Mohamed
Hussein
6
أبريل 2017·
حصوه في عين اللي
مايصلي عالنبي , بقينا 100 مليون نسمه و قلبنا العدّاد .
معدل المواليد
زاد جدا أخر 6 سنين , تقريبا عشان الناس كانت متضايقه و قلقانه و خايفه و مرتبكه من
الاحداث المتلاحقه , اه احنا كده , دماغنا كده , عكس كل مخاليق ربنا , لما بنتضايق
و نخاف و نقلق شويه بننسى ناخد الحبّايه .
أو جايز الموضوع
ده بالنسبالنا بيكون رد فعل للتعبير عن حالة الغضب و الإحتقان اللي جوانا , الله يخرب
بيت اللي يزعّلنا يا شيخ .
.......................................................................................................
Mohamed
Hussein
6
أبريل 2017·
أصحاب العقول في
الجنه و نعيمها
.
كان فيه راجل عنده
بيت كبير مليان عيال , و في يوم من الأيام عيلين تلاته أربعه من ولاد الراجل قامو و
هاجو ضده , قالو له مش عايزينك , عايزين حد تاني , و هوب مفيش كام يوم و بقى بيت الراجل
ده مليان ناس أشكال و ألوان , جايين من أخر الدنيا , اللي بيرطن تركي ( غنّي تركي يا
لوسي ) و اللي بيرطن انجليزي و اللي من كازاخستان و اللي أسمراني أوي و اسمه عثمان
, لحد ما البيت بقى عامل زي الأمم المتحده على صغير , بس أمم متحده في الشر , أمم متحده
في الخراب .
.
و كل واحد جاي
من بلدهم و معاه السلاح أو هيلاقي السلاح مستنيه , أصلهم يا ولداه صعب عليهم حال العيلين
تلاته اللي كانو عايزين الراجل يمشي , فقالو ييجو يساعدو و كده .
.
اللي مش معاه سلاح
من الناس اللي جت هتلاقيه لابس برنيطه و بيفكر و يخطط و يوجّه اللي معاهم السلاح ,
و بيتحكم في قنوات و مواقع اخباريه عالميه , و معاه موبايل , و يتصل بيهم , نزّلو خبر
كذا , قولو كذا , ركزو على كذا , كبّرو كذا , صغّرو كذا , شوّهو كذا , و هما يقولو
و يركزو و يكبرو و يصغرو و يشوهو و قدامهم شوية حمير فاتحين بؤهم و بيقولو أمين .
.
و عليها يا مولانا
, بقى الجيش السوري اسمه ميليشيات بشار و المرتزقه اللي جايين من سبعين دوله اسمهم
المعارضه السوريه الكيوت أو المعارضه السوريه المسلحه , و حلب لما تتحرر من ايد الإرهابيين
المرتزقه يبقى اسمها حلب تحترق .
.
فكان طبيعي و منطقي
جدا انك فجأه تلاقي خبر بيقول ان بشار ضرب مدينة سوريه بالكيماوي , و نفس الحمير تفتح
بؤها و تقول أمين , يعني انضربت فعلا ؟ و بشار اللي ضربها أكيد ؟ مش الإرهابيين المرتزقه
و لا الجيوش الإرهابيه اللي في سوريا ولا أجهزة المخابرات الأجنبيه الإرهابيه ولا لصوص
البترول و الثروات هما اللي ممكن يعملو كده ؟ , لا هو بشار , و عماد صاحبي مأكّد لي
, هو و الخواجه أبو برنيطه .
..............................................................................................................
Mohamed
Hussein
5
أبريل 2017·
عنبر المجانين
.
أضحكو على نفسي
بقى , صديق عزيز لفت انتباهي ان صديقه ( عزيزه برضه ) بتسرق بوستاتي , قلت له يا سيدي
عادي , اتعودت و مابقيتش ازعل من زمان , قالي بس دي بتسرق بوستات كتير من عندك و التفاعل
عندها حلو و قاعدين يشكرو و يمدحو فيها , بصراحه قلت أدخل و اشوف , لقيت فعلا كده
, قعدت أفكر و أفكر , أعمل ايه ؟ و حيث اني فلاح قراري قلت أحرجها بقى من غير ما حد
ياخد باله , كتبت تعليق عالبوست بتاعها اللي هو البوست بتاعي و قلت لها تحليل حضرتك
رائع و اسلوبك ممتاز ( مدح يعني زي باقي التعليقات عندها ) , مانا ذكي و اعجبكو أوي
, بس المفاجأه انها عملت لايك على تعليقي و ريبلاي كمان , قالت ميرسي خالص ده من ذوقك
.
ههههههههههههههه
والنبي الفيس بوك ده عباره عن عنبر مجانين كبير .
.............................................................................................................
Mohamed
Hussein
5
أبريل 2017·
خبر : القبض على
حرامي بيسرق 4 علب تونه من أحد المجمعات الإستهلاكيه .
.
أكيد الحرامي الطيب
ده هيقول بنتي كان نفسها في 4 علب تونه و كرتونة بيض و نص بسطرمه و قاروصة سجاير و
باكوين معسل بس انا مش معايا فلوس , و بعدين الإعلام بتاعنا يطلّعه عالهوا ( أه و الله
يطلعه عالهوا ) و يديله فلوس كمان و الحرامي الطيب يقول : لا انا كان معايا فلوس بس
مالحقتش أدفع , و بعدين الكولجيه يعملو منه بطل قومي و أيقونه , و يقولو ضحية الظروف
الاجتماعيه و الوضع الاقتصادي و انهيار الاتحاد السوفيتي و تأكل الطبقه المتوسطه و
اتساع ثقب الأوزون و بعدين يحتارو بقى في السؤال , مين أعظم من التاني و يستحق الزعامه
؟ حرامي التونه ولا حرامي الشوكلاته ولا سواق التوكتوك ولا صباع الأستاذ خالد علي
.
.........................................................................................................
Mohamed
Hussein
4
أبريل 2017·
هههههههههههههههه
اكتر ناس بقو بائسين في الدنيا دي هما الأعضاء الفعليين للجماعه الإرهابيه , كل شهرين
تلاته يسرسبو أخبار عن وثيقة مصالحة مع الدوله المصريه و بعدين يطلعو ينفو و يقولو
لا تصالح في الدم , ده لا يمكن أبدا .
, والنبي الفراغ
وحش , الفراغ قاتل , و بكره يروحو المدرسه و يرنو الجرس لنفسهم و يمتحنو و يطلعو الأول
عالامتحان اللي مفهوش غيرهم و يدّو لنفسهم ممتاز و نجمه و بعد شويه يزهقو من المدرسه
بقى و يقطّعو الكراريس و ينطو من عالسور و يجيبو ولي امرهم و يقولو له ابنك فاشل و
مش ملتزم يا حاج محمد , و يرد عليهم و يقول لهم : فشر دانا أبني اشطر واحد في المدرسه
و واخد ممتاز و نجمه , يقولو له طب خلاص المسامح كريم , بس نبّه عليه مايعملش كده تاني
, و يقولهم حاضر .
....................................................................................................................
Mohamed
Hussein
4
أبريل 2017·
مابحبش شخصنة الأمور
, انما هتكلم عنها كحاله زي ألاف الحالات المشابهه , صديقه من الفولور بعتت رساله تشتم
السيسي و تشتمني طبعا ( ده شئ أساسي اتعودت عليه ) , دخلت صفحتها و أول حاجه اتكعبلت
فيها هي بوست بتقول فيه : السيسي كل مايروح في حته يتكلم عن الإرهاب و الحرب عالارهاب
, ماهو أكيد بيعمل كده عشان هو اللي صنع الارهاب بتاع الشرق الأوسط و خرب الدول العربيه
!! .
.
الحقيقه صديقتنا
دي ممكن يكون فيه زيها , و المشهد اللي اتخيلته انها ممكن تكون متخرجه من الجامعه
( اكيد جامعيه ) و ممكن تكون متجوزه , و طبعا و من المؤكد انها بتحط روج و تقف قدام
المرايه و تبص لنفسها كده و تقول ( يا سلام على عقلك و جمالك و جمال امك يا بت يا لوزه
) .
.
يمكن يكون عزائي
الوحيد و الحاجه اللي بتمناها بجد والله انه يكون الحساب مضروب ( زي كتير من أكاونتات
الفيس ) و صاحبه راجل مثلا و عارف انه بيكدب و يهجص و يهبل لمجرد تشويه السيسي , يعني
مايكونشي فيه عقول في الواقع بالشكل ده , اتمنى ولو اني غالبا بضحك على نفسي , طب ليه
بضحك على نفسي ؟ عشان بصراحه شكل لوزه قدام المرايه و عيالها حواليها و جمالها و جمال
عقلها و جمال امها هو مشهد يصعب جدا وصفه , مشهد كوميدي تراجيدي مأسوي أو ممكن نقول
, مشهد ابن ستين كلب لذيذ .
.
عزيزتي مدام (
لوزه ) لو كنتي حقيقيه ( يارب ما تكوني ) , ممكن اقبل عقلك ولو بمعدل ذكاء واحد في
المليون , يعني مثلا تقولي السيسي مش عارف يحارب الإرهاب في سينا و فاشل , هقول معذوره
ماهي ماتعرفش يعني ايه ارهاب مدعوم من دول و يعني ايه حرب عصابات ؟ و الارهاب ده عمل
ايه في دول تانيه ؟ و حرب العصابات عملت ايه حتى في الجيش الأمريكي نفسه , لكن ماشي
مقبول .
.
و كان ممكن أقبل
عقلك بنسبة ذكاء واحد في المليار لو قولتي مفيش ارهاب في سينا و الدول العربيه و كل
الصور و ملايين القتلى و الجرحى و المشردين ده فوتو شوب و فزاعه من أنظمة الحكم الفاشيه
اللي بتاكل دراع العيال الصغيره , برضه ماشي هقول بهلوله على باب الله و تعبانه في
عقلها و الصدقه علينا واجبه , و الحمد لله الذي عافانا مما ابتلى به كثيرا من خلقه
, انما اللي بتقوليه يا لوزه يا اختى ده يتهز له سبع سماوات و سبع أراضين و سبع بحور
و بعدين نلاقي سبع كواكب بيخبّطو في بعض و يطلّعو شرار .
.
عزيزتي مدام لوزه
, نصيحه لوجه الله تعالى , العقل البشري و كوكب الأرض ممكن يستحملو وقفتك قدام المرايه
و انك تمدحي عقلك و جمالك و جمال اللي خلفوكي , و لو تحبي ممكن تشتميني 17 مره في اليوم
و تشتمي السيسي , عادي انا موافق , انما أبوس ايديكي , خصيمك النبي يا شيخه ما تخلّفي
عيال , عشان خاطر ربنا ماتخلفيش , انتي كده حلوه اوي و متسنجفه و زي الفل , بس الأجيال
اللي جايه ملهاش ذنب .
........................................................................................................
Mohamed
Hussein
4
أبريل 2017·
انت مين بالظبط
؟ صاحب قضيه ولا تاجر شعارات و فلايات ؟
.
- الثورات مش فعل
مضارع مستمر , و الثوره اجمالا مفهاش تخريب لممتلكات الدوله اللي هي ممتلكاتك و ممتلكات
اللي جنبك و ممتلكات اللي قاعد في بيتهم , و مفهاش أجانب ينزلو معاك الميدان ولا أجانب
يزقوك , لو لقيت حد بيزقك اعرف انها مش ثوره , و لو لقيت ان ثورتك ضد مصالح البلد تبقى
مش ثوره , الثورات بتبقى لمصلحة البلد و مستقبلها و مستقبل الأجيال اللي جايه فيها
, مفيش حاجه اسمها تعمل ثوره في بلد فتقوم تخربها لصالح بلد تانيه ( أو مجموعة بلاد
تانيه ) , انت كده تبقى أخر حماده , انت خاين و تاجر ثورات مش ثورجي ولا حاجه .
.
- الدين يعني المعامله
, يعني بتعاملني ازاي و بتعامل الناس ازاي , يعني ماتكدبش و تحرق و تقتل و تزيّف و
تلوي حقايق و تشوه تاريخ و تقول عالإرهاب ده حد جميل و تفضل تكدب صبح و ليل و تبقى
منقوع لشوشتك في الدم و الخيانه و النطاعه و في الأخر تقوم منزل أذكار قبل النوم ,
و عايز لايكات عليها بقى , انت تاجر دين مش متدين .
.
- القضيه الفلسطينيه
مش كيميا ولا لوغاريتمات , كيان مغتصب اسمه اسرائيل و دولة محتله اسمها فلسطين , الكيان
المغتصب قام و نشأ بفضل بريطانيا و بعد كده برعاية أمريكيه , ماينفعش تروح تعيش على
حجر الحكومه البريطانيه و الأمريكيه و تشتم مصر ( اللي هي أكتر دوله حاربت و ضحت عشان
خاطر أم القضيه دي ) و في الأخر تلبس كوفيه فلسطيني و تشغّل أغاني تحرير القدس و تتخيل
نفسك مناضل , مناضل من منازلهم ( أو من على حجرهم ) , و القدس القدس , قدس امك يا مولانا
, انت تاجر قضيه مش اكتر.
.
- الوطنيه مش معناها
انك تقول ماسر و عسكر و جنرالات البيزنس و يارب هجره و بلد زباله و تشوه تاريخها و
جيشها و تسخر منها قدام الأجنبي و الغريب و تتحالف مع كلاب السكك ضدها و تدعم الإرهاب
ضد جنودها اللي بيحمو أرضك و ترابك و عرضك و في الأخر تطلّع طقم الوطنيه من النيش لما
تيجي سيرة الجزيرتين , وطنيه بلاستيك من نوع ردئ , حاجه كده تايواني مضروب , زي ثورجية
صاحبك الأولاني و دقن صاحبك التاني و شعارات القدس بتاعة صاحبك التالت , تُجّار قضايا
و دم و أوطان و دين , بياعين شعارات و فلايات .
....................................................................................................................
Mohamed
Hussein
3
أبريل 2017·
على هامش زيارة
الرئيس لأمريكا
.
الأمريكان مش بيبيعو
سبح , و السياسه مفهاش حب و كره , كل الحكايه إننا أجبرنا الرئيس الحالي لأمريكا على
احترامنا و عالحفاوه دي , ثبات في الموقف , كلمتنا واحده من 3 سنين , مهما كانت الضغوط
و مهما كانت المحاولات و الإغراءات , و الأمريكان فهمو خلاص إن السيسي مابيجيش بلوي
الدراع .
.
مصر هتحتفظ بعلاقات
متوازنه مع أمريكا و روسيا , و بالمناسبه علاقتنا القويه بروسيا بعد 30 يونيو احنا
كسبنا فيها اكتر , يعني خدنا اللي احنا عايزينه منها , مش بس مشاريع و صفقات سلاح إنما
في التوقيت ده تحديدا كنا محتاجين دعم سياسي من دوله كبيره زي روسيا في مواجهة تكتل
دولي كبير كان ضدنا .
.
عبد الفتاح السيسي
هيكون حريص جدا في الفتره الجايه على ايجاد حل نهائي للقضيه الفلسطينيه , و لو تفتكرو
من سنه تقريبا طلع فجأه و اتكلم عن حل نهائي و محادثات سلام شامله , والنهارده هيفتح
الموضوع مع ترامب , الموضوع بالنسبالنا بقى شديد الأهميه , أمن قومي رقم 1 , مش من
باب حب الفلسطينيين و كره للصهاينه , الموضوع بقى يخصنا احنا ك مصر , و الحدوته باختصار
و بمنتهى الوضوح و من وجهة نظري لها علاقه بالإرهاب اللي في سينا .
.
حل القضيه الفلسطينيه
بالنسبالنا بيعني ( قفل الحنفيه من المنبع ) , الحدوته بدأت في 2006 تقريبا لما الصهاينه
ساعدو في تقسيم فلسطين لضفه و قطاع غزه و جابو حماس تحكم القطاع , الغرض هنا كان غرض
صهيوني مركب , رصاصه تضربها تصيب شخصين , الأول تقسيم دوله فلسطين والتقسيم في حد ذاته
هو ضرب للدوله و للقضيه الفلسطينيه في مقتل , و التاني زرع بؤرة توتر على حدود مصر
, اللي هي اسمها لامؤاخذه حركة حماس .
.
حل القضيه الفلسطينيه
بيعني ان قطاع غزه هتسيطر عليه دوله اسمها دولة فلسطين اللي لها جيش و شرطه ولها التزامات
و معاهدات دوليه مع دول الجوار خصوصا مصر , مش عصابه بتحفر أنفاق و تهرّب ارهابيين
و سلاح و مخدرات و بتتاجر في الدم و الموت و الخراب .
.
بالتوفيق يا ريس
بإذن الله .
..........................................................................................................
Mohamed
Hussein
3
أبريل 2017·
طب حاول تتخيل
.
مشهد غريب نط في
دماغي فجأه , تخيل بس , في مدينة نيويورك مثلا و على هامش زيارة السيسي لأمريكا , اتنين
مغتربين واقفين وسط مجموعه بيتكلمو , الأولاني صهيوني بيتكلم عن اسرائيل بمنتهى الفخر
, اسرائيل اللي هي الكيان المغتصب اللي مش دوله ولا حاجه , اللي عمرها جيل واحد , اللي
لمّو لها شوية يهود من كل مكان في العالم عشان ماتبقاش مجرد عشّه فاضيه مفهاش فراخ
, اسرائيل اللي قامت على أشلاء و دماء مئات الالاف من البشر , الصهيوني فخور بعشة الفراخ
دي و مش هيسمح لأي حد من المجموعه اللي واقفه انه يغلط فيها .
.
و في نفس الوقفه
و نفس الموقف واحد مصري بس كولجي , بيقول مااااسر و زباله و عسكر و مصر دي أصلها ولّاده
زي كلاب الشوارع !! , التاني ده بيتكلم عن أعرق و أقدم دوله في تاريخ البشريه , الدوله
اللي علمته و ربته هو و ابوه و أمه و جده و أجداد أجداده ل 120 جيل فاتو , الدوله اللي
عمرها ما كانت كيان معتدي ولا مغتصب و لا إيديها اتلوثت بدم بني أدم , الدوله اللي
بدأت حياتها قبل كتاب التاريخ بيومين .
.
تخيلتو المشهد
؟ تخيلتوه كويس ؟
حلوه 25 يناير
دي يا عماد ؟ ربيع عربي يا جدع !!.
................................................................................................................
Mohamed
Hussein
3
أبريل 2017·
انفجار في محطه
مترو أنفاق في روسيا , مقتل 10 على الأقل , و عشرات الجرحى
.
كولجي روسي رقم
1 : ظابط التأمين بتاع محطة المترو كان بيلعب كاندي كراش .
كولجي روسي رقم
2 : الحل في محطات المترو المتنقله مش الثابته .
كولجي روسي رقم
3 : لازم نقيل وزير الداخليه و وزير النقل و نعمل حوار مجتمعي .
كولجي روسي رقم
4 : أبو 50 % عمره ما هيفلح في حاجه أبدا .
كولجي روسي رقم
5 : تلاقي الإرهابي كرمش 20 روبل لأمين الشرطه الروسي .
كولجي روسي رقم
6 : الأزهر الشريف فرع موسكو هو المسئول عن تفريخ الإرهاب .
كولجي روسي رقم
7 : مجانية التعليم بتاعة جورباتشوف هي السبب في خلق عقول مشوهه
كولجي روسي رقم
8 : فلاديمير بوتين اللي عملها عشان يداري على خسارة ( لوكوموتيف موسكو ) للدوري الممتاز
( بص العصفوره ) .
.......................................................................................................................
Mohamed
Hussein
2
أبريل 2017·
من واقع خبرتي
الفيس بوكيه المتواضعه تماما ( بصوت متحت شلبي ) كنت عايز أقول لحضراتكو , أنا قبل
ماكتب البوست اللي فات و انا متوقع شتايم و اهانات و أنفريند و بلوكات , و حيث اني
على قدر من الذكاء محدود تماما برضه فكان ممكن اتصرف بشكل تاني , أكتب البوست بشكل
عايم مش واضح , أو أطنش الموضوع خالص و أهري في أي حاجه تانيه و يبقى سلامه في خير
زمان و خير زمان في النعام .
.
بس الحقيقه لأ
, في الحاجات العامه المهمه بحب المواجهه , مش مهم هخسر مين و مين هيقول عليا ايه
, ولا عمري والله فكرت في لايكات و تفاعل , و مش عشان أرضي غرور حد هقوم مهبّل بأي
هبل و يقولو هيه عاش الوطني المخلص الغيور على بلده .
.
أصدقائي الأعزاء
, رأيي في قصة عنب ديبو بتاعة الجزيرتين دول ماتغيرش من أول ما بدأ , رأيي مفهوش خرايط
ولا أراء لخبراء يقولو سعوديه ولا خبراء يقولو مصريه , رأيي مبني على فكرة و مبدأ احترام
جيش مصر و خارجيتها و مؤسسه الرئاسه و الراجل اللي ماجربّناش عليه الخيانه في كذا موضوع
مشابه , و واثق ان الموضوع ده زي ما يرسى هيكون لمصلحة مصر , هقولها للمره الألف ,
معنديش رفاهية الإختيار في تخوين مؤسسات الدوله العريقه ( اقرا الجمله دي تاني والنبي
) , رأيي مش اختراع ولا بينضحك عليا بشوية لايكات ولا هيخدعني ( أو يرهبني ) أي وصف
ممكن حد يوصفني بيه , قول يا عم لجان و قول معر*ين , قولهم 7 مرات و اتعشى و اغسل رجليك
و نام , و على فكره بقى انت حد جميل و وطني أخر فيصل , ماتجيب شوية وطنيه و النبي
, هات شويه يا جدع .
......................................................................................................................
Mohamed
Hussein
2
أبريل 2017·
خبر 1 : المحكمه
الإداريه العليا تقضي ببطلان حكم اتفاقيه ترسيم الحدود
- كولجي : أيوه
كده بقى , القضاء المصري مستقل و شامخ و يعرّي النظام , صفعة على وجة عبد الفتاح السيسي
, عاش قضاة مصر العظماء
أنا : هههههههههههههه
.
خبر 2 : محكمة
الأمور المستعجله تقضي باسقاط حكم المحكمه الإداريه العليا
- نفس الكولجي
: قضاء مسيس و بتاع النظام , وقضاه عايزين الحرق .
أنا : ههههههههههههههه
.
عزيزي الواد حوكشه
الكولجي , بعد التحيه
.
- الوطنيه ياض
يا حوكشه مش زي طقم الكاسات كده تشيلها في النيش طول السنه و تطلعها بس لما يجيلك ضيوف
, يعني ماينفعش طول السنه تقول ماسر و عسكر و الإرهاب عنف متبادل و بلد وسخه و يارب
هجره و تتعاطف مع كلاب السكك و الإرهابيين اللي بيقتلو جنود مصر و الخونه و الخواجات
اللي زيك و تيجي عند موضوع الجزيرتين تقوم مطلّع طقم الوطنيه من النيش و تبيع لنا وطنيه
بقى , صلاة النبي أحسن .
.
- القضاء يا حوكشه
لا كان بيعري النظام بالحكم الأول ولا هو مسيس بالحكم التاني , القضاء اجمالا في الموضوع
ده مش بيتكلم في فنيات و خرايط ولا القاضي معاه مازوره بيقيس بيها المياه الإقليميه
, القضاء بيتكلم في حاجات تانيه خالص بعيد عن إثبات ( أو نفي ) ملكية الجزيرتين .
.
- بقالك 3 سنين
يا ولداه بتحاول بكل الطرق و الكباري إنك تلزق صفة الخيانه على عبد الفتاح السيسي
, الراجل ده عاملك خرم في دماغك , داس على دماغ الجماعه الإرهابيه اللي راكباك بالجزمه
( يعني مش خاين ) , بيحارب الإرهاب في سينا و على حدود ليبيا ( مش خاين ) , مش بيفرط
في شبر من أرض سينا ( مش خاين ) , مابعتشي جندي يحارب في سوريا رغم الظروف الإقتصاديه
الصعبه جدا و رغم الإغراءات اللي مالهاش أول من أخر ( يعني مش خاين ) , و مع ذلك تتشال
انت و تتهبد عشان تحاول تلزق له الصفه اللي هي في الأساس صفتك الرسميه اللي بتنطبق
عليك بلا منافس , صفة الخيانه .
.
- عزيزي الواد
حوكشه الكولجي , المشكله إني حافظك زي خطوط إيدي , مصر على بعضها لا تعني لك أي شئ
, و انت أقصى أحلامك و أمانيك انك تشوفها كلها متباعه أو محتله أو محروقه , عشان تثبت
لنفسك بس ان عبد الفتاح السيسي خاين أو فاشل , يعني حكاية تراب مصر و طقم الوطنيه اللي
عفّن عندك في النيش تسرح بيه في حته تانيه , مش في حارة السقايين .
.
- امتى بقى اعتبرك
بني أدم صاحب قضيه و صاحب رأي و صاحب موقف ؟ لما ألاقيك طول السنه بتحترم اسم بلدك
و تاريخها و جيشها , و مابتسمحشي لحد يهينها قدامك و بتقف باحترام قدام دم جنودها الشهداء
اللي بيحمو أرضك و عرضك يا عديم العرض , لما تبقى بني أدم هتلاقيني بسمعك و بقولك اقنعني
و تعالى ننزل نتظاهر سوا و رجلي قبل رجلك .
..........................................................................................................
Mohamed
Hussein
2
أبريل 2017·
السيسي في زيارته
لواشنطن واخد معاه وفد وزاري كبير , الزياره هتستمر 5 أيام , و مصر مش من الدول و الدويلات
اللي بتروح تجري لأمريكا و تدفع لها زكايب فلوس حتى من غير ما أمريكا تطلب , معندناش
فلوس , و حتى لو عندنا فاحنا مش خواجات لامؤاخذه , هنفتح ملفات و نتكلم معاكو في مشاريع
مشتركه أوك , و عندنا خطوط حمره أد كده , ابعدو عنها و نتكلم .
.
مش عارف ليه جه
في بالي مشهد غريب , تخيل رئيس أمريكي ( أي رئيس ) , و راح له في شهر واحد شخصين بيمثلو
دولتين ( و بيتكلمو نفس اللغه ) , واحد دخل عليه و قاله شيك على بياض و احنا صبيانك
و محاسيبك يا معلم و التاني دخل عليه بملفات أد كده و قال في الملف الفلاني أه و الملف
العلاني لأ و الملف الترتاني أسف مش هينفع , مش هنقدر .
.
تخيل بقى نظرة
الرئيس الأمريكي و شعوره و تقييمه , و ايه الكلام اللي ممكن يقوله لمساعديه بعد نهاية
الزيارتين ؟! .
.
قعدنا 4 سنين علاقتنا
مقطوعه تماما بأمريكا , لا مايه ولا نور , و أمريكا دي السوبر باور اللي بتحكم العالم
, في الوقت ده كان الكلب أوباما ناقص يلبس تي شيرت عليه شعار رابعه و طبعا سلّط علينا
كل ألته الإعلاميه الضخمه و كل جمعياته و منظماته و حبشتكاناته
, مانكسرناش ولا
موتنا من الجوع و لا وطّينا ضهرنا , مع اننا كنا في أشد الحاجه للدعم الأمريكي ( مش
العداوه ) , يعني باختصار كان لنا عند الكلب حاجه بس ماقولناش له يا سيد .
.
عبد الفتاح السيسي
هيرجع من الزياره دي بالسلامه و هو موقّع اتفاقيات و مشاريع و فاتح ملفات جايز , لكن
مش هيرجع بأي تغيير في ثوابتنا الوطنيه و أمننا القومي , موقفنا في سوريا و ليبيا هيفضل
زي ماهو , حربنا على الإرهاب زي ماهي و بالتأكيد مش هنتصالح مع الجماعه الإرهابيه
.
................................................................................................................
Mohamed
Hussein
1
أابريل 2017·
قاضي الحشيش اتحكم
عليه بالسجن المؤبد , و فيه قاضي تاني بيتحاكم بتهمة الرشوه , رجل الأعمال الملياردير
جبناه من بيته الفجر و وزير نزل من مكتبه عالبوكس , و 2 رؤساء سابقين اتحاكمو , السيسي
ماكدبشي لما قال انا مش عليا فواتير لحد , لا عليه فواتير للحزب الوطني المنحل ولا
هيتصالح مع الجماعه الإرهابيه , ولا حاطط القضاه خط أحمر ولا رجال الأعمال خط فوشيا
, زمان من أد عشره خمستاشر سنه كنا بنحتاج معجزه إلهيه عشان نعرف نحاكم أمين شرطه
.
.....................................................................................................................
Mohamed
Hussein
31
مارس 2017·
النظره الدونيه
.
لما سافرت من
15 سنه تقريبا , كنت لسه يادوب متخرج و مخلص جيشي ( عمري 24 سنه ) , نزلت من الطياره
في الرياض لقيت المدير بتاع الشغل مقابلني في المطار , قال بكره الصبح هتسافر الخبر
( على حدود الخليج ) عشان عندنا عجز في الصيادله هناك , قلت ماشي , وصلت الخبر تاني
يوم لقيت صيدلي المفروض انه يدربني اسبوعين تلاته لأن السوق مختلف عن مصر و حاجات كتير
مختلفه , لقيته قعد معايا ساعتين تقريبا و قالي مفاتيح الصيدليه اهي , سلامو عليكو
انا راجع الرياض , قلت له عليكم السلام .
.
و لو سافرت ألمانيا
أو البرازيل هيكون نفس الشئ , متخرج بقى من مجانية التعليم بتاعة عبد الناصر , و عمري
24 سنه يعني بغل زي الفل , مش عارف المفروض اكون ايه غير إني أعمل كده ؟ هل مفترض اني
أقعد على قهوه و ألعن الرئيس و الحكومه و الفرنساويين و المماليك و أقول عسكر و ماسر
؟ , ولا أسافر و اتعب و اشوف أكل عيشي و أكون أد المسئوليه ؟ .
.
لما استقريت شويه
شوفت نماذج مصريه تشرف و نماذج تانيه تكسف , مصريين يرفعو راس بلدهم لفوق , و مصريين
تانيين يتخانقو على 5 ريال قدام الكفيل بتاعهم و يتحولو لمجرد مسخ أو أراجوز
.
بعد كام شهر من
شغلي , حصلت مشكله بسبب صاحب المستوصف اللي جنب الصيدليه , كان طالب اننا نروح نوقّع
عنده في المستوصف حضور و انصراف , مع اننا مش تبعه ولا لنا علاقه بيه أكتر من إن الشركه
اللي بشتغل فيها متأجره منه المحل اللي مفتوح صيدليه , جالنا جواب من الإداره اننا
نروح نوقع عنده كل يوم , و كان ردنا سريع جدا , استقاله جماعيه أنا و زمايلي بمنتهى
الأدب و الجديه , مفيش مشكله خالص , مايلزمناش قلة القيمه , مكانشي حيلتنا حاجه وقتها
, برضه مش مهم , استقالتنا اترفضت و من يوميها بقينا ( خط أحمر ) .
.
عايز أقول ان كل
مصري بيسافر بره هو سفير لبلده , بيتقال المصري الفلاني , سواء كان عامل أو مهندس أو
طبيب , و يفترض بالسفير ده مايكونشي عنده نظره دونيه لنفسه زي النماذج اللي كنت بشوفها
, سفير مش معناها انك تلبس بدله و كرافته و تضرب شعرك جيل وتبقى جزمتك بتلمع , سفير
معناها انك ترفع راسك فوق دايما مهما كانت ظروفك في مصر ( انا سافرت وكنت سالف تمن
تذكرة الطياره ) .
.
مشكلة كتير من
المصريين إن عندهم مصطلحات و مفاهيم مشوهه , مفيش حاجه اسمها انت بتشتغل عند فلان
, اسمها بتشتغل معاه , المرتب اللي بتاخده ده مش منحه ولا مكرمه , ده أجر مقابل عمل
, فلوس مقابل عمل يدوي أو فلوس مقابل عقل و خبره , معادله متساويه الطرفين , يحكمها
احترام العمل و احترام قوانين البلد اللي بتشتغل فيها مش اكتر , و لو كان ولابد تقول
مين صاحب الفضل ؟ فهو بالتأكيد صاحب الإيد و العقل مش صاحب الفلوس .
.
النظره الدونيه
اللي بتصيب كتير لما بيسافرو مالهاش علاقه بانك اتعلمت في حكومه ولا انترناشونال ,
كنت مسافر فقير معدم ولا لأ , النظره الدونيه دي جينات و هويه و ثقافه و عزة نفس و
تربيه في البيوت , محدش بيموت من الجوع , و قيمتك بتعملها بنفسك , يعني بتعملها على
إيديك .
..................................................................................................................
Mohamed
Hussein
31
مارس 2017·
البلد دي عجيبه
و غريبه , البلد اللي تعدّي من طوفان زي طوفان ال 6 سنين اللي فاتت و هي فيها الكم
ده من الفساد و فيها الشريحه دي من الخونه الإرهابيين و الشريحه دي من الشمامين و الأنطاع
و تُجّار الشعارات و فيها أله إعلاميه أغلبها مابين زلنطحي و حلنجي و فيها كوادر صف
أول و تاني و تالت منقوعين في البيروقراطيه لشوشتهم و فيها رجال أعمال عايشين بطريقه
( أنا و من بعدي الطوفان ) , و فيها خزينة فاضيه و حواليها ديابه و تعالب من كل ناحيه
, البلد اللي تفوت في كده تبقى بلد معجزه , بلد مالهاش كتالوج ولا معادله حسابيه ,
و لا تخضع لعلم المنطق , و لا ينفع تتعامل معاها بطريقه 1 + 1 بيساوي 2 .
مصر الدوله المعجزه
اللي ربنا حافظها و حاميها , كأنها سر من أسرار الله في الكون .
..............................................................................................................
ليست هناك تعليقات:
إرسال تعليق