Mohamed Hussein
25 يوليو 2016
مفيش مؤامره
.
- فيه طيارات بس بتنفجر و هي طايره , مع
ان الكلام ده ماحصلش قبل كده , كان عندنا نفس الطيارات و نفس الطيارين و نفس جهاز الشرطه
.
.
- فيه بس شاب اوروبي بيتقتل و يتمثل بجثته
و بعدين جثته تبان و الدنيا تتقلب علينا , الحكايه دي برضه ماحصلتش قبل كده , كان عندنا
نفس جهاز الشرطه ده و مصر كانت مرشّقه شباب من أوروبا .
.
- فيه بس عشرات المواقع الاخباريه بتظهر
فجأه و تكبر فجأه , و عشرات القنوات و الجرايد كلهم مخصصين لشتيمه مصر و جيشها و تشويه
كل حاجه و استخدام كل الأساليب , فوتو شوب و تقارير مضروبه و مزيفه .
.
- فيه بس تقارير ظهرت بتقول ( بالأدله و البراهين , ام كلثوم من السحاقيات
!! ) و تقارير بتقول ( كليوباترا ملكة السكس ) , و تقريبا يومين تلاته و هتلاقو تقارير
بتقول ان شجرة الدر كانت شغاله فتّاحه ( بتفتح للزباين ) و سعد زغلول كان شاذ جنسيا
, الكلام ده كله اكتشفوه أول امبارح بالليل .
.
- فيه بس صفحات للملك فاروق و فيه تحليل
لوذعي عن فترة الحكم دي ( و خلينا نكون موضوعيين يا كماحه ) , على اعتبار ان الملك
فاروق كان من السنبلاوين و احنا طردناه للمنفى ( احنا شعب لعين يا جدع ) , يا ترى شمامين
الكوله في الجزائر عملو صفحه بالصور و التقارير عن روعة بلدهم تحت حكم الفرنساويين
الكيوت ؟ و شوف بقى سعر الدينار الجزائري كان بكام وقتها و كانت الموضه بتنزل في الجزائر
قبل ما تنزل في كفر صقر .
.
- فيه بس ترويج للإستعمار , ترويج من النوع الجميل الكيوت , و استعداء
الخارج على مصر , وفيه رؤساء دول بيطلعو في المؤتمرات الصحفيه و لازم يجيبو سيرة مصر
3 مرات في كل جمله , و لما يتسأل الرئيس منهم انت بتشجع فريق ايه ؟ يقولك : بشجع فنربخشه
بس السيسي كاتل !! .
.
- فيه بس خطه ممنهجه لتشويه التاريخ و تزييف
الحاضر و تصوير المستقبل باعتباره خرابه ضلمه مليانه سحالي و كلاب مسعوره , و فيه تقزيم و تشويه لإسم مصر , الدوله الأكبر والأعظم في التاريخ
, لحد ما توصل جنابك لمرحلة من الإكتئاب و اليأس تبقى مش طايق حتى الفانله اللي عليك.
.
مفيش مؤامره , فيه رز بلبن .
.............................................................................................................
Mohamed
Hussein
25 يوليو 2016
بره الصندوق
.
في دولة زي البرازيل
جزء كبير جدا من دخلها من العمله الصعبه لا بييجي من سياحه ولا بيجي من قناة سويس ولا
من البرازيليين العاملين بالخارج , بييجي من بيع لاعبي الكوره لأوروبا , الرقم اللي
قريته على ما أعتقد بيوصل ل 20 مليار دولار سنويا !! .
.
في مصر عندنا المواهب
الكرويه , الموهب دي على فكره لا موجوده في أهلي ولا زمالك ولا كل اندية الدوري , اللي
انتو بتشوفوهم في الأهلى و الزمالك و يتباعو بالملايين دول الفرز السابع من المواهب
الكرويه المصريه , المواهب الحقيقيه موجوده في الأقاليم , الحريّفه اللي بجد هتلاقوهم
في القرى و النجوع و الحواري , و كلهم للأسف بينتهي بيهم المطاف انهم يخلصو جامعه و
يتعينو في أي وظيفه و يتجوزو و يربو كرش و بعدين يموتو بهدوء من غير ماحد يسمع عنهم
.
.
مش مطلوب خبراء
ألمان عشان نعرف نوصل للمواهب دي و نشتغل في الإستثمار في كرة القدم , مطلوب كشّافين
يلّفو شوارع مصر و حواريها , يجمعو المواهب دي من سن صغير و الدوله تصرف عليهم مع مراعاة
تعليمهم طبعا و بعد كده طريقه محترمه لتسويقهم , الحكايه على بعضها مش مكلفه و الإستثمار
ده هيكون أثره على الإقتصاد المصري كبير جدا , الأنديه الأوروبيه بتشتري اللاعب الموهوب
الحريف و مش بتشترط في اسمه انه يكون روماريو أو رونالدو ريفالدو أو أي حاجه فيها حرف
الراء .
.
فكرة الإعتماد
عالسياحه اللي ممكن تنضرب بسهوله و عالعاملين بالخارج اللي شغلهم على كف عفريت هي فكره
تدميريه لأي اقتصاد , بتخلي أسهل حاجه في الدنيا هي لوي دراعك .
...............................................................................................................
Mohamed
Hussein
24 يوليو 2016
بشوية تركيز صغيرين
, و شوية عقل أصغر , اللي حصل في ال 5 سنين اللي فاتو حصل في منطقتين اتنين بس في العالم , في الشرق الأوسط ( خصوصا الدول المحيطه
باسرائيل و القريبه منها ) و في أوروبا .
.
الحدوته باختصار
إن الخطه ( و الأكله المسمومه ) اتعملت عشان
الشرق الأوسط , حرق و خراب و تدمير جيوش و بنية تحتيه و قتل و تقسيم دول تحت اسم الديموقراطيه و التحرر
, و المطبخ كان في أوروبا , فكان لازم ينوبها من الحب جانب بأي شكل من الأشكال .
.
مش هتسمع عن ثورات
و ربيع ولا هتسمع حتى عن حوادث ارهابيه ولا هتسمع عن طيارات بتنفجر في أمريكا اللاتينيه
و لا في استراليا ولا في شرق أسيا ولا في شرق أوروبا ولا في وسط و جنوب أفريقيا , مع
ان المناطق دي فيها دول ماتسمعشي عن الديموقراطيه ولا طشاش حتى , و فيها ناس همجيين
و مستعدين لممارسة الإرهاب عادي , وفيها شعوب
تحت خط الفقر ب 17 خط و شرطتين .
.
مشكلتنا الأكبر
إننا بعد المعجنه دي كلها لسه فينا ناس مش مصدقين ان فيه مؤامره , و غالبا كده مش هيصدقو
و يقتنعو إلا لو شافو بعنيهم رئيس وزراء اسرائيل و رئيس وزراء بريطانيا و رئيس أمريكا
قاعدين على قهوه بلدي و كل واحد فيهم ماسخ جرنان مخروم و بيكلمو بعض و يتفقو من ورا
الجرنان عشان محدش ياخد باله .
...............................................................................................................
Mohamed
Hussein
23 يوليو 2016
عندي اقتراح لأردوغان
, طالما كل كام يوم بنسمع عن اختفاء طيارات من عنده و قطع بحريه , البيانات اللي حتى
بتنشرها السلطات التركيه نفسها .
.
بص يا أردغ يا
اخويا , الحاجه أمي في البلد عندها وزتين و كام فرخه كده , بتعمل ايه بقى عشان تتعرف
عليهم ؟ بتربط رجل كل وزه و كل فرخه بحتة قماشه , بنفس اللون , و بالليل تحبسهم في
العشه و تعدهم , و الصبح تسيبهم براحتهم و لو رجعو ناقصين بتعرف كام وزه ناقصه أو كام
فرخه , و بيبقى سهل جدا التدوير عليهم و نعرفهم بسهوله من حتة القماشه اللي مربوطه
في رجلهم .
.
اقتراحي بقى يا
أردغ انك تعمل نفس الحكايه , تعمل عشه كبيره عندك في اسطنبول مثلا , و تلم فيها كل
اللي باقي من القطع الحربيه عندك , يعني طيارات على دبابات و تعمل في العشه بركة مايه
صغيره كده و تحط فيها الكام قطعه بحريه , و تنزل انت بالليل بنفسك تعدهم و تربط كل
واحده منهم بحتة قماشه ( بنفس اللون ) , عشان لو قطعه حربيه تاهت كده او كده تعرف على
طول و تعرف توصل لها .
.
بالك يا أردوغان
, و انا في الجيش ( الجيش المصري طبعا ) , قعدت في يوم مع صف ظابط و حكالي عن واقعه
حصلت قدامه لما كان بيخدم في وحدة عسكريه في سينا , الواقعه كانت عباره عن اختفاء بندقية
روسي قديمه , واخدلي بالك يا أردغ ؟ بقولك بندقيه قديمه اختفت ( بندقيه مش 25 طياره حربيه ولا 40 قطعه بحريه
) , المهم الجيش اتقلب هناك يوميها و فشلت
كل المحاولات بلم الموضوع , طب نجيب بندقيه مكانها , طب نشتري بندقيه على حسابنا ,
لا يا حلو , مطلوب نفس البندقيه بنفس الرقم التسلسلي , و فضلت الدنيا مقلوبه و نيابه
عسكريه و مخابرات لحد ما جابو نفس البندقيه
من أسيوط !! .
..................................................................................................................
Mohamed
Hussein
23 يوليو 2016
المتصل : ألو
, ألو , سيادة المستشاره ميركل ؟
ميركل : ايوه يابني
انا ميركل , انت مين ؟
المتصل : انا مأمور
شرطة مركز و مدينة ميونيخ .
ميركل : أه خير؟
الأخبار عندكو ايه ؟
المتصل : مشكله
يا كبيره , الواد اللي لقيناه مقتول ماطلعشي له اصول عربيه ولا اسلاميه .
ميركل : ولا مشكله
ولا حاجه يا حماده , قولو انه مختل عقليا .
المتصل : تحت أمرك
يا كبيره , طب مش هنقول لقينا جواز سفره جنبه
أو انه قال الله اكبر قبل ما يضرب النار ؟ .
ميركل : لا طبعا
, انت عبيط ياض ؟!
المتصل : مفهوم
مفهوم , في حفظ الله يا كبيره .
ميركل : ربنا يوفقكو
يابني .
................................................................................................................
ليست هناك تعليقات:
إرسال تعليق