Mohamed
Hussein
23 مارس 2016
سعادة البيه الظابط
............. تحية طيبه و لكن !!.
.
امبارح روحت اجيب
أختي من المطار بالليل متأخر , دخلت من مدخل طريق المطار اللي قصاد مساكن شيراتون
, و بعد ما مشيت اتنين كيلو قابلني الكمين , العربيات وقفت و انا استغليت الوقفه و
جهزت رخصتي و رخصة العربيه , وصلت عند الظابط و دار الحوار ده
.
الظابط : رايح
فين ؟
أنا ( باستغراب
) : رايح المطار
الظابط : رايح
المطار تعمل ايه ؟
أنا ( باستغراب
أكبر ) : رايح أقابل أختى .
الظابط : أختك
جايه منين ؟
أنا ( بازبهلال
و قرف بقى ) : جايه من الإمارات .
الظابط : طيب اتفضل
.
.
كده خلص الحوار
.
.
سعادة البيه الظابط
, حضرتك ماعملتليش إيذاء جسدي ولا إيذاء نفسي , بس تقدر تقول حصل إيذاء عقلي , لا عقلي
استوعب الأسئلة ( ولا مرارتي حتى ) , و طول
مانا ماشي قاعد افكر في اسئلتك و جدواها و اقول لنفسي ليه ؟ ليه الأسئلة السخيفه العبيطه
دي و ايه أهميتها ؟ ياريتك قلت لي رخصك و شوفتها و قلت لي انزل و فتشت العربيه و صورتني
و احتفظت بصورتي و بياناتي عندك و عملت لي فيش وانا واقف حتى , كل ده كنت هشوفه منطقي
جدا و حقك و حق الدوله عليا و حاجه تحترم في
عملية التأمين , واضرب لك تعظيم سلام بعدها .
.
حاولت ألاقي لك
مبررات للأسئلة دي ( اللي غالبا سألتها لكل الناس اللي داخله بما فيهم الأجانب
!! ) , قلت مثلا جايز بيعرف منها اذا كنت كداب
ولا لا , يعني هيسألني اختك جايه منين و يبقى
عنده كشف كل ساعه بالرحلات اللي وصلت و بالتالي لو قلت جايه من ميونيخ و مفيش رحلة
جايه من ميونيخ يبقى انا حد مش مظبوط و مشتبه فيه , بس الفكره دي في منتهى السذاجه
, عشان اي عيل عنده 12 سنه هيجهز لك اجابات زي الفل , و يدخل على جوجل قبل مايوصل عندك
بدقيقه حتى و يعمل سيرش عن موعد الرحلات و يلاقي القايمه قدامه و يختار منها اي رحله
و يديك اجابه نموذجيه .
.
سعادة البيه الظابط
, غيرتي على بلدي و شكلها قدام الناس ( خصوصا انك شغال في منطقة المطار اللي هو واجهة
مصر ) و احترامي الشديد لتضحيات زمايلك و لتعبك و مجهودك و وقفتك في البرد هما الدافع
اللي خلاني أقولك : عيب عليك , ماتصغرش نفسك و تصغر زمايلك بأسئلة عبيطه .
.
سعادة البيه الظابط
, الطريق اللي حضرتك واقف فيه ده طريق المطار بيودي للمطار بس مش لحته تانيه , و اللي
رايح المطار بيبقى رايح يقابل حد قريبه مش رايح يشتري عيش فينو , و قريبه ده جاي من
الإمارات ولا من ميونيخ مش هتفرق معاك خالص , و أسئلة حضرتك التلاته مالهمشي أي علاقه
بعملية التأمين .
.
سعادة البيه الظابط
, عشان خاطر ربنا و خاطر مصر , بلاش تحط التاتش بتاعك .
.............................................................................................................................
ليست هناك تعليقات:
إرسال تعليق