Mohamed
Hussein
11 مارس 2017
شاب ماعرفوش واقف
قدام الصيدليه بيتكلم في الموبايل , بيكلم أخت مراته , هتسألوني عرفت ازاي ؟ اصبرو
عليا مانا جايلكو في الكلام أهو
.
المهم المكالمه
استمرت بتاع ساعه ونص ولا كأنها ماتش كوره على شوطين , و التون فيها يعلى و ينزل ,
الشاب فضل يتكلم و يشرح و ينفعل و يهدى و يقول بقى , من أول ماتعرف على اختها و من
أيام الخطوبه واللي حصل بعد الجواز , و اسألي اختك عملت ايه لما أمي جت زارتنا و لا
اسأليها لما روحنا العين السخنه , باختصار حكالها كل حاجه , مش لها هي بس , و ليا أنا
كمان و للشارع كله و لأم حماصه مرات البواب , طب والله انا كنت خلاص على وشك أروح أحضنه
و اقوله استهدى بالله يابني , يوسف و ساره مالهمش ذنب يتشردو بسببكو , و بعدين مانت
اللي عودتها تاخد أكتر من حقها من الأول , هو عشان بتحبها يعني تفرّط في حقوقك كده
؟ انت اللي غلطان يا جدع .
.
.
ههههههههههه يا
حبيبي مخابرات امريكيه و بريطانيه ايه بس اللي يعملو برامج عشان يراقبونا و يتجسسو
علينا ؟! , داحنا شعب معجزه بكل المقاييس , قابل انت أي واحد مصري في الشارع ماتعرفوش
ولا عمرك شوفته قبل كده , و قوله ( مالك , شكلك متغير و وشك مش عاجبني ؟ ) على طول
هتلاقيه بيقولك ( هحكي لك , مانت مش غريب ) .
ليست هناك تعليقات:
إرسال تعليق