Mohamed
Hussein
11 يناير 2017
عندنا في مصر ترسانة
قوانين باليه و معشش فيها العنكبوت , في كل المجالات , المحاكم و الاستثمار و الشهر
العقاري و الجهاز الإداري للدوله , قوانين موجوده من قبل عصر الكوره الشراب بزمن طويل
, قوانين حضرت الحرب العالميه الأولى و التانيه و انهيار الإتحاد السوفيتي , و حضرت
كمان أيام ماكان عبد الحليم حافظ بيبوس ناديه لطفي في أبي فوق الشجره , و أيام ماكان
الديك بيبيض 3 بيضات في اليوم و الفرخه بتولد , و اللي بيروح يحج يرجع يلاقي ولاده
داهنين حيطة البيت من بره و راسمين عليها جمل و نخله و سفينه و كاتبين ألف مبروك يا
حاج .
.
مش عارف ليه اصرار
الحكومات المتعاقبه على وجود العنكبوت و الكوره الشراب و النخله و الديك اللي بيبيض
و جورباتشوف و شفايف ناديه لطفي في أدراجنا
لحد النهارده ؟ هل مثلا بيعتبروه فولكلور جميل و حاجه أثريه فيها ريحة مصر ؟ طب ماهي
تاهت و لقيناها.
.
احنا نعمل متحف كبير و نسميه متحف القوانين الباليه و
نقعّد فيه كام موظف من اياهم و جنب منهم فرخ الكربون و القلم الفرنساوي و شيخ الحاره
و الختم و الدرج المفتوح , و كل واحد يزور المتحف ده يقابله الموظف و يقوله هات لي
شهادة من اتنين موظفين راتبهم اكتر من 6 جنيه بإنك على قيد الحياه و كل سنه و انت طيب
!! , و نفرح كلنا بقى و نتصور سيلفي مع السيد الموظف اللي بيسيب شغله و يروح يعزّي
في خاله عبد ربه كل يوم تلات , الله يرحمه
و يدّيله الصحه .
.
و المدارس تعمل رحلات للطلبه بجدول زمني , يوم جنينة
الحيوانات و يوم الأهرامات و يوم متحف القوانين الباليه , بابا المدرسه عامله رحلة
لمتحف القوانين الباليه أروح ولا ايه ؟ روح يابني بس خد معاك 20 جنيه خمسات , تحطهم
في جيبك و انت داخل و لما تيجي طالع دوّر في جيوبك كويس , لو مالقيتش ال 20 جنيه اعرف
انك دخلت المكان الصح و ماتوهتش في العنوان .
......................................................................................................................
Mohamed
Hussein
11 يناير 2017
عندي صديقه لذيذه
أوي أخر 7 حاجات , شويه تحط صورة حلب تحترق و شويه صورة البرادعي و شوية صورة خروف
من كبار الخرفان , يعني تقدرو تقولو إنها نص كولجي على نص ضاني على ربع بسطرمه .
.
الغريب بقى إني
لقيت بيني و بينها 500 صديق مشترك !! , منهم 50 بالكتير بني أدمين زينا كده و الباقي
من نفس نوعيتها , اللي هي نص و نص و ربع بسطرمه .
.
طبعا لو حكيت لحضراتكو
عن مواقفها السياسيه و أرائها و افتكاساتها هنضطر كلنا نلبس جزمه طرنبه ( الستات الشيك
بيقولو عليها بوت ) , و ننزل نلغوص كلنا في أفكارها العميقه قصدي في المعجنه دي .
.
طب المفروض بقى
إني اعملها بلوك و أريح دماغي صح ؟ لا و الله ( بصوت السيسي ) , ماعملتش كده , طب ليه
؟ عشان انا غاوي مثلا كل شويه ألبس جزمه طرنبه و انزل ألغوص في المعجنه ؟ لا خالص
, اومال ايه الفكره ؟ .
.
الفكره اني قلت
في نفسي دي زبونه لقطه , أكتر من 400 صديق من النوع بتاعها موجودين في صفحتي و متنكرين
( بقايا الحمّام القديم ) , طب تمام , اعمل ايه بقى ؟ بتجيلي طلبات صداقه كتير من ناس
محترمه و رسايل من ناس بتطلب الصداقه , و العدد بيكون كامل و عايز أحذف حد أقوم أدخل
قايمه الأصدقاء عندي و اتلخبط و احتار و عيني توجعني , بس خلاص تاهت و لقيناها , لما
أحب أحذف حد أدخل على صفحة صديقتي دي و افتح الأصدقاء المشتركين , و نقّي و اختار يا
عبد الستار , هذا صيدٌ عظيم و سهل جدا , بحذف ناس بالكبشه و حياتك , لوكشة واحده كده
, خمسه بخمسه .
.
يعني صفحتها بالنسبالي
بقت عامله زي أوضة الكراكيب , كل مافكر أفضي مكان لحد أفتحها و أشيل كام كركوبه , فكره
عظيمه , فكره هايله .
ليست هناك تعليقات:
إرسال تعليق