Mohamed
Hussein
7
سبتمبر 2017·
زمان أيام ما كنت
بشم كوله في 2011 , كنت هفرح أوي بخبر ان وزير الدفاع التونسي طبيب بشري .
.
أياميها شوفت وزيرة
دفاع في دولة اوروبيه , أسبانيا تقريبا , و كان أحد أحلامي ( الثوريه النضاليه اليساريه
العريقه ) إنه يكون وزير الدفاع عندنا واحده ست مزه , و تكون حامل في الرابع , ماعرفشي
ليه الرابع تحديدا ,حبذا بقى لو كان وزير الدفاع ده هو الأستاذه نيرمين الفقي , و تبقى
كده الثورة حققت أهدافها و جابت جون بكعب رجليها من نص الملعب , واضح اني كنت بشم الكوله
من قعر البرطمان.
..........................................................................................................
Mohamed
Hussein
6
سبتمبر 2017·
الخارجيه ردا على
تقرير هيومن رايتس واتش : أجندتها مسيسه و سياساتها منحازه !! .
.
يا بني ادمين
, يا أهل مصر الطيبين , اقعدو مع عيالكو و اخواتكو , الأطفال و المراهقين , اشرحو لهم
بالراحه , بهدوء , بالورقه و القلم , تشرحو لهم ايه بقى؟
.
- زمان كان فيه
قوى استعماريه بتتنافس للسيطره على دول العالم و نهب ثرواته , بتجيّش الجيوش و تطلع
في حروب تحتل الدول و تقتل سكانها و تنهب ثرواتها و تبسط نفوذها , اظن محدش ينكر الكلام
ده صح ؟ ده موجود في أي كتاب تاريخ , حتى الدول دي ماتقدرش تنكره .....طيب تمام .
.
- نفس القوى الإستعماريه
تخلّت عن الوسيله إنما الغايه موجوده زي ماهي , تخلت عن فكرة تجييش الجيوش و الدخول
في حروب نظاميه لاحتلال الدول و بسط النفوذ ( الحكايه دي موضه بطلت و بيروح فيها ألاف
الجنود من قوات الدول الغازيه ) .
.
- طب تعمل ايه
الدول دي عشان توصل لنفس الغايه من غير جيوش و حروب نظاميه ؟ دي بقى اللي اسمها حروب
الجيل الرابع , أدواتها مختلفه , أسلحتها مختلفه .
.
- ايه هي الأدوات
و الأسلحه ؟ الأدوات يا سيدي إعلام , صحافه و قنوات فضائيه عالميه , منظمات حقوقيه
, جمعيات بتصدر تقارير , شوية مصطلحات برّاقه , تجنيد للشباب تحت نفس المصطلحات البراقه
( الحريه و الديموقراطيه و الثورات و الربيع و حقوق الإنسان و حتى نُصرة الإسلام
!! ) .
.
- اللي باقي من
القوى الإستعماريه و بيحاول باستمرار يبسط نفوذه في الشرق و الغرب هما بريطانيا و أمريكا
و وراهم الكيان الصهيوني , الدول التانيه بتشارك على استحياء و بتحاول عالأقل تحمي
مصالحها الشخصيه .
.
- ايه الغرض من
كل الأفلام الهندي دي و اللي بيتصرف عليها مليارات متلتله ؟ الغرض انك تبقى باستمرار
تحت ستريس , تحت رحمتهم , بيساوموك و بيلوو دراعك , و انت هنا مش مقصود بيها مصر بس
انما مقصود بيها أغلب دول العالم ( راجع قانون جاستا اللي اتعمل مخصوص لابتزاز السعوديه
) .
.
- لو محتاج ألف
مثال و ألف دليل للتأكيد على دور الإعلام و المنظمات و الحبشتكانات في خراب الدول و
لوي دراعها هتلاقي أكيد وهتكتبهم بإيديك , الحكايه مش إيمان بنظرية المؤامره و نظرية
البطيخ , الحكاية إيمان بنظرية و أبجديات العقل البشري , و اللي مايشوفشي من الغربال
يبقى أعمى .
.
- مصر في الوقت
ده تحديدا في مرحلة استقلال سياسي تام , لا تبع معسكر شرقي ولا معسكر غربي , عشان كده
هتلاقي كل واحد بيحاول يساوم ( و يبتز ) بطريقته , اللي يساومك عالسياحه و اللي يساومك
عالمعونه و ( يسلّط ) عليك المنظمات الحقوقيه , و النبي لو عملت لكل سجين جناح فندقي
و جبت له شغاله فلبينيه تخدمه و تدلك له عضلة السمانه و ركّبت كاميرات في الجناح الفندقي
عشان أمريكا تشوف المعامله بعنيها 24 ساعه يوميا , ماهتفرق معاهم .
.
- طب دورنا احنا
ايه في الليله دي ؟ دورنا ببساطة شديدة إننا نفهم و نفهّم اللي حوالينا , أول سلاح
نقاوم بيه ( المرقعه ) الأمريكيه البريطانيه الصهيونيه هو سلاح العقل , اللعبه كلها
لعبة عقل , و دورنا حاجه كمان , لما تقابل عيل صايع من اللي بيشتغلو في المنظمات دي
أو بيشتعلو مراسلين في القنوات و الجرايد الأمريكيه و البريطانيه قوله في وشة كده
: انت بتشتغل في أقدم و أحقر مهنه في التاريخ ( هو هيفهم لوحده ) , قولها و على مسئوليتي
.
.
السيد وزير التربيه
و التعليم , عليك دور يافندم في شرح الكلام اللي فوق ده لطلبة المدارس , السيد وزير
الثقافه عليك دور , الساده الإعلاميين المصريين , انتو بتعملو ايه بالظبط في أماكنكو
؟ بتشتغلو ايه ؟ دي البلد فيها أزمة بوابين و شغالات !! .
..................................................................................................................
Mohamed
Hussein
6
سبتمبر 2017·
نقطه و من أول
العقل
.
- من عشر سنين
و انا بطّلت انخدع بقصة و افتكاسة قطاع غزه و حماس و جهاد و العداء مع الكيان الصهيوني
و أنقذو المسجد الاقصى و الهري ده كله , الأيام أثبتت إني كنت صح , لا فيه صراع و لا
فيه طلقه انضربت من حماس على جندي صهيوني على مدار 10 سنين , ولا فيه جهاد ولا فيه
سلامه , إنما فيه مجهود عظيم بذلوه في حفر الأنفاق مع مصر و تهريب الإرهابيين لمصر
و السلاح و المخدرات , يعني الحكايه سبوبه اقتصاديه بتصرف عليها أكشاك مع محاولة بائسه
لهدم دولة عظيمه اسمها الشقيقه الكبري مصر , هذه السبوبه و هذه المحاوله البائسه تأتيكم
برعاية الكيان الصهيوني ذات نفسه !! .
.
- من سنين طويله
و انا مابصدقش حكاية الصور اللي بتتنشر و الفيديوهات و الشحتفه و أه يانا يامه يانا
يامه , الحكايه دي برع فيها جدا التنظيم الإرهابي و ورا منه شمامين الكوله بتوع لايك
و شير , اللي هما الحمير المركوبين ( لعن الله الراكب و المركوب ) , من سنين شغاله
الحدوته , من أول صورة الطفلين اللي قتلهم الجيش المصري في فض اعتصام رابعه و طلعو
صورة طفلين ماتو في سوريا قبلها بشهور , و من أول فيديو الطفل السوري اللي بيجري وسط
النيران و الحقيقه انه مشهد تمثيلي عمله مخرج أمريكي نُص لبّه , و خد عندك بقى مئات
و ألاف الصور و الفيديوهات المفبركه يعني الفستك .
.
و بناء على ما
سبق فلازم حضراتكو تكونو عارفين أن حدوته بورما غير مالناس فاهمه و غير الصور و الفيديوهات
( اللي اغلبها مضروب ) , ممكن نقول حلقة جديده من مسلسل ممل ( حتى لو كان في الشكل
العام فيه صراع طائفي في بورما و فيه ضحايا من الأبرياء ) , إنما الغرض و الهدف و الغايه
هو خلق بؤر توتر في أماكن متفرقه من العالم مع استغلال لحماس ( و غشومية ) المسلمين
أحيانا و غيرتهم على دينهم , و استغلال لحماس الشباب احيانا و رغبتهم في الديموقراطيه
( الدين و الديموقراطيه و الحريه هما الطُعم أو أدوات اللعبه ) .
.
مين اللي بيخلق
بؤر التوتر ؟ اللي بيخلقها هو نفس اللي بيروج في جرايده و قنواته و يقول ( انقذو مسلمي
بورما ) و هو نفس اللي روّج للربيع اللامؤاخذه العربي , يا مولانا بريطانيا و أمريكا
مش بيبيعو سبح , ولا جرايدهم ولا قنواتهم , و عهد الله ما بيبيعو سبح ولا بينامو و
يصحو يتشحتفو على حال المسلمين و على حقوق الإنسان في الشرق الأوسط و جنوب شرق أسيا
.
.
و لو كنت يعني
مسلم متدين و غيور على دينك فعايز أقولك في النهايه , فكّر الأول و اعرف الحقيقه و
اعرف المشهد واللي وراه , ليه بقى لازم تعرف و تفهم الأول ؟ لأن حديث سيدنا النبي بيقول
المؤمن كيّس فطن , حاول تقراها صح , كيّس فَطِن , مش كيس قطن !! .
.
طب ليه برضه ؟
عشان يا مولانا ماتبقاش أداه أو لعبه في إيد اللي بيستغلو حماسك و غيرتك على دينك
( أه بالمناسبه أمريكا استغلت نفس حماسك ده في إسقاط الإتحاد السوفيتي !! و في تقسيم
فلسطين و في تقسيم السودان , ماتجيب بوسه مشبك يا أخي في الله ؟ )
...........................................................................................................
Mohamed
Hussein
6
سبتمبر 2017·
السعوديه اتأهلت
رسمي لمونديال روسيا 2018 , ألف مبروك لأشقائنا في السعوديه .
الخبر اللي فرحني
اكتر هو إن سوريا اتأهلت للملحق الأسيوي , يعني قدامها فرصه حلوه تلعب كاس عالم , سوريا
رغم الحرب و الدمار و الخراب المستمر من سنين , يارب مصر و سوريا يدخلو روسيا و هما
ماسكين ايد بعض .
.
ده حلم بقى , سوريا
تتأهل و مصر تتأهل , سوريا تعمل معسكر الإعداد بتاعها عندنا و يسافر المنتخبين في طياره
واحده و ينزلو في نفس الفندق , و المنتخب السوري يلاقي نفس الإهتمام من الإعلام بتاعنا
و نفس التشجيع من جمهور مصر , مش بصفته منتخب عربي , إنما بصفته منتخب سوريا الأبيه
, اللي زيها زي مصر , مابتنكسرش ولا تموت حتى لو اتلم عليها كلاب السكك .
.....................................................................................................
Mohamed
Hussein
5
سبتمبر 2017·
كل الطرق تؤدي
إلى روسيا , و الله إني لأشم رائحة موسكو
.
بص يا عم , بجد
و الله , ملناش أي حجّه , غانا نفخت الكونغو من شويه ( على أرضها ) و فازت بالخمسه
, كده غانا بقى عندها امل و لو إنه أمل وهمي , و الكوره بقت في ملعبنا احنا .
.
يعني ايه الكلام
ده ؟ يعني الأمل لما يرجع لغانا تبقى ممكن تعمل نتيجة ايجابيه مع أوغندا الماتش الجاي
, أوغندا دي اللي هنلاعبها بعد ساعه , فريق تعبان مُلّه على فكره و نقدر نشيّلها أربعه
هنا , ترجع اوغندا من عندنا شايله أربعه بإذن الله بدون مقاطعه , تروح على أرضها تلاقي
غانا مستنيه , غانا استعبطت في أول البطوله و خسرت نقط كتير بس غانا أقوى بكتير من
أوغندا و تقدر غانا تنفخ أوغندا على أرضها زي ما عملت النهارده مع الكونغو .
.
نقوم احنا ايه
بقى ؟ نقوم نفوز عالكونغو الشهر الجاي ( الكونغو أصلا عندها نقطه و خرجت من المسابقه
رسمي فهمي نظمي ) , و نتأهل من ستاد برج العرب , اه و عهد الله زي مابقولك كده .
.......................................................................................................
Mohamed
Hussein
5
سبتمبر 2017·
السبعه التُقال
, و مفهوم الدوله
.
عبد الفتاح السيسي
بعد 3 سنين من حكم مصر , بقى عنده 7 أعمده بيعتمد عليهم , من المسئولين اللي اختارهم
أو اللي تواجدو في عهده , ممكن نقول عليهم السبعه الكبار أو السبعه التُقال
.
- وزير الدفاع
صدقي صبحي , اللي هيتحسب في عهده إعادة تسليح الجيش المصري , و حرب طويله على الإرهاب
اللي بتدعمه دول عظمي و دويلات (و أكشاك ) , المشاركه في بناء مصر في مشاريع الطرق
و الكباري و استصلاح الأراضي و خلافه , التعامل مع ملفات عاجله و حيويه زي ملف لبن
الأطفال و منافذ البيع للمنتجات الغذائيه , يعني تحت إيده جيش بيعرف يشيل بلد بحجم
مصر في وقت الأزمه .
.
- وزير الداخليه
مجدي عبد الغفار , اللي قدم هو و رجالته مئات الشهداء في حربهم ضد الإرهاب , و اللي
اشتغلو في أصعب ظروف و أصعب توقيت و بأقل الإمكانيات المتاحه .
- رئيس الوزراء
السابق إبراهيم محلب , اللي السيسي رفض يستغنى عنه و كلّفه بملفات و مهام لا تقل خطورة
عن مهام رئيس الوزراء الحالي , زي المشاريع القوميه و ملف استرداد أراضي الدوله المنهوبه
.
.
- أسد الخارجيه
سامح شكري , اللي تقريبا مابينامشي , تلاقيه النهارده في الشمال و بكره في الجنوب و
بعده في الشرق و في الغرب , و لما الرئيس الفرنسي يقول أنا مهمتي صعبه فأنا مضطر كل
اسبوعين للتحدث مع أردوغان !! يبقى الله يكون في عون سامح شكري , اللي بيروح لكلاب
السكك و حلفاء التأمر علينا في قلب دارهم و يبتسم و يتفاوض و يفتح ملفات .
.
- سحر نصر الوزيره
النشيطه الوطنيه المحترمه , اللي بتدوّر على مجالات الإستثمار حتى لو في أدغال أفريقيا
.
.
- طارق عامر محافظ
البنك المركزي , اللي اخد قرارات جريئه جدا في وقت صعب , بس كان عارف هو بيعمل ايه
, زي قرار التعويم ( رغم أثاره الصعبه جدا علينا ), بس الحدوته مكانشي لها حل تاني
, احتياطي نقدي قليل جدا , و سياحه انضربت عمدا , و نفس الكشك اللي بيتأمر علينا ماعندوش
مانع يصرف اتنين تلاته مليار دولار و يرميهم في الأرض في مقابل مثلا انه يلم الدولارات
من المصريين في الخارج ( بمساعدة الخرفان طبعا ) , و المصريين العاديين نفسهم كتير
منهم هاص في الزيطه و باع اللي وراه و اللي قدامه و بقى يشتري دولارات و يخزنها في
بيته , طب حضرتك احنا معندناش أمكانيات أمنيه و رقابيه كافيه لتفتيش 40 مليون شقه و
محل , و نشيل مراتب و نحط مراتب , ولا عندنا امكانيات نطلع نجري ورا الناس في الخليج
و نقول لهم مين اللي بيلم منكو الدولارات و نعمل فيها الديب السحليوي , النهارده الاحتياطي
النقدي بقى 36 مليار دولار , و سعر الدولار بينزل تدريجي .
.
- و أخيرا بقى
, وزير التعليم , اللي تحفّظت على حاجات معينه من قرارته ( بصفتي مواطن ) لكن ده مايمنعش
ان الراجل ده دارس ملف التعليم من الألف للياء بكل تفاصيله و من سنتين , و عنده خطة
شامله متكامله للإصلاح و التطوير , و يمكن ده سبب الهجوم عليه من المنتفعين و المستفيدين
من معجنة التعليم الحاليه .
.
- اللي فوق ده
هو مفهوم الدوله المحترمه , الرئيس بيختار عشرات المسئولين بيطلع منهم الصالح ( و الطالح
) , هو مش مغسّل و ضامن جنه ولا بيقرا الفنجان , المسئول الكويس بيكمل , و الفاشل و
المهمل بيمشي , و الحرامي و المرتشي بيتحاكم
..........................................................................................................
Mohamed
Hussein
5
سبتمبر 2017·
هو أنا معنديش
شك إننا بإذن الله بكره هنغلب أوغندا , و باكتر من 1/0 , و بعد شهر هنغلب الكونغو برضه
و هيبقى معانا 12 نقطه .
.
هنيجي بقى لماتش
غانا اللي هناك , و هتبقى اصلا غانا خرجت من التصفيات ولا ليها امل ولا عمر , و المحترفين
بتوعها مش هييجو يلعبو الماتش و هيلمو شوية لاعيبه من عالقهاوي باعتبار انه ماتش تحصيل
حاصل , و احنا هنكون محتاجين نقطه واحده عشان نتأهل لكاس العالم , بس النحس الدكر بتاع
كل مره هيركبنا بقى , هننزل ماتش غانا نلعب بخطة دفاعيه و نفضل متعادلين لحد الدقيقه
95 , و نقوم نبل الشربات و نجهز علم مصر و نسخّن العربيات عشان نعمل زفه و و هووووب
يقوم على جبر أو احمد فتحي مكعبلين عيل من بتوع غانا في منطقة الجزاء بتاعتنا , مع
ان الكوره اصلا هناك في الناحيه التانيه عند الحارس بتاع غانا , الحكم يشوف الحركه
هو و حامل الرايه و طوب الأرض يشوفها , يقوم الحكم حاسبها ضربة جزاء .
.
يدخل عيل أعرج
و مكسح من بتوع غانا عشان يشوط ضربة الجزاء دي , و الحضري ياخد نفس عميق , و احنا ضربات
قلبنا تبقى أسرع من محمد صلاح و الأدرينالين بتاعنا يضرب في سقف البيت , الواد المكسح
يشوط الكوره بالراحه و تيجي في القائم يقوم الحضري فرحان اوي و يحتفل و هو مش مركز
, تقوم الكوره لامسه في كعب رجله و داخله جون , و السلام عليكم و رحمة الله و بركاته
.
........................................................................................................
Mohamed
Hussein
4
سبتمبر 2017·
عاجل , أكد مصدر
رفض الإفصاح عن إسمه لجريدة ( علمني العوم و النبي ياحمد ) الواسعه الإنتشار و المتخصصه
في الشئون السياسيه و الإقتصاديه و العسكريه و المنوفيه أن رباط الجزمه بتاعة السيسي
سعره 70 مليون دولار .
و قال المصدر الذي
يعمل خبيرا في رباط الجزم أن رباط الجزمه اللي لابسها السيسي في قمة بريكس صنعته خصيصا
شركة كاتربيلر العملاقه , و يرجع ارتفاع سعره أنه مصنوع من ألياف طبيعيه مشتقه من بعض
الديناصورات النادره و هي من نوعية الديناصورات اللي بتطلع نار من ودانها , و لو دوست
على ودانها مرتين ورا بعض هتطلّع سحلب .
........................................................................................................
Mohamed
Hussein
4
سبتمبر 2017·
حكايتهم ايه بقى
يا سيدي ؟ هقولك أهو
.
حكايتهم إن عقولهم
بقالها 7 سنين محشوره في مؤخرتهم , و هما بقالهم 7 سنين بيتركبو من الخرفان , يعني
7 سنين عقولهم بتُنكح يوميا على قارعة الطريق من كائن هو في الأصل خروف .
.
طب بعد ما عقله
اللي محشور في مؤخرته يتنكح 7 سنين متواصله من خروف ممكن يحصله ايه ؟ يحصله يا مولانا
إنه يشوف السيسي في قمة بريكس , مع قادة النمور الإقتصاديه في العالم , و دعوات للاستثمار
في مصر و إنهاء عقد الضبعه النووي ( جاهز للتوقيع ) , و شراكة اقتصاديه مع الصين (
اللي بتستثمر 11 مليار دولار في العاصمه الإداريه , ماهربتش ولا حاجه ) و اللي هتعمل
مدينة صناعيه كامله في مصر .
.
يشوف بقى الحدوته
دي و لأن عقله زي ما قلت لك كده موجود في مكان معين و بيتعمل فيه حاجات معينه , هتلاقيه
مركز مع الساعه الرولكس اللي لابسها السيسي , أم معرفشي كام ألف , عبد الفتاح السيسي
اللي كان وزير دفاع و قبلها كان رئيس مخابرات و واحد من كبار قادة الجيش المصري , اللي
مرتبتهم محترمه جدا ( و لازم تكون محترمه جدا ) لابس ساعه رولكس اللي بيلبسها أي شاب
عمره 27 سنه لو شغال في فودافون !! , لا و النبي مايصحش , كان المفروض يلبس ساعه من
أم تلاته جنيه على اعتبار انه السنين اللي فاتت كان بيشتغل تبّاع على ميكروباصات السلام
والنهضه و بيشرب سجاير فرط .
................................................................................................
Mohamed
Hussein
4
سبتمبر 2017·
اللي اتفاجئ بإنتماء
عمرو خالد و كل شلّة مشايخ ال ( هيييح ) اللي ظهرو فجأه في وقت واحد , في مصر والخليج
, اللي اتفاجئ بانتمائهم للإخوان يبقى لامؤاخذه مايعرفشي يعني ايه تنظيم إرهابي دولي
أنشأته المخابرات البريطانيه في نفس توقيت نشأة الكيان الصهيوني .
.
يا حبيبي , يا
ضنايا , كل قيادات الخرفان المرميين في السجون ولا ليهم أي تلاتين لازمه , مجرد خرفان
في القطيع زيهم زي أصغر خروف في الجماعه الإرهابيه .
.
اللي بيخطط للناس
دي و يفكّر لها و يجمع لها شعبيه من تحت الأرض و يوفر لها غطاء سياسي و اقتصادي ( تحت
مسميات بقى حقوق الإنسان و الديموقراطيه و الفول الحريتي ) اسمها المخابرات البريطانيه
, المخابرات اللي بتشتغل حضرتك بطريقة : لو عندك بحر فيه سمكه واحده و عايز تجيبها
, يبقى الحل بالتأكيد أنك تجيب معلقه و تنزح ماية البحر بالمعلقه لحد مايبقاش فيه غير
السمكه اللي انت عايزها !! .
.
المخابرات البريطانيه
حضرتك بتعتبر ان الكيان الإرهابي الدولي ده جزء من هيمنتها على العالم , القوه الاستعماريه
القديمه بتمارس استعمارها بشكل مختلف , بأدوات مختلفه و هي قاعده في التكييف , عشان
تسيطر على دول الشرق الأوسط تعمل كيان ارهابي دولي , و تمنح أغلب قياداته الجنسيه و
توفر لهم كل أدوات الشهره , و تخطط لهم و توزّع الأدوار للوصول لشرايح اجتماعيه مختلفه
من الشعوب , عشان في النهايه يفضل الكيان الإرهابي ده أداة تنفيذ في وقت الخراب و المؤامره
, و ورقة ضغط في وقت السلم , الحدوته في كلمتين أهم هقولهم تاني : أدوات تنفيذ في وقت
المؤامره و الخراب و ورقة ضغط في وقت السلم , فيلم و اتهرس مليون مره قبل كده .
.
ده يعني لو كنت
حابب تفهم , إن بريطانيا و أمريكا اللي بيلمو قيادات الإرهابيين عندهم و يصرفو عليهم
و يعلفوهم و يفتحولهم البرلمانات و البيت الأبيض , مش بيعملو كده محبه في الإسلام و
طبعا مش هيحررو لنا القدس , اعتقد أمريكا و بريطانيا مش هيحررو لنا القدس , ولا انت
رأيك يا مولانا انهم هيحررو لنا القدس ؟ أقولك الكلمه الأبيحه إياها ؟ .
..........................................................................................................
Mohamed
Hussein
3
سبتمبر 2017·
فلوس البلد بتروح
فين ؟
.
تعالى و انا أقولك
, كلام الناس اللي بتمشي في شوارعها و سككها و بتطلع كباريها , مش كلام ناس قاعدين
قدام كيبورد .
.
لما تكون زي حالاتي
غاوي سفر و تنطيط بين البلاد , هتعرف الفرق و تشوفه بعنيك , الحكايه لا لها علاقه بانك
بتتفرج على لميس ولا ماشي ورا مصطفى بكري ولا كل الهجص اللي عايش فيه شمامين الكوله
, انزل بنفسك و شوف .
.
في سنتين تلاته
بس حصل ايه ؟ حصل يا سيدي انك تطلع من بيتك في مدينة نصر عشان تروح السنبلاوين , عادي
مشوار اتعودت عليه و مشيته ألف مره , ايه الجديد في المشوار ده ؟ الجديد ان مفيش حته
بتقف فيها ؟ ولا حته ؟ أه ولا حته ؟ لا ليل ولا نهار ؟ أه و عهد الله لا ليل ولا نهار
, هتطلع الدايري من عند الحي العاشر هتلاقي كوبري فخم و فخيم لسه معمول , يطلعك من
مدينة نصر و يرميك ( هوووب ) عالدايري , الصينيه اللي كنت بتقف فيها أحيانا بالساعه
مابقتشي موجوده .
.
طيب طلعت الدايري
و مشيت , خدت نزلة اسكندرية الزراعي , و مشيت لبنها الطريق سالك , مسكت بقى طريق بنها
المنصوره , هتعدّي على ميت غمر ؟ قشطه , معاك ساعه لما تطلع من جواها , لا مبقاش ساعه
, ولا 10 دقايق حتى , عشان الكوبري اللي اتعمل بيخليك تعدّي من فوق ميت غمر و تنزل
( هوووب ) برضه تلاقي نفسك في طريق سالك , يعني لا ميكروباصات واقفه ولا تكاتك ولا
عربية كارو بحمار , وصلت اجا يا مولانا ؟ هتركن شوية في دخلة أجا , دي دخلة مدينة برضه
ولها احترامها , لا خلاص مش هتركن , و تركن ليه ؟ انت تطلع الكوبري ده و هوووب تلاقي
نفسك بره اجا و المنصوره في وشك , طب عند دخلة المنصوره الحته بتاعة سندوب و موقف الميكروباصات
و زحمه و يا سلام بقى لو فيه قطر معّدّي , بطّل عربيتك و حاول تتغدى لو جعان , الموضوع
مطول , لا خلاص , عملنالك كوبري في سندوب , تحفه فنيه و معمارية , حاجه كده مش هتلاقي
زيها في القاهره نفسها , كذا حاره و كذا اتجاه و كذا ارتفاع , و هووب تلاقي نفسك مسكت
طريق السنبلاوين .
.
حتى السنبلاوين
نفسها يا مؤمن , كان فيه وصلة بتاع 2 كيلو على طول تلاقي المجاري ضاربه فيها و الطريق
مكسر و حفر و بلاعات , الحكايه دي من سنين طويله لدرجة اني اعتبرتها فولكلور , يعني
حاجه كده من تاريخنا الجميل اللي مستحيل يتغير , و قلت الوصله دي عليها عفريت أو مارد
, مهما عملت فيها مابتتصلحش , لا معلش اتصلحت و ماطلعشي فيها عفريت ولا مارد .
.
الحدوته اللي فوق
دي طريقي , و أكيد عبد الفتاح السيسي مابيعملشي خطة التنميه على الطريق اللي بيمشي
فيه محمد حسين اللي هو انا , يعني أكيد الكباري و الطرق دي اتعمل زيها في اسكندريه
و خط القناه و الصعيد و وجه بحري , طب حضرتك عشان تعمل مجموعة كباري عملاقه و ترصف
و تعيد رصف ألاف الكيلومترات , الحكايه دي تحصل ازاي؟ تحصل مثلا لما تتوضى بالليل و
تدعى ان الطرق تتصلح و الكباري تتبني تصحى الصبح تلاقي دعوتك استجابت ؟ لا طبعا , طب
تزور الأوليا و تكنس السيده على ولاد الحرام اللي سابو الطرق بايظه السنين دي يقوم
ربنا يستجيب و ترجع تلاقي كل حاجه اتصلحت ؟ لا برضه , الحكايه دي يلزمها مجهود شاق
و مضني و مليارات متلتله , ده بس بند الطرق و الكباري للي بيسأل فلوس البلد بتروح فين
.
.........................................................................................................
ليست هناك تعليقات:
إرسال تعليق