Mohamed
Hussein
2
فبراير 2017·
المرض النفسي و
الكوله اللي لحست عقول شباب كتير تخلّي واحد مثلا يشوف فرحة الشعب المصري بالفوز و
الانتصارات و حلم البطوله يقوم ( يجترّ ) بقى شويه كلام و شعارات من نوعية الناس مش
لاقيه تاكل و الفقير و الدولار و التعليم و الصحه و كاني و ماني و دكان الزلباني .
.
الشباب دول بيصعبو
عليا بجد , ضحايا البرادعي , اللي بقاله 3 سنين بيرضّعهم يأس و يشرّبهم إحباط و يعمل
لهم الإكتئاب ساندوتشات , و يفهّمهم ان الحل الناجز و العبقري و المعجز إننا نروح نحفر
حفره و ندفن نفسنا فيها بالحيا , يعني منهجهم الفكري اسمه : ( هات صبّاره و ادفني يا
ببلاوي ) .
.................................................................................................................
Mohamed
Hussein
2
فبراير 2017·
لو كنت رئيس مصر
و فوزنا بكاس أفريقيا ده و في الظروف دي كنت أصدرت قرار جمهوري و فرمان رئاسي بمنح
عصام الحضري قلادة النيل و جايزة الدوله التقديريه و التشجيعيه و كتبت له نص دمياط
بإسمه بيع و شرا و سجلتها في الشهر العقاري , و لو الحضري طلب إنه يحكم مصر مكاني اتنين
و خميس معنديش مانع .
...................................................................................................................
Mohamed
Hussein
1
فبراير 2017·
..42
دعوى قضائيه في ظرف كام يوم , و ألف دبلوماسي أمريكي وقّعو على مذكره ضد ترامب لرفض
قراره بتاع حظر السفر , واضح ان الحرب العالميه اللي جايه هتبقى بين أمريكا و أمريكا
, و طبعا روسيا اللي هتفوز .
.
يعني الأمريكان
و المؤسسات الأمريكيه هيخلّصو على بعض ؟ وائل و سحر هيخلّصو على بعضيهم ؟ , والنبي
دي تبقى ليله يا عمدة , و نبلّ الشربات , و نطلع بقى نقول : سوف ندرّس انهيار الولايات
المتحده لأطفالنا في المدارس , لقد أذهلتم العالم بانهياركم الرائع أيها الأمريكان
.
.
و نعمل كمان مؤسسه
عندنا شبيهه كده بمؤسسة نوبل و نسميها مؤسسة نوفل , و ندّي جايزة نوفل للسلام للمناضله
الرائعه الشابه هيلاري كلينتون , و السنه اللي بعدها ندّيها لجون كيري ( مناصفةً مع
الكلب بتاعه أو مع وائل غنيم ) .
................................................................................................................................
Mohamed
Hussein
31
يناير 2017·
هحكي لكو حاجه
بجد .............. هي مصر دولة غنيه ولا فقيره ؟!
.
لما كنت عايش في
السعوديه ( 12 سنه تقريبا ) , طبعا كانت العيشه زي الفل , مولات و فسح و فلوس كتير
, ماكنتش عايش على مرتبي بس , كنت داخل في مشاريع صغيره مع عرب و هنود و عامل فيها
راجل أعمال على صغير كده , أصلا الدخل القومي بتاعي هناك كان حماده و لما رجعت بقى
الدخل القومي بتاعي عباره عن : حماده ماشي بلبوص .
.
أول ما رجعت من
السعوديه اتفقت مع مراتي ان مصروف البيت يكون 3 ألاف في الشهر ( غير مصروف المدارس
و المصايف إن وُجدت !! ) , بعد كام شهر بدأت مراتي تشتكي بالتلميح و التصريح , إن
3 ألاف مش مكفيين , و انا على كلمة واحده , هما 3 ألاف مفيش غيرهم .
.
من كام شهر و بعد
تعويم الجنيه زادت الأسعار , أغلب الحاجات زادت لأكتر من الضعف , طب انا زودت مصروف
البيت ؟ لا طبعا , هزود منين ؟, مانا دخلي هو هو و مليش عم مات في البرازيل و ورثته
, يعني 3 ألاف ؟ أه 3 ألاف , طب ازاي بقى ؟ والله يا عم ماعرف , إنما الست المصريه
اجمالا بتعرف تتصرف , تقلل في الكميات , تجيب أنواع أرخص من الأنواع اللي كانت بتجيبها
, تمنع البت لمار بنتي من الشوكلاته الكيندر جوي اللي على شكل بيضه , كده يعني , و
ربك هو اللي بيمشيها .
.
ممممممممم ماتيجي
نعمل فيها ثوار و أبطال و مناضلين و نلعن جدود أبو الحكومه 7 مرات في اليوم , و نقول
هاتي لنا فلوس يا حكومه , و نزلي الأسعار يا حكومه و ادعمي كل حاجه يا حكومه و اتصرفي
يا حكومه و تعالي دلّكي لي عضلة السمانه يا حكومه , دي أسهل حاجه و الله ممكن تتعمل
و عندي شوية شعارات لوز , هتعجبك أوي .
.
أو تيجي نفكر بالعقل
و بهدوء , هي مصر دولة غنيه ولا فقيره ؟ الإجابه , بسم الله الرحمن الرحيم , مصر دوله
غنيه بصفه عامه و فقيره كوضع مؤقت , ازاي يعني ؟ يعني لو فكرت في امكانيات الدوله هتلاقيها
كتير أوي , المفروض يعني , سياحه و أرض خصبه و موقع جغرافي و تلت أثار العالم و قناة
سويس و عاملين بالخارج , و زراعة و خلافه , ده اللي بيجيب فلوس أو المفروض انه بيجيب
فلوس , تعالى بقى عالناحيه التانيه كده , 92 مليون بني ادم , و بنيه تحتيه متهالكه
, و دعم لكل قطاعات الدوله تقريبا بما فيها الكهربا و المترو و السكه الحديد ( اللي
المفروض يصرفو على نفسهم ) و منظومة فساد ( بدأنا في الحرب ضدها ) و السياحه انضربت
بفعل فاعل , و العاملين بالخارج طار ربعهم ( بتوع ليبيا و كتير من العاملين بالخليج
) .
.
يعني ايه الكلام
اللي فوق ده ؟ يعني قبولي بمرحلة ربط الحزام دي مش تطبيل ولا تعر*يص ولا الهبل ده كله
, ماهو عبد الفتاح السيسي مش أغلى عندي من بناتي , إنما هو شعور و إدراك إنها مرحلة
صعبه على الكل , مضطرين لها , و كان فيه بدايل بس ماتنفعش , يعني مش اختيار , هقولك
على حاجتين كانو كفيلين اننا نفضل بأسعار زمان و الدولار ب 7 جنيه و العيشه تبقى عنب
.
.
1- كنت تشارك مع
محور الشيطان في تدمير سوريا , حضرتك مش متخيل حجم المليارات اللي كان ممكن تاخدها
في القصه دي , و كان ممكن كمان وقتها تساوم على اسقاط جزء كبير من ديونك , بس احنا
لأ .
.
2- عبد الفتاح
السيسي صرف 400 مليار جنيه في سنتين على منظومة الكهربا لحد ما عمل لها بنيه تحتيه
و أحياها من أول و جديد , كان ممكن والله نوفر ال 400 مليار دي و نعيش بكهربا كام ساعه
في اليوم و كانت الدنيا ماشيه , متخيل الرقم ده لو راح لدعم السلع و الوقود و خلافه
كانت هتبقى الأسعار عامله ازاي ؟.
.
عايز أقول لأصدقائنا
المخابيل باختصار , الشعارات الحنجوريه مفيش أسهل منها , و التفكير و انت مدلدل رجليك
في ماية الترعه ده شئ جميل , إنما الصعب هو انك تفكر بالعقل و بحسبة ورقه و قلم و تلتزم
الصمت ( و الصبر ) بعدها , أقصد يعني تبقى طبّال زي حالاتي كده .
..........................................................................................................................
Mohamed
Hussein
31
يناير 2017·
عندي شوية كولجيه
قراريين لسه موجودين في الأصدقاء , بواقي من أيام ما كنت ضليع في شم الكوله في
2011 , المهم انهم بيختفو تماما من التايم لاين و تقريبا في الوقت ده بيقضوها بوستات
فلسفيه عميقه و مقولات شهيره و صور الراجل اللي بيطلع دخانه من ودانه و جمجمته مفتوحه
و طالع منها حجر معسل أو مشبكين غسيل ( أي حاجه يعني تدل عالعمق و كده ) , و بييجي
عليهم لحظه و يظهرو و يبانو على حقيقتهم و تظهر بوستاتهم إياها و نواياهم و المعجنه
اللي في عقولهم .
.
لما بيظهرو بقى
بيظهرو مع بعض , في نفس الوقت واللحظه و بيبقو شبه قطيع شارد من طيور البطريق , ماشيين
ياخويا في التايم لاين يعملو كده و كده عند ست أم شوشو جارتنا , و مشكلتي اني بحب شوربة
البطريق و غاويها , عشان كده في اللحظه دي بقفش منهم بطاريق على أد ما بقدر , و مفيش
أسهل من طريقة تحضير شوربة البطريق يا لينا .
.................................................................................................................................
Mohamed
Hussein
30
يناير 2017·
الهجوم على مسجد
في كندا و قتل 6 مصلين !! .
.
ده اسمه ايه ؟
اسمه عمل ارهابي جبان , طب و الهجوم على الكاتدرائيه كان ايه ؟ كان عمل ارهابي جبان
برضه , ليه بقى ؟ عشان المسلم اللي بيصلي في الجامع هو بالظبط المسيحي اللي بيصلي في
الكنيسه , لهم نفس الإسم و نفس الصفه , إنسان مسالم بيصلي في دار عباده
.
اللي مش بيعرف
يساوي بين الحدثين , او بيعترض و يشجب حدث منهم و يفرح و يشمت في التاني هو بالتأكيد
حد عنده مشكله في قواه العقليه , او بمعنى أصح حد عايش عاله على كوكب الأرض و متسجل
اسمه غلط في كشوفات البني أدمين .
..........................................................................................................................
Mohamed
Hussein
30
يناير 2017·
في وسط البلد و
الدقي و بين السرايات و عين شمس و النعام و شبرا و الوايلي و المنصوره و اسيوط و اسكندريه
و واشنطن و طوكيو و كفر صقر و لندن و جوهانسبرج و التل الكبير و الرياض و أهناسيا و
دبي و عين الصيره , و في كل مدينة و حي في العالم , هتلاقي الدنيا هس سكوت , و فجأه
صوت عالي و هتاف و أفراح و زغاريط و علم مصر بيترفع و بيوت بتتهز و ناس بتصحى من النوم
, ولو فيه شوية بواقي كوله أو شوية برسيم بينداسو تحت الرجلين .
.
الحكايه مش ماتش
كوره و 3 نقط و بطوله و كاس , الحكايه حب و غيره و انتماء , احنا مش زي أي حد , لا
في حبنا للبلد دي ولا انتمائنا حتى لو مش لاقيين ناكل , و الفرحه العارمه و الدموع
و الزغاريط بيقولو لمحور الشر , خطتكو فشلت يا شوية بهايم , هويتنا دي جينات محفوره
على حجاره عمرها ألاف السنين , مش كلمتين مكتوبين على المايه .
.........................................................................................................................
Mohamed
Hussein
29
يناير 2017·
حدوتة خالد يوسف
........ بهدوء شديد , و بعيد عن الهرتله و الهري و صناعة أبطال من شواشي الدره .
.
- خالد يوسف عضو
البرلمان المصري كان مسافر فرنسا لمراته , و في التفتيش لقو معاه 10 شرايط زاناكس
, يعني 100 قرص .
.
- الزاناكس دوا
مهدئ و منوم , و الكميه دي مش كميه ولا حاجه , عشان اللي بيتعود عليه ممكن ال 10 شرايط
يكفوه شهرين مش اكتر , يعني الحكايه مش اتجار ولا ادمان بالمعنى المشين , إنما مراته
اتعودت تنام بمنوم , اللي هو الزاناكس , كانت بتنام بقرص و بعدين قرصين و هكذا .
.
- الزناكس بيختلف
تماما قدام القانون عن الترامادول مثلا , الترامادول بيتعامل معاملة الحشيش و الهيروين
, القانون اللي بيقول كده , و ده برضه مش معناه ان اللي بيستخدم الترامادول ده بالضروره
عيل صايع شمام أو تاجر مخدرات , لا فيه ناس كتير محترمين بيستخدموه إما كمسكن قوي جدا
للألم ( و له استخدام رجالي تاني ) , دي معلومه عالهامش تخص المستشار اللي انتحر في
مجلس الدوله , يعني القصه مفهاش تشويه ولا حاجه .
.
- المهم عايز أقول
ايه , ان الموضوع كله فستك , رجالة الأمن ببساطه بيشوفو شغلهم , لا غرضهم تشويه خالد
يوسف ولا أي حاجه , الزاناكس عشان يسافر لازم له روشته مختومه و وضع قانوني معين و
تنوه عن وجوده , و خالد يوسف اتعامل زي أي حد , و ده اللي يهمني في الموضوع و اللي
فرحني , إننا نخلص بقى من حكاية حصانة عضو البرلمان اللي كان بيستخدمها ناس كتير زمان
في تجارة المخدرات و الممنوعات و التهرب الجمركي و خلافه , و تبقى حصانة عضو البرلمان
داخل المجلس الموقر فقط , حصانه في انه يعترض و ينتقد أداء الحكومه و الوزرا و الرئيس
.
.
- القصه بتاعة
خالد يوسف يفترض انها حدث يومي بيحصل و بيتكرر باستمرار في المطارات و التعامل معاها
بيكون على حد علمي بتحقيق سريع من اجهزة الأمن داخل المطار و الموضوع بينتهي غالبا
انه بيتصادر المنوم اللي معاه او بيجيب روشته مختومه و تقرير بالحاله على ما اعتقد
و يسافر عادي , و بس كده .
.
- يعني لا رئيس
الوزرا حاطط خالد يوسف في دماغه و عايز يشوهه , ولا السيسي حط له الزاناكس في شنطته
عشان يلبسه في الحيطه , ولا خالد يوسف كده يبقى تاجر مخدرات أو عيل صايع و شمام .
...........................................................................................................................
Mohamed
Hussein
29
يناير 2017·
شوفت فيديو لشاب
سوداني ملثم و لذيذ أوي , بيهدد باحتلال القاهره في 72 ساعه بالبندقيه و الجلابيه
!! , و مستنى بس الإشاره من عمر البشير .
.
الحقيقه السودانيين
اتعاملت معاهم كتير , كلهم ناس طيبين وفي حالهم , هاديين جدا و مبتسمين دايما , أما
عن الإمكانيات العسكريه و كده , فدايما بفتكر موقفين مش بيروحو من بالي .
.
الموقف الأول
, أيام محاولة اغتيال مبارك في أديس أبابا , واللي كان متورط فيها سودانيين , و في
مؤتمر صحفي بعدها سألو مبارك قالو له ياريس السودان بتهددنا بشن حرب , ابتسم و قالهم
السودان عندهم طيارتين و 3 دبابات !! . ( عالهامش , في محاولة الاغتيال نفسها لما سألو
مبارك حصل ايه ؟ قال لهم اطلاق نار من قناصه فوق سطح عماره و بعدين قلت للسواق يلف
العربيه , و في اللحظه اللي السواق كان بيلف العربيه فيها الحارس الشخصي بتاعي جاب
القناص اللي فوق العماره , اه عندنا أفراد حراسات خاصه بيعرفو يجيبو القناص من فوق
سطح عماره و هما راكبين عربيه بتلف 180 درجه بسرعتها .
.
الموقف التاني
, كان من سنه تقريبا , لما الطيران الصهيوني عمل غاره على مصنع للكيماويات في السودان
, و قتها طلع وزير الدفاع السوداني و قال بالنص : الطيار الصهيوني كان طافي النور بتاع
الطياره عشان كده الرادار ماشافهوش !! .
.
لكل أهلنا و أشقائنا
في السودان , انتو على راسنا و الله , و العلاقات التاريخيه بين البلدين لايمكن تكون
حاجه عالهامش و السودان دايما هي العمق الاستراتيجي لمصر و البوابه الخلفيه , غير كده
نقطه , و نقطه يعني فلستوب .
.
مصر عسكريا بتلعب
في الليفل بتاع ألمانيا و فرنسا و تركيا و إيران و اسرائيل , مش في الليفل بتاع بوركينافاسو
و جزر القمر و كوم الشؤاف .
........................................................................................................................
Mohamed
Hussein
28
يناير 2017·
الست الطيبه اللي
السيسي وقّف موكبه عشان يسمع شكوتها بهدوء و ابتسامه , الحكايه دي مستحيل تكون مترتبه
, اللي هيشوف الفيديو هيعرف , و في الأخر قالت له ربنا يرعاك و يحفظك ( أحلى دعوه ممكن
يسمعها السيسي أو يسمعها أي بني ادم ) , هما الناس الغلابه الطيبين كده , بيفوتو في
الحديد مابيخافوش , على طريقة ( يا روح ما بعدك روح ) , شكوتهم بتبقى تلقائيه من القلب
, و دعوتهم كمان من القلب , هما دول بقى ملح الأرض و عمود الخيمه .
..........................................................................................................................
Mohamed
Hussein
28
يناير 2017·
عن عقول الشباب
لما تبقى كوره شراب في رجل الأنطاع و الخونه .
.
من ضمن الحاجات
اللذيذه أوي اللي حصلت بعد 2011 إنه في جولة الاعاده في الإنتخابات الرئاسيه 2012
, كان تركيز الأنطاع و الخونه و ما يسمى بالنخبه اللامؤاخذه المثقفه و كده , كانو مركزين
أوي على إن أحمد شفيق ده فلول , أه فلول , لا مش عسكر قالو فلول , طب ليه مش عسكر ؟
هو احمد شفيق كان دكتور عيون مثلا أو مهندس ديكور ؟ لا أحمد شفيق كان راجل عسكري ,
طب ليه مقالوش عسكر بقى ؟! .
.
عشان في التوقيت
ده كان بيتردد بين الشباب ان الجيش حمى الثوره و حمى الميدان , و بالتالي كلمة عسكر
مش هيكون لها صدى ايجابي , يبقى نلعب على حكاية انه فلول , مع ان احمد شفيق الوحيد
في نظام مبارك اللي كان له شعبيه و قبول و احترام حتى وسط الثوار و قرار تعيينه رئيس
وزرا لقى استحسان الجميع , بس برضه نلعب على حكاية انه فلول , و كمان ماينفعش نقول
عسكر عشان احنا محتاجين الجيش يسند نظام حكمنا اللي جاي جاي بالذوق أو بالعافيه ( اللي
هو نظام حكم الإخوان ) و طنطاوي مفيش خوف منه , ده راجل ( كركوبه ) و مطيع و كيوت
( هما كانو فاهمين كده ) , و لما نوصل للسلطه نبقى نمشيه عادي و نجيب واحد من رجالتنا
( هع هع هع هع ) .
.
و لما عملنا بقى
ثورة 30 يونيو , اتنست كلمة فلول و اختفت , و التعليمات جت بكلمة عسكر , ليه عسكر ؟
عشان مخطط حلف الشيطان بسيطرة الجماعه الإرهابيه فشل و طنطاوي ماطلعشي ( كركوبه ) و
السيسي ماطلعشي من رجالتهم , و الشعب ده ماطلعشي داقق عصافير على دراعه , و بالتالي
أصبحت الخطه ( ب ) البديله هي الحل .
.
محاولة بائسه لكسر
جيش مصر , قول يابني عسكر و انقلاب عسكري , قول كمان , و هات العسكر من أيام عبد الناصر
, و عيط و اتشحتف على أيام الملكيه ( اللي هي أيام الإحتلال ) , و اعمل أغاني عن كاريتة
الملك فاروق , قول عسكر تاني , و اشتم الجيش و قياداته , و قول عبد الناصر خربها ,
و قول جينرالات البيزنس و قول مصر اتهزمت في 73 , قول كتير , لعل و عسى نعرف نكسر الجيش
بتاعكو ده و الجماعه الإرهابيه تحكم مصر وتعمل ميليشيات مسلحه و انشقاق في الجيش و
تحصل حرب اهليه و نقعد احنا بقى في غرفه مكيفه في سويسرا نتناقش في المستقبل السياسي
لبلدكو و خطة تقسيم مصر , و نعمل لكو دستور جديد , بالأمريكاني أو بالروسي , انتو و
نصيبكو وقتها .
.
عزيزي الشاب الثائر
اللي سمح لدماغه تبقى كوره شراب لمدة سنين , انت مش انت و انت ماشي ورا يسري فوده و
بلال فضل و قناة الخنزيره , مفيش بند في كتاب الثورات بيقول انك تسمح لعقلك يبقى كوره
شراب في رجول الأنطاع و تجار الخراب , يبقى انت ماكنتش ثائر ولا حاجه , انت كنت هايج
بس , يعني حمار حساوي , و الحمير يا عزيزي لا يدخلون الجنه , الحمير لا يدخلون جنة
الديموقراطيه والحريه و المساواه و التقدم , الحمير يدخلون مخيمات اللاجئين .
....................................................................................................................
Mohamed
Hussein
27
يناير 2017·
مش قعدت تقول لما
الشتا يدق البيبان ؟! أهو دق يا خويا , بس الدقه جت و رشقت , صوابع رجلي مش لاقيها
مع اني شايفها قدامي اهي , حاسس ان ال 10 صوابع دول مش بتوعي , أقسم بالله ما ولادي
, لا واصل لهم دم ولا مايه ولا نور ولا إرسال ولا استقبال , ولا حتى لاقطين شبكة واي
فاي يعملو بيها أي منظر .
.................................................................................................................
Mohamed
Hussein
27
يناير 2017·
من فتره كده ,
قبل مؤتمر الشباب اللي فات كنت اتمنيت و اقترحت إن المؤتمر يتعمل كل مره في بلد , يلف
ربوع مصر يعني , من شمالها لجنوبها لشرقها لغربها , مش بس ترويج للسياحه إنما كمان
تعريف للمصريين ببلدهم ( أغلبنا مايعرفشي حاجه عن مصر و جمالها و تنوعها ) , مع فيلم
تسجيلي كل مره عن البلد اللي فيها المؤتمر و طبيعتها و أهلها و ناسها و عاداتها و خلافه
.
.
الريس النهارده
على صفحته و هو في أسوان بيقول إن المؤتمر الجاي هيبقى في وجه بحري , و التصريحات بتقول
إنه هيلف محافظات مصر و يقابل الشباب , يعني زي الاقتراح و الأمنيه بتاعتي , ممممممممممم
واضح ان عبد الفتاح السيسي بيراقبني شخصيا , اعترف ياريس اعترف , و النبي تلاقيك عاملي
فولو و مش بتعمل لايك ولا كومنت .
...........................................................................................................................
Mohamed
Hussein
27
يناير 2017·
السيسي في أسوان
قبل مؤتمر الشباب , ركب حنطور و اتحنطر في الشارع , و ركب مركب نيليه مكشوفه , الحكايه
دي 17 رساله في بعض , أهم رساله فيهم مش الإستقرار و لا دعم السياحه , إنما رساله بتقول
إن عندنا اجهزه أمنيه تقدر تأمّن رئيس الدوله في أي مكان و بتسمح له يختار أي وسيلة
مواصلات و أي حاجه تضرب في دماغه يعملها بمنتهى الحريه , و النبي ياريس لو عايز تعمل
المؤتمر ده في شرق ليبيا وسط الجبال و تعمل موكب خيول تتمشى بيه ساعة عصاري قبل المؤتمر
أو عايز تعمله في الساحل الشمالي و تركب بيتش باجي هيعرفو يأمّنوك برضه , الحمد لله
ان أجهزتنا الأمنيه مانكسرتش بعد 2011 .
.
فالله خيرٌ حافظا
و هو أرحم الراحمين .
..................................................................................................................
Mohamed
Hussein
27 يناير 2017·
عندي قناعه تامه
ان الفتره اللي فاتت دي مش هيحصل زيها تاني عندنا , لا اقتصاديا ولا أمنيا , كان امتحان
صعب جدا و نجحنا فيه , محدش بينجح في امتحان و بعدين يعيده , الإمتحان بيعيده الساقطين
الفاشلين .
.
و الأهم كمان و
المؤكد ان الأوطان بينطبق عليها القاعده أو المثل اللي بيقول : الضربه اللي مش هتموتني
هتقويني , يعني هنخرج من المعركه أقوى .
.
باقي بس إن الإمتحان
كله و ورقة الاسئله القذره ترجع للي كتبها و اللي شارك فيها , و السحر ينقلب على الساحر
, فصبرٌ جميل .
ليست هناك تعليقات:
إرسال تعليق