Mohamed Hussein
8 نوفمبر 2018·
البرادعي بُعث من قبره و رجع يكتب تويتات
تاني , تقريبا مزنوق في قرشين , و هيتوحد بقى مع الجماعه الإرهابيه و كل فصائل المعارضه
الداخليه منها و الخارجيه و المنوفيه و يجيبو معاهم أبو لهب و هتلر و هولاكو و عربي
كونته و سيد كيتو , و يعملو تحالف ضخم , ممكن يسمّوه تحالف ( كنت معدّيه قلت أخد الجمعيه
) .
.
اصبرو عالبرادعي كام يوم و هتلاقوه بينزّل
تويته فيها شعار رابعه , و مش بعيد نكتشف في أخر الحدوته إن الراجل الكيوت الرقيق ده
هو المرشد الحقيقي للجماعه الإرهابيه , زي عم مغاوري الجنايني في فيلم العميل 13 .
............................................................................................................
Mohamed Hussein
8 نوفمبر 2018·
شوفت يابني اللي حصل ؟
- خير حصل ايه ؟
.
ممممم مش عارف اجيبهالك ازاي , حادثه بشعه
- لا قول والنبي , قول بسرعه .
.
واحد يا سيدي قال ايه ؟ ماشي في الشارع
بالمسدس بتاعه
- بجد و النبي ؟
.
أه و الله
- و بعدين حصل ايه ؟
.
دخل كافيتريا و قتل بتاع 12 واحد كده
- هههههههههه لا لا انت بتهزر .
.
والله بكلمك جد , و بعدين انتحر
- هههههههههه ماهي الشرطه هتقول انتحر
, مع ان هما اللي قتلوه و انا ليا واحد صاحبي ساكن جنب الكافتريا دي و أكد لي ان هما
اللي قتلوه , و ماسابوش له فرصه انه يتحاكم محاكمة عادله قدام قاضية الطبيعي , دولة
الظلم , و مش بعيد يقولو عليه مختل عقليا .
.
انت بتقول فيها ؟ ماهما قالو مختل عقليا
فعلا
- هههههههههههه كنت عارف ان هما هيقولو
كده , و كانت فين بقى الشرطه لما مشي بالمسدس في الشارع و لما قتل ؟ ولا هما فالحين
يزودو مرتباتهم كل يوم تلات و بس ؟ .
.
انا عارف يا خويا .
- الناس بقت تشيل مسدسات في الشارع و بقينا
نتقتل عيني عينك كده , يعني الواحد ياخد مراته عشان يعزمها على قهوه يرجع هو و هي ملفوفين
في كفن , يارب هجره من البلد دي بقى .
.
ممممممم عايز تهاجر و تروح فين ؟
- أروح امريكا يا أخي , بلد أمان .
.
يا راجل ؟ طب مش كنت تسبّق يومين ؟ اهو
عالاقل كنت تلحق الحادثه و ينوبك منها نصيب .
- حادثة ايه ؟ .
.
اللي بحكيلك عنها يا جحش , في أمريكا ,
كاليفورنيا , مشي بالمسدس و دخل و قتل 12 و انتحر و قالو عليه مختل عقليا
........................................................................................................
Mohamed
Hussein
8 نوفمبر 2018·
قلقان من ماتش العوده بتاع الأهلي و الترجي
اللي هيتلعب بكره , و خايف انه مايبقاش مجرد ماتش كوره في نهائي أبطال أفريقيا ينتهي
بفايز و مهزوم , كمية الشحن غير طبيعيه و جماهير الترجي متحفزه و فيه اللي مستعد يدفع
ملايين عشان يخرّب علاقه بين دولتين ( زي ماحصل بين مصر و الجزائر ) , الحكايه ممكن
تكون محتاجه تدخل سياسي مسبق من مصر و تونس و اتصالات و تنبيهات من جانبنا على لاعبي
الأهلي إنهم ماينجرّوش لأي محاولة استفزاز مهما كانت نتيجة المباراه .
.........................................................................................................
Mohamed
Hussein
7 نوفمبر 2018·
خلاص يا جدعان محدش يزعل , النقاب حد جميل
و فريضه زي الصلاه و الصوم , و لو قررنا منعه في المدن و التجمعات لأسباب أمنيه هينزل
علينا غضب ربنا و مش بعيد السلعوه تطلع لنا بالليل و تاكل وداننا أو نصحى من النوم
نلاقي نهر النيل بيجري تحت السرير و مناخيرنا 3 فتحات و مغاغه بقت لازقه في السنبلاوين
.
.
و الإسلام دخل مصر من 70 سنه لما ظهر البترول
في السعوديه ( دخل هو و الجلابيه الزبده و العبايه السوده و علبة السجاير المارلبورو
الأحمر و المروحه و الكاسيت أبو روحين ) , مش من 1400 سنه , يعني أجدادنا و أجداد اللي
خلفونا ماتو كفار لأنهم ماحضروش الإسلام الجديد أبو بترول , ماتوعلى الإسلام أبو من
غير بترول , و هيتنفخو في الأخره بإذن واحد أحد .
.
و النبي بتاعنا اسمه محمد ابن عبد الوهاب
مش محمد بن عبد الله , و الراجل شيخ الازهر اللي قال إن النقاب لا فرض ولا سنه ولا
مستحب , ده مابيفهمش أي حاجه في الإسلام والشريعه , ده حيالله شيخ لأكبر مؤسسه إسلاميه
في العالم , اللي بيفهم هو الأسطى عوض صبي الحلاق اللي ربى دقنه و بقى بيخطب الجمعه
في الزاويه اللي تحت بيتكو , هاتو بوسه بقى .
............................................................................................................
Mohamed
Hussein
7 نوفمبر 2018·
فضفضه .......... بلدنا الطيّبه .
.
الواقع بنحسه صعب أوي , الصعوبه الإقتصاديه
اخر حاجه ممكن نفكر فيها , عشان احنا شعب بيعرف يعيش تحت أي ظروف , بكافيار بيعيش
, و بعيش و جبنه و عودين سريس بيعيش .
.
أصعب حاجه بتواجهنا و بتواجه أي مسئول في
رأيي هي الواقع الثقافي والفكري , دي القنبله الموقوته اللي البلد شايلاها في جيبها
و هي ماشيه , و زي ماقلت و بكرر , لو كنت قاضي هحكم على مبارك بالإعدام ألف مره مش
عشان قتل المتظاهرين , انما عشان قتل و تدمير الهويه المصريه .
.
امبارح كتبت عن النقاب في المدن و خطورته
الأمنيه , و لقيت ردود و رسايل ماتقلش جمال و حلاوه عن خفة دم الخليل كوميدي , و اللي
يقول يعني نمنع النقاب و نسيب العري ؟ البؤ ده حلو و بيعجبني , لا يا حماده , لا نقاب
ولا عري , لو عايز البلد دي تكبر و تكبر أوي ماتمشيش ورا حَدْف الشرق و نقاب و جلابيه
قصيره و كعب المرأه و طحال المرأه و أي هجايص , ولا تمشي ورا حدف الغرب , يعني لا المثليه
حد جميل ولا فيه حاجه اسمها سينجل ماذر , لو عايز البلد دي تكبر أوي قلّدها هي , قلّد
مصر, هي بعظمتها و تاريخها و جيناتها و هويتها , مصر مش السعوديه و أفغانستان ولا هي
برضه ايطاليا و أمريكا .
.
في قريتنا تلتين الستات منقبات , و تلتين
ستات العيله منقبات , بروح هناك و مش بلاقي غضاضه , الموضوع اتحول لعاده و تقليد أعمى
, هياخد شوية وقت لما الناس دي تفوق و تغير ستايل حياتها و ترجع مصريه زي ماكانت ,
لكن في القريه النقاب لا يعنيني ولا بيقلقني , انا ابن القريه و عارف بقول ايه , لا
فيه خطوره أمنيه ولا فيه مشكله لحد مالناس تقتنع بفكر و بوعي ثقافي , المدن الكبيره
لأ , لأ و ألف لأ , و البؤ بتاع العري ده انا بحاربه قبل منك , يعني يا جحش ماتبعشي
المايه في حارة السقايين .
.
انا عالفيس بوك ده من سنين طويله , عامل
زي اللي راكب توكتوك و ماسك ميكروفون في إيدي , بيلف في الشوارع و الحواري , يلاقي
شوية غرقانين في الوهابيه و تكفير الغير يمسك الميكروفون و يصرخ و يقول : فوقو يا ولاد
الكلب , يلاقي شويه عايزينها بلد سكرانه و شذوذ و قرف يمسك الميكروفون و يصرخ و يقول
: فوقو يا ولاد الكلب
.
أنا المصري يا أخي , و عهد الله ماعرف انتو
مين ولا جيتو البلد دي ازاي ؟ انا اللي ابويا و أمي علموني اكون مصري متزن في بلد الأزهر
و الكنيسه و الاهرامات , علموني مابقاش إرهابي ولا أبقى لامؤاخذه خواجه , أنا اللي
أبويا و أمي علموني مع انهم فلاحين لا راحو مدارس و لا عتّبو بابها , يعني لا خدو محاضرات
تنميه بشريه ولا كانو بيرطنو بالإنجليزي .
.
أنا اللي أبويا كان بيشرب جوزه ( معسل
) على باسطة السلم وانا جنبه بذاكر , و يلاقي الست لواحظ ( ام محمود ) فايته عالمشايه
ينادي عليها و يقول لها تعالى اشربي حجر معايا و تيجي أم محمود , و تدخل أمي تلاقيها
, تقول لها ازيك يا ام محمود , ترد ازيك يا غاليه و ازاي عيالك ؟ ترد امي و تقول :
احنا في نعمه , والله مانتي شاربه حاجه قبل ماتاكلي لقمه , عندنا سمك صابح محمد صايده
من الترعه , استني هجيب لك سمك الأول .
...............................................................................................................
Mohamed
Hussein
6 نوفمبر 2018·
قواعد البني أدمين العشره
.
1- أخلاقك و تدينك و عباداتك دي بينك و
بين ربك , ماتخصنيش انا في مفهوم المواطنه , يعني تسكر , ماتصليش ولا تركعها , تصاحب
بنات أو رجاله أو حتى شمبانزي , مايخصنيش , تختم القرأن كل يوم و تصلي قيام الليل و
تحج كل سنه , شئ جميل بس برضه مايخصنيش ولا يخص جارك ولا الأستاذ اللي ماشي هناك ده
.
2- يخصني في مفهوم المواطنه إنك ماتكسرش
اشاره , ماتسوقشي بسرعه جنونيه , تشرح بضمير في الفصل , تتقي ربنا في المستشفى الحكومي
اللي بتشتغل فيها , ماتاخدشي رشوه , ماتعطلش مصالح الناس , ماتلبسشي نقاب و تخبي هويتك
اللي هي ملامحك , ماتخربش ممتلكاتي الخاصه ولا ممتلكاتنا العامه .
.
3- لو عندك ولد و بنت , ربّي كل واحد بطريقه
مختلفه , ربي الولد يكون راجل لما يكبر و يتحمل مسئوليه و ينحت في الصخر ( مايبقاش
سي لوسي ) , و ربي البنت انها تحتفظ بكامل رقتها و انوثتها حتى لو بقت مديرة مفاعل
الضبعه النووي , علم ابنك ان الرجوله مش منحه ولا مكرمه من جنابه وعلم بنتك ان الأنوثه
مش ضعف من جنابها , عشان أنا قربت أطق من جنابي .
.
4- مهتم بالسياسه و الشأن العام ؟ ده حقك
تماما , بس اتعلم الأول ألف باء و أبجديات , اتعلم الفرق بين المعارضه و الخيانه ,
مع ان الفرق بينهم فرق السما من الأرض لكن نعمل ايه بقى ؟ماحنا باختصار في زمن الغباوه
.
.
5- امسك كتاب و اقراه بس خلي بالك , أي
كتاب هتمسكه في ايدك هيبقى زي سكينه , ممكن تقشر بيها بطاطس و تقطع بطيخ و لحمه أو
تدبح بيها نفسك أو غيرك , اختار نوعية الكتب , ولما تختار فكر وانت بتقرا , ماتسيبش
دماغك لكاتب أبدا ولا لشيخ ولا لمحاضر ولا لإعلامي , ماتسلمش دماغك تسليم أهالي لحد
, لا تحت بند الدين ولا تحت بند الثقافه و الحريه و التحرر و العمق الأقحواني , اعرف
انك في النهايه لازم تمسك السكينه بس ماتعورش نفسك بيها ولا تعور حد غيرك .
.
6- لما تقرا و تفكر لازم دايما تقارن و
تعرف إن طاقية زيد مش بالضروره تنفع على راس عبيد , و تجربة الدوله الفلانيه ماتنفعش
في الدوله العلانيه , العربيه المرسيدس حلوه و الفولكس حلوه , بس فانوس دي مايركبش
على دي .
.
7- علم ولادك , صبيان و بنات انهم يقولو
شكرا و حاضر و أسف , يقولوها بالعربي مش بالإنجليزي , اليابان اتقدمت جدا و محدش عندهم
بيرطن بالإنجليزي في البيوت ولا في الشوارع , بيعتزو بلغة بلدهم , واحنا لغتنا العربيه
مش لقيطه والله ولا لاقينها قدام جامع .
.
8- لما تطلب من حد يعملك حاجه في سوبرماركت
او بنزينه أو أي مكان , قوله شكرا , لما حد يقف لك بعربيته لحد ماتعدي بعربيتك شاور
له و قوله شكرا , كلمة شكرا كلمة بسيطه وسهله في النطق أوي .
.
9- في 2010 كنا كلنا برابطة المعلم كده
بنحبو في مجال السياسه , يعني بنزحف لسه و بنقول عالسكر أوكّر, انما بعد 8 سنين ماينفعش
نكون لسه بنحبو , اللي شوفناه في ال 8 سنين ينطّق الحجر و يعلم الحمار و يخليه جينتل
مان , ماينفعش تبقى في 2018 و تبقى لسه بتحبو و بتشكر في قناة الخنزيره و تقول البرادعي
سابقنا بمليون سنه ضوئيه أو تمدح في مراكز حقوق اللامؤاخذه الانسان الأمريكيه و البريطانيه
و الميديا الغربيه الكيوت اللي قلبها زي قلب الخسايه .
.
10- لما تفكر في أي مشكله عامه تخص بلدك
خرّج نفسك فورا من مفهوم المواطن لمفهوم المسئول أو حتى رئيس الدوله , اقعد عالكرسي
بتاعه في خيالك و فكر مكانه , شوف عندك امكانيات ايه و قماشة شكلها عامل ازاي و مميزات
ايه و عيوب ايه عشان تعرف تاخد قرار متزن , مش قرار واحد قاعد على شط ترعه بيمص لبشة
قصب .
.......................................................................................................................
Mohamed
Hussein
6 نوفمبر 2018·
الشراب الصوف اللي هنغطي بيه وشنا في الشوارع
.
عزيزتي المرأه المصريه , بعد التحيه
- تخيلي مثلا مثلا , حضرتك دخلتي الصيدليه
عندي لقيتيني لابس شراب صوف مغطي وشي و عامل فيه خرمين كده عشان عنيا , روحتي العياده
لقيتي الدكتور نفس الشئ , مشيتي في الشارع لقيتي الرجاله لابسه شرابات صوف في وشها
, ركبتي المترو روحتي الجامعه لقيتي الدنيا كلها بالشكل ده , هتحسي بايه ؟ ابنك في
ايدك أو بنتك , لو حد مننا احنا معشر الرجاله اللي لابسين شرابات صوف في وشنا خطف ابنك
من ايدك و كاميرات الدنيا و الأخره صورته مش هتعرف تجيبه , عشان ببساطه شديده الأجهزه
الأمنيه في مصر أو في أمريكا أو روسيا مش بتقرا الفنجان و تعلم الغيب و تعلم ما في
الأرحام , لا وعهد الله , لو الوش متغطي مش هيعرفو يحددو هويتي من نوع البنطلون اللي
لابسه ولا من عدد زراير القميص .
.
- وش معاليكي يعني هويتك , يعني بطاقتك
, يعني لو ارتكبتي مصيبه الكاميرات تعرف تجيبك واللي شافوكي يعرفو يوصفوكي , مش معقول
هطلب من المباحث الجنائيه تجيب واحده ست كل اللي يعرفوه عنها انها كانت لابسه عباية
مطرزه من تحت , تطريز العبايه مش بيحدد هوية الشخص , أه و النعمه .
.
- الأزهر الشريف , المؤسسه الإسلاميه الأكبر
و الأقدم في العالم قالك النقاب ده مش فرض ولا بطيخ , ده عاده , ومحمد بن سلمان ولي
العهد السعودي قالك صراحة كده , الفكر الوهابي نشرناه بتعليمات من أمريكا لمواجهة المد
السوفيتي , يعني لا تدين ولا حيض و بيض ولا كعب المرأه و مناخير المرأه كانو لخدمة
الإسلام , بالمناسبه صحيح , مفيش راجل في الدنيا بتغريه مناخير واحده ست عشان تكوني
في الصوره يعني , الحاجات اللي بتغري مش موجوده في الوش خالص .
.
واحنا بقى لما تكون بلدنا مستهدفه أمنيا
بالشكل اللي شايفينه , و لما يكون فيه دول و دويلات و أكشاك بتحاول تحرقها , يبقى انا
و انتي و طنط شوشو و عم عبد الجبار ملناش رأي , الرأي هنا رأي الأمن القومي , أمن البلد
دي , امن بناتي و ولادك .
.
- عايزه تلبسي نقاب ؟ قدامك 3 اختيارات
, تروحي تعيشي في السعوديه , الناس كلها هناك لابسه نقاب , عشان السعوديه مش مستهدفه
أمنيا لانها معاها فلوس تشتري بيها اعدائها قبل اصدقائها انما احنا مامعناش ( و صدقيني
لو حصل عمليتين ارهابيتين في السعوديه هيخلعوكي العبايه مش النقاب بس و هعذرهم ) .
.
- أو تروحي تعيشي في قريه , القرى الصغيره
الناس فيها بتبقى كلها عارفه بعض من الصوت حتى و مفيش خطوره امنيه فيها , المخابرات
البريطانيه مش هتستهدف كفر غنام ولا ميت دمسيس , أو تلبسيه في بيتك لما يجيلك ضيوف
, أما في شوارع المدينه لأ , عشان انتي بالتأكيد مش هتحسي بأي أمان لما انا و زمايلي
من الرجاله نلبس شرابات صوف على وشنا
.
موافق و مؤيد تماما و أبصم بالعشره على
قرار وقانون بمنع النقاب في شوارع المدن و إن أي ست منقبه تبقى مشتبه به و يتقبض عليها
بتهمة ( طمس الهويه ) حتى لو كانت الست دي هي اختي أو مراتي .
..................................................................................................................................
Mohamed
Hussein
5 نوفمبر 2018·
بص حضرتك
- نعم يا حبيبي
.
المسيحيين بيتقتلو عشان العقيده , الإرهابيين
بيقتلوهم عشان قريو كتب التراث و درسو في الأزهر و احمد الطيب قال لهم روحو اقتلو المسيحيين
و ادونّي رنه , و مفيش مخابرات دول اجنبيه ولا حاجه , ولا فيه مؤامره ولا مليارات بتتصرف
ولا قنوات و لا محاولة خلق فتنه , ده كله كلام بيروج له طبالين السيسي اللي زيك كده
- صح يا حبيبي , انت هايل .
.
و الإرهابيين دول هما اللي خربو سوريا و
العراق و ليبيا و اليمن و تونس و ضربو باريس و بروكسل و جزيرة القرم و تركيا و وقعو
الطياره الروسيه و طيارة مصر للطيران و قتلو ريجيني و خاشقجي , كله بسبب كتب التراث
الباليه والشيخ أحمد الطيب .
- صح يا حبيبي , انت عظيم .
.
واحنا عندنا فشل أمني و مش عارفين نحارب
الإرهابيين و نقضي عليهم لأن السيسي أصلا فاشل
- صح يا حبيبي , انت عقلك ألماظات .
.
لا لا السيسي مش فاشل , ده سلفي وهابي و
هو اللي بيبعت الناس يقتلو المسيحيين و بعدين يقتل الناس دي عشان يلبس طاقية ده ل ده
.
- صح يا حبيبي , انت عميق عمق المحيطات
و السنين و التنين
.
لالا , هو مش سلفي وهابي ده علماني و بيحارب
الإسلاميين الكيوت بس بيقتل المسيحيين في السكه .
- صح يا حبيبي , انت جميل اخر فيصل , يعني
الارهاب من كتب التراث و مفيش مؤامره , و الشرطه و الجيش فاشلين , لا مش فاشلين ده
هما اللي بيقتلو المسيحيين والسيسي وهابي بس علماني شويه , عندك اي حاجه تانيه تحب
تضيفها ؟ .
.
أيوه , عايز أوجه رساله و أقول للأستاذ
خالد أبو النجا إني بحبك أوي .
- رسالتك وصلت أكيد , و هو كمان بيحبك أوي
.
............................................................................................................
Mohamed
Hussein
5 نوفمبر 2018·
إنجلترا و جمالها و ضفايرها و غمازاتها
, ماتجيبي بوسه يا انجلترا ؟
.
صباح الخير , قصدي العواف عليهم
- في انجلترا بنت عمرها 21 سنه بتشتغل جارسونه
, فرحت بفوز انجلترا على السويد في كاس العالم قامت طلعت على عربية اسعاف و قعدت ترقص
و الشباب الإنجليزي النقي يتفرج عليها و يحتفل معاها .
.
- السلطات في انجلترا وجهت للبونيه اتهامات
جنائيه بتخريب ممتلكات عامه ( مع انه كل اللي حصل انها طبقت كبوت العربيه , أي سمكري
في السنبلاوين يظبطها ب 700 جنيه و 3 علب سجاير كليوباترا ) و حولتها للتحقيق و المحاكمه
, الكلام ده حاليا , يعني بعد 4 شهور من كاس العالم .....كده خلصت الحدوته , بس باقي
حاجتين اتنين لازم نقولهم .
.
الحاجه الأولى , لما الشباب النقي عندنا
بيحرق عربيات شرطه أو مجمع او قسم شرطه أو يفجر محول كهربا أو يرمي مولوتوف نفس ال
( انجلترا ) و اعلامها و و سلطاتها و البي بي سي بيقولو تعبير عن الرأي , و حرية تعبير
و ديموقراطيه , و شباب بيعبر عن غضبه أو عن فرحته .
.
الحاجه التانيه , الأجهزه الأمنيه في انجلترا
خدت أيام و شهور عشان تعرف تجيب البنت اللي متصوره فيديو من شخروميت موبايل و تحقق
معاها , و نفس الأجهزه دي عرفت هي و قناة الخنزيره مين اللي قتل خاشقجي و قتله ازاي
و جاب المسدس بكام و كانو كام نفر و مقاس جزمتهم ايه , عرفت من قبل حتى الجريمه ماتحصل
, و عرفو مين اللي أسقط الطياره الروسيه في سينا , من قبل ماتقع وحياتك .
.
اللي لسه منبهر بشعارات انجلترا و أمريكا
اللي بيروجوها عندنا يركن على جنب كده , و اللي لسه شايف إن الإرهاب في الشرق الأوسط
و خراب الدول و الجيوش واسقاط الطيارات سببه شوية كتب تراث باليه أو ان احمد الطيب
شيخ الأزهر ورا الحدوته دي يركن على جنب كده , عشان مرارتي و طحالي و قولوني العصبي
عايزين يعدّو .
.................................................................................................................
Mohamed
Hussein
4 نوفمبر 2018·
كنت في مشوار الصبح بعد السيده عيشه بشويتين
, و طبعا توهت وانا راجع , مانا أحسن واحد بيتوه في بر مصر المحروسه كله , لدرجة اني
بقيت أعمل حسابي على كده , المشوار الفلاني ياخد ساعه رايح و ساعه راجع و ساعتين توهان
يبقى المجموع أربعه .
.
المهم قلت أشاور لحد يوصف لي الطريق , قمت
سيبت التاكسيات و الميكروباصات و لقيت جنبي عربيه فخمه و فخيمه و إزازها متفيم , شاورت
لها , لقيت الإزاز نزل و شخصيه لها وجاهه بتبص لي , سألته عن الطريق , قعد يفكر ثواني
و بعدين وصف لي طريقين الإتنين بيوصّلو و الأخر قالي عشان ماتتلخبطش امشي ورانا احسن
, و فضل ماشي قدامي و يشاور و عينه على عربيتي لحد ماوصلت فعلا , في اخر لقطه لمحت
اللي سايق لقيته عسكري جيش و فيه اتنين عساكر حراسه راكبين ورا و لوحة العربيه ( قوات
جويه ) , تقريبا كده والله اعلم اللي وصف لي العنوان و فضل ماشي معايا يبقى قائد القوات
الجويه أو رئيس أركانها , حاجه في الرينج ده يعني .
.
بإذن الله لما هتوه في المشوار الجاي ,
مش هقبل بأي حد يوصف لي الطريق أقل من سامح شكري أو كامل الوزير
.......................................................................................................................
Mohamed
Hussein
4 نوفمبر 2018·
اللي فاهم إن الحريه و العمق و الشخصيه
و الديموقراطيه و الثقافه و الألمعيه و الفكر و الألماظيه بييجو عن طريق السخريه و
التطاول على بابا الكنيسه و شيخ الأزهر و الجيش و المؤسسات و التاريخ و الجغرافيا و
الأمن القومي و الهويه و الجينات و التركيبه المصريه و عمدان المعبد , اللي فاهم كده
تبقى معلوماته عن مفهوم الدوله و الوطن و الكيان بالظبط بالظبط زي معلومات خالد أبو
النجا عن الرجوله .
.....................................................................................................
Mohamed
Hussein
4 نوفمبر 2018·
حق الشهدا رجع , 19 كلب إرهابي بعتوهم رجالة
الداخليه المصريه للجحيم , اتأخرتو شوية يا رجاله , حق الشهدا بتوعنا المفروض ييجي
في ليله واحده مش ليلتين , عشان الناس تعرف تاخد العزا .
..............................................................................................................
Mohamed
Hussein
3 نوفمبر 2018·
بيان داعش الوهمي
.
من امبارح وانا بشوف بيان على صفحات أصدقائي
منسوب لتنظيم داعش الإرهابي , من أول لحظه عقلي رفض البيان ده , ماهو احنا ربنا هيكرمنا
اخر كرم لما نفهم و نفكر في كل كلمه , و برضه اهم سلاح لازم نستخدمه في محاربة الإرهاب
هو سلاح الفهم , لو فهمنا هنلاقي مخرج العرايس اللي بيحرك الليله بيلم تعابينه و يمشي
.
.
قولنا مفيش حاجه اسمها تنظيم داعش , دي
عبايه وهميه صنعها مخرج العرايس عشان يحط تحتها أي عمليه عايز ينفذها , الحكايه منظومة
متكامله يا بني أدمين , اجهزة مخابرات و إعلام دولي منحط و ممول و مورد اسلحه و جماعة
ارهابيه اسمها الإخوان و عنصر منفذ ...اسمها المنظومة المتكامله , اللي بيلعبو بيها
في الشرق الأوسط و أحيانا في أوروبا .
.
بيانات داعش بتطلع منين ؟ من اي حته يا
مولانا , مكتب في لندن تبع المخابرات البريطانيه , أو أوضه في قناة الخنزيره , دي شغل
كمبيوتر مش اكتر , المهم المنظومه تكون ماشيه صح , و بما إن اللي بيدير الليله دي مش
عبيط ولا برياله فالبتأكيد مش هيطلع بيان يقول فيه ثأراً للاخوات اللي اتقبض عليهم
, لا حضرتك كده تبقى جميل حماده , جميل أخر فيصل .
.
ايه الغرض من عمليه زي دي ؟ اسمه غرض مركب
, فكرة قتل سبعه تمانيه مش حدث يهز دوله , الحدث الحقيقي و الأهم هو مرحلة ما بعد الحدث
, الهري و الهبد اللي بنهبده و تبادل الإتهامات , و اللي يتهم الدوله بالتقصير و اللي
يطلع كوميكس واللي يقول الأقباط مضطهدين و بيقتلونا بالديانه و اللي يعك و اللي يعجن
, ده الحدث الأهم و ده اللي بيدور عليه مخرج العرايس , كمان اختيار التوقيت , مؤتمر
شباب و مباراه مهمه و عودة السياحه الروسيه .
.
من كام يوم عبد الفتاح السيسي كان بيزور
بوتين , الزياره دي مهمه جدا و خطيره , مخرج العرايس مايسيبهاش تعدي كده , عمل ارهابي
في شبه جزيره القرم , 19 قتيل , بس الروس مفيش فيهم خرفان ولا شمامين كوله ولا ناس
على نياتها و جميله حماده و بالتالي محدش قال استهداف للقرميين , او مقتل 19 مواطن
قرمي , ولا تقصير أمني , وبالطبع محدش هناك قال إن الأزهر الشريف فرع موسكو هو السبب
!! .
.
لو مش عارف يعني إيه تحدّي أمني ؟ لو مش
عارف الليله بتمشي ازاي و ليه ؟ لو مش عارف ازاي جيوش و دول وقعت و خربت ؟ لو عايز
تختصر المشهد و تلبّس العمه دي للتقصير الأمني و صحيح البخاري فممكن تركن على جنب شويه
, أكيد أكيد شايلينك لعوزه .
.................................................................................................................
Mohamed
Hussein
2 نوفمبر 2018·
رحم الله شهداء الوطن
.
- أي حد هيقول اقباط ماتو النهارده بلوك
, مفيش حاجه اسمها أقباط ولا مسيحيين , الجنود اللي بيموتو مش بندور على ديانتهم ,
مازعلناش عاللي اتقتلو في الجامع من سنه عشان هما مسلمين , اسمهم مصريين استشهدو ,
غير كده تبقى عندك خلل في مفهوم الوطن و المواطنه.
.
- أي حد هيقول تقصير أمني بلوك , لو فيه
تقصير هيتحاسبو , بس الإرهاب دايما بيسبق بخطوه و الحكايه بتتحسب حجم تحدي أمني مع
عدد عمليات بتتم بالفعل , يعني كام عمليه اتخطط لها و كام عمليه نجحت , بالمناسبه الفرنسيين
لما الإرهاب ضرب قلب باريس اللي فيها كاميرا كل متر و عسكري شرطه كل مترين واللي مفيش
استهداف إرهابي لها من أصله , مقالوش تقصير أمني .
.
- أي حد هيقول الأزهر و مناهج الأزهر بلوك
, قلنا مليون مره مناهج الأزهر محتاجه تعديل و تفوير , لكن مناهج الأزهر ملهاش علاقه
بالإرهاب اللي حاصل اخر 10 سنين , اتعلمو تشاورو صح يا بني أدمين , مناهج الأزهر مأسقطتش
سوريا وليبيا و اليمن و العراق , مناهج الأزهر ماهدمتش جيوش لها شنه و رنه , مناهج
الازهر مش مسئوله عن العمليات الإرهابيه في عواصم أوروبا , قلنا الإرهاب يعني مخابرات
أمريكيه و بريطانيه و صهيونيه كطرف أول , سلاح تركي و تمويل قطري كطرف تاني , جماعه
ارهابيه دوليه اسمها جماعة الإخوان كطرف تالت , عنصر بينفذ العمليه كطرف رابع و أخير
و أضعف و أتفه حلقه في السلسله .
.
شيخ الازهر مش بيرعى الإرهاب ولا بيدعمه
بالسلاح و لا بيخطط لقتل المصريين , بطلو نهيق يا حمير البلد .
.
- أي حد هينزل صور الشهدا و يستفيض بلوك
, الموت له حرمه و الأجساد لها حرمه , و الصمت و الدعاء في حضرة الموت جلال .
.
- المستهدف مش اتوبيس بينقل مصريين رايحين
يصلو , المستهدف هو حالة العته اللي بنشوفها عالفيس بعد كل حادثه , احنا أقسم بالله
لو بنشرح لحجاره كان زمانها فهمت .
.
- حق اللي استشهدو هيرجع حتى لو كان في
بلاد الواق الواق , مصر مابتسيبش حق ولادها و لا بيبات بره ليله واحده .
.
ربنا يرحم شهدائك يا بلد و يصبر أهلهم و
يصبرنا على فراقهم .
..........................................................................................................
Mohamed
Hussein
·
2 نوفمبر 2018
قولي بقى , هتعمل ايه بكره ؟
- أنا يا ستي بكره بإذن الله هروح أركب
عجل في شرم , ماتيجي تركبي عجل معانا و تتشمسي و تاخدي تان ؟! .
.
أركب عجل و أخد تان ؟! الله يجازيك يادي
الجدع , جرّيت الدماء الحاره في شراييني , كنت فين يا عبده من 50 سنه أيام ماكانت ألمانيا
شرقيه و غربيه ؟ طب إيه رأيك نتجوز و نفتح مصر على ألمانيا و أهو يبقى البحر المتوسط
بتاعنا و نكتبه بإسم العيال ؟ .
- موافق بس بشرط .
.
أشرط و أدبح براحتك يا نور عيني
- نكتب في كارت الدعوه , يتشرف قائد الإنقلاب
الجنرال عبد الفتاح السيسي بدعوتكم لحضور عقد قرانه على مستشارة ألمانيا انجيلا ميركل
و نكتب الكتاب في جامع رابعه .
.
مايبقاش قلبك اسود بقى , دول كانو كلمتين
لا راحو ولا جم عشان خاطر أوباما الله يحرقه أكتر ماهو محروق , مانت عارف أصول الشغلانه
.
.........................................................................................................
ليست هناك تعليقات:
إرسال تعليق