Mohamed
Hussein
5
يوليو 2018·
ديموقراطية بالحبهان
و المستكه و الورق اللوري
.
أردوغان خليفة
المثليين , بعد ما سجن نص الشعب التركي بحجة إنه على علاقه بفتح الله جولن أو كان يعرف
فتح الله جولن في ابتدائي أو حلق شعره عند الحلاق اللي كان بيحلق لفتح الله جولن أو
مشي في الشارع اللي كان ساكن فيه فتح الله جولن , جه النهارده و لغى منصب رئيس الوزرا
في تركيا و ضم صلاحيات رئيس الوزرا لمكتبه , يعني باختصار حول نظام الحكم من برلماني
لرئاسي , و مش بعيد بكره الصبح تضرب في دماغه و يحوّل تركيا لسلطنة و يبقى اسمه السلطان
رجب , و عيالة يورثو حكم السلطنة من بعده و تبقى الفتره دي في تاريخ تركيا إسمها فترة
حكم أولاد رجب .
.......................................................................................................
Mohamed
Hussein
5
يوليو 2018·
من يوم ما وعيت
عالدنيا و فيه جملتين بحفظهم زي ماهما كده , عجز الموازنه , و المستثمر الأجنبي .
.
و بقى عندي اعتقاد
ان كل جمله منهم عباره عن كلمتين ملزوقين في بعض زي التوأم السيامي اللي ملتصق من الرأس
و ماينفعش نفصله , طالما قولت كلمة موازنه يبقى لازم يسبقها كلمة عجز , و طالما قولت
مستثمر يبقى لازم بعدها تقول أجنبي , على رأي العظيمة إسعاد يونس لما سألت عادل إمام
في الفيلم انت بتشتغل ايه ؟ وقال لها بشتغل مستثمر , قامت برد فعل تلقائي كوميدي قالت
له , أجنبي ؟ .
.
المهم , لما قريت
خبر الموازنه العامه الجديده لمصر 2018 /2019 لقيت فيها كلمة ماخدنهاش في الكتاب يا
بيه , كلمة اسمها ( فائض ) , و مالقيتش كلمة ( عجز ) اللي اتربينا عليها , أتاري موازنة
مصر السنادي فيها فائض 4 مليار جنيه و متوقع إنه يكون الفائض 100 مليار في الموازنه
الجايه , طب فين كلمة عجز يا جدعان ؟ دانا كنت فاكرها عيب خلقي ( أو أتب ) المفروض
نعيش بيه مدى الحياه
.
بلد يا مولانا
بتحارب الإرهاب و الطوفان اللي خرب المنطقه حوالينا , و بتصرف مئات المليارات في بنية
تحتيه عشان تعمل دوله من أول و جديد , و بتعيد تسليح جيشها بأحدث الأسلحه , و بتاخد
قرارات مؤجله من عشرات السنين , كل قرار منهم كان أشبه بحقل ألغام , و بتحط صوابعها
في شق التعبان بقلب جامد , و في النهاية توصل بالموازنه العامه لفائض مش عجز !! .
.
من أربع خمس سنين
كان الاحتياطي النقدي لمصر وصل ل 15 مليار دولار , و كنا على وشك الإفلاس ك ( دوله
) , يعني مصر الدوله ( و الكيان ) كانت على وشك إنها تشحت عالقهاوي , أو نبيعها خرده
لبتوع الروبابيكيا , اللهم لك الحمد و الفضل و المنه .
......................................................................................................
Mohamed
Hussein
4
يوليو 2018·
لسه شايف فيديو
من شويه , بس و الله ضحكني أكتر من أفلام عادل إمام و أحمد حلمي و أكتر حتى من فيلم
اللمبي .
.
شاب مصري عايش
في أمريكا و عمل فيديو من سنه تقريبا , المحصله ؟ اللهم صل عالنبي , 45 ألف شير و شخروميت
ألف لايك , بيقول ايه الشاب المصري اللذيذ ؟ بيقول التالي :
.
السلام عليكم
, انا يا جماعه لسه راجع أجازه من ماااسر ( أم الدنيا ) , و وصلت أمريكا بالسلامه
, في ماااسر ( أم الدنيا ) صرفت في الأجازه بتاعتي نص مليون جنيه على الأكل بس , لأن
أقل أكله كانت بتكلف 1500 جنيه , و لما جيت هنا دخلت سوبرماركت أشتري طلبات البيت
, جبت كل حاجه , اللي هي قدامكو في شنطة العربيه دي , جمبري و ستاكوزا و كافيار و لحمه
و لبن و عسل , الحساب 500 دولار زي مانتو شايفين في الفاتوره , و المفاجأه لما جيت
أدفع الحساب بالكريديت كارد , بالفيزا يعني ( ماهو أنا معايا فيسا ) لقيتهم ماخصموش
مني ولا دولار واحد , سالت ليه عملتو كده ؟ ضربو عالكمبيوتر و قالو لي لأنك لسه راجع
من أجازه و أكيد ماشتغلتش ولا معاك فلوس , فالحكومه الأمريكيه بتدفع عنك فلوس البقاله
و هتلاقيها دافعالك فواتير الكهربا والمايه و الغار
..................
كده خلص الفيديو
الكوميدي , اللي معمول له 45 ألف شير مع سيل من الشتايم لمصر و المجد لأمريكا و ماما
أمريكا .
.
بس عايز أقول لحضراتكو
حاجه , الواد الخو* , قصدي الخواجه ده بيتكلم صح على فكره , وأمريكا مش بس بتدفع له
البقاله لما يكون راجع من اجازه , ده ترامب بيبعت له السواق الخاص بتاعه يوصله البيت
لأنه أكيد مرهق من السفر و أول ما بيوصل شقته بيلاقي 2 فلبينيات مستنينه عشان يعملو
له مساج و يدلكو له عضلة السمانه ( على حساب ترامب طبعا ) .
.
ده بالنسبه لأمريكا
, أما كندا لها وضع تاني خالص , حضرتك لما بتكون في اجازه في مصر ( و صارف 2 مليون
جنيه في الشهر عالأكل والفول و الطعميه ) و ترجع بتلاقي رئيس وزراء كندا مستنيك على
سلم الطياره , ياخدك بالحضن و يقولك حمد الله عالسلامه يا بطل , إمسك يا فلان , ايه
ده سيادتك ؟ دي يا ابني مفاتيح شقتك الجديده و عربيتك الجديده , بس يافندم انا عندي
شقه و عربيه موجودين هنا فعلا , لا يا ابني انت سايبهم من شهر و زمانهم قدمو و بقو
أولد فاشون , المهم تكون راضي عن كندا و راضي عني شخصيا .
.
و توته توته خلصت
الحدوته , بكره يا ولاد أحكي لكو حكاية الشاب المصري اللي بيشتغل صبي فرارجي في مصر
و فجأه يقرر السفر لاستراليا , و إزاي أول ما بيوصل هناك بيخطفوه خطف و يعينوه في منصب
عمدة مدينة سيدني و رئيس المجلس الأعلى للمفاعلات النوويه الأستراليه .
........................................................................................................
Mohamed
Hussein
4
يوليو 2018·
ألف باء
.
ماينفعش نيجي في
2011 و نهري في أبجديات السياسه و أبجديات العقل البشري و المنطق و بعد 7 سنين نلاقي
نفسنا بنهري في نفس الأبجديات و نفس الألف باء , كما لو كنا بنلف في دايره مقفوله أو
إن مرحلة الكي جي مابتخلصش و مش مفروض نكبر و نطلع منها.
.
..99.9 % من الأخبار
المتداوله عالفيس بوك مضروبه , تأليفه مقصود ترويجها عشان عقلك يتشكل بطريقة 10 ألاف
كدبه فوق بعض , راقات كده و في الأخر تدور على عقلك ماتلاقيهوش , ماهو أكيد اتردم تحت
كوم الإشاعات اللي حتى أصدقائي بيشيروها , و قولنا مليون مره فكرة إنك تلاقي عنوان
على لوجو لجريده ولا قناة فدي حكايه ممكن تعملها بنتي اللي في تانيه ابتدائي و تحط
لك مثلا خبر على لوجو اليوم السابع إن باباها اللي هو انا هيتجوز مارلين مونرو الله
يرحمها و الفرح يوم الخميس الجاي في مسجد المشير طنطاوي .
.
الحكومات يا بني
أدمين , أي حكومه في الدنيا , لا هي أمك اللي بوك الفلوس بتاعها مليان و متستف و تقولها
هاتي و تديك من غير حساب , ولا هي مرات أبوك اللي كارهاك و حاطه نقرها من نقرك عشان
تنكد عليك عيشتك .
.
علاقة المواطن
بالحكومه هي التالي , إنت حضرتك بتشتغل ب10 قروش و عايز لحمه و كافيار و جاكوزي و اخوك
تاجر بيكسب 100 قرش و اخوك التاني مش بيشتغل و عايز دوا عشان يتعالج , دور الحكومه
انها بتدير الليله دي , تقولك معلش ال 10 قروش بتوعك هيلزموك انك تعيش على قدك , و
أخوك اللي بيكسب 100 قرش تاخد منه 15 قرش عشان تصرف على اخوك التاني العيان اللي مش
بيشتغل , دي الحكايه باختصار شديد , بتدير أملاكنا و بتاخد مننا عشان تدينا , هترصف
لك الطريق و توصل كهربا لبيتك و تعلم ابنك في المدرسه , منين بقى ؟ من إدارة أملاكنا
و من شغل إيدينا .
.
اقتصاد أي دوله
بيبقى عامل زي البقره , أه البقره , بتحلبها عشان تشرب لبنها لكن في نفس الوقت لازم
تغذيها و ترعاها , مشكلة مبارك انه فضل يحلب في البقره لحد مابقت هيكل عظمي و اشربو
لبن يا عيال و قولو عاش الملك , البقره كانت قربت تفطس و لما تفطس هيبقى مفيش لبن لا
لحضرتك ولا لأولادك من بعدك , جه السيسي و قال البقره دي كده هتموت و هنموت معاها
, لازم نغذيها و نعالجها الأول (هيكلة اقتصاد وبنية تحتيه و مشاريع ) , هنتعب شويه
, هنتعب أوي , مكرهٌ اخاك لا بطل .
.
عايز حضرتك تكلمني
في اقتصاد و صعوبات حياه بتواجه الفقرا و الطبقه المتوسطه اللي بتكح تراب حاليا ( و
اللي أنا منها ) أقولك حاضر و أمين , تعالى نتناقش و نشوف حلول و نلعن جدود أبو الحكومه
اللي مش عارفه تدير المنظومة , بس بشرط , قبل ماتيجي يا مولانا لازم تتخلص الأول من
راقات الإشاعات اللي في دماغك , و من مفهوم ان الحكومه هي الأم أو مرات الأب , و من
فكرة إن خبر مضروب على لوجو جريده بيوديك و يجيبك , يعني باختصار اخرج من مستنقع السباخ
اللي انت عايش فيه و هات عقلك و تعالى , يا اهلا و سهلا .
................................................................................................................
Mohamed
Hussein
3
يوليو 2018·
في يونيو 2012
دخلنا السينما غصب عننا عشان نتفرج على فيلم بالإكراه , قعدنا عالكراسي و احنا شامين
ريحة وحشه , بدأ العرض , أبطال الفيلم مش أبطال ولا حتى محصلين كومبارسات , كلامهم
غريب عننا و سحنتهم أغرب , و أول سؤال جه في ذهننا , هو الفيلم ده مصري يا جدعان ؟
متأكدين انه مصري ؟ طب معلش نشوف شويه كمان , يمكن نكون غلطانين .
.
شوفنا شويه كمان
, فيلم ممل و عقيم , و قصته خلاص حافظينها (الله يلعنهم اللي كانو السبب و دخلونا السينما
بالعافيه ) , قال يا سيدي خير اللهم اجعله خير , شوية عيال سحنتهم شبه بعض صحيو من
النوم فجأه و لقو نفسهم كبارات القريه , و بقى في إيديهم الحل و الربط , بعد ما عاشو
طول عمرهم في الجحور زي السحالي و الصراصير , سبحان العاطي الوهاب , وهوبا نكتشف إن
بطل الفيلم ( أو اللي عاملينه بطل و إسمه مكتوب بالبنط العريض على الأفيش ) مجرد صبي
من صبيان المعلمه كان بيحضّر لها الشيشه و يمسك لها الشنطه , الصبي قالو له تحكم القريه
دي ياض يا شغته ؟ قال لهم احكم ماحكمشي ليه , هو انا صغير , بس أقول ايه يا معلمه ؟
انا أصلي معنديش خبره في الشغلانه دي , المعلمه بصت له كده و قالت له طول عمرك عبيط
و دي أحلى ميزه فيك على فكره , تقول ياض اللي هنقولهولك , قول القصاص , القصااااااص
, تعرف تقولها ياض ؟ أعرف يا معلمه , و شرفي هعجبك و هتشوفي مني إنبهارات .
.
و طول الوقت على
كده يا مؤمن , بنتفرج على حوار المعلمه و صبيانها و الواد شغته اللي فجأه بقى كبير
القريه , قرفنا جدا و حاولنا نخرج في نص الفيلم , قالو لنا مفيش خروج , ليه يا جدعان
داحنا معدتنا اتقلبت و الله ؟ قالو لنا لسه أوان الخروج ماجاش (و كله بأوان ), قولنا
حاضر وأمين , و رجعنا تاني للكراسي نتفرج على أم سحنة المعلمه وعيالها و إزاي بيحاولو
يحكمو القريه العملاقه دي بطريقة تفكير الصراصير و بدماغ الصراصير .
.
حاولنا ننام على
قد مانقدر عشان الوقت يجري بس الوقت مابيجريش , لحد فين و فين لما صاحبي اللي قاعد
جنبي صحاني و قالي قوم قوم , شكلها هتُفرج , ليه يابني خير , قال انا حاسس إن الفيلم
ده خلاص قرب من نهايته , و فعلا كان معاه حق , شوفت بعيني لوحة النهايه و شوفت بعيني
الستاره و هي بتتقفل , دانا حتى من فرحتي طلعت أجري ناحية الشاشه عشان أشد معاهم الستاره
و أقفلها كويس , و أخيرا خرجنا للشارع و للهوا , و لنور ربنا , بعد ما قضينا أسوأ سنه
في حياتنا بنتفرج فيها على أسوأ عرض في تاريخ البشريه .
.
خرجنا من العرض
و بنبص في الساعه لقيناها بتقول , 3 يوليو 2013 .
.
#يوم_الخلاص
............................................................................................................
Mohamed
Hussein
3
يوليو 2018·
إلا قولي يا مولانا
- نعم يا بني
.
هو احنا جينا تركيا
عشان نعمل ايه بالظبط ؟
- احنا يا إبني
جينا هنا عشان نحارب مصر , الدوله الكافره و جيشها الكافر , و كمان عشان ننصر سيدي
خليفة المسلمين رجب طيب أردوغان في تحرير القدس و تدمير الكيان الصهيوني .
.
بس يا مولانا مصر
عمرها ما كانت دوله كافره ولا جيشها كافر , ولّا مصر و جيشها كانو مؤمنين و أتقياء
من ألاف السنين و فجأه بقو كفره في يوليو 2013 ؟ و بعدين تركيا لا حاربت الصهاينه في
يوم من الأيام ولا ضربت عليهم طلقه واحده ولا هيحاربوهم , و كل اللي بيقوله أردوغان
فنجرة بؤ و احنا عارفين
- انا قلت لك ايه
قبل كده ؟ لا تناقش ولا تجادل .
.
أيوه معاك حق
, قولي صحيح , انت بقالك قد أيه مانزلتش من شقتك ؟
- من إسبوعين
, لما كنت ماشي في مظاهرات الإحتفال بفوز أردوغان و اتكعلبت و رجلي اتلوت , من وقتها
و انا مش قادر اتحرك .
.
و ايه اللي ينزلك
في حاجه زي كده ؟ دانت راجل كبير و بتمشي بالعافيه .
- يابني فيها قرشين
حلوين , رزق و جاي لنا , نقول له لأ ؟..
.
طيب بما انك مانزلتش
من البيت من اسبوعين و ماعندكش تليفزيون يبقى فاتك مشهد مظاهرات الشواذ و الخوا*ات
و العياذ بالله , دول عملو مظاهرات في الشارع عيني عينك .
- أعوذ بالله من
غضب الله , اللهم ارفع مقتك و غضبك عنا , ده ربنا هيخسف بمصر الأرض و يجيب عاليها واطيها
, عشان لما أقولك دوله كافره تبقى تصدقني , هو فيه ألعن من النجاسه دي ؟ اللهم اخسف
بهم و بدارهم الأرض .
.
يا مولانا مانا
نسيت أقولك , المظاهرات دي كانت هنا في تركيا مش في مصر , و تركيا أصلا جزء كبير من
دخلها قايم على بيوت الدعاره و الشذوذ .
- ايه ؟!! .
.
أه و الله زي ما
بقولك كده.
- يابني بلاش تبقى
حنبلي , هل انت اتأكدت إن المتظاهرين دول شواذ قصدي مثليين ؟ هل شوفتهم في وضع شذوذ
بعينك ؟ قال تعالى , يا أيها الذين أمنوا إن جاءكم فاسقُ بنبإٍ فتبينوا أن تصيبوا قوماً
بجهالةٍ فتصبحوا على ما فعلتم نادمين , و في النهايه يا سيدي يبقو مخطئين و مذنبين
, ندعو الله لهم بالهدايه .
.
يعني كده ربنا
مش هيخسف بيهم و بدارهم الأرض ؟ و يبقو مخطئين و لازم نتبين الأول , إنما لو الكلام
ده حصل في مصر تبقى دوله كافره و ملعونه و مرجومه و شيطانيه و عليها من الله ما تستحق
؟!
- أجل يا بني
, بارك الله فيك .
.
مممممم ماتجيب
بوسه مشبك يا مولانا .
- موووووووووواه
, حبيب قلبي من جوه .
..........................................................................................................
Mohamed
Hussein
2
يوليو 2018·
لما شوفت ماتشات
الدور الأول قلت بلجيكا و مفيش غيرها بلجيكا بقى , و لما عرفت انها هتلاعب اليابان
قلت بس , بلجيكا هتاخد اليابان جنب المفاعل النووي اللي تحت الحوض و تفوز عليها
7/0 أو 9/1 .
.
أجي اتفرج عالماتش
ياخويا ألاقي اليابان , الفرقه اللي صعدت لدور ال 16 بفرق إنذار , يعني بحُسن الخلق
و بإنهم ناس طيبين , مقطعه بلجيكا و جابت فيها جونين في 5 دقايق , و فين و فين لما
بلجيكا اتعادلت و في الأخر فازت بالعافيه و بطلوع الروح في الدقيقه 94 .
.
ده بقى اسمه مونديال
اللامعقول و اللامنطق , ولا ينفع فيه أي توقعات ولا كلام مبني على أسس علميه , هتقولي
النجوم الكبار اوي بيشيلو فرقتهم هقولك كان كرستيانو شال البرتغال و لا ميسي شال الأرجنتين
, هتقولي التاريخ هقولك فين ألمانيا اللي هي بطلة العالم ؟, هتقولي اللياقه البدنيه
هقولك الواد لوكاكو بتاع بلجيكا لو فككته هيعمل 22 لاعب من الحجم الياباني .
.
أهو بعد الشألباظات
اللي بتحصل دي مابقيتش أستبعد أي حاجه على الإطلاق , يعني مثلا مثلا مش هتفاجئ لو مصر
فازت بالمونديال و فرحنا كلنا و جايزة أحسن لاعب عطوها مناصفةُ لكهربا و رمضان صبحي
, هتقولي بس مصر خرجت من الدور الأول , يعني مش موجوده أصلا , هقولك يابني دي مجرد
شكليات مش بتفرق خالص في مونديال روسيا .
.................................................................................................................
Mohamed
Hussein
2 يوليو 2018·
دييجو أرماندو
مارادونا , أسطورة كرة القدم في العالم صرّح بإن راموس كان يستحق الإيقاف لمدة سنتين
بعد تعمدة إصابة محمد صلاح في نهائي أبطال أوروبا , بس المشكله إن راموس بيلعب في ريال
مدريد !! .
.
أه قال إيقاف سنتين
, و قال إصابه متعمده , يعني مع سبق الإصرار و الترصد .
.
أصدقائنا الحلوين
اللي عقولهم سابقه كوكب الأرض بمليون سنه ضوئيه , اللي وقتها قعدو يألشو كالعاده و
يقولو بطلّو بقى نظرية المؤامره و بطّلو تطبلو للشخص اللي بتحبوه , ده اشتراك عادي
, و لعبة الكوره للرجاله , و الإتحاد الأوروبي والإتحاد الدولي عندهم أخلاق و مبادئ
و قيم ( من الحجم الكبير ) و كل الهجص اللي بيعتبروه أفكار ألماظات , عايز أقول لهم
, أظن مارادونا مش طبّال و لا بتغلبه العاطفه ولا هو مصري ولا عربي و لا مولود في قرية
نجريج .
.
فيه إصابه متعمده
؟ أه فيه إصابه متعمده ( دي حكايه يعرفها أي عيل لعب كوره يومين في الشارع حتى ) ,
طب ليه تعمد الإصابه ؟ عشان يبعدو صلاح عن المباراه لأنه بيمثل نص قوة ليفربول , بس
راموس كان ممكن يقضي على مستقبل صلاح الكروي تماما ؟ مش مهم , فين اخلاق راموس و أخلاق
أوروبا ؟ ابقى تعالى وانا اقولك فين , طب الاتحاد الأوروبي بعد المباراه أكيد شاف اللعبه
ألف مره ماخدش قرار بإيقاف راموس ليه ؟ عشان الفيفا و الاتحاد الأوروبي لكرة القدم
مايختلفوش عن الأمم المتحده و الإتحاد الأوروبي بتاع السياسه , كلهم ولاد تيت حتى إشعار
أخر .
...............................................................................................
Mohamed
Hussein
1
يوليو 2018·
قواعد و بروتوكولات
الهبدجيه العشرون
.
هبدجي 1 , احنا
ماعملناش الثوره عشان النظام الفاشي كان قافل الشوارع و الميادين بالدبابات و المجنزرات
و السفن الحربيه و الغواصات النوويه .
.
هبدجي 2 , ماعملناش
ثوره عشان الشعب العبيد مايستاهلش , ولا يستاهل دماغنا الألماظات و عقولنا اللي سابقه
كوكب الأرض بمليون فدان .
.
هبدجي 3 , ماعملناش
ثوره عشان البلد مش مستحمله و احنا مع مصر الوطن ضد مصر المقاصه , قصدي مصر الدوله
.
.
هبدجي 4 , ماعملناش
ثوره عشان يوم 30 يونيو صادف يوم سبت , و احنا مستحيل نعمل حاجه في يوم السبت , مش
هنتشبه باليهود ولا مؤاخذه .
.
هبدجي 5 , ماعملناش
ثوره عشان درجة الحراره صادفت 38 درجه و محدش بينزل في الوقت ده غير الموزمبيقيين
, مش هنتشبه بالموزمبيقيين ولامؤاخذه .
.
هبدجي 6 , ماعملناش
ثوره عشان لازم الأول نوحد صفوفنا و نرتب أوراقنا و نرص كاساتنا و فناجينا .
.
هبدجي 7 , هي دي
المره رقم كام اللي ندعو فيها لثوره اخر 5 سنين يا جدعان ؟
هبدجي 8 , رقم
273 أو 714 , مش فاكر , مابنعدشّ يا جيمي .
.
هبدجي 9 , طب فين
ال 6 مليون أكاونت اللي شاركو في الهاشتاج ؟ .
.
هبدجي 10 , موجودين
طبعا , في تركيا و قطر و تونس و الأردن و أمريكا و تنزانيا و مبنى المخابرات البريطانيه
و مبنى الموساد , قصدي موجودين طبعا في بيوتهم في مصر و كانو جاهزين للنزول لولا نظام
السيسي حط عربية أمن مركزي تحت كل عماره و رمى على كل سلم 50 قشرة موز عشان محدش يعرف
ينزل .
.
هبدجي 11 , طب
هنعمل ايه دلوأتي يا شباب ؟
هبدجي 12 , هنعمل
زي ما بنعمل طبعا , ندعو لثورة كل يوم تلات و ماننزلش , و نعمل هاشتاجات و نعمل شألباظات
و نعمل تاتو فراشه .
.
هبدجي 13 , انا
ملاحظ جدا نشاطك الرائع عالفيس و تويتر يا أنسه .
هبدجيه 14 , و
انا كمان ملاحظة , حضرتك مناضل جامد اخر فيصل.
.
هبدجي 13 , أحب
أعرفك بنفسي , انا التنين المجنح و جيفارا الميدان و فارس الثوره , اسمي محمود أو سعيد
, بس ممكن تقولي لي يا حمدي .
.
هبدجيه 14 , وانا
زهرة الاحزان الزمخشريه و قلب خسايه و أميرة الميدان و الفراشه الرقيقه , اسمي عطيات
أو نحمده , لكن ممكن تقولي يا ساندي .
.
هبدجي 13 , ساندي
إسم جميل , مممممم مش انا عيد ميلادي النهارده ؟! .
.
هبدجي 15 , احنا
في ايه ولا في ايه يا جدعان , قولو لنا هنهبب ايه مع العيال اللي بيأيدو السيسي و يدافعو
عن مصر و تاريخها و جيشها , وليل و نهار يقولو فيه مؤامره , زمانهم هيحطو علينا دلوأتي
حط السنين .
.
هبدجي 16 , هنقول
عليهم أمنجيه و معر*ين .
هبدجي 17 , و عبيد
بياده .
هبدجي 18 , بيتفرجو
على احمد موسى و لميس الحديدي .
هبدجي 19 , و توفيق
عكاشه .
هبدجي 20 , و نحط
بعد كل جمله , تلاته من الإيموشنز دي 😀😀😀
...............................................................................................................
Mohamed
Hussein
30
يونيو 2018·
الشعره
.
سؤال مهم جدا لازم
الناس تفكر فيه باستمرار , و يفضل قدام عينيها , لأنه بيشرح حاجات كتير و بيوضح الرؤيه
تماما , و بيأرخ لمرحلة هي الأهم والأصعب في تاريخنا الحديث .
.
السؤال هو , ليه
؟ ليه ماحصلش لمصر زي ما حصل لسوريا و العراق و اليمن و ليبيا ؟ ليه ماوقعناش زيهم
؟ عندنا شعب حضاري ؟ عندهم شعوب حضاريه زينا , عندنا ناس بتحب بلدها اوي ؟ عندهم برضه
, عندنا دوله كانت مستقره أمنيا و سياسيا ؟ عندهم نفس الكلام , عندهم اختلافات طائفيه
و مذهبيه و اتلعب عليها , و احنا برضه عندنا و اتلعب عليها .
.
طب كلمة السر فين؟
و ايه السبب اننا ماوقعناش ؟ و كان بينا و بين السقوط قد ايه بالظبط ؟
.
أولا , كان بينا
و بين السقوط شعره أو تكه واحده , مجرد ما تتقطع الشعره دي كانت هتسقط الدوله المصريه
و تبقى أشبه بصخره عملاقه وقعت من فوق جبل , سقوطها هيبقى سريع و مدوي و أكيد هيبقى
النهايه , نهاية كل شئ .
.
فيه أمثله كتير
جدا على حكاية الشعره , يمكن الناس مش منتبهه ليها:
.
مثلا حصار المحكمه
الدستوريه من الخرفان و جماعة ابو اسماعيل كان شعره بين مفهوم الدوله واللا دوله ,
فكرة انك تحاصر أعلى جهة قضائيه بشوية إرهابيين و مخابيل , فكرة إنك ترهب القاضي (
حتى لو مش عاجبك ) بيعني انك هتخرج من مفهوم الدوله لمفهوم الغابه , اللي هو السقوط
المدوي .
.
مثال تاني على
الشعره , لما الخروف اللي شمامين الكوله جابوه يحكم مصر قال لبيك يا سوريا , دي كانت
كمان شعره , جيش مصر التاني يطلع يحارب الجيش الأول , جيش مصر يتحول لمجموعة مرتزقه
بتنفذ تعليمات جماعه ارهابيه , جيش مصر يحارب جيش عربي و إيده تتغرق في دمه مع ان الجيش
العربي ده لا معادينا ولا احتل أرض عربيه تانيه , هيبقى ايه مبرر قيادات الجيش المصري
و جنوده قدام نفسهم ؟ ولا حاجه , هيرجع الجيش المصري من سوريا بنفس عقيدته القتاليه
الوطنيه ؟ مستحيل , كمان ده التوقيت المناسب اللي كانت هتستخدمه الجماعه الإرهابيه
لتقسيم الجيش المصري و تفتيته و تحل محله ميليشياتهم المسلحه , و المصيبه الأكبر لو
كانو قيادات الجيش رفضو تعليمات رئيس الدوله اللي هو القائد الأعلى للقوات المسلحه
, في كل الأحوال كانت شعره و في كل الأحوال كانت صخره عملاقه هتقع من على الجبل و تحط
مشهد النهايه .
.
طب فين بقى اجابة
السؤال بتاع ليه ؟ الإجابه باختصار أهي
- الشعره الأولى
والتانيه تغلبنا عليهم ب 30 يونيو ( أعظم ثوره في تاريخ مصر الحديث ) , الثوره اللي
أبقت على مفهوم الدوله و قضت على مفهوم الغابه اللي كنا رايحين لها بسرعة الصاروخ
.
.
- الجيش المصري
مكانشي بس جيش قوي ( زي جيوش سوريا و العراق ) إنما كلمة السر كانت في إنه متماسك
, هنا كلمة متماسك أهم من قوي , محتفظ بعقيدته القتاليه الدفاعيه الشريفه , عنده أجهزة
مخابرات مفيش زيها في العالم , و يمكن دي الحسنه الوحيده على الإطلاق اللي تحسب لمبارك
( وسط مجلد كامل من السيئات ).
.
- أخر حاجه في
سؤال ليه , هي ان الشعب المصري فاق بسرعه و استوعب الدرس رغم إن الحرب كان أساسها اعلامي
و مواقع تواصل و احنا كنا ( ولا زلنا ) ماعندناش لا إعلام ولا إداره لمواقع التواصل
, بس اهو ده سر من أسرار ربنا فينا , نفحه ربانيه و رماها في حجرنا , فلا تسألنّ عن
السبب .
........................................................................................................
Mohamed
Hussein
29
يونيو 2018·
من 5 سنين
.
كنت نزلت أجازه
من السعوديه , و البدايه كانت في العين السخنه قبل الثوره مباشرة , لما روحت أصيف يومين
تلاته , و في أخر يوم شوفت جوز عساكر باللبس الميري و البندقيه على ضهرهم بيتكلمو مع
المسئولين عن القريه , و في البحر لانشات البحريه المصريه رايحه جايه , قلت في نفسي
دي البشاره , و الله البشاره .
.
يوم 29 رجعت على
بلدنا في المنصوره , أخويا سألني , هما الإخوان هيمشو ؟ قلت له بالفم المليان هيمشو
, قالي ليه ؟ عشان ازمة البنزين و طوابير العيش و الكهربا اللي مابتجيش ؟ قلت له لأ
خالص , طب ليه ؟ عشان حاولو بكل حماقه يلعبو في هوية شعب عمره 10 ألاف سنه , يلعبو
في جينات أقدم و أعرق بلد في التاريخ , سحليه عبيطه حاولت تبلع فيل , و النتيجه انه
الناس كرهتهم في ظرف سنه , مش بس الناس , دي الجدران و الشوارع و الحواري و التراب
و الحصى .
.
بعدها جهزت عربيتي
و قلت اروح انزل ميدان المحافظه في المنصوره وسط الناس , أمي الله يرحمها سألتني رايح
فين ؟ قلت لها رايح ازور واحد صاحبي , اوعى يا محمد تكون رايح تقف في الثوره , الله
لا يسيئك , لا يا حبيبتي مستحيل طبعا , و دي كانت من المرات القليله جدا اللي كدبت
فيها على أمي .
.
نزلت ميدان المحافظه
مرتين , مره لوحدي و مره مع بناتي , في كل مره كنت بركن العربيه عند مستشفى التأمين
الصحي اللي في مدخل المنصوره و امشي على رجلي لحد المحافظه , مفيش مكان تمشي فيه عربيه
, الناس جايه من القرى و المدن , اللي جاي مواصلات و اللي جايب مراته و عياله في تريسكل
, كله رافع علم مصر , علم مصر و بس .
.
في رأيي الشخصي
ده أعظم مشهد في تاريخ مصر الحديث , يوم مارجعنا بلدنا المخطوفه , يوم ما قلبنا الترابيزه
على كلاب السكك ( اللي بره و اللي جوه ) .
.
وأخيرا , لكل خروف
و كل نعجه , عايز أقول كلمتين وربنا يشهد , انا واحد من الناس وعيت عالدنيا و كان عندي
اعتقاد راسخ إنكو مظلومين و مضطهدين و بتوع ربنا , لحد ما عرفت حقيقتكو في سنتين من
2011 ل 2013 , كرهتكو و قرفت حتى من سحنتكو , و في 30 يونيو قلت يغورو في ستين داهيه
, أما بقى بعد اللي حصل أخر 5 سنين و بعد ما مارستو كل انواع الخيانه و الانحطاط و
الإرهاب و القتل و الحرق و التخريب و التشويه و التزييف و الكدب و الفبركه بصوره يستعيذ
منها الشيطان ذات نفسه بقى انطباعي كالتالي , لو شوفتكو كلكو متعلقين على عمدان نور
في الشوارع هتصور جنبكو سيلفي و انا مبتسم .
.
مصر يا ولاد الأفاعي
عمرها ما هتكون جاريه في بلاط تنظيم صهيوني إرهابي دولي , ده على جثة أخر واحد فينا
, مصر الطيبه و الخير و الأمل و الوتد و المدد و الجرس و الأدان و حفان القمح , وانتو
الشر و اللعنه والدم و الخيانه و الوساخه و التجاره بكل شئ , حتى بدين ربنا , ملكوش
مكان فيها , لا هي في يوم كانت بلدكو ولا عمركو هتكونو ولادها .
...............................................................................................................
ليست هناك تعليقات:
إرسال تعليق