Mohamed
Hussein
12
يوليو 2018·
معركة الوعي
.
- محمد حسان فضل
سنين يعمل شرايط كاسيت و يعيط و يتشحتف على وفاة سيدنا النبي , و يكلم الناس في التقوى
و الزهد و انهم يتصدقو من مالهم ( اللي هو فتات ) لحد ما ربنا أكرمه و بقى عنده عشرات
الملايين و فيلات وأسطول عربيات .
.
- عمرو خالد برضه
تقوى و زهد و كلام زي الفل و الأخر يطلع بتاع فراخ , فراخ لما تاكلها هترتقي بروحك
و تخليك تصلي التراويح و انت روحك مرتقيه و بتكاكي ( سبوبه حلوه يعمل منها قرشين )
.
.
- الإخوان جمعو
مئات الملايين من الشعب في القرى و النجوع و المناطق الشعبيه , جمعو زكاة الناس و صدقاتها
, و في النهايه نكتشف إن أغلب الفلوس دي بيصرفو منها على تنظيم إرهابي دولي و يشترو
سلاح و يخزنوه , يعني الظابط اللي استشهد معاليك و هو بيدافع عن أرضك و عرضك مش بعيد
تكون الطلقه اللي اتسببت في موته كانت من فلوس الصدقه بتاعتك.
.
- وجدي غنيم عاش
سنين طويله يكفّر في مخاليق ربنا , كفر خلق الله كلهم في كوكب الأرض و المجموعه الشمسيه
, باستثناء التنظيم الإرهابي و أمريكا و بريطانيا .
.
- يوسف القرضاوي
بيستنجد بالجيش الأمريكي و البريطاني لضرب سوريا و ليبيا و لو فيه إمكانيه لضرب مصر
يبقى خير و بركه .
.
- معز مسعود عمل
قرشين حلوين من الدعوه و التجاره مع الله ( قصدي التجاره بدين الله ) و قطعة الحلوى
بقى و الذباب و الكلام الجميل ده , و في الأخر نكتشف ان قطعة الحلوى المكشوفه طعمها
ألذ .
.
من سنين طويله
نابليون بونابرت أدرك إن نقطة ضعفنا هي الدين فقال للمساعدين يعلنو في أرجاء مصر إنه
اعتنق الإسلام , ناس كتير من المصريين فرحو و هللو و سموه على بونابرت !! .
.
أصدقائي الغاليين
- معركتنا في الأساس
معركة وعي , يوم ماننتصر في المعركة دي هنبقى عدّينا و محدش في الكون هيبقى زينا .
.
- فرق شاسع , فرق
السما من الأرض , مابين التدين ( و السذاجه ) , معركتنا اننا مانكونشي شعب ساذج لا
بداعي التدين ولا بأي داعي تاني .
.
- الطمّاع و النصاب
يلزمه جاهل و ساذج , و إلا مكانشي معز مسعود و عمرو خالد و حسان و غنيم و القرضاوي
و نابليون بونابرت لقو أكل عيش عندنا .
.
دين ربنا يا بني
أدمين مش كيميا ولا لوغاريتمات , ولا محتاج اخوان و سلفيين و وهابيين , ولا محتاج جماعات
و تنظيمات و بهاليل .
.
- دين ربنا اسمه
المعامله , عامل الناس بما يرضي الله , ماتسرقش , ماتكدبش , ماتقتلش ( و لا تحرض عالقتل
) , ماتزيفش , ماتزنيش , ماتشهدش زور , ماتغتابش , صلي فروضك الخمسه و صوم رمضان و
حج لو تقدر , وبر والديك , و طلع زكاتك و صدقتك في إيد الفقير المحتاج , من غير وسيط
, من غير جمعيه ولا جماعه ولا شوية نصابين و زلنطحيه , عشان انت مش عارف زكاتك هتروح
فين , و الفقرا والله مش في كوكب تاني , هتلاقيهم جنبك و حواليك في كل مكان .
.
- لو عندك استفسار
في الدين أو معضله , مسألة مواريث أو حاجه عايز تتحرى فيها الحلال و مش عارف , اسأل
دار الإفتاء و مشيخة الأزهر , هتلاقيهم بيردو عليك , كيانات مسئوله عن فتواها , علماء
دين مش صبي فرارجي ربى دقنه وبقى اسمه شيخ .
.
- و أخيرا و أهم
حاجه , ماتقعدشي قدام أي شيخ في الدنيا و انت لاغي عقلك , لو لقيته بيهبل و يعجن هاته
من ياقة الجلابيه و امسح بيه بلاط الجامع , على مسئوليتي , و تأكد إن لحوم العلماء
مش مسمومه ولا حاجه , خصوصا لو كانو خرفان أو تجار دين .
..................................................................................................................
Mohamed
Hussein
12
يوليو 2018·
كُبّه تاخد الإنجليز
.
امبارح كان يوم
مش عادي , و الحكايه مش ماتش في كاس العالم .
.
هو ايه اللي حصل
بالظبط ؟ اللي حصل إن المصريين كلهم بلا استثناء كانو بيشجعو كرواتيا , مش محبةً في
الكروات قد ما هي كراهيةً في الإنجليز .
.
والحكايه دي ماحصلتش
مع أي منتخب تاني في المونديال , كنا دايما بنتقسم , شويه يشجعو كذا و شوية العكس
.
.
طيب ايه دلالة
الموضوع ده ؟ و إيه اللي مفرحني أوي كده ؟ بص يا مولانا
- الإنجليز تاريخهم
معانا استعماري بلطجي سفاح , و مع أغلب دول العالم , بس التاريخ ده بعيد شويه و ممكن
يكون فيه ناس نسيت أو تناست .
.
- فيه حاجه أقرب
من التاريخ البعيد ده , هي الماضي القريب , أخر 8 سنين في المنطقه , أي بني أدم مصري
أو عربي عاقل عارف و متأكد إن الخراب ده كله وراه منظومه بريطانية صهيونية أمريكيه
, بنفس الترتيب .
.
- يعني ايه الكلام
ده ؟ يعني الحكومات البريطانيه مش بس نهبت ثروات الماضي و قتلت أجدادنا , لا دي مكمّله
حتى لو بشكل مستتر , و إيديها مابتنشفشي أبدا من الدم ولا بيشبعو من السلب و النهب
و الخراب ( حتى لو اختلفت الطريقه برضه ) , و انا هنا بتكلم عن الحكومات و الأنظمه
الحاكمه و الكيان مش بتكلم عن الشعوب .
.
- من كام سنه حاولت
انجلترا تلعب نفس لعبتها المنحطه , انها تمارس الحرق و الخراب و التزييف و القتل و
في نفس الوقت تسلّط سفرائها في دول المنطقه انهم يلعبو الدور التاني , الدور الكيوت
الجميل الحنين اللي قلبه قلب خسايه .
.
لو تفتكرو حضراتكو
السفير البريطاني في القاهره , كان كل يومين تلاته يعمل شوية همبكه من بتوعه , يتصور
و هو بياكل كشري على عربيه في الشارع , يغنّي عالربابه لمحمد صلاح , يشجع مصر في امم
أفريقيا , يردد أغنية أه لو لعبت يا زهر , المهم يحاول بكل الطرق التودد و التقرب و
التملّق من الشعب المصري , معتمد على قاعدة اننا شعب عاطفي و الحاجات دي بتاثر فينا
.
.
وقتها كنت بدعي
ربنا إنه مايكونشي عندنا شريحة من المصريين لسه بتاكل من الاونطه دي و تنخدع في تصرفات
سفير أكبر دوله بلطجية في تاريخ البشريه , إمبارح بس اتأكدت إننا بخير , بخير اوي
.
................................................................................................................
Mohamed
Hussein
11
يوليو 2018·
رائعة أنتي كروعة
الواد راديتش و الواد فيرزيتش و الواد مودريتش والواد فانكوفيتش والواد حنكوليتش ,
بصي ؟ ماتشغليش بالك بأسماء الأدويه دي , المهم انك رائعه و خلاص .
........................................................................................................
Mohamed
Hussein
11
يوليو 2018·
نقول تاني ...
بهدوء
.
- لما أفرد قدام
حضرتك خريطة العالم على مكتب و أقولك شاور لي كده فين باريس ؟ ماينفعش تشاور بإيدك
كلها من بعيد و تقول أهي , لان إيدك في الحاله دي هتبقى بتشاور على قارة أوروبا بحالها
و حتة من أسيا و نص البحر المتوسط , المفروض تقرب جدا من الخريطه و تشاور بصباعك على
مكان باريس بالظبط
.
- الحكايه دي اسمها
تحديد المشكله من غير ما نحط جنبها هطل و سخافات و افتراءات عالناس .
.
- وزيرة الصحة
خدت قرار معنوي بيقول السلام الجمهوري في المستشفيات , شاورنا بصباعنا عالقرار ده تحديدا
إنه قرار خاطئ , و مفهوش أي حس سياسي , ليه خاطئ ؟ ببساطة شديده عشان المستشفى و المريض
و المرض و الألم لهم حرمة و لهم قدسيه , و في نفس الوقت السلام الجمهوري يلزمه هدوء
و إلتزام و له قدسيه هو كمان , يبقى الإتنين ماينفعوش خالص مع بعض .
.
- طب ليه قرار
زي ده من الوزيره ؟ هي حاولت تجتهد و بحسن نيه لكن اجتهادها غلط و مش كل حسن نيه بيجيب
نتيجة صح , هبسطهالكو , أنا لو عايز أعزز الإنتماء عند بناتي ماينفعش أقول لهم يا بنات
هنقف طابور كل يوم الصبح أول ماتصحو من النوم و نردد السلام الجمهوري لبلدنا الحبيبه
, ده اسمه هطل و هبل , و هيتحول لسخريه , و البنات هيزهقو بعد يوم او اتنين أو عشره
, أومال أعزز الإنتماء لبناتي ازاي ؟ أخدهم زياره لأماكن مصر التاريخيه , أقرالهم في
تاريخ مصر , أحكي لهم عن كليوباترا و مينا و رمسيس و شجرة الدر و أم كلثوم و طه حسين
, أوقفهم عند شجره ضخمه معمره و أقول لهم الشجره دي يا بنات عمرها أكبر من عمر نص دول
العالم , أحكي لهم عن بطولاتنا و انتصاراتنا و أمجادنا .
.
- طب نجلد الوزيره
بقى و نفتري و نعجن ؟ و نقول تلاقيها كانت بتتاجر في الأعضاء و بتسرق الكانيولات و
تبيعها في إشارات المرور ؟ ده يبقى إسمه انحطاط و سفاله , طب نقول إن كل قراراتها غلط
؟ لا حضرتك مش بتشم على ضهر ايدك , فيه قرار واحد شاورنا عليه بصباعنا للتحديد .
.
- أما بالنسبه
للخرفان و الشمامين اللي بيستنو أي فرصه عشان يعيشو في إحساس الدونيه و يسخرو من إسم
بلدهم و نشيدها و علمها و سلامها الجمهوري , فعايز أقول لهم , المستنقعات و البرك لها
كائنات حيه بتعيش فيها و تتأقلم معاها , الكائنات دي لو فكرنا ننقلها لمايه نضيفه و
هواء نضيف هتموت , و يمكن يكون ده السبب اللي مخليكو من 8 سنين لحد دلوأتي مش عايزين
تسيبو المستنقع .
..............................................................................................................
Mohamed
Hussein
10
يوليو 2018·
تضامنا مع قرار
معالي وزيرة الصحة , بقترح كمان إن البالطو اللي بيلبسه الدكتور يكون عليه علم مصر
, و بالطو الممرضه عليه 3 أهرامات , أما العيانين فواجب عليهم إنهم يكسرو حته من مناخيرهم
عشان يبقو زي أبو الهول !! , و ده كله طبعا لتعزيز الإنتماء .
.
معالي الدكتوره
هالة زايد وزيرة الصحة , أبوس إيد اللي خلفوكي بلاش تجتهدي , ماتفكريش بره الصندوق
, ولا جوه الصندوق حتى , أقولك حاجه ؟ ياريت ماتفكريش خالص , و الله تبقى خدمتينا و
خدمتي البلد دي خدمة العمر .
..............................................................................................................
Mohamed
Hussein
10
يوليو 2018·
دي صورة إيزابيلا
شانكوتي , رئيسة وزراء جمهورية داندورما اللاتينيه .
.
الست دي اول ما
وصلت لمنصب رئيس الوزراء ( المنصب الحاكم في جمهورية داندورما ) , لقت إن الشعب الدندورمي
بيكح تراب , و المواطن مش لاقي حتى تمن باكو المعسل اللي بيشربه .
.
عملت إيه بقى ؟
على الفور قررت إنها تبيع كل العربيات و الطيارات بتاعة رئاسة الوزرا , و كان عندها
غويشة تعبان و 6 قراريط أرض وارثاهم عن أمها في البلد , باعتهم , حتى الكاسات اللي
في النيش باعتها , و بدأت تضخ كل الفلوس الجباره دي في خزينة دولة داندورما .
.
المهم , في ظرف
6 شهور و يومين بالظبط كان حال جمهورية داندورما اتقلب رأسا على عقب , بقت الدوله بتحتل
المرتبه الأولى على العالم في التعليم و الصحه و الدفاع و الهجوم و تصنيف الفيفا للمنتخبات
, و ( الفيسه ) اللي هي عملة داندورما بقت تساوي 175 مليون دولار أمريكي , أما المواطن
الدندورمي ف حالة اتشألب 180 درجه , بعد ما كان بيكح تراب بقى بيكح بترول و سبايك دهب
عيار 75 .
.
في يوم من الأيام
مواطن دندورمي كانت مراته طفشانه من البيت و قاعده عند اهلها , وسايبه معاه طفل رضيع
عمره 3 شهور بس , اسمه شحيبر, شحيبر بدأ يعيط بالليل و الأب مش عارف يعمل إيه أو يتصل
بمين ؟ و مايعرفش طبعاً إن شحيبر جعان , فالراجل أخر ما زهق اتصل برئيسة الوزراء ,
إيزابيلا شانكوتي , كانت المفاجأه انها ردت عليه بنفسها , مش بس كده , دي خدت منه العنوان
و كتبته في ورقة نتيجة و لبست عبايتها السودا بسرعه و ركبت توكتوك ( ماهي باعت عربيات
رئاسة الوزرا ) و راحت له فورا و رضعته بنفسها , يابني أقصد رضعت الواد الصغير شحيبر
, الله يحرقك بجاز .
.................................................................................................
Mohamed
Hussein
9
يوليو 2018·
أفكار خارج الصندوق
.
احنا نجيب رجالة
الرقابه الإداريه و نقول لهم اشتغلو على ملف الفساد , و كل يوم و التاني يمسكو فاسد
من الحيتان , يقوم العيال الهبدجيه بتوع الفيس مايعجبهمش الكلام ده و يقولو أكيد اللي
بيتقبض عليهم دول مناضلين و شرفاء و يمكن الحكومه عايزه تداري على خروج مصر من مونديال
روسيا .
.
نقوم نقول لرجالة
الرقابه الإداريه استريحو في مكاتبكو و سيبو الفساد زي ماهو , ماهو بقاله 30 سنه شغال
زي الفل , خلوهم يسترزقو , يقومو العيال الهبدجيه يتضايقو و يقولو هي الدوله مش بتحارب
الفساد ليه ؟ ولا هي خايفه تحارب الفساد ؟ أه شكلها خايفه تحارب الفساد .
.
نقوم نجيب العيال
الهبدجيه و نحاول نشرح لهم من أول ألف باء و زرع و حصد , و نقول لهم ان دولة الفساد
مش هتتهد بضربة شاكوش واحده ولا عشره و إن الدوله حاليا شغاله على ملف تحويل المصالح
الحكوميه لبرامج كمبيوتر يعني بتقضى على البيروقراطيه اللي هي أوسع باب للفساد , يقومو
مايقتنعوش .
.
نقوم مسلمينهم
مفتاح قصر الرئاسه و نقول لهم احكمو مصر براحتكو بقى .
.
يقوم متجمع في
ساحة قصر الرئاسه بتاع 50 ألف هبدجي فيسبوكي جميل (و الجزيره تقول 23 مليون ) , و يبدأو
يختارو منهم ناس لتنظيم الصفوف و حفظ الأمن في ساحة القصر, شوية من الهبدجيه يدفعو
رشاوي لبتوع حفظ الأمن عشان يقرّبوهم من باب القصر ومن المنصه و شوية تانيين يسرقو
موبايلات الباقي .
.
و بعدين يقعدو
و يقولو عايزين يا جماعة الخير نحل مشكلة الفساد والسرقه والرشاوي , كل واحد قدامه
ورقه و قلم , و يجمعو الأوراق , يكتشفو إن ال 50 ألف قايلين 200 ألف رأي مختلف , يبدأو
يتخانقو , ويقطعو هدوم بعض و يشرحو بعض بالموس ,و تقوم بينهم عاركه لرب السما, و نيجي
الصبح نلاقيهم كلهم بقو جثث هامده , الجزيره وال bbc
و هيومان رايتس واتش يقولو إن السيسي ضرب ال 173 مليون مناضل بالطيران
و المدافع و المنجانيق و يجيبو واحد من الشهداء على الهوا مباشرة يحلف بالكلام ده
, نقوم احنا مبتسمين كداهو 😆😆
.
و نقوم عاملين
مقبره كبيره فخمه في ظرف اسبوعين ( لا اسبوعين كتير هما يوم و نص يا كامل ) , و نجمع
فيها كل ( شهداء ) الهبد , و نكتب عليها من بره ( مقبرة الهبدجيه , كانو يحبون الهبد
مثلما لم يحبه أحد غيرهم ) , و نرزع قصدي نزرع جنب المقبره 7 شجرات صبار و 11 لايك
و 9 شير بعنف .
.
و بعدها نحكم مصر
بهدوء و ضمير , من غير صداع ولا وجع دماغ .
.............................................................................................................
Mohamed
Hussein
9
يوليو 2018·
شوفت يا حبيبي
اللي حصل ؟
- خير حصل ايه
؟
.
قبضو على وزير
فاسد في فرنسا و مسئول فاسد في أمريكا و وزير فاسد في ألمانيا و مسئول فاسد في اليابان
و بيحققو معاهم
- اه طبعا ,ماهي
دي دول متقدمه و محترمه ,مفيش حد فوق القانون , دولة العداله .
.....................
شوفت يا حبيبي
اللي حصل ؟
- خير حصل ايه
؟ .
.
قبضو على مسئول
فاسد في مصر و بيحققو معاه .
- هاهاها , و مين
اللي عينه بقى ؟ و مين اللي اختاره ؟ و معملوش تحريات عنه ليه ؟ و مجابوش ليه الشيخه
خديجه المغربيه أو حد يكون بيقرا الفنجان و يقول لنا الموظف ده هيفسد بعد شهر ولا لا
؟ تلاقيهم قبضو عليه عشان يلهو الشعب عن حاجه معينه , أو تلاقيه مادفعشي المعلوم للكبار
و اختلفو .
.
يعني مصر ماتبقاش
كده دوله محترمه و محدش فيها فوق القانون زي أوروبا ؟
- لا طبعا .
.
طب مين اللي عين
المسئول الفاسد في امريكا و فرنسا و ألمانيا و اليابان ؟
- إيه !! .
.
ممممممممم انت
ليه كده يا حبيبي ؟ مستحمل نفسك إزاي ؟ قولي ماتخبيش عليا
- أصل انا حضرتك
عندي نظرة دونيه بحب أعيش فيها و أحب أحس دايما إننا فاشلين وإني شخص حقير .
.
والله معاك حق
في أخر كلمه .
................................................................................................
Mohamed
Hussein
8
يوليو 2018·
كلمتين عايز أقولهم
لأصدقائي الغاليين أحفاد عوضين باشا أبو لباس , قصدي أحفاد جلفدان هانم و شركس باشا
, الصداقه عالفيس بوك مش جواز كاثوليكي , أه و عهد الله , يعني ممكن تلغوها عادي ,
أنا أصلي راجل فلاح إبن فلاح و لولا عبد الناصر ( ربنا يسامحه ) كان زماني حاليا بشتغل
كلّاف قد الدنيا في وسية حد من البشوات و الصيع بتوع جلالته .
.
فلو عندكو حنين
لأيام الملك و كاريتة الملك و طربوش الملك و جزمة الملك , أيام الإستعمار و الإستحمار
الجميل , أيام ما كانت الخدامه فرنسيه و بتاعة البليله من سويسرا , ممكن تلغو الصداقه
, و تحنّو براحتكو بقى , مش عارف أحن معاكو , كان نفسي و الله أحن معاكو بس مش عارف
, حقكو عليا , و بعدين هتقولو إيه لطنط جلنار و أونكل سلحدار ؟ تقولو لهم بنصاحب فلاحين
و أوباش ؟ و النبي ما يصح أبدا .
.
إلغوها و انتو
الكسبانين , وبعد ما تلغي الصداقه يا عزيزي الشركسي الجديد ( ال نيو شركسي ) ممكن تطلب
من جدك يوريك صورة أبوه الله يرحمه , وقتها بس هتتأكد إن الموضه كانت بتنزل في السنبلاوين
قبل ماتنزل في باريس .
.........................................................................................................
Mohamed
Hussein
7
يوليو 2018·
و انا طفل صغير
اشتغلت تقريبا كل الشغلانات اللي ربنا خلقها , بدأت من سن 6 سنين لحد ما دخلت الجامعه
, اشتغلت راعي غنم و فلاح و عامل بالأجره في أراضي الناس , بنقي دوده و بجمع قطن و
برحّل رز و بقطّع حطب و لما كبرت شويه اشتغلت عامل مباني , أشيل طوب أحمر و أطلعه أدوار
عليا , أشتغل على خلاطه بتاعة صبة السقف , و اشتغلت كمان مع تاجر تبن لمدة 3 سنين
, أعبي التبن في أكياس كبيره و اشيلها احملها على عربيه و بعدين أنزلها على ضهري و
اطلع بيها على سلم ممكن يكون سلم خشب , يعني ولد عمره 14 سنه يشيل كيس تبن وزنه 80
كيلو على ضهره , بخطاف بإيد واحده و يمسك السلم بالإيد التانيه , اليوميه دي كانت
5 جنيه .
.
طول السنين كنت
شاطر جدا في المدرسه , و الشغل في الصيف , ماعرفتش يعني ايه مصايف ( ولا حتى جمصه روحتها
) , صيف يعني شغل , يعني أساعد أبويا و أمي اللي مخلفين 6 عيال و أنا أكبرهم , محدش
كان بيضغط عليا عشان أشتغل , بس أنا كنت حابب كده , وطول السنين برضه و رغم ظروفنا
الصعبه جدا لا سمعت أبويا بيشتكي ولا سمعت أمي بتلعن البلد و الظروف و العيشه .
.
لما خلصت الكليه
و الجيش قلت أسافر بقى , عندي اخوات عايزين يتعلمو و يدخلو جامعه و يتجوزو , حصل موقف
غريب جدا يوم السفر , أولا كنت سالف فلوس التذكره , و في المطار اكتشفت ان المكتب مأكدشي
الحجز بتاعي , يعني أنا عالويتينج ليست , يوميها انفعلت جدا على موظف المطار مع إنه
ملوش ذنب , و قلت له هسافر يعني هسافر , ايه اللي جه في ذهني وقتها ؟ و ايه المشكله
لو ماكنتش ركبت الطياره دي و رجعت بلدنا و شوفنا حجز تاني و اكدناه بعد يومين تلاته
؟ لا طبعا ده بالنسبالي كان مستحيل , كان بيعني الفشل .
.
و لما اتجوزت و
خلفت و بناتي كبرو و بقو في ابتدائي بقيت اجيبهم معايا في الصيف يشتغلو و لو ساعتين
تلاته في اليوم , بمرتب رمزي , عشان يعرفو بشكل تدريجي يعني ايه ثقافة العمل ؟ يعني
ايه مسئوليه ؟ و في نفس الوقت مش مقصر معاهم في فسح ولا لعب ولا كل الحاجات اللي بيحبها
الأطفال .
.
أنا ليه بحكي كده
؟ عشان مش ببقى لاقي رد مايكونشي أبيح لما بشوف بغل طول بعرض قد الباب و عمره 30 سنه
قاعد على قهوه أو نايم عالسرير و مستني أبوه و امه يدوله فلوس ويجوزوه , او مستني الحكومه
تجيب له وظيفه وتدلك له عضلة السمانه وهو نايم , و في الأخر يقولك أصل اليابان و كوكب
اليابان , على فكره يا حماده , في كوكب اليابان لما العمال في مصنع بيحبو يضربو عن
العمل لأي سبب , بيروحو الشغل و يلبسو حاجه كده على راسهم تقول انهم مضربين عن العمل
, بيلبسوها و هما شغالين !! .
.
والنبي يابني تسيب
كوكب اليابان في حاله و حاول انت بس ربنا يعينك كده و اتعلم انك تشيل المنديل المستخدم
اللي بتسيبه عالكوميدينو جنبك بالإسبوعين و التلاته بدل ما تستنى ماما تيجي تشيله وهي
بتنضف أوضتك زي كل مره .
........................................................................................................
Mohamed
Hussein
6
يوليو 2018·
النحس اتفك الحمد
لله , شجعت بلجيكا و فازت , من بعد الدور الاول و انا برشح بلجيكا و كرواتيا للبطوله
دي , مع انهم مافازوش بيها قبل كده , بس مستواهم يستاهل .
النهارده اتمنيت
إن البرازيل تخسر مع إني بحب البرازيل , بس اتمنيت خسارتها لسبب غريب , عشان لو البرازيل
فازت بالكاس أو وصلت النهائي هيبقى الواد نيمار إبن الصرمه ضمن جايزة البالون دور
( احسن لاعب في العالم ) و يبقى صلاح ملوش فرصه فيها .
.
أكتر حاجه بتمتعني
في لعب بلجيكا هي الهجمه المرتده , مش زي مالكتاب بيقول لأ , دي زي مالكتاب هيقول بعد
20 سنه من دلوأتي , حاجه كده تعرّفنا الفرق بين المدرب اللي بجد و بين العاهات اللي
بييجو يسترزقو عندنا .
.
الواد لوكاكو عاجبني
جدا , و أقطع دراعي من هنا إن الواد ده بيفطر كل يوم الصبح بنص بقره أو معزتين .
........................................................................................................
Mohamed
Hussein
6
يوليو 2018·
شوفت حضرتك اللي
حصل ؟
- خير يابني ,
حصل إيه ؟
.
شقق العاصمة الإدارية
الجديده .
- مالها ؟ .
.
الشقه ب 2 مليون
جنيه و أكتر .
- لا بجد ؟ طب
كويس أوي , اللهم لك الحمد
.
هو ايه اللي كويس
؟ بقولك الشقه ب 2 و 3 مليون؟ شاب مين اللي يقدر يشتريها .
- ممممممم انت
أهبل يابني ولّا لك عمه تخينه شويه ؟
.
ليه يا أستاذ ؟
هو مش من حق الشباب يسكن هناك ؟
- يادي أم العته
عالصبح , يابني أنا راضي ذمتك
.
اتفضل حضرتك قول
- مدينة ذكيه معمول
فيها مبنى برلمان و قصر رئاسة و مبنى لوزارة الدفاع و وزارات كلهم بأحدث طراز عالمي
, ينفع نعمل في الأحياء اللي حواليهم إسكان شباب و الشقه ب 200 ألف و كل واحد يبقى
ناشر لباسه عالحبل ؟
.
لا طبعا ماينفعش
.
- طب ينفع فلاديمير
بوتين يكون واقف مع السيسي في شرفة القصر و يلمح معاليك من بعيد واقف في البلكونه بفانله
حمالات بتشرب سيجارة كيلوباترا و المدام بتنفض السجاجيد ؟ .
.
لا مايصحش
- طب حضرتك تعرف
إن قلب مدينة دبي فيها إسكان شباب ؟ أو فيها ستوديو من غير حمام مساحته 7 متر مربع
يقدر على تمنة واحد مرتبه 15 ألف درهم ؟
.
لا مستحيل .
- طيب , ماهو قلب
العاصمة الإدارية الجديده هيبقى زي قلب دبي كده .
.
و الشباب حضرتك
هيسكنو فين ؟
- بص يابني , المدينه
دي مخطط إن عدد سكانها يكون 6 مليون و بالتالي أتوقع مليون وحده سكنيه بأسعار اقتصاديه
و متوسطه بس المؤكد إنها هتكون على اطراف المدينه و في ضواحيها , هي دي طبيعة الأشياء
, الكثافه السكانيه تكون على الأطراف , مش في الحي الحكومي اللي هتدار منه الدوله ولا
في الأحياء المحيطه بيه .
.
طب ليه قلت اللهم
لك الحمد لما عرفت إن الشقه ب 2 مليون ؟
- عشان الشقه دي
مش هتكلف الدوله أكتر من 400 ألف , خزينة الدوله هيدخلها مبلغ محترم من بيع كل شقه
, و لو بنتكلم مثلا على 50 ألف ولا 100 ألف وحده سكنيه بالشكل ده يبقى المحصله أكتر
من 100 مليار جنيه نقدر نستخدمهم في استكمال المشروع العملاق و عمل المرافق و خلافه
, وبكده االمشروع يصرف على نفسه .
- أه فعلا , فكره
حلوه .
.
و بعدين يا حبيبي
عايز أقولك حاجه أخيره
- اتفضل حضرتك
.
مش مشروع العاصمه
الإداريه ده كان فنكوش و الشركات الصينيه هربت ؟
- أه صح , فنكوش
و السيسي بيبيع لكو الوهم .
.
طيب يابني , احنا
بقى الفناكيش بتاعتنا غاليه أوي كده , و أديك شايف بنفسك أهو , فنكوش واحد هنعمل منه
100 ألف فنكوش صغيرين و الفنكوشه الصغيره اللي قد كداهو ب 2 مليون جنيه , كل واحد حر
في فناكيشه بقى .
..........................................................................................................
ليست هناك تعليقات:
إرسال تعليق