( محمد حسين - منوع ) 12 يناير 2017

Mohamed Hussein

12 يناير 2017

هدير , سينجل ماذر ........... أه يا خاطيه (حكاية مجتمع مشوه ) .

.

- لا أدعّي التدين و إني مقطع حصر الجامع , و لا أدّعي الانحلال و إني خاربها مداين و كل يوم يجيبوني سكران طينه من خمارة عم ميشيل .

.

- هدير بنت اتعرفت على شاب و حبته و حصل بينهم علاقه جنسيه كامله ( اسمها زنا ) عشان نحط الحاجات في مسميتها الصحيحه , و كمان بقت حامل , طب هي المشكله في الجريمه نفسها و الكبيره اللي اسمها الزنا ؟ ولا المشكله انها بقت حامل ؟ .

.

- الشاب الأمور اللي عمل كده و قال لها مش هتجوزك ولا هعترف بالبيبي , الشاب ده لو عرفناه و قابلناه في الشوارع هنقول عليه دكر , جدع يا وله يا دكر انت يا حليوه !! , مع انه ارتكب نفس الجريمه و الكبيره ( الزنا ) و ارتكب جرم تاني اسمه النداله و الوطينه .

.

- طب هدير بقت حامل ( ربنا يستر على بناتنا و زوجاتنا و اخواتنا و حضراتكو جميعا ) , تعمل ايه بقى ؟ تجهض نفسها و تقتل الجنين و ممكن تموت هي كمان في نفس اللحظه ؟ هنا المشكله أو المعضله الأكبر , الجريمه و الكبيره حصلت و اللي كان كان ( الزنا ) , الحمل من توابعها , تتعامل ازاي معاه ؟ ترتكب جريمة جديده بالعمد اسمها قتل النفس ؟ الأرواح , هي و جنينها ؟ كل يوم بقرا اخبار عن حوادث بشعه , أمهات بيرمو أطفالهم اللي جايين من سفاح جنب مقالب الزباله و غالبا بيموتو , أمهات يموتو وهما بيجهضو نفسهم , ست تنط من الدور الرابع و تموت عشان خايفه من الفضيحه !! .

.

- طب و بعدين ؟ و أخرتها , البنت هدير دي لو اتقفشت و هي بترمي قنبله على جنود مصريين أو على مول مليان أطفال و قتلتهم هتتحاكم بس مش هتتفضح كده , لو هدير كانت موظفه دوله و سرقت ملايين من قوت الغلابه هتتحاكم بس مش هتتفضح كده , لو هدير كانت طبيبه بتتاجر في الأعضاء البشريه هتتحاكم بس مش هتتفضح كده , لو هدير كانت ظابط شرطه بيعذب متهم لحد مايموت , هتتحاكم بس مش هتتفضح كده .

.

- هو انا عايز أقول ايه ؟ عايز أقول كلنا عيوب و أخطاء و بلاوي و جرائم و كباير , سرقه و قتل و كدب و تزييف و شهادة زور و رشاوي و عقوق والدين و إرهاب و غيبه و قذف محصنات ,  , يعني أشكال و ألوان , بلاش والنبي نمسك في لون و نتشعلق أوي .