اللي عايز يعمل شركه ولا مصنع ولا
ولا , سيبهم براحتهم , الحاج مبروك قال لها بس دي جماعه خاينه و اللي هنعمله ده هيبقى
خراب على مصر بعدين , قالت له يعني هي مصر دي تبقى من بقية أهلنا ؟ اسمع الكلام بقى
وبلاش مناهده كتير , حماده هيحكمها من بعدك يعني هيحكمها و اللي عايزينه الأكابر هنعمله
, و عليها وافق الحاج مبروك عشان مايزعلش الحاجه و ساب البلد سداح مداح للجماعه الإرهابيه
, و كله عشان خاطر عيون الننوس حماده .
.
واحد يسألني و
يقولي ,وهو لما يكون عندنا جماعه ارهابيه دوليه و تمتلك شركات و مدارس و جمعيات اهليه
, ايه المشاكل اللي ممكن تحصل ؟
.
بص يا حبيبي
- شركات و مدارس
و جمعيات يعني اقتصاد موازي , تشوفه بعينك جزء من اقتصاد الدوله لكن الحقيقه في وقت
الجد هيبقى سلاح موجه لصدر نفس الدوله
.
- يعني أبواب مفتوحه
لغسيل الأموال و تلقى التمويلات الخارجيه , ماهما ولاد الحرام اللي بره لما يحبو يبعتو
لك تمويل اجنبي مش هيلاقو أحلى من كده , و كله يبقى قانوني و متستف و زي الفل .
.
- شركات يعني توظيف
لأعضاء الجماعه الارهابيه و بدل مايبقو بياخدو تمويل يبقو بياخدو مرتبات فخمه ( أصلهم
موهوبين طبعا زي مانتو عارفين ).
.
- جمعيات و شركات
يعني أماكن للتجمع و التخطيط و التدريب و يعني برضه مخازن لتخزين الأسلحه و المتفجرات
اذا تطلب الأمر .
.
- جمعيات و شركات
يعني أماكن يلمو فيها الدولارات زي ماحصل وقت الأزمه الاقتصاديه و قلت لحضراتكو وقتها
ان مفيش جهاز أمني في العالم يقدر يفتش مليون بيت و مليون محل و شركه و يدور تحت المراتب
و تحت السراير .
.
- باختصار , كيان
اقتصادي عملاق في إيد جماعه ارهابيه خاينه يبقى السلاح رقم واحد اللي معاهم , يعني
كل طلقه انضربت على جندي و ظابط مصري في السنين اللي فاتت شارك فيها بشكل أو أخر مدرسه
أو جمعيه أو شركه من شركاتهم , و ابقى سلّم لي عالحاج مبروك و مراته , و السلام أمانه
لحماده الصغير .
.......................................................................................................
Mohamed
Hussein
11
سبتمبر 2018·
الفيلم الهندي
على الأبواب
.
تركيا تستعد للدفع
ب 20 ألف من مقاتلي الجيش الحر في سوريا ( الإرهابيين يعني بس بيسموهم الجيش الحر
, أه بيدلعوهم ) إلى مدينة إدلب لحمايتها من الهجمات المحتمله و المتوقعه من الجيش
السوري , مممممم ماهو برضه الجيش العربي السوري هو اللي غلطان , يعني ايه يبقى جيش
سوريا و عايز يحرر مدينة سوريه من إيد الإرهابيين و الأتراك ؟ طب هيروح من ربنا فين
؟ّ!.
.
السيناريو بقى
1 - تبدأ أمريكا
و ألتها الإعلاميه الترويج لفكرة إن بشار الأسد هيستخدم الكيماوي لتحرير مدينة إدلب
, واحنا حاسين كده انه هيستخدم الكيماوي , شكله هيستخدم الكيماوي , عندنا تقارير كتير
بتقول انه هيستخدم الكيماوي , أم نحمده بتاعة الكرشه أكدت لنا انه هيستخدم الكيماوي
.
.
2- هووب الإرهابيين
في أدلب يضربو برميلين تلاته متفجرات .
3- هوووب الخواجات
بتوع الخوذ البيضاء يصورو كام مشهد للأطفال وهما ميتين أوي جدا خالص ( بسبب الكيماوي
بتاع بشار طبعا ) .
4 - هووب تدخل
القوات الأمريكيه و البريطانيه و التركيه و الفرنسيه و الألمانيه تضرب في الجيش العربي
السوري ( اللي بيفكر إنه يحرر أرضه من الإرهاب و الإحتلال التركي والعياذ بالله )
.
5- هوووب الخرفان
يقولو إدلب تحترق و يدعمو قوات التحالف الإستعماري الكيوت ضد الجيش العربي السوري الوطني
المفتري الظالم !!.
.....................
.....................
شوفو يا جدعان
, لو الجيش المصري مكانشي له التاريخ بتاعه و البطولات اللي عملها اللي ملهاش أول من
أخر , لو جيشنا مكانشي عمل أي حاجه في حياته غير إنه أنقذنا في السنين اللي فاتت من
إن بلدنا تكون ساحة لمسرحية هزليه بنت وسخه بيشارك فيها كل عربجية التاريخ والصيع و
الخوا*ات , ف ده في حد ذاته يكفيه و يكفيني جدا عشان أقول عليه أعظم جيش في الكون
.
........................................................................................................
Mohamed
Hussein
10
سبتمبر 2018·
عيشت في السعوديه
13 سنه , المنطقه اللي كنت بشتغل فيها كلها سعوديين , مفهاش اي جنسيات أجنبيه ( غير
شوية بنغاليين بيشتغلو حراس للعماير ) , و أغلب تعاملي كان مع الستات و البنات ( بحكم
إن الرجاله في أشغالهم ) , لا عمري هزرت مع ست أو بنت سعوديه ولا استظرفت و استخفيت
دمي ( حتى لو مكانشي عندها مانع للهزار ) .
.
طب ليه ؟ عشان
حضرتك في عقد العمل و حتى في قواعد العقل البشري بند بيقول إنك لما تروح دوله أجنبيه
أو تدخل بيت غريب لازم تحترم قوانينه و خصوصياته و عاداته و تقاليده .
.
هقولكو حاجه أغرب
, انا واحد من الناس مابحبش أبدا الأسماء بطريقة أم فلان و أبو فلان , بتنرفزني أوي
الحكايه دي و بكره إني أسمعها في مصر , و مع ذلك برضه عمري ما سألت ست هناك عن إسمها
الحقيقي , و لا استنكرت عليهم إنهم يقولو أسمائهم بالشكل ده ( أم فلان ) .
.
بص يا حماده ,
الحكايه أصلها مش شطاره و فهلوه و فتحة صدر
- لما ربنا يكرمك
و تسافر أمريكا أو أوروبا هتلاقي الناس بتمشي في الشارع بالشورتات عادي , و الستات
عالشواطئ عريانين , و ممكن تلاقي ولد بيبوس حبيبته و هما قاعدين , دورك ايه بقى ؟ ولا
أي حاجه , انت بتسافر عشان تشتغل مقابل أجر , لا حد قال إن دورك إصلاح الكون و تغيير
عادات و تقاليد الشعوب ( عشان يبقو على مزاجك ) و لا عاداتهم و تقاليدهم دي المفروض
تشيلها على راسك و تزعق .
.
- و لما ربنا يكرمك
و تسافر الهند هتلاقي الناس بتعبد البقر , برضه ماينفعش تاخدك الجلاله و تروح تشتغل
لهم واعظ ديني و تتخيل نفسك مندوب ربنا على الأرض .
.
- طب سافرت أي
دوله في العالم و ماحترمتش عاداتها و تقاليدها و قوانينها ؟ تبقى شيلت قربه مخرومه
يا معلم و بتخر على دماغك انت , يعني ماتبقاش بطل شعبي إلا في عقول شوية مخابيل .
...............................................................................................................
Mohamed
Hussein
10
سبتمبر 2018·
يسري فوده هو واحد
من زبانيه و عرابين الخراب في منطقة الشرق الأوسط .
.
شغله مع قناة الخنزيره
اللي هي البوق الإعلامي للخراب و الحرق و الدمار و مرتباته اللي قبضها منها ( من دم
الملايين من شعوبنا العربيه في مصر و سوريا و ليبيا و العراق و اليمن و تونس ) .
.
يسري فوده اللي
أتحدى انه يطلع لأنصاره و بهاليله و يقول لهم بشكل صريح و واضح , هو ازاي كان بيروح
أفغانستان و كهوف تورا بورا و يعمل لقاءات مع قادة طالبان في وقت حرب و وقت قصف جوي
و و و ؟ مين اللي كان بيوصله لهناك و يرجعه سليم ؟ مين اللي بيدير قناة الخنزيره ؟
مين اللي بيدفع للقوادين و العاهرات اللي فيها مرتباتهم و ليه ؟ .
.
أنا بالنسبالي
لا يعنيني إطلاقا إنه يكون اتحرش ببنات في ألمانيا أو اتحرش بمعيز و شمبانزي في موزمبيق
, ليس بعد الكفر ذنب , مفيش بعد خيانة الاوطان حاجه ينفع تتكتب في صحيفة الحالة الجنائيه
, يتحرش ببنات , يتحرش برجاله , يشرب خمره , يشرب جاز , مابتفرقش .
...............................................................................................................
Mohamed
Hussein
9
سبتمبر 2018·
يابني أنا مش محتاج
أقرا تقرير مفوضية حقوق الإنسان اللي تبع الأمم المتحده اللي بيعقّبو فيه على أحكام
القضاء المصري ( خصوصا لما تكون الأحكام ضد أعضاء من الجماعه الإرهابيه الدوليه )
, ولا محتاج أعرف رأي قناة الخنزيره و ال bbc
و الواشنطن بوست و لا أشوف تويتات البرادعي .
.
طب ليه مش محتاج
؟ عشان عارف والعارف لا يُعرّف , عارف و متوقع و أبصم بالعشره على توقعي , ليه برضه
؟ عشان هي يا حبيبي مش كيميا ولا لوغاريتمات , هي حدوته واحده و حلقاتها مكرره من سنين
طويله بشكل ممل , بيت دعاره كبيييير و لامم الشامي و المغربي و القارعه و أم الشعور
و المنظمات و الجرايد و القنوات و الهيئات و الحبشتكانات .
.
بيت الدعاره الكبير
ده اسمه ايه ؟ اسمه القوى الناعمه للشيطان الاعظم , كل واحد جوه بيت الدعاره بيلعب
دوره المرسوم له , من غير تعليمات ولا حتى اتفاقيات مسبقه , هي العاهره لما بتدخل برجلها
بيت دعاره بتبقى محتاجه خبير ألماني يشرح لها هتعمل ايه بالظبط ولّا هي عارفه طبيعة
وظيفتها و ال job
description
؟! .
.
طب هنسكت لهم يعني
ولا نعمل ايه ؟ لا احنا مانعملش , مطلوب مننا نفهم و بس , إنما عندنا مؤسسات عريقه
بتتصرف , الخارجيه المصريه ردت على الحيزبونه الجديده بتاعة مفوضية حقوق الإنسان و
قالت الخارجيه المصريه كلام كتير اوي ممكن نختصره في كلمتين ( إتلمي يا صايعه ) .
....................................................................................................................
Mohamed
Hussein
9
سبتمبر 2018·
أنا و العفريت
.
العفريت : ها ها
ها ها , شبيك لبيك , نفسك في إيه الله يخليك ؟!
أنا : نفسي أمشي
في التايم لاين و ألاقي كل الناس عندها عقول و إتزان و حصافه , مش صينية كنافة , مابينشروش
أخبار مضروبه , بيفكرو الأول , نفسي يبطلو هري و هبد , نفسي محدش يسرح بيهم ولا يشتغلهم
, نفسي الشباب ينشفو شويه و يبقو رجاله , و البنات و الستات مايكتبوش كلمة (خر* ) في
بوستاتهم و تعليقاتهم , نفسي الناس تشوف الصوره كامله مش حته و حته , نفسي مايغلطوش
في الكتابه العربي و لا يعوجو لسانهم , نفسي الكل يحترم بلده و اسمها و تاريخها و جيشها
و علمها , نفسي عبيد أمريكا و الغرب يبطلو عباده حمقاء و عبيد الوهابيه يفوقو من الغيبوبه
, نفسي المصريين يبقو مصريين يا اخي .
.
العفريت ( بيعيط
) : بس بس , قطعت قلبي يا اسمك ايه .
أنا : يا عم اتصرف
بقى و قول , ولا انت لسه عفريت صغير و زغلول ؟
.
العفريت : لا زغلول
مين يابن حسين ؟ , داحنا حلوين أوي و جامدين , هقولك الحل أهو , مش عشاني ولا عشانك
, بس ركّز و طأطأ و دانك
أنا - مركز يا
مولانا , إلهي يارب تكبر و نجوزك مرجانه
.
انت تجيب زعفريت
و قرنبيط و بودرة عفريت و خيط كمبريت , و تضيف عليهم ديل قط من اللي بيفط و ينط و تجيب
جلدة كتاب و ريشة غراب و نص كيلو كباب و حبايتين تين و إزازتين بيره مشبرين و تجيب
كمان حنكلان و قرن شألبان و باكو شمعدان و كيم كارديشان و بسبعتاشر جنيه حبهان , و
تروح بيهم لحمدان
- حمدان مين يا
حاج ؟
.
ممممممم يعني انت
يابني فهمت الهبل ده كله و نفذته و وقفت معاك عند حمدان؟!
- تصدق عندك حق
, تعاشرب بانجو بقى , اتفضل و الله .
..................................................................................................................
Mohamed
Hussein
8
سبتمبر 2018·
أخيرا خلصنا من
خطة مستر فته اللي اتلغت من الكتب من أيام حادثة دنشواي , و رجعنا تاني نلعب كوره بطريقة
( اللي يتكسف من بنت عمه مايجيبش منها خضار)
.............................................................................................................
Mohamed
Hussein
8
سبتمبر 2018·
حدوته اسمها العراق
.
يعني ايه دوله
مستقره سياسيا و أمنيا و عندها جيش قوي ؟ .
الجمله اللي فاتت
دي حضرتك هي كلمة السر لأي دوله , كلمة السر اللي بتحكم و تتحكم في كل حاجه من الإبره
للصاروخ , من أول الاستثمار و التنميه و الصناعه لحد بؤ المايه و حباية الطماطم , اه
و عهد الله زي مابقولك كده
.
العراق الدوله
الحضاريه التاريخيه العظيمه , بلاد الرافدين و حضارة بابل , حصل فيها ايه في عشرين
سنه فاتو ؟ راحت فين بالظبط ؟
.
- من عشرين سنه
كانت مستقره تماما سياسيا و أمنيا و اقتصادها قوي للغايه و عندها جيش له ترتيب عالمي
, و بعدين حصل ايه ؟ و بعدين دخلت أمريكا يا مولانا , وبس كده .
.
- دخلت أمريكا
و قالت أسلحة دمار شامل , و تعالي يا لجنه و روحي يا لجنه , طب نضرب العراق بقى , ماهو
أصل عندهم أسلحة دمار شامل من النوع الكبير يعني ال ( جامبو ) و بعدين صدام ده ديكتاتور
و بياكل دراع العيال الصغيره في بلده , روحي يا تقارير حقوق الانسان و تعالي يا تقارير
حقوق الإنسان , كلها عرايس يا مولانا في إيد مخرج العرايس .
.
- ها و بعدين ؟
و بعدين بح , قالو للعراقيين هنجيب لكو ديموقراطيه أمريكاني من النوع اللوكشورياس
, من يوميها و العراق بينعم و يتشألب في الديموقراطيه الأمريكاني اللوكشورياس , لدرجة
و الختمه الشريفه أردوغان اللي جيشه بيقلع ملط بقى يدخل شمال العراق و يطلع منها كأنه
داخل في بيت مالهوش صاحب , و الحكومه العراقيه تشجب و تستنكر و تقول مايصحش كده يا
جماعة الخير .
.
لما وقع الجيش
العراقي و لما العراق مبقاش فيها أي استقرار يّذكر اتلم عليها كلاب السكك , إيران على
تركيا و الراعي الرسمي الأزلي أمريكا و بريطانيا , كل واحد ياخد حته يا جدعان , ماتقلقوش
محدش هيقوم جعان , طب ايه العامل المشترك بين الأسماء الأربعه ؟ ركز كده ؟ ها ركزت
؟ أيوه هو ده , القوى الاستعماريه التاريخيه , دولة الفرس و الدوله العثمانيه و المستعمر
البريطاني و المستعمر الأمريكي الحديث , جينات المستعمرين هي هي , و أطماعهم مابتتغيرش
, الطريقه بس اللي ممكن تتغير .
.
وصل العراق لإيه
؟ وصل إنه المحاصيل الزراعيه تنخفض للنص السنه اللي فاتت دي , طب ليه ؟ هل الفلاحين
بطلو يزرعو ؟ لأ أزمة مايه , سببها ايه ؟ سببها حاجات كتير اهمها السدود و الحواجز
المائيه اللي عملها أردوغان , هل كان يجرؤ أردوغان على عمل سدود تمنع المايه عن العراق
أيام ماكانت العراق عراق ؟ الإجابه قطعا لأ , يبقى ضعفك السياسي و العسكري و الامني
بيوصلك لفين ؟ بيوصلك لإنك ماتلاقيش نقطة المايه ولا حتى حباية الطماطم .
.
التاريخ بيعيد
نفسه و أحيانا الجغرافيا كمان بتعيد نفسها , لاحظ إن أثيوبيا مابدأتش فعليا في إنشاء
سد النهضه إلا في 2011 , ليه السنه دي تحديدا ؟ عشان الدوله المصريه كانت في أضعف حالاتها
( نفس اللي عمله أردوغان مع العراق , اختيار التوقيت ), وبعدين حصل ايه ؟ و بعدين وقفنا
على رجلينا بسرعه في 2013 و الملف كله بقى في إيدينا احنا , و كل اللي مشاركين فيه
بقو على حجرنا .
............................................................................................................
Mohamed
Hussein
7
سبتمبر 2018·
الشرطه الأثيوبيه
: مدير مشروع سد النهضه مات منتحرا !! .
.
هبدجي أثيوبي رقم
1: لا لا ده مستحيل يكون انتحر , ده اتقتل و موجابي صاحبي مأكدلي , ايوه اتقتل و اللي
قتله رئيس المخابرات المصريه حتى بالأماره كان معاه رأفت الهجان و أول ما دخلو عليه
قالو له ( خالتي بتسلم عليك ) , ليا واحد صاحبي ساكن قريب من مكان الحادث كان واقف
في البلكونه و شافهم و سمعهم و هما بيقولو له كلمة السر .
.
هبدجي أثيوبي رقم
2 : الراجل ده انتحر فعلا , بس عشان يداري على ناس مهمين أوي في البلد و ياخد له قرشين
حلوين .
.
هبدجي أثيوبي رقم
3 : الراجل ده انتحر فعلا لان فيه ناس مهمين أوي بيشتغلو في تجارة الأثار و المخدرات
و ياميش رمضان هددوه إنه لو مانتحرش ممكن يرمو على وشه مايه نار , قام قال لهم لأ لأ
, كله إلا ماية النار , أنا رايح أنتحر أهو .
.
هبدجي أثيوبي رقم
4 : الراجل ده انتحر فعلا بس عشان الناس المهمين أوي هددوه بأهله , قالو له لو مانتحرتش
هنخطف جوز خالتك و مرات عمك و نمدهم على رجليهم , قام هو عشان شهم و جدع و واكل مع
الناس دي عيش و ملح راح انتحر .
هبدجي أثيوبي رقم
5 : القصه فيها غموض و ماتدخلش العقل لأن مدير مشروع سد النهضه راجل مستريح ماديا و
مرتبه كبير و عنده شقه فيها تلاجه 77 قدم , و المشكله اننا أصلا مش بنثق في الشرطه
الأثيوبيه , نسيتو حكاية البت جوبا اللي ملهاش ضهر ولقوها غرقانه في الهويس بتاع أديس
أبابا من عشرين سنه ؟ ولا نسيتو حكاية المطرب الشهير منجستو اللي اترمى من بلكونته
من 355 سنه وقالو انه انتحر ؟
.
هبدجي أثيوبي
6 : الغموض يكتنف القضيه , و عندي اعتقاد ان مدير مشروع سد النهضه كان معاه سيديهات
و ملفات ضد مسئولين كبار و جهات سياديه عشان كده دبرو حكاية اغتياله .
.
هبدجي أثيوبي رقم
7 : أيوه صح , سيديهات و ملفات ضد جهات سياديه , حق المرحوم مدير مشروع سد النهضه لازم
يرجع , الحريه للمرحوم مدير مشروع سد النهضه , المرحوم مدير مشروع سد النهضه على الأسفلت
, بس ده مات ؟ ( مممممم أومال يابني واخد لقب مرحوم بالأقدميه ؟! ) .
...............................................................................................................
Mohamed
Hussein
7
سبتمبر 2018·
كتيبة الرجاله
..........( من جبل الحلال ل هضبة الجلاله )
.
خليكو فاكرين
, لولا كتيبة الجنود و الظباط من الجيش و الشرطه اللي حاربو و بيحاربو و بيستشهدو في
جبل الحلال و شمال سينا , مكانشي هيبقى عندنا كتيبة رجالة تانيه بتعمل مصانع رخام و
فوسفات و طرق و مدن عالميه و محطات تحليه في هضبة الجلاله .
.
مفيش استثمار ولا
تنميه ولا صناعه ولا سياحه ولا حتى تعليم و مدارس بدون أمن , و مفيش امن بدون تضحيات
و دم طاهر , و كل المشاريع العملاقه اللي عملناها و بنعملها أخر 5 سنين , محطات الكهربا
و شبكة الطرق العملاقه و المصانع اللي في كل محافظاتنا و تصنيع فرقاطه مصريه و زراعة
1.5 مليون فدان في الصحرا و التخطيط لمفاعل نووي و مدن عالميه جديده و عاصمه إداريه
و مطارات و جامعات و مزارع سمكيه .
.
كل المشاريع دي
اللي وضع حجر أساسها في الأصل في الأصل هو كل جندي و كل ظابط بيحاربو تنظيم إرهابي
دولي مدعوم من أجهزة مخابرات عالميه و مصروف عليه مليارات الدولارات , الرجاله اللي
مبدأهم في الحياه ( اشتغلو انتو و عيشو و اصنعو و ازرعو و ماتخافوش عالبلد , احنا موجودين
) , طب و عمرك يا مولانا ؟ عمري هينتهي لما ربنا يريد حتى لو نايم في بيتنا و مشغل
التكييف , طب و عيالك و أمك و مراتك هتسيب لهم إيه لو مارجعتش ؟ هسيب لهم رفعة الراس
, لما يقولو احنا عيلة الشهيد .
.............................................................................................................
ليست هناك تعليقات:
إرسال تعليق