Mohamed
Hussein
14
يوليو 2016·
عفواً نحن نصنع
أيقونات من أي حاجه , حتى من شواشي الدره , الأيقونات يافندم بنعملها في وقت فراغنا
, بنتسلى يعني أو تقدر تقول نشاط اقتصادي .
إنما الشهاده لله
بقينا في صناعة الأيقونات و التماثيل العجوه فشر يهود قريش في زمانهم .
.
حسام حسن اتسجن
!! , يا خساره عرقك و تعبك عشان خاطر مصر يا حسام , يا خساره البطولات اللي جبتها لمصر
يا حسام , كلنا حسام حسن , الحريه لحسام حسن , بتسجنو حسام حسن يا كفره ؟!
.
يابني هو حسام
حسن اتسجن عشان شاط بلانتي و ضيعه ؟ طب اتسجن عشان انفرد بالجون و شاط الكوره في العارضه
؟ طب اتسجن عشان و هو بيدرّب المصري غلب الأهلى و اتعادل مع الزمالك ؟! يا مولانا حسام
حسن اتسجن عشان اعتدى على مصور بالضرب , صعبه على فهمك الحكايه دي ؟! واحد ضرب واحد
, و المضروب معاه الدليل قام قدم بلاغ , و قام اللي ضرب اتسجن , فين أم المشكله في
كده ؟! .
.
و بعدين اللي انضرب
اتصالح النهارده و حسام حسن طلع من السجن , مش كنت تصبر شويه ؟ يعني ايه الكلام ده
؟ يعني يادوب تلحق تاكل تمثال العجوه اللي صنعته و بتعبد فيه بقالك 3 أيام .
.
الحقيقه حدوته
حسام حسن هي استمرار لمسلسل الهرتله اللي عايشينه من 5 سنين , نجم الكوره (أو نجم السيما
) نجوميته بتشفع له و يبقى ايقونه لو اتسجن ( حتى لو اتقبض عليه في قضية دعاره ) ,
و الناشط السياسي اللي قعد يومين في التحرير ماينفعش يتسجن حتى لو اتقفش بطن حشيش
.
.
هنكبر و نعقل و
نبقى بني أدمين لما نفهم إن مفيش ماده في القانون بتقول إن ماضيك الممتاز و وطنيتك
و تضحيتك في مرحله من المراحل بتشفع لك لو عملت جريمه في المستقبل , و إلا مكانشي فيه
داعي نسجن مبارك , الراجل اللي كان قائد القوات الجويه في حرب اكتوبر
...........................................................................................................................
Mohamed
Hussein
14
يوليو 2016·
العربيه عشان تمشي
في طريق طويل و سريع لازم لها ماكينه قويه و فتيس حالته حلوه و شاسيه متين و فرامل
مشدوده صح و جسم متماسك , ولازم لها كمان عدد 2 فانوس و عدد 1 كالاكس .
.
و الدول زي العربيات
بالظبط , الدوله عشان تمشي في طريق طويل و بسرعه لازم لها مليون ايد بتزرع ( الماكينه
) , و مليون إيد بتصنع ( الفتيس ) , و مليون إيد بتبني ( الجسم المتماسك ) و معارضه
وطنيه حقيقيه واعيه ( الفرامل ) , و لازم لها كمان نفرين يشتغلو في التنظير السياسي
( الفوانيس ) , و نفر واحد يشتغل كاتب صحفي ( الكلاكس ) .
.
اللي حصل في مصر
هو عكس كده تماما , بعد 2011 قولنا هنحط العربيه على أول الطريق و نمشي بقى بسرعه و
نوصل , بس نعملها ازاي دي و احنا حالنا بالشألوب ؟! , عندنا اتنين تلاته بيزرعو و اتنين
تلاته بيبنو و اتنين تلاته بيصنعو ( الماكينه و الفتيس و البودي ) , و 87 مليون بني
ادم بيشتغلو في التنظير السياسي و الكتابه الصحفيه ( يعني 87 مليون فانوس و كلاكس
) .
.
عشان كده المحصله
بتكون عربيه ماشيه بطئ أوي كأنها واقفه مكانها , و طول الوقت فيه أضواء كتير بغباوه
, حاجه تخيل العين , و أصوات و كلاكسات من كل مكان , يعني بهرجه كدابه و كأننا في مولد
أم هاشم .
....................................................................................................................
Mohamed
Hussein
13
يوليو 2016·
-
أنا يا عمي بفهم في كل حاجه , من أول السياسه و الإقتصاد و التحالفات الدوليه و أنظمة
الحكم و التسليح الحديث و الخطط العسكريه و الدساتير و الطيارات و دورة راس المال و
دورة كربس و الدورات الرمضانيه لحد المستكه و الحبهان و الورق اللوري و طريقة صناعة
العسليه و الندّاغه , يعني عريس كامل الأوصاف , مش هتلاقي زيه لبنتك .
.
- أيوه يا ابني
, برضه ماقولتليش انت بتشتغل ايه ؟
.
- سوري نسيت ,
أنا يا عمي بلا فخر عندي أكبر شركة استيراد و تصدير في المنطقه .
.
- أيوه كده يابني
, فرّحت قلبي , بس قولي بتستورد إيه و تصدر إيه ؟ .
.
- أنا سيادتك بستورد
كوله و بصدر طاقه سلبيه و إحباط .
.
- غور ياض من هنا
, يلعن أبو شكلك .
..................................................................................................................
Mohamed
Hussein
13
يوليو 2016·
الست تيريزا ماي
بقت رئيسة وزراء بريطانيا , و الست هيلاري كلينتون هتبقى رئيسة أمريكا , الاتنين ستات
دول هيتحكّمو في تلتين العالم و يحاولو يعملو إقصاء أو ( إخصاء ) للتلت الباقي , و
احنا لسه بنقول صوت المرأه عوره و بنتكلم عن ( ختان ) الإناث .
...........................................................................................................................
Mohamed
Hussein
13 يوليو 2016·
روحت انا و حماتي
السجل المدني نجدد لها البطاقه , دخلنا لقينا زحمه و طابور طويل واقف , طابور الستات
اصغر شويه , أمين الشرطه اللي قاعد في مدخل السجل المدني شاف الورق و سمعني و انا بكلم
حماتي ( إن الدنيا زحمه ) , شاور لي عالموظفه و قالي قول لها معايا ست كبيره و خليها
تاخد ورقك على طول , روحت لها فعلا و خدت الورق , بعد شويه السيستم وقع ( من الزحمه
) , جه نفس أمين الشرطه وقف مع الموظفه و بص في ورق الناس اللي قدامها و فرزه , عشان
اللي ناقصه حاجه يقوله بدل مايقعد و يستنى السيستم عالفاضي , و جه عند ورقة حماتي و
قال للموظفه دخلي ورقها من غير ( بحث عالسيستم ) , دي ست كبيره , و من غير تصوير كمان
, عشان في السن ده التصوير مش مهم ( تبقى نفس الصوره القديمه ) , و بالفعل خلصنا و
مشينا في 10 دقايق , شكرت امين الشرطه و لا طلب رشوه ولا انا اديته رشوه !! .
.
مش كل أمناء الشرطه
بالصوره النمطيه الهمجيه اللي بيتم نشرها و الترويج لها , أما إني أنشر حاجه إيجابيه
حصلت فعلا ف ده مهم جدا , عشان حضرتك نشر السواد و الكأبه و الإحباط هو سلاح قاتل
, سلاح هيخلينا نموت و احنا قاعدين على كراسينا , نموت و نتحلل من غير ما حد يقرب مننا
!! .
.
ممكن القصه اللي
فوق تبقى لذيذه أكتر و تعجب شمامين الكوله و يتم نشرها بعنف لو كتبتها بالشكل ده :
.
روحت انا وحماتي
السجل المدني و الدنيا زحمه و عرق والمراوح مش شغاله ولا تكييفات و الأرض مليانه زباله
و سحالي و تعابين و ديناصورات , أمين الشرطه شال ( العرستين ) اللي كانو قاعدين على
رجليه و خدني على جنب و قالي هات 100 جنيه عشان تمشي و انا اديته 100 جنيه و بعدين
لمحنا واحد كان جايز يخلص ورق و قال دي رشوه و انتو معندكوش ضمير , قام أمين الشرطه
مطلع الطبنجه و ضاربه 37 طلقه في دماغه و بعدين جاب الدبابه من جوه و داس على راسه
رايح جاي , و جه أمين الشرطه زميله و جاب أر بي جيه و خلص عليا كلنا و موتنا , و دخل
جوه جاب جركن بنزين و ولع فينا , استريحت بقى ؟! .
.
كل الشكر لأمين
الشرطه في سجل مدني حي السفارات ( مدينة نصر ) , الراجل ده اللي انا مش عارف اسمه
.
..............................................................................................................
Mohamed
Hussein
12
يوليو 2016·
في كل دول العالم
الديموقرطي و الغير ديموقراطي , المتحضر و المتخلف عقليا , هتلاقي مؤيد و معارض للنظام
الحاكم , بس مابيحصلش في أي دوله إن المعارض يروح يعمل صور فوتوشوب عشان يسخر من مسئول
في بلده ولا معارض بيتريأ على بلده و اسمها و تاريخها , و لا معارض بيسخر من جيش بلده
, مهما بلغت عداوة المعارض ده للنظام الحاكم .
.
الحدوته دي موجوده
في مصر بس و لها ألهه عوالي و خُدّام معبد , و بقى لها مصطلحات لو جمعناها مع بعض ممكن
نعمل كتاب و نسميه ( القول المتين في علم الشمامين ) .
.
طب الظاهره دي
سببها ايه ؟ سببها الربيع اللامؤاخذه العربي , ماسورة الحريه اللي انفجرت في وشنا فجأه
, تحطيم كل شئ بما فيه الثوابت و حيطان البيت و احترام الكبير و الأجيال اللي سبقتنا
, لما بقى جيل الأباء يتقال عليه جيل عبيد و معر*ين , و لما ظهرت تقارير تقول ان أم
كلثوم تقريبا كانت شغاله في الدعاره و ان الملكة كليوباترا كانت ملكة السكس و غالبا
حتشبسوت كانت بتشرب بانجو تحت كوبري الملك الصالح .
.
اللعب على عقول
الشمامين شغال على قدم و ساق , طول 5 سنين , وممكن نقول باختصار إن ده حِمْل كبير و
اتحمل على عود طري , فكانت النتيجه بالظبط زي الجحش اللي تبدأ تحمل عليه حمل كبير و
هو لسه صغير , قوم بمرور السنين يكبر في السن و ملامح وشه تعجّز , بس يفضل جسمه صغير
زي ماهو , بيسموه الجحش العجوز .
.
العقل بتاع شمام
الكوله اللي اتلعب عليه بيفكرني بصورة الجحش العجوز , عقل طري ماستحملش المرحله ولا
ماسورة الحريه , قام عجّز و شاب و هو لسه صغير .
................................................................................................................
Mohamed
Hussein
12
يوليو 2016·
رئيس الوزراء التركي
: نسعى لتطوير علاقاتنا مع مصر و كل دول المنطقه !! .
.
رأيي الشخصي ,
و رغم تفهمي الكامل لحكاية ان السياسه مصالح و مفهاش قطيعه تامه , بس هفضل رافض ل
( التطبيع ) مع تركيا , اه التطبيع مش لاقي لها اسم غير كده , و مفيش فرق عندي بين
تركيا و اسرائيل , و جايز في بعض الأوقات بعتقد ان النظام الحاكم في تركيا حاليا أوسخ
من الصهاينه , إزاي بقى ؟!
.
معنديش شك ان الصهاينه
ورا الخراب اللي حصل في المنطقه في السنين اللي فاتت رغم ظهورهم بمظهر ( الحمل الوديع
) , خطه صهيو امريكيه , وضعها الصهاينه و أشرف على تنفيذها الأمريكان و البريطانيين
, و قام بالتنفيذ الصبيان الصغيرين , تركيا و قطر و حماس و جماعة الإخوان الإرهابيه
....دي الصوره اللي مش هقبل فيها نقاش و اللي مايشوفشي من الغربال يبقى اعمى .
.
وساخة النظام التركي
إنه مارس البلطجه علناً , دعم للجماعات الارهابيه في سوريا و ليبيا و مصر , توريد سلاح
للارهابيين , سرقه بترول سوريا و العراق , إيواء قيادات الجماعه الإرهابيه على أراضيها
و فتح جرايد و قنوات لهم عشان يمارسو التحريض ضد مصر و جيشها , الحدوته دي و بالشكل
القذر ده ماتقدرشي اسرائيل تعملها ( رغم انها العقل المدبر ) .
.
الدبلوماسيه المصريه
اتعاملت مع الملف كله بمبدأ ( المعامله بالمثل ) , مع تركيا كان ردنا واضح , رد في
الوش يناسب البلطجه التركيه , و مع الصهاينه بنتعامل بنفس المكر بتاعهم , السلام البارد
, كل واحد بيستف أوراقه و بيلعب بيها , حدوته السلام بين فلسطين و اسرائيل هي كارت
مصري بتلعب بيه مش اكتر , برضه إزاي ؟!
.
بص يا مولانا
, ربنا كرم الإنسان بالعقل و العقل بيقول ببساطه شديده إن حجم و نوعية الملفات اللي
قدام القياده المصريه في السنيتن اللي فاتو أكبر بكتير من تخيل أي انسان , يعني هم
ما يتلم , و من الحماقه انك تتخيل ان مصر برئاستها و خارجيتها صحيو من النوم لقو نفسهم
فاضيين و مش لاقيين حاجه يعملوها قامو قالو خلاص بقى نحيي عملية السلام بين فلسطين
و الصهاينه !! , التخيّل ده هو المعنى الحرفي للحماقه .
..................................................................................................................
Mohamed
Hussein
11
يوليو 2016·
مش عارف العيب
في مين ؟ , فيا انا ولا في الناس التانيين , لما قريت خبر الزياره بتاعة سامح شكري
لاسرائيل قلبي انقبض شويه , وقتها ماجاش في ذهني حكاية الكيان الصهيوني و المعابر و
غزه المحاصره وكل الكلام العبيط الساذج ده , اللي ينفع تحطه في كتاب ( النطاعه السياسيه
) باب ( المتاجره بالقضيه الفلسطينيه ).
.
قلبي اتقبض شويه
عشان الحدوته بتقول اننا خرجنا من مرحلة التفاوض مع الصبي للتفاوض المباشر مع ( المعلمه
الكبيره ) و غالبا دي بتبقى المرحله الأخيره تحت غطاء أو كارت للتفاوض اسمه ( عملية
السلام ) , و بقية جولة سامح شكري هي محاولة حشد لوجود حل دبلوماسي يرتضيه الطرفين
( X و Y
) في القضيه اللي اسمها Z , المرحله دي ماعتقدش تستمر اكتر من سنه أو تحتمل
أكتر من سنه .
.
و الكلام فيها
هيكون بطريقه : يا بني أدمين لازم نلاقي حل , مش هنفرط في حقنا في Z , و المنطقه مش حمل نزاع عسكري جديد , و المرادي
مش هيكون عالمتداري ولا هيكون فيها طرف اسمه ( الجماعات اللامؤاخذه الإرهابيه !! )
, دي هتكون حرب نظاميه , ممكن تبدأ بين مصر واسرائيل على أرض اثيوبيا أو تبدأ مباشرة
في القاهره و تل أبيب , غالبا مش هتحصل بإذن الله عشان محدش هيطلع في الحرب دي كسبان
, يعني اللعب هيكون على هامش الخوف .
.
يابني حاول تصدق
, مراهقتك السياسيه الصبيانيه لا تؤهلك حتى انك تبقى بياع بليله .
....................................................................................................................
Mohamed
Hussein
11
يوليو 2016·
دروس في علم النطاعه
.
الدرس الأول ,
لما تلاقي وزير خارجيه مصر بيزور اسرائيل تقوم تفبرك شوية صور حلوين عشان تثبت وجهة
نظرك , يعني باختصار تمارس النزوير و التزييف عشان تحاول توصّل قناعاتك المزيفه أصلا
.
.
الدرس التاني
, تجتر بقى شوية شعارات من بتوع زمان زي القدس في القلب و معبر رفح و الأكل و الدوا
لأهل غزه المحاصرين و أه يانا يامه يانا يامه , و الدور بتاع عبله كامل ده , مع ان
قيادات حماس ذات نفسهم بطّلو الشعارات بتاعة المعبر و الأكل و الشعب الجعان عشان عارفين
انها بقت كدبه خايبه زي حلة الطبيخ البايت , إنما واضح ان حضرتك ميت من 5 سنين و مش
عايش معانا .
.
الدرس التالت
, تقارن بمنتهى الحماقه بين مقابلة توفيق عكاشه لسفير اسرائيل و بين زياره وزير الخارجيه
المعلنه لاسرائيل , و الله انت حبيب قلبي من جوه و بتصعب عليا .
.
الدرس الرابع
, تلاقي على مدار سنتين حصل التالي , زياره من وفد حماس للقاهره , زيارة السيسي لبريطانيا
, زيارة سامح شكري لتركيا , دعوة امير قطر لمؤتمر في مصر , وزير خارجية أمريكا بيزور
القاهره , فيقوم الخبر يمر عليك عادي كده و تمسك في زيارة سامح شكري لاسرائيل , طب
ياريت تقدر تقولي هو ايه الفرق بين الكيانات دي بالنسبالنا حاليا ( أمريكا , بريطانيا
, تركيا , قطر , حماس , اسرائيل ) ؟ مين فيهم العدو ؟ و لّا كلهم اعداء ؟ طب لما كلهم
أعداء لبلدك , تبقى فين المشكله اللي تستاهل انك تفبرك صور و تجتر شعارات عبيطه ؟ تعرف
ايه عن السياسه يا واد يا مزيكا ؟! .
.
كده حضرتك خلصت
دروس النطاعه بامتياز , و جبت أخر شمّه في علبة الكوله , لو عايز تفهم تعالى و انا
اقولك :
.
أولا : لما مصر
تتكلم عن سلام بين الفلسطينيين و اسرائيل يبقى الطبيعي و المنطقي إنها تزور رام الله
و تل أبيب , و لا هنروح فلسطين و بعد كده نروح فنزويلا ؟! .
.
ثانيا : حكاية
السلام دي هي المعلنه , و لو انها مش الحقيقه أو مش الهدف في حد ذاته , محدش عايز سلام
, هما مبسوطين كده , مرتاحين كده , و السيسي عارف و سامح شكري عارف و انا عارف و المفروض
ان حضرتك تكون عارف .
.
ثالثا : ورقة السلام
هي ورقه ضغط أو مساومه مش اكتر , عشان ملفات تانيه اهمها ملف سد النهضه , و كون ان
حضرتك كنت لحد أول امبارح بالليل فاهم ان موضوع السد ده هو موضوع أثيوبي و مفيش وراه
دول زي أمريكا و اسرائيل ف دي مش مشكلتي ولا مشكلة مصر , يعني حاول تتعايش مع كونك
غبي و فاهم نفسه عبقري , تعايش يا مولانا بس مع نفسك .
.
حاجه أخيره هقولها
باختصار : رأيي في زيارة سامح شكري لاسرائيل اننا بنجيب من الأخر حاليا , بعد زيارة
الصهاينه لاثيوبيا و دول حوض النيل , يعني مرحلة ( اللعب عالمكشوف ) .
...................................................................................................................
Mohamed
Hussein
10
يوليو 2016·
اتفاقيات و توغّل
و قاعده عسكريه اسرائيليه في أثيوبيا , و ايطاليا قالبه الدنيا بقالها تسع ست سنين
عالواد اللي اتقتل , أصله كان الواد الحيله و جاي على 9 بنات , و أول مره شاب ايطالي
يموت من أيام الإمبراطوريه الرومانيه , مع انها عارفه مين اللي قاتله بس بتتقمص دور
المعلم هرم ( عارف بس هنكر ) , و السفن البريطانيه بتقرّب من سواحل ليبيا ( تلاقيهم
بيصطادو سمك مشوي ) , و جامعه هارفارد ( العريقه ) اكتشفت فجأه مواهب نادر بكار الدفينه
و علمه الغزير اللي بيطرطش في كل حته فقررت انها تدّيله منحه للماجستير , و قوم نادر
بكار ياخد المنحه و يطلع التاني على دفعته ( بعد مرجان أحمد مرجان ) , و يقابل وزيرة
الخاريجه الإسرائيليه السابقه بالصدفه البحته , اكيد كانت بتسأله عن رأي الدين في
( صحّة ) الصلاه بعد ما تشرب 9 جرادل خمره , في ( صحة ) حضرتك !! .
.
و يقول مولانا
البرادعي في محكم تتويته إن مفيش مؤامره , اه مفيش مؤامره , فيه رز بلبن .
.......................................................................................................................
Mohamed
Hussein
9
يوليو 2016·
شمام الكوله ,
تلميذ البرادعي النجيب , اللي زايط في موضوع التوغل الاسرائيلي في أفريقيا دلوأتي و
بيسأل فين دور مصر ؟ هو نفسه شمام الكوله اللي بقالنا 5 سنين بنحاول نفهّمه ان سد النهضه
ده مالوش علاقه بأثيوبيا و انه مشروع صهيوني أمريكي ( لخنق مصر ولوي دراعها ) كجزء
من خطة الشرق أوسط الجديد , وان التعامل مع سد النهضه لازم يكون بحذر وبأكثر من خطه
, وقتها كان يقول : أمريكا و اسرائيل ايه بس , بطلو بقى نظرية المؤامره دي !! .
.
يعني انت يابني
معترف بالتوغل الاسرائيلي في أفريقيا ( و في دول حوض النيل تحديدا ) و مش معترف بدورهم
في سد النهضه ؟ أومّال بيتوغلو ليه في رأيك ؟ طب خلاص حقك عليا , أقولك على حاجه ,
هي اسرائيل أصلا متوغله في أفريقيا عشان تصطاد غزلان , بيروحو كل اسبوع يصطادو غزالتين
و يرجعو و يشووهم و يتعشو بقى هما و العيال , مبسوط كده ؟! .
........................................................................................................................
Mohamed
Hussein
9
يوليو 2016·
تروح كايرو فيستيفال
سيتي تحس ان مصر كلها هناك , ملايين متلتله بتتصرف و الناس فرحانه و مبسوطه و مفيش
ركنه للعربيه , تروح بورتو كايرو اللي جنبه تحس ان مصر كلها هناك و الناس برضه فرحانه
و مبسوطه ( و مفيش ركنه للعربيه ) , تروح حديقة الأزهر و لّا مراجيح السبتيه تحس ان
مصر كلها هناك و مفيش مكان تمشي فيه على رجليك و الكل فرحان و معيّد .
.
تدخل الفيس بوك
بقى تقوم تتعطرس في الصفحات اياها , تحس ان الدنيا كئيبه و السواد معشش و الأسوأ قادم
والجفاف على الأبواب و الطاعون على الشبابيك و السحليه العملاقه في الشارع و بتاكل
دراع العيال الصغيره .
.
الفيس بوك ده
( عالم ) افتراضي و مليان ( عالم ) عايزه الحرق .
...................................................................................................................
ليست هناك تعليقات:
إرسال تعليق