Mohamed
Hussein
19 أكتوبر 2016
عيش على أدك ,
و خلّي عينيك مليانه
.
وانا في السعوديه
ماكنتش عايش على مرتبي بس , كنت بستثمر في كذا مشروع صغير , كسبت شويه فلوس حلوين
, و كان باستمرار جيبي مليان , ندخل أفخم الفنادق , نتفسح في أغلى الأماكن , نشتري
كل اللي احنا عايزينه .
.
لما نزلت مصر بعد
غربه 12 سنه الوضع اختلف كتير , الفلوس أغلبها طار في شقه و عربيه , و الدخل هنا مش
زي الدخل هناك ( ولا ربعه حتى ) , نعمل ايه بقى ؟ نسب و نلعن في البلد و الحكومه و
نشتم الجيش بالمره ؟ لا خالص , ولا عمري غلطت في حق بلدي ولا كرهتها , مانا اتولدت
في بيت مكانشي حيلته اللضى , و ياما كلت جلاوين و سريس و فول حريتي من الأرض و حتى
ورق الملوخيه الخضره , واتشعلقت على جرارات زراعيه و بقيت امشي أحيانا 8 كيلو عشان
مش معايا بريزة أركب بيها عربيه .
.
الأصل في الحدوته
ان بطنك تبقى شبعانه و عينيك مليانه , ماتبصش للي في إيد غيرك , عيشت كام سنه حلوين
أوي قول الحمد لله , نزلت شويه قول الحمد لله برضه , و افتكر باستمرار ان فيه ملايين
حالهم أقل منك , حتى بناتي و مراتي عودتهم على كده , احنا بنجتهد على أد مانقدر , ربنا
بعت عشر قروش خير و بركه , بعت تلاته خير و بركه , طالما بالحلال .
.
بقيت أخد المواضيع
بهزار , لوجي بنتي تقولي فلانه صاحبتي راحت في الصيف ده شرم و باريس و دبي واحنا ماروحناش
حتى العين السخنه أقولها ( وانا بضحك ) : اقطعي علاقتك بيها , مراتي تقولي أمهات التلامذه
هيروحو الداون تاون الصبح , أقولها و انا بضحك : اقطعي علاقتك بيهم , و لما يحبو يحرجوني
يعني و يفكروني بأيام السعوديه و العيشه هناك , أقوم انا اللي أحرجهم و أقولهم شوفتو
بقى ؟ عشان ماتقولوش اني حرمتكو من حاجه .
.
ظروف بلد و بقت
أصعب من بعد 2011 ( كانت نيله قبل كده بس بقت أنيل ) و احنا شاركنا في الأنيل ده بشكل
ما , ملوش لازمه الكلام , أصل العايط في الفايت نقصان في العقل , محتاجين وقت عشان
نقف على رجلينا من تاني .
.
المهم انك باستمرار
تشوف الأرض اللي انت واقف عليها , دولتك و في إيدها 10 قروش بسبب ظروف ما ( واحد اتنين
تلاته اربعه ) و بتحاول تتصرف من خلال ال 10 قروش دي , كل النظريات و الحلول اللوذعيه
اللي سمعناها اخر 5 سنين كانت محض افتكاسات أو تنظير من ناس عايمه في ماية البطيخ
, من أول ال 70 مليار بتاعة مبارك اللي هنرجعها لحد الصناديق السياديه اللي فيها دشيليون
جنيه , يبقى نعمل ايه بقى ؟ ولا حاجه , الدوله تعيش على أدها و المواطن يعيش على أده
.
............................................................................................................................
Mohamed
Hussein
18 أكتوبر 2016
أنا و لوجي
.
قاعد مع لوجي بنتي
بنشوف الفيديو بتاعها في المدرسه في حفلة التكريم عشان هي من الأوائل الحمد لله في
تالته ابتدائي , لوجي شغلت الفيديو
.
أنا : إحم إحم
, مين الراجل اللي بيتكلم ده يا لوجي ؟
لوجي : ده السوبرفايزور
بتاع الإينجليش بيعمل بريزينتشين .
.
أنا : طب هو بيخلص
امتى ؟
لوجي : ليه يا
بابا ؟ .
.
أنا : أصله بيتكلم
انجليزي بسرعه اوي و انا مش فاهم منه أي حاجه , غيرشي طراطيش كلام .
لوجي : طب خلاص
نمشّي الحته دي .
.
أنا : اه مشيها
, استني هنا , انتي واقفه و بتغني مع زمايلك أهو , الله شكلك قمر , بس مشّي الحته دي
.
لوجي : ليه يا
بابا ؟ .
.
أنا : أصلكو بتغنو
بالإنجليزي و انا مش فاهم أي حاجه .
.
لوجي مشت الفيديو
لحد ما وصلت عند لحظات التكريم اللي بينادو فيها عالطلبه , أيوه استني استني , اسمك
أهو , لجين محمد حسين , تحيا مصر يا عم الحاج .
.
لوجي : بابا هو
انت ليه متأسستش كويس في الإنجليزي و انت في كي جي ؟ .
أنا : بصي يا لوجي
انتي مش غريبه , انا لا عمري روحت كي جي ولا سمعت عنها أساسا , كنت بروح الكُتّاب بتاع
الشيخ عوضين و كان بيضربنا بالخرزانه و الفرقله , و أول مره في حياتي اخد انجليزي كان
عمري 13 سنه يعني كان شنبي نبّت , بالك انتي , انا قعدت 3 سنين في إعدادي عشان أعرف
اجاوب عالسؤال بتاع وات كان يو سي إن زا سكاي .
................................................................................................................
ليست هناك تعليقات:
إرسال تعليق