Mohamed
Hussein
7
يوليو 2016·
يوليو 2016 , توني
بلير : اللي حصل في العراق كان خطأ و احنا أسفين ( يعني سوري بالإنجليزي ) .
.
أغسطس 2020 , باراك
أوباما : اللي حصل في سوريا كان خطأ و احنا أسفين ( يعني سوري بالإنجليزي ).
.
سبتمبر 2024 ,
ديفيد كاميرون : اللي حصل في ليبيا كان خطأ و احنا أسفين ( يعني سوري بالإنجليزي برضه
).
.
أكتوبر 2028 ,
المخابرات الأمريكيه و البريطانيه : اللي ماحصلشي في مصر كان نفسنا انه يحصل عشان نقول
دلوأتي انه كان خطأ و نقول احنا أسفين ( يعني سوري بالإنجليزي) .
.
محمد البرادعي
على تويتر : لا يا بريطانيا , لا يا أمريكا , ماتقولوش على نفسكو كده , انتو حد جميل
أوي , و اللي حصل في سوريا و العراق و ليبيا كان بسبب النظام الكمعي في مصر اللي بياكل
دراع العيال الصغيره , ولابد أن يفرنقع .
.
حوده الثائر (
من على قهوه في وسط البلد ) : شوفت ياض يا جيفارا الدول العظمى بتعتذر ازاي مش زي عندنا
, و شوفت رد البوب عليهم , و لما قال ان النظام الكمعي في مصر لابد أن يفرنقع .
.
الواد جيفارا
( تنهيده طويله ) : أأأاه يفرنقع , أجمل كلمه سمعتها في حياتي .
...........................................................................................................................
Mohamed
Hussein
5
يوليو 2016·
أنا جاهل , والله
العظيم جاهل
.
عملت بلوك لاتنين
من الأصدقاء بعد ما كتبت البوست الأخير , بلوك بنفس راضيه مطمئنه , و الله العظيم انا
مش أزهري ولا لابس عمه ولا مقطّع حصر الجامع و عندي زبيبة صلاة أد كده , لا خالص و
الله .
.
بس هي الحكايه
ايه يا محترمين ؟ إمتى هناخد نفس عميق و نتعلم نفكر بهدوء ؟ الزربحه اللي بقالها 5
سنين دي مش ناويه تنتهي بقى ؟ هو الأزهر محتاج تطوير و تنضيف و تنقيح للمناهج ؟ أه
يا سيدي , محتاج و عهد الله محتاج , بس محتاج دي لها أصول , هما قاعدتين مفيش غيرهم
, أولا تتكلم بعلم مش بجهل , و مش معنى انك قريت كتابين تلاته تتخيل نفسك عالم و علّامه
و هتناطح علماء الأزهر , ثانيا تتكلم عن تطوير و تنضيف مش هدم و هجوم و تشويه بمنتهى
العبط و السذاجه .
.
يا محترمين هي
مش قصة عنب ديبو , الأزهر محتاج تطوير و الداخليه محتاجه , و احنا نفسنا محتاجين تطوير
و تنضيف , لكن البلطجه الفكريه و اللفظيه عمرها ما كانت طريقه للتطوير , و مش هنجيب
قنبله و نفجر نفسنا عشان ننضف .
.
هقولك تاني , أنا
لا شيخ بعمه ولا ظابط بدبوره , أنا صيدلي على باب الله بيحب البلد دي مش أكتر , ولا
أدعي العلم و اني بفهم في كل حاجه , ياريت حضرتك تبقى زيي كده و تصبر و تفكر شويه بس
, و تفتكر دايما انك لما الحنفيه بتنقط في بيتكو بتجيب سباك و بتقول أهل التخصص !!
, يعني حضرتك مش أهل لتصليح الحنفيه بس أهل للفتوى في الدين و التطوير الأمني ؟! .
.
هزيدك من الشعر
بيت , انا الشخص اللي ممكن يقعد في خطبة الجمعه و يلاقي الخطيب بيعك و يعجن و يبقى
عندي استعداد اطلع اجيبه من ياقة الجلابيه و أنزّله من عالمنبر , انما ده مش معناه
اني عالم في الدين , و أزيدك بيت كمان , اغلب الأفكار اللي نادى بيها اسلام البحيري
كان رأيي من رأيه , و كتبت عنها قبل مايظهر اسلام البحيري , بس كلام في سرك , و سامحني
و صدقني , اسلام البحيري ده شخص جاهل و غير مؤهل للي أنا و انت عايزينه , عارف الشيخ
فاروق في مسلسل ونوس , أهو زيه كده , جاهل , و زيي أنا كمان و زي جنابك مهما كان عندنا
أفكار تنويريه وجيهه ...معلش سامحوني و ياريت الناس تلم الدور شويه عشان الحكايه بهوأت
عالأخر .
...................................................................................................................
Mohamed
Hussein
4
يوليو 2016·
اللي عمل تفجير
المسجد النبوي أكيد و بالتأكيد هو حد مش متأثر بفكر الأزهر , عشان الأزهر مابيقولشي
فجّرو مسجد سيدنا النبي , و اللي عمل تفجيرات باريس و بروكسل مكانشي بيعاني من وضع
اجتماعي سئ ولا ظلم سياسي و لا فاشيه ولا حالة بؤس منفلوطي .
محاولة اختزال
( و لزق ) الإرهاب في أفكار مؤسسات زي الأزهر أو في ظلم اجتماعي أو قمع و فاشيه هو
دعوه عامه و مفتوحه لممارسة النطاعه , النطاعه اللي بقت علم بيدرّسه البرادعي و أمثاله
.
.
الإرهاب الحديث
يا جحش هو أجنده , لا يلزمه نشأة معينه ولا تربيه ولا كتاب فيه أراء متطرفه , الإرهاب
يلزمه شوية دولارات و سلاح أو قنبله و جهه بتخطط , و كل ما دولاراتك تكتر هتلاقي اللي
بينفذ حتى لو كان هجوم انتحاري ( كله بتمنه ) و الزبون موجود , الإرهاب جريمه ملهاش
مبررات ولا حيثيات ولا تفنيد ولا بحث في الماضي و الأعماق , الإرهاب ماينفعش تتعاطف
معاه ولا ينفع حتى تتعاطف مع شمام الكوله الأعظم اللي بيدرّس علم النطاعه .
..........................................................................................................................
Mohamed
Hussein
4
يوليو 2016·
و زي كل سنه ,
قبل 30 يونيو نبقى احنا بنجهز الأغاني و الحفله و الخرفان و شمامين الكوله يقولو هننزل
و نتظاهر و نزنزن الزنازين .
.
هه و بعدين بيحصل
ايه ؟
ولا حاجه احنا
بنغني و نحتفل
.
طب و الخرفان و
شمامين الكوله ؟ بيتظاهرو؟
لا , بس بيشوفو
احتفالنا و يطلّعو دخانه من ودانهم زي عربية البطاطا .
.........................................................................................................................
Mohamed
Hussein
3
يوليو 2016·
يوم ما قلبنا الترابيزه
.
التفجيرات في العراق
بقالها أكتر من 10 سنين مابتنتهيش , من بعد الإطاحه بالطاغيه صدام حسين , حلوه كلمة
الطاغيه دي صح ؟ عجبتك كده و عملت لك روح معنويه , و طبعا الإرهاب المستمر في العراق
سببه الأزهر فرع بغداد يا جحش !! .
.
أتحدى بقى أكبر
خبير و محلل سياسي يقولي مين بيحكم العراق حاليا و في السنين اللي فاتت بعد الغزو الأمريكي
الكيوت ؟ ده سؤال أصعب من السؤال بتاع أسماء الناس اللي ماتو في الحرب العالميه التانيه
, يا ترى العراق بيحكمها السنه و لا الشيعه ولا الأكراد , يا ترى بيحكمها إيران و لا
تركيا و لا أمريكا و لا هما التلاته واحد أصلا , الحكومه العراقيه مسيطره على ايه بالظبط
؟ أد ايه يعني ؟ من كام يوم قريت خبر على لسان رئيس الوزراء العراقي بيقول ان وجود
القوات التركيه على أراضي العراق أمر يجب أن ينتهي و قبل كده أخبار عن وجود قوات مواليه
لإيران !! بجد يا حماده ؟ يعني مستاء و بتشجب و تعبّر عن قلقك من وجود القوات التركيه
و الإيرانيه ( و طبعا الأمريكيه )على أرض العراق ؟
.
نفس اللعبه الأمريكيه
في العراق حاولت تلعبها في مصر بشكل مختلف شويه ( اسمه الربيع العربي ) , كان فيه أدوات
مشابهه موجوده هنا و هناك , منهم الخونه و الحقوقيين و النشطاء السياسيين , اللي بالتأكيد
كانو هيرحبو بالدبابات الأمريكيه , و الجيش العراقي اللي كان له شنه و رنه سقط في يوم
و ليله زي جبل الجليد , عشان الخيانه جت من جواه , الحمد لله ان جيش مصر العظيم مفهوش
خاين ولا بيسمح بوجود خاين جواه و إلا كان زمانا مش عارفين مين بيحكم مصر حاليا , يا
ترى ليبيا ولا السودان ولا داعش ولا أمريكا ولا بنجلاديش و كان زمان الرئيس المصري
بيشجب وجود القوات الموريتانيه في بني سويف !! .
.
في 30 يونيو
2013 و في 3 يوليو , يوم ما قلبنا الترابيزه , الشعب المصري قرر النزول للشارع , النزول
ده مكانشي جهجهوني , دي رساله , لما الملايين ينزلو الشوارع رافعين علم مصر و الجيش
يطير فوقهم بالطيارات تبقى رساله من الشعب و الجيش , او لوحه بترفعها مصر في وش الأمريكان
و كلابهم , شعار معروف في العسكريه المصريه : ممنوع الإقتراب أو التصوير , أو بمعنى
أصح back down .
....................................................................................................................
Mohamed
Hussein
3
يوليو 2016·
و لسه بنقول يا
هادي , و لسه الشهر ماخلصشي و بانت البشاير , راجل لبّسوه قميص نوم بتاع مراته و زفوه
في الشوارع !! , زي المشهد اللي ظهر في مسلسل الزفت الأسطوره , المشهد اللي حظى بنسبة
مشاهده كذا مليون على يوتيوب !! .
.
الفن عمره ما كان
أداه لنشر الوقاحه و الإبتذال ( تحت أي داعي ) , أي حد يقول كده و يبرّر لكده يبقى
بلطجي أو عيل صايع مش فنان , الفن مسئولية و رساله , يارب ريحنا من البهايم بقى .
.....................................................................................................................
Mohamed
Hussein
2
يوليو 2016·
مجرد رأي و علامة
استفهام ( و الله أعلم )
.
البني أدم المسلم
البالغ العاقل القادر ( المستطيع ) مفروض عليه الحج مره واحده , و طبعا لو حب يعمل
عمره أوكيه , بس اللي بيحصل غير كده خصوصا عند المصريين , أعرف ناس بتحج كل سنتين تلاته
أو خمسه بالكتير و ناس بتعمل عمره كل سنه .
.
تكلفة الحج الحاليه
بقت في الحد الأدنى 50 ألف جنيه و تكلفه العمره مابتقلش عن 10 الاف ( بالمصاريف )
, و المصريين أكتر شعوب الأرض بيعملو حج و عمره ( اكتر من السعوديين نفسهم ) , التكلفه
الإجماليه بتبقى مليارات و ممكن عشرات المليارات .
.
الموضوع ده شغل
تفكيري شويه و لقيتني بحط علامة استفهام أد كده و بسأل نفسي ليه ؟ حضرتك حجيت مره و
معاك 50 ألف زايدين عن حاجتك , ممكن لو سمحت بالمبلغ ده تستر بنتين يتامي مش عارفين
يتجوزو أو تفتح مشروع لشخص معاق يعيش منه هو و عياله مدى الحياه , ممكن لو سمحت بفلوس
العمره ال 10 الاف تشتري تريسيكل لشاب غلبان يشتغل عليه و يتاجر في شوية خضار خصوصا
انك طلعت عمره 12 مره قبل كده ؟ ممكن لو سمحت بال 10 ألاف تطلّع اتنين ستات غارمات
من السجن اتسجنو عشان كان عليهم قسط تلاجه و ماقدروش يدفعوهم ؟ و تخليهم يعيّدو وسط
عيالهم ؟
.
لما بتخيل المشاهد
دي و حجم الأجر و الخير اللي بيجي من وراها و انك تفتح بيت مدى الحياه أو توهب الحريه
لإنسان أو تعالج طفل مريض بمرض مزمن , بتخيل ان أجرها أعظم ألف مره من العمره السبعتاشر
و الحجه السابعه , و عندي اعتقاد ان سيدنا النبي عليه الصلاة و السلام لو كان عايش
كان هيبقى رأيه من رأيي .
.
ماهو مش معقول
تكون متخيل ان تديّنك يتطلب انك تسافر عشان تدعي دعوتين في مكان ما ( مهما عظم المكان
) و انت جارك مش لاقي ياكل أو جارتك مش لاقيه تتجوز او أخر الشارع بتاعك فيه ست غلبانه
مسجونه عشان 5 الاف جنيه .
...............................................................................................................................
Mohamed
Hussein
2
يوليو 2016·
يابني ورّيني عقلك
و جمالك و شكل معارضتك عشان اعرف أحط لك تصنيف , يعني في ال c.v
بتاعك نبقى نكتب بني أدم عالأقل .
.
فين عقلك و جمالك
و انت لك 5 سنين فاهم ان شوية بهاليل بدقون جابو كام بندقيه ( و كام نبله ) و قدرو
لوحدهم كده يهزمو جيوش لها شنه و رنه زي الجيش السوري و الليبي و يحتلو مدن و يحكموها
و يسيطرو على بلاد و يخربوها مداين , فين عقل جنابك ؟.
.
و فين هي شكل معارضتك
لما وصلت لمرحلة انك لما تشوف أي مشروع او انجاز عالأرض في بلدك اللي انت عايش فيها
تقوم نازل بصور وهميه عشان تشوّهه ؟ مين الحمار اللي ضحك عليك و فهّمك ان العك اللي
بتعكه ده اسمه معارضه و منهج فكري و طريقه للتفكير و التعبير عن الرأي , مش معقوله
طول السنين دي ماتكونشي قابلت بني أدم عاقل يصارحك بالحقيقه و يقولك انك بتشتغل لامؤاخذه
مش اكتر .
.......................................................................................................................
Mohamed
Hussein
2
يوليو 2016·
في مدخل المنصوره
, كوبري سندوب الجديد , طلعت عليه النهارده وانا راجع من البلد , و زي ما توقعت حاجه
فوق الخيال , مدخل المنصوره من ناحية السنبلاوين بقى عالمي , ما شاء الله تبارك الله
, ايه الإفترا ده يا عم كامل ؟ طب بذمتك عملت حوار مجتمعي قبل ما تفتري في كوبري سندوب
؟ أكيد ماعملتش .
.
اتمنى ألاقي صور
بالطيران لكوبري سندوب من فوق , هيبان أكتر , و بالنسبه للعيال الصيع اللامؤاخذه اللي
دايرين ينشرو صور وهميه للكوبري عشان بعد كده تبان انها وهميه و تبقى مسار للتريأه
و السخريه ( زي ما بيعملو في حاجات كتير ) لدرجة انك لو عملت سيرش على جوجل لكوبري
سندوب هتلاقي صور مش حقيقيه , عايز أقولهم باختصار شديد ( ومنهم أصدقاء عندي في الصفحه
) , أنا و عزة جلال الله و حق الأيام المفترجه دي بقرف منكو , و من التربيه اللي اتربيتوها
( ده لو كنتو اتربيتو ) .
.............................................................................................................................
ليست هناك تعليقات:
إرسال تعليق