Mohamed
Hussein
19 سبتمبر 2017
على سيرة الهري
بتاع الفيس بوك النهارده , موضوع حاتم الجمسي , الراجل المصري اللي بيعمل مداخلات مع
القنوات الفضائيه المصريه و يقدّموه على انه محلل سياسي مع انه في نفس الوقت عنده مطعم
صغير في أمريكا بيشتغل فيه !! , و هووب تقرير في نيويورك تايمز و هووب حملة تريأه من
الأشاوس المصريين , اللي منهم ناس وطنيين أخر حماده , و فين يا عم بقى التخصص و عايزين
تخصص .
.
طب صلو بينا عالنبي
, هحاول اكون هادي , و هفترض أصلا ان حاتم ده مش بيدرس علوم سياسيه ولا بيحضر ماجستير
في العلوم السياسيه .
.
- هذا العبد لله
الماثل أمامكم اللي هو انا , بقالي سبع سنين بكتب عالفيس , و كتاباتي في التحليل السياسي
, لو قناه فضائيه عملت مداخله معايا هتقول اني مين ؟ هتقول اني الكاتب و المحلل السياسي
فلان الفلاني , مظبوط ؟ طب ايه قولك بقى اني صيدلي و قاعد في صيدليتي الصغيره ( اللي
باكل منها عيش و اصرف على بيتي ) , هتعمل ايه وقتها حضرتك ؟ تصورني في الصيدليه و حملة
تريأه ؟ و ابقى اتمسكت متلبّس وانا ببيع الأدويه ؟! واقعد أقولك استر عليا الله يسترك
؟ انت اهبل يابني ؟ ولّا أي حد بيركبك و يسرح بيك ؟
.
- طب خلاص خلاص
, هستأذن دلوأتي , يادوب ألحق أقفل صيدليتي نهائيا , و أروح ألبس بدله و كرافته و أطبع
كروت أوزعها عالناس و الفضائيات بإسم الكاتب و المحلل السياسي و أروح السجل المدني
أعزم عالموظف بسيجاره كليوباترا و أغيّر المهنه في البطاقه , وأبقى صايع و عواطلي قد
الدنيا , و أخد لابتوبي و أقعد في كافيه فخم كل يوم أكتب نفس اللي بكتبه , على أمل
تجيلي مداخله مع أي برنامج توك شو و طبعا هيقولو في التعريف اني محلل سياسي ( مع اني
مش متخصص ولا حاجه ) , بس وقتها لو حد دور ورايا مش هيلاقيني متلبس بالعمل في مطعم
أو صيدليه , دانا في كافيه في وسط البلد يا عم و يشرب كابتشينو و يشعر بالروعه , يعني
هبقى متخصص و كاتب و محلل سياسي على كيف كيفك .
.
يا أمةً ضحكت من
جهلها الاممُ , و ضحكت على جهلها النيويورك تايمز .
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
Mohamed
Hussein
19 سبتمبر
2017
روحت أنا و البنات
معرض الأدوات المدرسية اللي معمول في قاعة المؤتمرات .
.
جبنا بقى كل حاجه
, كراريس و كشاكيل و برايات و أساتيك و أقلام رصاص و أقلام مش رصاص و ألوان رصاص و
ألوان مش رصاص , و جليتر و جلو و أقلام فيبركاسل و حاجات كتير كده مابفهمش فيها , و
سكيتشات صغيره و سكيتشات كبيره و الكشاكيل بالدسته و الكراريس بالدسته و ايشي ده دوبل
لاين و ده مش دوبل لاين و ده مربعات صغيره و ده مربعات كبيره , و عملنا شألباظات جوه
و طالع شايل 4 كياس قطمو وسطي .
.
المهم دفعت
450 جنيه , و كده جبت اللامؤاخذه السابلاي بتاع المدرسه للبنتين و معاه حاجات كتير
زياده في العدد , اللي عايز يروح من حضراتكو هتعجبه الأسعار , المهم انه يبعد عن سمير
و علي و كل الأسماء التخينه المجعلصه دي , خش على مكتبات الغلابه على طول و تأكد تماما
ان سعر البدله و الكرافته اللي بيلبسهم الموظف في مكتبة سمير و علي حضرتك اللي بتدفع
تمنهم .
ليست هناك تعليقات:
إرسال تعليق