Mohamed
Hussein
10
نوفمبر 2016·
يا جدعان مفيش
داعي للإنكار , أنا في الشارع أهو و بأكد لكو الخبر من وسط الناس , الخبر صحيح طبعا
, الحكومه أعلنت حظر التجول و قفلت الفيس بوك .
..................................................................................................................
Mohamed
Hussein
10
نوفمبر 2016·
خبر : الرئيس الأمريكي
دونالد ترامب يتوجه إلى واشنطن لملاقاه أوباما .
.
أوباما : أهلا
أهلا , مبروك يا سيد الناس .
ترامب : الله يبارك
فيك يا حاج .
.
أوباما : اتفضل
يا سيدي , أدي العهده أهي .
ترامب : ايه دول
؟
.
أوباما : مفاتيح
الخزنه و فرخ الكربون , و ختم النسر , و الرقم السري بتاع اطلاق الرؤس النوويه , و
حساب الواد زغلول بتاع الكانتين .
ترامب : تمام تمام
, بس كده لسه باقي حاجتين يا معلم .
.
أوباما : ايه هما
؟
ترامب : أولا
, اللوحه بتاعة ( نراقب الأوضاع عن كثب ) عشان أحفظها كويس .
.
أوباما : أه صح
معاك حق , أهي , سوري كانت واقعه تحت المكتب , ايه الحاجه التانيه ؟.
ترامب : القطره
بتاعة العين اللي بنستخدمها لما نحس اننا متأثرين أوي و متشحتفين على ضحايا الهجمات
الإرهابيه مثلا .
.
أوباما : قصدك
القطره بتاعة عبله كامل في فيلم اللمبي ؟
ترامب : أيوه هي
دي .
.
أوباما : أهي كنت
ناسيها في جيب الجاكيت , و هتلاقي عندك كمان دفتر فيه أسماء كل عملائنا بتوع الثورات
و الربيع العربي و حقوق الانسان في الشرق الأوسط و كل تليفوناتهم و أسمائهم المستعاره
, البرادعي هتلاقيه مكتوب باسم ( رجل اللامؤاخذه الضمير ) .
ترامب : قشطه
, نهارنا لبن بإذن الله .
.
أوباما : حليب
قلبي من جوه .
.......................................................................................................................
Mohamed
Hussein
10
نوفمبر 2016·
خلاصه الكلام
, التوافق و التطابق العجيب اللي بيوصل لمستوى ( نسخة بالكربون ) بين الجماعه الإرهابيه
و بين قيادات و شباب و دباديب الثوره , التوافق ده بقى يشوفه حتى الأعمى .
.
لو فيه عربيه ماشيه
في طريق و فجأه وصلت لتقاطع طرق و بقى قدامها اختيارين , تدخل يمين ولّا تدخل شمال
؟ شوف رأي الجماعه الإرهابيه ايه ؟ لو قالو شمال , يبقى غمض عينك و اعرف ان ده كمان
رأي البرادعي و مصطفى النجار و يسري فوده و كل دباديب الثوره , يعني تقدر تكتب رأيهم
ده و تبصم عليه من غير ما تسألهم .
.
لو اشتريت فازه
جديده لشقه و كان قدامك اختيارين , تحطها على ترابيزة الأنتريه ولّا على الترابيزه
الصغيره اللي في الركن هناك دي , اسأل الجماعه الإرهابيه عن رأيها و متسألشي دباديب
الثوره عشان هيكون لهم بالتأكيد نفس الرأي .
.
التطابق و التوافق
و نسخة الكربون بقو في كل حاجه , حتى الحاجات اللي مالهاش أي تلاتين لازمه أو مش بتفرق
كتير بالنسبالنا .
.
من أيام الحمله
الانتخابيه الأمريكيه و الجماعه الإرهابيه بتأيد ستهم و تاج راسهم هيلاري كلينتون
, و انت مغمض هتلاقي ده موقف دباديب الثوره , و بعد النتيجه يطلع علينا الدبدوب الأعظم
بتويته , يتكلم فيها عن تصريحات ترامب المعاديه للإسلام و المسلمين !! , هنا و في اللحظه
دي بتعجز الشفايف عن التعبير و بتبقى محتاجه مساعده من المناخير , إسلام و مسلمين ؟
ده على أساس ان هيلاري كلينتون حاجّه بيت الله 400 مره و بتبيع سبح و سجاجيد صلاه قدام
سيدنا الحسين ؟ و لّا على أساس ان في ال 5 سنين اللي فاتو كانت ستك هيلاري كلينتون
معيّشه بلاد المسلمين في ساونا و جاكوزي مش في بحر دم ؟!! .
.
انا خلصت فيك كل
الكلام يا برادعي و صوتي اتنبح , انت راجل في أخر أيامك , اعتكف بقى و صلي ركعتين و
حاول تستغفر ربنا كتير , والله العظيم دي نصيحه لوجة الله , يعني مفيش داعي تدوّر على
شهر عسل جديد مع الجماعه الإرهابيه , مفيش داعي ل ( المرقعه السياسيه ) لحد أخر نفس
في حياتك , يا مولانا انت لا صحتك ولا لياقتك البدنيه بقو يسمحو بكده .
................................................................................................................
Mohamed
Hussein
9
نوفمبر 2016·
عبد الرحيم علي
: حملة ترامب أكدت لي أنه يرى السيسي ( مثله الأعلى ) !! .
.
أقسم بالله انا
عندي استعداد ( ب طولي كده ) أقف في وش ألف خروف و ألف كولجي ( بسفالتهم و قذارتهم
و انحطاطهم ) و مانكسرش , مفيش حاجه ممكن تكسرني أكتر من وجود أشكال زي عبد الرحيم
علي و أحمد موسى و مصطفى بكري و إنهم يكونو محسوبين علينا , يعني زي الأتب اللي شايلينه
على ضهرنا واحنا ماشيين .
.
الأشكال دي لو
فيه منها 10 بس بيأيدو امبراطور اليابان بنفس الطريقه كان زمان اليابان بتشحت عندنا
على باب السيده .
.
مرارتنا مابقتشي
مستحمله يا بني أدمين .
........................................................................................................................
Mohamed
Hussein
9
نوفمبر 2016·
بصو بقى , عشان
نبقى بنتكلم على أسس علميه ثابته و فهم و درايه , مش حقيقي إن أحلى حاجه في دونالد
ترامب هي سياساته الخارجيه و لا نظرته للشرق الأوسط , إنما الحقيقه بتقول إن أحلى حاجه
في دونالد ترامب مراته .
......................................................................................................................
Mohamed
Hussein
9
نوفمبر 2016·
باسم يوسف : مساء
الخير يافندم .
هيلاري كلينتون
( بانفعال ) : انت مين يابني ؟ .
.
باسم يوسف : حضرتك
أنا باسم يوسف .
هيلاري كلينتون
: سالم يونس مين ؟ أنا ماعرفش حد بالإسم ده .
.
باسم يوسف : يا
فندم أنا كنت شغال أراجوز في حملتك الإنتخابيه بقالي ييجي سنه .
هيلاري كلينتون
: أه قلت لي , و عايز ايه دلوأتي ؟ .
.
باسم يوسف : كان
ليا بقية أتعاب من شغلانه الأراجوز دي ماخدتهاش .
هيلاري كلينتون
: انت حمار يا حمار ؟ .
.
باسم يوسف : يافندم
ليا بقية فلوس و عايز أرجع مصر بقى .
هيلاري كلينتون
: ياض انا خسرت , انت مابتفهمش , فلوس ايه .
.
باسم يوسف : وانا
مالي يا خالتي , الشغل شغل , بيزنس إز بيزنس .
هيلاري كلينتون
: طيب أوك يا سمير , هدّيك بقية أتعابك , بس اعملي نوم العازب دلوأتي عشان مزاجي وحش
أوي , سو باد .
.
باسم يوسف : بس
كده ؟ أوامرك يا كبيره , أهو , أهو , أهو .
هيلاري ( مبتسمه
) : برافو يا سالم , انت أراجوز هايل , عدّي عالحسابات خد بقية فلوسك , بس قولي صحيح
, انت لما ترجع بلدك هتشتغل إيه ؟ .
.
باسم يوسف : و
دي محتاجه سؤال ؟ هشتغل بطل قومي و زعيم سياسي و أيقونه طبعا .
هيلاري كلينتون
: هو لسه فيه حمير في مصر بيمشو وراك ؟ .
.
باسم يوسف : يوووه
, كتير يا أبلتي .
هيلاري : هاهاهاها
, ماي جود بليس يو , ابقى سيب تليفونك مع السكرتاريه يا سمير غالبا هنحتاج لك .
.
باسم يوسف : حاضر
يافندم بس هتحتاجوني في ايه ؟ الإنتخابات خلصت خلاص .
هيلاري كلينتون
: بنت أختي اتجوزت واحد و طلع شمال مالوش في الستات .
.
باسم يوسف ( مقاطعا
) : أها
هيلاري كلينتون
: فاحنا فكرنا يعني عشان احنا عيله سياسيه كبيره و الكاميرات بتراقبنا و بدل الفضايح
و كده .
.
باسم يوسف : أيوه
فكرتو في ايه بقى ؟ .
هيلاري كلينتون
: فكرنا نجيب له الزباين لحد البيت , ولو حد من الصحفيين سألنا نقول لهم دول نشطاء
سياسيين و حقوقيين .
.................................................................................................................
Mohamed
Hussein
8
نوفمبر 2016·
إمتى بقى ييجي
علينا اليوم و نبطل صداع و هري في السياسه و الإقتصاد و الطيارات النفاثه و التقارير
و المقالات و الإشاعات و الحبشتكانات و نرجع تاني نتكلم عن الحب و الورد و شجر التوت
و شط الترعه و كوباية الشاي ساعة العصاري و صوت أم كلثوم و العروسه و الحصان اللي كنا
بنعملهم من الطين و احنا عيال صغيرين .
........................................................................................................................
Mohamed
Hussein
8
نوفمبر 2016·
صديق عزيز تقريبا
كان بيشرب سيجاره في البلكونه من 3 سنين و لسه يادوب مخلصها , فجاي بيقول إن من حقك
تأيد الرئيس و الدوله و من حق غيرك يعارض !! , طبعا كلمه معارض دي كانت وصف لأيات عرابي
و معتز مطر و مصطفى النجار دبدوب الثوره .
.
صديقي العزيز فلان
الفلاني , معلش , مايجراش حاجه لما نبدأ تاني من أول زرع و حصد , مع إنها أبجديات و
عهد الله أبجديات , بس هقولك و الأرزاق بالله .
.
هات كلمة معارضه
و اعمل بحث على تعريفها في جوجل و غير جوجل , هات تعريفها بالعربي و الإنجليزي و الياباني
و الفيومي , هات بقى كل المقالات اللي بتتكلم عن مفهوم و أليات المعارضه , اجمع الكلام
ده كله في كتاب واحد و اقراه من الجلده للجلده 17 مره , و تعالى عشان أقولك :
.
- كتاب المعارضه
بيسمح لك انك تقول الرئيس الفلاني ده فاشل عشان عمل كذا و كذا و المفروض كان يعمل كذا
, الحكومه دي فاشله عشان عملت كذا , و تقوم مشكل حزب سياسي و تدخل البرلمان و لو الحكومه
مش عاجباك أوي تطالب باقالتها و لو الرئيس مش نازلك من زور تعمل تكتل برلماني و تشيله
بطريقه يسمح بيها الدستور , ماعرفتش تعمل لا ده ولا ده , هات تلاتين اربعين مليون و
انزلو الشارع اعملو ثوره و شيلو الرئيس , بقولك الشارع مش الفيس بوك و تويتر .
.
- مش هتلاقي بقى
في كتاب المعارضه ( من الجلده للجلده ) إن اللي يهرب و يروح يشتغل في قناه في دوله
معاديه عشان يهاجم مصر و كل مؤسساتها إن ده اسمه معارض , مش هتلاقي اللي بيشوه صورة
جيش بلده اسمه معارض , مش هتلاقي اللي بينشر صور مقالب زباله على موقع السياحه اسمه
معارض , مش هتلاقي اللي بيتهم بلده بقتل شاب ايطالي اسمه معارض , مش هتلاقي اللي بيقول
اخلع يا دفعه اسمه معارض , مش هتلاقي اللي بيقول على قادة الجيش جينرالات البيزنس و
السبوبه اسمه معارض , مش هتلاقي السخريه من تاريخ بلد و انتصاراتها و اسمها و علمها
و نشيدها اسمه معارض , مش هتلاقي اللي بينشر اشاعات و تقارير مزيفه و يصدّر للناس الإحباط
و اليأس و السواد اسمه معارض , مش هتلاقي اللي بيوصف حرب دوله على الإرهاب بإنه عنف
متبادل اسمه معارض , مش هتلاقي اللي بيمارس الإرهاب بكل أشكاله اسمه معارض , مش هتلاقي
اللي بيتعاطف مع الإرهابي اسمه معارض .
.
- الكلام اللي
فوق ده مستحيل تلاقيه في أي كتاب للمعارضه , لكن ممكن تلاقيه في مجلات البلاي بوي
.
......................................................................................................................
Mohamed
Hussein
7
نوفمبر 2016·
خدوها قاعده كده
, لو ريري سيلان و زيزي صديقة الطلبه و لوسي ابن طنط فكيهه و البت شربات بتاعة مسطرد
اتجمعو مع بعض في نفس الوقت و اتهموك في شرفك اعرف انك نضيف و ماشي دوغري .
.
عشان كده انا فخور
جدا اني كنت واحد من ضمن الناس المصريين اللي اتعرضو لحملة تشويه و هطل و ( مرقعه
) بدأها خالد رفعت و كملها مصطفى النجار و أيات عرابي و أيمن نور و معتز مطر .
.
مفيش وسام شرف
في الدنيا ولا نعمه من ربنا أعظم من إن يكرهك الخروف الإرهابي و الحمار شمام الكوله
اللي مركوب من الخروف و المتسّلق المتلون عبد الأضواء , اللهم دمها نعمه و احفظها من
الزوال .
.............................................................................................................................
Mohamed
Hussein
7
نوفمبر 2016·
أرامكو السعوديه
تعلن وقف امداد مصر بشحنات البترول حتى اشعار أخر !! .
.
بص يا حبيبي ,
بس و النبي حاول تركز
.
1- من شهر تقريبا
لما أرامكو قررت انها ماتمدش مصر بشحنة البترول بتاعة اكتوبر قلت الخبر حقيقي ( من
غير مافتح لينكات ولا اجيب مصادر ) , الحدوته أصلها بسيط , واللي شايف الصوره كامله
قدام عنيه مش هيتفاجئ بأخبار زي دي , هيشوفها منطقيه جدا .
.
2- حكاية العلاقه
التاريخيه بين مصر و السعوديه دي انا عارفها كويس جدا و مش محتاج دروس في أهمية إن
الدولتين الكبار اللي باقيين في المنطقه لازم ولابد يتعكّزو على بعض , و كتبت عنها
كتير , السعوديه محتاجه مصر و مصر محتاجه السعوديه بس و النبي على رأي الست "
لمَنْ أبقيه و ما أبقى عليا ؟!
.
3- يمكن خبر زي
بتاع أرامكو من شهر و زي بتاع النهارده كان يبقى كافي جدا للكولجيه انهم يفهمو حاجه
في حياتهم , الخرفان بتوع الجماعه الإرهابيه مش مستني منهم يفهمو ولا عايزهم يفهمو
ولا فيه أمل فيهم , كل تركيزي عالكولجيه خصوصا الشباب مش القيادات و الأيقونات اللي
باعو نفسهم لكلاب السكك .
.
4- عزيزي الكولجي
الصغير , الأصل في الحدوته بيقول حرب متعمده ضد مصر من 3 سنين , على كل الجبهات و من
كل اتجاه , الحرب دي بتشمل الإرهاب المدعوم من كذا دوله , بتشمل الحرب الإقتصاديه
, بتشمل ضرب السياحه , بتشمل لم الدولارات ( الفتافيت اللي باقيه في السوق ) , بتشمل
تخزين السلع الإستراتيجيه , و الغرض و التارجيت اسمه لوي دراع مصر , البلد دي لازم
تركع بأي شكل , تركع سياسيا و تغير قناعاتها و ثوابتها , أو تركع و تسلم نفسها للجماعه
الإرهابيه تاني ( الفصيل الوطني ) , و التارجيت الأكبر اسمه الجيش المصري , لازم ولابد
يحصل الجيش السوري و العراقي و الليبي .
.
5- مانا بقولك
لو فهمت هترتاح والله و تبطل زربحه ورا أيات عرابي و معتز مطر و أيمن نور و مصطفى أبو
سداغ , دبدوب الثوره .
.
6- علاقتنا بالسعوديه
حاول السيسي يحافظ عليها على مدار سنتين , عصر على نفسه مشنة لمون , عشان فاهم أهمية
العلاقه دي و ان يبقى فيه تحالف قوي يقدر يلم اللي باقي من أشلاء العرب , السعوديه
استجابت شويه و دعمت مصر شويه ( محدش يقدر ينكر ) , لكن يبدو إن أل سعود ماقدروش على
سياسة اللعب عالحبلين , و الضغوط الأمريكيه عليهم كانت أشد , حتى الوعود السعوديه بمنحه
دولاريه تسندنا في أزمه أنا واثق مليون في الميه انها ماتمتش و كانت سبب من أهم أسباب
أزمة الدولار ( مفيش سياسي هيطلع يقول كده عشان السياسه بتختلف عن الهري الفيسبوكي
) , بالمناسبه تهبيل اياد مدني كان بتعليمات مسبقه و حكاية اقالته غير مرضيه ليا ,
لأنه عمل التارجيت المرسوم له و اللي كان كان .
.
7- طب هنعمل ايه
بقى ؟ هنتشال و نتهبد و نعمل شألباظات و في النهايه مش هنلاقي حل غير اننا نعتمد على
نفسنا , ما حك جلدك مثل ظفرك , دي القاعده اللي مفيش مفر من إننا نستخدمها الفتره الجايه
.
.
8- اللي لسه متشعلق
في توب أل سعود و مستني منهم الخير و الدعم و السند , و مستني انهم يعقلو و كده بيفكرني
بنكته بايخه كنت بسمعها زمان , قال واحد بلدياتنا نزل القاهره عشان يزور أم هاشم ,
و قبل ماينزل سأل واحد صاحبه هو انا اعرف اروح لأم هاشم ازاي ؟, صاحبه قاله هتلاقيها
بتوّر كده و مليانه كهارب و الناس ملمومه حواليها , بلدياتنا نزل و لقى ميكروباص صاحبه
لسه شاريه جديد و عامله زينه و كهارب و الناس ملمومه حواليه , قعد الراجل يبوس في الميكروباص
و يتمسّح بيه و يحضنه , و جه صاحب الميكروباص يضربه و كل مايضربه يقوله اضرب يا هاشم
, أنا مسامحك عشان خاطر أمك .
.............................................................................................................................
Mohamed
Hussein
6
نوفمبر 2016·
عايز غيط دره استخبى
فيه يا جدعان , هاتولي غيط دره , أصلي طلعت لجنه الكترونيه و بقبض ( مش عارف بقبض بالجنيه
ولا الدولار ) , اودّي وشي من الناس فين , هاتولي غيط دره .
.
- طب تعالو نجيب
الحدوته من الأول , حدوته مسليه أوي
.
1- من 3 سنين بدأ
الهجوم على صفحتي بشكل عجيب , طبعا لو كنت استمريت في شم الكوله كانت صفحتي بقت أد
كده 100 مره , عشان الكولجيه مالهمشي وجود في الشارع انما كل وجودهم على مواقع التواصل
( دي دولتهم الوهميه ) , و الخرفان خرفان بيشتغلو بطريقة القطيع , و لو كنت خروف كان
زماني عندي الفيلا اللي بتحلم بيها البت لمار بنتي .
.
2- صور و أشكال
الهجوم كانت عبيطه جدا و ساذجه , حاجه تناسب المستوى الفكري للخروف اللي بيركب الحمار
و الحمار اللي بتركيب من الخروف .
.
3- هحكي لكو شويه
عن الحركات الساذجه بتاعة الخروف و الحمار , يعني مثلا تلاقي خروف باعت رسايل في الأوزرس
يشتم بالأب و الأم و طبعا ماينساش كلمة عرص و معرصين , و ينهي الرساله بحسبي الله و
نعم الوكيل !! , أه يعني قذف محصنات و بعدها على طول حسبنه , و خروف يقول انت تبع أمن
الدوله , لا تبع المخابرات المصريه , أه انا العقيد أركان حرب صيدلي و كاتب فيسبوكي
محمد حسين .
.
4- حمار يعمل صفحه
باسم ظابط شرطه و نفس الحمار يعمل صفحه تانيه باسم عادي و ينزل بوست فيه صورتي انا
و امي مع شوية شتايم حلوه و يدخل نفس حمار تاني يقول انا عارف المدرسه اللي فيها بناته
!! خاف بقى ياد يا عيد , و يدخل الحمار اللي عامل نفسه ظابط شرطه يقولي الناس دول بيتكلمو
جد و حاول تكول حذر و دول مجرمين , طب حاضر هخاف اهو .
.
5- حمار يبعت رساله
مباشرة بتهديد بالقتل , ده حمار دوغري و بيعجبني , و خروف يبعت رساله يقولي فيها (
هو انت من الحمير بتوع تحيا مصر ؟!! ) , الحقيقه الرساله الأخير دي اكتر رسالة استفزتني
و يمكن يكون فيها لب الموضوع واصل الحكايه .
.
6- أصل الحكايه
يا حضرات اسمه التشويه التام , قلب الحقايق , الخيانه تبقى وجهة نظر و منهج فكري و
الإرهاب يبقى عنف متبادل و مصر تبقى اتهزمت في 73 , و تحيا مصر تبقى بتاعة الحمير
, وبالتالي و بالمنطق البسيط اللي يقول للناس حبو بلدكو و خافو عليها و احترمو جيشها
يبقى لجنه البكترونيه و بيقبض فلوس , يعني في نهاية التشويه تبقى الوطنيه جريمه .
.
7- فيه واحد ماكنتش
اسمع عنه لحد امبارح , اسمه خالد رفعت , أول ماقالولي الإسم قلت لهم عارفه , ده الواد
اللي انضم للزمالك الموسم ده و بيلعب في خط النص , طلع التاني اسمه احمد رفعت و الأولاني
ده مش بيلعب كوره , المهم مولانا خالد رفعت اللي مش بيلعب كوره نشر بوست عن الكتيبه
الالكترونيه , اللي انا منها طبعا و جاب التايهه و جاب الديب من ديله .
.
8- البوست اتنشر
بقى عند مصطفى النجار ( أبو سداغ ) اللي كان بيكلم البرادعي و يقوله هنجيب فلان يمسك
رئيس وزرا و فلان يمسك الداخليه و فلان يمسك ماعرفشي ايه و نجيب البت مروه تنسق المسائل
عشان هي شاطره و لهلوبه , وانا بقالي 3 سنين نفسي اعرف مين مروه اللهلوبه دي ؟! و نشره
كمان أيمن نور اللي رأيي فيه باختصار انه مكانشي فيه داعي يروح يتشرمط في تركيا في
بلاط الأغا العثماني و طليقته تتشرمط في أمريكا في حملة هيلاري كلينتون , ما يتلمو
على بعض و يتشرمطو في حته واحده بدل الخايله الكدابه دي .
.
9 - للحمير و الخرفان
و البهايم و المتسلقين و عبيد الشهره عايز أقولهم , مصر هي مصر , وانا ابنها وابن الغاليه
الله يرحمها , يعني البني أدم اللي مش بيخاف ولا بيتهدد ولا بيتهد .
....................................................................................................................................
Mohamed
Hussein
5
نوفمبر 2016·
اللي عايمين في
ماية البطيخ
.
- لما خلصت الكليه
و الجيش سافرت السعوديه و اشتغلت فيها 13 سنه متواصله , ماكنتش بنزل غير اجازتي السنويه
, شهر كل سنه , حتى الجمعه و الأعياد بشتغلهم , طبيعة مهنتنا كده , و طبعا عشان أدخل
الكليه أصلا كان طلع عين أهلي , لأن ( بابي و مامي ) ماراحوش مدارس ولا بيعرفو يقرو
ولا يكتبو , ولا يعرفو الفرق بين دورة كربس و دورة كفر البدماص الرمضانيه , الله يرحمك
يابه انت و الغاليه .
.
- في الغربه و
تحديدا اخر كام سنه , اتغير مبارك و جه طنطاوي و بعدين البهلول مرسي , كرهت اللي كرهته
بس عمري ما كرهت بلدي , ولا قولت لبّيك اللهم هجره , مع اني متغرب بس كنت بستني اليوم
اللي ارجع فيه بلدي , ماقولتش مصر رمتني ولا حاجه قلت انا سافرت عشان أدور على فرصه
احسن و حياه افضل , الهند اقتصادها قوي جدا و مع ذلك فيه عشرات الملايين من الهنود
بيسافرو و يتغربو , مفيش دوله مابيطلعش منها مغتربين بيدورو على فرصة عمل افضل , حتى
أمريكا .
.
- لما كان عمري
30 سنه كنت اتجوزت و اشتريت شقه صغيره وجوّزت 3 بنات ( اخواتي ) , مع اني طالع من تحت
الصفر , لا ليا عم مات في البرازيل و ورثته ولا ابويا الله يرحمه كان سايب لنا الوسيه
, فلما اعرف ان واحد عمره 30 سنه مستني الحكومه تجوّزه و تشغله و تعملّه الرضعه و تدلّك
له عضلة السمانه ببقى عايز أدوس عليه بجزمتي .
.
- صح الغلطه في
الأساس غلطة مولانا مبارك , و حكوماته و اعلامه , مبارك ساب الدينا تفرط منه و أعداد
الخريجين من الجامعات تبقى أضعاف مضاعفه لحاجة السوق , و معالجشي جوه العقول حكاية
وظيفه ميري بالعكس وصلنا لعدد 6 مليون موظف حكومي !! , يعني كان حريص جدا انه يربّي
في البلد عجول و تيران و ناس كل مفهومها عن الدنيا هو اطبخي يا حكومه اخبزي يا حكومه
ادعمي يا حكومه جوزيني يا حكومه , بس العايط في الفايت نُقصان في العقل .
.
- يا حماده , في
أوروبا و أمريكا اللي انت قارفنا بيهم ليل و نهار , مفيش بغل زي معاليك بيقول عينيني
يا حكومه و جوزيني يا حكومه , الشاب من أول مايدخل الجامعه بيشتغل و مفيش حاجه اسمها
تعليم جامعي مجاني ( إلا للمتفوقين ) , اقولكشي على حاجه , اقعد عالقهوه و استنى رئيس
الوزرا ييجي يطقطق لك صوابع رجليك و يغيّرلك ماية الجوزه , و إلا تعمل ثوره بقى و تجيب
رئيس وزرا جديد يكون خبير في تغيير ماية الجوزه يعني يكون صبي قهوجي سابقا أو سواق
توكتوك !! .
.
- أحيانا بحس إني
بأدن في مالطه , بس عمري ما زهقت , ولا بطلت كتابه ولا بطلت أدان , لعل وعسى شاب يسمع
صوتي و يفوق من الغيبوبه , مصر أجمل مافينا و احنا أسوأ مافيها .
.................................................................................................................
Mohamed
Hussein
4
نوفمبر 2016·
مش قلقان من
11 نوفمبر ولا من 37 فبراير , و إجمالا مابقلقش عالسيسي , ولا بيشغل تفكيري بأي شكل
أكتر من كونه واحد بيسوق عربيه في ظروف مناخيه صعبه جدا و طريق أصعب , الركّاب متأذيين
و متفرهدين و طبعا معذورين بس أكيد هيستحملو و يكملّو , أنا بقلق عالعربيه بس , يعني
بقلق عالبلد , و طول مالبلد دي لها جيش صالب طوله , جيش فشلت معاه كل خطة التشويه و
محاولة خلق انشقاق جواه اللي استمرت أخر 5 سنين يبقى انا حاطط في بطني بطيخه صيفي
.
.
لو مش عاجبكو الراجل
السوّاق ده اللي بيحاول يعمل اصلاح اقتصادي حقيقي بدل الميغه اللي عيشنا فيها تلاتين
سنه , مفيش مشكله , هاتو مبارك تاني , كان حد جميل و لذيذ و كيوت , تذكرة المترو بجنيه
و بعد 20 سنه تبقى بجنيه , و علبة الدوا الفلاني بجنيه و بعد 20 سنه تبقى بجنيه برضه
, شوف حكمة ربنا يا جدع , و قروض و ديون متلتله مع ان السياحه مكانتشي مضروبه ولا كان
فيه ارهاب بالشكل الحالي ولا كان فيه حرب عالبلد و لوي لدراعها , المهم الشعب يتدلّع
و أهم حاجه ثبات الأسعار يا عاطف , و توصل في يوم من الأيام إن موازنة بلد يبقى أغلبها
بيطير في الدعم و تسديد فوايد الديون , بس الشهاده لله عملنا في عهده شويه كومباوندات
و ملاعب جولف عنب , لا صناعة ايه بس و تصدير ايه ؟ احنا لا بتوع صناعه ولا بتوع تصدير
ولا بتوع تنويع لمصادر العمله الصعبه , بقولك ايه صحيح , تاخد لك شقه في كومباوند فيه
تراك معمول بمواصفات قياسيه عالميه عشان تتمشي بالكلب بتاعك ساعة العصاري ؟!
.
ماتقلقوش يا بني
أدمين , تعاشربو نسكافيه , ولا خليها شاي بدل ما حبايبنا اياهم يمسكو في كلمة نسكافيه
و يقولو مليونير بقى و مش حاسس بالغلابه , مع إني وعهد الله من الناس اللي بتكح تراب
.......... , تعاشربو شاي .
...........................................................................................................................
ليست هناك تعليقات:
إرسال تعليق