Mohamed
Hussein
3
ديسمبر 2015·
جلسة برلمان
.................... فانتازيا
.
في قاعة مجلس النواب
المصري , ليل داخلي
.
مشهد 1 :
رئيس المجلس (
توفيق عكاشه ) : و دلوأتي الكلمه للسيد النائب مر.. مر ...مرت... , اقري لي الإسم ده
و النبي يا أستاذة حياة , أصلي نسيت نضارة القرايه حدانا في البلد
.
حياة الدرديري
( قاعده جنبه ) : ده اسمه مرتضى منصور يا دكتور توفيق .
.
توفيق عكاشه :
اه مرتضى منصور عارفه , قوم يا خويا , قول بس انجز بسرعه مش فاضيين , ورانا انفار كتير
عايزين يتكلمو , يعني مش عايزين لت و عجن .
.
مرتضى منصور (
قايم منفعل ) : انت نسيت نفسك يا حيوان ولا ايه ؟ أنا اللي خليتك رئيس للمجلس و لولايا
عليك انت و امك كان زمانك لسه بتجري ورا عربيات الرش , فاكر لما كنت بتبوس ايد صفوت
الشريف , انا يتقالي قوم ياخويا و انجز و لت و عجن ؟ انا مرتضى منصور أصغر مستشار في
تاريخ كوكب الأرض , ماشي ماشي , و رحمة أمي هجيبك بلبوص يا توفيق يا عكاشه .
.
توفيق عكاشه :
اسكت يا وله , يا وله اسكت ياوله , دانت بؤ يا وله .
.
.
مشهد 2 : أعضاء
البرلمان بيحاولو يحتوو الموقف
.
سعيد حساسين داخل
على توفيق عكاشه بصنيه نحاس مدوره و عليها كوباية ازاز فيها مشروب لونه غريب
سعيد حساسين :
اتفضل يا دكتور توفيق , اشرب ده , ده خلاصة منقوع نبات ( الحشنكفير ) الأفريقي , هيروق
أعصابك و يهديك و يدلّك لك الطحال ( و بيعالج الجدري و حب الشياب و الضعف الجنسي )
.
مشهد 3 : نائب
سلفي لابس جلابيه بيضا قصيره و دقنه طويله و حاطط السواك في بؤه , بيقرّب بسرعه من
مرتضى منصور و يقرر إنه يأدّن في ودنه
..النائب السلفي
: الله أكبر الله أكبر , الله أكبر الله أكبر .
.
.
مشهد 4 : انا بعد
ما شوفت شوية من الجلسه دي , جبت المسدس زي حسين فهمي في الفيلم و قلبته و دخلته جوه
بؤي و قبل مادوس عالزناد بربع ثانيه تدخل عليا لوجي بنتي و ترمي المسدس من ايدي
.
لوجي ( منفعله
) : بابا بابا , بلاش يا بابا .
أنا : ليه يا لوجي
؟ سيبيني , أنا عايز أرتاح
لوجي : يا بابا
ده مسدس المايه بتاع لمار و ماما منبهه علينا محدش يلعب بيه عشان بيغرّق السيراميك
مايه و بنتزحلق كلنا .
...................................................................................................................................
Mohamed
Hussein
3
ديسمبر 2015·
إنبوكسيات
.
جيفارا الثائر
أوي : هاي , ممكن نتعرف ؟
.
فتاة الميدان القرمزيه
NO CHAT : هو انا مش بتكلم شات خالص مع حد , بس عشان
اسم حضرتك و احتراما لروح المناضل العظيم مممممممممممم اوكيه نتعرف .
.
جيفارا الثائر
أوي : أنا محمود من القاهره 27 سنه , معهد خدمه اجتماعيه , 2 إضراب و 3 اعتصامات و
7 مرات اختفاء قسري .
.
فتاة الميدان القرمزيه
: بحبك , تتجوزني يا محمود ؟
.
جيفارا الثائر
أوي : بحبك , حاضر هتجوزك بس لما أرجع من الإختفاء القسري اللي أنا فيه حاليا .
.
فتاة الميدان القرمزيه
: هستناك يا حبيبي .
.
جيفارا الثائر
أوي : بقولك ايه ؟ ادخلي على صفحتي هتلاقي صحابي كاتبين بوستات و عاملين هاشتاج عن
اختفائي القسري اعملي لها لايك و انشريها على صفحتك , انتي صفحتك كبيره .
.
فتاة الميدان القرمزيه
: حاضر يا محمود
.
جيفارا الثائر
أوي : و بعد شويه أخويا هيعمل مداخله عالجزيره و يتكلم عن اختفائي القسري , و ابويا
هيطلع مع وائل الإبراشي بالليل , اتفرجي عليه و عرّفي صحابك .
.
فتاة الميدان القرمزيه
: حاضر يا محمود .
.
جيفارا الثائر
أوي : سلام بقى , لازم أقفل دلوأتي , المفروض اني مختفي قسريا و ماينفعش أظهر اونلاين
, طبعا مش هوصيكي ان محدش يعرف اني كلمتك , لو حد عرف اعتبري كل اللي بينا انتهى .
.
فتاة الميدان القرمزيه
: لا فاهمه فاهمه , حاضر يا حبيبي
.
جيفارا الثائر
أوي : المجد للثوره .
.
فتاة الميدان القرمزيه
: المجد للثوره .
..................................
..................................
محمود ( بيشاور
لميكروباص ) : الغردقه ياسطى ؟ و النبي تنزلني عند قرية الجونه كده .
.......................................................................................................................................
Mohamed
Hussein
3
ديسمبر 2015·
برلمان 2015
.
- كنت اتمنى مرتضى
منصور و توفيق عكاشه يسقطو , لكنهم فازو , و باكتساح , الديموقراطيه مفهاش أحلام (
ولا تمني ) , فوز مرتضى منصور ب 70 الف صوت معناه اختيار الناس ( حتى لو مش عاجبني
) , لكن ألف باء ديموقراطيه بتقولي : إقبل و ابلع !! .
.
- حزب المصريين
الأحرار فاز بأكتر من 60 مقعد , يعني أكتر من 10% من مقاعد البرلمان , و ده حزب نشأ
بعد ثورة يناير , مع حزب الدستور و التيار الشعبي , صح المصريين الأحرار متموّل بفلوس
حلوه و متغذي و مربرب , لكن في المقابل الأحزاب الثوريه زي الدستور و التيار المفروض
ان لهم شاب في كل بيت , مؤمن بأفكارهم ( على حسب كلامهم عالأقل ) , لو كانو بس شالو
الحنّه اللي على كعوب رجليهم و نزلو الشارع في السنتين تلاته اللي فاتو كانو خدو خمسين
ستين كرسي , إنما الرحرحه حلوه مفيش كلام , و ليه ننزل الشارع و صوابع رجلينا تتأثر
لما ممكن نتكلم عن انسحاب و ثوره و مظاهرات , حاجه كده بتاعة يومين تلاته يعني ولها
شمخه حلوه برضه .
.
- أقطاب الحزب
الوطني المنحل كتير منهم سقطو و بفضيحه , خصوصا في المدن , المشكله عندنا بتكون غالبا
في القرى و النجوع , التصويت فيها بيكون جماعي الى حد كبير , حسب ( كُبارات ) البلد
ما بيقولو , بالمناسبه , هي دي الأصوات اللي خدها مرسي في انتخابات الرئاسه لما خد
5 مليون صوت , هتلاقي أغلبهم في القرى و النجوع , بطريقة الحشد الجماعي , يعني نفس
الأصوات اللي راحت لمرتضى منصور مثلا كانت راحت لمرسي قبل كده .... يارب تصدق بقى ان
شعبية الإخوان دي حاجه فستك , وماينضحكش عليك بشوية أرقام هلاميه .
............................................................................................................................
Mohamed
Hussein
2
ديسمبر 2015·
أردوغان بيحكي
لمراته
.
رجب : بصي بقى
يا حاجه , أنا أنضم لحلف الناتو و أقعد على حِجر امريكا و أقول إن حدودنا هي حدود الناتو
, و أنا صبي المعلمه الكبيره و محدش يقدر يقرب لي , و الجزيره تقول عليا مناضل و بطل
و الخرفان في مصر يقولو ده خليفة المسلمين .
.
الحاجه : هههههههههههههههههههههههههه
.
.
رجب : و بعدين
أعمل قواعد أمريكيه على أرضي و اتفاقية دفاع مع الصهاينه و الجزيره تقول إني اكبر نصير
للقضيه الفلسطينيه و الخرفان في مصر يقولو برضه ده خليفة المسلمين .
.
الحاجه : ههههههههههههههههههههههههه
.
.
رجب : و بعدين
أجيب داعش و احطها في سوريا عشان تخربها و تحرقها , و اسرق بترول سوريا بمعرفة داعش
و ابعت للدواعش فلوس و سلاح بدل البترول عشان أكسب فلوس أكتر و هما يحرقو سوريا أكتر
و الجزيره تقول مناصر للثوره السوريه و الخرفان في مصر يقولو ده خليفة المسلمين .
.
الحاجه : هههههههههههههههههههههههه
.
.
رجب : طب بالك
انتي يا حاجه , انا لو اتصورت فيديو و انا عريان ملط و قاعد على رجل أوباما بيهشتكني
, الجزيره هتقول عاللي بعمله ( حنكه سياسيه ) و الخرفان في مصر هيقولو : خليفه بقى
و لازم ( يليّن ) موقفه عشان خاطر الرعيه .
.
.
الحاجه : ههههههههههههههههههههههههههه
, ياخويا ربنا يجعله في ميزان حسناتك , إشرب الكاس بتاعك بقى بدل مانت ماسكه في إيدك
بقالك ساعه , طَقْ , في صحتك يا رجب .
...............................................................................................................................
Mohamed
Hussein
2
ديسمبر 2015·
طب هحكي لكو عن
أول حالة اختفاء قسري عملتها في حياتي , الله يسامحك يا برادعي , قلّبت عليا المواجع
.
.
كنت يوميها صغير
أد كده , يعني قول بالكتير 8 سنين , أبويا الله يرحمه كان بيضم الرز في أرضنا البعيده
, و أمي قالت لي خد ( اولّة المايه ) دي ودّيها لابوك في الغيط , أنا خدت الأولّه و
مشيت في الطريق الطويل ده بين الأراضي بدندن و سرحان , و فجأه ضربت في دماغي اني أعمل
حركة كده , قلت أرمي الأوله دي لفوق و هي نازله أقوم مدخّل صباعي ده في ودنها و شاقطها
يعني , ماكدبتش خبر و قلت أجرب , الأولة مليانه مايه , و طبعا ممممممممممم صباعي مدخلش
في ودن الأولة ولا حاجه و نزلت اتكسرت 600 حته , في اللحظه دي حسيت ان جسمي تلّج و
خايف جدا ( كنت بترعب من أبويا ) , طب اعمل ايه بقى ؟ فكرت و فكرت و مالقيتش حل غير
الهروب ( اهرُب يا وِلْد ) , و مشيت بتاع 4 كيلو و روحت استخبيت في قريه تانيه بعيده
عن قريتنا .
.
فضلت مستخبي من
غير أكل في القريه دي من 10 الصبح لحد 6 بالليل مثلا , طبعا مكانش فيه تليفونات ولا
موبايلات , أبويا رجع البيت و سأل عليا و أمي قالت له أنا بعتهولك بأولة المايه من
الصبح , و فجأه و انا مستخبي كده و ( مختفي قسريا ) , لقيت أبويا داخل عليا و هو راكب
الحمار , ابتسامته إياها و قالي اركب !! , ركبت وراه و كان جوايا نفس شعور مرسي لما
دخلو عليه بعد 30 يونيو و قالو له الشعب مش عايزك و فرج مستنيك !! , وصلنا البيت بعد
نص ساعه تقريبا و ابويا مش بيكلمني ولا كلمه , و لما نزلنا من عالحمار أبويا مد إيديه
في الجيب السحري بتاع السديري و طلّع ممممممممم لا مش شوكلاتايه , أبويا طلع الخرزانه
, و انا عارف من ساعة ما مد ايديه , هو بيحب يشيلها في جيب السديري الداخلي ده , و
رزعني علقه معتبره .
.
أبويا ماضربنيش
عشان كسرت الأوله , بس خاف عليا لما اختفيت و الدنيا ليّلت , و من يوميها و انا توبت
وبطّلت حكاية الإختفاء القسري دي .... الله يرحمك يابه , و الله لحد دلوأتي مانا عارف
انت عرفت مكاني ازاي ؟ مع اني كنت مختفي قسريا و متنكر يعني.
..................................................................................................................................
Mohamed
Hussein
2
ديسمبر 2015·
الحلزونه يامّه
الحلزونه
.
.
عندي صديقه في
الأصدقاء ( مش هقول على اسمك يا نصه ) , صديقتنا دي كل يوم تدخل عالفيس تكتب بوست بالشكل
ده :
.
1- بتجيلي تهديدات
من كل اللي شغالين في قسم العجوزه عشان أبطّل أكتب .
.
2- كان عندي واحد
جارنا بعتبره زي أخويا الصغير و فجأه بقى مايقوليش حتى صباح الخير و لما سألته عن سر
التغيير ده قالي انه شغال ظابط كبير وأميرالاي في المخابرات الحربيه و المخابرات العامه
و الأمن القومي و الأمن الغذائي و إنه بطّل يقولها صباح الخير عشان خايف عليها لأنه
عرف إنها متراقبه أخر حاجه .
.
3- لو سمحتو ,
اللي بيتصل بيا و ماردش عليا مايزعلش , أنا الموبايل بتاعي متراقب هو و تليفون البيت
و شفاط المطبخ و الكيتشن ماشين .
.
4- أمن الدوله
بيبعت لي رسايل تهديد , و السي أي إيه و الكي جي بي حاطين اسمي على قوائم المطلوبين
.
.
5- عاااااااجل
, إجتماع طاري لدول الكومنولث عشان يشوفو حل معايا و يوقفوني عن كتابة البوستات .
.
ههههههههههههههههههههه
أه و عهد الله , حاجات من النوعيه دي , المهم صديقتنا دي بتكتب الكلام ده من امتى ؟
من بتاع سنتين يا مؤمن !! , و عندها 20 صديق بيعملولها لايك على كل بوست من دول و كلهم
كده على كلمه واحده ( إحنا وراكي و مش هنسيبك , المجد للثوره , اثبتي يا رفيقة الميدان
, هنجيب لك حقك من ولاد الكلب , مهما عملو مش هيكسرونا ) !! .
.
المهم إني لما
بشوف تعليقات أصدقائها كل مره بتخيلهم فرقة ( كورال ) , المطرب يقول ( بيهددوني ) و
هما وراه يقولو ( مش هنسيبك ) , بيهددوني مش هنسيبك .
.
أقترح على صديقتنا
من باب التغيير إنها تختفي يومين كده من عالفيس و ترجع تقول : أنا حصلي اختفاء قسري
, و برضه بيهددوني , و فرقة الكورال ترد ( مش هنسيبك مش هنسيبك ) .
.
.
و الأن مع قصيدة
الحلزونه :
الحلزونه يامه
الحلزونه , خبيني يامه يا حلزونه , الحلزونه مشيت في ميدان التحرير , ميدان التحرير
ميدان التحرير , و حصل لها اختفاء قسري و جالها تهديد كتير تهديد كتير تهديد كتير
.
..................................................................................................................................
Mohamed
Hussein
2
ديسمبر 2015·
الإختفاء القسري
...................... إلا الكولّه أعيت من يداويها
.
- في سنة 2015
اللي احنا فيها ماينفعش يكون فيه حاجه اسمها اختفاء قسري , الكلام ده كان ينفع من
50 سنه أيام الجواب ماكان بيتبعت الأردن يوصل بعدها بشهرين , إحنا في زمن الفون و الواتس
و النت و الفيس و الميس و التيس , هبسطهالك , مش انت مصدق ان عساكر و أمناء الشرطه
مرتشين ؟ ( و هما فيهم كده فعلا كتير ) , طيب , اللي يبقى يختفى قسريا يقوم مكرمش
20 جنيه في ايد العسكري و يقوله هعمل مكالمه من موبايلك يا دفعه , أو رساله عالواتس
من أي عيل في السجن ( كده مابقاش اختفاء يا معلم ) .
.
جهاز الشرطه اللي
عنده من الغباوه ما يكفي لاعتقال صلاح دياب الملياردير الكبير و تصويره فيديو في لحظة
الإعتقال مش هيفكر ولو لثانيه قبل مايعتقل صاحبك اللي مالوش أي تلاتين لازمه , يعني
لا يلزمه قسري ولا قسرك .
.
أغلب اللي عملتو
عليهم جنازه و مناحه و قلتو اختفو قسريا طلعو كالتالي , الأنسه ( فوفي الرقيقه ) كتبو
على صفحتها انها اختفت اختفاء قسري من يومين و جت بعد يومين قالت يا جماعه , يا كماعه
أنا كويسه و كنت مش عارفه أدخل فيس بس , بالمناسبه هي اللي عامله الحركه دي يا كماعه
و لمت شوية لايكات حلوين و شوية فولور زي الفل يا كماعه ...و بقت مشهوره أكتر من ساندوتشات
الحواوشي .
و الأستاذ ( أوحو
الحنين ) بعد ماختفى قسريا يومين تلاته طلع انه كان مع صاحبه في الغردقه ...بالذمه
مش مكسوفين من نفسكو ؟!! .
.
- مصطلح ( الإختفاء
القسري ) مصطلح رنان و شكله حلو خصوصا قبل 25 يناير , حاجه من اللي بتعجب الجماهير
يعني , ايه رأيك بقى ؟ أديكو اتركبتو تاني أهو بما فيكو ألهتكم العوالي , بيتركبو برضه
, و عهد الله أنا أول مره أشوف ألهه بتتركب , و تكتب تويتات مع بعض في نفس اللحظه
, ده جنس جماعي ده ولا ايه ؟ ده حتى يبقى عيب و حرام يا جدعان .
.
طب تصدقو بالله
, اللي صدق في زمانا ده ( و مع شرطه هي أصلا فضيحه لوحدها ) حكاية الإختفاء القسري
, لو طلع لهم عيل من السجن و قالهم انا كانو بيربطوني على شجره و يحطو صخره على ضهري
و انا أقعد أقول ( أحدٌ أحد ) , هيصدقوه برضه .
..................................................................................................................................
Mohamed
Hussein
1
ديسمبر 2015·
أمي عندها 3 وزات
في البلد , بتعلّمهم كده بطريقه عشان تعرفهم بيها , إنها تربط في رجل كل وزه حتة قماشه
مميزه بلون معين , عشان الوز كله شبه بعضه ( عامل زي سكان الصين كده) , و بيبقى كتير
اوي عالترعه .
.
المهم أمي كلمتني
من شويه و قالت لي الواد ابن اخويا راح يجيب ال 3 وزات بتوعنا من عالترعه لقى اتنين
منهم بس و التالته مش لاقيها , قلت لها يامه جايز القماشه اللي على رجلها اتفكت و وقعت
و اتلخبطت الوزه في باقي الوز , قالت لي لأ يابني دانا رابطاها بإيدي رابطه جامده
, قلت لها بس بس أنا كده عرفت اللي حصل , الوزه دي يامّه حصل لها ( إختفاء قسري )
, وانا مش هسكت , و رحمة أبويا ماهسكت , هكلم البرادعي و أيمن نور و جيمله اسماعيل
عشان يكتبو تويتات عن الإختفاء القسري بتاع وزتنا , أه هيكتبو التويتات في نفس الوقت
بالظبط .... و بالصدفه البحته !! .
.
#الحريه_لوزّتنا
#وزتنا_عالأسفلت
#دي_كانت_رايحه_تزور_أمها_العيانه
.
...............................................................................................................................
Mohamed
Hussein
1
ديسمبر 2015·
ما بعد 30 يونيو
و ( قلبة الترابيزه ) ............. مفيش مؤامره , فيه محشي ( أغرف لك ؟ ) .
.
1- مفيش مؤامره
خالص , فيه بس شوية ارهابيين في سينا و لما ضيقنا عليهم الخناق , اتنقلو ( هيله بيله
) لمدينة سرت في ليبيا ( على حدودك الغربيه ) .
.
2- مفيش مؤامره
خالص , بس فيه رئيس سوداني فرط في نص بلده و مستعد يسيب ( نص ال نص ) اللي باقي إنما
كل ما تجيله التعليمات يطلع يقول حلايب و شلاتين , اللي هما حتة أد كده بالنسبه للي
فرط و هيفرط فيهم .
.
3- مفيش مؤامره
خالص , و تركيا دي دوله اسلاميه و دقنها واصله لحد ركبتها , لا بتاعة دعاره و لا قاعده
على حِجْر الناتو , و لا بتشتري بترول من داعش ولا بتبعت لهم صفقات أسلحه ولا بتقوم
بنقلهم بعد ما يهربو من سينا لغزه و توديهم ليبيا .
.
4- مفيش مؤامره
خالص , و شوية الخرفان اللي بدقون و مسميين نفسهم داعش بتنزل عليهم زكايب الدولارات
من السما كده و بيصحو من النوم يلاقو خطط الهجوم و التحرك و السلاح جاهز تحت المخده
( أكيد جوز ملايكه اللي عملو الحكايه دي و هما نايمين ) , لا طبعا أمريكا و بريطانيا
و تركيا مين , مستحيل , اكيد الملايكه هما اللي بيعملو كده .
.
5- مفيش مؤامره
خالص ولا فيه خرفان عايشين في أوروبا و أمريكا و مفتوح لهم قنوات و جرايد ( و حتى أبواب
الكونجرس مفتوحالهم عالبحري ) و كل حياتهم و يومهم بيتلخص في اهانة مصر و جيشها و تحريض
الغرب علينا .
.
6 - مفيش مؤامره
خالص و لا 30 يونيو قلبت الترابيزه على دماغ الخونه , ولا البرادعي ممكن يكون غلطان
و مش فاهم , لا طبعا , غلطان إزاي ؟ ألهتنا العوالي مابيغلطوش .
.
7 - مفيش مؤامره
خالص ولا حركة حماس بتكره جيش مصر أكتر ما بتكره جيش الصهاينه اللي راكبهم بكل الأوضاع
اللي في مجلات السكس , و يكرهو الصهاينه ليه ؟ مش جايز يكونو مستمتعين و احنا فاكرين
الحكايه اغتصاب ؟! .
................................................................................................................................
Mohamed
Hussein
1
ديسمبر 2015·
أحمد موسى ( اللي
لا بحبه ولا بطيق سحنة أهله ) .
.
فيديو للإعتداء
على أحمد موسى في لندن , فيديو للإعتداء على أحمد موسى في باريس , جدع يا وله , شاطر
يا وله , اضربه على قفاه بقى , اضربه على قفاه !! .
.
طب بالنسبه للخرفان
يعني اللي بيعملو كده فانا مش بستغرب , إن خروف عايش في أوروبا و لسه محتفظ بقرونه
و ( ليّته ) و فروته و عقله الزرايبي , ماهو ماخدشي لقب خروف من شويه يعني , ده واخده
عن جداره و استحقاق , و الحكايه دي بتبقى جينات بتتوارثها الأجيال , يعني خروف يتجوز
نعجه يقومو يخلفو لنا خروف صغير كده ( اسمه : حولي ) , و ال ( حولي ) ده يكبر و بعدين
يخلص دبلون صنايع و يسافر أوروبا يغسل صحون في مطعم هندي , و أبوه الخروف الكبير و
أمه النعجه يعملو هاشتاج لابنهم اللي سافر و يقولو ( مصر بتطرد علمائها ) , و فجأه
يظهر ( العالم ) ابن الخروف و النعجه و هو بيضرب احمد موسى في الفيديو , أبوه و أمه
يشوفوه في التلفزيون و يفرحو أوي و يلمّو حبايبهم على عشوة برسيم عشان يتفرجو على ابنهم
( العالم ) .
.
ماشي كل اللي فات
ده منطقي من الخرفان , إنما أصحابنا الكولجيه اللي بيشيرو الفيديوهات دي و يعملو عليها
حفله و فرح 3 ليالي , أومال إيه حكاية يقرأ لمحمود درويش و ديستوفسكي و يستمع لفيروز
دي ؟!! ماهو يابني لو كانت دي هي قواك العقليه يبقى و عهد الله أخرك تقرا ل زاب ثروت
و تسمع ولاد سليم اللبانين , و يا حمار , يا حماااااااار , بدل ما تكتب على صفحتك
( مازال في العيش ما يستحق الحياه ) , اختصر و قول ( مفيش صاحب بيتصاحب ) .
.................................................................................................................................
Mohamed
Hussein
30
نوفمبر 2015·
عالمستوى الشخصي
, مش سعيد أوي بالخناقه اللي قايمه حاليا بين الخرفان و الكولجيه , أصلي عارف اللي
فيها و حافظه صم , الخرفان عندهم المفاتيح و ( المكنه ) اللي بيعرفو يحطو فيها الكولجي
من هنا يطلع لهم حمار من هنا و يركبوه , وقت اللزوم بيجيبو المكنه دي .
.
المكنه و المفاتيح
ممكن تكون شوية صور لشهداء يناير , و تذكير بقى بأيامهم الخوالي , و الميدان و الهيييييح
و كده , مع بوستين تلاته على شبكة رصد يتكلمو فيها عن حكمة البرادعي اللي سابقنا بمليون
فدان و إزاي انهم ظلمو الراجل ده و مستنيينه يرجع عشان يقود المسيره , شوية إشادة بخالد
على ومواقفه البطوليه ( اللي انا مش عارفها ) , مع بوست الحريه لعلاء عبفتاح و أبو
دومه و الدفّاس , و صورة نادرة لجيفارا و هو لابس البوكسر على لحم بطنه و بيقص ضوافره
بالسلاح بتاع البندقيه , و الجزيره تستضيف أسماء محفوظ عشان تحكي لنا عن أمجادها و
بطولاتها في حرب اكتوبر وماقبلها و إزاي انها قدرت توحّد القطرين ب ( أكلة سمك بلطي
) و تبني الأهرامات من غير المناكير بتاع صوابعها ما يتأثر و إزاي حفرت قناة السويس
بصباع روج صيني من أبو 3 جنيه , و بس يا سيدي , كده يبقو حضّرو المكنه و جهزوها , والكولجي
يدخلها برجله اليمين و يطلع حمار من الناحيه التانيه , يتركب كالعاده , و حا يا حمار
, شي يا حمار .
...................................................................................................................................
Mohamed
Hussein
30
نوفمبر 2015·
ريهام سعيد
... كرتونة بيض , اكشن تاني مره
.
قناة النهار قالت
ريهام سعيد هترجع بس هتركز في برنامجها على ( أعمال الخير ) !! , يعني أشد في شعري
منكو ولا أعمل ايه بالظبط ؟ و هي مشكلة ريهام سعيد كانت إيه غير حلقاتها بتاعة ( أعمال
الخير ) دي ؟ حلقة تقديم المساعدات للاجئين سوريين و الطريقه الوقحه اللي اتقدمت بيها
و قبل كده حلقه من مصحه نفسيه و لقاء مع مريضه نفسيا .
.
يا بشر , امنعو
البيض بقى , مشكلة ريهام زفت في ال mentality
بتاعتها , في قواها العقليه , في صحتها النفسيه , في ألف باء أدميه
, الحاجات دي مش موجوده عندها .
إنما عندها نفس
السماجه بتاعة الإخوان و نفس الوقاحه و نفس الضحكه الصفرا , الإخوان برضه كانو بيجمعو
تبرعات و يعملو خير , و الفرق الوحيد بين الإخوان و ريهام إن الإخوان كانو بيتاجرو
بفعل الخير عن عمد , و هي بتتاجر بيه بجهل و تخلف , المحصله واحده , نفس النتيجه و
نفس كرتونة البيض .
.
أه بالمناسبه
, صدق أو لا تصدق , برضه فيه ناس تانيه كتير عندها مشكله في ال mentality و ال ألف باء , و لازم ننزل تحت أوي عشان نعرف نتكلم
معاهم و نفهّمهم , السيسي مامنعش برنامج ريهام سعيد ولا رجّعه , السيسي مقالش لتوفيق
عكاشه يلبس جلابيه فلاحي و يستضيف مرتضى منصور ( في الجونينه ) , و يشتمو طوب الأرض
( ده إسمه إعلام زفت خاص ) , السيسي مقالش للناس تنتخب ابن مرتضى و لا قال للنخبجيه
ينسحبو من الإنتخابات , السيسي مالوش علاقه إطلاقا بالجون اللي دخل في مسعد عوض امبارح
............ يارب تصدقو .
...................................................................................................................................
Mohamed
Hussein
29
نوفمبر 2015·
بيان الجماعه الإرهابيه
بالخارج ............... أه ماهما بيجاهدو ضد مصر و جيشها من أمريكا و بريطانيا و لهم
قطيع من الخرفان متمزّج أوي من الحكايه دي .
.
نص البيان :
1- احنا بنأكد
ان مرسي هو الرئيس الشرعي لمصر و الكلام ده مفهوش جدال ولا نقاش , يعني حد يقول نتفاض
في كده ولا حاجه لا ممكن ابدا ..ادينا بنقول أهو .
.
2- مستمرين في
الثوره ( ممممممم يعني ايه ثوره يا اخوان ؟ ) , و لازم نخلص من الإنقلاب و بنجمع أدواتنا
لكده ( عارفها ادواتكو دي , دعم امريكي وبريطاني و الشيطان ذات نفسه ممكن توقفوه في
الصفوف الأماميه و تقولو ده امير المؤمنين ) .
.
3- و بعد مالريس
مرسي يرجع يحكم مصر لازم نفهم ان ورانا شغل كتير و مش فاضيين بقى , و بلاش نختلف على
حاجات هايفه , ( أه فهمت , اللي عايز الفازه ياخد الفازه و اللي عايز السجاده اللي
في مدخل قصر الرئاسه ياخدها و نبقى نفرش لمرسي حصيره , ده راجل ولي و بتاع ربنا و مش
بتفرق معاه الحاجات دي ) .
.
4- احنا عايشين
في أمريكا و بريطانيا صحيح بس هنحرر القدس من ايد اسرائيل ( اللي هي بنت أمريكا و بريطانيا
؟! ) .
.
.
أنا بقى : ثواني
بس , هستعجل لكو على المراكبي .
........................................................................................................................
Mohamed
Hussein
29
نوفمبر 2015·
أحمد منصور كلب
الجزيره : الحكام العرب اللي وقفو مع روسيا الكافره الملحده بنت الحرام ضد تركيا المسلمه
المؤمنه اللي بتبيع سبح جلبو لنفسهم العار و الشرار و يكأنهم يحاربون الله و رسوله
و كده يعني .
.
أيوه يا سيدي أيوه
, مايصحش كده ( بصوت السيسي ) , احنا لازم ندعم تركيا المسلمه و أمريكا المسمله و بريطانيا
المسلمه ضد روسيا بنت الحرام , و لازم كمان نساند داعش المسلمه ضد جيش سوريا الملحد
الزنديق , و لازم نحب تركيا و نعشق دعمها للإرهاب , و نكتب في ارهابها قصايد شعر ,
هما كانو عملو ايه ؟ ايه يعني شوية خراب في سوريا و ليبيا و تونس , و ربعميت خمسميت
عسكري مصري اتقتلو , ايه يعني لما تركيا ترعى و تعلف الإرهابيين اللي هربو من مصر وتفتح
لهم قنوات عشان تخرب بلدنا ؟ , ولا حاجه طبعا , داعش دي مسلمه يا جدعان هي و النظام
التركي , وهما اول اتنين هيدخلو الجنه لعلمك بقى , و هيقفو على باب الجنه يشوفو كارنيهات
الناس و بطايقهم ..
..................................................................................................................................
Mohamed
Hussein
29
نوفمبر 2015·
توفيق عكاشه مستضيف
مرتضى منصورعشان يتكلمو عن مصر و السياسه و الإقتصاد و الموقف الدولي و موقف عبود
, الحلقه دي ناقصها مصطفى بكري و الريس برايز و تبقى حلقه نموذجيه عنوانها ( ديك أم
الإعلام الهادف ) .
.
و تيجي حضرتك تسألني
عن المستقبل و تقولي : هو بكره شكله عامل ازاي مع إعلاميين و نخبجيه بالشكل ده ؟ هقولك
: شكله أخضر , بكره هيبقى أخضر بإذن الله , أه و الله أخضر ,
......................... و بأستيك من فوق !!.
....................................................................................................................................
Mohamed
Hussein
28
نوفمبر 2015·
يسري فوده في حوار
لل BBC : مفيش ثوره غير 25 يناير , و لما بقول ثوره
يبقى بقصد 25 يناير !! .
.
بص يا عم يسري
, بغض النظر انك كنت واحد من أبطال معركة اللمون الشهيره و إن أضعف الإيمان انك كنت
تستحي وتتكسف على دمك و تنسحب من الحياه العامه تماما و تشتغل على عربية بطاطا , بس
هقولك , في حسبة العدد و نزول الناس كانت ثورة 30 يونيو أكبر من 25 يناير , و بحسبة
رئيس منتخب في الإتنين اللي شيلناهم كانو متنيلين على عين أمهم منتخبين , و بحسبة الجيش
فالجيش نزل في الحالتين , يبقى ايه بقى ؟! .
.
هقولك أنا , في
ثورة 25 يناير اللي كنت بأيدها بكل طاقتي رغم وجودي بره مصر ( و صفحتي تشهد ) كانت
ثورة ضد نظام فاسد بس اكتشفنا لاحقا انها كانت ضد نظام فاسد لصالح قوى عالميه شريره
بنت تيت , أما ثورة 30 يونيو ف دي يا مولانا اللي قلبت الترابيزه , ثورة ضد الإتنين
, النظام الفاسد و القوى العالميه بنت التيت .
.
هقولهالك بطريقة
تانيه , ثورة يناير كانت بتأيدها الجزيره و أوباما ( لما قال هندرّسها للعيال في المدارس
) و بريطانيا كتبت فيها قصايد شعر , ثورة يونيو هي العكس , و لما تقول مفيش ثورة غير
يناير تبقى وقفت في الجهه اللي تناسبك مع التلاته دول ( الجزيره و أوباما و كاميرون
) , وانا وقفت في الجهه اللي تناسبني مع شعب و جيش و حيطان البيت و ضد التلاته الأوساخ
, أظن احنا كده مش محتاجين نفكر بعمق ولا نضرب أخماس في أسداس عشان نعرف هويتك و انتمائك
.
.
طز في جنابك .
................................................................................................................................
Mohamed
Hussein
28
نوفمبر 2015·
ههههههههههههه
اضحك مع 6 ابريل
.
من شهر فات , و
على صفحتهم :
... الثوره هي
الحل ...................170 لايك
...حق الشهدا لازم
يرجع ...... 113 لايك .
...راجعين للميدان
... 95 لايك .
... ماذا بعد السيسي
؟ ..17 لايك .
.
و من يومين بقى
...خلاص خلاص
, المفاوضات و الحوار هما الحل , هنتفاوض و نتكاتف من اجل انقاذ الوطن و الخروج من
عنق الزجاجه و الكلام الكبير ده !! ............ .يعني باختصار : احنا نمشيها مفاوضات
يا مصيلحي , و ننقذ الوطن بالمره .
.
ههههههههههههه
حوار مع مين يا ضنايا ؟ و وطن مين اللي هتنقذوه ؟ يابني انقذ بنطلوتك الأول و ارفعه
على وسطك .
.
.
الحقيقه موقف
6 ابريل و الهري بتاعها و محاولتها باستمرار انها تعيش في دور إنها حركه لسه ليها أي
تلاتين لازم و ممكن بقى تشيل أنظمه و تحط أنظمه و تعمل شألباظات و حوارات و تحكم و
تتحكم و تؤمر و تنهي , الموقف ده بيفكرني ببوست قريته من كام يوم عند صديق و عالم رائع
كتب على صفحته : إن العلماء توصلو في النهايه لحقيقه علميه بتقول : nothing is something !!.
................................................................................................................................
Mohamed
Hussein
28
نوفمبر 2015·
فنجان قهوه
................. عشان الدايره المقفوله
.
مشروع الضبعه النووي
( هنحل مشكلة الطاقه و يبقى عندنا تكنولوجيا نوويه سلميه ) , هنبتدي حالا أهو في العاصمه
الإداريه الجديده ( عشان ننظم الدنيا و نخف التكدس عن القاهره اللي بقت شبه عربية المترو
بتاعة الستات الساعه 2 الضهر ) , و قناة السويس الجديده و شرق التفريعه و استصلاح مليون
فدان و بدء تسليم أول دفعه من مشروع المليون وحده سكنيه و مشروع صوامع القمح و غيرها
كتير .
.
كتّر ألف خيرك
يا ريس , الكلام ده حصل في سنه و نص , مشاريع عملاقه , خيرها الحقيقي هنشوفه في السنين
الجايه ( طبيعة المشاريع الكبيره كده ) , بس تعالى بقى ياريس اهدى شويه عشان عايزك
في كلمتين , تشرب ايه الأول ؟ قهوه عالريحه , ماشي , روح ياد يا امير هات لنا اتنين
قهوه عالريحه من القهوه اللي جنب سوبرماركت الحاج محمد .
.
بص ياريس عايز
اكلمك في موضوع الحلزونه أو الدايره المقفوله , ناخدها واحده واحده كده و ربنا معانا
, بقى صلي عالنبي عليه الصلاة و السلام , الدايره المقفوله دي اسمها منظومة التقاضي
, مجرم و ظابط شرطه و أمين و محامي و قاضي و وكيل نيابه , ظابط الشرطه محتاج يتعلم
ان الزمن اتغير و الحكايه بينه و بين المجرم اسمها تطبيق القانون مش طار شخصي ولا حاجه
, و المحامي ( يالله ما علينا ) , و والقاضي مايجيش يلاقي قدامه 10 ألاف قضيه , نصهم
صحة توقيع و نفاذ لعقود البيع و الشرا ( ده شغل شهر عقاري و مليارات ضايعه عالدوله
, لو خفضنا رسوم التسجيل بتاعة العقود للربع هنكسب مليارات و نفك التكدس اللي عند القضاه
) , احنا كده عايشين في منتهى الهبل اللي في الدنيا , و الحكم عالمجرم ياخد سنتين قول
تسعه فيقوم المجرمين اللي بره يتشجعو أكتر و المجرم اللي جوه ندلعه تسع سنين حتى لو
كان قتّال قتله , و عشان المجرم اللي جوه متدلع يقوم المجرم اللي بره يتجرأ حتى على
كماين الشرطه و يقتل ناس منهم , يقوم ظابط الشرطه ينفعل و يبلطج و نلف في نفس الدايره
المقفوله , الحلزونه .
.
المنظومه دي محتاجه
تتفور يا ريس , عندك قنابل كفايه ولا أبعت لك من عندي ؟!! , و النبي طلب أخير و شخصي
, لو قررت تفوّر يعني ماتنساش حبيب قلبي أحمد الزند في الليله دي .
.....................................................................................................................................
Mohamed
Hussein
28
نوفمبر 2015·
واضح إن الداخليه
مصرّه جدا على التعامل بنفس الغباوه القديمه , و كل ما نمشي خطوتين لقدام يرجعونا عشره
لورا , المجهود اللي بيبذلوه و التضحيات الكبيره بتاعتهم كلها بتتبخر في الهوا على
ايد اتنين تلاته ظباط ولاد تيت , أنا نفسي بقيت أحط علامات استفهام و اقول الناس دي
تبع مين بالظبط ؟!! .
.
مشاهد كتير تجبرني
على علامة الإستفهام دي , من أول حكاية القبض على واحد في فرحه , و اختيار التوقيت
, حتى لو هو مجرم او هربان من حكم أو أو , ليه اخترتو التوقيت ده تحديدا ؟! هل غباوه
مركزه و لّأ حاجه تانيه ؟!! انتو معانا ولا مع الناس التانيين ؟ و ليه القبض على صلاح
دياب الفجر و تصويره بالكلابشات حتى لو كان مذنب ؟ مكانش عندكو وقت تاني ؟ طب ده رجل
اعمال يعني مش هيجري منكو ولا حاجه , التفاصيل الصغيره و المريبه و اللي قفلت بحالتين
تعذيب في اسبوع واحد دي كمان علامة استفهام كبيره .
.
ياريس عبد الفتاح
, من ساعة اعتصام امناء الشرطه في الشرقيه و تعامل الحكومه معاه بشكل طري و انا ماستبشرتش
خير , عايز اقولك بس خلي بالك , ماتسيبش كام بلطجي يستفزو مشاعر الناس , في النهايه
انت اللي بتشيل الليله .
...........................................................................................................................
Mohamed
Hussein
27
نوفمبر 2015·
بالورقه و القلم
.
بص حضرتك كده ؟
بصيت كويس ؟ طب اقرا بقى , صور لابن أردوغان مع قيادات داعش , حبس رئيس تحرير جريده
تركيه عشان نشر خبر عن تسليم تركيا لصفقة أسلحه لداعش , داعش بتبيع البترول لأنقره
........... بس تركيا مالهاش علاقه بالإرهاب صح ؟! .
.
طب بص تاني كده
, بصيت كويس , تركيا قبل ماتضرب الطياره الروسيه ماتصلتش بينا ( روسيا ) و اتصلت بالناتو
أو ب بريطانيا تحديدا ( و أكيد بأمريكا ) , قالو لها اضربي يا شابّه و ماتقلقيش ( ده
كلام بوتين و بوتين مش بيبيع بليله ) , بعد كده رد الفعل البريطاني الأمريكي مادعمش
أوي موقف بهلول اسطنبول , و دلوأتي أردوغان بيقول إننا ماكناش نعرف ان الطياره روسيه
( شوفتو الدكر ؟ ) , و بوتين مابيردش عالتليفون ( لا دكر مفيش كلام ) , عايز أقابل
بوتين يوم الإتنين في باريس ( و تقابله ليه لما انت دكر , ما تبلع ريقك و تحاول تصرف
العفريت اللي حضرته ؟ ) .
.
طب بص بقى أخر
مره , صح , اه صحيح ( بصوت السيسي ) ان التشابك الإقتصادي بين دول زي تركيا و روسيا
و حلف الناتو و أمريكا معقد جدا , و صح ان الصفقات و المشاريع دي بعشرات المليارات
, و صح إن بوتين مثلا لو قرر يدك تركيا و يجيب عاليها واطيها هيلاقي واحد عنده بيقوله
اعقل يا حاج بوتين و خد عندك , لو نفخنا تركيا هنخسر أد كده في المشروع الفلاني , و
احتمال نخسر مشروع كذا في صفقة كذا , و و و و , بس صدقني و الله , فيه لحظات القلم
نفسه مابيعرفش يكتب فيها , هتيجي تكتب بالقلم تلاقيه مابيكتبش .
.
الحكايه إن اللي
عملته تركيا في الطياره الروسيه اسمه اعتداء عسكري , و كل المواقف السلبيه اللي اعلنت
عنها روسيا ( سياسيه أو اقتصاديه ) مش هتشفي غليل الروس ولا هترحم بوتين في كتاب التاريخ
, يعني باختصار , الرد الروسي الحقيقي هيكون عسكري ( الجزاء من جنس العمل ) , و مش
هيكون بضرب طياره روسيه ( الأهبل منع تحليق طياراته خايف من كده , و كأن الحكايه راس
ب راس !! ).
.
أردوغان نفسه عارف
كويس جدا انه هيتنفخ و انه لبس في الحيطه رسمي , كل الحكايه و الاتصالات هي محاولة
لتقليل حجم النفخه , أو استعجالها على طريقة ( الوقوع في البلا ولا انتظاره ) .
...............................................................................................................................
ليست هناك تعليقات:
إرسال تعليق