Mohamed
Hussein
15 سبتمبر
2016·
في مصر , هتلاقي
شخصيه عسكريه مرموقه كده , على كتفها معرفشي كام نجمه ولا كام دبوره و لا كام سيف
, حاجات كتير يعني , اسمه قائد الفرقه الفلانيه , يقف بهيبه و يمشي بهيبه و الكل يضرب
له تعظيم سلام , حتى لو عربيته ماشيه بالسواق بس و هو مش جواها بتضرب تعظيم سلام للعربيه
, و تقول بس ده الكبير بقى بتاع الجيش المصري , تقوم تلاقي ان نفس الكبير ده بقى صغير
و بيضرب تعظيم سلام لواحد أكبر منه اسمه قائد المنطقه و الأكبر ده بيضرب تعظيم سلام
لواحد اكبر اسمه رئيس الأركان و رئيس الأركان يضرب تعظيم سلام لوزير الدفاع .
.
أيام تنحي مبارك
و لما اجتمع المجلس العسكري , اللي هما شوية الرتب اللي فوق دول , كان في التوقيت ده
تحديدا مصر على شفا حفره من النار , في وقت اختلط فيه الحبابل بالنابل , وقت كان بالنسبه
لدول تانيه هو إشارة البدء في السقوط , قامو القاده بتوع الجيش المصري عملو ايه بقى
؟ قالو يا عم البلد بتخرب و نلحق نهرب و نسرق و ننهب اللي نقدر عليه , يعني على طريقه
لو خربت دار أبوك خد لك منها قالب ( المغريات كانت كتير اوي و غيرهم في بلاد تانيه
هرب ) ؟ , و لّا شالو الليله و شالو بلد بحجم و تاريخ و جغرافية و أهمية مصر , و في
وقت عصيب ؟!! هما دول على فكره قادة الجيش المصري اللي الأراجواز بتاع حملة هيلاري
كلينتون بيقول انهم بيسمسرو في لبن الاطفال , ومستنيين يكسبو في علبة اللبن 3 جنيه
و نص !! .
.
ايه ده يا محمد
؟ انت بتمدح في جيش مصر كده ليه ؟ دانت ناقص تكتب فيهم شعر ؟ هي حصّلت تمدح جيش بلدك
؟ ممممممممممم تصدق معاك حق , انا غلطان فعلا و المفروض أمدح الجيش الأمريكي ( العدو
) و قياداته اللي قتلو ملايين العرب و حرقو بلاد عربيه أو امدح في الجيش التركي ( العدو
) اللي قتل و سرق و نهب سوريا و العراق و اللي عساكره بيقلعو ملط وقت اللزوم عشان أعجبك
و ابقى واد ثورجي و مناضل , أقولكشي على حاجه ؟ المره الجايه هبقى اكتب شعر في الست
الوالده .
............................................................................................................................
Mohamed
Hussein
15
سبتمبر 2016·
كان عندي وجهة
نظر , الأمريكان و البريطانيين لما بيخربو أي دوله عربيه بييجو بعد عشره خمستاشر سنه
و يعتذرو ( إمعاناً في البرود و الوقاحه ) , أصل معلوماتنا كانت غلط , اصل تقديرنا
للأمور كان غلط , أصلنا أسفين لمقتل مليون مواطن في دولة كذا .
.
وجهة نظري كانت
بتقول إن كلمة اعتذار قبيحه مماثله كانت مكتوبه لمصر و مرميه في أدراج الامريكان و
البريطانيين , كلمة اعتذار بتاريخ سنة 2035 , بتقول سوري يا جماعه احنا خربنا مصر و
قسّمناها و قتلنا كذا مليون مصري بمساعدة جماعه ارهابيه و تقديرنا للأمور كان غلط
, وي أر سو سوري !! .
.
اللي عملناه في
30 يونيو كمصريين و اللي بنعمله لحد دلوأتي هو باختصار اننا بنقطّع جواب الإعتذار الأمريكاني
و ممكن نبقى نعتذر احنا للامريكان و البريطانيين في 2035 و نقولهم سوري يا جماعه إننا
بوظنا مخططكو و كشفنا عملائكو و قلبنا عليكو الترابيزه و ضيعنا عليكو نشوة الإعتذار
الوقح .
..................................................................................................................
Mohamed
Hussein
14
سبتمبر 2016·
عندي مشكله كبيره
في فكرة قبول المصطلحات المشوهه اللي مرمي على وشها ماية نار
.
المواطن الليبي
اللي بيرحب بقوات ايطاليا و الناتو و أمريكا , هو و المواطن السوري اللي بيرحب بالقوات
التركيه و برضه الناتو و أمريكا , هو و المواطن العراقي اللي بيرحب بالقوات التركيه
و الإيرانيه و كان بيبوس جزمة جورج بوش , هو و المواطن المصري اللي مستني الفرج و المدد
من ماما امريكا أو عايش على حجرها و بتصرف عليه عشان يشتم بلده ( أو شغال أراجوز في
حملة هيلاري كلينتون ) , الأربعه ماينفعش يتقال عليهم معارضين ولا ثوار ولا مناضلين
ولا أصحاب فكر , الأربعه اسمهم باختصار ولاد كلب خونه , مش أكتر من كده ولا أقل .
.
لو مسكت الروايه
الجنسيه بتاعة احمد ناجي و حاولت تعرف اللي كاتبها دماغها فيها ايه بالظبط ؟ هتكتشف
ان دماغه فاضيه تماما , يعني أبيض يا ورد , ممكن في ركن بس من أركان دماغه تلاقي (
شوية سباخ ) , برضه مش اكتر من كده ولا أقل , ماينفعش تحط احمد ناجي تحت كلمة مثقفين
و مبدعين و موهوبين و مفكرين , مش لازم كل مصطلح نضيف في حياتنا و له قيمه نرمي على
وشة ماية نار , ينفع عادي جدا تقول ان احمد ناجي ده مجرد عيل سبرسجي زي اللي بينامو
تحت كوبري الملك الصالح , و انه لما اتسجن فهو اتسجن بنفس ذات الطريقه اللي بيتسجن
بيها أي عيل صايع بيبيع صور جنسيه في الشارع , جبت منين مصطلح الثقافه و الفكر و الإبداع
؟ بأمارة إيه ان شاء الله ؟! .
.
ولاد الناس مش
بالضروره يكونو شايلين موبايل من ابو 17 ألف , او تكون لابسه بوت من أبو 5 ألاف , أو
يكون راكب بي إم , مصطلح أولاد الناس محتاج إعادة تعريف لأنه بالشكل ده يبقى مصطلح
مشوه , و انت بتحاول تفكر فيه و تعيد تعريفه تاني , ياريت تصدق انك ابن ناس مع انك
لا شايل موبايل ب 17 ألف ولا مراتك لابسه بوت ب 5 الاف ولا عندك حتى عربية 128 سماوي
.
.
اللي بيلبس جلابيه
بيضا قصيره و يربي دقنه و يحط في سيالة الجلابيه سواك مش بالضروره أبدا يكون شيخ و
تقوله يا مولانا الشيخ و تسأله عن رأي الدين في الصوم و الزكاه و في ثقب الأوزون ,
لا ممكن يكون صبي عجلاتي عادي , اسمع منه و ركز معاه , لو لقيت كلامه في الدين بتاع
صبي عجلاتي , قوله انت صبي عجلاتي , الحكايه سهله خالص .
.......................................................................................................................
Mohamed
Hussein
14
سبتمبر 2016·
السيسي عمل لثورة
يناير عمل سفلي و شوية أعمال سُفلية تانيين عشان يربط القوى الثوريه ( و يقطعو الخلف
) .
.
من كتاب ( دليل
المحتاس في تفنيد الإفلاس ) تأليف المناضله أهداف سويف بالإشتراك مع كوكبه منتقاه من
ألمع الوجوه الثوريه و البانجو اللي فتّح في شوارع مصر .
...................................................................................................................
Mohamed
Hussein
14
سبتمبر 2016·
وانا راجع من البلد
بقى و يادوب لسه هدخل ميت غمر لمحت بطرف عيني تنين طاير من اللي بيطلع نار من بؤه
, التنين كان طاير فوق الكوبري الجديد اللي عامله الجيش ( قصدي العسكر ) , البنات اترعبو
طبعا , قلت لهم ماتقلقوش يا بنات ده مجرد تنين صغير وانا هعرف اهرب منه كويس عشان بقيت
خبره في التعامل مع التنانين , و الحمد لله فلتت منه , و يادوب دخلت كفر شكر ألاقي
واحد بياكل من الزباله على جنب و عازم أصحابه كمان , البنات اترعبو , قلت لهم ماتقلقوش
, دي ناس بتاكل من الزباله عادي , قالولي طب مين اللي واقف يصورهم ده ؟ قلت لهم ده
الراجل اللي بيجيبهم عشان يتصورو !! ..
.
المهم وصلت القاهره
و خدت البنات السينما في مول من مولات مدينة نصر , و طبعا وانا داخل المول لقيت واحد
بيمسح الأحذيه , معلق لوحه جنبه و كاتب عليها بكالوريوس طب القصر العيني دفعة 94 و
ماجستير و دكتوراه في أمراض النسا و نائب رئيس الجمعيه العالميه في كوكب الأرض و المجموعه
الشمسيه للولادات القيصريه , وقفنا جنبه و قعدنا نعيط ( و نتشحتف ) أنا و البنات و
خلصنا علبتين مناديل من اللي هي أم 7 جنيه دي , و لما دخلت جوه الحقيقه لقيت زحمه بشعه
, مفيش مكان تقدر تقف فيه ولا حتى عارف تتنفس , البنات قالو لي ايه الزحمه دي يا بابا
؟ قلت لهم بصراحه مش متأكد , بس غالبا دي تبقى ثورة الجياع .
..............................................................................................................
Mohamed
Hussein
13
سبتمبر 2016·
أمريكا بتطالب
الجيش الليبي بالإنسحاب من المناطق اللي فيها مصافي بترول و اللي بدأ الجيش الليبي
في استعادتها من تنظيم داعش !! .
.
أمريكا كده كشفت
عن وشها القبيح و علاقتها بالتنظيمات الإرهابيه ( المصطنعه ), يعني بالبلدي قلعت البنطلون
, بس النشطاء السياسيين في مصر لسّه مُصرّين إنهم كل ما تيجي سيرة أمريكا يوطو عشان
يجيبو حاجه وقعت منهم في الأرض , مع ان مفيش حاجه وقعت منهم , إنما شكل الحكايه عجبتهم
أوي .
.........................................................................................................
Mohamed
Hussein
12
سبتمبر 2016·
بعد ساعه من دلوأتي
هعمل زي مابعمل كل ليلة عيد , أخد العربيه و اشد الرحال عالبلد عشان أبوس إيد أمي الغاليه
و اقولها كل سنه و انتي طيبه , بالظبط بالظبط أوصل على صلاة العيد , المسافه 3 ساعات
, من مدينة نصر لنزلة الزراعي لبنها لكفر شكر و ميت غمر و أجا و المنصوره و بعدين السنبلاوين
ثم التوجه مباشرة إلى عمق أرياف السنبلاوين حيث تقع قريتنا العزيزه , معايا مراتي و
بناتي الاتنين , السفر في الضلمه ده متعه بالنسبالي , في طرق ممكن يكون فيها حتت شبه
مقطوعه , لا عمري خوفت في البلد دي ولا عمري هخاف , هي مصر كده , ربنا خلقها كده ,
ماتتحبش ولا تتعاش غير كده , دي مصر سيادتك مش امريكا , يعني ايه مصر بقى ؟ يعني البلد
اللي في أصعب ظروفها تحس فيها بالأمان .
...............................................................................................................
Mohamed
Hussein
11
سبتمبر 2016·
لكل أصدقائي الأعزاء
.
- في نيويورك و
واشنطن و فيينا و باريس و طوكيو و ريودي جانيرو و القاهره و اسكندريه و كوم الشقاف
بتحصل حالات خطف و حالات سرقه , يعني مصر مش خلقه عن بقية مخاليق ربنا , إنما كل الهري
اللي حضرتك بتقراه بقالك فتره هو ( من وحي خيال المؤلف ) حواديت الست اللي اتخطفت لما
اترش عليها بنج من سواق التاكسي , و الست اللي قالولها اركني عربيتك عشان بتطلع دخانه
و سرقوها , و الطفله اللي حقنوها بمادة سريه رقمها الكودي 56734 و هي في المول و خطفوها
, كله هتش و هري و وسيله قذره من الخرفان و محاولات بائسه لإرهاب الناس و رعبهم , اللي
بيألف البوستات دي غالبا أول مابيعمل نشر للبوست بيقول لمراته و بناته يالله اجهزو
بقى عشان نخرج و نتفسح و نتنطط و نعمل شألباظات .
.
العبد لله ممكن
في ساعة صفا و فنجان قهوه و سيجارتين كليوباترا أسنجف لك عشرين تلاتين قصه من اللي
حضرتك بتقراهم و يبقو محبوكين جدا لدرجة انك تخاف تفتح شباك بيتكو , البت لمار بنتي
ام 6 سنين لو أطلقت لها العنان في تأليف الحواديت هتألف احسن من كده , أصل احنا عيله
موهوبه بس ما بنحبش نتكلم عن نفسنا .
.
بكره العيد كل
سنه و انتو طيبين , اخرجو للمولات و الجناين و الملاهي و المراجيح , افرحو و اشترو
لعيالكو بلالين و زمامير و غزل البنات , ادبحو الخرفان في الأضاحي , و اشنقو الخرفان
التانيين بضحكتكو و إحساسكو بالأمان .
.......................................................................................................................
Mohamed
Hussein
11
سبتمبر 2016·
ماينفعش تعتبر
نفسك معارض و لا مناضل ولا ثورجي و لا كل المصطلحات العبيطه اللي بيضحكو بيها عليك
أو اللي بتضحك بيها على نفسك , ولا ينفع حتى تعتبر نفسك بني أدم إذا كان بيوصل بيك
الحال إنك تجيب 2 اصحابك يعملو انهم بياكلو من الزباله و تصورهم و تنشر صورتهم , او
تجيب واحد و تقوله انت هتعمل نفسك ماسح احذيه و حط جنبك لوحه مكتوب عليها ليسانس أداب
دفعة 94 !! .
.
مصر في 5 سنين
دخلها تقريبا نص مليون سوري , مش هتلاقي واحد منهم عاطل عن العمل و لا واحد بياكل من
الزباله ولا واحد بيشتغل ماسح أحذيه و هو ليسانس أداب 94 !! .
..
لما تكون ظروف
بلدك صعبه و هباب و نقولك ان أعداد الخريجين في الجامعه مش متناسب إطلاقا مع حاجه سوق
العمل و ان مصر لازم فورا تقلّص الأعداد دي للنص تقريبا و تهتم بالتعليم الفني ماتبقاش
تعمل نفسك 7 رجاله في بعض و تقول لا انا عايز شهاده عشان اعلقها عالحيطه و بعدين الحكومه
توفرلي وظيفه و انا قاعد بشرب معسل عالقهوه .
.
لما نقولك استرجل
لو سمحت و انزل دور على شغل معقول و محترم زي السوريين ما عملو وبلاش تعشق لزقتك جنب
الست الوالده ماتبقاش تعمل نفسك بطل و تقول لا الحكومه لازم هي اللي تتصرف و تدوّرلي
على شغل , ياكشي يشغلوني رئيس تحرير الأهرام .
.
ثقافتنا الجميله
بتقول إني أول ما فتحت الصيدليه جبت عيل عمره 13 سنه مابيروحش مدارس و قلت له هديك
1200 ج و هتشتغل في مكان نضيف توصل أوردرات و تمسح الصيدليه , و قعد معايا اسبوع و
مشي , و كل يوم بشوفه بيتسكع في الشوارع و عالقهاوي , الواد ده بالتأكيد لما يكبر هيفتح
اكاونت عالفيس ويقول عسكر ويسقط و دولة الظلم , طيب يابني حقك عليا , هي دولة بنت تيت
أصلا عشان ماشغلتكش نائب رئيس مجلس ادارة مدينة زويل خصوصا انك اتعلمت لحد رابعه ابتدائي
و اللي زيك في سويسرا بيعملو له تمثال قدام قصر الرئاسه .
...................................................................................................................
Mohamed
Hussein
10
سبتمبر 2016·
الشاب المصري و
البنت المصريه اللي ظروفهم الصعبه جدا مكانتشي مانع لهم من انهم يتدرّبو و يجتهدو و
يتعبو و يعرقو و بعدين يشاركو في بطوله أولمبيه و يفوزو بميداليات و يرفعو علم مصر
و يضربولها تعظيم سلام قدام العالم كله , الشاب ده مش معاق ولا البنت .
.
المعاق الحقيقي
هو اللي طول النهار و الليل يسخر من جيش بلده و يتريأ و ( يتعولق ) كأنه بيكتب بوستاته
و هو قاعد على حِجْر و احد , و بعدين ييجي عيل تاني يعمل من اللي ( بيتعولق ) الأولاني
بطل قومي و أيقونه !! , الإعاقه الحقيقيه بتبقى في العقل و الكرامه و النخوه و الضمير
.
...................................................................................................................
Mohamed
Hussein
10
سبتمبر 2016·
عارف انت الواد
عبده البهلول العبيط اللي كان و هو صغير فاشل و اهطل و منبوذ من كل الناس , اللي فجأه
ساب دقنه تكبر و استشيخ و عمل فيها مولانا عبده البهلول العبيط ؟ الواد ده لما الشيخ
بتاعه ضحك عليه و قاله لازم تجاهد يا عبده يا بهلول عشان تدخل الجنه و تلاقي حور العين
هناك مستنيين على نار , روح جاهد يا عبده يا بهلول , و عبده البهلول سمع كلام الشيخ
بتاعه و شال سلاح و راح افغانستان و العراق و سوريا و ليبيا و اليمن و بيجاهد بقى و
مستني اليوم اللي حور العين هيقابلوه فيه و هما لابسين لانجريهات ايطالي .
.
لو حضرتك يعني
جنابك يعني معاليك لسه لحد النهارده مصدق إن ألف بهلول زي عبده بالظبط أو 10 ألاف بهلول
( أو حتى مليون بهلول ) يقدرو يحاربو جيوش نظاميه ( لها شنه و رنه ) لوحدهم كده و يحتلو
بلاد و مدن و يدخلو بورصه و يتحكمو في حركة تجاره و يسيطرو على طرق و يستخدمو رادارت
حديثه و يضربو طيارات عسكريه و يخططو و يفكرو و يعملو تقسيم إداري و علاقات ثنائيه
و علاقات دوليه و موازنات اقتصاديه ؟!!! تبقى أم دماغك دي محتاجه تتفرمت من أول و جديد
و ينزل لها نسخة ويندوز بتاعة بني أدمين مش بتاعة معيز ولا جديان , انت تروح لمحل كمبيوترات
في السراج مول اللي ورايا ده , و تسلمه دماغك و تسيبها عنده يومين , هو غالبا لما هيزهق
منها و يتخنق و مايلقاش حل هيحط دماغك في طشت مليان مايه و يوصلّها كهربا , و انا هقوله
كتر ألف خيرك يا باشمهندس و الحساب عندي .
.........................................................................................................................
Mohamed
Hussein
9 سبتمبر 2016·
من عشرين تلاتين
سنه بدأنا نسمع عن طالبان و تنظيم القاعده و الميغه اللي بتحصل في أفغانستان , و لحد
النهارده ( يعني بعد عشرين تلاتين سنه ) هتقرا اخبار ان الحكومه الأفغانيه بدأت تستعيد
السيطره على مدينة كذا من تحت أقدام طالبان !! .
.
من عشره خمستاشر
سنه بدأت الميغه في العراق , و لحد النهارده ( يعني بعد عشره خمستاشر سنه ) مش هتلاقي
بني ادم على كوكب الأرض يعرف بالظبط مين بيحكم ايه في العراق و امتى و فين و ازاي ولا
مين نايم في حضن مين .
.
من خمس ست سنين
بدأت الميغه في سوريا , و بعد عشرين تلاتين سنه ( للأسف ) مش هتلاقي سوريا بالشكل و
الثبات و الإستقرار اللي كانت عليه قبل 2011 , يعني ماتستغربش سنة 2040 لما تقرا خبر
ان الجيش السوري بدأ يستعيد السيطره على مدينة كذا , و نفس الوضع في ليبيا و اليمن
و احتمال تونس ( ربنا يكتب السلامه للجميع )
.
اللي عمله الجيش
المصري و المخابرات المصريه في ال 5 سنين اللي فاتو هو أكبر بكتير من فهمك و استيعابك
و من الدايره اللي عمال بتلف فيها بمنتهى العبط , دايرة الحريه و الديموقراطيه و الفوليه
و السمسميه و سعر الدولار و نقص المارشميللو و قفل سينتربوينت و الحريه لأطفال الشوارع
و رفعة ايد خالد علي و هرتلة باسم يوسف و وجدان ابراهيم عيسى .
.................................................................................................................................
Mohamed
Hussein
9
سبتمبر 2016·
نقطة نظام
.
أي رئيس دوله في
الدنيا بيسقط و ينتهي حكمه بطريقتين اتنين مفيش غيرهم , إما بانتخابات و صناديق أو
بثوره شعبيه , و الثوره كمان لازم تكون مدروسه , ليه ؟ و ازاي ؟ و هنعمل ايه ؟ و مين
هيدفع الفاتوه ؟ مفيش ثورات بتقوم بطريقة انك تحط ديل جلابيتك في سنانك و تقول انا
رايح اعمل ثوره زي ما حصل في يناير 2011 , انت ماعملتش ثوره في 2011 , انما اتعمل بيك
ثوره .
.
أما الهري و الفرهده
و نشر الإشاعات و الإحباط و الكأبه و إيجاد مصطلحات كيوت للخيانه و العماله و خلط الأوراق
بغباوه و عمى و محاولة كسر جيش البلد ف دي مش طريقة لإسقاط نظام حاكم , مش هتلاقيها
في أي كتاب , دي طريقه لإسقاط أتخن دوله , و محدش هيسمح لك بكده .
.
لو أبوك و أمك
ماعرفوش يربوك أو نسيو يربوك , و المدرس بتاعك نسي يعلمك ف دي مش مشكلتي ولا مشكلة
المجتمع و الشعب , حريتك الشخصيه بتبدأ بحياتك الشخصيه و لبسك و اكلك و شربك و عربيتك
و اختياراتك و عروستك , و بتوصل لحد حريتك في انتخاب زيد أو عبيد و حريتك في انك تشارك
في ثوره أو لا , أما مشاركتك في نشر الأكاذيب و تفنيد الخيانه و السخريه من جيش بلدي
ف دي مش حرية شخصيه , هتاخد معاليك بأوسخ جزمه من المواطن قبل الدوله , و ده حق المواطن
و حق الدوله .
.
بتفهم بأنهي لغه
عشان أشرح لك ؟! .
....................................................................................................................
ليست هناك تعليقات:
إرسال تعليق