Mohamed
Hussein
21
نوفمبر 2018·
محلات الفسيخ بتبيع
فسيخ و رنجه في يوم شم النسيم ببتاع مليار جنيه .
محلات الحلويات
بتبيع حلاوة المولد في يومين المولد بخمسه سته مليار جنيه .
في رمضان بنشتري
شوية مكسرات وتوابل باتنين تلاته مليار جنيه .
في العيد الكبير
بنشتري أضاحي بعشره خمستاشر مليار جنيه .
في العيد الصغير
بنشتري كحك و بيتيفور ببتاع كام مليار جنيه .
..................
قعدنا نقول العيل
بييجي برزقه لحد ماجبنا عيال تصرف لها خمسين ستين مليار جنيه في السنه عالبسكوت و الرنجه
و لحمة العيد و الملبن و الشكلمه .
...............................................................................................................
Mohamed
Hussein
20
نوفمبر 2018·
اقتلو أحمد الطيب
أو اطرحوه أرضا
................
شيخ الأزهر ضد
الدوله المصريه ؟ لا خالص يافندم .
طب الازهر ضد
30 يونيو ؟ ماحصلش سيادتك , و وجود أحمد الطيب كان مهم جدا في خطاب السيسي يوميها
, هو و البابا.
.
طب كلام شيخ الأزهر
بيعني إنه مفيش نيه لتنقيح المناهج ؟ لا سيادتك , هو بس بيرد على المطالبين بإلغاء
السنه و الإكتفاء بالقرأن .
.
لا بقى الأزهر
بيتحدى إرادة السيسي و رغبته في التطوير وأصبح مؤسسه فوق الدوله ؟ بطل هبل يا مولانا
, الأزهر جزء من مؤسسات الدوله بيأتمر بأمرها مهما عظم شانه , زيه زي الجيش كده .
.
بس السيسي خايف
من شيخ الأزهر ؟ لا الراجل ده ماعملش حساب لأمريكا و بريطانيا و نص الكره الأرضيه في
30 يونيو , و بالتالي مش هيخاف من مؤسسه هي أصلا تحت إيديه ( في قبضة يده ) .
.
طب مين اللي هيتولى
موضوع التنقيح و الفلتره دي ؟ الأزهر نفسه , مفيش كيان تاني يقدر على كده , لا انا
ولا سيادتك ولا وزارة الصحه ولا المجلس القومي للمرأه .
.
يعني معترف ان
فيه مشاكل في المناهج مش مناسبه خالص للعصر و احاديث ضعيفه بتصطدم بالعقل البشري و
حاجات بيُساء فهمها و بيحصل من وراها كوارث ؟ أيوه معترف جدا و من أوائل الناس اللي
طالبت بأهمية التنقيح ده .
.
هو الأزهر مؤسسه
مهمه لمصر ؟ جدا , للغايه , عمود من أعمدة الدوله المصريه وجزء من قوتها الناعمه ,
هو و الكنيسه المصريه , و لو المؤسسه فيها خراب من جوه تنضفها , ماتهدهاش .
.
بس الدول التانيه
مفهاش ازهر ولا كيانات دينيه و عايشه زي الفل ؟ و الدول التانيه برضه مفهاش تجنيد إجباري
وبعض الدول فيها وزير الدفاع شخصيه مدنيه و ممكن تكون واحده ست و حامل , مش كل الدول
زي بعض يا مولانا , ولا كل الدول ظروفها واحده , المكان و الزمان مهمين جدا (الموقع
الجغرافي و التوقيت)
.
طب امتى الأزهر
هيبدأ في عملية التطوير دي ؟ كله بأوان, الموضوع بيدخل فيه حتى الجانب الأمني , و لازم
الأمور تمشي تدريجي ( أنا واحد من قارعة الطريق و مجرد ما قلت رأيي في النقاب جالي
ألاف الرسايل كلها تهديد و شتيمه بالأم و قذف محصنات ), يعني البلد دي سيادتك ممكن
تولع فجأه
.
يعني ايه ؟ يعني
لازم تكون فاهم الفرق بين ادارة دوله وإنك تقعد على شط ترعه تمص قصب و تصدر قرارات
واجبة النفاذ في التو و اللحظه , و برضه تبقى فاهم هو ليه السيسي بيقول و يعيد في موضوع
التطوير من غير مايجبر الأزهر على كده مع انه يقدر .
.
إزاي ؟ انت بنفسك
معترف ان مصر حاليا فيها عالأقل خمسه سته مليون داعشي و ارهابي تحت الطلب , اصبر شويه
لما العقول تنضف بالتدريج و التعليم يتطور و الدوله دي تقف على حيلها ( عشان التركه
تقيله أوي ) .
.
بس حضرتك كل الإرهابيين
دول طالعين من تحت عباية الأزهر ومتأثرين بمناهجه ؟ لا مش صحيح , بيوت الإخوان بتطلع
إرهابيين من يوم مايتولدو حتى لو كانو عايشين في امريكا و كملو تعليمهم في جامعات اوروبا
, و الوهابيه بتطلع ارهابيين مايعرفوش حاجه عن الازهر ومناهجه, و الإرهابيين في سوريا
و ليبيا و العراق و تونس و تركيا و باريس وبروكسل و أفغانستان و الصومال و نيجريا مش
متخرجين من الازهر ولا يسمعو عنه , والنبي يا مولانا تحاول تشاور صح, عشان قضيتك ماتضيعش
في المبالغات و الأفوره .
.
بس انا مش عاجبني
كلامك ده ؟ خلاص مش مشكله , احنا نهد الأزهر بمعاهده و نعمل مكانه فاسقيه , و نسرح
شيخ الازهر و الأئمه و الخطباء , و استلم حضرتك المساجد و المنابر,و سمعني سلام (لو
ماكنتش انت تولعني مين هيولعني ).
........................................................................................................
Mohamed
Hussein
19
نوفمبر 2018·
حكاوينا .....احنا
بتوع المفاجأت .
.
وانا عايش في السعوديه
جه معاد فرح اختي , أكبر واحده في البنات , المشكله اني وقتها قدمت طلب اجازه و اترفض
, كلمتهم في البيت وقلت لهم معلش مش هعرف أجي عشان الإداره رافضه تماما , و بعدها حاولت
تاني في طلب الاجازه و زنّيت لحد ما وافقو عليه , قلت بس , الكوره كده جت في ملعبي
, أعملها مفاجأه بقى , كان باقي على فرح اختي 3 أيام .
.
خدت جواز السفر
و التأشيره و حمّلت عربيتي فوق و تحت كالعاده , و سافرت بيها كالعاده برضه , طلعت من
الخبر ( على الخليج العربي ) قبل المغرب بساعه , وصلت ميناء ضبا ( عالبحر الاحمر )
تاني يوم بعد الضهر , المسافه بالظبط 2200 كيلو , اللي هو عرض السعوديه بالكامل , وصلت
ضبا و انا خلصان لاني سايق 20 ساعه متصله من غير اكل ولا نوم , دخلت شركة الحجوزات
و سألت الموظف فيه عبّاره امتى ؟ قالي فيه لانش سريع طالع بعد ساعتين , حجزت فيه و
طلعت بالعربيه عالمينا و دخلت بيها عالمركب .
.
أمي الله يرحمها
كلمتني تاني وانا راكب المركب خلاص , يا محمد مش هينفع تيجي تحضر فرح اختك ؟ دانت الكبير
و مكان أبوها , هنعمل الفرح ازاي من غيرك ؟, لا يامه مش هينفع خالص , انا حاولت و الله
بس مش نافع .
.
وصلت سفاجا و خلصت
اجراءات المينا , كنا بقينا تالت يوم الفجر و انا كده ليه 48 ساعه مانمتش , حتى العبّاره
ماعرفتش انام فيها لانها لانش سريع مفهوش سراير, المهم لما خرجت من سفاجا كنت خلاص
بقى بشوف الناس أشباح قدامي , ياض اركن شويه و نام لك كام ساعه , يا عم انام ايه بس
, دانا بيني وبين القاهره 5 ساعات يعني فركة كعب !! , و سوقت فعلا , طب تيجي عالقاهره
؟ لا عالمنصوره , كمل بقى , هتزيد ساعتين تلاته كمان ؟ مايجراش حاجه .
.
وصلت البلد و اختي
( العروسه ) كانت بره بتشتري حاجات لزوم فرحها , جت وانا واقف قدام البيت و لمحتني
من اول الشارع , جت تجري زي المخابيل و كانت هتتكعبل , و حضنتني في الشارع وقعدت تبوس
فيا وتقول ( انا كده فرحي تم و فرحتي كملت ), أهي اللحظه دي بالنسبالي تستاهل تعب و
سفر شهور و سنين مش يومين تلاته .
...............
الحدوته و ما فيها
يا جدعان هي الأم , اسمها الأم , صاحبة الزرعه , أمك ممكن تعلمك و تربيك عشان تبقى
عالم ذره , و ممكن تعلمك و تربيك عشان تبقى أغنى راجل في العالم , بس الأم اللي ماتعلمش
ولادها انهم يحبو بعض و يتعبو شويه عشان بعض تبقى باختصار شديد ماعرفتش تعلّم ولا تربي
, ربنا يرحمك يا غاليه
.......................................................................................................................
Mohamed
Hussein
19
نوفمبر 2018·
صباح الخير يا
مينز
.
النهارده اليوم
العالمي للرجاله , اللي هو احنا يعني , اه وعهد الله عملو لنا يوم عشان مانزعلش ولا
ناخد على خاطرنا , فاحنا بقى نركز كده و نسمع الكلام , كل راجل مننا يقوم يحضن أخاه
الرجل التاني حضن مطارات و يقوله معلش , تقابل أي راجل في الشارع تحضنه و تقوله معلش
, أكثرو من المعلش يرحمكم الله .
.
و النهارده برضه
و بالصدفه البحته عيد ميلاد عبد الفتاح السيسي , الراجل ده اللي بيحكم 100 مليون هراي
و فتّاي و هبّاد و زرّاط , اللي لو طلب رأي الشعب في قضيه معينه هيطلع ب 200 مليون
رأي مختلف على الأقل , عبد الفتاح السيسي بالذات أكتر واحد يستاهل المعلشه , كل سنه
و انت طيب يا ريس , عقبال 100 سنه جايين في صحه و سعاده , ربنا يعينك بينا و علينا
, و كل سنه هقولك معلش .
.............................................................................................................
Mohamed
Hussein
18
نوفمبر 2018·
علامات الإفلاس
الفكري .
.
- تبقى أفلست تماما
و بتحاول بس تقلب عيشك أو تنقذ ما يمكن إنقاذه من معركتك الفكريه البلهاء تقوم تستخدم
مصطلحات عميقه و مقعره , بحر الظلمات و إعادة تدوير الإفك ولا مندوحه و تخرصات , و
الهجايص البرادعاويه دي , اللي بتحاول تخرج بيها من مأزق إنك بقيت صفر و كم مهمل ,
مع إنك في الحقيقه بتتحول بهجايصك المقعره لشخص مثير للغثيان و الشفقه , ليس إلا ,
يعني not more .
.
- تبقى أفلست تماما
و عايش في دور إنك البني ادم العاقل الوحيد في كوكب الأرض و المجموعه الشمسيه , و بقية
البشر قطيع من المجانين و الخرفان , تقوم تحاول تثبت ألمعيتك و عظمتك كشخص متفرد و
فريد و مفرود بإنك تجيب أي افتكاسه أو ألشه على لوجو مضروب لأي جريده و تنشرها للتأكيد
على عظمة و ألمعية فكرتك و منهجك الفكري , اه و رحمة خالك فكري
.
- يعني مثلا لو
بتكره الدين وشايل الأزهر على دماغك و زاعق , تجيب صوره لألشه بتقول ( دار الإفتاء
المصريه تحسم الجدل في حكم الدين في مضاجعة البرغوت الدكر لأنثى ذبابة الدروسوفيلا
) , ( الأزهر الشريف يوضح رأي الدين في حلاقة محمد صلاح لشعر صدره ) , دار الإفتاء
تشدد على ضرورة لبس فردة الشراب اليمين قبل الشمال ) , أي هجايص يعني و تعمل عليها
حفله انت و أصدقائك العاقلين اللي سابقين كوكب الأرض بمليون فدان .
.
- أو تكون العكس
تماما , متخيل نفسك متدين و معاك كشف بأسماء المبشرين بالجنه شايله في جيب البنطلون
الوراني و أصلا شايف ان محدش هيدخل الجنه دي غيرك انت و عوض ابن خالتك , و ربنا سبحانه
و تعالى عامل لك توكيل عشان تدافع عن دينه و تحارب طواحين الهوا , و ده طبعا لأنك قاري
و مضطلع فشر الباز أفندي , تقوم تنشر برضه أي افتكاسه مماثله , حاجه من نوعيه ( شاهد
كيف بكى الجمهور الألماني عندما سمع الطفل الفلاني يقرأ القرأن ) , ( شاهد كيف أفحم
الشيخ الفلاني القسيس العلاني و طرحه أرضا بكلمه واحده ) , ( علماء أمريكا و اليابان
و فرنسا و كوريا و روسيا و بركة السبع يعلنون إسلامهم و ينطقون الشهاده بعدما رأو لفظ
الجلاله مكتوب على بيضه في قرية كوم أبو لباس ) .
.
- عزيزي و صديقي
و حبيبي و نور عيني المواطن المصري , لو عندك أي حاجه من الحاجات اللي مكتوبه فوق دي
فاعلم أنك مجرد شخص هجّاص مفلس فكريا قاعد في قعر برطمان كوله , كوله بإسم الدين أو
كوله بإسم الحريه أو كوله بإسم الثوره , و كلها برطمانات يا مولانا , أه و عهد الله
.
...................................................................................................................
Mohamed
Hussein
18
نوفمبر 2018·
بجد بتحبني يا
احمد ؟
- بحبك يا سالي
.
طب احلف
- والله بحبك
.
.
لا احلف إنك ماعرفتش
ولا حبّيت بنات قبلي ولا كان لك علاقات نسائيه و مغامرات مشبوهه , و احلف كمان اننا
لما نتجوز لو بقى معاك فلوس كتير أوي هتجيب لي عربيه بيكانتو زيرو.
- و الله العظيم
و رحمة أبويا لما نتجوز لو بقى معايا فلوس كتير هجيب لك عربية بيكانتو زيرو لونها أحمر
, اللون اللي بتحبيه , و أملهالك دباديب من اللي انتي بتحبيها , أديني حلفت اهو يا
ستي عشان ترتاحي
.
ميرسي يا حياتي
.
................................................................................................................
Mohamed
Hussein
17
نوفمير 2018·
النهارده ألاف
الفرنسيين اتظاهرو عشان زيادة الضرايب على الوقود في بلد النور و الحريه و الجمال و
ساندوتشات الحلاوه بالقشطه .
الشرطه الفرنسيه
تعاملت مع المظاهرات بكل الحب , كولّ الحوب , و المحصله 3 حالات دهس بالسياره و اعتقال
العشرات للتحقيق و حالة وفاه و 47 إصابه أغلبهم في حاله حرجه , بكل الحب .
...........................................................................................................
Mohamed
Hussein
17
نوفمير 2018·
شعور رؤوف خليف
امبارح لما صلاح استلم الكوره في الدقيقه 89 وهو بيقول يا لطيف يا لطيف إلطف يا لطيف
, هو نفس شعور مرسي بالظبط لما الرجاله دخلو عليه في 3 يوليو و قالو له تعالى يابني
عشان الشعب عايزك في كلمتين على جنب .
..................................................................................................................
Mohamed
Hussein
17
نوفمير 2018·
تويتة البرادعي
و أحدث إصداراته
.
عندما ترتعد الفرائص
.
- دي فرائصنا احنا
يا جدعان , بترتعد و وركبنا بتخبط عالجيران بسبب تويتات البرادعي و السيسي عامل اجتماع
مشترك و متواصل للمجلس الأعلى للقوات المسلحه و مجلس الأمن القومي و قصر الكرملين و
مجموعة الكومنولث و بيدرسو التويتات دراسه عميقه و متأنيه .
.
و تهب أكلة الجيفه
للعواء .
- والنبي تبطلو
عواء يا خوانا , البرادعي مش عارف ينام في النمسا لأن صوتنا مسمع هناك , و اللي عنده
حتة جيفه يجيبها عشان لسه ماغيرتش ريقي .
.
معارضه سلميه منظمه
- عارفها عارفها
, الفصيل الوطني و رفقاء الميدان , الإخوان و داعش و ولاية سينا و أبو لهب و هتلر و
دراكولا و ريا و سكينة
.
فاعلم اننا مازلنا
نسبح في بحر الظلمات .
- مش مشكله أبدا
انك تسبح في بحر الظلمات , المهم يكون معاك عوّامه على شكل بطّه .
.
و نؤمن أن العبوديه
حريه
- ماهو برضه احنا
اللي غلطانين و بنستفز الأخرون , مش معقول كل مامشي في الشارع ألاقي خمسه سته حاطين
تمثال للسيسي و بيعبدوه و يسجدو له , مايصحش كده , طب انتو دارسين الكلام ده قبل ماتعملوه
؟
.
......................
ايه بقى محصله
التويته دي ؟ ولا حاجه يا مولانا , هرتلَ يهرتلُ مهرتلا , زروط يزروط مزروطا , نفس
البؤين الحمضانين و الشعارين اللي بيتشقلب فيهم البرادعي مع إزازة بيره من 5 سنين
, و بعدين يتعشى و يغسل رجليه و ينام , ويصحى الصبح يلاقي ربنا بعت له قرشين حلوين
, ماهي الحركه بركه برضه .
........................................................................................................................
Mohamed
Hussein
16
نوفمبر 2018·
معركة الوعي
...لفظ الجلاله على شجرة السلام
.
من كام سنه حصل
المشهد ده , شجره في مدخل مدينة السلام منحوت عليها لفظ الجلاله ( الله ) و جنبها كلمة
( محمد ) , انا شوفت المشهد بعيني و شوفت ألاف البشر ملمومين و قافلين الطريق السريع
, و زي شجرة السلام فيه بيضة الفرخه اللي مكتوب عليها لفظ الجلاله برضه , و زيهم حاجات
تانيه كتير .
.
عزيزي المؤمن المتدين
أخر فيصل
- لو جبت مسمار
و روحت عند أي شجره وكتبت اي كلمه بالمسمار, أحمد بيحب منى مثلا , و سيبت الشجره دي
كام سنه و رجعت لها هتلاقي الجمله اللي كتبتها بقت جزء من نسيج الشجره واللحاء كبر
و غطاها و بقت كأنها محفوره و معجزه إلهيه ( احمد بيحب منى ) , اتشحتف بقى وقول سبحان
الله , و بالمناسبه فيه مواد معينه لو غليت فيها بيضه و كتبت عليها اي كلمه من بره
هتنطبع على البيضه من جوه .
.
عزيزي المؤمن المتدين
- عظمة ربنا سبحانه
و تعالى في الخلق و الخليقه هتشوفها في كل حاجه حواليك و هتقول سبحان الله مليون مره
في الساعه , هتشوفها لما تفكر في الكواكب و المجرات و حركتهم , لما تفكر في استجابة
اعضائك لأوامر عقلك , هتشوفها في نفس الهوا اللي بيدخل صدرك بشكل وتركيبه و يطلع بشكل
و تركيبه تانيه , هتشوفها في نقطة المني اللي بتقابل بويضه و تلقحها وتكبر ويطلع لها
اعضاء وايدين و رجلين و يبقى اسمها جنين و طفل , هتشوفها في مرج البحرين يلتقيان ,
هتشوفها هتشوفها هتشوفها.
.
أما انك تعتقد
إن رب الكون مستني يرمي لك علامة كده و معجزه على عظمته بإنه يكتب اسمه على بيضة فرخه
أو على شجره تبقى مش متدين ولا نيله , انت مجرد أحمق من ألاف و ملايين الحمقي .
.
طب ايه المشكله
؟ ماهي الغباوه حد جميل و حرية شخصيه يا أخي ؟ ماتسيب الناس تمارس حماقتها بأريحيه
كده ؟ لا يا مولانا , جهلك و حماقتك يبقو حرية شخصيه لما تمارسهم في حياتك الخاصه
, يعني مثلا ربنا رزقك ببنتين بدل ماتسميهم سما و أسيل سميتهم جعيضي و بسطاوي , بتسيب
السرير و الأرض و تحب تنام عالبوتاجاز و هو والع , نام براحتك , ياكشي تتحرق بجاز
.
.
أما جهلك و حماقتك
في الحاجات اللي مشترك فيها مع غيرك زي الدين و الوطن و مفاهيم الحريه و الثوره و خلافه
, ف دي مش حرية شخصيه .
ليه بقى ؟ لأنه
بشوية حمقى و قطعان زي معاليك كده خربت أوطان و اتحولت لأثر بعد عين و اتقتل و اتشرد
ملايين , الخراب مافرقشي هنا بين أحمق و بين بني ادم طبيعي , تبقى حماقتك من البدايه
مكانتش حرية شخصيه .
.
طب ايه علاقة حماقتك
و البيضه والشجره بخراب الأوطان ؟ بص يا حماده , هي حلقات سلسله , تنبهر بإسم منحوت
على شجره أو على بيضه ؟ تتشحتف بقصص و أفلام و خزعبلات ؟ تشوف المسيحيين في مصر كفار
ولازم نقتلهم في وقت فراغنا ( بس بره مصر لا ) ؟ تغني اغاني لتحرير القدس و لما تيجي
تجاهد تجاهد ضد مسلمين و مسيحيين من بلدك مش ضد الصهاينه ولا حاجه ؟ ويوصل بيك مستوى
الحماقه انك تصدق إنه فيه تحالف لمواجهة الشيعه العلويين في سوريا , تحالف سني بتقوده
أمريكا و بريطانيا على اعتبار طبعا إن أمريكا و بريطانيا من أهل السنه و الجماعه و
إن أوباما من نسل سيدنا النبي .
.
كده تخلص الحدوته
بترتيب خطوات منطقيه زي مابيحطها مخرج العرايس بالظبط , جهلك ده نعمه بالنسبالهم ,
سلاح بيستخدموه لقتلنا و حرق بلادنا , و الخراب لما بييجي مابيفرقش , عشان كده قلت
لك ان جهلك و حماقتك مش حرية شخصيه .
......................................................................................................
ليست هناك تعليقات:
إرسال تعليق