Mohamed
Hussein
16
فبراير 2017 ·
-
بتتصل بتليفون و تلاقي الرقم مشغول تفضل سايب السماعه على ودنك شويه كتير ؟ ( على أساس
ان الرقم مشغول بس احتمال يبقى مش مشغول ؟ ) .
.
- بتخلص مكالمة
الموبايل و تفضل سايب الموبايل شويه مع ان الطرف التاني قالك في حفظ الله و قفل ؟
( مش جايز يفتكر حاجه تانيه و يرجع يقولها ؟ ) .
.
- بتعلّم دَخْلة
شارع الطيران اللي في صلاح سالم بشبكة كبيره مفروده على مبنى تحت التشطيب و لما المبني
يتشطب و الشبكه تتشال تفضل ماشي لحد ما تلاقي نفسك عدّيت مدينة نصر و مصر الجديده و
قرّبت على حلايب و شلاتين ؟ .
.
- عندك بنتين و
بتتلخبط في أساميهم و تبدّلها , و عشان ماتتلخبطش في اسم مراتك و تقع في ورطه ما يعلم
بيها إلا ربنا بتفضل كل ما تناديها تقولها يا حبيبتي يا حبيبتي يا حبيبتي ؟ .
.
- بتشرب نسكافيه
بالليل بمعلقتين نسكافيه كلاسيك و من غير لبن عشان تعرف تنام بعمق ؟.
.
- بيدخلّك زبون
يسألك على دوا و تقوله موجود بس محتاج فكه , يطلع يفك من صاحبه اللي قاعد في العربيه
و يرجع لك بعد دقيقتين يقولك هات الدوا بقى تقوله : دوا ايه و انت مين بالظبط و مين
اللي باعتك و بتشتغل لحساب أي جهه ؟ .
.
- بتدور عربيتك
و تنزل الإزاز الشمال و تشغل الراديو لحد ما تسخن و تقعد تسمع أم كلثوم و بعد شويه
تتخض و تفتكر ان مفاتيح العربيه مش في جيبك و تفضل تدوّر عليها ؟ .
.
- مراتك بتطلب
منك ب 5 ج عيش فينو و انت راجع تقوم شاري 2 عصير جهينه بطعم الجوافه و تفضل و انت ماشي
تحاول تفتكر و تقول يارب هي كانت طالبه طعم جوافه ولا مانجه ؟ .
.
لا ماتقلقش , انت
حد جميل أوي , تعالى خش في لحم أخوك يا فواز .
...............................................................................................................................
Mohamed
Hussein
16
فبراير 2017·
شوية مطر حلوين
أوي , طلعت كالعاده و مشيت تحت المطر غرّقت هدومي و شعري , اللهم صل وسلم و بارك على
سيدنا محمد , يارب بحق ساعة المطر يدخل عليا راجل كده لابس أبيض فابيض و معاه شنطه
سمسونايت فيها مليون دولار , و يقولي دي فلوسك يا محمد اللي كنت سالفها منك من زمان
و انا و الله ماهكدّبه , هقوله : أه صح افتكرتك افتكرتك , بس اتأخرت أوي ليه كده ,
عموما يا سيدي انا مسامحك عالتأخير .
.
مع اني عمري ما
سلّفت حد أكتر من 200 جنيه , بس أكيد الراجل ده بيتكلم صح .
.............................................................................................................................
Mohamed
Hussein
16
فبراير 2017·
في أمريكا , بلد
الديموقراطيه الأصلي يعني ال original , مش الديموقراطيه التايواني المضروبه , في أمريكا
البلد اللي فيها رئيس له صلاحيات كبيره و عريضه و واسعه و شرحه و برحه زي دوار العمده
كده , خد الحبايه دي و حطها تحت لسانك , هتبقى كويس بإذن الله .
.
بيقولك يا سيدي
, تقرير للجارديان إن مواطنين أمريكان عايزين يعملو عصيان مدني و يمتنعو عن سداد الضرائب
اعتراضا على تولي ترامب الحكم , و قبلها طبعا مظاهرات حاشده في أغلب المدن الأمريكيه
, مع ان ترامب ده جاي بالصناديق , أه الزناديق و عهد الله , و تقولي بقى هي فين الديموقراطيه
؟ أقولك ابقى تعالى و انا اقولك فين .
.
طب بالنسبه لصلاحيات
الرئيس ؟ , تقرير لجريده أمريكيه بيقول امتناع جهاز المخابرات الأمريكيه , ال CIA عن اعطاء ترامب بعض المعلومات الحساسه , يعني كده
مين بيحكم أمريكا بالظبط ؟ مش الرئيس الأمريكي اللي جاي بالزناديق ؟!! و ايه علاقة
الجرايد دي بأجهزة المخابرات ؟ طب فين بقى استقلال الصحافه و صاحبة الجلاله ؟ ابقى
تعالى برضه و انا اقولك فين .
.
مشكلتنا بعد
25 يناير و لما الدنيا فتحت عالبحري و كل واحد قري كلمتين أو قعد وشاف الأسواني و يسري
فوده بيهرتلو في برامج التوك ( شوز ) فتخيل صاحبنا إنه بقى خُط السياسه و جهبز أنظمة
الحكم في العالم و حوت العلاقات الدوليه و تمساح في شئون الإقتصاد و كبير مشجعي مانشستر
يونايتد , و من ساعتها ظهرت عندنا حكاية ( المثقف الحمار ) , اللي هو حافظ كلمتين من
أي كتاب و مش فاهم أي حاجه في الدنيا , بعرفهم بسهوله أوي و بشم ريحتهم من على بعد
, اللي بتلاقيهم دايما متخيلين إن الفيس بوك ده قطر طنطا و سارحين فيه يبيعو شعارات
و فلايات .
...............................................................................................................................
Mohamed
Hussein
15
فبراير 2017·
ثقب في الدماغ
( مشّيها الدماغ )
.
قناه خرفانيه ضاني
بتروج لافتكاسه جديده و هي ان السيسي اتفق مع الصهاينه انه يعمل للفلسطينيين دوله في
غزه و سينا !! , بقى سينا اللي بنحارب فيها بقالنا 3 سنين عشان الارهابيين مايرفعوش
رايتهم على متر من ترابها , سينا اللي قدّمنا فيها مئات الشهداء و اتصرف في تنميتها
عشرات المليارات في أخر سنتين بس , هنسيبها لحد ؟!! انما الجزيره و بقية قنوات الدعاره
الخرفانيه زيهم بالظبط زي ريري سيلان , يوم ماتكبر و تبطل تشتغل في الدعاره فهي بالتأكيد
هتشتغل قواده .
.
و نعجة ضاني قبل
ماتش مصر و الكاميرون تقول السيسي دفع رشوة للكاميرون و الحكم عشان مصر تفوز , و لما
خسرنا خروف تاني قال ان السيسي دفع رشوة عشان نخسر , و خروف يقول السيسي هيجامل بوتين
و يعمل قاعدة روسيه في مصر وخروف يقول السيسي هيجامل ترامب و يعمل قاعده امريكيه (
يعني يبقى كده السيسي عميل للروس و الأمريكان مع بعض ) .
.
لو ركزتو في الكلام
اللي فوق هتلاقو العامل المشترك فيه هو اسم السيسي , واضح ان إسم عبد الفتاح السيسي
مبقاش مجرد اسم لرئيس مصر الفارس المنقذ , لا ده بقى كمان إسم لفيروس من النوع الفتّاك
بيصيب قطعان الخرفان و الماشيه في كل الوطن العربي و بيعمل لهم ثقب في النفوخ , يعني
خرم في دماغهم ( مشّيها دماغهم عشان فيه بنات و ستات قاعدين ) .
.
بالك يا ريس ؟
لو الدولار بقى ب 500 جنيه و البيضه بألف دولار و الفراخ في مصر بطّلت تبيض في نفس
الوقت ( عملت عصيان مدني ) , و بقينا خلاص بناكل قش , برضه هفضل وراك و هأيدك طول مانت
عامل للخونه و ولاد الكلب و القطعان خرم في نفوخهم بالشكل ده , يارب اشوفهم دايما كده
محروقين و مخرومين .
...................................................................................................................................
Mohamed
Hussein
15
فبراير 2017·
لو عايز صفحتك
تكبر أوي عالفيس بوك و تبقى أشهر من البناطيل الستريتش و سوالف عمرو حمزاوي , قدامك
4 طرق سريعه و نتيجتها مضمونه ( بضمان الشيخه خديجة الفيسبوكيه )
.
1- تشتغل في المُحن
( الإسلامي لامؤاخذه ) و تنزل صور عبيطه و تقول عباية الرسول و نعل الرسول و نضاره
الشمس بتاعة الرسول , و ممكن تتألّق مع الصور دي و تنزّل صورة بت مزه ( تكون محجبه
طبعا ) و عامله شفايفها كداهو , قال يعني مقموصه و كده , و تكتب فوق الصوره ( انا زحلانه
, عشان محدش بيصلي عالرسول ) , يعني هييييح بس هييييح اسلامي ....... الهجصايه دي بتعمل
لها 200 الف لايك في ساعه زمن .
.
2- تشتغل في مصطلحات
العسكر و الزولم و الكمع , مع كلمتين مجعلصين , قف على ناصية المعرفشي ايه و لا تبصق
معرفشي فين , و حقا إنك لن تضع قدمك في ماية الطرشي مرتين , و تنزل صورتك بشكل غريب
, يعني مثلا فاتح بؤك أوي و مش مسرح شعرك و أخر مره تكون استحميت فيها هي أيام عاطف
صدقي , أيام ماكانت نادية الجندي هي معبودة الجماهير .
.
3- تعمل صفحة سيكو
سيكو و تسمي نفسك مدام ريري التعبانه , مع صورة لسمّانة رِجل أي ست من على جوجل ( ركز
في الجزء اللي تحت الركبه بيعمل شغل حلو معانا ) , و صوره لحته كده من صدر صافيناز
و تبقى لعبت معاك يا معلم , تتشهر بقى و تكسب كروت شحن كتير و ممكن بعد يومين تفتح
هايبر ماركت و تسمّيه هايبرماركت مدام ريري التعبانه و شركائها .
.
4- تشتغل في نشر
الإشاعات , بس حاول تكون واد ( دوقرم ) شويه , يعني في نهاية كل اشاعه تكتب ( و الله
اعلم ) أو في أولها تكتب ( بيقولو و احتمال ) , عشان لو حد نفخك في تعليق تقول مانا
كتبت ( و الله اعلم ) , و تنشر بقى أي اشاعه تخطر على بالك , يعني الدوا الفلاني يا
جماعه فيه مادة النفتالين و اللي هياخده هيحصله مرض غريب اسمه نفتالينوميجالي , أو
تقول يا جماعه محدش يشتري بسكوت ويفر دانا فتحت باكو بسكوت و انفجر في وشي و وقع العماره
و العماره اللي جنبها و انا دلوأتي ميت و في العنايه المركزه بس بقيت أحسن الحمد لله
, انشروها لتعم الفائده .
.
بس يا سيدي , و
أصل الحدوته بيقول ان عندنا شوية قطعان كده , قطيع متدين بالفطره و قطيع كولجي بالفطره
و قطيع نسوانجي بالفطره و قطيع ( على نياته ) بالفطره , و ان كنت اعتقد انه قطيع واحد
, يعني نفس الشخص بيجمع ال 4 صفات , متدين و على نياته و كولجي و نسوانجي .
.
في صفحتي الحمد
لله و من فضل ربنا عليا , أصدقاء و فولورز مافهمشي حد تبع القطيع , و يوم ماهبّل أي
نوع من الهبل اللي فوق هلاقي الصديق قبل الغريب بيقولي بطّل هبل, دي نعمة كبيرة من
ربنا , اسمها نعمة العقل .
.................................................................................................................................
Mohamed
Hussein
14
فبراير 2017·
أنا و بناتي .
.
لوجي 10 سنين
, و لمار 6 , الإتنين خدو دراسات اجتماعيه في المدرسه social , و منها عرفو الإنسان المصري القديم كان بيعيش
ازاي .
.
المهم كالعاده
قالو لي احكي لنا يا بابا حدوتة قبل النوم بس تكون عنك , يعني تكون انت البطل بتاع
الحدوته
.
أنا : كان يا ما
كان يا سادة يا كرام ولا يحلى الكلام الا بذكر النبي عليه الصلاة و السلام , كان فيه
ولد صغير عمرة بتاع 7 سنين ( يعني أدك كده يا لمار ) اسمه محمد اللي هو انا , عايش
في بيت مصنوع من الطوب الني ( يعني الطين ) , و السقف بتاعه كام لوح خشب و متغطي بشوية
قش , تقوم الدنيا لما تمطر نلاقي المطر نازل في بؤنا و احنا نايمين .
.
لوجي ( بتقاطعني
) : كنت عايش في بيت مصنوع من الطين ؟ تبقى انت يا بابا الإنسان المصري القديم اللي
خدناه في ال سوشيال .
لمار : و كنت بتلبس
الهدوم مصنوعه من جلود الحيوانات ؟! .
لوجي : و عندما
ندرت الامطار هاجرت إلى نهر النيل ؟ .
.
أنا : استنو عشان
أكمل الحدوته , المهم الولد محمد ده كان معاه في البيت بتاع 20 طفل زيه كده , اخواته
و ولاد عمه , كل راجل و مراته و عياله ( خمسه أو سته ) في أوضه في البيت , و رغم ان
كان فيه عشرين عيل في البيت لكن وقع اختيار جدي عليا , و اختيار مرات جدي كمان , يا
ترى يا بنات اختاروني في ايه ؟ .
.
لوجي : اختاروك
تروح معاهم المصيف في العين السخنه .
أنا : لا .
لمار : اختاروك
و جابولك انت بس هديه طياره صغيره بتطير بالبطاريات .
أنا : لا .
.
لوجي و لمار :
أومال اختاروك في ايه ؟ .
أنا : جدي اختارني
عشان أسرح معاه بالغنم , و مرات جدي كانت مربيه فراخ كتير و اختارتني عشان أجمع لها
بيض الفراخ كل يوم , و كانت بتديني مكافئه ( مرتب يعني ) بيضة فرخة كل اسبوع .
.
لوجي ( بتقاطعني
) : بتسرح بالغنم و تلم بيض الفراخ ؟ لا مخدناش دي في السوشيال .
لمار : ممكن ناخدها
السنه الجايه .
أنا : توته توته
خلصت الحدوته , و ديني ماهحكيلكو عني تاني .
................................................................................................................................
Mohamed
Hussein
14
فبراير 2017·
العيال اتهبلت
و الله , من كام يوم عيل اهبل يقول ان مصر خسرت في نهائي أفريقيا بتعليمات من السيسي
قالها للاتحاد الأفريقي و لحكم المباراه و لهيكتور كوبر و عصام الحضري و وصّاهم جامد
, و ليه يا مولانا السيسي عايزنا نخسر ؟ قالك أصل السيسي عرف ان فيه ملايين متلتله
في الشوارع بتتفرج عالماتش فخاف بقى ان مصر تكسب تقوم الملايين دي تعتصم !! , فقام
عمل كده و لما نفذو الخطه بتاعته و خسرو قام راح قابلهم في المطار عشان يقولهم برافو
إنكو نفذتو الخطه بتاعتي و خسرتو !! .
.
انتو مش مصدقين
؟ والله العظيم فيه عيل كاتب كده و مصدق و بيحلف و زي الفل , و تلاقيه خريج جامعه و
ياما راح المدرسه و رجع من المدرسه و امه تقول ابني الأستاذ راح و ابني الاستاذ جه
و لما يخطب هتقول للعروسه اكيد : انتي واخده شاب مفيش زيه في مصر ولا في كوكب الأرض
, هو فيه في جماله ولا عقله ؟! لا و النبي يا حاجه ما فيه , كوكب الأرض أصلا لو فيه
اتنين زي المحروس ابنك كان زمانه بطّل يلف حوالين الشمس و قام راكن على جنب في أي مدار
فاضي وقعد يضرب بانجو .
.
و النهارده لقيت
واحد من الأصدقاء كاتب عن النائب محمد أنور السادات ان لجنة القيم اسقطت عضويته عشان
فضح معرفشي ايه و عربيات ايه , مع ان مصايب النائب ده بيتم التحقيق فيها من شهور ,
إنما كالعاده الخاين و الزلنطحي و ابن الكلب بيلاقي له درويش و بهاليل يعملو منه بطل
و أيقونه ( سلو بلدنا بعد 25 لامؤاخذه يناير )
.
الناس دي لما بشوف
سحنتها عالتايم لاين و قبل ماعمل بلوك بقعد شويه أفكر مع نفسي كده , أقول طب بلاش بلوك
و حاول تشرح له و تفهّمه انه حمار , و بعدين أمسك الشخص ده و أتخيل إنه قاعد قدامي
و أفضل أقلّب فيه يمين و شمال و فوق و تحت على أساس ألاقي دخله أدخل له منها مالاقيش
, طب ده الواحد يفهّمه منين بالظبط ده ؟ ناس عايزه تتعلم من أول زرع و حصد تقوم تشرح
لهم مره واحده كده هو ليه السيسي قابل المنتخب في المطار وليه لجنة القيم أوصت باسقاط
عضوية النائب الفلاني ؟ لا طبعا , ده كده يبقى كتير على قواهم العقليه و كتير جدا على
مرارتي , يبقى البلوك وجب يا عطيه .
...........................................................................................................................
Mohamed
Hussein
13
فبراير 2017·
للعقلاء فقط
.......... خبر و كلمتين .
.
في كاليفورنيا
تم إجلاء حوالي 200 ألف شخص من منازلهم , عشان فيه ثقب حصل في قناة لتصريف الماء في
أحد السدود الموجوده هناك , اسمه سد أوروفيل , السلطات أجلت السكان أو طلبت منهم مغادرة
منازلهم عشان فيه احتماليه لانهيار قناة تصريف المايه دي و بالتالي الدنيا هتغرق حواليها
............. كده خلص الخبر .
.
ايه الكلمتين بقى
؟ .
1 - هي ازاي أمريكا
تعمل قناة لتصريف الماء و يحصل فيها تأكل و ثقب و احتمالية انهيار ؟ ممممممممم عشان
ده عادي يا حبيبي , عادي على مستوى الأفراد و الحكومات و الدول , دراسات الجدوى بتتعمل
بشكل علمي و عملي و بيتعمل فيها حساب كذا و كذا و كذا , لكن طبيعة الأشياء بتقول ان
الحكومات و الشركات مش بيبقو ( مغسلين و ضامنين جنه ) , و بالتالي بيبقى وارد جدا بعد
فتره ( كذا سنه مثلا ) يحصل حاجه مفاجأه حتى قبل نهاية العمر الافتراضي للمشروع ( بحسب
الدراسات ) , و المفروض تتعامل مع الحدث المفاجئ و تتصرف على انه حالة طوارئ , مش حالة
فشل في تنفيذ المشروع او التخطيط له ......... دي اسمها لا مؤاخذه الفزلكه العبيطه
.
.
2- السلطات بتاعة
الدوله بتقوم بعملية إجلاء أو بتنصح بيها , يقوم المواطن يعمل ايه بقى ؟ ممممممممم
يستجيب , ببساطه شديده يستجيب , يعني مايقولشي لا , و لا يتفزلك , و اوعى ايدك كده
ملخت الكُم , و اتصرفي يا حكومه , و انا مش هسيب بيتي ابدا , و يسقط يسقط حكم كاليفورنيا
؟ لا خالص , بيستجيب , ليه يستجيب ؟ عشان المواطن اجمالا مش في حالة حرب مع حكومته
و المواطن العاقل مش بيتخيل ان الحكومه دي بتبقى قاعده تفكر ليل و نهار ازاي تزعجه
و تقرفه في عيشته , طالما فيه خطر عليك أو خطر عالدوله و أمنها القومي يبقى من حق الدوله
تفكر في عملية اجلاء , و مفترض بالمواطن يقول حاضر و أمين , ده المواطن العاقل البني
أدم , أما الكولجيه و الخرفان بقى فدول ربنا يشفيهم أو ياخدهم أو كلاهما معا .
...............................................................................................................................
Mohamed
Hussein
13
فبراير 2017·
قولي حضرتك , أصل
انا لسه متجوز جديد , اعمل ايه في الفالانتاين داي ؟ .
- مممممممم خليها
بتتكلم في أي موضوع عادي و قرب منها و قول لها بحبك .
.
أقولها بحبك بس
؟ يعني ماشتريش هديه و أكلف نفسي فلوس أد كده ؟
- لا مش ضروري
الهديه الغاليه لو مش معاك فلوس , ممكن ورده حمره , تكفي جدا و مش هتكلفك 10 جنيه
, المعنى يا صديقي هو الأهم .
.
تصدق صح , فكره
حلوه أوي , هشتري ورده و اقولها بحبك , بس يارب مراتي ماتعرف ولا تشوف الورده .
- غور ياض من هنا
, عن ابو شكلك
...............................................................................................................................
Mohamed
Hussein
12
فبراير 2017·
في قضية الرشوة
بتاعة مدير مشتريات مجلس الدوله , خد عندك يا سيدي , تسجيلات صوتيه و طلب مبالغ طائله
و تزوير محاضر استلام لأثاث ( ماتمش تسليمه أصلا ) و كمان رشاوي جنسيه ( أيوه هو اللي
جه في دماغك ده ) , يعني حاجه على كيف كيفك , فلوس و دلع , و تلاقي معالي المستشار
( اللبّان ) كان بيعمل عُمره كل سنه و مش بعيد يكون بيدبح عجلين في العيد الكبير و
يعمل موائد رحمن في رمضان ( أتاريهم بيعزمونا على حسابنا , على راي الله يرحمه جلال
عامر )
.
إنما حكاية تزوير
محاضر استلام أثاث ( لم يتم تسليمه ) دي بتفكرني بنكته سمعتها زمان , بيقولك مره موظف
مصري فاسد راح يزور موظف عراقي فاسد في الفيلا بتاعته , الموظف المصري سأل الموظف العراقي
اللي هو صاحبه و قاله انت جبت فلوس الفيلا دي منين , دانت مرتبك عالقد ؟ قام الموظف
العراقي فتح شباك من الفيلا و قال للمصري شايف الكوبري اللي هناك ده ؟ قاله اه شايفه
, قاله طيب الفيلا دي بقى اشتريتها بشوية فلوس كانو باقيين من ميزانية الكوبري .
.
و تدور السنين
و يروح الموظف العراقي يزور الموظف المصري في بيته , يلاقيه قصر كبير و يسأله جبت الفلوس
بتاعة القصر منين دانت موظف على قد حالك ؟ يقوم الموظف المصري يفتح شباك في القصر و
يشاور للعراقي و يقوله , شايف الكوبري اللي هناك ده ؟ يقوم العراقي يقوله : لا انا
مش شايف كباري خالص , يقوله المصري طيب , اهو القصر ده اتعمل بفلوس الكوبري اللي انت
مش شايفه .
..........................................................................................................................
Mohamed
Hussein
12
فبراير 2017·
أنا من البلد اللي
مره زمان كان فيها ولد و بنت غلابه صغيرين بيدورو و يلفّو في القرى , ينشدو في الموالد
و الأفراح , البنت الصغيره قابلت الولد الصغير بالصدفه على محطة قطر و سألته انت صوتك
حلو ؟ طب السمّيعه بيقولو عليك ايه ؟ قال لها السميّعه اللي شوفتهم مابيعرفوش يسمعو
!! , الولد كبر و بقى اسمه رياض السنباطي و البنت كبرت و بقى اسمها ام كلثوم .
...................................................................................................................
Mohamed
Hussein
12
فبراير 2017·
عن الإعلام أبو
تلاته تعريفه , و الإعلاميين اللي أخرهم يشتغلو في طابونة عيش .
.
شوية عيال صيع
في قريه من قرى مصر جابو عيل و ربطو رقبته بحبل و سحبوه و هما ماشيين في القريه و صوروه
فيديو !! .
.
فين الحدث بقى
؟ ايه اهمية الحدث ؟ فين الخبر يعني ؟ اهو اللي فوق ده بقى خبر و بقى حدث بيتصدر برامج
التوك ( شوز ) و المواقع الاخباريه الكبيره , و معنا على الهاتف عم الواد الفلاني اللي
كان مربوط بالحبل , هذا و قد صرح واحد من العيال الصيع اللي عملو كده بكذا , خبر عاجل
, القبض عالعيال الصيع اللي ربطو الواد من رقبته و مشيو بيه في الشارع .
.
بالمناسبه , الحكايه
العبيطه دي حصلت النهارده في القريه اللي لازقه في قريتي اللي اتربيت و عيشت فيها
, يعني قريه اعرفها و اعرف الناس اللي فيها , و الحدوته العبيطه أصلها عباره عن شوية
شباب عواطليه مش متعلمين بيروحو في الأفراح و يتخانقو , عنفوان الشباب بقى يا مولانا
, و كل فرح يروح شوية عيال من هنا يشبطو في شوية عيال من هنا , و قوم ايه ؟ قوم العيال
اللي من هنا استحلفو لعيل من هنا و ربطوه بحبل و مشيو بيه في الشارع , اه و عهد الله
, لا ده حدث كبير فعلا , حدث ما يتفوتش , ده حدث لا يقل أهمية عن انهيار الإتحاد السوفيتي
و قيام الحرب العالميه التانيه و سفر أم كلثوم للغناء في باريس و اكتشاف مقبرة توت
عنخ أمون .
.
الساده الأفاضل
الصيع الإعلاميين المصريين , يا ولاد الكلب يا أفاضل انتو , انتو عايزين ايه من مرارتي
بالظبط ؟ اتعلمتو ايه في حياتكو ؟ بيتم اختياركو ازاي؟ طب امتى بقى ناويين تتألقو و
تشوفو دكر بط و هو ( بيكسّر ) بطه في أي قريه عندنا في السنبلاوين و تعملو حوار صحفي
مع دكر البط و أي حد من عيلة البطه المسكينه باعتبار انه حدث تاريخي يافندم ؟! .
...................................................................................................................
Mohamed
Hussein
11
February at 22:04 ·
من المؤكد ان موضوع
تنحي مبارك و تسليم السلطه للمجلس الأعلى للقوات المسلحه و من بعده تقديم مبارك للمحاكمه
و عدم هروبه , و بعد كده اختفاء شخصيات من المشهد زي سامي عنان , من المؤكد ان الفتره
مابعد يناير 2011 كان فيها كواليس كتير , و أحداث مانعرفهاش , إنما أسوأ حاجه ظهرت
فينا بعد التاريخ ده هي اعتقاد كل واحد فينا انه لازم يعرف كل حاجه عن كل حاجه , بما
فيها خبايا الحكم و كواليس الدوله و الأمن القومي ( مع إننا و عزة جلال الله نادرا
ما بنجرؤ على تغيير جلدة الحنفيه لما تكون بتنقّط و بنقف قدامها عاجزين و نقول لازم
نجيب سبّاك يعني حد متخصص ) .
.
الحكايه دي ملهاش
غير تفسير واحد اسمه سوء الإستخدام abuse
, سوء استخدام حتى للمفاهيم البسيطه زي مفاهيم المواطنه و الحريه و علاقة المواطن بحكومته
و دولته , عشان كده التحول حصل بنسبة 180 درجة , يعني من أقصى إلى أقصى , من أقصى درجات
الخوف و الجبن و الكبت و التهميش لأقصى درجات التشويه و البلطجه حتى البلطجه الفكريه
.
.
ايه اللي حصل في
ال 6 سنين ؟ و ازاي عدينا من مرحلة جايز تكون هي الأخطر في تاريخ مصر الحديث ؟ و ايه
اللي كان بيدور في الكواليس ؟ ماعرفش ( ولا مطلوب من المواطن انه يعرف ) , إنما اعتقادي
إن البلد دي فيها جهات كانت صاحيه مابتنامشي , و اتعاملت مع الموقف كله بطريقة هيكتور
كوبر مدرب المنتخب المصري , بلعب على اد امكانياتي و عارف امكانيات اللاعيبه بتوعي
و ان المنافسين أقوى و إن الماتش مش سهل , بس بعرف في النهاية أكسب , مش هتاخد مني
كوره حلوه و ممتعه بس خليك فاكر دايما إن النتيجه أهم .
...............................................................................................................................
Mohamed
Hussein
11
فبراير 2017·
بعد أكتر من
13 سنه من بداية الديموقراطيه ( الأمريكاني ) في العراق , الدوله الحضاريه العريقه
اللي عمرها ألاف السنين , عشرات القتلى و الجرحى في مظاهرات في ساحة التحرير , أنصار
مقتدى الصدر و أنصار معرفشي مين و شرطه تبع مين , و انفجارات كل كام يوم , القوات التركيه
بتعمل ايه في الموصل ؟ مين بيحكم العراق ؟ إيران ولا تركيا و لا أمريكا و لا بريطانيا
و لّا و لّا ؟ مين مع مين و مين بينام في حضن مين ؟ جيش كان له شنه ورنه و ترتيب عالمي
راقي بقى بح , بقى بلح , و ساسه و قادة بقى أخر ما عندهم و أقصى حاجه يقدرو عليها إنهم
يشجبو تدخل القوات بتاعة الدوله الفلانيه في أراضيهم و يرحبو بتدخل القوات بتاعة الدوله
العلانيه , أه و الله بيشجبو من هنا و يرحّبو من هنا .
.
أهلا بكم في كتاب
الديموقراطيه الأمريكاني , من الجلده للجلده , و بما أن النهارده هو ذكرى تنحي مبارك
يبقى لازم أقول , تعظيم سلام لجيش مصر العظيم .
.............................................................................................................................
Mohamed
Hussein
10
فبراير 2017·
لسه شايف فيديو
حالا لمدير المخابرات الحربيه المصريه في ندوة تثقيفيه ( الفيديو في أول تعليق ) ,
لو سمحت اسمع و ركز عشان يوصلك شعوري اللي وصلت له في الأخر .
.
الراجل بيتكلم
بصوت قوي و مخارج ألفاظ واضحه و أرقام و ترتيب و تنظيم ( طبع الجيش المصري ) , يعني
ايه إرهاب في سينا ؟ و ايه علاقتة بالدول الي حوالينا ؟ و مين بيموله و شكل التسليح
, يعني ايه أنفاق و الفلوس بتيجي منين و التعامل بيكون إزاي , و البنيه التحتيه للإرهابيين
و الدعم اللوجستي و حجم المواد المتفجره و طريقة دخولها , و ايه دخل شركات الصرافه
اللي بيمتلكها عناصر من الجماعات الإرهابيه , باختصار الصوره الكامله الشامله للمعركه
اللي بتخوضها و تنتصر فيها مصر في أخر 3 سنين .
.
شعوري و شعور أي
حد عاقل أو بني ادم بعد ما يشوف و يسمع الفيديو إنه يتخيل نفسه ماسك عربية روبابيكيا
( اللي بتتجر بالإيد ) و بدل ما يحط فيها غساله مصديه و تلاجه واكلاها البارومه و طشت
نحاس مخروم , يحط فيها البرادعي على الأسواني على حجي على سي الأستاذ باسم على لا مؤاخذه
يسري فوده , أتاري ان الاوطان ماينفعشي يقودها أو يحكمها شوية شواذ يعني ( خواجات
) , لا مايحكمشي , يا قطه ( بصوت العظيم عادل أدهم ) .
...........................................................................................................................
ليست هناك تعليقات:
إرسال تعليق