Mohamed
Hussein
1
مايو 2016·
لو كان الفيس بوك
ده موجود قبل حرب 73 كان زمانا قاعدين لحد دلوأتي نتناقش و نحلل في الخطه اللي لازم
نحارب بيها عشان نحرر سينا , و لازم طبعا الخطه تستقر في وجدان ابراهيم عيسى , و كان
زمان الصهاينه نفسهم قاعدين معانا في قلب القاهره و بيفكرو معانا برضه في الخطه اللي
نحاربهم بيها !! يعني بناخد و ندّي مع بعض في الكلام مفهاش حاجه .
.
و انت ايه رأيك
يا كوهين ياخويا نحاربكو ازاي ؟ كنت بقول يعني اننا لازم نحاربكو عشان نحرر سينا و
كده , ايه بتقول ايه ؟ أهم حاجه نغير صورة البروفايل كلنا و نكتب ( سينا في القلب
) ؟ يعني لا سلاح و لا عساكر ولا رادارات ولا غيره ؟ تصدق فكره حلوه , طب استني ناخد
رأي جميله اسماعيل , الحمد لله , جميله اسماعيل موافقه بس أيمن نور مش موافق .
.
معلش يا كوهين
ياخويا فكّر لنا في فكره تانيه تحظى بتأييد كل القوى السياسيه اللي يسترك و النبي يا
شيخ , معلش تاعبينك معانا , قولي الأول تشرب ايه ؟ لا و الله مانت دافع حاجه , عيب
يا راجل دانت في بلدنا و حتى لو محتلّنا برضه ضيفنا , احنا ناس نفهم في الأصول , واد
يا حتّة , هات أحلى إزازة بيره مشبّره لكوهين عشان يعرف يفكر و يمخمخ , و هات لي سحلب
و شوف لي شاحن سامسونج عندك عشان الموبايل هيطفي والفانز بتوعي قاعدين في البيدج مستنيين
الفكره بتاعة كوهين .
.
الواد حته ( بصوت
واطي في ودن الأستاذ الناشط ) : يا أستاذ فكرة ايه بس , كوهين ده عدونا و محتل أرضنا
, حضرتك ناسي ولا ايه ؟ .
.
الأستاذ ( بصوت
واطي في ودن حته ) : أعداء ايه يا غبي يا متخلف يا رجعي , انت بتصدق الكلام ده و الإحتلال
و المؤامره و الهري ده , دي فزّاعة عاملهالك النظام و المخابرات , عاجبك حالك انت كده
؟, أديك أهو , اتعلمت لحد تانيه اعدادي , و أخرتها شغال صبي في قهوه , اللي زيك في
سويسرا بيشتغل وكيل وزارة الخارجيه ( ده أول تعيين ) و بيركب عربية 19 متر .
..................................................................................................................
Mohamed
Hussein
2 مايو 2016.
الأحداث اللي حصلت
في الشهر اللي فات ده أكدت لي على حاجه مهمه أوي
, إن أي قرار تاخده جهه حكوميه في مصر لازم له قبل ما يتم شرطين في غاية الأهميه
:
.
أولا : لازم القرار
ياخد موافقة نقابة الصحفييين .
ثانيا : لازم القرار
يستقر في وجدان ابراهيم عيسى .
.
و إلا بقى فالبديل
مخيف و مفزع , مش هنشوف خير أبدا , و الدنيا هتولّع , و هنغير نظام الحكم كل اسبوعين
( اكتر ما بنغير أنبوبة البوتاجاز ) , و حضرتك هتبقى نازل من بيتكو كده لا بيك ولا
عليك و بتفتح باب الأسانسير تلاقي الديناصور في وشك على طول .
.
ملحوظه تحسباً
لأي ظروف , لو حضرتك فتحت باب الأسانسير و لقيت الديناصور في وشك ماتقلقش ولا تتخض
, تمالك نفسك و امسك اعصابك و ابتسم و اسأله : هو حضرتك نازل ولا طالع ؟ لو قالك نازل
قوله طيب اتفضل حضرتك عشان انا طالع , و لو قالك طالع قوله اتفضل حضرتك عشان انا نازل
.
.
عارف الكارثه فين
بقى ؟ الكارثه انك تسأل الديناصور : هو حضرتك نازل ولا طالع ؟ يقولك : لا نازل ولا
طالع !! , في الحاله دي تحديدا لازم أقولك تخاف , بصراحه مش عارف انصحك بإيه , إنما
كل اللي اعرفه انك بالتأكيد عملت حاجه هباب في دنيتك ولازم تكفر عنها و تستغفر ربنا كتير , يا أخي لو
معاك 5 الاف جنيه إلحق و اطلع عمرة شعبان , مش معاك فلوس و كل اللي في جيبك 10 جنيه
؟ مفيش مشكله , ميكروباص و اطلع على نقابة الصحفيين , اعتصم لك أد يومين تلاته , أهي كلها تكفير ذنوب في أماكن مقدسه .
...........................................................................................................................
Mohamed
Hussein
2 مايو 2016.
نورماندي تو
.
كل 200 نفر في
مصر حاليا بقى عندهم اعتقاد انهم يقدرو يغيّرو نظام الحكم و يشيلو الحكومه و يزنزنو
الزنازين , اه و عهد الله , ننزل في مظاهره ( عشرينيه ) أو نعمل اعتصام ( عشريني )
و نطالب بإقالات و اعتذارات و إلا نهتف بسقوط النظام !! .
.
أي حد عاقل عارف
ان المولد بتاع تغيير النظام ده اتفض من سنتين
, اتفض بلا رجعه , اتفض بتفويض و انتخابات رئاسيه و شعبيه جارفه , بس فيه ناس
الكوله تمكنت منهم تماما لحد ما بقت الغيبوبه
بالنسبالهم منهج حياه , بيعتزو جدا بأفكارهم و بالغيبوبه اللي عايشين فيها , و تسأله و تقوله هي المركب ( نورماندي 2
) دي بتمشي في البحر ياريس حنفي ؟ يقولك :
إلا بتمشي في البحر , دي بتمشي في البحر و في البر و عالحيط كمان .
.......................................................................................................................
Mohamed
Hussein
2 مايو 2016.
في خلال ال خمس
سنين بتوع الربيع اللامؤاخذه العربي ,جيوش اتدمرت بالكامل و ترسانات أسلحه اتنهبت
, بلاد اتحرقت , أكتر من مليون واحد ماتو (عساكر و مدنيين ), ملايين المهجرين , أمريكا
و الناتو جابو جيوشهم و طياراتهم و بيلعبو عندنا , على أرضنا و وسط جماهيرنا , لا جايين
إقامة مش فيسيتور , و ليله و معجنه بتقول ان وطنا العربي البائس ده محتاج 150 سنه عشان بس يرجع لنقطة الصفر !! .
.
و في هذه الفتره
, و في هذه الأثناء , و إبّان المعجنه مش هتلاقي جندي صهيوني واحد اتقتل أو اتعوّر
و خد له غرزتين أو حتى جالة ( حَبْ شباب )
, مع ان المعجنه محاوطه اسرائيل من كل ناحيه , شوف حكمة ربنا يا مؤمن ؟ و بكده
يبقى مفيش شرق أوسط جديد ولا فوضى خلّاقه و لا مؤامره ولا حاجه زي ما قال مولانا البرادعي قبّح الله وجهه .
.
الله يخرب بيتك
يا برادعي و يحرقك بجاز انت و نضارتك و تابلتك و تويترك , سوريا بيتفاوض عليها الروس
و الأمريكان في جنيف , و ليبيا بيتفاوض عليها الطليان و الناتو معرفشي فين , و اليمن
السعيد بقى ريهام سعيد , و فلسطين اتقسمت نصين ( فلس و طين ) و السودان مابقاش حته
واحده ( هتّه واهد ) , و باقي لنا ليفيل واحد و نحارب المخلوقات الفضائيه و سلاحف النينجا
.
.....................................................................................................
ليست هناك تعليقات:
إرسال تعليق