( محمد حسين - منوع ) ( 15 سبتمبر 2018 )

Mohamed Hussein

15 سبتمبر 2018·

هي الناس عايزه حلول و تفكير ولا الحكايه نهيق حمير ؟!

.

- أول خطوتين في عرض أي مشكله في الدنيا هما إنك تعرضهم بشكل صح و بشكل عادل , يعني من غير أفوره و صور فوتوشوب و كمان تشاور بصباعك على أصل المشكله و أولها و بدايتها و تسلسلها .

.

- لو ماعرضتش المشكله بالشكل المنطقي العقلاني ده تبقى مش عايز حلول ولا عايز تفكر , تبقى بتنهق وبس , و إن أبغض الأصوات لصوت الحمير .

.

- اسكندريه مشاكلها كتير اوي و متراكمه من سنين طويله , من أول المباني المخالفه ( فساد المحليات ) لحد تشويه الكورنيش لحد مشكلة الزباله .

.

- الشكوى من منظر الكورنيش منطقيه جدا , منطقى لما يكون عندك بحر بجمال بحر اسكندريه تحاول تسيبه على طبيعته اللي خلقها ربنا واللي صورها في أجمل صوره , طب فيه نوادي تبع نقابات و فيه و فيه , ممكن الحكايه تتعمل بشكل جميل , شواطئ و نوادي يتعمل فيها شماسي و مفيش مباني خرسانيه مرتفعه , يعني لو هيتعمل مبنى يبقى منخفض جدا بحيث مايحجبش رؤية اللي ماشي بعربيته عالكورنيش , يتعمل دور واحد بس و بشكل جمالي و يكون ارتفاعه مايحجبش الرؤيه ..ده بصفه عامه لأي حاجه تتعمل على كورنيش اسكندريه .

.

- طب الصوره المتداوله بتاعة ايه ؟ لا مش هيعملو سور بطول الكورنيش ولا هيحبسو السمك لا جدار عازل ولا بطيخ , ده جزء من مبنى يقال انه تجديد لنادي تبع القوات المسلحه و يقال إنه مشروع ملاهي مائيه , في الحاله الأولى مرفوض المبنى بس يترفض عالكل و تزال أي مباني مرتفعه بتحجب الرؤيه ( هنقدر عالتكلفه الماديه لكده ؟ ) و لو ملاهي مائيه يبقى مشروع معقول أوي .

.

- فكرة حجب الرؤيه و فكرة ان الكتل الخرسانه نلاقيها في وشنا في كل حته هي فكره كريهه لأي حد , و ده بصفه عامه و في كل مدن مصر .

.

- القاهره تحديدا محتاجه تتنفس , أه تتنفس , اللي هيطلع من حضراتكو على كوبري اكتوبر هيشوف في نص الكوبري بالظبط مبنى ماسبيرو و منطقه فاضيه كبيره اللي هي مثلث ماسبيرو اللي كان عشوائيات و اتشالت و نضفت , سمعت ان المكان ده هيتعمل فيه أعلى برج في أفريقيا , ماشي معقول ,وممكن يتقسم نصين , برج سكني عملاق و الباقي جناين ( منطقه خضره ) , متنفس جديد في وسط البلد .

.

- بعد شويه و على نفس كوبري اكتوبر هتشوف مباني قديمه متهالكه و غير مسكونه ,مش لاقي أي منطق لوجودها لحد دلوأتي , مباني ماتسواش تلاته تعريفه في منطقه سعر الأرض فيها بعشرات الملايين !! , طب المباني دي تتهد بأمر الدوله و أصحابها ياخدو تمن الأرض بسعر السوق , و مستثمر يدفع و ياخد نص الأرض يعمل عليها أبراج سكنيه بشكل محترم و النص التاني يتعمل مسطحات خضره , متنفس برضه ( فكره مش هتكلف الدوله مليم واحد ) .

.

- الحكايه بتقول إن القبح هو القبح , قبح حجب منظر بحر , زي قبح وجود مباني شكلها سئ جدا في منطقه حيويه بيمشي عليها المصريين و العرب و الأجانب ( كوبري اكتوبر ) , زي قبح ان القاهره تتحول لكتله خرسانيه صماء من غير متنفس .

.

- هكون أسعد واحد في الدنيا لما الناس تعرض المشاكل بالشكل ده , أصل المشكله و حجمها , و حلول بسيطه مقترحه , من غير هري ولا هبد ولا نهيق