Mohamed Hussein
7 ديسمبر 2017·
عملت ايه يا مولانا بقى في السنين اللي
فاتت دي ؟
- أنا يا ابني بلا فخر , جاهدت مع الأمريكان
ضد الجيش العراقي الكافر و صدام الطاغيه لحد ما أعدمنا صدام و دمرنا العراق و دمرنا
جيشها .
.
برافو عليك , و ايه كمان ؟
- و جاهدت مع الأمريكان و التحالف العربي
ضد الجيش السوري الكافر و بشار العلوي و ضد المد الإيراني لحد ما دمرنا سوريا و دمرنا
جيشها .
.
شئ جميل أوي , و ايه كمان ؟
- و خدت فلوس من قطر و سلاح من تركيا و
جاهدت مع حلف الناتو ضد الجيش الليبي الكافر و معمر القذافي الطاغيه لحد ما قتلناه
و دمرنا ليبيا و دمرنا جيشها .
.
انت عظيم جدا يا مولانا , و ايه كمان ؟
- و خدت سلاح من ايران وفلوس من قطر و جاهدت
ضد الجيش اليمني الكافر و قتلنا عبد الله صالح و دمرنا اليمن و جيشها .
.
انت هايل جدا , و ايه كمان ؟
- و جاهدت ضد الجيش المصري الكافر و خدنا
فلوس من هنا و من هناك و معانا ترسانات أسلحه و حاولنا ندمر مصر و جيشها بس ماعرفناش
.
.
معلش , حقك علينا و الله , طب عايز ايه
دلوأتي ؟
- عايز الجيوش العربيه تستفيق من غفلتها
و تحارب الصهاينه و الأمريكان عشان هيخلّو القدس عاصمه لاسرائيل .
.
أه فهمتك فهمتك , انت عايز الجيوش اللي
انت شاركت في تدميرها و الجيش المصري اللي ماعرفتش تدمره , عايزهم يحاربو الصهاينه
اللي انت ماضربتش عليهم طلقه رصاص واحده ولا قتلت منهم جندي واحد .
- بالظبط كده .
.
إلا قولي يا مولانا , عايز اسألك سؤال
.
- اه طبعا اتفضل
.
هو انت لما بتروح الخرابه الضلمه بالليل
و بتقابل حد هناك بترجع مبسوط و مستمتع ؟ ولا بتبقى محتاج أكتر ؟ .
- قصدك ايه مش فاهم ؟
.
قصدي يا مولانا , غور من هنا يلعن ميتين
أم فضيلتك , أه و عهد الله .
.............................................................................................................
Mohamed Hussein
7 ديسمبر 2017·
الحدوته ( من الجلده للجلده ) ... اقرا
حضرتك الأخبار دي كده :
.
الخبر الأول ( إضراب شامل في الأراضي الفلسطينيه
اعتراضا على قرار ترامب )
والله شر البليه ما يضحك , يا مولانا فكرة
الإضراب دي أليه اعتراضيه لذيذه أوي بس استنى , هي أليه تعترض بيها على قرار خدته حكومتك
و نظامك الحاكم , مش تعترض بيها على قرار أخدته قوات الإحتلال أو أي طرف داعم ليها
, انت بتواجه الإحتلال بإنك تعلن الإضراب في الأرض اللي انت مسيطر عليها ؟ عارف حالك
عامل زي ايه بالظبط ؟ زي واحد بلطجي دخل بيتك و اعتدى على أطفالك فانت انفعلت أوي و
قررت انك تمتنع عن الأكل , و لما انفعلت أكتر قلت و دين النبي هقلع ملط وأقف في البلكونه
يارب يجيلي دور برد و أموت فيها !! .
.
الخبر التاني : (حركة الجهاد الإسلامي تطالب
منظمة التحرير بسحب اعترافها باسرائيل ) .
والنبي ايه ؟ هو ده اخرك يا حركة اللامؤاخذه
الجهاد ؟ يعني لما منظمة التحرير تسحب اعترافها تبقى كده الدنيا بيس و ملكوش أراضي
محتله ولا القدس بقت عاصمه لاسرائيل ؟ طب مسميه نفسك حركة الجهاد ليه ؟ ماتروحي السجل
المدني تعزمي عالموظف بسيجاره كليوباترا و تغيري الإسم ده , سمّي نفسك أي اسم تاني
, حركة لوسي ابن طنط فكيهه,او حركة مدام سونيا التعبانه.
.
الخبر التالت :(اسماعيل هنيه يعلن النفير
العام و يطالب كل أنصار حركة حماس بالإستعداد لمتطلبات المرحله القادمه! ).
ياخويا النفير العام ده بيبقى قبل الأكل
ولا بعده ؟ و الله ضحكتني حكاية متطلبات المرحله القادمه دي , انتو لسه هتفكرو تعملو
ايه ؟ طب والنبي ياعم اسماعيل عشان الجو برد تتغطي كويس و ماتنساش تحط جورنان تحت الهدوم
عشان يدفي صدرك .
..............................
بصو , من الأخر كده
1- مش عايز أجلد الشعب الفلسطيني , لأن
حال العرب حواليهم مش مشجع , العرب ما بين قاتل و قتيل , و القتيل العربي اتقتل بإيد
القاتل العربي , يعني زيتنا في دقيقنا .
.
2- إنما ده مايمنعش إن أصحاب الشأن أولى
بالتحرك , بالدفاع عن أرض محتله و مغتصبه , وقتها هيجبرو كتير من الأنطاع انهم يتكسفو
على دمهم و يقفو وقفة رجاله مع أصحاب الحق و القضيه .
.
3- اسرائيل دوله قويه عسكريا في حالة الحرب
النظاميه فقط , يعني في حرب ضد جيوش , إنما حرب العصابات تقدر تدمر الكيان الصهيوني
بالكامل , ليه بقى ؟ لان فيه مواجهه مباشره مع جنود مرتزقه جبانات مالهمش قضيه ولا
مبدأ , ملمومين من كل مكان في العالم , حرب عصابات تهز الكيان الصهيوني من جواه .
.
4- حركة سماح و حركة لوسي ابن طنط فكيهه
( الجهاد سابقا ) من 4 سنين بيحفرو أنفاق و يهربو إرهابيين و يحاربو الجيش المصري
, مع ان عدوهم في الشمال مش في الجنوب , الحركات دي خاينه لقضيه بلدها , اتحولت لحركات
مرتزقه , لو المجهود اللي بذلوه في السنين اللي فاتت و القتلى اللي راحو منهم كانو
راحو في حرب مع الكيان الصهيوني كان زمان اسرائيل بتلم أشلائها بالعافيه و كان زمان
ترامب غير قادر على قرار زي قرار امبارح .
.
5- كل التحيه و الاحترام لشوية شباب فلسطيني
لسه مؤمنين بقضيه بلدهم و أرضهم المحتله وبيدافعو عنها بأرواحهم , لسه ماتوسخوش بلعبة
السياسه و قذارتها , هما دول أمل فلسطين , مش منظمات و حركات بنت وسخه خاينه .
...........................................................................................................
Mohamed Hussein
6 ديسمبر 2017·
الخارجية المصريه أعلنت موقف مصر الرسمي
بشكل قاطع , برفض قرار ترامب و أي أثار مترتبه عليه ( أتوقع يكون فيه تصعيد سياسي أكتر
) .
.
محدش يزايد علينا , ظروفنا صعبه صحيح ,
لكن مواقفنا التاريخيه ثابته مابتتغيرش , حتى لو كنا بنحارب الإرهاب و وبنكح تراب
.
..........................................................................................................
Mohamed Hussein
6 ديسمبر 2017·
ملخص كلمة دونالد ترامب : هننقل سفارتنا
للقدس لأن كل حاجه في القدس أصلا , مباني الحكومه و البرلمان الإسرائيلي و المحكمه
و بيت رئيس الوزرا و محل ليشع بتاع الكبده , و انا اصلا لما بروح ازور اسرائيل بروح
أزورهم في القدس , يبقى لازمتها ايه الشحططه ؟ ولا هي مصاريف و بنزين عالفاضي ؟ , و
كده تبقى القدس عاصمة اسرائيل بقى , بس احنا عايزين سلام و بتوع سلام و عايزين نبقى
حلوين مع العرب و المسلمين زي ساندوتشات الحلاوه بالقشطه .
.
هذا و من المتوقع أن يثور العرب والمسلمين
في مشارق الأرض و مغاربها , و أن يصبو جمّ غضبهم على ترامب و أمريكا و اسرائيل , و
مش بعيد يغيرو صورة بروفايلاتهم عالفيس بوك لحد بعد بكره العصر .
.................................................................................................................
Mohamed Hussein
6 ديسمبر 2017·
شوف يا مولانا , في يوم زي النهارده , هيبقى
قدامك اختيار من اتنين :
- إما انك تشتغل في الخطب العصماء و القدس
في القلب واقدسااااه , و تغني كام نشيد و كام طقطوقه على شوية شعارات حلوين و تغير
صورة البروفايل و تجيب الأستاذ هنيدي يحرق علم اسرائيل , و بعدين المخرج يقول لكو ستوب
, كت , فركش , هايل يا فنان .
.
- و الإختيار التاني انك تفهم , ده اختيار
صعب , لما تكون اتربيت من صغرك عالمسرحيه الهزليه اللي فوق دي و بتكررها بمنتهى الحماس
( مش الملل ) هيبقى اختيار الفهم صعب .
.
اختيار الفهم بيقول ايه بقى ؟ بيقول التالي
:
1- الكيان الصهيوني نشأ من 90 سنه , و في
نفس التوقيت ظهرت جماعة الإخوان الإرهابيه , دي مش صدفه , بس حاول تهدى و تركز , يعني
ايه جماعه دوليه موجوده في اكتر من دوله عربيه ؟ يعني مفيش وطنيه ولا مواطنه ولا أي
لازمه لكلمة وطن , يعني تبقى شوكه في حلق كل دوله فيها فرع للجماعه دي.
.
2- اللي أنشأ الكيان الصهيوني و اللي أنشا
جماعة الإخوان هي بريطانيا و اللي بيرعاهم أمريكا , الأم اللي خلفت و الأم اللي بتربي
, من غير هري كتير , هتلاقي أغلب قيادات الجماعه معاهم جنسية أمريكيه أو بريطانيه و
لما يحبو يهربو بتبقى لندن و واشنطن وجهتهم الأولى و المفضله .
.
3- لما حاولت دوله زي مصر في وقت من الأوقات
انها تقضي على فكر الجماعه دي كانت أمريكا بتقف لنا , مره بتقارير حقوق انسان و مره
بتهديد و لوي دراع , يعني دعم كامل متكامل و غطاء سياسي .
.
4- لما ظهر البترول في جزيرة العرب, بريطانيا
اسرائيل امريكا لعبو عالملف ده صح جدا , و تحت ذريعة انك تحارب المد الشيعي الإيراني
بقى عندنا في الخليج قواعد أمريكيه و بريطانيه اكتر من محطات البنزين , يعني جبنا عربجية
التاريخ يحمونا من عربجي صغير , ابحث هنا عن خيانة و حماقة العرب .
.
5- استمرت جماعة الإخوان الإرهابيه في التوغل
بمساعدات أمريكيه بريطانيه قطريه , و استغلو كمان في مصر إن جوز الست كان عايز ابنه
يورث الحكم و بالتالي موافق على اي حاجه تقولها ماما أمريكا بما فيه السماح للجماعه
الإرهابيه بتكوين امبراطوريه اقتصاديه .
.
6- من عشرين سنه بدأ التخطيط لخراب الشرق
الأوسط من نفس محور الشر , محور الشر بيخطط في أوضه مكيفه بورقه و قلم و مش مطلوب منه
يبذل أي مجهود , صبيانهم و أدواتهم موجودين عندنا .
.
7- مشيت الخطه بشكل مكانشي حتى يتوقعه اللي
رسم الخطه نفسها , و اتدمرت العراق تحت داعي وجود اسلحة دمار شامل, و اتدمرت سوريا
و ليبيا و العراق و اليمن , المخطط معروف و المنفذين معروفين , جماعة ارهابيه دوليه
, أدوات اعلاميه عربيه , مراكز حقوقيه , ميديا عالميه , غطاء سياسي , تمويل عسكري
, كلاب من بره و خونه و انطاع من جوه .
.
8- نفس الشئ كان مخطط لمصر بس ربنا نجانا
و نجاها , عشان كده هتلاقينا واجعين أوي كلاب السكك .
9- بعد ما اتخرب الوطن العربي بتفكير صهيوأمريكي
و تنفيذ و إيد عربيه , بقينا في حالة أشبه بالملاكم اللي انطحن ضرب و بقى ينزف من كل
حته , الملاكم في اللحظه دي حضرتك مش محتاج اكتر من إنك تزقه بصباعين من ايدك يقوم
واقع عالأرض مايحطش منطق ,و ده اللي بتعمله اسرائيل و ترامب حاليا .
.
10- طب الحل ايه ؟ الحل ببساطه انك تتوقف
تماما و نهائيا عن الشعارات و الافتكاسات و تفهم الكلام اللي فوق و تتصرف على أساسه
, اللعبه من البدايه لعبة عقل , لعبو على كل حاجه بما فيها الوازع الديني عندنا اللي
بيوصل احيانا كتير لدرجة الحماقه و الغشم , حتى ده استغلوه و بقى سلاح في إيديهم بيقتلونا
بيه .
....................................................................................................................
Mohamed Hussein
5 ديسمبر 2017·
بكره هيبقى يوم تاريخي للهري لو قرر ترامب
انه ينقل السفاره الأمريكيه للقدس , وقتها هتحس يا مؤمن ان كل الصيع و العواطليه و
الشمامين واللي مابيركعوهاش في وطننا العربي و الإسلامي , كلهم بلا استثناء ربّو دقن
فجأه و طلعت لهم زبيبة صلاه قد غطا الحلّه , و هتلاقي مسيرات من حماس و خطب رنانه من
أردوغان و أناشيد و كوفيه فلسطيني و شعارين و هاشتاجين و بوسه و عضه و بعدين ينامو
و يصحو زي الفل , أو زي ما قال العظيم الراحل جلال عامر ( أخي جاوزَ الظالمون المدى
, فهيا ننامُ بعد الغدا !!) .
.
بص يا مولانا , ده لو عايز تفهم :
.
- أردوغان مجرد كلب من كلاب أمريكا و حلف
الناتو , عنده أكبر قاعده عسكريه أمريكيه , والعلاقه بينه و بين الصهاينه بالظبط زي
العلاقه بين حسام حسن و ابراهيم حسن , بالمناسبه ماحصلش في يوم من الأيام ان تركيا
قدمت جندي واحد شهيد في حرب مع الصهاينه ولا ضربت عليهم طلقه رصاص ولا حتى طرطشت شويه
مايه ( الشعارات الحنجوريه مفيش أسهل منها ) .
.
- حركة حماس بقيادتها الحاليه مجرد شوية
مرتزقه مأجورين بياعين شعارات ويتاجرو بالقضيه و يقلّبو عيشهم , و لو كان المجهود اللي
بذلته حماس في ال 7سنين اللي فاتو في حفر الأنفاق و تهريب الإرهابيين و محاربة الجيش
المصري في سينا , لو بذلو نصه بس مع العدو الصهيوني كان زمانهم حررو القدس .
.
- ترامب زي أوباما , و أحمد زي الحاج أحمد
, و اختيار التوقيت ده لو تم هيبقى لأن العرب في أضعف ( وأتفه ) حالاتهم , نص الوطن
العربي محروق بإيدين النص الباقي , ده توقيت مثالي , مفيش حاجه بتتم اعتباطا , زي بالظبط
توقيت بناء سد النهضه اللي بدأ في 2011 لما كانت الدوله المصريه في أضعف حالاتها ,
قبل ماتوجه سهامك و لعناتك بقى لامريكا و الكيان الصهيوني وجهها الأول للخونه و المتأمرين
العرب اللي صرفو مئات المليارات عشان يخربو الدول العربيه و يهدو الجيوش اللي كان لها
شنه و رنّه .
.
- احنا في مصر لا بياعين شعارات ولا فلايات
, بنحمي أرضنا و أمننا و ترابنا , و كفايه علينا اوي الإرهاب و ( الخير ) اللي بيجيلنا
من حلف الشيطان بإيدين ( أشقائنا ) العرب , يعني يا مولانا رجلينا مش هتيجي في ( الخيّه
) دي , احنا مش برياله , حاربنا الصهاينه 4 حروب و قدمنا شهداء بعدد سكان دول و دويلات
و أكشاك , محدش يزايد علينا ولا يبيع المايه في حارة السقايين .
.
عارف اسرائيل فين عالخريطه يا حماده ؟ طب
تمام , اخطف رجلك بقى لحد هناك و روح جاهد , بسرعه يا حماده قصدي يا شيخ حماده , بس
استنى , ركز و النبي , عدوك في تل أبيب مش في العريش ولا الشيخ زويد ولا القاهره ولا
دمشق و لا طرابلس , إوعى تنسى يا حماده زي كل مره .
..............................................................................................................
Mohamed Hussein
5 ديسمبر 2017·
حبيب العادلي بعد ما بعتناه السعوديه عشان
يشتغل مستشار أمني للأمير محمد بن سلمان ويشرف بنفسه شخصيا على عملية اعتقال الوزراء
و الأمراء السعوديين , جبناه تاني بقى عشان نحاكمه في التهم اللي عليه و حابسينه دلوأتي
في أوضة ضلمه و بنحط السيخ المحمي في صرصور ودنه , شهرين تلاته كده و نبعته يستكشف
حركة الكثبان الرمليه في الصحراء الغربيه , و في شهر 6 الجاي بإذن واحد أحد هنهرّبه
لروسيا في طرد مقفول مكتوب عليه من بره ( خالتي بتسلم عليك ) , لا مش هنبعته عشان يقابل
بوتين , هنبعته عشان يقف جون لمنتخب مصر مكان عصام الحضري .
...........................................................................................................
Mohamed Hussein
5 ديسمبر 2017·
شئ جميل أوي أخر فيصل إن صاحب السمو أمير
دولة الكويت الشقيقه يستقبل صاحب المعالي و الفخامه أمير عزبة قطر في القمه الخليجيه
و يتناقشو بقى في الإعتداء الإيراني على المنطقه العربيه !! , أه و الختمه الشريفه
, هيناقشو الإعتداء و التوغل الإيراني في المنطقه مع الواد ابن موزه .
.
أتعشم انهم في اجتماعات بكره يناقشو ( سبل
التصدي لاستخدام البترودولار و المال القذر في خراب الوطن العربي ) , و مش بعيد الأمير
القطري الشاذ يقف في قلب الإجتماع و يندد بالإرهاب و يطالب بإغلاق القنوات المحرضه
على الحرق و الخراب و على رأسها قناة الجزيره !! .
.
و كده نبقى اتأكدنا إن البانجو هو المشروب
الرسمي للقمه الخليجيه رقم 38 .
...........................................................................................................
Mohamed Hussein
5 ديسمبر 2017·
كلمتين في ودنك .... يعني ايه دوله ؟
.
تخيل بس , حاول تتخيل , في فبراير 2011
الجيش المصري و المؤسسات السياديه المصريه سابت الرئيس الأسبق محمد حسني مبارك في إيد
اللامؤاخذه الثوار , و اللامؤاخذه الثوار قتلوه و مثلو بجثته و قطعو ودانه و مناخيره
و نشرو الصور و الفيديوهات و وصلت لكل المواقع و الجرايد و القنوات العالميه , وسط
صيحات و تكبير و تهليل من اللامؤاخذه الثوار برضه على هذا الإنجاز ( الديموقراطي )
الحر المتحرر الحران العظيم !! .
.
طب تخيل تاني , بعد يونيو 2013 , قام الجيش
المصري و المؤسسات السياديه سابو الرئيس السابق محمد مرسي في إيدينا , قمنا احنا قتلناه
و مثّلنا بجثته و اتصورنا سيلفي مع دراعه اليمين و بعتنا الصور لرويترز و أخواتها
, و زغرطنا و عملنا حفله جنب جثة المخلوع , و العالم كله اتفرج علينا و على انتصارنا
العظيم برضه .
.
تخيّلت حضرتك ؟ ها حسيت بإيه ؟ هو انا عايز
أقول لمعاليك ايه ؟ في كتاب الديموقراطيه المواطنون متساوون في الحقوق و الواجبات و
البطيخ و الفول الحريتي
, كلام جميل اوي أخر حماده , يعني قتل رئيس
سابق و التمثيل بجثته زي مثلا قتل عم محفوظ بتاع الجراج ؟ هو ده اللي فهمته في الديموقراطيه
؟ لا دانت كده مخ معاليك كان محتاج يروح الصيانه من بدري .
.
بص يا مولانا , منصب رئيس دوله أو رئيس
سابق ده منصب حرج , حتى لو كان الرئيس السابق ده خاين أو إرهابي او بهلول , لكنه و
في لحظة ما و لسبب ما قعد على كرسي الرئاسه بتاع الدوله , هنا بقى قتله و التمثيل بجثته
يساوي أمنيا و سياسيا بالظبط بالظبط زي ألف حادثه إرهابيه مُجمّعه , صورة رئيس سابق
مقتول و متمثل بجثته بتعلق في أذهان العالم أكتر من صورة زلزال أودى بحياة 100 ألف
شخص.
.
في ال 10 سنين اللي فاتو حصل حوادث كتير
اوي , إرهابيه و كوارث طبيعيه , راح ضحيتها مئات الألاف في العالم , بس يبقى 3 مشاهد
في عيون سكان كوكب الأرض البائس , مشهد إعدام صدام حسين , مشهد مقتل القذافي و مشهد
مقتل عبد الله صالح .
.
ليه بقى ماحصلش كده في مصر ؟ عشان احنا
شعب متحضر و شيك و جميل أوي جدا خالص على عكس شعوب العراق و ليبيا و اليمن ؟ طب انا
مش عايز أقول كلمه أبيحه عالصبح .
.
ماحصلشي كده عشان عندك حاجه اسمها الدوله
العميقه , دوله لها مؤسسات سياديه و خطوط حمرا بتحافظ عليها , مهما الحكايه دي كلّفتنا
, لأنك لو ماحفظتش عليها فانت باختصار خرجت من مفهوم و نطاق الدوله لمفهوم الغابه
, و كده تبقى وصلت و نقولك حمدالله عالسلامه , روح بقى شوف لك معزه ربيها جنب الخيمه
و احلبها و اشرب لبنها , و لما تجوع اصطاد غزاله أو نسناس و اشويه عالفحم , و لو مالقيتش
حاجه تاكلها انت و عيالك يبقى سيفك على كتفك و خنجرك في جيبك و اطلع على أي قافلة تجار
تكون معدّيه , ثبتهم عالطريق و قول لهم ( أبو قسم ) .
......................................................................................................................
Mohamed Hussein
4 ديسمبر 2017·
صدام حسين , و بعده القذافي , و بعدهم على
عبد الله صالح , بمعدل ( راس كل 5 سنين ) , اللي عايز يعرف مصير اليمن القادم ايه ؟
فهو مش محتاج تفكير كتير , يكفي إنه يبص لمصير العراق بعد صدام و ليبيا بعد القذافي
.
.
العراق من 10 سنين بيدوّر على نعيم الديموقراطيه
الأمريكاني , على زكايب الخير و الرفاهيه و الفخفخينا , و أتحدى أي عراقي يقولي النهارده
مين الحاكم الفعلي للعراق ؟ ياترى إيران ولا أمريكا ولا بريطانيا ولا تركيا ( و لا
جميع ماسبق ) ؟.
.
ليبيا من 5 سنين بتدور على نعيم الحريه
بعد ما نجحت ( الثوره ) , بتدور برضه عالحريه الأمريكاني , و أتحدى أي ليبي النهارده
يقولي مين اللي بيحكم ليبيا ؟ و بيحكم أنهي منطقه بالظبط و بيحكمها الساعه كام تحديدا
؟ .
.
اللي عايز يعرف الجيش المصري و المخابرات
المصريه عملو ايه بعد 2011 يبص لل 3 نماذج اللي فوق , و يبص كمان للنموذج السوري ,
ده لو حابب يعني تعرف يعني ايه عندك مؤسسات سياديه أنقذت مصر في مرحلة الطوفان , و
لو حابب تعرف إن الحكايه مكانتشي أبدا شوية عيال صيع قاعدين على قهوه في وسط البلد
و بيعملو تشكيل الحكومه و يتشقلبو في شعارين و هاشتاجين و إزازتين بيره .
.
و اللي برضه عايز يعرف مصر بتعيد تسليح
جيشها ليها حتى في ظروف اقتصاديه صعبه ؟ , يشوف النماذج اللي حوالينا و يشوف بعين أوسع
المنطقه بالكامل و الوطن العربي المطحون بين شقي الرحى ( الأجنبي المتأمر و العربي
الخائن أو العربي الأحمق ) .
.
أنا بس عندي سؤال صغير قد كداهو , سؤال
مشروع جدا , سؤال للقيادة السعوديه , سلمان و ابن سلمان , بهدوء شديد , هل مشاركتكو
في خراب سوريا و اليمن كانت مشاركه ايجابيه و ناجحه وقرار صائب ؟ هل قدرتو توقّفو المد
الإيراني في المنطقه ولا وجودكو رسّخ للنفوذ الإيراني و غير الإيراني و لمّيتو عربجية
التاريخ و كلاب السكك عندنا ؟ السؤال ده أكيد جاوبه عبد الفتاح السيسي من سنتين تلاته
, و أكيد اجابته وصلت لسلمان ألف مره في صورة نصيحه , و أكيد برضه إن النصيحه اترفضت
.
.............................................................................................................
Mohamed Hussein
4 ديسمبر 2017·
من يومين على عبد الله صالح كان مسيطر بشكل
كبير على الأرض , و النهارده تم اغتياله هو و عدد من قيادات الحزب بتاعه , الحكايه
دي ملهاش تفسير غير خيانه من جوه قوات عبد الله صالح , و الخيانه يلزمها طرفين , طرف
خاين ( شخص أو مجموعة أشخاص ) و طرف ممول و محرض ( و بيدفع للخاين ) , لو عايزين تعرفو
الممول و المحرض فانتو مش محتاجين تقرو الفنجان ولا توشوشو الدكر , يكفي جدا انك تشوف
حاليا مين شمتان في مقتل عبد الله صالح و معلق الكهارب و عامل فرح .
.
الثوره نجحت في اليمن وفشلت في مصر ( من
أقوال العاهره توكل كرمان ) , اه طبعا الثوره نجحت في اليمن و جابت مجموع كبير , مجموع
يدخلها كلية الحرب الأهليه قسم الخراب التام و هي حاطه رجل على رجل .
.
الحمد لله على نعمة الجيش المصري , و كفى
بها نعمه .
........................................................................................................
Mohamed Hussein
4 ديسمبر 2017·
لما بنته خبطت موتوسكل بعربيتها وهي سايقه
, و صاحب الموتوسكل عمل محضر و تم استدعاء بنته للتحقيق في الحادثه و بعدها مشيت على
طول ( زي مابيحصل في أي حادثه ) , في التوقيت ده قام المثقف المفكر المغوار اللي بيمشي
عالحيط بالترويج لإن المخابرات المصريه دبرت الحادثه عشان دي بنت علاء الأسواني ( والمخابرات
جابت الموتوسكل و قالت له ارمي جتتك قدام عربية بنت الأسواني , واللي سايق الموتوسكل
أصلا يبقى محسن بيه بتاع المخابرات ) , و الأمن الوطني خد بنته في نص الليل ( حلوه
نص الليل دي يا حاج محمد ؟ ) , و أبداً لن تطفئو جذوة النضال في صدورنا , و أي بؤين
حمضانين من اللي بينتزعو أهات العواطليه و الشمامين .
.
طبيعي جدا ان عقليه بالوصف اللي فوق يكون
تعليقها على حدوتة احمد شفيق بعد مداخلة شفيق امبارح , إنه الموضوع اتظبط و اتسنجف
وقالو لشفيق تقول ايه و ماتقولش ايه ( على اعتبار ان احمد شفيق ده بتاع كشري أو عيل
غلبان جاي من الصعيد يسترزق و تايه و مش عارف أي حاجه في مصر ) , التسجيل بتاعك راح
الجزيره بالغلط يا شفيق ( حاضر يافندم ) , انت اتعاملت من الإماراتيين احسن معامله
يا شفيق ( تمام يافندم ) , انت ماكونتش معتقل ولا كنت ممنوع من دخول مصر يا شفيق (
أوامرك يافندم ) , انت هتعيد التفكير تاني في موضوع الترشح يا شفيق ( طبعا يافندم
) , هتسمع الكلام يا شفيق و إلا ناخدك على سطح الواد حماده و نغتصبك و نصورك ( هسمع
الكلام يافندم , دانا راجل كبير و مش حمل تصوير , قصدي مش حمل اغتصاب ) .
.
علاء الأسواني هو نموذج فج للشخص اللي بتنحسر
عنه الأضواء و فجأه يلاقي نفسه مالوش أي تلاتين لازمه في الحياه ( بعد ماكان بيطلع
في 3 برامج توك شو يوميا و ينزل لنا من الحنفيه ) , فيقوم يتحول إلى أقدم و أقذر مهنه
في التاريخ .
.
بتخيل مشهد مثلا , الأسواني ضربت في دماغه
ياكل كبده , راح المطعم و قعد على كرسي , جالة ساندوتش الكبده و قطم قطمتين , حس بنوع
من الإستياء لأن كمية البصل في الساندوتش شافها كتيره , يا ترى أول حاجه هتيجي في ذهنه
ايه ؟ 1- ساندوتش الكبده معمول صح بس انت اللي ماكلتش كبده من زمان ؟ 2- صاحب المطعم
ده حرامي و بيوفر في الفلوس عشان كده كتّر نسبة البصل ؟ 3- المخابرات المصريه هي اللي
حطت له بصل كتير في الكبده عشان تقرفه في عيشته و ماتخليهوش عارف يفكر ولا عارف يناضل
في ساعة العصاري ؟ .
...............................................................................................................
Mohamed Hussein
4 ديسمبر 2017·
حازم عبد العظيم حصل له تطور مذهل في فتره
قصيره جدا , اتطور من مفهوم العاهره اللي بتلبس لبس مثير و تنزل الشارع عشان حد يعبرها
و يشقطها , و دلوأتي دخل في مرحلة العاهره اللي بتركن ضهرها على عمود في شارع جامعة
الدول و ترمي نفسها ( و جتتها ) على أي عربيه راكنه بالعافيه كده , حتى لو كان صاحب
العربيه راكن عشان يغّير فردة الكاوتش , و تقوله هاجي معاك , يا ستي روحي الله يسهلك
بعيد عني , ايه ده انت مالكش في الستات ؟ ياست انتي غوري من هنا بلاش قرف , طب هات
خمسين جنيه و اعمل فيا اللي انت عايزه , استغفر الله العظيم من كل ذنب عظيم , طب اقولك
حاجه ؟ بوسني دلوأتي و هات سيجاره كليوباترا .
.........................................................................................................
Mohamed Hussein
3 December
at 13:34 ·
مطلوب منافس
.
صديقي العزيز , ماتنتخبش السيسي , إنتخب
زيد أو عبيد أو نطاط الحيط , ياكشي تنتخب مرعي بتاع الكليمه , انت حر , أول قاعده في
كتاب الديموقراطيه بتقول انك حر في اختيارك , هات أي حد وانتخبه , يكون لابس بدله و
كرافته و قاعد في طياره خاصه مكيفه و ماسك في إيده صباع موز , أو لابس جلابيه و قاعد
جنب ( عريشه ) و ماسك في إيده ( منجل ) .
.
بس استني , لحظه واحده , إصبر يا مولانا
, خد نفس عميق و فكر 5 دقايق , هي ايه مواصفات المرشح اللي حضرتك عايزه ينجح و يكون
رئيس دوله بحجم مصر و في توقيت زي ده ؟ هقولك أنا عالأبجديات اللي المفروض يفكر فيها
أي مواطن مصري , سواء كان مؤيد أو معارض , يساري أو يميني , اشتراكي ولا رأسمالي ولا
منفلوطي , أبيض أو أسود أو اخضر , فيه مواصفات بسيطه لازم تتوفر في المرشح .
.
1- وظيفته الحاليه و السابقه مش معيار للاختيار
ولا بتفرق , سواء كان مدني أو عسكري سابق , طالما الدستور قال ينفع , يبقى ظابط جيش
, دكتور أنف و أذن , مدرس فرنساوي , صيدلي زي حالاتي , بياع كرشه , عالم ذره , ولا
بتفرق .
.
2- طويل و قصير , تخين ورفيع , أهلاوي ولا
زملكاوي , مولود في بؤه معلقه بلاتين ولا مكانشي لاقي المعلقه الميلامين , برضه مابتفرقش
.
.
أومال ايه اللي بيفرق , و ايه ( الكبائر
) اللي تخليك تحط عالمرشح ده علامة إكس بنفس راضيه مطمئنه , هقولك يا سيدي :
.
1- إنه يكون متهم بأي قضايا تمس الشرف أو
الأخلاق أو الأمانه , حط علامة إكس ( لو صدر ضده حكم قضائي نهائي هيبقى أصلا ممنوع
من الترشح ) .
.
2- يكون هجّاص و كداب و حلنجي ( ده ينفع
نبطشي أفراح مش رئيس لمصر ) , يعني ايه هجاص و حلنجي ؟, يعني يقولك هجمو عالمطبعه و
سرقو ورق الدعاية بتاعي ( عدد المطابع في مصر أكتر من عدد عربيات الدره المشوي , و
حكاية المنشورات دي موضه بطلت من سنة 1930 , دلوأتي الدعايه بتبقى عالفيس و المواقع
الإلكترونيه و يوتيوب و القنوات و الجرايد , يعني برنامجك الإنتخابي مش محتاج تطبعه
في ورق , دانت ممكن تنزله في فيديو لايف على انستجرام بس ابقى اقفل صدرك كويس عشان
ماتعملش زي مدام غاده ) , أو يقول اني محتجز و ممنوع من مغادرة الإمارات و ممنوع من
دخول مصر , الهجاص يابني ماينفعش يبقى رئيسك .
.
3- مايكونشي عارف يعني ايه دوله , يعني
ايه أمن قومي , يعني ايه مؤسسات سياديه , يعني ايه توازنات منطقه , باختصار مايبقاش
شمام كوله و متخيل ان رئاسة الجمهوريه ماتختلفش كتير عن هاشتاج عالفيس أو تويته بيكتبها
على تويتر في ساعة عصاري و هو مدلدل رجليه في ماية الترعه .
.
4- يكون مؤمن تماما إن التصالح مع الإرهاب
بيعني انك تحط رقبتك ورقبة بلدك تحت سكينة الإرهابيين مدى الحياه , مايفرحشي بأصوات
الإرهابيين اللي إيديهم غرقانه في دم ولادنا , و اللي من سنين بيحاولو بكل الطرق يحرقو
البلد اللي معاليه عايز يترشح لرئاستها .
.
5- أهم حاجه و دي تخص الناخب بقى , بص يا
مولانا , كان مقبول جدا اننا نهبّل في اختيارتنا في 2012 , الصوره كانت ضبابيه و مفيش
أقنعه سقطت ولا وشوش اتكشفت , و كان اغلب الشعب عايش في غيبوبه و الجزيره بتهشتكه
, في 2018 الوضع مختلف تماما و الصوره واضحه زي الشمس , و بالتالي مفيش مبرر , لا فيه
مبرر لعصر اللمون , ولا مبرر لانك تنتخب فلان نكايةً في علّان , ماتنتخبش السيسي ,
إوعى تنتخب السيسي , هات اي حد ينطبق عليه الوصف اللي فوق و انتخبه , وانا هقولك برافو
لأنك مواطن مصري شريف بيمارس حقه الديموقراطي .
.
#صوتي_لعبدالفتاح_السيسي .
................................................................................................................
Mohamed Hussein
2 ديسمبر 2017·
أحمد شفيق ممنوع من دخول مصر و ممنوع من
مغادرة الإمارات .
- طيب .
.
لا لا , احمد شفيق مش ممنوع ولا حابسينه
في أوضه ضلمه , ماهو دخل اهو.
- طيب برضه .
.
أحمد شفيق هرب عشان نظام حكم السيسي فاشي
وقمعي و ملفقين له قضايا .
- طيب
.
يووووه , سوري , ده هربان من 2012 يعني
قبل السيسي بسنتين .
- طيب برضه .
.
أحمد شفيق سافر فرنسا .
- طيب .
.
لالالا ده ماسافرش فرنسا .
- طيب برضه .
.
أحمد شفيق موبايل بنته اتهاك و هو مكانشي
قاصد يطلع في الخنزيره .
- طيب .
.
يوووه , هو الموبايل ماتهاكش , بس مفهاش
حاجه يعني لما يطلع في الخنزيره .
- طيب برضه .
.
احمد شفيق وصل مصر و محدش قاله انت رايح
فين ولا جاي منين , لأن الدوله مرعوبه منه و ماتقدرش تعمله حاجه .
- طيب .
.
أحمد شفيق ده جامد تنين و هيبقى منافس شرس
للسيسي و طبالين السيسي اللي زي حالاتك مرعوبين منه و قاعدين يشوّهو فيه , مع إنه حد
جميل أوي , أستحلفكم بالله أن تنظرو إلى هذا الوجه الملائكي الجميل .
- طيب حاضر , احنا مرعوبين منه , و هننظر
للوجه الملائكي أهو .
.
يا أستاذ يا أستاذ !!.
- نعم يا حبيبي .
.
انت عمال تقول طيب و طيب برضه و حاضر ,
انت بتاخدني على قد عقلي ولا ايه ؟
- يابني والله ابدا ,انا بس سايبك تكمل
قصيدة و معلقة ( شفيقيات ) , بس عايز أسألك سؤال واحد و سامحني فيه .
.
اه طبعا اتفضل اسأل
- من غير زعل ؟
.
أكيد من غير زعل .
- ممممممممم مين بقى احمد شفيق ؟ الإسم
ده مش غريب عليا , أيوه افتكرت , مش ده كان الباك الشمال بتاع الزمالك في التسعينات
؟ .
...........................................................................................................
Mohamed Hussein
2 ديسمبر 2017·
في اليمن اللي كان سعيد , حوثييين يحاصرو
ميليشيات عبد الله صالح و بعدين يتفقو معاه و بعدين يقتلو و يطحنو في بعض في قلب العاصمه
صنعاء , و بعدين قوات عبد الله صالح يحتلو مش عارف كام وزارة و مبنى تليفزيون و البنك
المركزي وشوية طرق و شوارع و حواري و محل أندريه بتاع الكبده , و في نفس الوقت فيه
حكومه تانيه في اليمن مش عارف تبع مين و جيش يمني ماعرفش فين , و رئيس مش عارف إسمه
ولا عارف اذا كان صحي من النوم ولا لسه , و فيه شعب مش لاقي ياكل بالمعنى الحرفي للكلمه
و أمراض ظهرت عندهم مع انها اتلغت من كتاب الطب من 500 سنه , و عاهره خدت جايزة نوبل
لامؤاخذه للسلام و هربت و خدت الجنسيه التركيه بتاعة خليفة الشواذ بعد ماخربت اليمن
و قعدت على تلها , و هي دي كل الحدوته من الجلده للجلده .
.
حدوته بتقول إزاي نقنعك انك تحرق بلدك وتخربها
بإيدك لحد ماتبقى أطلال و كوم تراب و بعدين تتصور سيلفي و في خلفية الصوره أطلال بلدك
, و تنزل صورتك دي على انستجرام ولا الفيس بوك و بعدين أنصارك و بهاليلك يعلّقو بقى
و يقولو إنت حد مناضل , انت حد هايل , انت حد جميل , انت مفيش زيك في كوكب الأرض و
المجموعة الشمسيه .
...........................................................................................................
ليست هناك تعليقات:
إرسال تعليق