Mohamed
Hussein
31
أغسطس 2017·
بص يا حبيبي ,
هجيب لك من الأخر عشان أريّحك خالص
.
- احنا هنعمل سور
حوالين العاصمه الإدارية الجديده , يعني طولة تقريبا بتاع 120 كيلو ( قد المسافه من
القاهره للمنصوره ) , هنعمل سور ليه ؟ مممممممم عشان محدش يشوفنا و لا يبص علينا و
احنا بنستحمى جوه
.
السور يكون ارتفاعه
7 متر و السُمك بتاع مترين و نص قول تلاته ( أهو يستحمل القنابل النوويه برضه ) , الحكايه
دي تكلفنا 2 تريليون دولار , ولا يهمنا , هو احنا حيلتنا أكتر من الفلوس ؟ داحنا مش
عارفين نودّي الفلوس فين , و بعدين المبلغ ده أصلا يادوب يساوي البوكيت موني بتاع البت
لوجي بنتي في العيد .
.
- بعد ما نعمل
السور نحفر خندق بطول و عرض المدينة , يكون خندق عميق أوي , اعمق من عقل البرادعي و
علاء الأسواني و أعمق من تفكير العيال بتوع الفاشيه و العسكر و الظلم و كاريتة الملك
فاروق , أيام ما كانت بتاعة البليله من سويسرا .
.
- و بعدين نعمل
بوابه رئيسيه للعاصمه الإداريه دي , و نعلّق عليها خرزه زرقا كبيره و فردة صندل بلاستيك
بتاعة عيل صغير يكون راضع صدر أمه ( عشان الحسد ) , و نجيب شوية بخور و كيلو مستكه
و كيلو مش مستكه و ديل سحلية يتيمه و حته من سوالف عمرو حمزاوي , و نبّخر المدينه و
المنطقه كلها .
.
و بعدين بقى يا
سيدي , اخر حاجه , اخر حاجه يعني , نعمل لوحه ضخمه اللي بيبقى فيها إسم المدينه و سهم
بيشاور عليها , و مانكتبش عاللوحه الضخمه إسم العاصمه الإدارية الجديده , لا خالص
, إحنا هنكتب عليها : أه دي شقة المعلم فوزي و أنا مراته الجديده .
...............................................................................................................
Mohamed
Hussein
30
أغسطس 2017·
ماجستير و دكتوراه
في الحموريه
.
كالعاده و مع اقتراب
تسليم أي مشروع جديد بيبدأ الهري , نفس الهري اللي حصل في موضوع قناة السويس الجديده
, الكراكات غرقت في الوحل , الشركات هربت من المشروع , ده مشروع عملاق و مستحيل يتم
, طب خلاص هنفتتحه يبقى مشروع ملوش أي تلاتين لازمه و تبذير لفلوس الشعب .
.
هنشتري طيارات
رافال ؟ يووووه بقى , الرافال دي فرز تالت و الفتيس بتاعها بيقفش , و بعدين مستحيل
نشتريها , و بكره تشوفو , طب خلاص اشتريناها بس ده تبذير وبنشتري سلاح ليه ؟ دي الناس
مش لاقيه تاكل ولا لاقيه فلوس تصيف عند الجيلي فيش في الساحل .
.
الميسترال مستحيل
ناخدها , دي فرنسا عاملاها أصلا لروسيا , احنا هنحط راسنا براس الكبار ولا ايه ؟ ده
فنكوش , لا دي رشوه من السعوديه عشان نبعت جنودنا لسوريا , هنعمل ايه بحاملة مروحيات
و النبي ؟ لا مستحيل ناخد الميسترال , ايه ده خدناها ؟ طب خلاص احنا واخدينا كسمسار
بس و هنبيعها لروسيا بدولار واحد , و كان لازمتها ايه بعزقت الفلوس دي
.
الهري الجديد بقى
يا ساده , و مع اقتراب التسليم المبدئي للعاصمه الإدارية الجديده , تعالو و انا اقول
لكو :
.
- المشروع ده فنكوش
و مستحيل يتم و الشركات الصينيه هربت يبقى السيسي بيبيع لكو الوهم
- طب خلاص المشروع
بدأ في التنفيذ , يبقى لازمته ايه و النبي ؟ ليه نصرف فلوسنا في عاصمه جديده ؟ مالها
القديمه بس ؟ داحنا لو عملنالها ريستارت هتشتغل و تبقى زي الفل و كنا وفرنا المليارات
دي .
.
- المشروع قرب
يتسلم , قامت الصديقه العزيزه فلانه الفلانيه و هي بتنشر الغسيل لمحت ست ام شوشو جارتهم
في البلكونه , ست أم شوشو قالت لها و النبي ياختي انا جالي هاتف في المنام و قالي ان
العاصمه الجديده هيتعمل فيها دار اوبرا ب 4 مليار جنيه , و لما صحيت من النوم سي المحروس
أبو شوشو جوزي اكّد لي الكلام ده , صديقتنا العزيزه ماكدبتش خبر , و نشرت بقى حكاية
دار الأوبرا أم 4 مليار دي .
.
الواد لوسي ابن
طنط فكيهه , بعد ما رجع من الخرابه و بعد ماستمتع , نشر خبر إننا بنعمل سور حوالين
العاصمه الإداريه الجديده , يعني تقريبا سور بطول 120 كيلومتر !! , يا اهبل يا جاهل
يا متخلف , ماحنا لازم نعمل سور عشان المغول و البيزنطيين لما ييجو مايعرفوش يضربو
المدينه بالمنجنيق !! .
.
الحدوته كلها باختصار
, دايره مقفوله , و مشاهد مكرره بشكل ممل , خروف هو أستاذ في الكدب و الفبركه و تأليف
الإشاعات , و شمام كوله حمار بقاله 7 سنين بيتركب من نفس الخروف , 7 سنين ده وقت كافي
جدا لشمام الكوله إنه ياخد ماجستير و دكتوراه في الحموريه .
.
إشاعات إشاعات
إشاعات , بيقولو فيه خرفان راكبين على خوا*ات , إشاعاااات , إشاعات إشاعات إشاعات
.
..........................................................................................................
Mohamed
Hussein
29
أغسطس 2017·
هحاول اكون هادي
و مؤدب و كيوت , على قد ماقدر يعني .
.
في مقال منشور
في اليوم السابع , كاتب المقال هو السيد خالد ابو بكر ( اللي انا ماعرفوش شخصيا , وشرف
ليا و عزة جلال الله اني ماعرفه ) , بيقول ايه بقى المقال اللي بيتكلم عن الشعب المصري
اللي ملوش كتالوج ؟ , طيب هكتب لكو مقتطفات من الأفكار اللوذعيه لكاتب المقال :
.
- ثورة 23 يوليو
قام بيها شوية ظباط في التلاتينات و الشعب اعتبرهم عمرو بن العاص و رفاقه ( والنبي
يابني ماحد اعتبرهم عمرو بن العاص ولا عمرو بن يوسف حتى , إنما الناس فرحت بفكرة إن
مصريين بيحكمو مصر , مش جنابك مصري برضه ؟ ) .
.
- وانقلب الحال
بعد ثورة 23 يوليو و بدأ الشعب يرى ظلما و قهرا !! هههههههههههههههه بجد والنبي ؟
, يعني الشعب اللي طلع من وسية البشوات و شغل التراحليه و اتملك أرضه لقى ظلم و قهر
على ايد عبد الناصر ؟ الشعب اتظلم على إيد عبد الناصر يا ضنايا ؟
.
- المصريين اللي
ثارو عالملك رجعو يحبو الملك تاني ( لا مش المصريين يا حماده اللي بيحبو الملك , دول
خرفان الجماعه الارهابيه و شويه من شمامين الكوله اللي مايتخيروش عن معاليك , ممكن
بس نحترم في فاروق انه ساب مصر بشكل محترم , مش اكتر من كده , انما مفيش حد ابن حلال
بيحب الإستعمار و الإستحمار , ده لو كان ابن حلال يعني !! ) .
.
عبد الناصر كمل
في الحكم بعد الهزيمه عشان ام كلثوم راحت قالت له : ابقى فأنت الأمل ( بجد والنبي ؟
أم كلثوم قالت له كده ؟ يعني عبد الناصر ماقررش التنحي و الشعب نزل الشوارع يطالبه
بالرجوع ؟ ) .
.
السادات بقى انتصر
في الحرب و بعدين جزء من الشعب خطط و راح قتله !! طب دي أقولك فيها إيه ؟ هما اللي
قتلو السادات جزء من الشعب ؟ الجماعات الإرهابيه بقى اسمها جزء من الشعب ؟, فصيل وطني
يعني ؟ هو انت منهم ؟!! .
.
عزيزي خالد أبو
بكر , مش ضروري تكتب مقالات , المشرحه مش ناقصه قُتله , أه و عهد الله , و لو كنت معاليك
من ( القُتله ) اللي بيطلعو في التلفزيون ( في التالافزيون ) فياريت الحلقه الجايه
تطلع و تقول للشعب أفكارك الجميله دي , قوله يا شعب عبد الناصر ظلمكو ( و قهركو ) هو
وشوية العيال اللي معاه , و الملك فاروق حد جميل وانتو يا شعب جزء منكو اتجمع و قتل
السادات , خاطب الشعب يا حبيبي .
.
أما بقى مصطلح
( شعب ملوش كتالوج ) فممكن أكون أول واحد قولته أو من أول الناس اللي قالته , بس قولته
بعلم و بنضافه و احترام , مش بانحطاط و إهانه , شعب ملوش كتالوج يعني شعب يقف يتصور
جنب قنبله و هي بتتفكك , يعني شعب يعجز عن لوي دراعة أو كسره مجموعه من الدول العظمى
, يعني شعب يقدر في أصعب الظروف يقلب الترابيزه على دماغ الكل , يعني شعب في عز الأزمات
يضحك و يقول نكته , اما بقى ( شخاخ البط ) اللي انت مسميه مقال فعنوانه الحقيقي هو
شعب ملوش ضمير , شعب ملوش أخلاق , شعب ملوش قيم , شعب ملوش مبدأ !! ............ مين
بقى اللي سمح لك تتكلم باسم الشعب ؟ يابن الشعب ؟ .
.
فخامة الرئيس عبد
الفتاح السيسي , ايه اللي بيحصل ده ياريس ؟ مين الناس دي ؟ مين اللي جابهم ؟ مين اللي
سمح لهم ؟ و بأي حق ؟ .
..........................................................................................................
Mohamed
Hussein
29
أغسطس 2017·
لو سمحت
- نعم ؟
.
هو انت خروف العيد
؟
- أه بتسأل ليه
؟
.
مفيش , كنت حابب
أخد فكره عن الأسعار
- أه الأسعار
, انا ب 4000
.
لا انا بسأل عن
سعرك انت مش سعر العجل اللي جنبك
- مانا بجاوبك
عن سعري انا , 4000
.
4000 ايه سعادتك
؟
- 4000 جنيه يا
باشا
.
باشا ايه بقى
, دانت اللي باشا
- العفو يا سيدي
العفو
.
طب معلش سؤال أخير
و النبي
- اتفضل أسأل
, بس انجز عشان مش فاضيلك
.
هو انا ينفع أضحّي
بجوز فراخ أو بطه نتاية صغيره ؟
- غور ياض من هنا
بدل مانطحك
.
تنطح مين يا جدع
, دانت ب 4 ألاف , أنا لو مكانك أقعد كده معزز مكرم و اجيب نعجه فلبينيه تنطح بدالي
و تدلّك لي عضلة السمانه بالمرّه
................................................................................................................
Mohamed
Hussein
29
أغسطس 2017·
الفقر الحقيقي
و الغنى .... لو كانو يفقهون
.
زي دلوأتي كده
و احنا عيال صغيرين , ده الوقت اللي كنا بنستلم فيه بيجامات العيد من عند الترزي (
الخياط ) , جدي الله يرحمه او حد من أعمامي يروح يشتري توب قماش كبير و نروح للترزي
نفصله كلنا , كل ولاد العيله , الأحفاد اللي هما احنا , كنا بتاع 20 طفل , و يوم العيد
تلاقينا كلنا لابسين زي بعض بالظبط , نفس البيجاما المخططه بالطول أم زراير في النص
, و نفس الجزمه البلاستيك الجديده أم 3 خطوط في الجنب , لا تقولي بقى باريس فاشون ولا
خطوط الموضه , احنا كنا خط لوحدنا , نجري و نلعب و نتنطط في الشوارع , و بعدين نرجع
نتلم كلنا على طبليه و حصيرة و ناكل مع بعض و نعيّد على اعمامنا و جدنا و نبوس إيديهم
, العيديه كانت بريزه و ربع جنيه , و نكمل لعب و تنطيط , دي أيام الخير على فكرة ,
أيام الغنى الحقيقي , لو عايز تعرف الفقر تعالى و انا أقولك .
.
الفقر الحقيقي
إنك تكون عايش في فيلا و عندك عربية اخر موديل , و أخوك نفس الشئ و اختك نفس الشئ و
مامتك كمان , و عايشين كلكو في مدينة واحده , و ييجي العيد تلاقي نفسك طلعت الساحل
و اخوك طلع شرم و اختك بقى هتعيد في دبي , و مامتك في البيت , هتعيدو عليها ازاي ؟
أقولك انا , مكالمة تليفون رقيقه , أو رسالة عالواتس و جنبها إيموشن بتاع وش المكسوف
, أو تعمل لمامتك مينشن في بوست معايدة و تكتب ( يشعر بالمحبه ) , ده الفقر الحقيقي
حضرتك , الفقر الدكر , إن الوشوش لا تتلاقي ولا تتقابل ولا تبوس ايد والدتك و تعيّد
عليها و انت محني قدامها , ولا تتلمو مع بعض و تاكلو لقمه و تعيّدو عالولاد و تجمّعوهم
مع بعض .
.
هو انا عايز أقولك
ايه ؟ بالتأكيد مش قصدي اقولك انك تروح تجيب توب قماش زي اللي كان بيجيلنا زمان ولا
جزم بلاستيك زي اللي كنا بنلبسها ( أصلا مش هتلاقيهم ) ولا إن ولاد العم يلبسو زي بعض
, أنا عايز أقول لحضرتك , إنت ممكن تحب الساحل في العيد و تحب شرم و تحب دبي و تحب
المولات و البيسين و الشاليهات, بس الأجمل و الأكتر أدميه في العيد انك تحب البني ادمين
نفسهم , اللي هما عيلتك و قرايبك .
........................................................................................................
Mohamed
Hussein
28
أغسطس 2017·
بالنسبه بقى للزيّاطين
و الهجاصين و اللي بيحبو يصطادو في المايه العكره .
.
افتح يا جحش أي
جريدة مصريه أو عالميه أو أي موقع الكتروني , اختار أي تاريخ عشوائي , أه اي تاريخ
, بص كويس , لقيت ايه ؟ خبر القبض على المسئول الفلاني أو الوزير العلّاني في الدوله
الفلانيه بتهمة الرشوة أو بتهمة استغلال النفوذ أو التربّح أو أو , الكلام ده هتلاقيه
في كل دول العالم من شرقة لغربه , امريكا فرنسا اليابان اسرائيل بريطانيا البرازيل
ألمانيا .
.
فكرة إن رئيس الدولة
أو رئيس الوزرا لما بيختار حد من المسئولين أو المحافظين أو مساعديهم , إنه بيكون مغسّل
و ضامن جنه , و جايب المسئول ده معاه صك براءه مسبق و لاحق , و إن رئيس الجمهوريه بيفتح
الفنجان و يقرا الودع و يوشوش الدكر , هي فكرة تليق بعيل في تالتة ابتدائي لسه بيعمل
بيبي تحت الشجره .
.
السلطه و النفوذ
باستمرار لهم إغراء , لهم شيطان , مدى الحياه هيفضل الشيطان ده موجود , و في المقابل
هيفضل القانون موجود , و كرباج القانون فوق رقبة الكل , و هي دي الحدوتة باختصار ,
أنا جبتك في المكان الفلاني لأن مفيش عليك سابقه قانونية سابقه , عايز أشوف شغلك بقى
, و الله اشتغلت كويس أهلا و سهلا , أهملت في شغلك هرفدك , سرقت و نهبت و ارتشيت هتتنفخ
و تتسجن زيك زي أي حد .
.
بالعكس أنا بشوف
اللي بيحصل ده ظاهره صحية جدا , وزير زراعه ينزل من وزارته عالبوكس , نائب محافظ تتجاب
من اجتماعها عالنيابه , دي اللي اسمها دولة القانون , و الحكاية ممكن نقولها في سؤالين
اتنين , هل الدوله بتتستر على أي فاسد ( حتى لو كان وزير ) ؟ الإجابه لأ , طب تعرف
حد في مصر كلها فوق القانون حاليا ؟ الإجابه برضه لأ , يبقى كلامي صح .
......................................................................................................................
Mohamed
Hussein
28
أغسطس 2017·
معالي الدكتورة
سعاد الخولي نائب محافظ اسكندرية , جميلة أوي تسريحة شعرك دي و الصبغه و الفورمه و
اللون و القصه , روعة بصراحة , بس كان واجب تعرّفينا إن احنا اللي بندفع حساب الكوافير
!!.
................................................................................................................
Mohamed
Hussein
28
أغسطس 2017·
يعني انتي ربنا
أكرمك و بقيتي نائب محافظ , في محافظة اسكندرية , أعرق و أجمل محافظات مصر , يعني وجاهة
و مكانه إجتماعية مفيش بعد كده , و إسمك هيتكتب في التاريخ , وانتي أصلا مستورة و حالتك
ميسوره , لازمتها إيه بقى أم الطفاسه دي ؟ رشاوي و مخالفات إدارية و تربّح , و نهب
لفلوس البلد و مباني تقع على دماغ الناس , و عيال يعيشو من فلوس حرام , هما ولاد الكلب
مابيخلصوش ليه ؟ .
.
و من أقوال الجميله
الفاتنه سعاد الخولي ( ماتقولشي إيه إدتنا مصر ) , أه و الله ( ماتقولشي إيه إدتنا
مصر ) , لا مانا مش هقول , الرقابه الإدارية هي اللي هتقول , هتقول إيه اللي إديتهولك
مصر و إيه اللي سرقتيها من جيبها , و بإذن واحد أحد يعلّقوكي من شعرك يا خالتي .
...................................................................................................
Mohamed
Hussein
27
أغسطس 2017·
يا حبيبي انت خروف
, مجرد خروف ماشي في قطيع
- لا بقى ماسمحلكش
تقولي خروف , انا مش خروف .
.
طب هثبت لك للمره
الألف انك خروف , و كلكو مجرد قطيع من الخرفان مش اكتر .
- اثبت لي كده
.
.
في قانون المواريث
الجديد بتاع تونس , مولاك الشيخ وجدي غنيم لعن جدود أبو المسئولين في تونس و أولهم
الرئيس التونسي و اتهمهم بالكفر
- مولانا الشيخ
وجدي غنيم بارك الله فيه , هو على الحق المبين .
.
أردوغان بقى اللي
مولاك الشيخ وجدي غنيم هربان عنده أصدر امر باعتقال وجدي غنيم بناء على طلب تونس .
- أردوغان بارك
الله فيه , هو على الحق المبين .
.
و الفرع بتاع الجماعه
الإرهابيه بتاعتكو في تونس فوّت عادي موضوع قانون المواريث وقال إنه جميل اخر حماده
.
- الفرع بتاعنا
في تونس بارك الله فيه , هو على الحق المبين .
.
تمام كده أوي
, قولي بقى , انتو مين ؟
- احنا قطيع من
الخرفان بارك الله فينا , نحن على الحق المبين .
..........................................................................................................
Mohamed
Hussein
27
أغسطس 2017·
من غير تنمية بشريه
ولا حاجه , لو عندك موهبة حقيقيه و شوية عزيمة و شوية صبر و شوية طموح هتوصل هتوصل
, اكيد هتوصل , فكرة إن السواد قادم و مفيش فايده و نشر الكأبه و الإحباط و التشاؤم
هي فكره كولجيه بامتياز , و الحدوتة بتقول , لو اتنين وقعو في البحر هينجو منهم اللي
بيعرف يعوم !! لا هينجو المؤمن المتدين ولا هينجو الثورجي اللي قاعد على قهوه يبيع
شعارات وفلايات .
.
من خمس ست سنين
بس كان فيه اتنين لاعيبة كوره , بيلعبو في الدوري المصري , مش في الأهلي ولا الزمالك
, أغلب الناس ماتسمعشي عنهم , لو واحد فيهم فكّر يشتري تلاجه وقتها فهو غالبا هيشتريها
بالتقسيط , النهارده الساعه خمسه هتلاقيهم بيلعبو قصاد بعض في إتنين من أكبر و أشهر
أندية العالم , أرسنال و ليفربول , بعد ما بقى سعرهم يصرف على قبيلة بحالها ( ربنا
يزيد و يبارك و يحفظهم و يحميهم ) , إسمهم و إسم بلدهم هيتنطقو ب 17 لغة مختلفه و هيتفرج
عليهم مليار بني أدم في كوكب الأرض من شرقة لغربه , اللاعب المصري فلان , الفرعون المصري
علّان , المحمدين , صلاح و النني .
.........................................................................................................
Mohamed
Hussein
26
أغسطس 2017·
لو سمحت
- نعم يافندم
.
أنا عايز أقول
شهادة حق للتاريخ
- في حق مين حضرتك
؟
.
في حق قسم الصيانه
بتاع زانوسي
- اه اتفضل طبعا
, مالها الصيانه بتاعة زانوسي ؟
.
بصراحه عاجبني
اوي و منبهر جدا بشغلهم و أدائهم
- عاجبينك ازاي
يعني ؟
.
بص حضرتك
- بصيت أهو
.
لما بتتصل بيهم
بيحددو معاد و بييجو في نفس المعاد بالثانيه , يعني تظبط ساعتك عليهم , قمة الإنضباط
.
- طب ده شئ جميل
أوي , و ايه كمان ؟
.
ولما بييجي الفني
بتاع الصيانه يشوف التلاجه مفيش 5 دقايق تسأله المشكله في ايه ؟ يقولك المشكله في كذا
, إجابه فوريه و قاطعه مفهاش أي تردد .
- جميل جدا , و
ايه كمان ؟
.
الحاجه التالته
حضرتك هي طريقة شغلهم في الفتح و التقفيل , قمة الإحترافيه , مفيش حاجه بتتكسر ولا
مسمار بيتنسي , يعني زي مابيقولو شغل على ماية بيضا .
- طب ده كده روعه
, و أكيد طبعا المشكله بتاعة التلاجه بتتصلح
.
لا طبعا مابتتصلحش
ولا حاجه
- يا سلامممممم
, يعني انت منبهر بيهم و في الأخر المشكله بتفضل زي ماهي ؟
.
يا جدع عيب , هو
احنا لازم نكون شعب نمرود و طماع و مايعجبوش العجب ؟ بقولك ناس بتشتغل باحترافيه و
انضباط و منتهى الثقه , عايزهم يصلّحو المشكلة بتاعة التلاجه كمان ؟
.............................................................................................................
Mohamed
Hussein
26
اغسطس 2017·
مش هتطلع مصيف
و تفرّح البنات يا محمد ؟
- بص حضرتك , انا
اتعلمت و طلع عين أهلي و بعد كده اتغربت 13 سنه , و رجعت من الغربه , لقيت فيه أكل
و شرب و لبس و مصاريف مدارس , و حكاية المصيف دي بقالنا 3 سنين ماطلعنهاش
.
ليه بقى ؟
- المصيف بتاعنا
اجمالا بيكون ليلتين تلاته , إما في العين السخنه أو في اسكندريه ( المعموره مثلا
) , و اختيار المكانين دول عشان المسافه مش بعيده أوي و عشان الحسبه , الحسبه المفروض
ماتزيدش عن 2500 جنيه , مانقدرش نصيف في السنه بأكتر من كده , من سنتين بقى جبنا قطه
في البيت و القطه مانعرفش نسيبها لوحدها أكتر من ليله , فقلت الحمد لله , جت من عند
ربنا !! .
.
ايه ده ؟ يعني
مش هتروح هاسيندا ؟
- ايه هاسيندا
دي ؟ دوا كحه ؟
.
لا يا محمد , دي
حته كده بيصيفو فيها
- الحته دي في
أوروبا ولا أمريكا ؟
.
لا الحته دي في
مصر , بس الليله ب 17 ألف
- طب مانا لسه
مافطرتش و مش عايز أقول ألفاظ أبيحه خصوصا إننا في أيام مفترجه
.
يابني انت مش فاهم
, أصل الأخت إسراء عبد الفتاح بتصيف في هاسيندا
- طيب خلاص , بما
إني اتغربت 13 سنه و أخري ليلتين في المعموره تبقى هي اكيد اتفحتت في التعليم برضه
و اتغربت 7450 سنه , دي حسبه بسيطه بالورقه و القلم .
.
لا حضرتك هي ماتغربتش
ولا اتفحتت , هي نزلت التحرير 18 يوم .
- قلت لي بقى
, طب كده تاهت ولقيناها , إما ميدان التحرير في الوقت ده كان فيه أبار بترول و هي لحقت
بير و بقت ( كفيل ) , أو كان فيه مغاره علي بابا و هي لحقت لها شوية دهب و لولي و مرجان
.
.
لا يا محمد ميدان
التحرير مفهوش بترول ولا فيه مغارة علي بابا ولا على ماما
- ماهو بص حضرتك
, ماتحاولش معايا , انت بتحاول تضغط عليا عشان أقول إن العيال دول ولاد كلب وسخه خونه
صيّع باعو بلدهم لكلاب السكك و قبضو و بيقبضو التمن , ماتحاولش لأني مؤدب و كيوت و
لساني مش طويل .
....................................................................................................................
Mohamed
Hussein
26
أغسطس 2017·
لاحظت حاجه عندي
لها دلاله , إن أكتر بوستات بيكون عليها تفاعل هي البوستات اللي بتكلم فيها عن الذكريات
و الشوارع و الحواري و الشجره و القنايه و الأرض الخضره و صيد السمك و ضحكة الوشوش
و صوت الادان و لمة الناس مع بعضهم .
.
الحكايه دي دلالتها
إن الناس ممكن تزهق من السياسه و الأخبار شويه , ماتحبش , ماتعلقش , إنما عند بهية
محدش بيزهق و كله بيحب , بهية بقى , بخيرها و ترابها و ريحتها و طعمها و طينها و جمالها
وعبلها , و بعشق زي الداء .
............................................................................................................
Mohamed
Hussein
25
أغسطس 2017·
الحمير لا يدخلون
الجنه
.
هجوم إرهابي على
مسجد للشيعه في أفغانستان وقت صلاة الجمعه , أكتر من 20 قتيل و 50 جريح .
.
شوف حضرتك
- عدد المسلمين
السنه في العالم , اكتر من مليار نسمه , فيهم كام ألف إرهابي بهلول متخلف عقليا .
- عدد المسلمين
الشيعه في العالم حوالي 200 مليون نسمه , فيهم برضه كام ألف إرهابي بهلول متخلف عقليا
.
- فيه دول بنت
تيت بترعي الإرهابي البهلول السني و تصرف عليه , و دول تانيه بنت تيت برضه بترعي الإرهابي
البهلول الشيعي و تصرف عليه , و فيه دوله واحده بتخطط للموضوع كله .
.
لو سالت الإرهابي
السني المتخلف عقليا و الإرهابي الشيعي المتخلف عقليا , ايه أقصى أحلامكو و أمانيكو
؟ هيقولو في صوت واحد تحرير القدس و طرد الكيان الصهيوني , و عشان هما الاتنين متخلفين
عقليا فبتبقى قناعتهم إن تحرير القدس بيبدأ بإنهم يقتلو بعض !! , يعني المتخلف عقليا
الأولاني يقتل المتخلف عقليا التاني و العكس صحيح , و مفيش واحد منهم يحرق لمبة كهربا
حتى في تل أبيب ( ولا من الدول اللي بترعاهم ) , و بكده تعيش اسرائيل في أمان و سلام
و تنام في بطنها بطيخه صيفي , و قبل ما تنام تفتح التلفزيون على شاشه LCD كبيره تتفرج علينا و احنا بنقتل بعض , يضحكو و يطرقعو
الكاسات و يسكرو طينه و ينامو بعمق زي الأطفال .
.
عرفتو بقى مين
المستفيد الأوحد من الإفتكاسه بتاعة الصراع السني الشيعي ؟ و مين اللي ممكن يكون هو
العقل المدبر للحدوته كلها , و يبقى المتخلفين عقليا مجرد أدوات تنفيذ ( هما و الدول
اللي وراهم ) .
.
أه بالمناسبه
, تنظيم داعش الإرهابي أعلن مسئوليته عن عملية قتل الشيعه النهارده , و بالمناسبه برضه
مفيش حاجه اسمها تنظيم داعش , ده إسم وهمي لأي حد أو أي مجموعه أو أي كيان عايز يعمل
جريمه ( حتى لو كان الكيان ده جهاز مخابرات دوله أجنبيه ) .
.
أول خطوه في خطوات
دخول الجنه , جنة الدنيا أو جنة الأخره هي إننا نفهم , عشان لو مافهمناش هنبقى حمير
, و الحمير لا يدخلون الجنه .
.................................................................................................
Mohamed
Hussein
25
أغسطس 2017·
ريّحو دماغكو
.
بعد تفحيص و تمحيص
, و تفكير و تعمق , و تحليل للدماغ و المخ و الجمجمه و القرون و الليّه و الديل , وصلت
لقناعتي التامه
.
في سنة 2022 ,
لو ماحصلش أي تعديل في الدستور هنبقى قدام انتخابات رئاسيه مفهاش إسم عبد الفتاح السيسي
, طيب هيكون قدامنا اختيارين , إما شخصيه من المؤسسه العسكريه يكون عليها توافق و لها
شعبيه كافيه ( زي صدقي صبحي مثلا ) أو شخصيه مدنية وطنيه تحظى برضه باحترام الأغلبيه
من الشعب , يكون مثلا سياسي مخضرم محدش يشك أبدا في وطنيته , و في كل الحالتين عملنا
انتخابات حره و نزيهه و جبنا نزيهه ذات نفسها تراقب الإنتخابات و معاها وفد من أمريكا
و الإتحاد الأوروبي و الأمم المتحده و دول الكومنولث و المجموعه الشمسيه و درب التبانه
و تحت إشراف لفيف من الأنبياء و القديسين , و نجح المرشح ده , اللي هو العسكري أو المدني
الوطني المحترم , و فاز من الدور الأول ( باكتساح ) , تفتكرو بعدها الخرفان و شمامين
الكوله هيقولو إيه ؟
.
أقولك أنا يا سيدي
, لو نجح مرشح بخلفيه عسكريه هيقولو العسكر و الحكم العسكري ( مع انه نجح بانتخابات
و صناديق و تحت إشراف من طوب الأرض ) !! , طب لو كان المرشح مدني وطني محترم ؟ برضه
هيقولو ده مجرد واجهه جايبها الجيش , و الجيش هو اللي بيحكم , يعني كلمة مدني و عسكري
مش هتفرق معاهم .
.
هو أنا عايز أقول
لحضرتك ايه بالظبط ؟ انا عايز أختصر هري كتير , كلمة مرشح مدني اللي بيقصدها الخرفان
و الشمامين بتعنى رئيس لمصر يكون شمام كوله بيسأل الدوله بتشتري سلاح ليه ( الدوله
اللي هي أكتر دوله دخلت في حروب و اتعرضت لمؤامرات في تاريخ البشريه ) أو يكون المرشح
المدني هو مجرد سكرتير لمرشد جماعه إرهابيه دوليه خاينه .
نقطه و من أول
الديموقراطيه .
..............................................................................................................
ليست هناك تعليقات:
إرسال تعليق