Mohamed
Hussein
11
فبراير 2016·
الأصل في الحدوته
دي اسمه ( إسقاط ) , يعني عيل وسخ يعمل اسقاط لوساخته دي على الغير , و ده بيكون سبب
نفسي كافي إنه يلاقي مبرر لوساخته قدام نفسه , يعني يقف قدام نفسه في المرايه و يقول
( انت فاكر ان انا بس اللي كده ؟ لا ابدا دي ناس كتير كده ) .
.
ومنهم الواد ده
, تيمور السبكي , اللي بيقول ان فيه دراسه بتقول : 30 % من نساء الصعيد بيخونو ازواجهم
خصوصا المسافرين منهم .
.
طبعا لا فيه دراسه
ولا يحزنون , عارفين يعني ايه دراسه ؟ يعني تيمور أفندي لفّ على 100 بيت في الصعيد
مثلا و لقى الإجابه دي في 30 بيت منهم : مساء الخير يا حاجه , انا تيمور و بعمل دراسه
, كنت عايز اسألك , هو انتي بتخوني جوزك اللي مسافر ؟ الحاجه : أه طبعا طبعا , تعالى
اشرب شاي بقى , اتفضل و الله !! .
.
عرفتو حجم الوساخه
اللي وصلناله تحت اسم اعلام و حرية و صفحات فيس بوك و و دراسه بتقول و خبر بيأكد و
صرح السيد المسئول ؟ عرفتو اننا محتاجين دولة القانون و الحزم مش محتاجين لجنة للاخلاق
؟! .
...................................................................................................................................
Mohamed
Hussein
11
فبراير 2016·
في السوق و في
الصحافه
.
في سوق المنصوره
ناس كتير غلابه اتجمعو , محدش فيهم يعرف التاني , ست جايه من الزقازيق في القطر و معاها
قفصين حمام , و راجل من ابو كبير ركب نفس القطر و جايب شوالين بطاطس , و شاب فارش بخضار
و ست قاعده بكام بطايه على كام دكر بط , كل واحد بينادي على بضاعته , تعالى خد حمام
يا أستاذ , خدي لك جوزين حمام يا أبله , صابحه وطازه يا بطاطس , و دعوات بالرزق و البركه
ويارب سهل عشان أروّح قبل المغرب ما يأدن , و بعد ساعتين تلاته هتلاقيهم اتعرفو على
بعض و بياع البطاطس هينادي عالست اللي عامله فارشة للشاي و يعزم البياعين اللي جنبه
على شاي و ممكن يفطرو سوا .
.
في الصحافه , ألاف
الصحفيين , محررين و كُتّاب , بِدَل و كرافتات و فساتين شيك , فنادق و أوبين بوفيه
, عناوين و فرقعه , تشويه مقرف للخبر وفبركة أخبار , أو تلميع فج للسيد المسئول , القمح
في ذمة الله , أسرار الصفقه بين قطر و الإخوان لاحتلال كوكب بلوتو , تخبّط في الإداره
الأمريكيه و الإتحاد الأوروبي من زيارة محافظ دمياط لمدرسة فارسكور الثانويه و أنباء
عن اجتماع لحلف الناتو , في ذكرى 25 يناير أنباء عن هروب عائلة السيسي من مطار ألماظه
إلى مكان مجهول و اجتماع عاجل للمجلس الأعلى للقوات المسلحه , أنباء عن انشقاقات و
انقلاب داخل ضفوف الجيش المصري .
.
و لما تسأل صحفي
من دول و تقوله إيه اللي انت بتهببه ده , يقولك لو سمحت , بليز , حرية الصحافه , الصحفي
مايتسألش عن مصرد الخبر , صاحبة الجلاله , احنا معانا حصانه .
.
في السوق ملح الأرض
و ناس شالو مصر أخر 5 سنين , رزقهم يوم بيومه ( و مش معاهم حصانه ), ده سوق نضيف ,
وفي الصحافه أم حصانه هتلاقي سوق قذر و ناس خربوها مداين , و بقى حال أغلب الصحفيين
الجدد إما إنه يكون دولجي طبّال بغشم أو ثورجي هجّاص بغباوه .................أو تكون
مزه و سمانة رجليها حلوه .
.........................................................................................................................
Mohamed
Hussein
11
فبراير 2016·
لما كنت في الثانويه
العامه و الجامعه كان حلم حياتي اني أسافر أمريكا و اعيش فيها , كنت منبهر أوي جدا
خالص بكل حاجه تخص أمريكا , الحضاره الأمريكيه , الحريه الأمريكاني , الديموقراطيه
, الهامبورجر, حقوق الإنسان , و ياما قعدت اعيط و اتشحتف قُدّام الممثله الأمريكيه
اللي كانت شغاله سفيره للنوايا الحسنه و هي بتتكلم عن الأثار النفسيه التي لحقت بالعصافير
من جراء القصف الإسرائيلي لجنوب لبنان !! , و أقول زي الراجل اللي في فيلم الزوجه التانيه
( ياسلام عالحنّيه , يا سلام عالإنسانيه ) .
.
و لما كبرت شويه
و شويه كمان فهمت إني كنت بحلم بأكبر خدعه و أكبر وهم في التاريخ , و إن الحريه و حقوق
الإنسان و كارتر و ما كارتر مجرد أدوات و عرايس من عرايس المسرح الأمريكي , توزيع أدوار
يعني , يبقى عندك البطجي و النصاب و الشيخ الطيب أبو سبحه اللي بتصدّره في المشهد
, و فهمت كمان ان المواطن الأمريكي ذات نفسه عمره مانبهر بالوهم اللي انا عيشت فيه
ده ولا صدقه , و كل اللي يهمه و اللي يعنيه هو مرتبه و عيشته و رفاهيته , ييجي منين
مرتبه ده بقى مش مهم ؟ من تجارة سلاح ولا حرق أوطان ولا نهب لثروات الشعوب بطريقه شيك
برضه مش مهم .
.
الخلاصه , عايز
أقول , الشباب في السن الصغير ده ممكن تاخد منهم حماس و نشاط و طاقه ( ولازم تتعامل
معاهم بهدوء ) , لكن ماتخدشي منهم لا رأي ولا حكمه ولا قرار !! .
...............................................................................................................................
Mohamed
Hussein
10
فبراير 2016·
و بعد ما بقى عندنا
شباب بيشتم جيش بلده صبح و ليل و محتاج حد يقنعه انه حبه لمصر و احترامه لإسمها و تاريخها
مش حاجه تخضع للاحتمالات و لا هي وجهات النظر .
.
و بعد ما بقى عندنا
مشايخ و بهاليل بيطلعو على منابرنا و شاشاتنا , مشغولين بتكفير الغير و بالجهاد , وانك
لو اتجوزت واحده مش مسلمه تعاملها كأنها جاريه و اوعى تحبها و إلّا السلعوه هتجيلك
بالليل و تاكل مناخيرك .
.
و بعد مابقى عندنا
اعلانات على قنواتنا الفضائيه عن الشيخ فلان لفك السحر الأسود و الأزرق و البامبه المسخسخ
و متخصص في جلب الحبيب , و يا ( جلبي ) لا تحزن .
.
الحكومه قررت انها
تعمل لجنة للاخلاق , بس هتسيب اللي بيشتم بلده و جيشها عادي و هتسيب مشايخ و بهاليل
الوهابيه عادي و هتسيب مناهج المدارس و اعلانات التخلف العقلي و أفلام السبكي عادي
, باختصار كده مش هتقفل الحنفيه , اهم حاجه تبقى اخلاقك كويسه يا زداحمد .
.
لجنة للأخلاق يعني
نحط كام بند زي : اغسل يديك قبل الأكل و بعده و اسمع كلام امك وابوك و ماترميش الورق
و قشر الموز في الشارع , و ماتبصش على ست أم شوشو جارتكو و هي بتنشر الغسيل يوم التلات
, و نكتب البنود دي على جلدة الكراسه زي زمان , و ممكن نسمع حتتين من عمرو خالد على
كلمتين حلوين من زاب ثروت و نشرب بؤ مايه و ننام , و هنصحى الصبح زي الفل .
...................................................................................................................................
Mohamed
Hussein
10
فبراير 2016·
أنا عايزك تتطمن
خالص و تفتكس براحتك , يا سيدي هو الفيس بوك ده معمول أصلا عشان تفتكس فيه براحتك و
تتعايش مكارثيا و تنقسم ميتوزيا و تبيض علينا عادي خالص , مش عندك اكاونت مجاني و بتعرف
تفك الخط ؟ خلاص يبقى حقك بقى , هه افتكس كده و ورينا افتكاساتك , انت اللي هتفتكس
يا منعم , جاهز بالإفتكاسات ؟ جاهزين يا خوانا ؟ مش عايز صوت لو سمحتو .
.
حافظ دورك يا استاذ
؟ عارف هتقول ايه ؟ و انتي يا أنسه عارفه الدخله بتاعتك هتبقى ازاي ؟ أيوه اسم الله
عليكي , انتي هتجيبي صورة متفبركه لجريدة اسمها الأهرام التعاوني , و عنوان بالبُنط
العريض ( زراعة القمح في مصر في ذمة الله ) و صوره لاتنين وزرا تحتها بيقولو اننا هنبطل
نزرع قمح , يا أستاذ يا أستاذ أومال هنزرع ايه ؟ و انتي مالك يا بت انتي , انتي ممثله
, فاهمه يعني ايه ممثله ؟ يعني تعملي الدور و بس , هنزرع مكرونه يا حيلتها , مكرونه
وفراخ بانيه , استريحتي ؟ اتبطيتي ؟ .
.
و انت يابني تدخل
بصوره و عنوان لجريده ايام مرسي البهلول , العنوان بيقول ( بعد تولي مرسي حكم مصر ب
40 يوم , مصر تحقق فائضا في انتاج القمح !! و تقول عشان كده المخابرات الأمريكيه شالت
مرسي و جابت السيسي عشان كنا هنمتلك قوتنا و سلاحنا ) و بعدين تقول هيييييييح , اوعى
تنسى ال هييييح دي .
.
يا أستاذ يا أستاذ
, 40 يوم ايه اللي بيتزرع فيهم قمح ؟ ده قمح مش جرجير يا مولانا , و بعدين مصر ماحققتشي
فائض في انتاج القمح من شخرميت سنه ,اخرس يا حيوان , و اعمل اللي بقولك عليه من سكات
, انت مش اتعشيت و خدت اجرتك ؟ يبقى تدخل تقول البؤين دول , و الكورال اللي هيقف ورا
في الأغنيه جاهزين يا أساتذه , عارفين هتقولو ايه , اه أي افتكاسه يطلع بيها ممثل من
الممثلين تقولو ( بيداري على موضوع سد النهضه , أه يانا يامّه يانا يامّه ) .
.
.
.
مشهد من فيلم
( تعالو نفتكس ) , أكشن تاسع مره .
......................................................................................................................................
Mohamed
Hussein
7
فبراير 2016·
وفد من الخارجيه
الأمريكيه و كشك حقوق الإنسان الأمريكي جه مصر , الكشك بعت الوفد و معاه التقارير يعني
بعت الوفد بتقاريره جاهزه و متستفه ,, اختفاء قسري و تعذيب في السجون وعصابة الولاويله
الحمره بتاكل العيال الصغيرين في مصر .
.
بتوع حقوق الانسان
في مصر قالو لوفد الكشك الأمريكي ( طلاق تلاته ما بيحصل اللي انتو بتقولو عليه بالشكل
ده ) و بتوع الكشك يقولو أبدا , بيحصل , شور هاندريد بيرسينت , و عندنا تقارير بتقول
كده من جهات و منظمات و حبشتكانات .
.
أغلب ظني ان وفد
حقوق الإنسان الأمريكي لا عنده تقارير ولا نيله , ممكن يكون بيعتمد تويتات البرادعي
و مقالات وائل قنديل يكتب عليها صح و يستفها زي ماهي كده , و قمة المأساه لما ناس عايشه
في أمريكا تعتمد على تويتات و مقالات ناس عايشه في النمسا و بريطانيا عشان يقيّمو حالة
ناس عايشه في مصر !! .
.
أصدقائي الغاليين
, لو قلبك أخضر ( وراور ) و طري كده و مندّي زي الخسايه , مش عيب , محسوبك برضه قلبه
خسايه , دانا يا جدع بخاف من منظر السكينه في ايد حد حتى لو كان بيعمل بيها سلطه ,
أه و عهد الله , بس مش عيب كمان نسأل نفسنا , هي افتكاسة الإختفاء القسري ظهرت ليه
في اخر 3 شهور بس ؟ قعدنا سنين طويله مانسمعشي عنها , هي الشرطه هي هي بغباوتها و ذكاوتها
, بحلوها و مرها , يمكن تكون اتحسنت شويه عن قبل 25 يناير 2011 انما لسه زفت طبعا
, ايه اللي جد عليها ؟ كان فين الإختفاء القسري ده ايام حبيب العادلي ولا حتى بعد ثورة
يناير ؟ ده سؤال مشروع والله , السؤال بطريقه تانيه , مين اللي رمى لنا فجأه جمله رنّانه
اسمها ( اختفاء قسري ) ؟ و ليه فجأه الكل بقى يهري فيها ؟ .
.
و لو حضرتك عايز
و حريص فعلا على تطهير جهاز الشرطه من فساده و بلطجته و هترفع ايديك في اللحظه دي هتلاقي
ايدي سابقاك , بس أول خطوه و أهم خطوه لو حريصين على كده فعلا هي إننا نجيب تقارير
الأكشاك الأمريكيه و ندوس عليها برجلينا , عشان هي مجرد أكشاك اتعملت مخصوص عشان تلوي
دراعنا مش أكتر .
...................................................................................................................................
Mohamed
Hussein
.
6
فبراير 2016·
بيتنا في البلد
من بعيد , بعد غيط القمح و سنابل الخير , و ضحكت عالبنات قلت لهم هوديكو الملاهي بتاعة
كايرو فيستفيال سيتي و طلّعتهم عالشجره دي , و بعدين لقيت عود السريس في أرض البرسيم
, دي متعه خاصه , عود سريس مع رغيف عيش و حتة جبنة قديمه.
ليست هناك تعليقات:
إرسال تعليق