Mohamed
Hussein
24 مارس 2017
موافق تماما على
زيادة سعر تذكرة المترو من جنيه ل 2 جنيه , مش عشان أنا عندي عربيه ولا معناها اني
مابحسش بالناس البسيطه , شغل الدروشه و الهطل و البؤين الحمضانين دول مش بيأثرو فيا
, مفيش عقل ولا منطق بيقول ان تذكرة المترو من عشرين سنه تبقى بجنيه و النهارده ( يعني
بعد 20 سنه ) بجنيه برضه , مفيش عقل ولا منطق بيقول ان مترو الأنفاق اللي بيستخدمه
ملايين البشر يوميا ييجي أخر السنه و يكون مديون و خسران وبيكح تراب و مش عارف يسدد
حتى فواتير الكهربا بتاعته , و في النهايه يتحول ل عبء على ميزانية الدوله و يحتاج
دعم من الميزانيه اللي هي برضه بتكح تراب , و نبقى احنا مبسوطين و فرحانين و بنضحك
عشان التذكره بجنيه , بس مش عارفين احنا بنضحك على حاجه صح ولا بنضحك على نفسنا .
.................................................................................................................
Mohamed
Hussein
24 مارس 2017
من سنين وانا بقول
ان مفيش حاجه اسمها ( إعادة أموال مصر المهربه ) , و إن أي حد يقول للناس إنه هيعرف
يرجع الفلوس دي يبقى بينصب عليهم و بيبيع لهم الوهم و يعبّي لهم الهوا في أزايز , و
إن الأرقام المتداوله مش حقيقيه ( الله اعلم الحقيقه فين )
.
الحدوته أصلها
قصة عقل و حسبة بسيطه , اللي معاه 5 مليون جنيه بس بيعرف يجيب محاسبين و مديرين ماليين
يخفو فلوسه بطريقه الجن الأزرق مايعرفش يوصل لها , ما بالكو باللي عنده مليارات .
.
الناس البسيطه
فاهمه ان محمد حسين اللي هو انا لو عنده مليار جنيه من طرق غير مشروعه ( أو مشبوهه
) هيروح بنك في أوروبا و يدخل عليهم يقولهم سلامو عليكو , عليكو السلام و النبي عايز
أحط الفلوس دي عندكو بس أوعو تقولو لحد , يقومو يقولو له اطلع لأبله إليزابيث في الدور
التالت بس صور البطاقه وش و ضهر فيقوم يطلع محمد بعد ما يصور البطاقه في الكشك اللي
قدام البنك و يقابل أبله إليزابيث و يديها زكيبه الفلوس تقوم تقوله اسمك الرباعي كذا
و بيتكتب بالإنجليزي كذا ؟ يقولها أيوه يا أبله مظبوط , طب وقّع هنا و هنا و هنا و
هنا و هنا بس حاول تبقى توقيعاتك كلها زي بعض و هات تليفون خالك رمضان عشان لو حصل
حاجه و مارديتش علينا نبقى نكلم خالك .
.
من زمان و انا
بقول الحدوته دي ماتستاهلش وفود رايحه و وفود جايه و ان تكلفة سفر الوفود و إقامتهم
هندفعها احنا من لحم الحي ( دي ملايين بتتصرف ) , و في الوقت اللي كانو الناس الطيبين
قاعدين يحسبو فلوس مصر المهربه و يقسمو الرقم على 90 مليون و يشوفو بقى كل واحد هيطلع
له كام و بعد ما يخلصو الحسبه يفكرو هيصرفو الفلوس في ايه ؟ يشترو تلاجه جديده بالقسط
ولا يجيبو كسوة الشتا ولا يعملو صيانه للعربيه , كنت أنا في الوقت ده بدعي على ولاد
الحرام , مش بس اللي سرقو فلوس البلد , إنما كمان ولاد الحرام اللي ضحكو عالناس و خلوهم
يتشعلقو في حبال الهوى الدايبه .
ليست هناك تعليقات:
إرسال تعليق