Mohamed
Hussein
20
سبتمبر 2018·
عزيزتي المرأه
بجميع أنواعها
.
مفيش حاجه اسمها
سترونج اندبندانت ومان , ولا سترونج اندبندانت بطيخ , أمي و أمك و جدتي و جدتك عاشو
و ماتو و اترملو و ربّونا وربو اللي خلفونا في ظروف ماتسمعيش عنها ولا في الحواديت
, مفيش واحده قالت على نفسها سترونج اندبندانت .
.
الجواز ياعزيزتي
مش عمليه بيقوم بيها المأذون عشان يجمع خروفين في بيت واحد و ينطحو بعض و نشوف مين
الخروف اللي هينطح التاني اكتر , الراجل ماينفعش يكون طري ( و منسون ) عشان يعجب معاليكي
, و الست ماتنفعشي تكون بشنبات ( عشان تبقى شخصيه ) , الراجل عظيم برجولته و الست عظيمه
بأنوثتها , فطرة الله التي فطر الناس عليها .
.
الجواز و البيت
بيبقى عامل زي الأوفه اللي لها ودنين , و الأوفه أم ودنين بيشيلوها اتنين , مفيش مجال
للمنّه و المعايره , لا الراجل يعايرك انه بيصرف على البيت ( عشان ده دوره ) و لا حضرتك
تعايريه بإنك عايشه و مستحمله ظروف صعبه ( لو عرفتي بس انه كل يوم بيصيف في هاسيندا
و يسيبك لوحدك ابقى قولي البؤيين دول , انما بيجري على أكل عيشه على قد مايقدر ماتقوليش
جارتي و صاحبتي وست أم شوشو اللي تحتنا بيروحو و يشترو و يصيفو و يعملو ) .
.
لو ربنا رزقك بولد
ربيه انه لما يكبر يكون راجل و بيتحمل المسئوليه , بلاش والنبي تفضلي تقولي له يا حماده
يا حماده لحد مايبقى عمره 70 سنه و هو حماده , و لو ربنا رزقك ببنت ربيها انها تكون
زوجه و أم و ست ناعمه زي الغريبه , بتفخر بأنوثتها ( و تحبها ) .
.
ولو حصل وانفصلتي
أو بقيتي أرمله و بتجري على ولادك ربنا يعينك وهيعينك أكيد بشرط واحد ( يكون على لسانك
دايما كلمات الرضا و الحمد ), أمي اترملت و عمرها 30 سنه و عندها 6 عيال فوق راس بعض
و معاش يادوب يأكلنا عيش حاف , و هدوم بتتغسل في طشت نحاس , يعني مفيش غساله ولا حتى
فيه تلاجه و الأكل يتعمل على كانون أو في فرن أو بالكتير على وابور جاز ,علمتنا كلنا
و دخلتنا الجامعه و عاشت و ماتت من غير ماتقول انا سترونج اندبندانت ولا تلعن الظروف
والعيشه .
.............................................................................................................
Mohamed
Hussein
19
سبتمبر 2018·
سنة 2018
أحمد : انا ساكن
في التجمع , و انت ؟
حسنين : انا حضرتك
ساكن في الحلميه
أحمد : الحلميه
!! الله يكون في عونك , المناطق الشعبيه دي بتبقى العيشه فيها صعبه أوي
.
سنة 2022
حازم : أنا ساكن
في العاصمه الإداريه الجديده , و انت ؟
أحمد : انا حضرتك
ساكن في التجمع .
حازم : التجمع
!! , الله يكون في عونك , المناطق الشعبيه دي بتبقى العيشه فيها صعبه أوي .
..............................................................................................................
Mohamed
Hussein
19
سبتمبر 2018·
قمة الحماقه و
النطاعه إن حد يقف قدام خبر وفاة شخص ما , فنان أو أديب أو عالم و يسأل نفسه الأول
هو كان مسلم ولا مسيحي ؟ ماهو عشان لو مسلم نقول ربنا يرحمه و لو مسيحي أو ديانه اخرى
نبدّع بقى و نقول , عليه من الله مايستحق , هلك فلان .
.
بص يا حبيبي ,
الحكايه ملهاش أي علاقه بتدين ولا بعقيده ولا بطيخ , الحكايه باختصار اسمها عنصريه
, إنت كائن عنصري نطع ليس إلا , مش بني أدم متدين ولا حاجه , و العنصريه هي العنصريه
, عنصريه أبيض تجاه الأسود , عنصريه رجل تجاه امرأه , عنصرية واحد اتولد و عاش في القاهره
ضد واحد فلاح أو صعيدي , عنصرية مسلم ضد غير مسلم , عنصرية مسلم سني ضد مسلم شيعي
, عنصرية مسلم سني إخوانجي ضد مسلم سني مش اخوانجي و تفضل الدايره تصغر و تصغر و تصغر
لحد مالكائن النطع يعتقد إن مفيش حد يستحق الرحمه و هيدخل الجنه غيره هو و أبوه و أمه
و اتنين من خالاته .
.
عنصريه يا مولانا
يعني عقول أضيق من خرم الإبره , الجهل و التجهيل و الوهابيه و الفكر الإخوانجي الضاني
و مئات من شرايط الكاسيت و كتب بير السلم و خطب البهايم , الحاجات دي حولت دماغ معاليك
لمجرد صفيحة زباله , فيها أشكال و احجام و انواع كتير , بس في النهايه كلها زباله
.
.
رحم الله الفنان
الجميل المبدع جميل راتب .
......................................................................................................
Mohamed
Hussein
18
سبتمبر 2018·
-
صلاح لعب واحده من أسوأ مبارياته من سنين , حتى باصاته كانت مش مظبوطه و منها باصه
اتسببت في هدف التعادل لباريس سان جيرمان و كان الماتش هيخرج تعادل ( و يشيلوه الليله
) لولا فيرمينو اللي جاب جون في أخر دقيقه .
.
- الواد ذهنه شارد
تماما , فيه حاجه مش مظبوطه من أول الموسم , السنغالي ساديو ماني بيغير منه فعلا و
بيتعمد يلعب مع نفسه , بس الحكايه مش غيره بس , و مش ساديو ماني بس , فيه أكتر من لاعب
في الفريق, و انا مابقيتش أستبعد حكاية الفلوس , أه وارد جدا يكون بيندفع ملايين الدولارات
للاعبين في ليفربول , و صلاح يكون عارف و حاسس , و ده اللي مخلي ذهنه شارد .
.
أه يابني أنا في
الحاله دي هبقى مؤمن تماما بنظرية المؤامره , طب ليه مؤامره ؟ عشان فيه جهات و دول
و دويلات بنت وسخه بيوجعها و هيوجعها أوي إنه يكون عندنا في مصر لاعب عالمي بيتحط في
الصف الأول لأحسن 3 لاعبين في العالم , أه القدوه و الحاله دي بترعب ولاد الوسخه ,
أه صلاح مابقاش مجرد لاعب كوره حريف أوي أو مشهور أوي , هو تخطى المرحله دي و وصل لمرحله
مفيش لاعب عربي هيوصل لها تاني ولا بعد مليون سنه .
.
- طب ايه الحل
؟ الحل مننا هو الدعاء , مانملكش غير كده , و من صلاح التركيز التام في الملعب و يتخلى
عن العواطف , و يعرف إنه مطلوب منه يبذل مجهود مضاعف السنادي عشان يفضل في قمة نجوم
العالم .
....................................................................................................................
Mohamed
Hussein
18
سبتمبر 2018·
من أهم الحاجات
اللي بنحطها في اعتبارنا لما نيجي نقيم رئيس و حكومه , مش بس انجازاتهم و اخفاقاتهم
, إنما كمان الظروف اللي بيشتغلو فيها, و حجم و شكل القماشه اللي في إيدهم , قماشة
الإمكانيات المتاحه و قماشة المشاكل المتراكمه و قماشة الهيكل الإداري للدوله ( التركه
) .
.
نقطه كمان مهمه
أوي في التقييم , ممكن نسمّيها ( الجانب الأخر من النهر ) , الناحيه االتانيه اللي
فيها معارضين الرئيس و الحكومه , ممكن نقيمهم بشكل بسيط و بدون مبالغه ولا أفوره ولا
تحجيم و تقزيم , هقولك يا سيدي :
.
- واحد سافر بريطانيا
و عمل لقاء مع ال bbc اللي بتديرها المخابرات البريطانيه
اللي هي أصل الشرور و الخراب في العالم ( و هو عارف طبعا ) , و طول اللقاء يلعن و يسب
في الدوله الفاشيه والنظام القمعي اللي بياكل دراع العيال الصغيره , الواحد ده سافر
من مطار القاهره و رجع من مطار القاهره و نام في بيتهم , لا حد قاله رايح فين ولا جاي
منين , هي دي كده يبقى اسمها دوله فاشيه ولا الشخص ده يبقى مجرد هجاص و فنجري بؤ ؟!
.
.
- واحد اترشح لانتخابات
الرئاسه و ماعرفش يكمل عدد التوكيلات , قام طلع في مؤتمر صحفي و قال برضه الدوله الفاشيه
و المناخ الغير ديموقراطي و الشبوره المائيه , هو ده ينفع يكون رئيس دوله ولا هو مجرد
هجاص و فنجري بؤ ؟ .
.
- واحد كان بيشتغل
في مركز مرموق في الدوله و عمل تقرير عن الفساد, يقوم يروح بالتقرير ده للإعلام و القنوات
الفضائيه ولا التقارير بتتقدم للجهات السياديه ؟ ده واحد يعرف الفرق بين الدوله والطابونه
؟ مناضل ده ولا فنجري بؤ ؟ .
.
- واحد يبقى شايف
دولته بتحارب إرهاب من سنين , و توابيت رايحه و توابيت جايه , و شهداء بالمئات , و
أمهات ثكالى , و ديابه ولاد كلب بيحاولو يحرقو بلده و يوقعوها يقوم يقول نتصالح معاهم
, يعني نحاربهم في سينا و الصحراء الغربيه و نصالحهم في القاهره؟! انت مناضل ولا لامؤاخذه
خواجه ( بلاش الكلمه التانيه ) .
.
- مجموعه لذيذه
أخر فيصل بقالهم 5 سنين يا مولانا بيألفو كل يوم شوية إشاعات و بعدين ينشروها و بعدين
يصدقوها و بعدين يعملو عليها كوميكس و ملوخيه و شوربة لسان عصفور , المجموعه دي ينفع
تدير كشك سجاير و لّا اخرهم يتشألبو في إزازتين بيره و شوية كوميكس و هاشتاجات ؟!
.
.
عايز أقول لحضراتكو
في النهايه , لو عبد الفتاح السيسي ماعملش المشاريع اللي عملها ولا البنيه التحتيه
ولا خرج بمصر لبر الأمان , لو الراجل ده راح كل يوم الصبح قصر الرئاسه و جاب سامح شكري
و كامل الوزير و رئيس الوزرا و قعدو يلعبو طاوله و يقزقزو لب و سوداني , برضه هنتخبه
و هدعمه عشان ببساطه شديده الجانب الأخر من النهر فيه قطيع من المعيز لا يصلحو حتى
كماسحي أحذيه (مع كل و كامل احترامي للشرفاء ماسحي الأحذيه ) .
.............................................................................................................
Mohamed
Hussein
17
سبتمبر 2018·
خالد أبو النجا
متمسك أوي بالدفاع عن الشواذ , اللي هما الخواجات يعني , مش بس كده , ده بيفنّد كمان
و يفتكس ويشرح الأسباب و الحيثيات بتاعة الكائن الشاذ الكيوت الجميل , و أخر ما توصل
إليه علمه الغزير هو إن المثليه الجنسيه دي حاجه طبيعيه خالص مفهاش اختيار , و مفهاش
حتى اضطراب نفسي و بالتالي تبقى مش حرام , وإن الإنسان بيتولد كده زي مابيتولد أشقر
أو بُحلقي
.
يعني يا مولانا
لو واحد ربنا رزقه ب 5 عيال يقول انا عندي عيل أشقر و عيل قصير و عيل خو* و عيل مش
خو* و بنت بتحب زميلتها في الجامعه بس مش عارفه تفتح معاها الموضوع إزاي ؟!
.
تصدقو بقى إن كل
الكلام اللي فوق ده ماوقفنيش ولا اهتميت بيه قد ماهتميت بالجمله الأخيره في نظرية مولانا
خالد أبو النجا , الجمله اللي بتقول فيما معناه ( حاولو تقرو شويه عشان تعرفو تكوّنو
رأي ) .
.
و هنا مربط الفرس
أو مربط الجحش , أهو مربط و السلام , ماهي أصل الحدوته بتقول إن أغلب الشريحه اللي
بيسمو نفسهم نخبجيه في مصر , في كل المجالات , الفنيه و الأدبيه و المنفلوطيه , أغلبهم
يستحق نوط الحموريه من الدرجه الأولى , و دايما والله بشوفهم في المشهد ده , مشهد الحمار
اللي واثق من نفسه جدا و من علمه الغزير و من ألمعيته و متخيل طبعا انه سابق كوكب الأرض
بمليون فدان ( مع كامل اعتذاري للحمير ) .
.
المشهد بشوفه بصوره
كاريكاتيريه كوميديه جدا , تخيل حضرتك مثلا , أينشتاين قاعد على كرسي خشب قديم و فيه
حمار قاعد في وشه , الحمار رافع رجليه الاتنين اللي قدام , واحده منهم ساند بيها راسه
( باعتبار انه عميق و بيفكر و كده ) و التانيه بيطبطب بيها على كتف أينشتاين ( يربت
على كتفه ) و يقوله : يا أينشتاين انت محتاج تقرا شويه و تتعلم عشان تعرف تكون رأي
!! .
.
عزيزي خالد أبو
النجا , ولا أقولك مش عزيزي ولا نيله , حد الله بينا و بينا الحرام , أنا بس مش عارف
أجيب لك الموضوع ده إزاي , ولا عارف أجيبهولك فين .
.
طب دلوأتي يا فناننا
الجميل الواحد لو فات على خرابه و لقى عيلين في وضع اللامؤاخذه المفروض يشجعهم و يجيب
لهم اتنين لمون لأنهم بيمارسو حقهم الشرعي الحلال الديموقراطي و بيعبرو عن رأيهم بطريقه
مختلفه ؟ و لو عقلي ماستوعبش المشهد ده المفروض أروح اقرا كتب كتير عشان أبقى قاري
و مثقف و مضطلع و مستوعب الأشياء ؟روح يا شيخ , الله يحرقك بجاز في يوم تكون المايه
قاطعه فيه أو يكون فيه مايه بس مفيش حد جنبك عشان يطفّي نارك !! .
.........................................................................................................
Mohamed
Hussein
17
سبتمبر 2018·
من 5 سنين بس كان
أشد المتفائلين مايقدرش يأكد إننا هنعدّي من مرحلة الطوفان دي , أنا نفسي كنت بكتب
عن الأمل و التفاؤل بس جوايا خوف , مش خوف من إننا نعدي إنما كان السؤال اللي في ذهني
باستمرار هنعدّي إزاي و بخساير حجمها إيه ؟
.
من 5 سنين كان
الاحتياطي النقدي وصل لرقم حرج جدا , و كنا دوله أوشكت على إعلان إفلاسها , و إرهاب
في كل شبر في سينا و على طول حدودنا الغربيه ( بطول 1200 كيلو ) , و حدود بنأمنها من
جانب واحد عشان الجانب التاني مش موجود , و فساد و إرهابيين و هبدجيه عايشين وسطينا
, و حرب اقتصاديه و ضرب متعمد للسياحه و مفيش استثمار ولا إنتاج و نص الكره الأرضيه
حاطننا في دماغه , يعني كنا في ظروف تكفي لإسقاط قاره بحالها .
.
في الأوقات اللي
زي أوقات الطوفان دي بيبقى مجرد الوصول بالسفينه للشط إنجاز عظيم , حتى لو وصلت السفينه
و فيها اصابات كبيره , الأعظم إنك توصل بالسفينه سليمه , والأعظم و أجمل إنك تعمل فيها
شوية تحديثات في طريق الوصول .
.
مصر في نهاية
2018 فين بالظبط اقتصاديا و أمنيا و سياسيا ؟ بقينا عالشط أكيد , رغم ان الحرب لسه
مانتهتش ( و عمرها ما هتنتهي و تبقى صفر ) , بس فرق شاسع بين سفينه بتحارب وسط الطوفان
و سفينه بتحارب وهي عالشط , عالشط تبقى الكوره في ملعبك انت , و اللي كسر كوبايه في
ال 5 سنين هيدفع تمنها .
...................................................................................................................
Mohamed
Hussein
16
سبتمبر 2018·
حكاية أول ألشه
في حياتي ............ أيام ماكان لنا طعم و لون و هويه
.
كنت في تانيه اعدادي
, يعني 14 سنه تقريبا , عندنا في الفلاحين الوجبه الرئيسيه هي العشا مش الغدا , و وقتها
بيكون بعد صلاة المغرب .
.
رجعت من الجامع
بعد ماصليت المغرب و النور قاطع ( كان بيقطع أكتر ما بييجي ) , و أمي الله يرحمها فرشت
الحصيره و جهزت العشا عالصينيه , و جنب منها لمبة جاز عشان نشوف و احنا بناكل .
.
قعدنا كلنا و اتلمينا
, أنا شايف قدامي لحوقي كبير ( طاجن ) مليان رز , و جنب منه طبق فيه شوية لفت مخللين
و بس كده , كلت معلقه و اتنين و تلاته , و بعدين سألت أمي , هو انتي طابخه ايه يامّه
؟ قالت لي رز كشري ( الكشري في الفلاحين يبقى رز و عدس بس و انا عارف أمي عملت ايه
بالظبط , الرز موجود في البيت و مرطرط لأننا بنزرعه بس العدس بنشتريه , كان كيلو العدس
ب 3 جنيه وقتها و أمي متعوده تجيب ربع كيلو ب 75 قرش عشان طبخة الرز الكشري دي , و
يبدو انها لقت العدس غلي شويه و جابت تُمن عدس مش ربع , و حطته على بتاع 5 كيلو رز
فطبعا الكام حباية عدس تاهو في قلب الحله و هي بتنطبخ )
.
المهم أمي قالت
طابخين رز كشري يا محمد , وانا مش شايف حاجه من اللمبه الجاز و لا حاسس بطعم العدس
, قمت ضحكت و قلت لها طب مش كنتي تجيبي ورقه صغيره و تكتبي عليها رز كشري و تلزقيها
في جنب اللحوقي كداهو عشان نبقى عارفين ؟ أمي مابتعرفش تكتب بس فهمت , قالت انت مابتحمدش
ربنا ليه ؟ قلت لها يامه الحمد لله إنما لو جيتي للحق ده مش رز كشري , ده رز أبيض ساده
بس بيستعبط .
.
و دي كانت من المرات
القليله أوي اللي شوفت فيها أبويا الله يرحمه و هو بيضحك من قلبه .
...........................................................................................................................
Mohamed
Hussein
15
سبتمبر 2018·
-
حبسنا مبارك و قعد يتحاكم سنين
- جبنا ولاده يتحاكمو
في قضية التلاعب بالبورصه .
- بنحاكم مرسي
و قيادات الجماعه الأرهابيه
- فيه 3 قضاه بيتحاكمو
و رجال أعمال مليارديرات .
- جبنا وزرا و
مسئولين ( اختارناهم بنفسنا ) و بعد شوية فكرو يلعبو بديلهم و يتربحو من مناصبهم قمنا
وقّفنا البوكس تحت مبنى الوزاره و قلنالهم انزلو محتاجينكو في موضوع كده .
.
السؤال بقى , هو
الراجل عبد الفتاح السيسي ده ممكن يكون عليه فواتير لمين ؟!! .
...........................................................................................................
Mohamed
Hussein
14
سبتمبر 2018·
إنت زعلان ليه
يا حبيبي ؟
- عشان هيعملو
سور خرساني على كورنيش اسكندريه بطول الكورنيش , هيعزلو اسكندريه , هيسجنو السمك ,
هيمنعو الرؤيه , هيحبسو الموج الأزرق في الزنازين .
أها جميل , وانت
يا حبيبي زعلان ليه ؟
- عشان حضرتك هيعملو
سور خرساني عملاق حوالين العاصمه الإداريه الجديده .
.
عارفين يا ولاد
, انتو صعبانين عليا و مقدر شعوركو جدا , عشان كده مش عايز أقول لكو عالتقيله .
- هو فيه أتقل
من كده ؟
.
اه طبعا بس خايف
على أعصابكو يحصل لها حاجه أو يجيلكو بواسير و كساح بإذن واحد أحد .
لا قول بسرعه
, هينيلو ايه تاني ؟
.
بصو من الأخر
, انا سمعت طراطيش كلام من مصادر مؤكده قريبه من مصادر وثيقة الصله إن مصادر رفضت الكشف
عن إسمها بتقول إن السيسي ناوي يشبك السورين في بعض .
- يعني ايه الكلام
ده ؟
.
يعني يا حبيبي
هنوصّل السور اللي عملناه حوالين العاصمه الإداريه الجديده بالسور اللي عملناه بامتداد
الكورنيش بتاع اسكندريه , و بكده يبقى عزلنا الشمال الغربي لمصر عن الشمال الجنوبي
الخماسيني .
- و ليه يعمل كده
؟ هو بيعمل فينا كده ليه ؟ ايه الفايده ؟
.
لا يا حبيبي الموضوع
ده هيبقى له فايده عظيمه جدا
- هي ايه ؟
.
الفايده كلها هتكون
في مصلحة الصراصير و الفيران , يعني في مصلحتكو
- إزاي يافندم
؟
.
الغرض من شبك السورين
في بعض إن لو فيه قطيع من الصراصير و الفيران زي حالاتكو كده حب إنه يسافر من عند العاصمه
الإداريه لأخر نقطه في كورنيش اسكندريه يقوم يمشي على السور ده من فوق طول الطريق
, و بكده يضمن إنه مش هينداس تحت عجلة عربيه ولا تحت جزمه مقاس 46 ولا هيقع في بلّاعه
.
- واضح إن حضرتك
بتسرح بينا و عايز تشلّنا , صح ؟
.
أه دي حقيقه فعلا
, بس عرفتو إزاي ؟
- عشان اصلا مفيش
سور اتعمل ولا هيتعمل حوالين العاصمه الاداريه ولا فيه سور بيتعمل بطول كورنيس اسكندريه
, يبقى ازاي السيسي هيشبكهم ببعض و هما أصلا مش موجودين ؟
.
و لما هما مش موجودين
بتقرفو اللي خلفونا ليه يا ولاد الصرمه ؟!
................................................................................................................
ليست هناك تعليقات:
إرسال تعليق