مزادات

مزادات
.
عملو علينا في البلد
مزاداتْ
قال بيه يجامل بيه
وبيه يهادي البيه
وبيه يبعنا لبيه
مازهقنا م البهوات !.
.
وبيه يقول للبيه

خدلك نشان مني
كافؤك يابيه بنشان
علشان قتلت ابني
ابني الكبير اللي اتقتل
قلتو إنه مات !
.
هو احنا
ياللي اسمك وطن
عايشين في أرضي
مستورين
ولا في زمن النخاسه
مقهورين
ولا في سوق التلات !
.
ساعات بقدم شكوتي
لله بذل
وساعات يضيع مني
الرجا والنور واضل
ساعات !

.

محمد حسين