Mohamed
Hussein
18
فبراير 2016·
أمين و أمين و
أمين ....... الساده الضالين .
.
في أقل من إسبوعين
, أمين شرطه اعتدى على اطباء مستشفى المطريه و أخلو سبيله , أمين شرطه اعتدى على ست
في محطة عزبة النخل و أخلو سبيله , فكانت النتيجه عند الامين التالت بتاع النهارده
, الأمين اللي قتل سواق توكتوك فقامو أهالي الدرب الأحمر اتلمو عليه و قتلوه و مثلو
بجثته !! .
.
نتيجة منطقيه جدا
للتعامل الرخو و المايع و الصايص من وزارة الداخليه مع فئة ضاله في أغلبها اسمها امناء
الشرطه , التعامل الرخو اللي بدأ من طريقة فض اعتصامهم في الشرقيه بنظام ( أطبطب و
أدلع ) , يوميها حطيت علامة استفهام و علامة تعجب و كل العلامات اللي في الدنيا , هي
الداخليه ربت مارد في بيتها و المارد كبر و بقى خارج السيطره ولّا ايه الحكايه بالظبط
؟ .
.
ياريس عبد الفتاح
, كلمتين لوجة الله , بأيدك جدا و بحترمك , بس فيه حاجه أهم منك و من نظامك و مني و
من اللي خلفوني , اسمها مصر, البلد اللي في عرض شوية استقرار و هدوء و احترام , البلد
اللي كلاب السكك دايرين يقطعو في لحمها بره و جوه , قتل أمين شرطه في الشارع و التمثيل
بجثته له ترجمه , اسمها ان بعض الناس فقدو الامل في عداله ناجزه و بدأو ياخدو حقهم
بإيديهم , الترجمه دي خطيره جدا , بلد بحالها ممكن تتحط على المحك عشان تصرفات صبيانيه
من شوية بلطجيه لابسين ميري .
.
أتمنى ياريس تصرف
سريع جدا , قبل ماييجي علينا اليوم و نصحى من النوم نلاقي الجيش نزل الشارع عشان يسيطر
على المارد اللي معشّش في وزارة الداخليه .
...................................................................................................................
Mohamed
Hussein
18
فبراير 2016·
أتمنى في الفتره
الجايه إن جهاز المخابرات المصريه ( العامه و الحربيه ) يلاقي عنده شوية وقت لتجميع
الملفات و الوثائق و الأحداث و الخبايا اللي حصلت في ال 5 سنين اللي فاتت و تسجيلها
بشكل يليق , أعتقد إن اللي عملته المخابرات المصريه في السنين دي يفوق بمراحل عن اللي
عملته أيام حرب الإستنزاف و قبل حرب اكتوبر , و جايز نكتشف إن مصر ( من 2011 ل
2016 ) كان فيها ألف راجل اسمهم رأفت الهجان .
.
طوفان خراب و خطة
محكمة الأدوات و التنفيذ , وضع اقتصادي سئ و لوي دراع لأقصى درجه , اعلام مشبوه و مواقع
الكترونيه مشبوهه و تزييف و تحريف و فوتوشوب و لعب عالمشاعر , تخطيط من عشرات السنين
, ترسانات من الأسلحه اتنهبت في ليبيا و اليمن و سوريا و اتهرّبت , أنفاق و إرهاب
, و حدود 4 ألاف كيلو , أنظمة سقطت و جيوش دابت في لحظة زي غزل البنات و بلاد اتقسمت
زي علبة الجبنه النستو , و ملفات اتفتحت عليك مره واحده , و خيانه و عماله بره و جوه
, و حكومات بتستثمر فلوسها في الحرق و الخراب , و أسد كان هيقع و السكاكين حواليه
, إزاي بقى , إزاي بلد مثقله بالجراح قدرت تمشي بأقدام ثابته في أرض الرمال المتحركه
؟! .
.
أصدقائي الكولجيه
, ماتشغلوش بالكو انتو بالكلام اللي فوق ده , أنا بخطرف ( أو بطبّل ) , ركزو بس في
السجاده و الموتوسيكل و ماتنسوش تعملو هاشتاج لأحمد مالك و تتعاطفو مع الحاجه ساميه
شنن و المناضل العظيم محمد سلطان .
....................................................................................................................................
Mohamed
Hussein
18
فبراير 2016·
اللي غرقانين في
البلاله
.
- قالولي نابليون
بونابرت المستعمر الفرنسي أول ما دخل مصر نشر أشاعه انه أعلن اسلامه و بعدها بدأت تظهر
له شعبيه بين المصريين ( الناس اللي دولتهم بقت مستعمره على إيديه ) , ده حتى أميتاب
باتشان يا مؤمن لما عرف ان اكل عيشه في دولنا العربيه و السبوبه حلوه , و لقى في أفلامه
إن حكاية إنه بيحارب قبيله بصباعه الصغير و يسلك سنانه برجل الأسد مابقاش لها بريق
زي الاول قام عمل فيلم و في أخر الفيلم مشهد بيقول انه مسلم , و هو بينضرب بالرصاص
, بتاع 700 رصاصه و قال أشهد أن لا اله الا الله , و هوبااااا , أخبار تملى الصحف عن
اسلام أميتاب باتشان , و شعبيته تبقى جارفه عندنا , كان باقي له يومين و ننزل صورته
عالجنيه المصري و الريال السعودي , أحدٌ احد ياعم الحاج .
.
و قالو لنا كمان
ان الجزمه المقلوبه حرام , أوعي ياض تكون شايف جزمه مقلوبه و مش تعدلها , و إلا ماتبقاش
متدين و السلعوه هتجيلك بالليل و تاكل ودنك , و لما تكون مابتحبش تشرب اللبن أوعى تقول
مش بحب اللبن , قول اللبن مابيحبنيش !! .
.
و تفوت سنين و
سنين , و نبقى في عصر الأيباد و الموجات المغناطيسيه و الزمكان , بس احنا لسه زي ماحنا
, لنا زمكان لوحدنا , أردوغان يبقى عضو في حلف الناتو و قاعد على حجر أمريكا و يشارك
في حرق شعوبنا و سرقة بترولنا , بس و ماله , مش مهم , أصله قال انه تبع حزب اسلامي
, و مراته محجبه كمان و مش بتسلم على رجاله ( هااااااح ) , يعني نابليون بونابرت و
أميتابتشان جديد , و السعوديه تقول احنا تبع تحالف دولي بقيادة واشنطن و هنحارب في
سوريا بس احنا حلف اسلامي , هي قالت اسلامي ؟ تبقى براءه ياعم الحاج , طالما اسلامي
يبقى السمع و الطاعه , اوعي ياض تغلط في السياسات السعوديه ولا تسيب جزمه مقلوبه و
لا تقول مش بحب اشرب اللبن , ياكشي بلادك تتحرق و ماتلاقي فيها شبر أرض تعيش فيه ,
انت مش خايف من ربنا ولا ايه ؟
.
أصدقائي التانيين
, انتو مش متدينين وضليعين في التدين ولا حاجه , انتو مجرد بهاليل غرقانين في البلاله
.
....................................................................................................................................
Mohamed
Hussein
17
فبراير 2016·
الفاتوره يا أردغ
.
هات ورقه و قلم
كده واكتب ورايا , دعم الإرهابيين في سوريا بالسلاح , الإعتداء على الأراضي السوريه
, دعم عملية حرق و خراب سوريا , سرقة البترول السوري , ضرب الطياره الروسيه , دعم الإرهابيين
في العراق و الاعتداء على سيادة الأراضي العراقيه , سرقة البترول العراقي , إيواء الإرهابيين
الفارين من مصر , تحريض ضد مصر 24 ساعه , يعني لك فاتوره يا معلم عند روسيا و سوريا
و مصر والعراق , دي فاتورة مشلتته !! .
.
انفجار أنقره
, 28 قتيل , لا اصبر عشان لسه التقيل جاي ورا , قول بقى اللي عمل كده حزب العمال الكردستاني
, أو حزب العمال البريطاني أو حتى أبو فراس الحمداني , فاتورتك و هتدفعها يا بهلول
اسطنبول , و مش بعيد قريب جدا أمريكا و حلف الناتو يرفعو إيديهم عنك و فجأه هوبااااااا
, تلاقي نفسك واقف في نص الشارع عريان ملط !! .
...................................................................................................................................
Mohamed
Hussein
17
فبراير 2016·
يالضيعة يهود
.
الملياردير الكبير
صلاح دياب انطس 6 شهور سجن عشان شتم مرتضى منصور !! , و طبعا صلاح دياب كراجل ملياردير
يعني اكيد معاه فلوس يجيب طابور محامين اوله في بغداد و أخره في الصين .
.
مممممممم وانا
بدوّر في صفحتى كده ألاقي خير اللهم اجعله خير , من كام يوم مكتوب على صفحتي الشخصيه
بوست بيهاجم و يشتم الراجل الوطني الشريف و القيمه و القامه السياسيه و البرلمانيه
و الرياضيه و العلميه و الأدبيه و الثقافيه و الحضاريه و التاريخيه و الثوريه و المحليه
و الأفريقيه و الدوليه سيادة المستشار مرتضى بيه منصور , البوست فاجئني جدا و قلت ايه
ده ؟ مين الحيوان اللي كاتب التخاريف دي ؟ و بعد الخضّه و الفزعه سألت أصحابي المتخصصين
في الفيس بوك و شئون الهاكرز , و اللي أكدولي ان صفحتي في التوقيت ده بالذات كانت مسروقه
و ان اللي سرقها و كتب البوست هو جندي اسرائيلي حقير حقير حقير .
.
إخواني , لا يجب
أن تحركنا الأحقاد على الناجحين و المتفوقين .
................................................................................................................................
Mohamed
Hussein
17
فبراير 2016·
كالعاده ماتفاجئتش
ولا خيّبو ظني فيهم , أول ماحد يموت , على طول تلاقيهم بيسألو نفسهم سؤال , هو كان
معانا ولا مش معانا ؟ معانا يبقى تقى و ورع و في الفردوس الأعلى من الجنه مع النبيين
والصديقين و الشهداء و خيرت الشاطر وباكينام الشرقاوي , مش معانا يبقى زنديق و كافر
و ماجن و فاسق و ربنا هيحشره مع فرعون و هامان و كيم كارديشان , لا هيحشره ايه ؟ ده
ربنا حشره فعلا يعني already و عندنا أدلة و قرائن و براهين
بتقول كده , و الجزيره كمان عندها فيديو بيثبت الكلام ده !!
.
وعلى فكره بقى
احنا ربنا بيبعت لنا كل شهر على مقر مكتب الإرشاد الحالي ( اللي في لندن ) كشف دوري
بأسماء الناس اللي هتدخل الجنه و الناس اللي هتدخل النار , الكشف مكتوب بالقلم الرصاص
يا اخي المؤمن ومعانا تفويض ربّاني بالتعديل فيه , يعني راجع نفسك بسرعه و ارفع علامة
رابعه قبل ماتقابل وجه كريم عشان ننقلك من كشف الزناديق لكشف أولياء الله الصالحين
.
...........................................
...........................................
الحقيقه كلمة الشريعه
و الدين هي من الكلمات الأعظم في حياتنا و في قاموس اللغه العربيه , لكنها في أخر كام
سنه بقت بتيجي دايما في مواقف و جمل في منتهى الأباحه و الوقاحه , ماهو مفيش حاجه أكتر
أباحه من التجاره بدين ربنا و أياته و إدعاء الغيب و الكشف عن صدور عباد الله و عبيده
!! .
.
رحم الله محمد
حسنين هيكل .
................................................................................................................................
Mohamed
Hussein
17
فبراير 2016·
حبيبي الثورجي
و السيد الرئيس
.
- حبيبي , يا ضنايا
, يا تلافيف عقل و قلب اللي خلفوني من جوه , يا أيقونة ميدان التحرير و طائر السنونو
, حلوه اللايكات صح ؟ مصر فيها 40 الف معتقل ؟ طب ما تبحبح ايدك و تخليهم 750 الف
, هو انت دافع حاجه من جيب اهلك و أكيد رابعه كان فيها شخرميت مليون معتصم , و اهو
اللايكات تزيد و تبقى أشهر من البناطيل الستريتش , بس احنا ماعندناش سجون تاخد 40 الف
يا ضنايا بما فيهم حرامية الغسيل و تجار المخدرات و قتالين القتله , و كلمة معتقل دي
مايعه و مايصه شويه زي جنابك كده , و طبعا اكيد بتقصد بالمعتقل بتاع حرية الرأي و كده
صح ؟ أومال انت مش معتقل ليه ؟!! , إلّا قولي صحيح , هو انت مركوب من الخرفان ولا مركوب
من نفسك , يعني اكتفاء ذاتي ؟! .
.
- السيد الرئيس
عبد الفتاح السيسي , سيبك من حبيبي و اللي زيه , دول أولهم زي أخرهم , فيه ناس عالفيس
مهمتها تعمل أبطال من شواشي الدره زي السجاير اللي كنا بنعملها زمان , هتعملهم ابطال
شويه و بعدين تولع و تتحرق و ينداس عليها بالرجلين
.
يا ريس انا عارف
خطورة المرحله اللي احنا فيها و حجم المؤامره على مصر , بس سيادتك مش واخد بالك من
حاجه ؟ ان الحلقه الأضعف في الفريق المصري هي وزارة الداخليه ( على راسنا تضحياتهم
في الكام سنه اللي فاتو ) و إن الحلقه الأوسخ في الداخليه هي أمناء الشرطه , ضرب الطياره
الروسيه في سينا كان خلل و تقصير امني و قتل الشاب الايطالي خلل و تقصير امني , و الاتنين
مسئولة عنهم الداخليه اللي هي الحلقه الضعيفه و مقصوده من الخواجه وخرفانه عشان ضرب
السياحه و بالتالي ازمه اقتصاديه و أزمة دولار و طبعا تشويه علاقتنا بدولتين مهمين
جدا ( روسيا و ايطاليا ) .
.
يعني جنابك هتفضل
تصلح في علاقاتنا الدوليه و اقتصادنا و تحاول تنقذ ما يمكن انقاذه , و يضيع مجهودك
كله على ايد تقصير امني و كام امين شرطه بلطجي أو فاشل , هه و بعدين ؟ and so يعني ؟ هل سيادتك مستعد تتحمل الفاتوره دي اكتر من
كده و نتحملها احنا معاك كشعب ؟
.
السؤال التاني
ياريس , هل امناء الشرطه بقو فعلا دولة فوق الدوله ؟ , امبارح امين شرطه اتعدى على
ست في محطة مترو تحت تهديد سلاحه , و النهارده في الحادث الارهابي الارهابيين سرقو
السلاح اللي استخدموه من امناء الشرطه , يعني سلاح امناء الشرطه بيستخدموه في البلطجه
انما وقت الجد بيتسرق ( هو و الفانله ) , على طريقة : أسدٌ عليّ و في الحروبِ نعامةٌ
!! .
...................................................................................................................................
Mohamed
Hussein
16
فبراير 2016·
فن الدبلوماسيه
و الحرب ............. عمودين الخيمه الباقيين في دولة عظيمه اسمها مصر .
.
سامح شكري وزير
الخارجيه المصري بيقول إن قرار السعوديه بالتدخل البري في سوريا أمر سيادي منفرد
!! و ان مصر بتدعم الحل الدبلوماسي في سوريا .
ده اسمه فن الدبلوماسيه
, الكلمه موزونه بحساب , لا ينفع تأيد قرار السعوديه و لا ينفع تقول احنا ضده في التوقيت
ده تحديدا , و الإجابه النموذجيه هي اللي قالها سامح شكري ( ندعم الحلول الدبلوماسيه
) .
.
وعن مصر العسكريه
و بالصدفه البحته , النهارده ذكرى بتقول ان فيه كام مصري اتقتلو في ليبيا و جيش مصر
اتحرك فورا و قبل مايطلع النهار كان حقهم و حق البلد راجع , حتى لو كانو المجرمين دول
في بلاد تركب الأفيال هنروح لحد عندهم , جيش مصر يا ساده هيجيب حقنا و حق ولادنا جوه
وبره , و هيدافع عن الدول العربيه لو اتعرضت لاعتداء اجنبي , وبس كده , مش جيش بتاع
حوكشه و لا بيطلع عشان يلعب حوكشه مع جيوش الحوكشه , يعني لا حد هيمنعنا من التحرك
وقت مانقرر ولا حد هيزقنا لقرار احنا مش عايزينه .
.
و الحقيقه ان النجاح
و الأداء الجيد جدا لوزارة الخارجيه و وزارة الدفاع ( عمودين الخيمه ) في الكام سنه
اللي فاتو و في وقت عصيب , مش بيرجع لشخوص بعينهم , يعني مش لوزير الخارجيه بشخصه ولا
وزير الدفاع بشخصه و لا حتى لرئيس الجمهوريه بشخصه , إنما سببه إن الوزارتين دول تحديدا
بتحكمهم مؤسسات قويه و عريقه , اسمهم مؤسسة الدبلوماسيه المصريه و المجلس الأعلى للقوات
المسلحه , عشان كده التعامل بيتم بحكمه و احتراف مش مجرد اجتهادات شخصيه .
........................................................................................................................
Mohamed
Hussein
16 فبراير 2016 ·
كنت كده و انا
صغير , لما كان عمري 7 سنين تقريبا , و فضلت اسرح بالغنم مع جدي حسين لمدة 3 سنين لحد
ما توفى جدي الله يرحمه و بعنا الغنم بعدها , كان عندنا قطيع غنم كبير , 40 راس تقريبا
, ما بين خروف و نعجه و حولي ( الخروف الصغير خالص ) , كنا نطلع بالغنم الصبح بدري
اوي و الاقي بطنها فاضيه تماما , و نمشي لحد الأراضي اللي كان فيها ( دره ) متقطع أو
قطن متقطع و نسيبهم ياكلو و نقعد جنبهم و نرجع قبل المغرب تكون بطونها اتملت , الحولي
كنت بشيله على صدري و انا ماشي في الطريق رايح جاي , و في قلب أرض الدره بعد ما صحاب
الأرض يكونو شالو منها الدره ( و عيدان الشامي ) ممكن تلاقي كوز دره ناشف ( أو بعبوله
) و امسكه بإيدي و أفرّطه و أأكله للخروف ( مش للنعجه ) , الكلام ده كان بيحصل في الصيف
و كل يومين تلاته ننزّل الغنم في الترعه تستحمى و انا أنزل معاهم , و مش عارف ليه جدي
اختارني من بيت فيه اكتر من 20 طفل من جيلي و أكبر مني ( ولاد عمي ) , انما الصوره
فكرتني بسنين من أجمل سنين حياتي , الفقر اللذيذ , الصبر و راحة بالبال , و سعادة الطفل
اللي في الصوره ( مش انا طبعا ) , سعادة طفل ماشي حافي في عز الصيف و الأرض سخنه مولعه
مع اني كان عندي جزمه بلاستيك ب 3 خطوط في الجنب , انما قلعتها مره في أرض دره وانا
قاعد جنب الغنم و بعد كده مالقيتهاش او نسيت انا قلعتها فين , دوّرت عليها ييجي اسبوعين
و قلت مش مهم , و كملت في الدنيا حافي .
.........................................................................................................................
Mohamed
Hussein
15
فبراير 2016·
أتحدى لو فيه حد
من علماء الحفريات أو أساتذة علم الحيوان أو حتى علماء الفلك و المتخصصين في المخلوقات
الفضائيه أو علماء الديدان يلاقو عندهم ( في عقولهم أو كتبهم ) كائن حي , معاصر ولّا
حتى منقرض , يقدر يستوعب الفكره دي : -
.
.... إن عساكر
قطريين يتدربو في قاعدة السيليه ( الأمريكيه ) في الدوحه و بعدين يروحو قاعدة أنجرليك
( الأمريكيه ) في تركيا و ياخدو التعليمات من وزارة الدفاع ( الامريكيه ) لضرب دولة
عربيه مسلمه عشان يدافعو عن الإسلام ( ضمن التحالف الإسلامي ) !! .
.
الأفكار الزرايبي
دي محتاجه عقول تكون اتنقعت في ماية الجوزه لمدة 85 سنه متصله , عشان كده مفيش عقل
يقدر يستوعبها غير عقل خروف إخوانجي .
..............................................................................................................................
Mohamed
Hussein
15
فبراير 2016·
حكاية البلطجي
و التعلب و الراجل الأعمى
.
- كان فيه واحد
بلطجي و عينه على بيت معين فيه خوات كتير , البلطجي عايز يخلص من الناس اللي في البيت
ده و عنده أسباب يطول شرحها , قعد البلطجي يفكر و يفكر , اعمل ايه عشان ادخل البيت
ده و أنفّذ اللي في دماغي ؟ البلطجي لقى ان الحل الأمثل هو انه يختار واحد من الناس
اللي في البيت ( من أهل البيت ) , تكون مواصفاته مناسبه انه يشتغل ( تعلب ) عنده ,
البلطجي مافكّرش كتير , و لقى ضالته في عيل صغير موجود في البيت , عيل عنده عقدة نقص
من زمان و كاره خواته , قال بس هو ده اللي هينفعني .
.
و بدأ البلطجي
يوطد علاقته بالعيل و يشرح له دوره و يفهّمه هيعمل ايه , و الخطه كانت باختصار , إن
العيل ( التعلب ) كل كام يوم ياخد واحد من خواته و يغمّي عنيه ( يخلّيه أعمى ) و يقوله
تعالى بس دانا عاملك مفاجأه حلوه أوي , و يخرجو بره البيت , و ييجي عند حفره كبيره
كده و يقوم زاقق أخوه في الحفره , ويرجع البيت لوحده , الخوات كل واحد ملهي في نفسه
و حياته , و محدش من اللي في البيت بياخد باله ان فيه أخ كده مش موجود , و بعد كام
يوم يكرر التعلب نفس الخطه بتاعة البلطجي مره و اتنين و تلاته , و توته توته فرغت الحدوته
.
.
من عشر سنين كان
فيه تحالف عجيب و مريب بين حمد جوز موزه و بين بشار الأسد , اللي يفتكر في الوقت ده
كان التحالف عامل زي الضرس المخالف في جامعة الدول , و هوباااا مشي التعلب بالأخ اللي
متغميه عنيه و لحد الحفره و زقه و رجع التعلب تاني , ودلوأتي فيه تحالف مريب بين تميم
ابن موزه و السعوديه و قال رايحين يحاربو في سوريا , الحدوته هتخلص بإن الأعمى الجديد
هيقع في الحفره و التعلب هيرجع مكانه و يستنى الفريسه الجديده حسب تعليمات البلطجي
.
.
اللهم قد بلّغت
, اللهم فاشهد .
.
.
ملحوظتين على الهامش
:
1- قناة الجزيره
كانت فكرة البلطجي للترويج لخطوات التعلب و إدارة التعامل مع الفريسه .
2- مصر مابتتصاحبش
على عيال ولا بتغمّي عنيها .
............................................................................................................................
Mohamed
Hussein
15
فبراير 2016·
خمسة لعقلك
.
1- الوضع الإقتصادي
صعب ليه ؟ هما 3 حاجات , اسمهم بالترتيب الزمني , مبارك , احنا , الإخوان .... مبارك
خربها في 30 سنه و بقى نص فلوس الدوله واقتصادها في ايد عشرين تلاتين شخص , واحنا لما
عملنا ثورة في يناير كان فيه خطيئة كبرى , إن الثوره مالهاش محاسب أو مدير مالي يعملك
كشف حساب مسبق , يعني يقولك نستمر في التظاهر او الوقفات و ممكن نكسب كذا سياسيا بس
هنخسر كذا اقتصاديا ( و النون هنا عايده على مصر ) , و مظاهره بعد مظاهره و اعتصام
بعد اعتصام و من غير فواتير ولا كشف حساب بقت الصوره للعالم و المستثمر الأجنبي هي
بلد غير مستقره سياسيا ولا امنيا ولا اقتصاديا , و راس المال جبان , و بعد 30 يونيو
كنت و مازلت واحد من اللي رافضين تماما التصالح مع الجماعه الارهابيه , بس من وقتها
و ان عارف ان الرفض ده معناه انهيار اقتصادي اكبر , عشان مليارات الجماعه الإرهابيه
اللي كبرت و ربربت في عهد مبارك أكيد هتخرج من البلد ( طبعا أي مصادره لأمولهم هي مصادره
للفتات , زي أموال مبارك و الحزب الوطني كده ) و رجاء من أخوك الصغير ماتحاولشي توصل
للرقم الحقيقي لأموال الإرهابيين ولا اموال نظام مبارك , مش هتوصل لحاجه ولا هتعرف
ترجّع دولار واحد , بلاش تعيش في الوهم .
.
2- الوضع الإقتصادي
الصعب ده خلّانا نلجأ لدول ( شقيقه ) , يعني السيسي مانهبشي ثروات البلد و بعدين راح
يمد إيده للي يسوا و اللي ( شقيقه ) , لا السيسي بيحاول يرقّع في توب هو مستلمه كده
, مكرهٌ اخاك لا بطل .
.
3- و فجأه نكتشف
إن الدول ( الشقيقه ) لما قررت انها تساعدنا كانت أسوأ ألف مره من صندوق النقد , و
مطلوب مننا في المقابل نستجيب لمغامراتهم الصبيانيه و نقعد على حِجْر أمريكا زيهم
, و واحد كده يمسك شعله في ايده و يحرق بيها رجليه ( لما مصر تحارب سوريا ) .
.
4- بالمناسبه لا
استبعد أبدا إن المليارات اللي اعلنت عنها ( الشقيقه ) قبل كده تم مساومتنا عليها
, وإن المساومه دي تكون سبب من أسباب أزمة الدولار و الأزمه الإقتصاديه , طبعا مفيش
مسئول في الدوله يقدر يصرح بكده , عشان الدبلوماسيه بتختلف تماما عن كتابة بوستات عالفيس
بوك .
.
5- الكلام ده مش
تطبيل , ولا دعوة لليأس , إنما صورة كامله ( بجوز عيون ) و دعوة للصبر , هنصبر و هنعدّي
اكيد , و اللي يهمني أكتر من الإقتصاد حاليا , هو إننا نعدّي من طوفان الخراب اللي
سارح في المنطقه , و اللي بيتترجم في سياستنا الخارجيه ( و المشي عالحبل ) , السيسي
ناجح فيها بامتياز , و بعد شوية نتكلم عن الوضع الداخلي و المعركه الاكبر , السيسي
أداؤه فيها أقل من مقبول , بس معلش , صاحب بالين كداب , و لكل مقامٍ مقال .
...............................................................................................................................
Mohamed
Hussein
14
فبراير 2016·
بدون ماكياج
.
.
من غير ماكياج
و لا مواربه , يحدث حاليا يعني دلوأتي يعني now
إن حلف الشيطان بيحاول يحرق ما تبقى من أرض سوريا الأبيه , و حلف
الشيطان هو باختصار ( امريكا , بريطانيا , تركيا , السعوديه , قطر ) و طبعا من وراهم
الكيان الصهيوني .
.
من غير ماكياج
برضه ولا مواربه هنحني للمره الألف احتراما و إجلالا لجيش مصر العظيم و مخابراتها
, عشان في نفس التوقيت , حاليا يعني دلوأتي يعني now
بقى عندنا ( رفاهية الهري ) في سعر السجاده الحمره و نوع البيسكلته
و عدد الموتوسيكلات اللي كانو في موكب الرئيس .
.
حاول بس تفهم أو
تتخيل , إن في الوقت اللي قعدت فيه انت وصاحبك تسألو بعض هي السجاده دي بكام وهتعيش
كام سنه و نسبة الإهلاك فيها كام % ؟ , كان فيه اتنين شباب في سوريا بيسألو بعض ( هو
احنا هنصحى من النوم بكره و نلاقي دمشق زي ماهي ولا اختفت من عالخريطه ؟ طب أصلا احتمالية
اننا نصحى من النوم بكره و نلاقي نفسنا عايشين هي كام % ؟ ) .
.
#أدعم_الجيش_العربي_السوري_ضد_حلف_الشيطان
.
#تحيا_مصر.
..........................................................................................................................
Mohamed
Hussein
13
قبراير 2016·
في عيد الحب
.
يسريه : انا عايزه
ورده حمره و دبدوب أحمر يابراهيم
ابراهيم : بس ده
تبذير يا يسريه و الشيخ الحويني قال لا يجوز .
.
يسريه : طب خلاص
, تعالى احكي لك عن روعة الجون اللي ايفونا جابه فيكو الماتش اللي فات , و كمان كنت
بفكر أقول لماما تيجي تقعد عندنا اسبوعين تلاته , ايه رأيك ؟
ابراهيم : انا
نازل أشتري الورده و الدبدوب يا يسريه .
.................................................................................................................................
Mohamed
Hussein
13
فبراير 2016·
و بيقولك يا سيدي
ان موكب عبد الفتاح السيسي و هو رايح البرلمان كان فيه 12 موتوسيكل , كل موتوسيكل هيمون
بنزين في الطلعه دي ب 3 جنيه , و ضيف عليهم 1 جنيه نفخ للكاوتش عند الواد بولا اللي
جنبي يبقى الحساب 4 جنيه للموتوسيكل الواحد , اضرب بقى في 12 يبقى الحساب 48 جنيه
, مش بس كده و عندك 21 طلقه انضربو في الهوا , كل طلقه سعرها ( في الجمله ) بتاع 6
جنيه يبقى تكلفتهم 126 , ضيف بقى دول على دوكهما يبقى المجموع كله 174 جنيه , و في
الأخر يطلع السيسي و يكلمنا عن حقوق الفقراء و المهمشين !! .
.
ياريس انت لو حريص
فعلا على حقوق الفقراء و المهمشين كنت جبت بدل الموتوسيكلات دي جمال ( بكسر الجيم
) يعني camels , عشان الجمل بيكلف في أكل البرسيم أقل من بنزين
الموتوسيكل , و بدل ال 21 طلقه كنت جبت اتنين من المماليك يبارزو بعض بالسيوف .
...........................................................................................................................
Mohamed
Hussein
13
فبراير 2016·
خطاب الرئيس و
الوضع الإقليمي
.
أهم فقره في خطاب
السيسي هي دي : (( علينا ألا ننسى أننا نجحنا فى تعطيل مخطط وإبطال مؤامرة وعلينا أن
ندرك أن هناك من هو متربص ولايريد لهذا البلد أن يكون إستثناءاً بين مصائر دول هذه
المنطقة المضطربة وأن يعرقل مشروعنا الوطنى للتنمية والإستقرار )) .
.
و عن المنطقه المضطربه
اللي قال عليها السيسي و التوقيت البالغ الصعوبه , اتفضلو في الصالون , قصدي تعالو
نشوف شريط الأخبار من غير تكبير و تفخيم للحدث ولا تصغير و تقزيم , من غير هرطقه لفظيه
و لا تحليل بطريقة ( ودنك منين يا جحا ).
.
1- السعوديه بتفكر
جديا انها تنشر قوات بريه في سوريا ضمن التحالف الأمريكي لدعم المعارضه السوريه في
مواجهة داعش !! .
.
امنعو الضحك بقى
, و اعرفو ان السيسي بيحكم مصر في توقيت لازم فيه ( يمشي عالحبل ) , قالك يا سيدي أمريكا
و السعوديه هيحاربو داعش اللي صنعوها على ايديهم يعني hand made مش هيحاربو الجيش السوري ولا بشار الأسد و لا هيخربو
اللي باقي من سوريا , أه طبعا طبعا , و انت كرئيس مصر في وضع اقتصادي زفت بعد خراب
مبارك و خراب مكثف لل 5 سنين اللي فاتو , لا هينفع تشارك في الهبل الأمريكي السعودي
( عشان تاريخك هيمنعك و ماينفعشي جيش مصر التاني و التالت يحارب جيش مصر الأول ) ,
و لا هينفع تطلع تقول علنا كده انك مؤيد للجيش السوري ولا انك ضد سياسة أمريكا و السعوديه
في سوريا ( عشان الحاضر و الواقع الصعب هيمنعك ) .
.
المؤامره او الطوفان
اللي ماشي في المنطقه دي بيتطلب إنك متاخدشي حاليا أي رد فعل عنيف لا في موضوع سوريا
ولا في موضوع سد النهضه , الخواجات مستنيين لك غلطه و الغلطه تبقى ذريعه و ساعتها يحوّلو
دفة الطوفان ناحية مصر , بالمناسبه الفرق في القوه العسكريه بيت روسيا و تركيا هو نفسه
بالظبط الفرق بين مصر و أثيوبيا , و لو عايز تعرف ليه روسيا ماطربقتشي تركيا على دماغ
اللي فيها و ليه مصر ماينفعشي تعمل كده مع اثيوبيا رغم انها تقدر , هي اجابه واحده
في الحالتين , اسمها أمريكا و حلف الناتو .
.................................................................................................................................
Mohamed
Hussein
12
فبراير 2016·
إنما أغبى مشهد
شوفته النهارده بصراحه , المشهد اللي بيدل على حالة السفه و الهيافه و العبط اللي وصلنالها
, هو مشهد أصحابي المتعاطفين اللي دايرين ببوستات بتقول أبو 99 % و ابو 50 % , مشهد
شوفته مقرف , حاجه يعني تجيب غثيان , انتو ايه يا جدعان مابتزهقوش ؟ , و مش عارف
99 و 50 ايه موقعها من الإعراب في موضوع زي بتاع النهارده ؟ ماعندكشي أدوات لتبرير
موقفك غير الهيافه دي ؟ طب نعمل ايه طيب ؟ نعمل تمثال في كل شارع لابو 99 % و نحرق
أبو 50% ؟ طب ماحنا كده هنحرق البرادعي يا فالح ( و ممكن نحرقك انت شخصيا ) !! , طب
لو حصلت خناقه و عاركه لرب السما بين الاطباء و الصيادله نقول خناقه بين ابو 99 وابو
98 ؟ طب نحسمها ازاي بقى ؟ بضربات الجزاء ؟ .
.
أصدقائي الغاليين
, ابوس إيد اللي خلفوكو , احنا بنتكلم في قوانين و حقوق و واجبات و تطوير و دولة و
نقابات و حكومه و شعب و ظلم و عدل , هي دي الأدوات و المفردات , ممكن لو سمحتو يعني
تكبرو شويه و تبطلو عبط و هبل و رياله ؟
................................................................................................................................
Mohamed
Hussein
12
فبراير 2016·
النتيجة 2/0
.
- الحمد لله ,
اليوم عدّى على خير , و النتيجة 2/0 لصالح الاطباء , جون جابوه في الحكومه و جون جابوه
في الكولجيه و الخرفان و بتوع 6 ابريل اللي حاولو يلزقو نفسهم بأي شكل بإضراب الأطباء
و يعتبروه عمل ثوري و استمرار بقى لنضال عبد الرحمن القرضاوي و عاصم عبد الماجد و ريري
سيلان و الأشكال الزباله دي .
.
- القرارات اللي
شوفتها لحد دلوأتي كلها جيده , بما فيها المطالبه بإقالة وزير الصحه , المطالبه على
فكره مالهاش علاقه بحادثة المطريه ولا غيرها إنما لها علاقه بتصريح للوزير شافو إنه
إهانه للأطباء , اه من حق النقابه انها تعتبر التصريح ده إهانه للاطباء و تطالب باقالته
و التحقيق معاه في النقابه ( ياكشي ياكلو دراعه حتى ) , و احنا مالنا يا موهيي .
.
- ممكن بس نتغاضى
عن شوية شعارات و هتافات و تصريحات كانت بره دار الحكمه , وشوية صور و مشاهد , و نقول
إن الكتله الأكبر من الاطباء رفضت تسييس الحدوته و الحمد لله نجحت في كده .
.
- عارفين مشكلتنا
بقت إيه ؟ لما كتبت بوست من كام ساعه بتكلم فيه عن القانون و العدل للكل و رفض البلطجه
كفعل ( أيا ما يكون البلطجي ) و حاولت أحذر بس و أقول اني خايف ( و الخوف حق مشروع
) , يعني خلّو بالكو من الديابه , لقيت الناس هاجت و ماجت و شوية بلوكات محترمه , مشكلتنا
إننا وصلنا للمرحلة دي , في كل قضيه أو حدوته أو حادثه أو موقف هتلاقي محدش بيقرا ولا
بيسمع ولا بيفكر , ممكن ياخد عنوان البوست أو يقرا عشان يطلع كلمه من وسط الكلام و
يعتبرها ال KEY WORD و يبني عليها بقى المبنى اللي
هو أصلا في كل الأحوال هيبنيه !! .
.
- مشكلتنا باختصار
إننا في كل مره بيبقى قدامنا شارع طويل , أولة ضلمه و أخره ضلمه , و العنوان الصح
( التشخيص و العلاج ) في نص الشارع و نص الشارع ده منوّر , بس محدش عايز يوصل لنص الشارع
, و لو قولت رأيك و حاولت توصل للعنوان الصح اللي في النور هتلاقي اتنين بيشتموك ,
اللي في أول الشارع الضلمه هيشوفك خاين و ضد الدوله و اللي في أخر الشارع الضلمه هيشوفك
خاين و طبّال و ضد الثوره .
.
- يا مولانا انا
بقول القوانين لازم تتغير و تتفوّر , و محتاجين حزم على الكل , ومحدش يلوي دراع دوله
, يعني مش عايز أخرج من أم دولة الباشا الظابط و الباشا القاضي و أدخل في أم دولة الباشا
الدكتور و الباشا المحامي , أشرحهالك ازاي دي ؟! .
........................................................................................................................
Mohamed
Hussein
12
فبراير 2016·
جمعيه عموميه طارئة
للاطباء ................... متضامن و لكن
.
1- الساده الأطباء
, لو سمحتو حدّدو الهدف بتاعكو , التارجيت , جايين ليه ؟ عشان تكرار حالات البلطجه
و الإعتداء على الأطباء و هيئة التمريض في المستشفيات الحكوميه , وبس , يعني أي شعار
تاني هيترفع يبقى هجص و افتكاسات .
.
2- الساده الأطباء
, لو سمحتو حدّدو المسمى الوظيفي للمتضرر اللي هيحضر الجمعيه أو يقف قدام دار الحكمه
, اسمه الطبيب , مش الصحفي ولا المحامي ولا الحقوقي ولا الناشط السياسي , شوفت ناس
منهم في الصور , أعرفهم بالإسم , و اعرف انهم غاويين تصوير و عايزين جنازه يشبعو فيها
لطم .
.
3- الساده الاطباء
, لو سمحتو حددو جهة الخصومه , و هنا جهة الخصومه هي الفعل نفسه , اللي هو البلطجه
و الإعتداء , مش وزارة الداخليه ولا حتى معهد امناء الشرطه , الإعتداء على المستشفيات
مرفوض في المطلق , من العامل و الفلاح و الجزّار و السباك و المهندس و ظابط الشرطه
و القاضي و بياع البليله .
.
4- الساده الأطباء
, حددو مطلبين اتنين بس , الأول هو إلزام الدوله بتأمين الطوارئ و المستشفيات الحكوميه
و التاني هو تغيير القوانين الباليه , عشان أمناء الشرطه أخلو سبيلهم و اعتبرو الحكايه
اعتداء على موظف أثناء تأدية عمله , و هو ده القانون , تبقى خصومتنا مع القانون نفسه
.
.
5- الساده الأطباء
, قبل ماتقولو كلمة واحده في الجمعيه الطارئه لازم تقفو بشكل كامل و تعتذرو بالإجماع
عن قفل مستشفى المطريه , عشان حضرتك ممكن تقفل عيادتك و انا ممكن أقفل صيدليتي و المعلم
عكوة الجزار يقفل محل الجزاره بتاعه , دي مشاريع خاصه يعني ملكيه خاصه تعمل فيها اللي
انت عايزه , زي بدلتك و عربيتك , إنما قفل مستشفى حكومي يبقى اسمه بلطجه مضاده .
.
6- الساده الاطباء
, زي مالمفروض نطالب بتغيير القانون و الحكايه ماتبقاش اعتداء على موظف أثناء تأدية
عمله و تخلص بغرامه , لازم كمان نطالب بتغيير القوانين الحاكمه لأهمال الأطباء و الممرضين
, عشان فيه ناس كتير أوي غلابه بتموت أو بيحصل لها عاهه مستديمه و التهمه العبيطه اسمها
( إهمال طبي ) .
.
7- الساده الأطباء
, متضامن جدا مع حقكو ومع الحق في المطلق , وضد البلطجه بكل صورها و أشكالها , معلش
, مش عارف أكون طبال و كبرت شويه و بقيت برفض فكرة ( القطيع الأعمى ) , و مش مهم خالص
هيتقال عليا ايه .
...................................................................................................................................
ليست هناك تعليقات:
إرسال تعليق