Mohamed
Hussein
20 ديسمبر 2015
..
25 يناير 2011 و 25 يناير 2016 ............ حكاية البطيخه و اللمونه و الخايله الكدابه
.
.
هو ايه الفرق بين
يناير 2011 و يناير اللي جاي ؟ هقولك أهو , في 2011 ملايين البشر نزلو و أيدو النزول
( و انا منهم ) , نظام فاسد بقى و مترهل و حكم أبدي و توريث و شلة زلنطحيه حواليه
, بس أياميها كانت الناس نازله بالعشم كده , بالطيبه و التلقائيه , بتكلم عن الناس
العاديه اللي زي حالاتنا مش اللي نزلو عشان يخربو ولا اللي نزلو عشان يركبو .
.
في 2011 ماكناش
شوفنا داعش ولا شوفنا الوجه القبيح لأمريكا و بريطانيا و لا شوفنا مخططات علنيه لحرق
دول الشرق الأوسط , ولا شوفنا دول بتولع و تتحرق و تخرب رسمي , كانت الدنيا بيس أوي
, النسق الثوري و شعارات زي الفل و في الخلفيه موسيقى من النوع اللي يخلي الواحد يتشحتف
.
.
طب 2016 بقى ؟
هقولك برضه , 90 % من اللي أيدو ثورة يناير( و انا منهم ) قالو ستوب يا عم , نزلني هنا , اتعشت كده و حلو
أوي و جبرنا , بلدنا اهم و مش هنسيبها لكلاب السكك , اللي لسه مقالشي ستوب بقى كعدد
أو نسبه هو غير كافي لتحريك طفاية السجاير دي من قدامي , مش لتغيير نظام حكم في دولة
بحجم مصر , بص يا مولانا انت متأكد فبلاش تناهد
و النبي يا شيخ .
.
طب انا خايف من
25 يناير 2016 ؟ ممممممممممم اطلاقا , طب هقولك حاجه تختصر لك شعوري باليوم ده , أنا
لو روحت دلوأتي و معايا شوية ورد مجفف و رسمت قلب في ميدان التحرير بالورد المجفف ده
أنا واثق ألف في الميه اني هروح يوم 26 يناير 2016 ألاقي القلب زي ماهو !! .
.
طب لما انا مش
خايف بتكلم ليه ؟ الحكايه يا سيدي انك عامل زي العيار اللي بيدوش , عامل لنا صداع , زي حته حديده بتترمي في الترس اللي
بيلف مش أكتر , و الميزه الوحيده في الهري
بتاعك انه بيبقى دايما ( قبلة الحياة ) لتنظيم إرهابي , اظن انت مش محتاج ألف دليل
تانيين عشان تعرف انه ارهابي ( ولا لسه محتاج دليل ؟! ) .
.
يابني هبسطهالك
, في 2011 كان فيه واحد واقف في بلكونه و معاه بطيخه كبيره و رماها على دماغ
الراجل اللي مش عاجبه لما كان معدي في الشارع
, الراجل ده مات , يارب تصدق انه مات , و في 2016 بقى انت عايز تقف في البلكونه بس معاك لمونه و عايز
ترميها على دماغ الراجل التاني اللي مش عاجبك برضه , تفتكر ممكن يموت لما اللمونه تقع على دماغه ؟!
.
.
طب هينوبك ايه من الوقفه دي ؟ ولا حاجه , شوية خايله
كدابه و كاميرات الجزيره بتصور الواد و هو بيرمي اللمونه و بتحاول تقنعه ان اللمونه
دي سرها باتع و هتغير موازين القوى في كوكب الأرض و المجموعه الشمسيه , و في النهايه
كالعاده هتخسر اللمونه بتاعتك و احتمال كبير
وقفتك في البلكونه تجيب لك لفحة برد .
................................................................................................................................
Mohamed
Hussein
20 ديسمبر 2015
عارف انت الست
المصريه الفلاحه اللي بتنطق الكلام بشكل مختلف شويه و تقول كده :
.
- انا اتصلت باخوك
في عمان و ( كالسن ) عليا .
.
- كنت تعبانه شويه
و قلت لهم يعملو لي ( لايسون ) .
.
- الأيام مابقاش
فيها خير ولا بركه , الواحده زمان كانت لما تتعب ترتاح على قرصين ( فولانجين ) .
.
- وانت ليه بتطنش
باليومين و التلاته و ماتسألشي على امك ( يا محمّه ) ؟! .
.
أهي الست دي تبقى
أمي .
............................................................................................................................
Mohamed
Hussein
20 ديسمبر 2015
أصدقائي إياهم
اللي بيرجعونا مئات السنين لورا , لزمن الفن الجميل , من مئات السنين كده كنت تسمع
عن العالم من دول هتلاقيه عالم و بارع في الطب و الفلك و الفلسفه و الجيولوجيا و الأدب
و بيصلح بوابير الجاز .
.
عندي أصدقاء كده
, رجعوني للزمن ده , عصام حجي بالنسبالهم هو العالم اللي بارع في شغل الفضاء و الإقتصاد
و السياسه و التعليم و الديموقراطيه و الثورات و أنظمة الحكم الرشيده و برضه بيصلح
بوايبير الجاز !! .
.
لو مانزلشي خبرين
تلاته يوميا عن عصام حجي مع بوكيهات الورد و القلوب حتى لو كان الخبر بيتكلم عن انه
دخل الحمام أو وقف جنب مطعم و اشترى ساندوتش هامبورجر هيعتبرو الموضوع فيه حكمة و حنكه
و عبقريه و ألمعيه من العالم الجليل .
.
بهاليل محمد حسان
و الحويني , برضه بيوصلو لنفس القناعات دي بتاعة تقديس عالمهم و شيخهم الجليل , و الحويني
بالنسبالهم هو أعلم أهل الأرض حتى في السياسه و الإقتصاد , مع انه يا مؤمن كان شايف
الحل للأزمه الإقتصاديه مثلا , اننا نعمل غزوات لأوروبا كل شويه و ناخد الفلوس و الغنايم
نعيش بيها , طب يفرق ايه الحويني عن الراجل بتاع الثورات اللي قامت عشان سعر الطماطم
؟! .
.
و النبي مايفرقو
حاجه , اهو كلهم علماء و بيصلحو بوابير الجاز و بيتعمل لهم تماثيل عجوه و كل تمثال
عجوه له بهاليله و مريديه .
.............................................................................................................................
Mohamed
Hussein
18 ديسمبر 2015
روسيا جابت الصندوق
الأسود لطيارتها اللي انضربت في سوريا و جاب مندوب من كل الدول الأوروبيه يحضرو الكشف
عن أسباب تحطم الطائره , الطياره انضربت بصاروخ في ديلها و مكانتش في الأجواء التركيه
و لا حاجه , قشطه يا معلمين .
.
طب ليه روسيا عملت الحكايه دي قدام مناديب من دول
اوروبا ؟ هقولك أهو , يبدو إن بوتين متأثر
شويه بالفلكلور المصري القديم فقرر انه يجيب
أهل العروسه كلهم ( اللي شارو عليها بضرب الطياره الروسيه ) و يبقى الرد على عينك يا تاجر , يعني الدُخله هتكون بلدي .
.
أردوغان في الكام
يوم اللي فاتو بس طلب اجتماع عاجل لحلف الناتو
و اتصالات مكثقه مع أوباما و عمل تطبيع كامل مع اسرائيل , أهي النوايه بتسند الزير
, و لو طال يتحالف مع مخلوقات فضائيه مش هيتأخر .
................................................................................................................................
Mohamed
Hussein
17 ديسمبر
2015
كلمتين و السلام
.
بعد 4 سنين من
اللي ما يتسمى الربيع العربي , حد جاب لنا فاتوره و كشف حساب ؟ عرفتو يعني خسرنا كام
مية مليار ؟ , و كام مليون شهيد و مشرد ؟ و
كام دوله مابقتش دوله ؟ أه سيادتك دي اسمها الفاتوره و كشف الحساب .
.
الحقيقه في 25
يناير اللي مش هترضى قطيع ( النعام ) بتقول
باختصار : الثوره اللي مالهاش قائد مسبق و مجلس قياده واعي و مالهاش خطه و خطه بديله
و مالهاش محاسب يقولنا التكلفه كام و مالهاش خبير يقولنا هنعوض التكلفه دي ازاي و مالهاش
ضمانات جاده للحفاظ على وحدة الوطن و ترابه و مالهاش ضمانات للحفاظ على الممتلكات العامه
و الخاصه و مالهاش هدف محدد و خطه واضحه و مالهاش معالم ولا أبعاد و مالهاش عيون صاحيه
عاللي بره و اللي جوه يبقى مالهاش لازمه !! ............. تبقى باختصار خراب .
.
لأنستي الجميله
اللي شيرت البوست بتاعي عن شهيد الصاعقه و كتبت فوقه كلمتين اتنين , الحقيقه ماكنتش
محتاج أكتر من ثانيه عشان أشم ريحتك , و ممكن أقول ان الشهيد البطل كان واقف في الصوره زي الأسد ,
شاب اسمراني من طينة مصر , حالق شعره و دقنه زي مالجيش بيقول مش راسم على دراعه تاتو
!! , و لأصدقائي الكولجيه اللي بيسخرو من الشهيد البطل , ممكن تدفسو مناخيركو في كيس كوله و تشمو فيه لحد
ما نفسكو يقتطع , انتو أحرار طبعا , بس رجاء , ياريت , أتمنى , تسيبو مسافه و لو 2
سم بينكو و بين قاع الوساخه , جايز تكون المسافه دي هي النداء الأخير للطياره الأخيره اللي ممكن ترجعكو تاني لكوكب البني أدمين .
........................................................................................................................
Mohamed
Hussein
15 ديسمبر 2015
أشتون كارتر وزير
الدفاع الأمريكي : التحالف الإسلامي يتماشي مع دعوات واشنطن لدور سني أكبر ضد داعش
.
.
تحالف إسلامي ؟!
واشنطن ؟! سني ؟! أشتون كارتر ؟!
............... انتو كده قطعتو لي الشورت في البيسين .
.
الحكايه و ما فيها
إن ضربات روسيا في سوريا قضت على جزء كبير من قوة داعش و كتير من الدواعش هربو , الكفه
رجعت تاني لصالح الجيش العربي السوري , التحالف الحقيقي ( الأمريكي البريطاني التركي
السعودي ) لقى نفسه في ورطه حقيقه , مايقدروش
على مواجهه مباشرة مع روسيا ( أو مايفضلوش ) فكان الحل الأمريكي الصهيوني لإعادة ( الإتزان في الخراب ) على أرض سوريا هو
تكوين تحالف اسلامي , يعني نجيب شوية انفار كده من بلاد المسلمين و نوديهم سوريا و
ندعمهم على طريقة ( من دقنه و افتل له ) .
.
إسم مصر موجود
ضمن التحالف كإسم فقط ( و كلنا عارفين الأسباب ), قناعتي الشخصيه إن أخر دوله في الكون
هتبعت جندي ( أو طلقة رصاص ) لسوريا عشان يحارب
الجيش العربي السوري و يخرب سوريا أكتر تحت اسم محاربة الإرهاب هي مصر , تتقطع ايدينا
قبل مانعمل كده .
.
جلالة الملك سلمان
, عايز أقولك كلمتين , كتاب التاريخ مش هيرحمك ولا كتاب الجغرافيا !! .
................................................................................................................................
Mohamed
Hussein
15 ديسمبر
2015
ضحكة الصباح
.
الأمير محمد بن
سلمان وزير الدفاع السعودي : هنعمل تحالف اسلامي لمحاربة الإرهاب ( الإسلامي
) في العالم الإسلامي ( امنعو الضحك ) , التحالف مقره الرياض , هنحارب
كل الارهابيين في أي حته و أي مكان في الحاره المزنوقه , الوضع بالنسبه لداعش في سوريا
مختلف شويه و لازم تدخل قوى دوليه و التنسيق مع الشرعيه ( ممممممم الشرعيه ؟ الكلمه
دي مش غريبه عليا ) , و الإرهاب موجود في كل مكان
, سوريا و ليبيا و اليمن و سينا ( ماتجبش سيرة سينا سمو الأمير , ماتشغلش بالك
بيها ) ,
التحالف الإسلامي هتشارك فيه كل دوله على اد طاقتها , يعني اللي يجيب صاروخين
ماشي , جوزين عساكر مايضرش , سجاده قديمة أو بوتاجاز قديم , أو طشت بلاستيك أي حاجه هتنفع .
.
الترجمه بقى
.
1- احنا مالناش
علاقه بالإرهاب , لا بنصرف عليه ولا بندي له سلاح , و لا نعرف يعني ايه فكر وهابي
, و ماعندناش حد في السعوديه اصلا كان اسمه محمد بن عبد الوهاب .
.
2- احنا هنحارب
الإرهاب في سوريا , المتمثل في الجيش العربي السوري لحد ما نمكن داعش من حكم سوريا
و بكده نبقى قضينا عالإرهاب !! .
.
3- التحالف الإسلامي
بيضم في عضويته 34 دوله منهم السعوديه و تركيا و قناة الجزيره و أمريكا و بريطانيا
و استراليا و حتى اسرائيل , إسلامي ده ولا مش إسلامي يا متعلمين يا بتوع المدارس ؟!
.
.
.
اسئلة للأذكياء
فقط :
.
س 1 : من هو قائد
تنظيم داعش الإرهابي ؟ هل هو بشار الأسد أو جمال عبد الناصر أو الملكه نفرتيتي ؟!
.
.
س 2 : ماهي الدول
التى ترعى الإرهاب و تموله ؟ هل هي بوركينا فاسو أو بنجلاديش أو قبائل ال ( كوتو موتو
) ؟! .
.
س3 : لماذا يصر
الحمار دائما على أنه أذكى مخلوقات الله لحد مايخربها على دماغه و دماغ أهله ؟ هل عشان
هو ذكي فعلا و عبقرينو و لا عشان دراعه ملوي أخر حاجه , ولا عشان كاره بشار الأسد و
حاسس انه جوز امه ؟! .
..............................................................................................................................
Mohamed
Hussein
13 ديسمبر 2015
خلاص وزارة التخطيط
قررت انها تنزل برنامج ( حكومتي ) على الموبايل , هتقدر من خلال البرنامج تنهي تعاملات
حكوميه كتيره منها تجديد رخصة العربيه و رخصة السواقه .
.
حضرتك كل ما عليك
هو انك تفتح لينك البرنامج , هتلاقي فيديو مدته 7 ثواني , في الفيديو موظف قاعد على
مكتبه , اول مايشوفك هيبتسم لك الإبتسامه اياها و يقولك ( كل سنه و حضرتك طيب ) !!
.
.
و تحت الفيديو
هتلاقي اختيارين , اختيار اسمه ( كرّمش ) لو
دوست عليه هتبقى خلاص يا معلم مصلحتك قضيت و زي الفل , و اختيار تاني اسمه ( تجاوز
الخطوه ) , لو حاولت تعمل نفسك فزلوك و دوست على اختيار ( تجاوز الخطوه ) ده هتلاقي
نفس الموظف طلع ايديه من الفيديو و مسك ايدك فجأه كده و كلبشها و قالك : رايح فين يا
أستاذ ؟ مفيش حد جوه , الموظفين كلهم مشيو , طلعو عزا في حماة الأستاذ عبد النعيم .
.........................................................................................................................
ليست هناك تعليقات:
إرسال تعليق