Mohamed
Hussein
9
فبراير 2017·
الموضه اللي ماشيه
عالفيس بوك حاليا من صغار و ( أطفال ) الكولجيه هي الجمله دي ( قولي يا سيسي انت قريت
كتاب في حياتك ؟!! ) و بعدين ايموشن فيس بيضحك أو أكتر من فيس , و تعليقات كلها بنفس
النطاعه و الطفوليه , زي ما حصل مع صاحبنا أبو 17 سنه اللي عملت له بلوك من شويه .
.
و الحقيقه ماعرفشي
أبو 17 سنه كان فين أيام 25 يناير 2011 ( كان عمره 10 سنين وقتها ) , يعني كان يدوب
بيروح الملاهي و يركب العربيه الكهربا و يتحايل على باباه ياخد لفه تانيه , او كان
بيعمل بيبي في الشارع تحت الشجره .
.
و الحقيقه برضه
أبو 17 سنه ماعرفشي يكون قري كتب ايه و فين غيرشي كتب المدرسه و كتاب سلاح التلميذ
, و تكون معلوماته في الحياه ايه ؟ غير مثلا لعبة فيفا 2016 و يفضل عنده اعتقاد ان
الحكم بتاع اللعبه بيظلم الفرقه بتاعته .
.
الحكايه دي ملهاش
غير تفسير واحد , حكاية انت قريت كتاب في حياتك أو قريت كام كتاب , التفسير هو الإفلاس
, حلقه جديده من حلقات الإفلاس بيدور فيها صغار و أطفال الكولجيه على اعتبار ان الكبار
بتوعهم بيدورو في نفس الحلقه البائسه دي , ماهي شعارات الثوره مابقاش لها شمخه ولا
رونق ولا زبون , يعني بقت زي حلة الطبيخ البايت , ندخل بقى على شعارات الثقافه و انت
قريت كام كتاب و انا كام كتاب و تعالى نقيس ثقافتك كام متر و ثقافتي كام متر , هات
المازوره و تعالى ورايا .
.
و الحقيقه ان واحد
زي عبد الفتاح السيسي كرئيس للمخابرات و قائد من قادة الجيش المصري و بعدها وزير دفاع
و رئيس , الراجل اللي بقاله 3 سنين بيلاعب محور الشر و القوى الإستعماريه العظمى ,
اكيد قري كتب بعدد شعر راسك أيها الجحش الكيوت الصغير , و مش ضروري يعني يعمل صفحه
عالفيس و يكتب فيها ( قف على ناصية الحلم ) عشان تصدق انه مثقف يا جحش .
.
بس الأهم من ده
كله و اللي عايز أقولهولك و يارب ماتنسهوش , ممكن تعتبره قلم أو قفا جايز يعلّم فيك
او يعلمك , الحقيقه عزيزي الجحش الصغير إن أول قاعده في قواعد الثقافه على الإطلاق
هي الإنكار , إنك تنكر على نفسك اللي قريته , تنكر إنك تعلم , تنكر إنك تفقه , قاعدة
التواضع , أو بمعنى أصح أول مكفّر يخرجك من دين المثقفين هو التباهي ( و الفشخره )
بالكتابين اللي قريتهم ( ده لو كنت قريت كتابين ) , أيوه يعني لما تتباهي و تتفشخر
تبقى ايه ؟ ممممممممم تبقى مجرد جحش صغير و لما تكبر بإذن واحد أحد لو فضلت على نفس
الطريقه و ( الطوّاله ) هتبقى حمار كبير اد الدنيا , زي الحمير اللي انت متشعلق في
ديلهم حاليا .
.....................................................................................................................
Mohamed
Hussein
9
فبراير 2017·
السيسي : هجوم
أكمنة الشيخ زويد يوليو 2015 كان هدفه إعلان ولاية سيناء !! .
.
عزيزي النخبجي
المصري ( المثقف ) الغشيم , اللي حافظ له كام شعار و شايل كتابين على ضهره ( كمثل الحمار
يحمل أسفارا ) :
.
في أي مجتمع في
الدنيا بتبقى النخبه المثقفه هي الجوز عيون اللي المجتمع بيشوف بيها خصوصا في ساعة
الضلمه , و احنا بحق ربنا و في مجتمعنا فلتنا بأعجوبه , ليه فلتنا بأعجوبه ؟ عشان نخبتنا
عرّه , يعني الجوز عيون اللي المفروض نشوف بيها فيهم عين رايحه خالص و التانيه بنشوف
بيها طشاش , و لو بحسبة ورقه و قلم كنا رشقنا في عمدان المرحله كلها و وقعنا في أول
حفره و ماطلعناش منها .
.
عزيزي النخبجي
الحمار , الإرهاب الدولي اللي بترعاه أمريكا و بريطانيا و اللي اتصرف عليه مليارات
من عربان الخليج , الإرهاب ده حرق دول و أسقط جيوش كان ليها ترتيب عالمي محترم , الإرهاب
ده مابيتحاربشي بشومه و نبّوت , يعني مش نروح نقطع فرعين من أي شجره و نحارب بيهم الإرهاب
و حوش ياد من هنا و حلّق ياد من هنا .
.
في سينا لوحدها
كام كتيبة جيش انتشرو في أخر 3 سنين ؟ و كام فرد مقاتل ؟ 30 ألف مثلا ؟ عارف يعني ايه
تحرّك 30 ألف جندي و تأمنهم و تسلحهم و تأكلهم و تشربهم و تعالجهم في منطقة زي سينا
, عارف التكلفه دي كام مليار في السنه ؟ طب عارف ليه بنعمل كده ؟ عشان الإرهاب الدولي
الأمريكي الخليجي مايرفعشي رايته على متر من أرض سينا و نفس الحكايه في حدود مصر الغربيه
مع ليبيا , بطول أكتر من 1000 كيلو , و تأمين من طرف واحد عشان الطرف التاني مش موجود
!! .
.
عارف ليه بقول
عليك نخبجي عره بتاع شعارات ؟ عشان الكلام اللي فوق ده مش كلام في السياسه ولا كلام
في الإرهاب , ده كلام في الإقتصاد , اللي المفروض يكون اسمه اقتصاد حرب , و اللي فوق
ده مجرد بند من بنود كتير لازم تقولها قبل ما تتكلم عن سعر الدولار , ده لو حابب انك
تتغير و ماتكونشي مجرد حمار لابس بدله و كرافته و بيسرح في قطر السوشيال ميديا يبيع
شعارات و فلايات .
..................................................................................................................
Mohamed
Hussein
8
فبراير 2017·
بعد 6 سنين من
الهري الفيس بوكي و الفرهده اليوميه المتواصله , من غير أجازات لا جمعه ولا سبت ولا
حتى أجازه في عيد العمال , بحس كده إن دماغي محتاجه تفصل , نفسي أروح جزيره صغيره محندقه
لوحدي , مايكونشي فيها بشر , و أخد معايا كنكه و سبرتايه و شوية بن حلوين و راديو صغير
أسمع عليه أم كلثوم , و تبقى الجزيره دي فيها كام شجره ( كلهم جوافه ) و فيها شوية
نجيله أنام عليها , بلا سراير بلا بتاع , و طبعا مفيش لا نت ولا تلفزيون و لا أخبار
ولا توك ( شوز ) , و افضل نايم عالنجيله و باصص للسما و فارد دراعاتي أو تانيها و عاملها
مخده تحت راسي , و بس كده , أجازه بقى شهرين تلاته لاستعادة لياقتي الذهنيه و النفسيه
و العقليه و العضليه , بعد ما وصل بينا الحال اننا نحاول نقنع شاب مصري انه يقول مصر
مش ماسر و إنه يحترم جيش بلده , كده كتير أوي على العقل البشري .
.
بس أنا عارف حظي
كويس و واثق منه , أنا أول ما رجلي تخطي الجزيره دي هلاقي فيها 4 غيري , قاعدين لي
بقى , محمد البلتاجي و تامر هجرس و ريهام سعيد و أيمن يونس و ممكن ربنا يكرمني كمان
بوائل الإبراشي و تبقى كملت , و هكتشف إني نسيت أجيب البن معايا و إن الراديو مفهوش
حجاره , و إنهم قطعو شجر الجوافه .
.........................................................................................................................
Mohamed
Hussein
7
فبراير 2017·
بنت خيرت الشاطر
قدام النيابه بتقول : أنا سلفيه و مليش أي علاقة بالإخوان !! .
.
أه طبعا ملهاش
علاقه بالإخوان , دي حيالله بنت نائب المرشد , بنت العقل المدبر و الشيطان الأعظم للجماعه
الإرهابيه كلها , يبقى إزاي لها علاقه بالإخوان ؟! دي اكيد تسمع عنهم من بعيد لبعيد
كده .
.
أقسم بالله الناس
دي من يوم ما تتولد بترضع كدب , بتشرب كدب , بتاكل كدب , بتتنفس كدب , يعني ممكن نقول
باختصار إن تعريف الكائن الإخوانجي هو : كتلة من الأكاذيب تمشي على قدمين .
.
يمكن أحد المميزات
القلائل ليناير 2011 إنها كشفت الوجه القبيح بتاعهم , ماكنّاش قبلها بنصدق الأفلام
السينمائيه اللي بتتكلم عنهم , ماكناش بنصدق رؤساء مصر , ماكناش بنصدق الصحفيين و الكتاب
الكبار , ماكناش بنصدق ظباط أمن الدوله لما يحكو عن أكاذيبهم .
.
كان لازم حدث كبير
و جلل يحصل عشان نشوف الوجه الشيطاني القبيح للملاك أبو سبحه و دقن اللي خدع ملايين
من البسطاء على مدار 90 سنه .
..........................................................................................................................
Mohamed
Hussein
7
فبراير 2017·
عن المقالات الفستك
و الكلام البلح
.
لسه من شوية قاري
بوست من اياهم , حاجه كده باللغه العربيه الفصحى مع كام جمله مجعلصين من اللي بينتزعو
أهات السذج و مُحدثي الثقافه و العقل , و خلاصة البوست بقى هي فشل ( العسكر ) في إدارة
شئون البلاد , و حالة مترديه , والشباب طاقه ماعرفناش نستخدمها , و الشباب مستعد يموت
نفسه عشان خاطر البلد و عندنا موقع جغرافي و امكانيات معرفشي ايه و المايه 3 ألوان
, و هييييييييييييييح , أه و الله هيييييييييييح .
.
بالذمه البلح ده
ينفع يكون تقييم و رؤيه اقتصاديه لحال بلد و منطقه حاليا ؟ يا بيه الكلام ده كله بلح
, فستك , و تعبت نفسك عشان تقول البلح ده ؟ حسيت بالفخر و الفخار وانت بتكتب بلح ؟
عسكر يا حماده و الجيش بيحكم ازاي و مشاريع ايه و ايه حكاية ( ثكناته ) دي ؟ , هو انت
اهبل و مامتك عارفه و لا مخبي عليها ؟ .
.
طب حقك عليا ,
بلاش رئيس كان ظابط جيش , حتى لو جه بانتخابات و صناديق و ديموقراطيه و هباب أزرق
, المره الجايه رشحو دكتور أمراض نسا أو مهندس ديكور و حاولو تنجحوه عشان هي دي الديموقراطيه
, و لما ينجح دكتور النسا و يحكم البلد حكم مدني متين , و يلم الشباب اللي عالقهوه
و يشغلهم كلهم في السلك الدبلوماسي و يطلع امكانياتنا المدفونه و المايه ال 3 ألوان
, و يرتفع مستوى الدخل لل 92 مليون مواطن بحيث يبقى زي المواطن السويسري أو الإماراتي
عالاقل , و يتعايش مع جماعة الإخوان الكيوت اللي بيموتو في دباديب ام البلد و ترابها
, و يعمل حكومه ائتلافيه تضم الإخوان و الكولجيه و خالد علي , و نوزع الدهب بتاع منجم
السكري عالشعب و نجيب ال 70 مليار دولار بتوع مبارك و نوزعهم علينا و كل واحد يبقى
عنده فيلا ب 3 جناين , لما نوصل لتوقيع عقد الفيلا أم 3 جنانين ابقى صحيني من النوم
عشان أوقّع معاكو , و أدي توقيعي أهو , اهو .
.
بالمناسبه , ده
لو مش عايزين نضحك على نفسنا , كل اللي بيتقبض عليهم في الفساد و الرشوه و تخزين البضايع
و سرقة المال العام , كلهم بلا استثناء مدنيين , يعني طبيب و مهندس و صيدلي و محاسب
و محامي , مدنيين و زي الفل , مافيا الدروس الخصوصيه بيقودها مدنيين , و كل اللي هبلو
في موضوع سد النهضه مدنيين , و ال 400 وزير اللي شوفنا سحنتهم في اخر 7 سنين مدنيين
, و الخونه اللي مستعدين يبيعو نفسهم للخواجه بدولار مدنيين , واللي بيحضر العفريت
مدني و اللي مايعرفش يصرفه مدني , واللي بيقودو كل مؤسسات الدوله مدنيين , إنما من
المؤكد و الأكيد إن المدني ده بقى لو بقى رئيس مصر , يا دين النبي عاللي هيحصل , الزهر
هيلعب معانا و هيبقى راس حربة كمان .
.
ماهي أحلى حاجه
إننا نبيع الوهم للناس و نعبيّة في أزايز , و نختصر الدنيا في كلمة مدني و عسكري ,
طول مافيه الزبون اللي بيشتري , انما كلام بالعقل و المنطق و حلول حقيقيه و تقييم شامل
من غير شعارات عبيطه , لا الحاجات دي ملهاش زبون يا بيه .
............................................................................................................................
Mohamed
Hussein
6
فبراير 2017·
أصدقائي الأعزاء
, رجاء و النبي عشان خاطر ربنا
.
شاب راح مع خطيبته
يتفرجو عالماتش , صاحب الكافيه قفل عليهم بعد الماتش و قال الحساب , ماعرفشي اصلا الكلام
ده يحصل ازاي في مصر الجديده ؟ ده مابيحصلش في المرج , المهم اللي حصل , حصلت مشاده
كلاميه بين الناس و عمال الكافيه , العمال استنو الشاب بره و واحد فيهم ضربه بمطوه
و مات , الله يرحمه .
.
س 1 : استخرج كلمة
الدوله من الفقره السابقه ؟
س 2 : أين يقع
إسم عبد الفتاح السيسي في هذه الحادثه ؟
س 3 : ماهو دور
شريف إسماعيل في غلق أبواب الكافيه ؟
س 4 : هل لوزير
الداخليه أي دور في عدم دفع الحساب ؟
س 5 : هل وزير
التعليم مسئول عن المطوه القرن غزال ؟
.
ماهو عشان خاطر
ربنا بقى لازم نفهم ان ده حمل كبير عالعقل البشري , أبجديات العقل البشري مفهاش كده
, حادثه زي أي حادثه , خناقه زي أي خناقه , في كافيه أو موقف ميكروباص أو مول أو حتى
حمام عمومي , في مصر الجديده في السنبلاوين في واشنطن في بوركينا فاسو , في أي مكان
في العالم , الخناقه أفضت إلى موت طرف من الأطراف , الله يرحمه , ايه علاقة الدوله
بكده ؟!! .
.
طب الحادثه دي
هيحصل فيها ايه ؟ هيتحاكم اللي عملو كده , طب لما يتحاكمو هياخدو ايه ؟ والله على حسب
معلوماتي البسيطه هتبقى قتل خطأ أو حتى قتل عمد من غير ترصد , يعني أخرها عشره خمستاشر
سنه , مفهاش إعدام ولا مؤبد , طب ليه ؟ عشان هو ده القانون اللي في مصر و في أي مكان
في الدنيا , القانون لازم يفرق و يميز بين القتل الخطأ ( في خناقه ) و القتل مع سبق
الإصرار و الترصد اللي هو حدوته تانيه خالص , الحادثه دي بالظبط زي حادثة أمين الشرطه
مع عامل الشاي في الرحاب .
.
أصدقائي الأعزاء
, الساده الإعلاميين البظرميت , رجاء محبه , خلّو أبو قرش بقرش و أبو جنيه بجنيه و
ماتحطوش عيشه على أم الخير , عشان مصر بتسلم عليكو و بتقول لكو : والله بالله تالله
مرارتي ما بقت مستحمله .
..........................................................................................................................
Mohamed
Hussein
6
فبراير 2017·
ولاد البلد و ولاد
الحرام المصفّي يعني ال pure .
.
ولاد البلد بيعملو
إيه ؟ .
- بيشجعو منتخب
بلدهم سواء كسب أو خسر , بيقفو في ضهر أي 11 لاعب لابسين زي مصر , رافعين علم بلدهم
و بس .
- بيبرّو أمهم
سواء عاملتهم كويس او عاملتهم وحش .
- بيبوسو إيد أمهم
سواء كانت خشنه و مشققه أو ناعمة زي الغُريبه .
- بيحافظو على
بيتهم و يغيرو عليه سواء كان بيت قديم و تعبان أو كان سرايه بيرمح فيها الخيل .
.
ولاد الحرام المصفي
بيعملو ايه بقى ؟ .
- بيشجعو أي حد
ضد بلدهم , أي منتخب و أي دوله .
- بيقولو على بلدهم
ماسر و يارب هجره و اخرجو منها امنين و بيشمتو في خسارتها .
- بيقولو سينا
دي لو كانت لسه تحت سيطرة اسرائيل كانت بقت جنه .
- بيقولو الاحتلال
ده حد جميل و أمي لو كانت مشيت مع الخواجه كان زمانها ركبت بي إم و لبست بناطيل ستريتش
بدل الجلابيه المقطعه اللي لابساها .
.
هو انا يا حبيبي
ابقى بفتري عليك لما أقول ابن حرام مصفي ؟ حط المعطيات بتاعتك دي في مسألة حساب لأي
عيل في ساته ابتدائي و قولو النتيجه ايه ؟ أو دخلّها على أي كمبيوتر و دوس إنتر هيقولك
ابن حرام بالبُنط العريض .
............................................................................................................................
Mohamed
Hussein
5
فبراير 2017·
المكسب الحقيقي
.
اللي بعد نص ساعه
ده ماتش كوره , ربنا يكرمنا و نفوز , و لو خسرنا هنقول برافو برضه , برافو للرجاله
اللي فرحونا طول الماتشات اللي فاتت , برافو للرجاله اللي لعبت في ظروف صعبه جدا و
اصابات كتير و بعد غياب سنين عن البطوله عرفو يوصلو النهائي .
.
المكسب الحقيقي
موجود دلوأتي في الشارع , الناس فرحانه و بتحتفل من قبل الماتش , ملايين في الشوارع
و القهاوي و الاستادات و الساحات الشعبيه قدام شاشات عملاقه , ملايين شايلين علم مصر
و بيقولو يارب , ملايين لازقين في بعض و محدش فيهم يعرف التاني , حالة إلتفاف كامل
و كرنفال رائع بإسم مصر , كنا محتاجين الحاله دي أوي , و هو ده المكسب الحقيقي .
.
مين اللي قال ان
الكوره مجرد بتاعه كده مدوّره و شوية عيال لابسين شورتات بيجرو وراها ؟!! .
.........................................................................................................................
Mohamed
Hussein
5
فبراير 2017·
الواد المتهم بالهجوم
على متحف اللوفر بخنجر قرن غزال من يومين , قالو انه اتعرض لإطلاق نار في الرجل و البطن
و إن حالته حرجه ( و محتاج دعواتكو ) , ممممممممم بس النهارده بقى كويس ( تلاقيه شد
عضلاته كداهو و قام واخد الرصاصه على بطنه و طلّعها من مناخيره ) , و كمان رفض يرد
على أسئلة المحققين ( تلاقيه مخاصمهم ) .
.
يعني هو دلوأتي
انضرب بالنار في رجله و بطنه و كان بيطلّع في الروح ولّا بقى كويس ؟ ياختي كده ينفع
و كده ينفع ( بصوت العظيمه يسرا ) .
....................................................................................................................
Mohamed
Hussein
4
فبراير 2017·
عندي علم مصر كبير
في البيت , قلت للبنات يعلّقوه في البلكونه من الليلادي عشان ماتش بكره , فرحو أوي
بالفكره و هينفّذوها , طبعا مانسيتش أشرح لهم إن العلم اللي هو حتة القماشه دي إسمه
رمز الدوله , اللي أجدادنا حاربو و استشهدوا عشان يرفعوه على شوية رمل في سينا .
.
علّمو أولادكم
حب الوطن و التاريخ و السباحه و الرمايه و ركوب الخيل , و ازرعو جذورهم في الأرض بإيديكو
عشان مايطلعوش نبت شيطاني , و تكتشف في النهاية إنك ربّيت في بيتك عيل خاين تحت الطلب
.
........................................................................................................................
Mohamed
Hussein
4
فبراير 2017·
الواد اللي عمل
الهجوم على متحف اللوفر طلع مصري , و من المنصوره يعني بلدياتي , جدع يا وله ( بصوت
توفيق عكاشه ) .
.
بس ده أي هري في
الحماده يا سعادة البيه , الواد عايش في دبي و سافر فرنسا تأشيره 20 يوم و راح اشترى
خنجرين ( عشان لو خنجر منهم صدّى فجأه يبقى التاني موجود ) و بعدين احتفظ في بيته بفاتورة
الخنجرين اللي هي ممكن تكون 6 يورو مثلا , معرفشي ليه برضه , هل مثلا عشان لو العمليه
ماتمتش يروح يرجّعهم للراجل اللي فارش بخناجر و يستفيد من ال 6 يورو دي ؟ أهي تنفعه
, ياكل بيها عشوه حلوه من كنتاكي و هو مروح , يعني يبقى لا قتل ولا كنتاكي ؟ .
.
تصدقو بالله ؟
حكاية دهس مواطنين بسيارة مختل عقليا أو مخمور كان لها شمخه عن كده , يعني الارهابي
سافر كل ده , من قاره لقاره لقاره عشان يشتري خنجر و يروح يغز بيه الفرنساويين و المماليك
؟ طب يغزهم في متحف اللوفر اللي فيه كاميرا في كل شبر ليه ؟ مايغزهم في الشارع أو المترو
أو حتى سوق التلات بتاع باريس .
.
عموما لو خلال
يومين تلاته ظهر أي تلميح أو تصريح بحظر سفر المصريين لأمريكا و الاتحاد الأوروبي يبقى
اللي في دماغي صح , و تبقى الحكايه بلح , و كالعاده تم استخدام سذاجة بهلول من بهاليل
الخرفان و حموريته , و استدراجه للعمليه العبيطه بكل تفاصيلها , و في النهايه اتحسب
علينا بني أدم .
............................................................................................................................
Mohamed
Hussein
3
فبراير 2017·
في حادث متحف اللوفر
الإرهابي الكوميدي .
.
بص يا سيدي , و
بحسب تصريحات الشرطه الفرنسيه , واحد مشتبه فيه حاول يقتحم متحف اللوفر , يعني ايه
يقتحم ؟ يعني يدخل بسرعه كداهو من غير تفتيش أو مثلا نادو عليه و مارضاش يقف , طب اشتبهو
فيه ازاي ؟ عشان حاول يقتحم و مايقفش و بعدين كان معاه شنطه شكو انه يكون فيها متفجرات
, طب لما اشتبهو فيه عملو ايه ؟ ضربو عليه نار و أصابوه اصابه خطيره , و هو عمل ايه
بقى ؟ قال الله أكبر ( حلوه جملة الله اكبر دي لازم تترشق في كل حادثه ) .
.
طب و حصل ايه كمان
؟ الجندي اللي ضرب عليه نار اتعرض لاصابه ؟ اتعرض لاصابه ليه هو المقتحم ده كان معاه
كلاشينكوف ؟ لا كان معاه سلاح أبيض , يعني مطوه قرن غزال مثلا أو ( كذلك ) من بتاع
السلطه و جايز قصافة ضوافر , و معقول واحد معاه سلاح أبيض يصيب واحد معاه سلاح ألي
؟ والله اسأل سعادة الباشا رئيس الشرطه الفرنسيه , طب لما فتشو شنطته لقو فيها متفجرات
و قنابل نوويه ؟ لا خالص , ملقيوش حاجه , كان فيها تقريبا فانله و لباسين و شبشب بلاستيك
من أبو 8 جنيه , طب و بعدين الشرطه الفرنسيه عملت ايه ؟ قفلت متحف اللوفر و محطات المترو
و قالت ان الحدث خطير و تقريبا الباريسيين هينامو من المغرب النهارده , ليه كل ده ؟
عشان الراجل أبو قصافه و فانله و لباسين و قال الله اكبر ؟ أه و عهد الله .
.
هي الميزه بس إن
فرنسا مفهاش خرفان ولا كولجيه ولا ناس قاعده تهري في السياسه , و أي حاجه بتيجي من
الحكومه و المسئولين عندهم بيقولو نعم و حاضر و أمين , مع إن الحادث و وصفه و التعامل
معاه أقرب مايكون لمسرحيه كوميديه , و لو صدق الحادث و اعتبرو ده إرهاب يبقى اللي في
سينا اسمه ايه ؟! ده اللي معاه ربنا بيمشي عالمايه فعلا .
.
عندنا في مصر بقى
, الإرهابي بيتصور و هو ماسك القنبله أو العبوه الناسفه و يبقى قتل و حرق أو نزل فيديو
على صفحته عن طريقة تحضير قنبله بدائية الصنع أو متسجل له مكالمه نص ساعه بيتكلم فيها
عن الدولارات و القتل و مبايعة البغدادي , و في الأخر لما يتقبض عليه و يعترف نفضل
نحاكم فيه سنين و نعالجه و نعلفه , و الخرفان و الكولجيه يعتبروه بطل قومي و أيقونه
, و الخواجات بتوع حقوق الإنسان يطلعو من العلبه بتاعتهم و يتكلمو عن حقوق الإرهابي
الكيوت الرقيق زي الفراشه .
.............................................................................................................
ليست هناك تعليقات:
إرسال تعليق