Mohamed
Hussein
31
مارس 2016·
مابين ضمير أبلة
حكمت و ضمير أبلة غاده ابراهيم
.
.
زمان من أد عشرين
سنه كانت معلوماتنا الحياتيه بناخدها من اربع خمس إذاعات و قناتين تلفزيون و جريدتين
تلاته , عزيزي تحت العشرين و اجراس الخطر و نادي السينما و عمود أنيس منصور و ابراهيم
نافع يتكلم عن الأرض الفاضيه بتاعة مطار امبابه , و في الدين حديث الروح و لقاء الشعراوي
يوم الجمعه بعد الصلاه , الكلمات المتقاطعه و جورباتشوف زار فرنسا و الحرب الأهليه
في لبنان , و تاكسي السهره و فطوطه و بانوراما فرنسيه , حتى ماتشات الكوره كان لازم
يسبقها اعلان مصر للتأمين و الحكم الدولي محمود عثمان , و مع قلّة البرامج و القنوات
و الأحداث اللي بتوصل لنا و تكرارها كان كل حاجه فيهم لها طعم , لها شكل مميز , تمثيلية
بتيجي الساعه 8 و مش هتيجي لو جابو جلسه لمجلس الشعب , و نقعد نشتم في مجلس الشعب اللي
منعنا نشوف التمثيليه , ضمير أبلة حكمت و ليالي الحلميه و أربيسك و الضوء الشارد و
رأفت الهجان , كل حاجه لها طعم , حتى الموسيقى التصويريه مميزه لكل برنامج , وداننا
حفظتها .
.
و في خلال العشرين
سنه دي تحسو اننا دخلنا خلّاطه من بتاعة المباني و الصبّه , القنوات بقت 5 ألاف و الجرايد
بقت 50 ألف و برامج الدين بقت اكتر من اللي بيقعد قدامها , و اللي بيكتب أكتر من اللي
بيقرا , و اللي بيفتي في الدين اكتر من اللي بيصلي , و أي واحد يعمل برنامج و أي واحد
يعمل قناه و أي واحد يعمل جريده وأي واحد يغني و أي واحد يفتي و يبقى شيخ , وأي واحد
يبقى مناضل سياسي حتى غاده ابراهيم , و معرفشي ليه عقولنا مضطره تستوعب برميل الطرشي
الكبير اللي وقعنا فيه ده , و لازم نعلق على كل حدث بما إننا في ثورة معلوماتيه و نت
و فيس بوك , و علاقه السي أي ايه بالمخابرات التركيه ؟ كوبري أجا مظبوط كده ولا مايل
شويه ؟ طب ايه العلاقه بين الماسونيه العالميه و اللبان الدكر ؟ تفتكرو العمليات الإرهابيه
في اوروبا هتأثر على سعر ال 500 نوع جبنه بتوع فرنسا ؟ هما مش اكتشفو حقل غاز في البحر
المتوسط اومال يعني محدش خد غطس كده و عبّى برميلين غاز ولا حاجه , اهو نشوف البشاير
, الرافال كان لازمتها ايه ؟ ليه ماركزناش عال f16
و كترنا منها ؟ عايزين بقى نعرف ميزانية الجيش و خطته في سينا بالظبط
و نحللها و احنا قاعدين .
.
دماغنا ورمت و
عهد الله , وبقيت أشوف شباب في العشرينات ضغطهم عالي بشكل بشع , انا عايز ارجع تاني
لأيام الشعراوي ودرية شرف الدين وفطوطه و انيس منصور و الكلمات المتقاطعه و تمثيلية
الساعه 8 بس يارب مايجيبو جلسه لمجلس الشعب .
...............................................................................................................................
Mohamed
Hussein
31
مارس 2016·
لو عايز تبقى مشهور
أوي في مصر و تمضي على أوتوجرافات .
.
ماتفكرشي كتير
في تفوق علمي أو تفوق أدبي أو موهبه من أي نوع و المصطلحات البيزنطيه دي , الكلام ده
ملوش لازمه عشان ماتصدعشي دماغنا , الشهره لها سكك تانيه خالص :
.
1- لو بنت و أموره
شويه و جسمك حلو ( يووه يا ستي أقصد حسنة المظهر ) , و معندكيش مانع من غمزه و همسه
و ابتسامه و نظره و لمسه ( عالسريع كده ) هتتفتح لك الأبواب المقفوله , ركزي على رئيس
التحرير بتاع الجريده أو رئيس القناه , شوية دلع حلوين بقى , قشطه عليكي , هاتي قلم
من نوع فخيم عشان توقعي على الأوتوجرافات للعامه و الغوغاء و الدهماء و الشناقيط أمثالنا
.
.
2- مش بنت ولا
مزه , انت أصلا شاب في مقتبل العمر , برضه محلوله , طول شعرك و اعمله ضفيره و اربطه
بأستيك من ورا و ماتحلقش دقنك بس حدّدها , الشاسيه ده بتاع المفكرين , و ادخل بقى بالبؤين
بتوع حكم العسكر و ميزانية الجيش و تنمية الإنسان و مفيش مانع من كلمتين انجليزي و
ليكن مثلا , البنيه التحتيه infrastructure , و حاول تفتح بؤك قبل و بعد كل كلمه كام ثانيه
كده , دليل على الإمتعاض ممكن أو ان جواك كلام كتير اوي عايز تقوله و سيل جارف من الأفكار
الجهنميه اللي هتخلينا ننام في مصر و نصحى نلاقي نفسنا في سويسرا من غير خطف طيارات
ولا يحزنون .
.
3- انت مش بنت
مزه ولا شاب في مقتبل العمر ولا عندك شعر اساسا عشان تعمله ضفيره , برضه محلوله , يبقى
عليك و عالأزهر , و ادخل بالبؤين بتوع جامعة الأزهر و تفريخ الإرهاب و مشروع كتاكيت
بنها ده , مع ان الازهر ملوش فروع في ليبيا و سوريا و الجزائر و تونس و العراق و أنقره
وباريس و بروكسل و باكستان و افغانستان , معرفشي الكتاكيت الإرهابيه اللي بيتم تفريخها
في الدول دي مين اللي بيرقد عليها بالظبط ؟ , لا استنى الحكايه ماخلصتش لحد كده , شوف
لك محامي بقى عشان يرفع عليك قضيه , أه يرفع عليك قضيه , عشان انت اصلا مش معروف و
بالتالي الأزهر مش هياخد باله انك بتشتمه بالأب و القمع , هات محامي على حسابك و قوله
يرفع عليك قضيه بتهمة ازدراء الأديان ( االتهمه دي حلوه و ليها شمخه غريبه ) , و هات
محامي تاني عشان يترافع عنك في نفس القضيه , لا يطلعك براءه ايه يا جحش , هو انت لما
تطلع براءه هتتشهر ازاي ؟ انت تتخبط لك سنه سجن , مايجراش حاجه , اعتبر نفسك في عقد
عمل في الأردن , و بس يا سيدي , هتطلع من السجن بطل قومي و مجدد و إمام المثقفين و
المفكرين و شعله للتنوير و اللمبه القلووظ اللي هتنور لنا الدرب المظلم , يعني فضائيات
و توكشوهات و الساعه ب 10 أخضر و أي كتاب هتكتبه ياكشي يكون بعنوان ( الإلحاد اللذيذ
و زبل المعيز ) هيتنسف من السوق نسف .
..........................................................................................................................
Mohamed
Hussein
31
مارس 2016·
لمار : بابا عايزين
200 جنيه في المدرسه عشان الصوره بتاعة حفلة التخرج
انا : 200 جنيه
ليه ؟ ده يوسف شاهين الله يرحمه لو كان هيصورك و يعملّك فيلم تسجيلي قصير مكانشي هيطلب
200 جنيه .
.
لمار : يا بابا
دي حفلة التخرج و هلبس فيها الروب انا و صحابي , و كلهم دفعو .
انا : حاضر يا
لمار هديكي الفلوس , فكرتيني بحفلة التخرج بتاعتي بس يوميها مادفعتش حاجه , النقابه
اللي عملتها على حسابها , ياااااه , أخيرا يا لمار خلصتي بكالوريوس فنون جميله و هتلبسي
الروب و تحققي حلم باباكي , الأيام بتجري بسرعه أوي .
.
لمار : فنون جميله
ايه ؟ يا بابا انا في كي جي 2 .
...........................................................................................................................
Mohamed
Hussein
30
مارس 2016·
فيه ناس من اللي
كانو مخطوفين امبارح زعلو عشان مالحقوش يتصورو سيلفي مع الخاطف , و واحد بيقول كانت
تجربه لذيذه مش بتتكرر غير مره في العمر , و واحد من اللي كانو عالطياره اتصل بمراته
أوّل ما لقط شبكه في قبرص وقال لها احنا مخطوفين و انا الحساب بتاعي في البنك رقمه
كذا و فيه مبلغ كذا , الست نسيت ان جوزها مخطوف و قعدت تأكد عليه يقول بيانات الحساب
صح .
.
و واحد صاحبي لسه
خاطب بيقول دخلت عالنت وكنت مهموم جدا باخبار الطياره المخطوفه وفاتح ييجي 12 موقع
اخباري مع بعض , و بعد 3 دقايق لقيت خطيبتي باعتالي رساله بتقول : انت عالنت بقالك
3 دقايق و ماقولتليش ( صباح الخير يا حياتي ) زي ما بتعمل كل مره , تبقى اكيد لسه زعلان
من كلامنا امبارح , قول انك لسه زعلان ؟ و زعلان ليه بقى ان شاء الله ؟ هو انا كنت
عملت ايه يعني ولا كنت عملت ايه ؟ مابتردش ليه ؟ , هتعمل فيها زعلان ؟ أوعى تكون بتكلم
واحده تانيه ؟
.
احنا شعب يعجز
العالم أجمع عن توقع رد فعله في أي حاجه بتحصل , على فكره أنا مصدق إن أجدادنا الفراعنه
بنو الأهرامات اللي وزن الحجر الواحد فيها كذا طن من غير نظرية ( تفريغ الهوا ) ولا
حاجه , النظريات دي مابتفرقش معانا , ماتلزمناش , و عهد الله ماتلزمنا , احنا الفراعنه
, لا بتوع قواعد ولا بتوع نظريات ولا لنا كتالوج أساسا .
.....................................................................................................................................
Mohamed
Hussein
30
مارس 2016·
الواد أبو جلابيه
بيضا و تحتها بنطلون ترينج و شبشب بلاستيك اللي قاعد في مندرة بيتهم و بيحلم بأستاذية
العالم هو و الواد التاني أبو بوستات بتجيب 3 لايك و 2 كومينت اللي حاسس ان صفحته بتاعة
الفيس خطر على نظام الحكم و انه متراقب من المخابرات و الأمن الوطني و الصاعقه و حرس
الحدود , الاتنين بيحاولو يقنعو نفسهم و يوهمو ال 7 أنفار اللي حواليهم إن السيسي كل
ما بياخد قرار أو يقيل مسئول بيفضل بعدها ركبه بتخبط في بعض و مش عارف ينام طول الليل
لأنه خايف من رد فعل أبو جلابيه و شبشب و ابو 3 لايك و 2 كومينت , عشان كده بيضطر السيسي
انه يعمل مصايب و كوارث عشان يداري بيها على قراراته !! .
.
زمان أيام ما كنت
في الجامعه و كنت ساكن في سكن طلبه خارجي , كان فيه بواب عماره جنبنا اسمه ( أبو نحمده
) , الراجل ده اول ما شوفته لاحظت ان حركاته غريبه و بيتلفّت حواليه كتير و انت بتكلمه
, و يبص يمين و شمال و فوق و تحت بحركات سريعه , و لما علاقتي بيه اتوطدت و بقينا أصحاب
سألته هو ليه بيتلفّت كتير كده ؟ قام قرّب مني و قالي بصوت واطي : أصل المخابرات الامريكيه
بتراقبني !! , قلت له عارف يابو نحمده انا لما ببقى فايت عالعماره اللي انت شغال فيها
دي بحاول امشي بعيد عنها ليه ؟ قالي ليه ؟ قلت له عشان خايف صباع رجلي الصغير يخبط
في العماره و يوقعها , و السكان غلابه مالهمشي ذنب , و بعدها قطعت علاقتي بابو نحمده
عشان ماتلطّش في موضوع المخابرات الأمريكيه ده .
.
عايز أقول لصديقي
الأولاني ( أبو جلابيه و شبشب ) : انتو قعدتو 88 سنه تجمعو تبرعات و تشترو سلاح و يجيلكو
تمويل و تعملو فرق كشافه و اجتماعات تحت الأرض و اجتماعات فوق الأرض و لجان و لجان
نوعيه وجمعيات و دعم من فلان و علان و ترتان و ابو قرادن , ولما الشعب قرر انه يدوس
عليكو اتلمّيتو في ساعتين زمن , كأنكو جوزين فراخ بنجيبهم من العشّه .
.
و عايز أقول لصديقي
التاني , ماينفعش تبقى جايب 3 % و تقعد تهلفط في الكلام و تقول انا فاتني طب و صيدله
على ربع درجه .
..............................................................................................................................
Mohamed
Hussein
29
مارس 2016·
نظرية برضه
.
المخابرات المصريه
هي اللي دبرت حكاية خطف الطياره دي عشان تداري على اقالة هشام جنينه , اه صح , كده
بانت لبّتها , يعني الدوله عشان تداري على موضوع هشام جنينه ( اللي 90 % من الشعب لو
سألتهم عليه هيقولو ده الباك الشمال بتاع الأهلي في التسعينات ) تقوم الدوله تدبر لخطف
طياره و العالم كله يتكلم علينا و يتكلم عن امننا و مطاراتنا و السياحه تتأثر تاني
و أزمة الدولار تبقى أزمتين ؟ وجهة نظر من واحد معاه دكتوراه في شم الكوله , ده طبعا
على أساس ان هشام جنينه ده جبار و مخيف و بيمشي عالحيط و بيطلّع نار من ودانه ؟!
.
و بنفس النظريه
و نفس المنطق أكيد المخابرات هي اللي دبرت لفوز مصر على نيجيريا عشان تداري بقى على
موضوع الطياره اللي اتخطفت ( رمضان صبحي ده أصلا عسكري أمن مركزي و متنكر ) , و كنتو
عايزين تحكمو مصر و تصنعو البديل ؟؟ ليه يا جدعان ؟ دي مصر لو بقالها 7 الاف سنه ماشيه
في الحرام و دايره على حل شعرها ربنا مش هيعاقبها بالشكل ده .
...............................................................................................................................
Mohamed
Hussein
29
مارس 2016·
حطيت صوابعي في
الشق
.
- أزمة الدولار
كان سبب من أسبابها الرئيسيه ضرب السياحه خصوصا بعد حادث الطائرة الروسيه في سينا
.
.
- الدولة و الاجهزه
الامنيه بدأت تشدد الإجراءات في المطارات و تسابق الزمن في محاولة لعودة جزء من السياحه
في موسم الصيف .
.
- بالفعل ردود
الأفعال بدأت تتغير شوية و بدأت السياحه ترجع تدريجي .
.
- ننام و نصحى
بقى على خبر اختطاف طائرة مصريه و هبوطها في قبرص .
.
- قبل مانعرف تفاصيل
الخبر و الهدف من الخطف لازم نفهم ان كله هيبقى مجرد هري و ان السبب ايا ما يكون مش
هيفرق كتير .
.
- المهم و المهم
فعلا هتلاقيه في الأخبار دي , صورة مصر للطيران egypt air في كل قنوات العالم ( سمعه سيئه ) , كلمة مصر و مطار
مصري اللي هو برج العرب ( سمعه سيئه ) , الدول و الحكومات هتعلن تأجيل رحلاتها السياحيه
لمصر .
.
- اللي خطف الطياره
واحد مجرم و مختل عقليا , و عايز يبعت جواب لطليقته , لا عايز يبعت الخضار لمراته
, لا عايز اللجوء السياسي , لا عايز الإفراج عن مساجين , كل ده مش مهم .
.
- مين اللي صور
المختطف و هو لابس حزام ناسف و مين اللي بعت الصوره لوسائل الإعلام ؟ برضه مش مهم
.
.
- الحزام ده ناسف
ولا لا ؟ غالبا لا , ممكن يكون ديكور مش اكتر , و عامل الخوف كفيل جدا بالسيطره على
طاقم الطياره حتى بحزام ناسف ( عيره ) , انت ممكن تخطف طياره بسكينه بلاستيك او حتى
قصّافة ضوافر .
.
- الحوادث المشابهه
في الدول التانيه مابتلاقيش رد فعل عنيف تجاه الدوله , بالعكس بتلاقي تعاطف و مابتسمعش
عن وقف رحلات و لا تعليق أفواج سياحيه , عندنا احنا بس بيبقى رد الفعل عنيف و سريع
.
.
- ركّز بقى في
رد الفعل العالمي مش في الحادثه نفسها عشان هي حادثه عبيطه , مصر مطلوب تركيعها اقتصاديا
و اللعب بيتم عالسياحه , ركّز على رد الفعل في وسائل الإعلام و رد فعل الحكومات و الدول
و الترويج و التشهير السريع جدا .
.
- الساده الكولجيه
, كبيركو و صغيركو , يارب تفهمو بقى , الحكايه مش طالبه عبط و هبل و استظراف و سخافه
و شماته , الحكايه لا ليها علاقه بنظام سياسي ولا بحكومه ولا اللي انت بتعمله ده اسمه
معارضه , الحكايه ان المؤامره على دول كتير انتهت و حققت نتايجها المطلوبه بس جت عندك
انت و وقفت , و مطلوب تركيعك و كسرك , انت يعني مصر , يعني الدولة مش السيسي ولا الحكومه
.
...........................................................................................................................
Mohamed
Hussein
28
مارس 2016·
هشام جنينه
.
- هشام جنينه طلع
بتصريح من فتره , تصريح بيقول ان حجم الفساد في مصر يساوي معرفشي كام مليار جنيه و
كام مليون و كام ديشيليون و بريزه لجل الحلفان .
.
- هشام جنينه جاب
في تقريره كلام عن مخالفات إداريه متراكمه من 15 سنه و مخالفات من أيام أحمد عرابي
و شجرة الدر و ضافها للتقرير .
.
- التقرير مالوش
علاقه بالسيسي ولا بالحكومه الحاليه , عشان بس حماده يبلع ريقه و يقعد في حتة ناشفه
.
.
- تصريح هشام جنينه
و تقريره كان لهم مردود زي الهباب على الإستثمار و الإقتصاد و حاجات كتير كده .
.
- الدوله قررت
انها تشكل لجنه لمراجعة تقرير هشام جنيه , اللجنه كانت من جهات حكوميه و رقابيه رفيعه
و من ضمنها البرلمان ( و ده مش معناه ان الدوله مفهاش فساد متراكم من سنين طويله بس
المبالغات و الأرقام العشوائيه ممكن يخلّو الدوله تجيب جاز ) .
.
- اللجنه خلصت
شغلها و عملت تقرير بيقول ان تقرير مولانا هشام جنينه مليان مغالطات و تكرار لأرقام
, و من الأخر يعني حط عيشه على أم الخير و كرر ام الخير 9 مرات .
.
- هشام جنينه عمل
( بُنط ) جرئ و حركة كحرته و قال انا عندي كلام هقوله بس مش هقوله قبل ذكرى 25 يناير
ما تفوت , قال يعني خايف عالبلد و أمنها و استقرارها , حركة اتهرست في مليون فيلم قبل
كده .
.
- 25 يناير فات
و بعده 35 يناير و 75 يناير و هشام جنيه ماطلعش و قال الكلام اللي عايز يقوله ولا المعلومات
الخطيره اللي عنده و شغل الديب السحليوي ده .
.
- نيابة أمن الدوله
العليا استدعت هشام جنينه للتحقيق بتهمة تعريض السلم العام للخطر و إضعاف مؤسسات الدوله
, يعني شكله هيتنفخ بإذن واحد أحد .
.
- واحد يقولي طب
ما نعتبر تصريحات هشام جنينه حرية رأي و تعبير ؟ نعم يا جحش !! حرية رأي و تعبير ؟
, هو هشام جنينه كان بيشتغل فرّاش في جامع ؟! ده رئيس الجهاز المركزي للمحاسبات , يعني
التصريح و الكلمه و الحرف يتحسبو عليه و على الدوله و عالإقتصاد و البورصه و الكل كليله
.
.
- الكولجيه أيام
ما بدأت الهوجه بتاعة هشام جنينه طبعا اعتبروه مناضل و بطل قومي و أيقونه ( أيقونه
رقم 56734 ) , و الأيام الجايه هيطالبو ان صورة هشام جنينة تنزل على علبة الكوله .
...................................................................................................................................
Mohamed
Hussein
28
مارس 2016·
عارف انت الشخص
اللي بتلاقيه متفائل كده و متشبث بالأمل و دايما يقول بكره هيكون احلى ؟ الشخص اللي
بيتعمد دايما إن عنيه تقع على زرعه و خضره و صورة حلوه و بيحمد ربنا باستمرار , الشخص
ده مش عبيط ولا جاهل و لا واهم و لا حالم و لا قاعد على شجره يكتب أشعاره , الشخص ده
بني أدم عايز يعيش و يبني مستقبل لنفسه و لولاده , و عارف كويس أوي إن الكأبه و التشاؤم
و الإحباط لما يطولوه هيكسرو ضهره , هيبقو السلاح اللي هيمسكه بإيده عشان يهد بيه نفسه
و بيته و بلده .
.
طب عارف انت الشخص
اللي بتلاقيه دايما متشائم و مكتئب و سوداوي و كل ما يسمع خبر حلو يقفل ودانه و كل
ما يشوف صوره حلوه يغمض عنيه ؟, و دايما يدور في أجندته السوده على حيثيات و أسباب
تدعو لتفنيد كل حدث بطريقة التشاؤم و السواد ؟ الشخص ده مش عميق ولا مثقف و جوّاني
و عارف الفوله ولا حاجه , ده حد مريض نفسيا ( و عنده هُسهُس ) , و مرضه ده اتمكن منه
فبقى شايف انه الوحيد اللي بيفهم و إن الديناصورات على الأبواب و جايبين معاهم الطاعون
و الكوليرا ( فوق البيعه ) , و لازم ولابد نعيش و ننحشر معاه في أم علبة الكوله بتاعته
و إلا مانبقاش مثقفين و مفكرين .
.
يا جحش حاول تتفائل
شويه , حاول يعني ولو من باب التغيير , طب أقولك حاجه , بلاش تتفائل , ادخل استحمى
, أه خد دش و ماتخافشي , المايه اللي هتنزلك من الدش مفهاش كهربا , و ممكن كمان تملى
البانيو و تقعد فيه , و لو حسيت ان حاجه جايه من وراك بتزغزك ماتترعبش و تقول بس دي
أكيد أناكوندا عملاقه ( بطّل تتفرج على أفلام رعب ) , الحاجه اللي هتزغزك في البانيو
دي تبقى إيد المدام اللي جايه تهزر معاك يا مولانا .
................................................................................................................................
Mohamed
Hussein
28
مارس 2016·
ماهو لو كنت مصدق
إن ايطاليا و أوروبا بحكوماتها و برلماناتها و اعلامها و سلطاتها مش وراهم سيرة غير
الشاب ريجيني اللي اتقتل عشان أصل عندهم المواطن له كرامه وله تمن و ابننا يتتاقل بكنوز
الدنيا و الليله دي يبقى كمان لازم تصدق ان التفجيرات اللي حصلت في باريس و بروكسل
ده عمل ارهابي و ضعف في الأجهزه الامنيه عندهم ( و جايز فساد و رشوه ) مش تقول أصل
الحكومات الأوروبيه هي اللي بتعمل التفجيرات عشان تلاقي ذريعه لمعرفشي ايه في الشرق
الأوسط .
.
ماهو يا مولانا
ماينفعش تبقى حمار و بتؤمن بالحاجه و عكسها , لازم تفكر شويه , حاول يعني , التفكير
مش هيأثر على نضارة بشرتك و لا هيخلي شعر صدرك يطلع بدري , قولي بقى : هو المواطن الاوروبي
غالي أوي وله تمن و اوروبا مابتنامشي طول الليل عشان بتتشحتف على ريجيني و لّا المواطن
الأوروبي مالوش أي تلاتين لازمه و حكومته بتفجّر لها بتاع 200 مواطن على غيار الريق
عشان تلاقي ذريعه لسياسات خارجيه ؟!! .
..................................................................................................................
Mohamed
Hussein
28
مارس 2016·
لما شوفت تعليقات
بعض المصريين من فصيلة الخرفان على الخبر بتاع ترتيب جيش مصر بين جيوش العالم ,و قريت
كمية لا بأس بها من العته و السماجه والوقاحه و الإنحطاط ( مضروبين في خلاط واحد )
, قعدت أفكر: الحل مع العيال دي ايه ؟ قلت يدخلو الجيش و يلبسو بياده و يقفو خدمه بالسلاح
, و يعملو حفره برميليه بالكوريك و يترمو فيها و ينامو جنب عربية ( زِل ) في الصحرا
في عز البرد ويدخلو مشاريع حرب , و ياكلو عيش بايت ( جرايه ) و يغمسوه بزوريح ( الخضاراللي
قعدت اكله سنه و انا مش عارف هو ايه و سميته وقتها زوربيح ) جايز يسترجلو شويه و ينضفو
, بعدين افتكرت ان جيش مصر العظيم مابيقبلشي في صفوفه خرفان , جيش مصر مابيدخلهوش
( لا مؤاخذه خواجات ) , و دي كانت من أهم انجازات عبد الناصر .
.
عزيزي الخروف الإخوانجي
أبو دقن , هتعيش خروف بتسخر من الجيش اللي حاميك , و لما تكبر شويه هتبقى خروف إرهابي
و هتروح تقتل في جنود بلدك ( و تسيب أعدائك ) و انت فاهم انك بكده بتعمل عمل عظيم و
انك لما تموت هتبقى شهيد و حور العين هيقفو طابور و يستنوك بقمصان نوم ايطالي فوق الركبه
, و كأن ربنا سبحانه و تعالى خلق حور العين عشان يهادي بيهم الخونه و الإرهابيين و
المعفنين , مش بقولك خروف .
...................................................................................................................
Mohamed
Hussein
27
مارس 2016·
على إسم مصر
.
1 - جلوبال فاير
باور أصدرت تصنيفها بتاع 2016 لترتيب جيوش العالم من حيث القوه , و مصر كانت في المرتبه
العاشره ( أه جيش المكرونه و الكفته )
.
2 - التصنيف بيستبعد
الأسلحه النوويه , على اعتبار ان استخدامها شبه مستحيل لأنه بيكون وبال عالكل بما فيها
الدوله اللي بتستخدمه ( يعني أسلحه مُعطّله ) , و الرد بيكون نووي برضه حتى لو كانت
الدوله المعتدى عليها معندهاش سلاح نووي !! , اسمع الكلام بس , وقت الجد هتلاقي النووي
بيتباع عالرصيف زي الشرابات و ريموت التلفزيون , و نقل قنبله نوويه من دوله لدوله حاليا
بقى أسهل من نقله مروحه او كاسيت من ابو روحين .
.
3 - مصر هي الأقوى
في أفريقيا بلا منازع أو منافس .
.
4 - اسرائيل في
المرتبه التاسعه يعني قبل مصر مباشرة , و تركيا و ايران بعد مصر , و باستمرار هتلاقي
الأربع جيوش دي بيتبادلو الاماكن , الجيوش الأربعه الأقوى في الشرق الأوسط , طبعا احنا
لاين تاني بعد اللاين الأولاني بتاع أمريكا و روسيا و الصين , عشان بس لو حد حاول يقنعك
ان تركيا هتفشخ روسيا تقوم على طول ترزعه على قفاه و تقوله يا حمار تركيا محميه بحلف
الناتو مش اكتر .
.
5 - فيه دول أوروبيه
كتير جيوشها بعدنا في التصنيف زي ايطاليا و بولندا و اسبانيا و حتى ألمانيا , بس في
النهايه كل الدول دي أعضاء في حلف الناتو , عشان بس تفهم ان التحالفات بتبقى مصدر قوه
ازاي و ان العكس من التحالفات هو التقسيم , اوعى حد يضحك عليك و يفهمك ان تقسيم فلسطين
بين فتح و حماس كان انجاز عظيم ولا تقسيم السودان كان عمل نضالي جبار لعمر البشير
.
.
6 - اثيوبيا تصنيفها
ال 37 يعني بتلعب في دوري الشركات , برضه نفس الحمار ضحك عليك و فهمك ان مصر تعجز عن
فرم أثيوبيا ( في ماكنة الكفته ) , انما حكاية سد النهضه راشق فيها اسرائيل و أمريكا
, الحكايه مش بالسذاجه اللي حضرتك فاهمها , و الحكومه الإثيوبيه أعبط و اتفه من انها
تاخد قرار بانشاء سد مائي على منبع نهر النيل .
.
7 - السودان بتاعة
البشير لا بتلعب في الدوري الممتار ولا حتى في دوري الشركات , ترتيبها ال 80 , يعني
البشير بالكتير يعرف يلعب في مناخيره , و كان معاه حق وزير الدفاع السوداني لما قال
ان الطيار الإسرائيلي كان طافي النور !! , حد يقول للبشير بلاش هلفطه بالكلام و يقعد
بالعصايه بتاعته على جنب .
.
8- سوريا كانت
بتاخد ترتيب متقدم , اعتقد من العشرين الأوائل و تراجع ترتيبها لل 32 بعد الدمار بتاع
ال 5 سنين اللي فاتو , و هو ده الإنجاز الوحيد لأمريكا في أخر 5 سنين , قصدي الإنجاز
الوحيد لأم الربيع العربي , و كان مقدر لمصر تكون كده , بس جيش الكفته حماها و حفظها
و حمى نفسه و صعد في الترتيب ( أسف اني جرحت شعور الخرفان و الكولجيه ) .
.
9- دوّر على العراق
في التصنيف , هتلاقيها ال 84 , حضرتك متخيل ؟ الجيش العراقي اللي كان صيته مسمع لأخر
الدنيا بقى ال 84 , و كله بفضل الديموقراطيه الامريكاني حتى اسألو قناة الجزيره .
.
10 - كمية الأسلحه
الحديثه اللي جابتها مصر في اخر سنتين , من طيارات و قطع بحريه و رادارات و تنوّع مصادر
التسليح بعيد عن امريكا ( و شرها ) مش بس كان ضروري عشان العالم و المنطقه في وضع مضطرب
و قدامنا تحديات أصعب من أي مرحله في تاريخ مصر , إنما كمان بيبقى عامل ردع و رساله
لكلاب السكك اللي بره بتقول لهم back down
.
.................................................................................................................................
Mohamed
Hussein
27
مارس 2016·
مش بالصدفه
.
- لما يكون عندك
قطيع بيتحرك بمجرد إشاره في اتجاه ما , يبقى ماتركزشي مع القطيع عشان هما مجرد خرفان
بينفذو تعليمات من غير ما يكونو فاهمين حاجه ( مبدأ السمع و الطاعه ) , ركز مع قيادات
القطيع و تعليماتهم و مع راعي الغنم الرئيسي .
.
- مش بالصدفه ان
اشاعاتهم من سنتين تلاته على السيسي كانت بتنصب كلها في ان والدته يهوديه و خاله عضو
في الكنيست , الهطل ده بينشره القطيع بمنتهى الحماس , لازم كلمة يهوديه تتقال و كلمة
الكنيست , مش مسيحيه ولا بوذيه ولا خاله عضو في مجلس الدوما , لا يهوديه و كنيست يعني
أي حاجه نلمّس بيها على اسرائيل .
.
- مش بالصدفه لما
الناس اقترحت ترحيل جزء من أهالي سينا لمساكن أمنه و تطهير المنطقه دي عشان نخلص بشكل
كبير من الإرهاب و الأنفاق اللي واصله للبيوت يقوم القطيع تجيله التعليمات اللي بتقول
, إن السيسي عايز يفضّي شمال سينا من أهلها و يسلّمها لاسرائيل !! , برضه كلمة اسرائيل
لازم تظهر هنا , و جيش مصر اللي بيحارب من سنتين بيقدم التضحيات دي عشان يدي أرض لاسرائيل
!! , جيش مصر اللي دخل حرب نظاميه كامله ضد الصهاينه و امريكا في 73 و قدّم ألاف الشهداء
عشان يحرر أرض سينا هيسبهالهم كده محبه .
.
- مش بالصدفه ان
الطيران المصري لما يطلع يجيب حق الشهدا و يدك أوكار الإرهابيين في سينا و يجيب عاليها
واطيها تقوم التعليمات تيجي للقطيع بان الطيران الإسرائيلي شارك مع الطيران المصري
!! , برضه لازم كلمة اسرائيل تظهر للقطيع .
.
- الحكايه دي كلها
لها تفسير بسيط جدا , اسمه ( الإسقاط ) , ريري سيلان اللي بقالها 88 سنه قاعده على
حجر أمريكا و نايمة في حضن الخواجه الصهيوني لازم تعمل اسقاط لحالتها الزباله دي على
غيرها و تتهم غيرها بكده , و الحقيقه بتقول ان تنظيم الإخوان الصهيوني نشأ مع بداية
نشأة الكيان الصهيوني الأم , و إن أمريكا على مدار عشرات السنين استخدمت كل أوراق الضغط
الشرعيه و الغير شرعيه لحماية كيانين اتنين فقط , اسرائيل وجماعة الإخوان الإرهابيه
, اسألو مبارك و السادات و عبد الناصر عن علاقة أمريكا بالإخوان , اسألو الدوله المصريه
هي ليه ماقدرتش تقضي على شوية بهاليل بدقون يتلمّو في ساعتين زمن .
.............................................................................................................................
Mohamed
Hussein
26
مارس 2016·
تعريفات
.............. تعريف الكولجي
.
الكولجي هو الشخص
اللي بدأ حياته بمعارضة لنظام حكم ما بشكل موضوعي ( المرحله الاولى ) , و بعدين الحكايه
فرطت منه شويه فبقى يعارض أي حاجه في أي حته من غير حتى ما يسأل و لا يستفسر , على
طريقة : خُلقنا لنعترض ( المرحله التانيه ) , و بعدين زيت الفرامل بتاعة يختفي فجأه
و مايبقاش فيه فرامل فيقوم يتحول للتريأه على اسم مصر و تاريخها و جيشها و عبد الناصر
و الازهر كنوع من الوجاهه الإجتماعيه و في المقابل يبدي إعجاب شديد بأي كلب جربان في
أوروبا وأي حاجه مكتوبه بالإنجليزي و يتعاطف مع فرنسا و بلجيكا و يحط العلم بتاعهم
على صفحته ( المرحلة التالته ) , و بعد كده يعيش في دور قناوي اللي رفضته هنومه و يستعجب
جدا انها رفضته مع انه عريس لُقطه و أي ست تتمناه , يقوم ينزوي على نفسه و يتفرغ لشم
الكوله و عقله يتحول لماكنة بمنافله يقعد كل يوم يشم كوله و يلفّ المنافله تقوم الماكنه
تنشر الإكتئاب و السواد و الإحباط في الأوضه اللي هو قاعد فيها و قافل بابها على نفسه
يقوم يكتئب اكتر و يشم كوله اكتر و يلف المنافله وهكذا , و بعدها يتعايش تماما مع الجو
ده , و يشتمك بالأب و الأم لو حاولت تقنعه ان بره الأوضه دي فيه أكسجين نقى و هوا و
نور ربنا ( المرحله الرابعه )
...........................................................................................................................
Mohamed
Hussein
26
مارس 2016·
لما بيحصل هجوم
إرهابي غادر على كمين او مجموعة جنود مصريين في سينا بيكون الرد المصري قوي جدا , و
من غير تأخير , و كل ارهابي بييجي سينا سواء من الأنفاق أو من الجماعه الإرهابيه اللي
بنعلفها عندنا بيبقى عارف و متأكد ان الموت هو مصيره النهائي , و الحكايه بالنسباله
مسألة وقت , يعني من الأخر كده بيبقى داخل سينا عشان يقابل الحور العين مباشرة ( زي
ما قاله شيخه الإرهابي الكبير ) , و جيشنا مش بيخلي نفسهم في حاجه و بيبعتهم جماعات
للمصير المحتوم .
.
زيارة وفد حماس
اللي كانت من كام يوم بعد ما أعلنت الداخليه تورطها في عملية اغتيال النائب العام
, اعتقد الزياره دي و مقابلتهم لمسئولين مصريين في الأجهزه الأمنيه كانت رسالة التحذير
الأخيره من مصر , عشان نقفل الحنفيه , الجيش المصري عقيدته مفهاش تفاوض مع إرهابيين
ولا سياسة ( قوم نتصالح ) مهما كانت التضحيات , أقل حاجه عنده هي التحذير , و وقت ما
هيفيض بيه هيغيّر اتجاه الطائرات المجهوله من الغرب للشمال الشرقي , مصر مش هتغلب مع
شوية بهاليل بدقن , حتى لو كانو صبيان البلطجي الامريكي .
.
اه بالمناسبه
, حركة حماس معلّقه لوحه كبيره اوي في قطاع غزه , لوحه بتقول القدس تنتظر الرجال ,
مين بقى الرجال ؟ الرجال يا سيدي اللهم صلي عالنبي يبقو جوز موزه و ابنها و الخواجه
بتاع تركيا ( الصوره دي ناقصها أوباما و نتنياهو ) , امنعو الضحك , هما دول الرجال
؟ , دانا كنت فاكر التلاته دول تحديدا بيتنافسو على لقب ( أكتر واحد لامؤاخذه ) , يعني
القدس اختارت من الجيوش العربيه و الإسلاميه الدويله اللي معندهاش جيش اصلا و بتحميها
قاعده امريكيه و الدوله اللي عندها قاعده امريكيه و محمية من الناتو , يعني نفهم من
كده يا ولاد ان امريكا و الناتو هيحررو القدس من قبضة الصهاينه !! .
.
ماهي حاجه من اتنين
, إما قادة حماس دول مخابيل و بيسرحو بالشعب الغزاوي أو خونه و برضه بيسرحو بالشعب
الغزاوي , انا شخصيا شايف انهم مش مخابيل !! .
....................................................................................................................
Mohamed
Hussein
26
مارس 2016·
اليوم السابع
.... محررين و صحفيين مع إن مصر فيها أزمة بوابين
.
- محرر اليوم السابع
كتب عنوان عجيب لخبر لقاء وزيرة الهجره بالجاليه المصريه في كوبنهاجن , عنوان الخبر
بيقول ( بالصور ...وزيرة الهجره تلتقي بأبناء الجاليه المصريه و النوبه ) !! , اي عيل
صغير عمره 8 سنين و هو ب ( يفرّ ) في شريط الأخبار هيتوقف عند العنوان ده , مش لأهمية
الحدث , إنما لوقاحة العنوان , أبناء النوبه اللي قابلتهم الوزيره هما مصريين أكيد
, يعني زي أبناء المنوفيه و ابناء دمياط , حرف العطف أيها المحرر الصحفي الجهبذ لازمته
ايه ؟ هل سهوا مثلا ؟ يعني ممكن سهوا نرسم خريطه لمصر من غير حلايب أو من غير سينا
؟! أو نصيغ عنوان لخبر بيقول ( السيسي يعتمد ميزانية خاصه لتطوير شبكة الصرف الصحي
في جميع المدن المصريه و حلايب ) ؟!
.
- خالد بيه صلاح
, إعلامي كبير و كاتب صحفي عملاق و محلل سياسي بديع و فيلسوف و مُنظّر و مدرس فرنساوي
لحد ما نلاقي مدرس فرنساوي , و موقعه الإخباري مهتم بقضايا الخلع و عناوين من نوعية
( زوجه تخلع زجعها عشان مابيعرفش ) , ( زوجه في قضية خلع : زوجي شاذ ) , ( زوجه تتهم
زوجها انه كان بيجيب صحابه ينامو معاها أو معاه ) , الإخبار و الإفتكاسات دي بتعجب
خالد صلاح اوي , النموذج الحديث من الجرايد الصفره بتاعة زمان , اعلام محترف بقى و
نزيه و توعوي و تثقيفي , و الصحفي المفروض مايتحبسش لا في قضايا رأي ولا حتى يتحبس
لو اشتغل حرامي غسيل .
.
و لما تعرف إن
اليوم السابع بتحتل المركز الأول في المواقع الإخباريه في مصر يبقى صلاة النبي أحسن
( بصوت توفيق الدقن ) .
...........................................................................................................................
Mohamed
Hussein
26
مارس 2016·
فقط في أفريقيا
.
الكوره توصل للاعب
و اللاعب يبقى انفراد بالمرمى يقوم الحكم الأفريقي مفكر لمدة ثانيتين , يا سنه سوخه
, دي الكوره مع محمد صلاح و ده لو انفرد بالمرمى هيجيب جونين مش جون واحد , طب اعمل
ايه و اتصرف ازاي ؟ أروح اكعبله ؟ لا ماينفعش , خلاص هصفّر , هوووف , صفرت أهو , طب
هقول للناس انا صفرت ليه ؟ الكوره لا أوفسايد ولا فيها أي حاجه , خلاص هقولهم الوقت
خلص و مكانشي عندي 10 ثواني كمان عشان استنى الهجمه تنتهي , أصلي بصراحه ماسك نفسي
بالعافيه و كنت عايز أدخل الحمّام !! , أومال يعني أسيب مصر تغلب نيجريا في أرضها في
3 دقايق ؟ طب أنا يبقى لازمتي ايه انا و الصفاره بتاعتي دي ؟! .
.
في أفريقيا , و
في سنة 2016 , مش هتلاقي في أغلب الدول الأفريقيه ملعب كوره محترم زي مخاليق ربنا
, ولا هتلاقي مدرجات تصلح للإستهلال الأدمي ( العيال كانو متشعلقين على عمود نور تقريبا
) , ولا هتلاقي جوز مصورين يعرفو يصورو ماتش , و لو بصيت و ركزت في وشوش الجماهير هتشوف
بعنيك خريطة البؤس المدقع , ناس ماتسمعشي حتى عن خط الفقر , جوع و مرض و رشوه و فساد
, و شعوب ثرواتها منهوبه من الألف إلى الياء , طبعا الكلام عن الديموقراطيه و الحريات
هيبقى كلام كوميدي و يفطّس من الضحك .
.
طب ليه مابتحصلشي
ثورات في الدول الأفريقيه دي ؟ مقومات الثورات موجوده زي مالكتاب بيقول , الفقر و الجوع
و المرض و الفساد و الفاشيه و نهب الثروات ( داحنا بالنسبالهم نبقى السويد ) ؟ ليه
بقى ماسمعناش عن ( ربيع أفريقي ) ؟ , لو عايز تعرف الإجابه ابقى اسأل المخابرات الأمريكيه
و مركز كارتر للسلام و قناة الجزيره و مراكز حقوق الإنسان و رجالة السبوبه , أو بلاش
تسأل حد , بص عالخريطه هتلاقي الدول دي بعيده تماما عن دولة الكيان الصهيوني .
......................................................................................................................................
ليست هناك تعليقات:
إرسال تعليق