Mohamed
Hussein
10
أغسطس 2017·
عالمستوى الشخصي
, بحب محمد صلاح و عمرو دياب , ماحبش رمضان صبحي و تامر حسني , و مع ذلك أفرح لل 4
أخبار دول , أفرح جدا و بنفس الدرجه
.
- محمد صلاح يتباع
ل نادي ليفربول في صفقه قيمتها تقريبا مليار جنيه !! ( يعني أغلى لاعب مصري و عربي
في التاريخ ) , و نجاح ساحق في ملاعب أوروبا .
.
- رمضان صبحي جدد
عقده مع ستوك سيتي في الدوري الإنجليزي , كويس اوي و الواد لسه صغير محتاج شوية خبره
و هيتألق .
.
- عمرو دياب بيحتل
المرتبه الأولى في قايمة فوربس لأهم و أشهر 100 شخصية عربيه .
.
- تامر حسني وصل
للعالميه و هوليود , و فيلمه الأخير حقق نجاح غير عادي و أرقام قياسيه في السينما المصريه
و العربيه .
.
هو البني أدم المصري
الطبيعي لازم يكون كده , تحب فلان و ترتاح لفلان ده شئ يخصك , لكن نجاح أي شخصيه مصريه
في محفل دولي ده شئ لازم يفرحك , لأنه بيمثل مصر , اللي هي بلدك , سواء كان الشخص ده
مطرب او ممثل او عالم أو أديب أو لاعب كوره .
.............................................................................................................
Mohamed
Hussein
10
أغسطس 2017·
-
في بورتريكو , الدويله الفقيره اللي عدد سكانها مايزيدش عن 3 مليون نسمه , شاب عمل
أغنيه اسمها ديسباسيتو , الأغنيه حققت نسبة مشاهدة خرافيه , تجاوزت 2 مليار مشاهد
, و كانت أحلى ترويج للسياحه و لإسم الدوله أو الدويله اللي هي محدش يسمع عنها أساسا
, الدويله اللي هي عباره عن مجموعه من الجزر و سكانها خليط من الأسبان و الافارقه و
الأمريكيين و العرب , يعني ماتعرفلهاش راس من ديل , الدويله اللي قصة حياتها ماتختلفش
كتير عن قصة حياة واحده ست غلبانه اتمرمطت في الدنيا و في بيوت الاغنيا , مابين احتلال
أسباني لتبعيه أمريكيه لإبادة سكان أصليين , يعني حاجه أخر وجع .
.
- و في مصر , الدوله
الأعظم و الأقدم في التاريخ , شاب مصري ( من طفح يناير ) حب إنه يقلد الأغنيه بتاعة
المطرب البورتريكي فكان لازم طبعا إنه يحط التاتش بتاع الصيع و شمامين الكوله , و بدل
مايروج للسياحه في بلده ( و يبقى تقليد بتقليد ) عمل العكس تماما , و صوّر المناظر
القذره , و سلوكياتنا السيئه في شواطئ اسكندريه مثلا , مع إن الأصل في الأشياء هو العيون
اللي بتشوف , مصر فيها شواطئ يا طولها يا عرضها , مناظر خلابه مش موجود زيها في العالم
, و فيها مصطافين أجانب و مصريين بيعرفو يحافظو عالمكان اللي هما فيه , المهم حضرتك
اختارت ايه ؟ و في نفس الوقت مين قالك ان بورتريكو مفهاش مناطق أنيل بستين نيله من
المناطق اللي مش عاجباك عندنا ؟!
.
حاجتين مهمين أوي
في الحدوته دي , الأولى إن ال ( بيبي ) ده ماظهرش إلا بعد 25 يناير , زي ماظهرت فرقة
أطفال الشوارع , و أي كام عيل معفنين مابيستحموش بقينا نعتبرهم فنانين و مبدعين , ال
( بيبي ) ذات نفسه بقينا نعتبره ابداع و نوع من التمرد و الواقعيه و العمق الثقافي
, القرف و الوساخه بقينا نعتبرهم منهج فكري و علم لازم يٌدرس في مدارسنا , ماده نسميها
( السواد و البيبي و الوساخه لبناء الشعوب ) , و الحقيقه واضح جدا الفرق إن بورتريكو
ماحصلشي فيها ربيع لامؤاخذه عربي ولا ظهر فيها نماذج زي يسري فوده و باسم يوسف , و
بالتالي الناس هناك مش عميقه ولا متقعره و لما بتعمل أغنيه بيصورو المشاهد الجميله
أوي و يروّجو لإسم بلدهم و العياذ بالله !! .
.
الحاجه التانيه
المهمه جدا هي القانون , يعمل ايه القانون في حالة زي دي ؟ للأسف معندناش ماده في القانون
اسمها محاكمة فلان الفلاني بتهمة إنه ابن وسخه قذر .
......................................................................................................
Mohamed
Hussein
9
أغسطس 2017·
الشرطه الفرنسيه
تداهم شقه في باريس على علاقه بحادث دهس الجنود
.
عزيزتي الشرطه
الفرنسيه , بعد البونسوار عليكو , محتاجين اجابات لو سمحتو , يعني سيل فو بلي
.
- معاكو إذن نيابه
بمداهمة الشقه ؟ يكون متوقع و مختوم من قاضي بندر باريس العمومي , و عملتو حوار مجتمعي
ولا لا ؟ .
.
- احترمتو حقوق
الإنسان و انتو بتداهمو الشقه و خدتو للناس اللي جواها بوكية ورد و
2 كيلو برتقان
ولّا دخلتو بإيديكو فاضيه ؟
.
- استخدمتو أقصى
درجات ضبط النفس مع المتهمين و لو لقيتو حد منهم شايل حتة كلاشينكوف بترشو كولونيا
في عينيه عشان عينيه تحرقه ؟ .
.
- رنّيتو الجرس
3 مرات لا يكون حد من الحريم قالع راسه ولّا كسرتو الباب فجأه ؟
.
- الكالون بتاع
الباب اللي اتكسر ده هتصلحوه على حسابكو ولا على حساب المواطن الفرنسي محدود الدخل
؟ .
.
- وانتو بتقتحمو
الشقه عملتو صوت ولا كنتو هاديين ؟ ماخدتوش بالكو ان في الشقه اللي قدامها ست عجوزه
ممكن تصحى من النوم أو عيل بيذاكر للثانويه العامه و محتاج تركيز لأنه علمي علوم والنص
درجة بتفرق ؟
.
- مش جايز انتو
اللي دهستو الجنود بتوعكو عشان تغطو على احتمالية رشوة الرئيس السابق في تنظيم قطر
بنت التيت لكاس العالم ؟ ماعندكوش ممثله إسمها غاده عبد الرازق كانت تنزّل فيديو على
انستجرام بدل المعجنه دي ؟ .
.
- مش جايز المتهم
بدهس الجنود مالقاش تعليم كويس ولا مستشفيات نضيفه و كان الأول على قريتهم في دبلوم
التطريز و حلم حياته يطلع قاضي بس الواسطه ضيّعت مستقبله ؟ و ان الحكايه دي تكون اتسببت
له في رواسب نفسيه و سيكولوجيه و حالة من الكره لفرنسا , لفااااااارنصا؟
.
- يعني ايه عربيه
تدوس 6 جنود في وقت واحد ؟ هما كانو واقفين في كمين ثابت ولّا ماشيين في طابور ورا
بعض ؟ و لما الجنود مش قادره تحمي نفسها من دهس العربيات أومال مين هيحمي الشعب الفرنسي
؟ مين هيحمي المدنيين ؟ هاهاهاها , بكره تشوفو فااااااارنصا.
.
- و أخيرا , لعلمكو
بقى , وش كده , أي حد هتقبضو عليه , من قبل مانعرف اسمه هنقول انه كان مختفي قسريا
و انكو خاطفينه من تسع ست سنين , و إن تهمته الأصليه هي الخلاف السياسي و المعارضه
لنظام الحكم الحالي لأنه من أنصار نابليون بونابرت والشرعيه , أو هنقول إنه أصلا مكانشي
عايش في فرنسا , ده شغال في الأردن و بيجري على عياله و يتيم معندوش غير أب واحد و
ام واحده , و عمته تخينه و عندها فلات فوت .
................................................................................................................
Mohamed
Hussein
9
أغسطس 2017·
ريجيني ولا تغديني
.
محلل إيطالي بيتهم
بريطانيا ( المخابرات البريطانيه ) بقتل الشاب ريجيني , و بيقول إن لندن رفضت التعاون
في التحقيق هي و جامعة كامبريدج , و بيقول برضه لو مصر قتلته مأخفتش جثته ليه ؟!!
.
.
ده بالظبط نفس
الكلام اللي قولته من أول ما ظهرت الحدوته و الإفتكاسه بتاعة ريجيني , الحكايه مش عايزه
حد يقرا الكف ولا يوشوش الدكر , الحكايه بالعقل و المنطق البسيط:
.
- مصر مابتقتلش
الشاب الأوروبي اللي جاي لها زياره , حتى لو كان الشاب ده جاسوس و ابن ستين كلب ( و
هو فعلا جاسوس و ابن ستين كلب ) .
.
- أومال الأجهزه
الامنيه بتعمل ايه لو مش هتقتله ؟ الأجهزه الأمنيه بتتعقبه و تراقب تحركاته و في لحظه
تقبض عليه و تحقق معاه , و لما توصل لحقايق مابتقتلش الجاسوس المتهم , بترميه في السجن
و بتخاطب دولته أو الدوله اللي هو شغال لحسابها , و في مرحلة معينه بيكون الشاب ده
جاهز لصفقة تبادل ( ثنائيه ) أو يدخل فيها دوله كمان و تبقى ثلاثيه .
.
- مصر لو قتلت
الشاب الأوروبي , و ده مابيحصلش ولا هيحصل , كان سهل عليها تتاويه في مترين رمل في
الصحرا , و نقول مختفي و مش لاقينه و دوّرو معانا و النبي يا أهل الاتحاد الأوروبي
, إيدكو معانا , ساعدونا إلهي ربنا يعمر بيتكو .
.
- طب مين اللي
قتل الشاب الجاسوس ؟ اللي قتله المخابرات البريطانيه , و هي اللي كانت مشغلاه , اه
في لحظه ممكن تحرق كارت من كروتك لو الفايده من حرقه أكبر من الفايده من وجوده ( يا
صديقي هذا العالم أوسخ بكثير مما تتخيل ) .
.
- طب ليا بريطانيا
تقتله ؟ عشان بالنسبالها ألف فايده و فايده , توتّر علاقاتك بايطاليا بعد ماكانت خدت
شكل كويس جدا ( نفس اللي حصل مع روسيا و مع فرنسا ) , تضرب لك شويه من السياحه , تشوه
سمعة بلدك , تبقى ورقة ضغط زيادة عليك .
.
- طب مصر و ايطاليا
عارفين ان المخابرات البريطانيه هي اللي قتلته ؟ أه عارفين و متأكدين بس مستحيل هيوصلو
لدليل ملموس و واضح , ليه مستحيل ؟ عشان شغل اجهزة المخابرات بيكون كده ( على ماية
بيضا ) , محدش بيشتغل بإيديه , بيبقى لهم عناصرهم التابعين لوسيط رقم 1 اللي هو تابع
لوسيط رقم 2 اللي تابع لجماعه رقم 3 , يعني هتلف السبع لفات عشان توصل لدليل يربط المخابرات
البريطانيه بالعمليه , أجهزة المخابرات في كل الدول الكبيره بتشتغل بالطريقه دي , حتى
مخابراتنا المصريه لو حبت تعمل عمليه مماثله في قلب أوروبا هتبقى برضه ( على ماية بيضا
) .
.
- طب لو حصل و
وصلت لدليل ملموس ( و ده صعب جدا يحصل ) ؟ برضه ماينفعش تعلن عنه , ولا حد هيعلن مثلا
عن نتيجة التحقيقات في الطياره الروسيه اللي انضربت في سينا , لا مصر ولا روسيا هيعلنو
, و غالبا العقل المدبر هو هو , لعبة القط و الفار مابتنتهيش , انما لما بتمسك دليل
بترميه للدوله اللي نفذت و تساوم بيه أو ترد برد مماثل من غير مالشعوب تحس .
.
- طب ليه ايطاليا
عاشت الدور أوي و سحبت السفير ؟ عشان برضه شغل الدول كده , الجريمه حصلت و اللي كان
كان , هسعى في تحقيقات لكن الأهم هدوّر إزاي استغل الحكايه و استفيد منها , و احاول
اهدّي الرأي العام عندي , و تحت الترابيزه لعب في ملف تاني خالص أو مساومه عليه , زي
ملف ليبيا .
.
- أومال مين بقى
العيال اللي بعتو للجرايد الإيطاليه بعد ساعتين من قتل ريجيني و قالو لهم احنا اللي
قتلناه ؟ لا دي عيال ولاد وسخه ملناش دعوه بيهم .
...............................................................................................................
Mohamed
Hussein
8
أغسطس 2017·
عملتو ايه في الدوري
يا محمد ؟
- تعيش إنت يا
حاج
.
طب في بطولة أفريقيا
؟
- يا حاج تعيش
إنت
.
طب البطوله العربيه
بقى ؟
- إنت تعيش يا
حاج
.
طب الكاس يا محمد
, ده الكاس ده بتاعكو
- مانا هقولك يا
حاج , عشان تعرف ان مرتضى منصور بيعمل فينا معروف قد ايه
.
قول يا محمد
- بقى احنا يا
حاج بني أدمين , و كل ابن أدم خطّاء , يعني ذنوب و نيله و محدش خالي , سيادة المستشار
بقى قرر إنه يخلي كل جماهير الزمالك تكفّر عن ذنوبها في الدنيا , فلما نقابل وجه كريم
نقابله خالصين مخلصين , ألف شكر سيادة المستشار , ربنا يعمر بيتك و يحرقك بجاز قادر
يا كريم .
........................................................................................................
Mohamed
Hussein
8
أغسطس 2017·
ايوه بنشتري غواصات
ليه بقى ؟
- و انت مال أهلك
.
لا مانا لازم أفهم
, أنا مواطن و من حقي أفهم , و أعرف جبنا الغواصات بكام و ميزانية الجيش قد ايه و بيخطط
لإيه , لازم الموضوع يتفتح في حوار مجتمعي و نجيب أبله جميله اسماعيل و الطفل المعجزه
الاستاذ عصام حجي , و بعدين مش كنا بفلوس الغواصات دي نشتري مارشميللو و كندرجوي و
نعالج بتوع الساحل الشمالي من قرصات الجيلي فيش و هجمات السلطعون المتكرره ؟
- طب خلاص خلاص
, هشرح لك كل حاجه و أفهّمك و أمري لله .
.
أيوه فهمني , قول
بسرعه
- بص يا سيدي
, عارف الفنكوش بتاع الغواصات الألمانيه ؟
.
أه عارفه , مانا
بسأل عليه
- و عارف فنكوش
الميسترال اللي بعناها لروسيا بدولار واحد ؟
.
أه عارفه برضه
- و عارف فنكوش
قناة السويس الجديده اللي الكراكات و هي بتحفرها غرقت في الوحل ؟
.
اه عارفه
- و عارف فنكوش
العاصمه الإداريه الجديده اللي الشركات هربت منها و مستحيل المشروع يتنفذ ؟
.
اه عارفه
- و عارف فنكوش
الرافال اللي الشكمان بتاعها مخروم و الفتيس بيقفش , و فنكوش محطات سيمنز بتاعة الكهربا
؟
.
أيوه عارف كل ده
, بس ايه علاقتهم ببعض ؟
- مانا هشرح لك
أهو , اصبر عليا
.
طب قول بقى
- بص يا سيدي
, احنا جبنا الغواصات عشان نطلّعها فوق الميسترال , و بعدين الميسترال تمشي في البحر
المتوسط ( و الغواصات فوق منها ) لحد ماتوصل لقناة السويس الجديده , و أول مالميسترال
تدخل قناة السويس الجديده هتقوم طبعا مطرطشه مايه كتير اوي , المايه اللي طرطشتها هتوصل
للعاصمه الإدارية الجديده اللي فيها محطة سيمنز العملاقه , يقومو الناس اللي شغالين
في العاصمه الجديده يغرقو مايه من الطرطشه , فيضحكو و يبصو للسما يلاقو طياره رافال
طايره فوقهم بالصدفه , الطيار اللي سايق الرافال أول مايشوف طرطشة المايه تحت هيقوم
لافف بالطياره بسرعه و عامل كداهو , زيوووو , زيووووووو , نقوم احنا كلنا طالعين في
البلكونات عشان نشوف الرافال و هي بتعمل ( زيووو ) و نفرح و نهلل , أهو احنا بقى عملنا
كل المشاريع و الفناكيش دي عشان نوصل للمرحلة دي , مرحلة ال ( زيووووو ) , فهمت ولا
لسه ؟ .
.................................................................................................................
Mohamed
Hussein
8
أغسطس 2017·
بالصدفه البحته
قعدت مع ست كبيره , ست بسيطه أوي من أهالينا الطيبين , و بالصدفه جت السيره و لقيت
الست الطيبه البسيطه بتحكي عن طفولتها , أيام ماكانت أمها بتروح تجمع قطن في الوسيه
بتاعة الباشا و هي عيلة صغيره , ماشيه حافيه , الأم بتروح الوسيه من الفجريه و ترجع
قربات المغرب , و أجرتها ماتكفيش حتى العيش الحاف , تقوم الأم بعد ماتخلص شغلها في
الوسيه تلاقي أي شوية حطب مرميين عالطريق و فيهم كام لوزه قطن مفتحين , تحاول تلم
( فتافيت القطن ) منهم و تجمعهم يمكن يعملو ربع كيلو و تبيعهم بقرشين ساغ , أهم يساعدو
برضه في مرحلة الوصول ( للعيش الحاف ) .
.
الموقف ده و البوست
ده مش دفاع عن عبد الناصر ولا عبد السميع , إسم جمال عبد الناصر اعظم من إنه يستنى
بني ادم بسيط زي حالاتي يدافع عنه .
.
قليلين أوي أوي
اللي بينتقدو عبد الناصر بعلم و فكر و منطق و موضوعيه , الأغلبيه العظمى هما عبارة
عن مجموعة من الحمقى و الزلنطحيه , اللي هتلاقيهم في نفس الوقت و نفس اللحظه بيتكلمو
عن الفساد و المسئول الفلاني الفاسد و يقولو إن الحل هو العداله الإجتماعيه !! مممممممممم
ههههههههههه والله هم يضحك و هم يبكي.
.
عزيزي المتحزلق
المتفزلك العبيط الجاهل الأحمق , لو فكرت في يوم تفهم أو تفكر هتلاقي الحل في كام سطر
قليلين
1- الملك عمل كويس
او عمل وحش إسمه محتل اجنبي مستعمر , مفيش حاجه اسمها الحكم الملكي جميل , قول الاحتلال
جميل و خليك صريح و واضح في ممارستك ل( الشذوذ ) العقلي , الملك مكانشي من مغاغة ولا
من السنبلاوين .
.
2- الإستعمار بصفه
عامه بيكون الغرض منه استغلال موارد الدوله ( المحتله ) و نهبها بأي شكل , مفيش مستعمر
بيروح يحتل دوله عشان يصرف فلوسه عليها و يجيب من بلده و يحط فيها و يساعدها و يهشتكها
و يغسل لها رجليها قبل ماتنام .
.
3- مصر أيام الإستعمار
بتاع الملك كانت دوله غنيه يعيش فيها شعب مايسمعشي عن خط الفقر , إقرا السطر ده عشر
مرات , دولة غنيه فيها شعب ( 95% منه ) مايسمعشي عن خط الفقر أساسا , كلهم من عينة
أم الست الطيبه اللي قعدت معاها النهارده .
.
4- لما جه عبد
الناصر و صادر الأراضي بتاعة البشوات بدأت الشريحه اللي ماتسمعشي عن خط الفقر يبقى
عندها أرض ملك ( مش مستنيه تلم فتافيت قطن من الطريق عشان تكمل حق رغيف العيش ) , و
بالتالي بدأت الأغلبيه اللي كانت مسحوقه من الشعب تعيش , يعني تلبس و تاكل و تتعلم
و تتنفس و تتعالج , بدأو يفتكرو انهم بني أدمين يا أخي !! .
.
5- النقطه اللي
فاتت دي هي المعنى الحرفي للعدالة الإجتماعيه أيها الأحمق اللي مش عارف هو بيردد شعاراته
ليه و ازاي ؟ .
.
6- الحدوته شرحتها
مره باختصار , راجل مخلف 50 عيل , مسرّح 48 منهم يشتغلو و يتفحتو و مش بيصرف عليهم
و سايبهم جعانين حافيين , و بيلم مجهودهم و يبيعه و يصدره و يبقى راجل غني , قدام الناس
غني بس الغالبيه العظمى من عياله ميتين بالمعنى الحرفي , و راجل تاني قال لا ال 50
عيل لهم حق في التعليم و العلاج و الحياه و امتلاك أرض بلدهم , طبيعي ان الراجل ده
يكون أقل غنى , راجل أقل غنى بس ولاده عايشين عالأقل زي البني أدمين .
.
7- مش عارف أقولهالك
ازاي , بس هقولهالك بطريقة تانيه , لولا جمال عبد الناصر كان زمانا دولة غنيه أوي حاليا
( و مسلفين بريطانيا و فرنسا و كوم الشؤاف ) , بس برضه كان زمانا حاليا أنا و معاليك
لابسين هدوم مقطعه و بنلم فتافيت القطن من عالطريق , و كل شق في رجلينا بيدخّل قردة
و عيالها !! .
..............................................................................................................
Mohamed
Hussein
6
أغسطس 2017·
لما بكون مسافر
البلد زي النهارده كده , بيبقى فيه عندي 3 قواعد ثابته مابتتغيرش
.
1- بعتمد في سواقتي
على إن بقية الناس بيسوقو كويس و مركزين و مصحصحين و عينيهم وسط راسهم , هركز أنا ليه
بقى ؟ .
.
2- رخصة السواقه
منتهيه من شهور , و كل مابلاقي نفسي داخل على كمين بفضل أقول الدعاء بتاع ( و جعلنا
من بين أيديهم سداً ) و أربط الحزام طبعا , و لما أبقى قدام الكمين بالظبط ببتسم و
أحاول أبقى كيوت اوي فشر يونس شلبي في مسرحية العيال كبرت لحد مالظابط ولا أمين الشرطه
يقولي اتفضل حضرتك , بعدها بثواني بفك الحزام و برجع شرير تاني فشر الأستاذ زكي رستم
في فيلم نهر الحب .
.
3- قبل ماطلع من
هنا بدعي ربنا إن مفيش مزه تكون سايقه عالدايري و فردة الكاوتش بتاعة عربيتها تنام
, عشان ده معناه ان الدايري هيتقفل من أول مدينة نصر لحد اسكندريه الزراعي , لأن رجالة
مصر و شبابها كلهم هيركنو على جنب و ينزلو يساعدو المزه في تغيير فردة الكاوتش , الحكايه
دي فيها عطله ساعتين , و زود عليهم ساعه كمان يبقو تلاته , مانا كمان هنزل طبعا أساعد
في تغيير فردة الكاوتش , اومال يعني نسيب البونيه لوحدها عالدايري و تبقى فريسه للديابه
و الأسود و الديناصورات و الأناكوندا ؟
..................................................................................................................
Mohamed
Hussein
6
أغسطس 2017·
في عيد العلم
.
عبد الفتاح السيسي
: زيادة حجم الإنفاق على البحث و التطوير من 11.8 مليار جنيه ل 17.5 مليار جنيه .
.
مممممممم الرقم
ده قليل أوي ياريس , لا يليق بمصر , المفترض إن الرقم يوصل ل 100 مليار جنيه , و ياريت
يوصل ل 10 % من الموازنه العامه , صح إن الإيد قصيره بس فيه حلول , و الجميل في الحلول
انها تابعه لنفس الملف , يعني فايدة مزدوجه أو هنبقى ضربنا عصفورين بحجر واحد , انما
المشكله في الحلول انها ( حقول ألغام ) , محتاجه حد جرئ ماعندوش مانع يجازف بشعبيته
في مقابل مستقبل أفضل لمصر , يعني باختصار محتاجه رئيس إسمه عبد الفتاح السيسي
.
عندي حلين نزوّد
بيهم ميزانية البحث العلمي لأكتر من 100 مليار من غير ما نكلف ميزانية الدوله حاجه
.
.
1- عدد الموظفين
في الجهاز الإداري و الحكومي وصل ل تقريبا 7 مليون موظف , العدد ده يكفي قاره مش دوله
, و سيادتك قلت محتاجين منهم مليون ولا اتنين , و أصلا أصلا وجود العدد ده هو في حد
ذاته عائق كبير في طريق البحث العلمي , ماهو يانشتغل بحث علمي و تكنولوجيا و تقدم يانشتغل
فرخ كربون و طابع دمغه و امضي من الأبله انشراح في اخر الطرقه .
- الحل ياريس هو
تسريح 2 مليون على الأقل من الموظفين , معاشات مبكره , ياخدو أصل المرتب بتاعهم , و
يقعدو في البيت ( يقدرو يشتغلو في القطاع الخاص لتحسين دخلهم و هيبقى عندهم معاش اللي
هو أصل المرتب ) , هنستفيد احنا من البدلات و الحوافز و الأوفرتايم اللي كانو بياخدوها
, اللي هي بتعمل مليارات في السنه , نضيفهم لميزانية البحث العلمي , و في نفس الوقت
, نحتاج 100 ألف شاب من خريجي الهندسه و معاهد التكنولوجيا و التجاره و ادارة الاعمال
, يغطو المصالح الحكوميه في مصر كلها بنظام كمبيوتر متكامل , و يحولو ملفاتنا الورقيه
لملفات كمبيوتر , طاقه الشباب دي هايله ياريس , و امانه عليك أول واحد يتم تسريحه في
كل مصلحه حكوميه هي أبله انشراح .
.
2- عدد الطلبه
المقبولين و الخريجين من الجامعات عدد كبير جدا , برضه يكفي قاره , و قصة دكتور و مهندس
و محامي موضه بطلت , احنا قرّبنا كلنا كده برابطة المعلم نسرح بعربيات بطاطا , السوق
مش محتاج كده خالص , السوق مشبع ل 50 سنه جايين , لا ده فوق المشبع يعني supersaturated , و الخريج اللي هو ( المنتج النهائي ) مبقاش
قادر على المنافسه في الأسواق العالميه , لأن الحكايه عدد في الليمون , يبقى نعمل ايه
بقى ؟ نقلل عدد المقبولين في الجامعه بنسبة 30 % , شوف كام مليون طالب الدوله بتصرف
عليهم كام مليار جنيه عشان في الاخر ياخدو شهادات و مايلاقوش شغل , قصه خيبانه من أولها
لاخرها , نقلل العدد ياريس و نوفر عشرات المليارات نضمها لميزانية البحث العلمي , برضه
ماينفعشي يكون عندنا نص مليون خريج في السنه و نتكلم على بحث علمي , الموضوع ده هيتطلب
حمله اعلاميه توعويه ضخمه جدا , و الاهتمام يتحول للتعليم الفني المنتج , يعني الطالب
يدرس و يشتغل في مجال دراسته الفنيه , السوق محتاج كده أوي .
.
الحلين ياريس هما
حقول ألغام لانها ملفات متراكمه ( من أيام التركه الجميله ) انما البحث العلمي مش هيمشي
غير بالشكل ده , يعني لازم في نفس الوقت نعمل نفس الحاجات لأنها مرتبطه ببعض تماما
, بس خلي بالك , في الحلين هتصطدم بملايين الأسر المصريه و بالتالي هتيجي على حساب
شعبيتك رغم انك بتبني مستقبل صح لمصر , مش قلت لك تركة جميله أوي .
..............................................................................................................
Mohamed
Hussein
5
أغسطس 2017·
شوفتو يا جدعان
اللي حصل ؟ كارثه بكل المقاييس , واحد اسمه هشام كامل عرض عربيته للبيع عالنت , و لقالها
مشتري , نزل يقابل المشتري لقاهم 4 و معاهم سلاح , ضربوه بالنار في قلب الشارع و سرقو
محفظته و عربيته و سابوه مرمي قتيل
.
كولجي 1 : هو ابو
50 % هيفلح في حاجه ابدا .
كولجي 2 : كده
لا فيه سياحه ولا استثمار , مين هييجي عندنا و احنا حالنا كده ؟
كولجي 3 : هي وصلت
ان الناس تشيل سلاح في الشارع , يا فضيحتنا قدام العالم , يا فضيحتك يا مااااسر .
كولجي 4 : انا
قلت البلد دي مش نافعه تحت حكم العسكر , و مش بعيد الشرطه تكون هي اللي قتلته .
كولجي 5 : لا كده
كتير اوي , انا مش هأمن على مستقبل ولادي هنا , لازم اخدهم و اهاجر , هروح أمريكا بعيد
عن القرف ده
.
ممممممممممم استنو
يا جدعان , نسيت اقولكو ان المصري ده فعلا اتقتل في الشارع من ناس معاها سلاح و هو
بيبيع عربيته و سرقو عربيته و محفظته , بس الكلام ده في أمريكا مش في مصر
.
كولجي 1 : يا عم
حادث عابر , ايه المشكله ؟
كولجي 2 : و ايه
علاقه ان واحد يتقتل في الشارع من ناس معاها سلاح بالسياحه و الاستثمار؟! ايه العلاقه
مش فاهم أنا ؟
كولجي 3 : هي يعني
الشرطه الأمريكيه هتوقّف كمين في كل شارع ؟
كولجي 4 : مش جايز
ان المصري ده غلطان و هو اللي شتم الناس المسلحين الكيوت ؟
كولجي 5 : انتو
أصلا معر*ين و عبيد بياده
......................................................................................................
Mohamed
Hussein
5
أغسطس 2017·
السعوديه عملت
مخيم لاستقبال الحجاج القطريين , بس قطر بنت التيت رافضه ان حجاجها يسافرو .
.
المهم ان المخيم
اللي عملته السعوديه لحجاج قطر معمول على مساحة 4000 متر مربع , يعني أقل من مساحة
فدان , و دي بالظبط نفس المساحه اللي ممكن تتعمل كمخيم لحجاج كفر غنام اللي عندنا في
السنبلاوين , تخيل يا مؤمن ان بتاعة كده محسوبة علينا دوله يكون عندها حجاج بيقعدو
في مساحة اقل من فدان ؟! , طب ما كانو خدولهم شقتين دوبلكس فوق بعض بدل المخيم و نسميّها
( دوبلكس الحجاج القطريين ) ؟! حجاج مصر لو كل واحد منهم فرش سجاده صلاه بس عشان يقعد
و ينام عليها , و فرشو السجاجيد دي جنب بعض , هتبقى أول سجاده في منى و أخر سجاده في
مطار القاهره .
.
عموما السعوديه
كده عملت اللي عليها لأشقائنا من الحجاج القطريين , مش باقي بس غير انها تجيب في المخيم
ده كرتونة ماية معدنيه و دجاجتين عالفحم .
إنما لو قطر رفضت
سفر حجاجها و أصرت على كده , تبقى السعوديه وقعت في مشكله كبيره وحيص بيص و موسم الحج
عندها هينضرب , لأن عدد الحجاج السنادي هيكون 7 مليون ناقص سبعتاشر نفر .
...............................................................................................................
Mohamed
Hussein
4
أغسطس 2017·
بيقولك 4 بنات
من قطر راحو كافتيريا في الدوحه , قالو يتسولفو يعني و يشربو شوية لبن حمير تركي شهي
( أأأه شو طيب على رأي فيصل اللامؤاخذه القاسم ) , و هما قاعدين الكلام جاب كلام :
.
البنت القطريه
رقم 1 : يا بنات , تدرون , مافي أحلى ولا أجمل من الجندي الامريكي جاك اللي عندنا
, يحمي بلدنا و أرضنا و يقف ورانا.
البنت القطريه
2 : لا ماهو الجندي الأمريكي جاك , مافي أحلى ولا أجمل من الجندي الإيراني هاشمي ,
يحمي بلدنا و أرضنا و يقف ورانا .
البنت القطريه
3 : لا لا , مافي أحلى ولا أجمل من الجندي التركي رجب , يحمي بلدنا و أرضنا و يقف ورانا
.
البنت القطريه
4 : و يش تقولون يا بنات , ماعندكم نخوه ولا وطنيه , ايش الجندي الامريكي و الجندي
الايراني و الجندي التركي , مافي احلى ولا أجمل من جنود الجيش القطري , جنود جيش بلدي
, خصوصا الجندي السوداني و الجندي الكازاخستاني و الجندي النيجيري و الجندي الموزمبيقي
شو ماحلاه .
.
في الوقت ده بقى
كان فيه سرب طيور كبير مهاجر طاير في السما , السرب غير اتجاهه و وقف بالظبط فوق الكافتيريا
اللي فيها البنات الأربعه , و قررت الطيور مع بعض انها تعمل ( بيبي جماعي ) , و عملو
بيبي جماعي فعلا على البنات الأربعه , تلاته منهم غرقو في البيبي و ماتو فطسانين ,
و الرابعه طلعت تجري في الشارع , و تسأل الجندي التركي و الجندي الأمريكي و الجندي
الإيراني و الجندي الموزمبيقي , و كل ما تقابل جندي تسأله نفس السؤال , مين راح يحمينا
من بيبي العصافير ؟!! .
.........................................................................................................
Mohamed
Hussein
4
أغسطس 2017·
مساء الخير يافندم
- مساء النور
, مين حضرتك ؟
.
انا محمد حسين
, صديقك على الفيس بوك , أسف و الله لو كنت جيت لك في وقت مش مناسب .
- لا أبدا أبدا
, البيت بيتك , اتفضل
.
معلش فرصه تانيه
, انا أصلي مستعجل , بس كنت محتاج من حضرتك خدمه
- طبعا طبعا ,
اؤمرني
.
ممكن حضرتك تاخد
صورتي دي تعلقها عندك في الصالون هي و صورة جدي حسين الله يرحمه , و تاخد شوية الغسيل
دول تنشرهم عندك عالحبل لان المنشر بتاعنا مقطوع , و السكريه دي بقى حطها عندكو في
المطبخ هي و طقم الفناجين , بس حافظ عالسكريه لانها مكتوبه في القايمه .
- يا أستاذ محمد
مايصحش كده , دي شقتي و لها خصوصيه , مش معنى اننا أصدقاء تقوم تقتحم شقتي و خصوصيتي
بالشكل ده .
.
طب كويس اوي إنك
انت اللي قولتها , لما الحكايه فيها خصوصيه و احترام لخصوصيات الناس , ليه بقى حضرتك
كل ماتكتب بوست أو تعطس عطسه عالفيس أو خالتك حمؤه تتعب و يجيلها دور اسهال و تبقى
بتدور على شريط انتوسيد , ليه في كل مره بتعملي تاج و مينشن في البوست بتاعك , و يبقى
كأنك كاتبه على صفحتي ؟!! و من غير استئذان كمان يعني من غير ما ترن الجرس ؟!
- ماهو حضرتك ممكن
ببساطه شديده تشيل التاج بتاعي و تحذف البوست من عندك لو مش عاجبك
.
نعم ؟؟؟؟ حضرتك
بتعملي مينشن و تاج كل ساعتين , مطلوب مني انا اشتغل فلّايه و اقعد بقى أشيل في مينشنات
و تاجات و أحذف في بوستات ؟ هو ده الأصل في الأشياء ؟
- يعني ايه مش
فاهم ؟
.
هبسطهالك , يعني
تخيل انك كل يوم تطلع من أوضتك تلاقيني فجأه كده قاعد في الصالون بتاع شقتك بعلّق صوري
و بوستاتي و أفكاري و افتكاساتي ( من غير إحم ولا دستور ) , تقوم انت بكل ادب تقولي
اتفضل بره و احترم خصوصية الشقه , اقوم انا خارج و انت تدخل اوضتك تاني , و تطلع بعد
ساعتين تلاقيني برضه في الصالون بعمل نفس الشئ , وقتها هيكون شعورك ايه ؟ و هتقول عليه
ايه ؟
- ممممممممم هكون
قرفان منك طبعا و هقول عليك غتيت
.
طب تمام أوي كده
, سلامو عليكو بقى يا أستاذ غتيت .
.
...................................................................................................................
ليست هناك تعليقات:
إرسال تعليق