Mohamed
Hussein
9
مايو 2016·
إفرد رجليك حتى
لو كانت مشققه
.
أكتر حد بيصعب
عليا في الفيس بوك , هو الشخص اللي بيحاول في تعليقاته و ردوده انه يدور على كلام كبير
أوي و مجعلص , و يعمل مقدمات هلاميه لكل شئ , لو قلت له سلامو عليكو لازم يفكر و يقدح
زناد فكره قبل مايرد السلام , و يبدأ سلامه بحيثما و ربما و في الواقع و actually , الحكايه دي مشهوره اكتر عند الصحفيين و المشاهير
و أشباه المشاهير و اللي مش مشاهير بس نفسهم يكونو مشاهير .
.
هو باستمرار حاسس
انه في معرض أنتيكات و لازم في تعليقاته يعرض الأنتيكه بتاعته !! , هو باستمرار حاسس
انه مهم و العيون حواليه و بتراقبه , هو باستمرار حاسس ان كلمته دي بصمه ممكن تغير
تاريخ البشريه المعذبه , هو باستمرار حاسس انه لازم يكون مميز و متميز و متفوق على
أقرانه في العالم البشري و العالم السفلي و عالم البحار .
.
يابه النبي عربي
, و البساطه هي أصل الجمال , لأ , البساطه هي كل الجمال , ماتحاولش تلبس كرافته عالجلابيه
, الجلابيه شكلها حلو أوي عليك صدقني , عيّط و خلي دموعك تغرق قميصك و اضحك بصوت عالي
حتى لو سنانك مش ناصعة البياض , و لما تكتب اغلط في الحروف عادي و اكتب ( كزلك ) احنا
مش في مجمع اللغه العربيه و محدش هيمدك على رجليك , و لما تكون نفسك تاكل دره مشوي
اقف على عربية الدره و كل , ماتخافش محدش بيراقبك و لا حد هيشوفك و حتى لو شافوك قول
لهم طز , طزين تلاته , أربع خمس طزات , التكلُّف و التصنع ( حتى في الكلمه ) هيحولك
لبني أدم بلاستك , ممسوخ , و لما حد يقولك سلامو عليكو , قوله عليكو السلام تعاشرب
شاي , عادي و الله , مش هتنتقص الحكايه دي من علمك الغزير و لا ثقافتك العميقه و لا
مكانتك الأدبيه و العلميه و المعمليه الفذه .
.
و ايه بقى يا مولانا
؟ لما تكون تعبان و مرهق من المشي إركن تحت شجره و اقلع الجزمه و الشراب ( أو اقلع
الشبشب ) و إفرد رجليك و مددها , حتى لو كانت مشققه من تحت , رجليك دي جميله عشان هي
رجليك , مش شرط تكون رجلين هياتم عشان تفخر بيها .
..................................................................................................................
ليست هناك تعليقات:
إرسال تعليق