Mohamed
Hussein
14
ديسمبر 2017·
ماتفاجئتش و الله
بحكاية ان مرسي كان بيتخابر لحساب أمريكا , ولا أي اندهاش , ماهي الناس لما تفهم مش
هتتفاجئ , تفهم ايه بقى ؟ بص يا سيدي
.
- أولا , مرسي
مكانشي يلزمه انه يكون شغال في أمريكا عشان يتم تجنيده ضد مصالح بلده و أمنها القومي
, لا هو و لا أي عضو في جماعته الإرهابيه , تجنيدهم ممكن يتم ببساطه شديده و هما في
بيوتهم في مصر .
.
- طب ليه الكائن
الإخوانجي بسهوله كده يتخابر و بسهوله يخون بلده ؟
القصه و مافيها
إسمها عقيدة الجماعه , عقيدتهم مفهاش حاجه اسمها بلد ولا وطن , بلدهم و وطنهم و دينهم
و مذهبهم هو التنظيم الدولي نفسه , و بالتالي هو بيتخابر ضد مصر و يخونها و مايكونشي
جواه أي غصه أو شعور بالندم , هو قناعته انه مابيعملش حاجه غلط , هي ايه مصر دي اللي
أتخابر ضدها؟ يعني ايه كلمة وطن ؟
.
- كمان حاجه مهمه
, الأصل في عقيدة الجماعة هو ( الغايه تبرر الوسيله ) , و الغايه هنا بتكون رضا الأمريكان
عن التنظيم الدولي ( مش عن محمد مرسي كشخص ) , مقابل الرضا ده مستعد الكائن الإخوانجي
انه يعمل اي حاجه , بما فيها خيانة الوطن اللي هي أصلا مابيعتبرهاش خيانه .
.
- الكائن الإخوانجي
ممكن يكدب 70 مره يوميا و ينشر إشاعات و هو عارف انه بيكدب , بس مجرد اعتقاده ان الكدب
و الإشاعات هيفيدو تنظيمه الدولي بشكل ما , مش هيلاقي أي غضاضه في كده , خالص , ولا
الهوا .
.
- يعني ايه الكلام
ده ؟ طب وسّع صدرك شويه عشان تعرف تستوعب اللي جاي , مرسي ( أو أي عضو في الجماعه
) ممكن يمارس الخيانه و العماله و يتخابر وهو على سجادة الصلاه , يمارسهم و هو صايم
, يتفق عالتخابر جنب ستاير الكعبه , ده كله عادي , بالنسبالهم عادي , مانا قلت لك
, مفيش حاجه في عقيدتهم اسمها وطن عشان يتكسفو و يقولو بنتخابر ضده , و رضا الأمريكان
عنهم يسوى كتير .
و دي كل الحدوته
باختصار , حدوته تنظيم صهيوني إرهابي دولي مايعرفشي انتماء ولا وطن .
.........................................
طب ليه القضيه
دي مأعلنوش عنها في وقتها و ليه سابو مرسي يبقى رئيس لمصر ؟ ماهو لو حضرتك تعرف الفرق
بين حكم الأوطان في مرحلة السيل و الطوفان و بين إدارة كشك سجاير , ماكنتش تسأل السؤال
ده .
.
بص يا حبيبي ,
في 2011 و 2012 لو كان حد قالي كلمه واحده على تسريحة شعر البرادعي كنت ضربته بالنار
, ولو حد قالي الإخوان قتالين و خونه و غدارين كنت دوست عليه بالعربيه , و انا كان
زيي ملايين متلتله في حالة غيبوبه , لما تعرف بقى الدوله اتعاملت معانا ازاي , مع السيل
الجارف ده و امتصته وصبرت عليه لحد مالملايين فاقت من الغيبوبه و الأقنعه تساقطت ,
هتقول المخابرات المصريه أدارت معركة بمنتهى العبقريه والإحتراف .
.
و لو عايز تعرف
برضه خطورة مواجهة السيل الجارف على أمن الوطن والنتيجه هتكون ايه ؟ شوف اللي حصل في
سوريا و ليبيا , القذافي و بشار مفيش عندهم أجهزه سياديه محترفه تعرف تدير المعركه
, فقررو انهم يواجهو السيل بصدورهم , بمنتهى الغشم , و النتيجه زي ماحضرتك شايف كده
.
............................................................................................................
Mohamed
Hussein
14
ديسمبر 2017·
بوتين بتاع روسيا
!!
(( رد الرئيس الروسي
فلاديمير بوتين على سؤال من الصحفيين بشأن أهمية النفقات العسكرية في روسيا بحكاية
حول طفل أبدل خنجر والده بساعات.
وروى الرئيس الروسي
حكاية عن نجل ضابط بحري متقاعد، أقر لوالده بأنه أبدل خنجره بساعات جديدة، ورد عليه
أبوه: "هذه الساعات جيدة في الواقع، لكن إذا جاء إلينا اللصوص غدا، لقتلي وأمك
واغتصاب أختك الكبرى، فإنك لن تستطيع إلا أن تقول لهم: مساء الخير، الساعة 12:30 بتوقيت
موسكو! )) .
.
عصام حجي بتاع
ثورة الطماطم !!
(( احنا بنشتري
سلاح ليه بقى ؟ )) .
...............................................................................................................
Mohamed
Hussein
14
ديسمبر 2017·
فجأه كده يا مؤمن
تلاقي أمريكا بطلت تجيب سيرة بشار الأسد , و تركيا تقول معندناش مانع انه يكمل , و
السعوديه ماتقولشي بشار لازم يرحل سبعتاشر مره في اليوم .
.
تقوم تلاقي نفسك
بتسأل سؤالين , بمنتهى البساطه , يا أمريكا انتي و تركيا هو بشار كان سفاح و ديكتاتور
و بقى طيب و كيوت و ديموقراطي أول امبارح بالليل ؟ يا سعوديه يا حبيبتي هو بشار كان
شيعي و علوي و بقى سُنّي و اسمه الرباعي عمر حافظ الأسد بن الخطاب , و مسمّي بنته عائشه
؟.
.
يابني الحدوته
خلصت و المأموريه تمت بنجاح , المأموريه كانت تدمير الجيش السوري زي ما دمرو الجيش
العراقي و الليبي , و حكاية ديكتاتور زيها زي أسلحة الدمار الشامل و السلاح الكيماوي
و الديموقراطيه و الربيع العربي , اسمها الذريعه اللي بيستخدموها للتدمير و الخراب
, بيستخدموها او بمعنى أصح بيستخدمو معاليك .
.
طب فين بقى حكاية
حلب تحترق ؟ ابقى تعالى وانا اقولك فين , طب فين التحالف السني بزعامة أمريكا لمواجهة
المد الإيراني (و النبي حلوه أوي التحالف السني بقيادة أمريكا , دي نكتة القرن الواحد
وعشرين و السبعه وعشرين على التوازي ) .
.
يا أمةً ضحكت من
جهلها الأممُ و التعالب و الفيران و النسانيس و القرد أبو بتاعة حمره .
...............................................................................................................
Mohamed
Hussein
13
ديسمبر 2017·
خبر صغير و حدوته
الخبر بيقول :
دبلوماسيه بالخارجيه الأمريكيه تستقيل و تؤكد , الجيش يتدخل في سياسات الوزاره !!
.
ده الخبر حضرتك
, و الحدوته كالتالي , من الجلده للجلده
1- أمريكا هي الدوله
العظمى الوحيده في العالم حاليا , القطب الأوحد , بتمارس بلطجتها على بلاد الله و محدش
يقدر يبلطج عليها .
.
2- أمريكا محميه
بموقع جغرافي , هي أشبه بجزيره كبيره أوي وسط مسطحات مائيه شاسعه , عشان كده بتلجأ
باستمرار انه يكون لها قواعد عسكريه في كل منطقه في العالم , أمريكا بقواعدها العسكريه
( و عملائها ) تقدر تضرب أي دوله في عمق أراضيها و تدخل بقوات بريه كمان , إنما أي
دوله عايزه تحارب أمريكا هيبقى اخرها تضرب كام صاروخ طويل المدى و تطلع تجري , هتروح
فين بقواتك البريه وسط المحيطات يا مولانا ؟ و يمكن حلك الوحيد انه يكون لك قاعده عسكريه
في كندا ولا المكسيك و ده طبعا مش هيحصل و مفيش حاجه اسمها استقلالية دول ( كندا و
المكسيك ) لو كان الأمر يتعلق بالأمن القومي لأمريكا , و دي أول قاعده (في الامن القومي
لأي دوله,مفيش حاجه اسمها استقلالية دول مجاوره )
.
3- أمريكا اللي
هي البلطجي الأعظم و الأقوى كان من باب أولى تعمل فصل للمؤسسات عن بعضها , يعني الخارجيه
خارجيه و الجيش جيش , بس الكلام ده شعارات بيتم تصديرها للحمقى في الشرق الأوسط
.
4- ترامب نفسه
بيستعين بمجموعة من ( الجنرالات ) كمساعدين و مستشارين في كل نواحي الحياه الأمريكيه
, لا حد هناك بيقول عسكرة وزارة كذا , و لا جنرالات البيزنس ولا حكم العسكر , لا صحفي
ولا مواطن , برضه أم الشعارات دي بيتم تصديرها للحمقى بتوعنا مش أكتر .
.
5 - أردوغان السفاح
خليفة الشواذ طلع بتصريح في منتهى الإنحطاط من كام يوم , بعد ما ترامب قرر نقل السفاره
الأمريكيه للقدس طالع يقول ( كده تبقى أمريكا ايديها تلطخت بالدماء !! ) , ياخي أحا
و مليون أحا , أمريكا اللي بقالها سنين ايديها غرقانه في دم ملايين العرب ( مع الكلب
أردوغان نفسه ) , في سوريا و العراق , كانت ايديها نضيفه و اتلطخت بالدماء لما نقلت
السفاره ؟! .
.
6- اهو تصريح أردوغان
بيفسّر المشهد المنحط , و إزاي بيتم قيادة قطعان الخرفان في الوطن العربي و ازاي القدس
تتحول لقميص عثمان و أداه للتجاره مش اكتر , السفاح سفاح لما يتسبب في قتل و تشريد
ملايين العرب و المسلمين مش لما ينقل سفاره يا تاجر يا حقير .
.
7- نفس القطعان
العربيه اللي هاجت و ماجت لما رسام دنماركي رسم كاريكاتير مسئ لسيدنا النبي !! و يكأن
سيدنا النبي و رب سيدنا النبي بيحزنهم كاريكاتيرمسئ أكتر ما يحزنهم تشريد و قتل ملايين
البشر و خراب الدول و هدم الجيوش و تحويل الاوطان لكوم رماد ( فتلاقي فجأه ان عداوتك
مع الدنمارك مش أمريكا و بريطانيا و اسرائيل , والنبي انت زبون لُقطه ) .
.
8- الكلام اللي
فوق ده بيختصر الحدوته , ترامب مايختلفش عن كلينتون ولا عن اوباما , كله بيلعب دور
مرسوم له من أجهزة سياديه , مفيش حاجه اسمها ديموقراطيه في المطلق ولا صلاحيات رئيس
في أمريكا ولا صقور و حمام , ده البلح اللي بيتصدر للحمقى , و بيختصر كمان مشهد العملاء
في المنطقه زي الكلب أردوغان ( عضو الناتو و اللي عنده اكبر قاعده عسكريه لأمريكا
) و ازاي بيتاجرو بقضايا زي القدس , و بيختصر حالة القطعان و الحمقى اللي كانو عنصر
مؤثر جدا في خراب بلادهم و أوطانهم .
.
9- أخيرا مش هبطل
أقول , الحمد لله على نعمة الجيش المصري العظيم و كفى بها نعمه , و الله والله لو البلد
دي كانت اتسابت للحمقى و الزلنطحيه و تجار الشعارات , كان زماننا بالمعنى الحرفي بنغُتصب
في مخيمات اللاجئين , و في الخلفيه أطلال وطن !! .
................................................................................................................
Mohamed
Hussein
12
ديسمبر 2017·
أصدقائي و حبايبي
اللي اتحوّلو امبارح بالليل و بقو خبراء في الطاقه النوويه و الذريه , الشرقيه منها
و الغربيه والدقهليه .... تحيه طيبه و بعد .
.
بصراحة ربنا عايز
أقولكو سر خطير , وانا عارف اني بعد البوست ده هتبقى حياتي مهدده بالخطر و هتعرض للسجن
و التعذيب في مناطق حساسه , إنما لازم أقول السر اللي السيسي و الحكومه خبّوه عليكو
في موضوع مفاعل الضبعه النووي .
.
اللي حصل كالتالي
, و الكلام ده من مصادر قريبة الصله بمصادر أخرى موثوقه , من الأخر و باختصار :
.
- عبد الفتاح السيسي
حب إنه يعمل مفاعل نووي في الضبعه , مع اننا متلغمطين كهربا و مايلزمناش , طب ليه يعمل
مفاعل نووي ؟ عشان يا سيدي قال يغّطي على خسارة الزمالك للدوري السنين اللي فاتت .
.
- المهم السيسي
ماكدبش خبر , قام راكب عربيته و وصل لحد مدرسة المنهل اللي في مصطفى النحاس , لقى عُمّال
قاعدين و كل واحد معاه أجنه و شاكوش , راح لهم و سألهم , تعرفو تبنو مفاعلات نوويه
يابني انت و هو ؟ قالو له طبعا يا باشا , داحنا لسه دكي النهار بانيين مفاعل نووي صغير
لواحده هانم في مصر الجديده , قال لهم طب اركبو معايا , و فعلا خدهم معاه لحد الضبعه
.
.
واحد من العمال
اسمه سلامه , و هما شغالين في المفاعل بص للريس كده و قاله يا باشا , احنا فيه حاجه
معملناش حسابها , هندفن النفايات النوويه فين ؟ الريس انفعل و قاله نعم ياخويا ؟ بتسألني
أنا ؟ مش انتو اللي خبراء في المفاعلات النوويه ؟ وقّف يابني الشغل ده و كل واحد ياخد
يوميته و اتوكلو على الله .
.
في اللحظه دي ظهر
شاب اسمه عبد الصمد , و قاله استني يا باشا , انا عندي فكره , فيه حتة أرض فاضيه ورا
كايروفيستفال بتاع التجمع , احنا نعمل هناك حفره كبيره ندفن فيها النفايات النوويه
بالليل في الضلمه و الناس نايمين , و بعدين نردم عالنفايات و نحط شوية أسمنت و زلط
ولا من شاف ولا من دري , الفكره عجبت الريس و قال خلاص يا ولاد , كملو شغل , ربنا يوفقكو
.
.
هي دي كل الحدوته
, و اللي مش متأكد يروح ورا كايرو فيستفال هيلاقي حفره كبيره جاهزة و قاعد هناك غفير
اسمه بسطويسي بالبندقيه بتاعته و جنب منه 7 شكاير أسمنت , و لوحه مكتوب عليها ( مكان
مخصص لدفن السيكو سيكو ) , ماهما طبعا مش هيقولو دفن نفايات نوويه , عشان تبقو تصدقو
بس .
................................
................................
أصدقائي الغالين
, و عزة جلال الله مصر دي لو مرارتها ستانلستيل , ماركة كاتربيلر , ماكانت تستحمل أبدا
اللي انتو بتعملوه فيها من سنين
إنما عايز أقولكو
3 حاجات
1- طبعا الكلام
اللي فوق ده مجرد افتكاسه ألفتها حالا و المفروض مايصدقهاش عيل في تالته ابتدائي ,
لكن بما إننا في زمن العته فممكن ناس تصدقها عادي .
.
2- يارب تصدقو
ان فكرة انشاء مفاعل نووي مصري روسي بتنفذه شركة روس أتوم العملاقه بيختلف تماما عن
فكرة إنشاء كشك سجاير بيعمله عم حوكشه المقاول .
.
3- مئات العلماء
و الخبراء اللي هيشتغلو في المشروع ده من روسيا و مصر أكيد أكيد بيبقو عاملين حساب
كل كبيره و صغيره , و أكيد والله بيفهمو أكتر من ابن عمك ساقط الإعداديه و من ست أم
شوشو جارتكو .
...............................................................................................................
Mohamed
Hussein
12
ديسمبر 2017·
عاجل , أول حالة
وفاة نتيجة تسرب إشعاعات من مفاعل الضبعه النووي !! .
.
ممممممممم يابني
مش منسوب النيل قل و التماسيح ظهرت في مدينة نصر و المحاصيل الزراعيه ماتت و احنا مبقيناش
لاقيين مايه نشربها بسبب سد النهضه اللي لسه ماخزّنش ولا نقطة ولا اكتمل بناؤه أصلا
؟ .
طيب بتستغرب ليه
بقى لما يموت كام واحد بسبب تسرب إشعاعات نوويه من مفاعل الضبعه اللي لسه ماتحطش فيه
طوبه ولا انضرب فيه كوريك ؟! .
.
طب هقولك حاجه
, هات ايدك كده , و شبكة العشره دول , انا مره كنت قاعد في ساعة عصاري , معايا ورقه
كبيره و قلم رصاص و برسم ترعه , يادوب رسمت الترعه من هنا و لقيت المايه عوم تحت رجليا
وانا قاعد , من خضتي القلم الرصاص وقع منّي في المايه , بمد إيدي عشان أجيبه لقيتني
مسكت سمكه صغيره .
.............................................................................................................
Mohamed
Hussein
12
ديسمبر 2017·
يابني احنا بنعمل
محطه نوويه في الضبعه عشان أأأ
- لا ماتكملش
, احنا هندفن فيها النفايات النوويه بتاعة روسيا .
.
ياض استنى انا
ماقولتش ولا كلمه
- وانا مش عايز
اسمع , هي نفايات روسيا و عماد صاحبي مأكد لي .
.
يا حبيبي راسك
اللي فوق رقبتك دي ولا راس ابن خالتك ؟
- لا راسي .
.
طب اسمع
- عايز تقول ايه
؟
.
مفاعل الضبعه النووي
هيكون مصدر مهم جدا لتوليد الكهربا , مصر بتنوّع مصادر انتاج الطاقه , محطات سيمنز
العملاقه , و محطات توليد كهربا من الرياح , و لوحات توليد الكهربا باستخدام الطاقه
الشمسيه , و السد العالي , و أخيرا مفاعل الضبعه النووي .
- ليه ده كله ؟
هو احنا هنعمل فرح ؟
.
لا يا جحش , دي
اسمها التنميه المستدامه , بتحسب فيها حاجتك من الكهربا النهارده و بعد عشرين و خمسين
سنه , عشان تعرف تعمل مصانع و طرق و في النهايه ماتعتمدش على مصدر واحد ولا اتنين
, و ممكن نوصل لمرحلة تصدير الطاقه .
- بس احنا بنعمل
المفاعل ده بالذات عشان ندفن النفايات النوويه بتاعة روسيا .
.
ياهبل يابن الاهبل
مبقاش فيه حد بيدفن نفايات , بطل تقرا في مجلة ميكي ماوس و تتخيل نفسك بقيت عالم ذره
, يعني 29 مليار دولار و دراسات مستمره من سنه و وزرا رايحين و جايين و نتصور قدام
العالم كله في مؤتمر صحفي وبوتين و السيسي يوقعو عشان في النهايه نعمل تُرْبه لدفن
النفايات , يا عرة مخاليق ربنا ؟ .
- طب خلاص مش هندفن
النفايات , بس المبلغ ده كبير و احنا بنكح تراب .
.
يا جحش المبلغ
ده بقرض روسي و هنبدأ الدفع بعد اكتر من 10 سنين و الفوايد من المشروع قد التكلفه
10 مرات .
- طب خلاص , مفيش
تكلفه , بس العالم كله دلوأتي بيتخلص من المفاعلات النوويه و بيتجه لمصادر اخرى للطاقه
.
.
انت ياض بتشتغل
ايه ؟
- انا حضرتك بشتغل
في خدمة العملا في شركة انترنت .
.
اه عرفتك عرفتك
, طب قولي بقى عندك كام لمبه منورين في دماغك ؟ أصل شكلها مش لاقطه شبكه خالص , اقولك
حاجه ؟ , حاول تشيل فيشة دماغك لمدة دقيقتين و حطها تاني يمكن ترجع تشتغل , أي خدمه
تانيه ؟ نورتنا يافندم
.................................................................................................................
Mohamed
Hussein
12
ديسمبر 2017·
من كام يوم شوفت
صوره بتختصر المشهد , مشهد شمامي الكوله في المجمل , يعني من الألف للياء , تعالو احكي
لكو المشهد كله و بعدها نحمد ربنا على نعمة العقل .
.
في المشهد :
- شاب ايطالي بيتقتل
, تنزل صاحبتنا بعدها بساعتين زمن و تشيل لوحه مكتوب عليها ( قتلتوه ليه , هو احنا
قصرنا معاكو في حاجه ؟ ) , صاحبتنا تتصور صورتين حلوين عشان تنزلهم عالفيس وسط لايكات
و أهات المناضلين ( على فكره الشاب ده اتقتل من اكتر من سنه و لحد النهارده النيابه
المصريه و الايطاليه و اجهزة البحث و التحري بتحاول توصل للمخطط الحقيقي و مش هيوصلو
, رغم انه معروف ليهم كجهاز مخابرات لكن مستحيل هيوصلو لدليل , انما صاحبتنا عرفت على
طول ان مصر اللي قتلته , و اتهمت بلدها و اتصورت الصورتين .
.
- حادث ارهابي
في فرنسا , يقوم صاحبنا نازل عامل وقفه بالشموع جنب السفاره الفرنسيه , إلّا ما عملها
عشان خاطر جنود بلده , انما برضه اتصور صورتين و نزلهم عالفيس , و يا سلام عالحنيه
يا سلام عالإنسانيه .
.
- أمريكا قررت
تنقل سفارتها للقدس , ينزل صاحبنا و بدل مايلعن جدود أبو أمريكا و ترامب يقوم يشتم
بلده و رئيسها و جيشها , و برضه صورتين حلوين و هو واقف و معاهم شوية لايكات للمناضل
البطل .
.
و يفضل شمام الكوله
يا مولانا يمارس هوايته المفضله في الوقاحه و الخيانه و الإنحطاط ( و الصورتين ) ,
و ينزل لتحت لتحت لتحت , لحد مايوصل للمشهد ده , مشهد حتمى أو نتيجه حتميه , انا و
الله ما اتفاجئت بيها :
.
المشهد لبنت بيسموها
نبض الثوره او معرفش قلب الخسايه ولا ايه , البنت مامتها ماتت بس في لحظة موتها كانت
برضه حريصه جدا عالصورتين , تتصور جنب الجثه , شوية لايكات حلوين , صوروني و النبي
و انا حاضنه جثة ماما !! .
.
و يمكن المشهد
ده لوحده يكون المشهد الختامي لعقل شمامي الكوله لما يوصل للحضيض و يبقى بالمعنى الحرفي
( عبد للصوره و اللايك ) , لكنه كمان بيحمل معنى تاني , ممكن نفهمه لما نتخيل مثلا
توكل كرمان و هي بتاخد صورتين سيلفي جنب أنقاض اليمن , ده نفس المشهد بالظبط , اليمن
بالنسبه لتوكل كرمان المفروض هي الأم اللي ماتت او بتحتضر , لكن ( المناضله ) توكل
كرمان هتكون بالتأكيد حريصه على الصوره و اللحظه و اللقطه و اللايكات .
.
..... و أدي كل
الحدوته , من الجلده للجلده , حدوتة ضحايا البرادعي و حمدين صباحي , لما عقلك يتحول
لكوره شراب يتلعب بيها لسنين طويله , و تلاقي نفسك بتتحول تدريجي و تبقى عبد لصوره
ولايك , هتوصل بالتأكيد لمشهد النهايه نفسه , انك باختصار تتصور جنب جثة الحاجه !!
.
..................................................................................................................
Mohamed
Hussein
11
ديسمبر 2017·
أخيرا , أبو مكه
محمد صلاح أحسن لاعب في أفريقيا بحسب إستفتاء ال BBC
, عقبال ماتفوز بجايزة الكاف يا مصري يا أصيل , و السنه الجايه نلاقي إسمك في المرشحين
لجايزة أحسن لاعب في العالم , انت مش أقل منهم .
...........................................................................................................
Mohamed
Hussein
11
ديسمبر 2017·
بوتين يوقع مع
السيسي على عقود محطة الضبعه النوويه .
بوتين : مستمرون
في تعزيز التعاون العسكري مع مصر
بوتين : انشاء
منطقه صناعيه روسيه في محور قناة السويس ب 7 مليار دولار .
بوتين : مستعدون
لتوقيع بروتوكول عودة حركة الطيران .
بوتين : تعزيز
التبادل التجاري مع مصر بزيادة قدرها 4 مليار دولار .
بوتين : عليا الطلاق
ماحد هيفوز بكاس العالم اللي هيتلعب عندنا غير منتخب مصر .
................................................................................................................
Mohamed
Hussein
10
ديسمبر 2017·
مفيش بني أدم عاقل
في الشرق ولا في الغرب إلا و بيقرّ و يبصم بالعشره إن مفيش حرب هتقوم ضد الكيان الصهيوني
إلا بمشاركة الجيش المصري , دي حقيقه لا تنفيها معاهدة سلام ولا معاهدة عبد السلام
, و الحكايه مش سببها حدود مشتركه مع اسرائيل , الأردن لها حدود مشتركه و فلسطين لها
و سوريا و البحر المتوسط !! , يعني اللي عايز يوصل لعمق تل أبيب مش محتاج أصلا إنه
يمر في الأراضي المصريه .
.
طيب حاضر , من
عنينا والله , هنبقى نحارب الصهاينه للمره الخامسه , بس الأول نخلّص شوية الإرهاب اللي
في إيدينا و نبني اقتصاد قوي و نقف على رجلينا و بعدين نلاقي أي كرامه كده من أصحاب
القضيه الحقيقيين , أهل فلسطين , يبيّنو شوية كرامات , ينزلو سلاحهم اللي رافعينه في
وشنا من سنين , يحترمو ألاف الشهداء اللي قدمتهم مصر عشان القضيه , يعرفو إن عدوهم
في الشمال مش في الجنوب , يبطلو يشتغلو مرتزقه عند عيل صايع بيحكم كشك عالخليج , يفهمو
إن أردوغان أخره كام شعار حنجوري و كام خطبه رنانه و جملتين و بوسه و عضه , و إنه أكبر
عميل و صديق للصهاينه , و يبدأو معركة حقيقيه ضد العدو اللي بيحتل أرضهم , معركة يشارك
فيها كل عناصرهم و فصايلهم .
.
مصر هتخلص من الإرهاب
و تقف على رجليها اقتصاديا قريب جدا , يمكن خلال سنه ولا اتنين , إنما امتى الفلسطينيين
هيفهمو و يدركو و يبطلو زربحه و يعرفو عدوهم مين و فين , و يعرفو مين بيوضيهم و مين
( بينجسهم ) و مين بيبيع لهم شعارات و فلايات ؟ اعتقد الكلام ده هيحصل سنة الله أعلم
, و احنا بقى تاني يوم الصبح بعد سنة الله أعلم هنبقى نشارك في الحرب مع إننا ك ( مصر
) ملناش أرض محتله !! .
.
و وقتها برضه حبايبنا
الصيّع بتوع جيش كامب ديفيد و الجيش المصرائيلي هيقولو نفس الكلام , عادي مفيش مشكله
, اتعودنا على وساختهم من سنين , اتعودنا أوي , لدرجة انهم لو في يوم بطلو وساخه هنقلق
على صحتهم و ناخد اتنين كيلو برتقان و نروح نزورهم .
.
روح يابني الأول
اعرف مين مصر و مين عدوك ؟ روح اتعلم ازاي تتكلم عن مصر وجيشها , و روح حارب عدوك بكل
ما تملك , بدمك و روحك و مالك , هتلاقي مصر مش مستنيه إنك تنادي عليها , ده قدرنا من
زمان , قدر الكبير , بس الكبير يلزمه الإحترام , كل الإحترام , لما تتكلم عن مصر و
جيشها .
.
مش هتفهم ولا هتدرك
و لا هتحارب عدوك و هتفضل تزربح و تقل أدبك و ترفع سلاحك في وش مصر هننفخك مش ندافع
عنك , و هتبقى عدونا زيك زي الصهاينه , دي الحدوته باختصار , خلصانه بمقاومه حقيقيه
و فهم و إدراك و توقير للكبير .
..................................................................................................................
Mohamed
Hussein
10
ديسمبر 2017·
خالد علي ( المرشح
الرئاسي ) : في 25 يناير ارتبكت اسرائيل و هرب سفيرها من القاهره و تسلق المتظاهرون
الحوائط لإنزال علم اسرائيل من سماء بلادنا , هكذا كنا و هكذا كانو وقت ثورة يناير
المجيده فقط , لا قبلها ولا بعدها !! .
.
عزيزي الأستاذ
المناضل من النوع الكومبو , خالد علي :
- في 25 يناير
هرب السفير الإسرائيلي و سفراء كتير لأن الحاله كان اسمها إنفلات أمني , و وضع سياسي
غير مستقر , في الحاله دي أول تعليمات للدول إنه البعثه الدبلوماسيه تغادر و تبقى ترجع
لما تتضح الصوره , في العراق حصل كده و في سوريا و في ليبيا و اليمن و الصومال و قبائل
الكوتوموتو الأفريقيه و كوم الشقاف , و لو دوله حصل فيها زلزال أو طاعون أو كوليرا
أو تهديد بعمليات إرهابيه كبيره , بتغادر البعثات الأجنبيه خوفا على أرواحهم , سواء
كانت بعثة الصهاينه أو أي دوله تانيه , و بالتالي لو الكوليرا ضربت موزمبيق مثلا و
البعثات الدبلوماسيه بدأت تغادرها بما فيها بعثة الصهاينه يبقى المفروض نشوف مرشح رئاسي
موزمبيقي يفخر بأمجاد الكوليرا اللي اتسببت في مغادرة البعثات الدبلوماسيه .
.
- انا مش عارف
بصراحه هو معاليك بتفخر بإيه بالظبط ؟ بالإنفلات الامني ؟ طب خد التقيله بقى , لو الجيش
المصري مكانشي لم الليله دي كنا هندخل في حرب أهليه , و ساعتها كل السفارات الأجنبيه
هتتقفل بالضبه و المفتاح و الترباس و كل البعثات الدبلوماسيه هتختفي من مصر في ظرف
ساعتين , في إنجاز جديد و عظيم يُحسب للحرب الأهليه , لا قبلها ولا بعدها !! , أه و
الختمه الشريفه .
.
أصدقائي الحلوين
بتوع بلاش حملات تشويه للمرشحين , عايز أسألكو كام سؤال صغيرين , بهدوء شديد .
.
1- هو الأكاونت
ده بتاع خالد علي ولا مسروق ؟ بتاع خالد علي .
2- يعني دي أفكاره
و نظرياته و دماغه ولا دماغ ابن خالته ؟ لا دماغه هو .
3- هل خالد علي
قال الكلام ده تحت تهديد السلاح مثلا ؟ لا .
4- طب العقليه
اللي تفكر بالشكل ده تنفع تشتغل ايه ؟ رئيس لدوله بحجم مصر ولّا بياع بليله ؟ جاوب
انت بقى .
.....................................................................................................................
Mohamed
Hussein
9
ديسمبر 2017·
أحلام مشروعه
.
إمبارح نمت بالليل
و حلمت حلم جميل , قال خير اللهم اجعله خير , حلمت ان فضيلة العلامه يوسف القرضاوي
طلع في برنامج في قناة الجزيره العظيمه و دعى المسلمين و العرب في مشارق الأرض و مغاربها
إلى الجهاد ضد العدو الصهيوني الغاشم .
.
و على الفور استجاب
خليفة المسلمين رجب أردوغان لدعوة العلامة القرضاوي , و قرر تجييش الجيوش التركيه لمحاربة
الصهاينه , كما قرر الإستعانه ايضا بالجنود الأمريكان اللي موجودين في قاعدة انجرليك
الأمريكيه اللي في تركيا , و الأمريكان ماكدبوش خبر و قالو له جايين معاك نحارب الصهاينه
.
.
و على الفور برضه
استجاب أمير قطر لدعوة القرضاوي و قرر تجييش الجيش القطري بكل جنوده السودانيين و الموزمبيقيين
و الهنود لمحاربة الصهاينه , و قرر برضه انه يستعين بالجنود الأمريكان الموجودين في
القواعد الأمريكيه اللي في قطر , قالو له رجلنا قبل رجلك و لازم نحرر القدس من الاحتلال
الصهيوني .
.
أيات عرابي سمعت
دعوة القرضاوي و نزلت ( من أمريكا ) على فلسطين عدل , عشان تقود الميسره في الجيش العرمرم
, و قادة حماس سابو فنادقهم في طهران و نزلو جري عشان يحررو أرضهم , و الجماعات الجهاديه
في قطاع غزه قالت لانصارها سيبكو من حكاية الأنفاق وسينا و خلينا نحرر أرضنا , عدونا
في الشمال .
.
و قيادات الإخوان
اللي هربانين في أمريكا و بريطانيا ( و اللي معاهم الجنسيه الأمريكيه و البريطانيه
) قررو هما كمان انهم يلبو النداء , و استأذنو من الحكومات الأمريكيه و البريطانيه
انهم يروحو يحاربو الصهاينه , قامت الحكومات دي قالت لهم و النبي مانسيبكو تسافرو لوحدكو
أبدا , احنا معاكو و قواتنا و طياراتنا تحت أمركو لحد مانطهر أرض فلسطين من الصهاينه
الأنجاس .
.
و بعدين ياسيدي
اتلم الشامي و المغربي و كل المناضلين و المجاهدين و هزمو الصهاينه شر هزيمه و حررو
القدس و المسجد الأقصى و كل شبر في الأراضي الفلسطينيه .
.
و في أخر مشهد
في الحلم عمل أردوغان حفله ضخمه جدا بمناسبة طرد الصهاينه من أرض العرب , و عزم فيها
كل قادة الجيوش اللي شاركت و جاب القرضاوي و أيات عرابي وتميم و عزمي بشارة ( عضو الكنيست
الإسرائيلي ) , و في الحفله قرر أردوغان انه يتجوز أيات عرابي بمباركة القرضاوي وسط
تهليل و تكبير الحضور , و في اللحظه دي شوفت الأمير تميم قاعد في ركن في الحفله لوحده
بيبص لأردوغان و عينيه مليانه دموع , بس ماعرفتش بصراحه هو بيعيط ليه .
................................................................................................................
Mohamed
Hussein
9
ديسمبر 2017·
القوة الناعمه
.... من فضلك خلي الدماغ صاحي
.
يعني ايه القوة
الناعمه ؟ ده المفهوم حسب جوجل و ويكيبيديا :القوة الناعمة هي القدرة على الجذب والضم
دون الاكراه أو استخدام القوة كوسيلة للاقناع.
.
أو ممكن نقوله
ببساطه , إنك تمتلك أدوات و أشخاص و كيانات يكون لهم تأثير خارج حدود بلدك , و التأثير
ده يبقى بيحصل من غير سلاح ولا حرب ( أدوات و نفوذ )
, القوة الناعمه
ممكن تكون مؤسسه أو أشخاص أو فرع من فروع المعرفه و الثقافه
.
أي دولة كبيره
في الدنيا بتكون حريصه على وجود وامتلاك السلاح ده اللي اسمه القوه الناعمه , و بتفخر
بكده و بتحافظ جدا عليه .
.
تعالى أقولك أمثله
كتير للقوه الناعمه في العالم , منظمات حقوق الانسان الأمريكيه و البريطانيه هما جزء
من القوه الناعمه للبلاد دي , و الميديا بتاعتهم كمان , بالنسبه لأمريكا و بريطانيا
ده سلاح بيمتلكوه , و بالنسبالنا احنا ده سلاح موجه في صدرنا , بيستخدموه في التشويه
و لوي الدراع و الفبركه , طب الحل ايه مع السلاح ده ؟ الحل انك تفهم , و تقولهم في
وشهم سلاحكو فشنك , و لما تلاقي عيل مصري شغال في المنظمات دي و بيقبض منهم و يقولك
انا بلا فخر شغال في منظمة كذا الحقوقيه الأمريكيه !! تقوله في وشه و بالفم المليان
: اه يعني صايع و خاين لبلدك وابن وسخه , مش تعمل منه بطل و أيقونه .
.
في فرنسا متحف
اللوفر و اليونسكو ( مع انها منظمه دوليه ) لكنهم جزء من القوه الناعمه لفرنسا , وفي
ايطاليا اول حاجه هتيجي في ذهنك هي الفاتيكان , ممكن تكون ماتعرفشي حاجه عن الأرجنتين
لكن تعرف مارادونا و ميسي , و تسمع عن البرازيل من بيليه , و البرتغال دي مين يا عم
؟ لا ماعرفش بس أعرف إن دي بلد كريستيانو رونالدو .....حتى القوه الناعمه ممكن تكون
أشخاص في أي مجال ولهم تأثير .
.
طب احنا في مصر
عندنا قوة ناعمه ؟ أه كتير جدا , لهم تأثير و إسم مصر بيتردد دايما مقرون بيهم ؟ أه
طبعا , نحافظ عليهم ولا نهدهم ؟ نحافظ عليهم .
أمثله للقوه الناعمه
في مصر ؟ كأشخاص ؟ أم كلثوم و عبد الناصر و نجيب محفوظ و زويل و مجدي يعقوب و مصطفى
مشرفه و محمد صلاح , اه محمد صلاح .
.
طب كفروع معرفه
و ثقافه ؟ في وقت من الأوقات كانت السينما المصريه جزء مهم من القوه الناعمه لمصر
, تأثيرهم في الوطن العربي يخلّيك تروح أي دوله عربيه من المحيط للخليج تلاقي أهلها
بيتكلمو بالعاميه المصريه , ده تأثير و نفوذ .
أبو الهول و الأهرامات
و معبد الكرنك و التحنيط و عظمة الفراعنه و تاريخ مصر و حضارتها جزء مهم جدا من القوه
الناعمه لمصر .
.
عندك كمان مؤسستين
, بيمثلو عمودين من عمدان المعبد المصري العريق , هما بالتأكيد جزء مهم للغايه من القوه
الناعمه بتاعتنا , المؤسستين دول اسمهم الأزهر الشريف ( أكبر مؤسسه و مرجعيه اسلاميه
في العالم ) و الكنيسه المصريه ( واحده من أكبر المرجعيات المسيحيه في العالم ) , شيخ
الازهر و بابا الكنيسه مش مجرد أشخاص عاديين , كلمتهم لها وزنها و حسابها و تأثيرهم
و نفوذهم الخارجي موجود , لما بيسافرو أي دوله بيتعاملو معاملة رؤساء دول , يبقى تختلف
مع الكيان ده أو الكيان ده , يكون عندك اعتراض على حاجات معينه ؟ و ماله حقك مش عيب
, بس بأدب , باحترام للكيانين , بعقل و فهم و إدراك , برغبه في التطوير و التنقيح مش
رغبه في التشويه و الهدم .
.
حاولت اكون هادي
جدا في البوست ده , يارب تكون الفكره وصلت , الهجاصين يمتنعون .
.............................................................................................................
Mohamed
Hussein
8
ديسمبر 2017·
وانت يابني نويت
على ايه ؟ هتروح تجاهد ؟ هتروح تحارب ؟
- لا حضرتك انا
هروح أقف على سلالم نقابة الصحفيين .
.
أه فكره برضه
, و تلعن جدود أبو ترامب و أمريكا و اللي جابو أمريكا والصهاينه اللي محتلين الأرض
العربيه .
- لا حضرتك أنا
هلعن جدود السيسي و مصر .
.
ليه يا بقره ؟
- يا عم انا شمام
كوله , لو ماجبتش سيرة مصر و السيسي و جيش مصر في كل حدث أو موقف أتحرق
.
أه فهمتك فهمتك
, صايع يعني .
- طبعا , واحد
مصاحب خالد علي و خالد البلشي , عايزني أطلع ايه ؟ طيار ؟ .
.....................................................................................................
Mohamed
Hussein
8
ديسمبر 2017·
شخبطه
............ ال c.v بتاعي لحد ما دخلت الجامعه
.
- عامل في جمع
دودة القطن , من سن 6 سنين ل 12 سنه , يعني خبره ست سنين , اليوميه كانت 40 قرش و وصلت
في الأخر ل جنيه .
- عامل بالأجره
لجمع القطن و تقطيع الحطب و ترحيل الرز و ضم الغله و الشامي و الدراس , من سن 8 سنين
ل 15 سنه , اليوميه من 1.5 جنيه ل 4 جنيه .
- شيّال تبن ,
مع تاجر تبن , اليوميه 5 جنيه , من سن 12 سنه ل 17 سنه .
- راعي غنم مع
جدي حسين ,من سن 6 سنين لحد ماتوفى ( كان عمري 10 سنين).
- عامل على خلّاطه
بتاعة صبّة السقف , اليوميه 5 جنيه , من 13 ل 16 سنه .
- شيّال طوب ,
أطلعه الدور الرابع ولا السابع , ده بيتحسب بالألف طوبه , غالبا كان الألف طوبه ب
7 جنيه , ياخدو يوم كامل , في سن 13 سنه .
- عامل باليوميه
تبع وزارة الري , بينزل الترعه و ينضفها من الغاب و القريع و الحاجات دي , في سن
11 سنه , اليوميه 4 جنيه .
.........................
.........................
طب ايه لازمه البوست
ده ؟ و ليه بحكي قصة حياة أهلي كأني أبوزيد الهلالي ؟ مع ان وضعي دلوأتي مختلف و الحمد
لله مستورين .
.
في لحظة قعدت أفكر
, ايه سر ارتباطي الغريب بالبلد دي و كأنها من بقية أهلي ؟ ليه استحمل سخافات و نطاعات
يوميه ؟ طب ماأشم كوله مع الشمامين و افتح صدري و أبيع شعارات و فلايات و ابقى مناضل
و بطل و مش بعيد أشتغل في الجزيره و أقبض بالدولار ؟ يعني أبقى خاين قصدي مناضل و زي
الفل , هي الحكايه و الحدوته وطن و مواطن ولا الحدوته ايه بالظبط ؟ .
.
اللي اكتشفته بقى
, ان الحكايه مش بس وطن و مواطن , فيه حاجه تانيه مهمه , أنا شبه البلد دي و هي شبهي
, بنشبه بعض , ناكل نجوع , ننام على سرير أو عالرصيف , نتعب أو نرتاح , نركب عربيه
أو نتشعبط في مقطورة جرار زراعي , إنما فينا حاجه و طبع , لا بنتباع ولا بنترهن و لا
بننحني , عندنا شوية جذور متمسكين بيها بغباوه , و شوية قيم و مبادئ , فقريين يا عم
الحاج بس نعجبك أوي .
.
فيه واحد كمان
فقري زي حالاتنا , و يمكن ده سر اعجابي بيه , إسمه عبد الفتاح السيسي , تعالى اقولك
كلمتين في ودانك , من غير هجص يا حمار , في ال 3 سنين اللي فاتو بتوع خراب المنطقه
, كان موسم و مولد , لو عايز فلوس زي الرز , شيكات على بياض من عربان الخليج , فانت
مش مضطر لترسيم حدود و يقولو باع الجزر و باع كليته الشمال , كان يكفي انك تشارك بقوات
مصريه في خراب سوريا و اليمن , افرد حجرك بقى و عبّي زي مانت عايز , و كنت هتبقى بطل
في عين الخونه و الشمامين و العواطليه و مش بعيد ربنا يفتح عليك و يقولو خليفة المسلمين
, بس الراجل ده فقري زي حالاتنا , و عنده نفس أم الجذور اللي متمسك بيها بغباوه , عقيدة
جيش و وطن , و حفان قيم و أردبين مبادئ .
.
طبيعي جدا إن محمد
الفقري اللي هو أنا , اللي شبه بهيه الفقريه اللي هي مصر , ينتخب الراجل الفقري اللي
هو عبد الفتاح السيسي , خلصانه أهي بمثلث متساوي الأضلاع , و ب 3 زوايا متساويه , كل
زاويه 60 درجه .
.............................................................................................................
ليست هناك تعليقات:
إرسال تعليق