Mohamed
Hussein
15
نوفمبر 2018·
معركة الوعي
............. رداء سيدنا النبي
.
فيه حاجات كتير
جدا بتترمي للناس ك ( طعم ) , طعم بيرميه مخرج العرايس عشان يشوف مستوى الوعى و مستوى
الجهل و الهطل , و بناء على القياس ده و النسب اللي بيشوفوها بيحطو خططهم و إزاي يتعاملو
معانا مستقبلا ؟ هل يتعاملو معانا باحترام كبني أدمين ؟ ولا يحطو في بطنهم شادر بطيخ
صيفي لأننا لسه مجرد قطيع من الحمقى ؟!
.
من ضمن الحاجات
دي مثلا فكرة إن صورة تنزل لشبشب قديم و يتكتب تحتها ( نعل سيدنا النبي ) و اعمل لايك
بقى و شير بعنف , أو جلابيه قديمه و يتقال عليها ( رداء سيدنا النبي ) .
.
حجم اللايكات و
الشير و التفاعل على الهجايص دي بيتحلل كبيانات و بيطلعو منه بنتايج , يعملو معانا
ايه ؟ او يعملو فينا ايه ؟ او حتى يستخدمونا ازاي ؟
.
مفيش شبشب ولا
جلابيه هيعيشو 1400 سنه عشان في النهايه يتصورو صوره و حضرتك تشوفها تقول سبحان الله
( و تتشحتف ) و تتخيل انك كده بتنصر الإسلام وإن الملايكه اللي على كتفك اليمين مش
ملاحقين عليك يا عيني في كتابة الحسنات
.
طيب تمام , نفترض
جدلاً بقى انك قدام حذاء أو رداء سيدنا النبي فعلا , ها ؟ وبعدين ؟ so what ؟.
.
ولا حاجه يا مولانا
, و لا أي حاجه خالص , نعل سيدنا النبي مجرد شبشب , و رداء سيدنا النبي مجرد جلابيه
, و تسريحة شعر سيدنا النبي مجرد تسريحة شعر , و الأنبياء اجمالا ربنا مش بيبعتهم لنا
عشان يلعبو دور ال ( جان بتاع السيما ) اللي هيعلم الناس الموضه ولازم يقلدوه في شكله
و هيئته و حركته و مشيته , لا خالص , الأنبياء ربنا بيبعتهم عشان يعلموك الأخلاق و
القيم و المعاملات , أخلاق و قيم و معاملات , مش جلابيه و شبشب و تسريحة شعر .
.
يوم مانفهم كده
, يوم مانبطل نشير الهبل و الحماقه و نتشحتف عليها , يوم ما نقتدي فعلا بأخلاق و معاملات
الأنبياء و مانجيش خالص ناحية لبسهم و هيئتهم , وقتها بس مخرج العرايس هيعمل لنا اعتبار
و هيبطل يستخدمنا في حرق بلادنا اللي بيحرقوها بإيدينا و بالشعارات اللي بنحبها .
...........................................................................................................
Mohamed
Hussein
15
نوفمبر 2018·
النيابه العامه
في السعوديه أعلنت تفاصيل التحقيقات في مقتل خاشقجي .
.
أهم 3 حاجات في
رأيي الشخصي هما التالي :
.
1- الإعتراف بإن
مسئولين أمنيين سعوديين ورا الجريمه و التحقيق معاهم و تحويلهم للمحاكمه .
.
2- تطابق نتايج
التحقيقات مع الأخبار اللي كانت بتسربها تركيا و تنشرها قناة الخنزيره بيعني إن نظام
أردوغان عنده علم مسبق باللي هيحصل و مخترق بشكل ما الفريق الأمني السعودي ( فيه خاين
واحد على الأقل ) أو بيتجسس على القنصليه السعوديه ( و دي تبقى حدوته تانيه خالص )
.
.
3- تالت و أهم
حاجه على الإطلاق إن نتايج التحقيقات و بالشكل ده و بالتفاصيل و بالإعتراف بتوجه رساله
في منتهى الوضوح , رساله بتقول لأردوغان اللي عمّال يساوم السعوديه من شهر و يحاول
يبتزها و يلوي دراعها , بتقوله , التسجيلات و الحبشتكانات اللي عندك تقدر تبرمها دلوأتي
و تحطها في الصندوق , أه في الصندوق .
...........................................................................................................................
Mohamed
Hussein
14
نوفمبر 2018·
مالك يا أستاذ
؟ شكلك مهموم
- والله حضرتك
مفيش , البنات مطلعين عين أهلي شويه .
.
ليه بس عملو ايه
؟
- يا سيدي كل مايحوّشو
200 جنيه يروحو يشترو بيها ماكياجات , و إيشي كونتور و إيشي كونسلر و إيشي ليب جلوسر
.
.
ايه الحاجات دي
؟
- دي حاجات استغفر
الله العظيم كده .
.
طب عموما مش مشكله
, خليهم يعيشو سنهم , مش هما ماشاء الله تبارك الله قرّبو يخلصو جامعه ؟ .
- لا حضرتك , دول
لسه في ابتدائي .
.
نعم ياخويا ؟!!
- اه و عهد الله
زي مابقولك كده .
.....................................................................................................
Mohamed
Hussein
14
نوفمير 2018·
خبرين و حدوته
.
الخبر الأول بيقول
, الإتحاد الأوروبي يتحقق من مصير مليار يورو قدمها لتركيا من أجل اللاجئين .
الخبر التاني
: انسحاب الوفد التركي من اجتماعات باليرمو ( ايطاليا ) اللي معموله عشان الوضع الليبي
.
.
دول الخبرين ,
و الحدوته ببساطه شديده , يعني في مستوى الطالب الخروف و الطالب شمام الكوله الجميل
كالتالي :
.
ايه علاقة تركيا
بوضع في ليبيا ؟ و ايه علاقتها بالمفاوضات ؟ تركيا لا هي دولة جوار و أمن قومي زي مصر
و تونس و الجزائر , ولا هي دوله عظمى بترعى مفاوضات زي روسيا و فرنسا و ايطاليا .
.
هل لتركيا أي حاجه
تخص الملف الليبي ؟ اه يا مولانا , لها فضلة خيرك شوية ارهابيين مسرحاهم هناك و شوية
أسلحه بتوصلهم للإرهابيين و لها بعض المسئولين في الحكومات العميله في ليبيا , اللي
محدش يعرف عددها ولا يعرف مين فيهم تبع مين .
.
طب برضه فين الحدوته
؟ الحدوته باختصار و بالترتيب
- تركيا دولة استعماريه
قديمه , جينات الاستعمار في دمهم , و استعمار يعني خراب و سرقه ونهب للشعوب ( لا والله
يا مولانا استعمار لا يعني كاريته الملك و الخدامه الفرنسيه و بتاعة البليله اللي من
سويسرا و الهبل اللي بتتشقلب فيه معاليك ) .
.
- تعمل ايه الدوله
الاستعماريه اللي بقت ضعيفه جدا و سانده نفسها بالعافيه ؟ تشارك في حرق و تخريب دول
الجوار , ترعى ارهابيين , تبعت سلاح , تسلط اعلامها لتلميع الوجه القبيح , تسرق شوية
بترول و غاز من هنا و من هناك و حتى أشجار الزيتون و الحلل النحاس بتسرقها .
.
- طب لما دوله
زي سوريا تخرب يحصل ايه ؟ تاخد تركيا شويه من اللاجئين بتوعها , نوعيات معينه ( النوع
الضاني ) , منهم يكونو جواري و غلمان في بلاط السلطان ( و المثل بيقول : اللي أكل عيش
اليهودي يضرب بسيفه ) و منهم يكونو سبوبه تسترزق منها تركيا , عايزين شوية مليارات
يا اتحاد يا أوروبي عشان الكلاب اللي مربينهم عندنا ممكن نطلقهم عليكو لو مابعتوش المليارات
.
.
مصر ايه بقى ؟
مصر مين ؟ مصر ازاي ؟ مصر الدوله اللي ماضربتش طلقة رصاص واحده في سوريا ( و كانت تقدر
و كانت هتاخد شيكات على بياض في وقت كانت في أمس الحاجه للفلوس ) , مصر الدوله اللي
استقبلت ملايين السوريين و مقالتش عليهم لاجئين , مصر الدوله اللي ماحوّلتش اللاجئين
لسبوبه تسترزق منها ولا لكلاب سعرانه تطلقهم على اعدائها .
......................................................................................................................
Mohamed
Hussein
13
نوفمير 2018·
يابني ماتقلقش
, احنا مش شاغلين نفسنا ولا بنعمل فتنه ولا حاجه , احنا بس بنتسلى , و كل الحكايه إننا
ماحبّيناش نسيب الكلاب تعوي و القافله تسير , فقلنا نركن القافله على جنب شويه و نجيب
الدفاتر و ننزل نقطع لسان الكلاب و بعدين نرجع ناخد دفاترنا و نطلع بالقافله تاني
.
.
علي يمينك ياسطى
و النبي , نزّلني محطة الكلاب اللي بتعوي .
.......................................................................................................................
Mohamed
Hussein
13
نوفمير 2018·
حاضر هنجيب الدفاتر
.
كنت بشتغل في السعوديه
بعد 2001 , شغلي كان في منطقة إسكان مدني , عماير كلها نسخه بالكربون زي بعض حتى في
التقسيمه من جوه و التصميم , سألت واحد سعودي صاحبي هي العماير دي اتعملت امتى و ازاي
و ليه كلهم شبه بعض كده ؟ قالي العماير دي كلها اتعملت في وقت واحد و بسرعه جدا أيام
ما صدام دخل الكويت , عشان الكوايته الهربانين يسكنو فيها , قلت له هما الكوايته هربو
؟ قالي في ساعتين زمن يا دكتور , قلت له و السعوديين سكنو الشقق دي امتى ؟ قالي لما
الكوايته رجعو بلدهم و سابو الشقق , سألته الكوايته رجعو بلدهم امتى ؟ قالي لما الناس
بتوع ربعكو راحو حررو لهم أرضهم .
.....................................................................................................................
Mohamed
Hussein
13
نوفمبر 2018·
مفيش مسئول في
دوله خليجيه بينطق كلمه أو بيهرش هرشه من غير تفويض رسمي من ولي امره و ولي نعمته
.
.
الكويت موقفها
الرسمي مشبوه تماما من أول ماقررت تلعب دور الوسيط بين التحالف العربي و الكشك الخليجي
, مفيش حاجه اسمها وسيط لما تكون قدامك أدله قاطعه ان الكشك بيحاول يصرف فلوسه على
خراب و حرق دول تانيه , مفيش وسيط بين البلطجي و الناس المحترمين , وإلا في الحاله
دي بيكون الوسيط هو مجرد بلطجي بديل بينزل الملعب بتعليمات من نفس مخرج العرايس .
.
أما الشعوب فلها
احترامها , كل الشعوب لها احترامها , حتى لو كانو شعوب لدول بنت أول امبارح , و حتى
لو كانو مجرد أحفاد لأول جيل في دولتهم , الجيل اللي اتولد يوم مامصر كان عمرها في
البطاقه 9950 سنه .
..............................................................................................................
Mohamed
Hussein
12
نوفمير 2018·
عايزاك تربط لي
رباط الكوتشي و تقولي ماتخافيش انا مش بعاكسك مع إنك جميله أوي و تتعاكسي يا ابراهيم
.
..................................................................................................................
Mohamed
Hussein
12
نوفمير 2018·
صباح الخير
.
كنت ماشي في الشارع
و رباط الكوتشي إتفك , و حيث إني ملتزم و متدين أخر فيصل و بناطيلي كلها طويله مغطّيه
الشراب و مش بسمع غير حمو بيكا , إرتبكت و اتلخبطت و مابقيتش عارف أعمل ايه و بقيت
أتلفّت حواليا عشان ألاقي مكان فاضي أربط فيه الكوتشي .
.
و فجأة ظهرت بنت
لقيتها جنبي , انا اترعبت أول ماشوفتها , ماهو الواحد مايضمنش ظروفه في الأيام دي و
التحرش مالي البلد , لقيت البنت قعدت كده و بدأت تربط لي رباط الكوتشي و قالت لي انا
ملاحظه من شويه انك مرتبك و مش عارف تتصرف إزاي , و على فكره أنا مش بعاكسك , مع إنك
مز السنين و التنين و تتعاكس عادي .
.................
.................
يالله يا جدعان
, اعملو لي لايكات كتير و قلوب و دباديب , و اتشحتفو و هاتو ناس تتشحتف معاكو , و اللي
عنده أي افتكاسه زي الإفتكاسه بتاعتي يفتكسها عادي , لأن الدستور بيدينا الحق إننا
نفتكس , و زي ماقال عمي الكبير عالم الثدييات , إن الإنسان بيلد غالبا , لكن أحيانا
كتير بيبيض .
.
بكره بإذن واحد
أحد أحكي لكو حكاية علبة الأوجمنتين 1جم اللي لقيت مكتوب عليها لفظ الجلاله و الفرخه
أم 3 رجول و الديك اللي بيأدن و يقيم الصلاه مش بيأدن بس , و انتو تكتبو سبحان الله
و تعملو لايك و شير بعنف
.........................................................................................................................
Mohamed
Hussein
11
نوفمبر 2018·
فيا عاده و طبع
هباب , لما اكون ماشي في الشارع بحب أتأمل ملامح الناس و تعبيرات وشهم في الفرح و الغضب
و طريقة ضحكتهم و أصواتهم و نظرات العيون احيانا .
.
امبارح حصل موقف
و لقطه من أصعب اللقطات في حياتي بسبب عادتي الهباب دي , كنت في مشوار في المهندسين
و داخل عماره كبيره فيها مركز علاج أورام شهير جدا .
.
واقف تحت مستني
الأسانسير ينزل , نزل الأسانسير و فيه ست في الخمسينات , لبسها شيك و شكلها جامعيه
, معاها ابنها في أواخر العشرينات ساندها و ماسك في ايديه التانيه ملف المسح الذري
الكبير ده .
.
سمعت الأم بتقول
لابنها بالنص و هما خارجين من الأسانسير ( يابني ريحني و قولي انا عندي ايه بالظبط
و باخد علاج لإيه كل شويه ؟ انت بقالك شهور سايب شغلك و بتوديني أخد محاليل ) , بصيت
عالست بصه تانيه و عرفت انها كفيفه !! .
..........................
..........................
عايز أقول للناس
اللي مابتعرفش تحمد ربنا , الناس اللي بتقعد تشتكي ليل و نهار لما يطلع لهم فسفوسه
في صباع رجلهم الصغير أو يطلع لهم حب شباب , و الناس اللي بتضرب بوز شبرين عشان جالها
دور برد و شكل مناخيرها بقى أحمر من كتر استخدام المناديل و الموقف ده مأثر في نفسيتهم
اوي , و الست اللي مش بتبطل أفأفه عشان جارتها قالت لها صباح النور من غير نفس , و
الراجل اللي اكبر مشاكله في الدنيا ان عنده حته في العربيه محتاجه سمكره و طول الليل
مكتئب بسبب القصه دي , انتو بجد بجد , عاملين زحمه في الدنيا عالفاضي .
.
و عايز أقول لكل
شاب و كل بنت , مقاطعين أمهاتهم أو بيعاملوهم معامله سيئه , أصلها مابتحبنيش , دي بتحب
اخويا اكتر مني , دي مش بتعامل مراتي بطريقه كويسه , طب هي تعبانه ؟ هبقى ابعت لها
رساله عالواتس و اقولها سلامتك و جنبها ايموشن يشعر بالحزن ,عايز أقول للنماذج دي
, انتو عار عالبشريه .
....................................................................................................................
Mohamed
Hussein
11
نوفمبر 2018·
بالنسبه للناس
اللي بينزلو الشغل باللباس و البوكسر و الستات اللي بيروحو يجيبو الخضار و هما لابسين
مايوهات , عايز أقول لهم كلمتين , عيب كده أوي , اتكسفو على دمكو و بطّلو عهر و و عري
و دياثه بقى , هتتحرقو في نار جهنم يا بعدا .
.
يا أستاذ يا أستاذ
- نعم يا حبيبي
؟
.
هي فين الناس دي
اللي بتنزل الشارع بعري و بوكسرات و مايوهات ؟
- مممممممممم ماتقول
لنفسك يابن الصرمه ؟!
................................................................................................................
Mohamed
Hussein
11
نوفمبر 2018·
معركة الوعي
............ الفرق بين التدين و الغشم
.
مينا سمير شاب
و هو ماشي في الشارع لقى بنت بتتعرض لتحرش , حاول يدافع عنها بشهامة المصريين , مينا
مات و هو بيدافع عن شرف البنت اللي بالتأكيد مايعرفش اذا كانت مسلمه ولا مسيحيه .
.
لو عندك يقين قاطع
ان الشاب ده مش شهيد و مش هيورد على جنه بموجب كشف الأسماء بتاع اللي هيدخلو الجنه
اللي حضرتك شايله في جيب البنطلون الوراني ؟
.
لو عندك يقين ان
شاب عمره 20 سنه لسه ماعملش في حياته خير ولا شر , لسه عيل , ومات وهو بيدافع عن الشرف
و العرض , إنه أبواب الجنه مقفوله في وشه ب 100 ترباس ؟ .
.
لو عندك يقين ان
عشرات و مئات و ألاف زي مينا سمير , شباب زي الورد , ضحو بحياتهم في سينا و عالحدود
و في الكماين و هما بيدافعو عن أرضك و عرضك , مش هيعتبو بابها ؟ و هيروحو جهنم حدف
؟
.
لو عندك يقين إن
حتى جملة ( الله أعلم ) ماينفعش تتقال و لا ينفع نقول ( ربنا رحيم بعباده ) و لازم
نفتي و نصدر أحكام نهائيه ربانيه ( مكان ربنا ) و احنا نايمين على بطننا عالسرير بنقرا
كتاب ( أحكام الفساء ) ؟ .
.
لو عندك اعتقاد
ان ربنا خلق خمستاشر عشرين مليون مسيحي في مصر لخدمتنا و الدفاع عننا و لما يموتو يدخلو
جهنم , على طريقة : يالله يابني انت وهو عملتو اللي عليكو , و حميتو أرضي و شرف بنتي
, عارفين طريق جهنم ولا نبعت حد يدلكو ؟
.
لو عقلك قابل و
راضي و مستريح على كده ؟ يبقى بالتأكيد عندك خلل في مفهوم العقيده و عندك خلل أكبر
في إدراك إسم من أسماء الله الحسنى ( العادل ) .
.
مش هبطل أكتب و
أرفض ( حدف الغرب ) علينا , ماسمهاش مثليه جنسيه , اسمها ( لواط ) , مفيش حاجه اسمها
سينجل ماذر , مش هنمشي في الشارع بمايوهات ولا عريانين عشان نعجب حد , مش هنرخص بيوت
للدعاره و الشذوذ زي أوروبا و تركيا ولامؤاخذه .
.
و برضه مش هبطل
اكتب و أرفض ( حدف الجهل ) , ربنا اللي أعرفه و مؤمن بيه عادل , و ديني عادل , و أي
حاجه تصطدم بمفهوم العدل أو تصطدم بأبجديات العقل البشري ( اللي ربنا خلقه ) بعرف انها
مش من ديني , إنما تفسيرات و تأويلات و هرطقات للعواطليه و أشباه المشايخ .
.......................................................................................................................
Mohamed
Hussein
10
نوفمبر 2018·
النهارده حصل حاجتين
عندي , حاجه حلوه و حاجه مش حلوه .
الحاجه الحلوه
ان بنك من البنوك عمل ماكينة صرافه قريبه أوي من البيت و رحمني بالتأكيد من إني أركب
العربيه وألفّ على ماكينة صرافه .
الحاجه اللي مش
حلوه إن حسابي في البنك أصلا أصلا مبقاش فيه ولا ساغ , أه و عزة جلال الله , لا ساغ
ولا جنيه ولا أي عمله خلقها ربنا , يعني أنضف من الصيني بعد غسيله , و بطاقة البنك
بحطها كده في المحفظه من باب الوجاهه الإجتماعيه , عشان لما أجي أطلّع الرقم القومي
أو كارنيه النقابه في أي مصلحه حكوميه أطلع معاهم بطاقة البنك على سبيل الفشخره الكدابه
.
.
و هنا تحضرني مقوله
للأديب الرائع دوستوفسكي اللي بيقول فيها ( كنت فين يا خشب لما كُنّا نجارين ؟! )
.
...................................................................................................................
Mohamed
Hussein
9
نوفمبر 2018·
صباح الخير , جمعتكم
مباركه و التلات بتاعنا برضه , مش بتاع حمدين ولا حاجه
.
من يومين كتبت
بوست عن النقاب , البوست عمل قلبانه وشألباظات , و الحقيقه جت لي بدون مبالغه اكتر
من ألف رساله من ناس مش في الأصدقاء , كلها بلا استثناء رسايل من نوعية , عر* , ديوث
, ابن ال كذا , عاهر , ** أمك
.
فيه 4 من الألف
بعتو رسايل محترمه و رديت عليهم , منهم اتنين ستات منقبات و اتنين رجاله سلفيين ملتزمين
دينيا , اتكلمنا باحترام , راجل منهم اقتنع و ست اقتنعت و اتنين لأ .
.
مش ده المهم ,
المهم النسبه 4 من ألف يعني بتتقال كده , 0.4% ,و بتساوي في نظرية التقريب صفر , يعني
صفر .
.
اصحاب الأكاونتات
اللي بعتو رسايل مقسومين نصين , نص اكاونتات مضروبه و شغل اللجان بتاع تميم ابن موزه
و خرفانه , و نص عباره عن ناس حقيقيين اغلبهم شباب ذكور , كتير منهم شمامين كوله تحديدا
, اللي هو ممكن يكون رأيه نفس رأي أو ممكن يكون مابيركعهاش أساسا ولا يعرف العصر كام
ركعه , بس لازم يدخل و يشتم لان اللي كتب البوست واحد مؤيد للسيسي .
.
الحقيقه عايز أقول
كلمتين و أوجه رساله للساده , رئيس الجمهوريه و شيخ الأزهر و وزير التعليم , بصفتهم
و شخصهم .
.
عارف يافندم ان
التركه الهباب دي مش بتاعتكو بس قدامكو مهمه و معركه شاقه , العقول اتملت سباخ , الله
لايسامحه مبارك خربها و سابها سداح مداح .
.
معالي الساده الأفاضل
, فيه ناس كتير محتاجه تتعلم من أول ألف باء , ناس جامعيين و معاهم شهادات , محتاجين
يتعلمو يعني إيه أخلاق و فضيله , و يعني ايه كبائر و صغائر , يعني لما تختلف في قضيه
لا هي فرض ولا كبيره و يترد عليك ببذاءه و قذف محصنات و مجموعه من الكبائر نبقى احنا
في مشكله حقيقيه .
.
فضيلة الأمام الأكبر,
معالي وزير التعليم , المنابر و المدارس تحت ايديكو يافندم , لو سمحتو اشرحو للناس
ايه علاقة خلق الله اللي هو احنا بسيدنا النبي ؟ هل نقتدي بأخلاقه و معاملاته ولا نقتدي
بلبسه و لبس زوجاته ؟ اشرحو ترتيب الأولويات , علمو الناس يفصلو أبو قرش عن أبو قرشين
, وشيلو الهري و العته اللي في المناهج و الخطب .
.
اشرحو للناس يعني
ايه عقيده و معاملات و دين و فرق توقيت و درء مفاسد , عرفوهم يعني ايه حديث ( أنتم
أعلم بشئون دنياكم ) .
.
الأفاضل اعضاء
البرلمان الموقر , فرحت جدا ان القانون اترفض وأتمنى مايتعرضش للتصويت عليه تاني قبل
عشره خمستاشر سنه , لما الناس تتعلم و تعرف الألف من كوز الدره , و الازهر و وزارة
التعليم يلعبو دورهم و يعدلو مناهجهم و ينضفو نفسهم بنفسهم .
.
معالي وزير الداخليه
, لو حصلت ألف حادثه , قتل و ارهاب و خطف أطفال و كانو الألف حادثه العامل المشترك
فيهم هو مجرمين متنكرين ورا نقاب ( رجاله أو ستات ) ماتطلبش من البرلمان قانون بالشكل
ده , مش دلوأتي خالص , عشان حجم الجهل و السباخ اللي جوه العقول و الصدور يكفي لحرق
قاره بحالها .
.
أما الأصدقاء اللي
بعتو رسايل و خاضو في الأعراض فعايز أقول لهم , انا مش زعلان بس مش مسامح , نتقابل
عند ربنا و اللي له حق ياخده , و عند الله تجتمع الخصوم
.
اه بالمناسبه
, البوست اللي كتبته بيقول انا مش ضد النقاب كحريه شخصيه ( تلتين عيلتي منقبات ) ولا
بدعو للعري و الهري ده , انا ضد تغطية الوجه و طمس الملامح في أماكن محدده و لأسباب
محدده , و حكاية الشراب الصوف مش سخريه , اسمها ضرب مثل لتقريب الفكره و توضيحها ,
أي عيل في تالته ابتدائي هيفهم المقصود و المعنى ده لو كان بيفهم .
........................................................................................................................
ليست هناك تعليقات:
إرسال تعليق