Mohamed
Hussein
5 يوليو 2018·
في بيتنا فساد
.
سيادة الرئيس عبد
الفتاح السيسي , ماتحاربشي الفساد يا ريس , سيبه زي ماهو كده , و الله لو سيبته الناس
هتحبك و تعزف لك عالربابه .
.
أصدقائي الأعزاء
, معلش , احنا مش هنحارب الفساد بقى , لأن الفساد ده حد جميل و احنا ماينفعش أبدا نحارب حد جميل .
.
طب ليه ماينفعش
؟ بص يا مولانا , ماهي أصل الحكايه عمرها ما كانت شعارات وبؤين محفوظين و تعيش حياتك
و انت مؤمن بالحاجه و عكسها , سبحان الله , لا سحر ولا شعوذه .
.
عايز تحارب الفساد
يا حماده ؟ هتستحمل ؟ قولي بس انك هتستحمل و انا أقولك حاضر و أمين , هتستحمل إيه بالظبط
؟ هقولك أنا بس توعدني انك تستحمل
.
- بص يا مولانا
, عندنا 6 مليون موظف حكومي في مصر صح ؟ طب تمام , نقول نصهم فاسد ؟ اعتقد كده نبقى
متفائلين أوي , بس خلينا نقول نصهم بس فاسد , نصهم يعني كام ؟ نصهم يعني 3 مليون ,
أوباااا , 3 مليون موظف يعني ايه ؟ يعني 25 مليون مستفيد , إزاي يعني ؟ ماهو كل موظف
له أب و أم و اخوات و زوجه و أولاد , بيستفيدو من فساده بشكل ما , بالمناسبه الفساد
بيشمل الرشوه و المحسوبيه و استغلال النفوذ و نهب المال العام و بيشمل كمان انك تزوغ
من شغلك الحكومي و تروح تمضي و ترجع عشان عندك شغلانه تانيه بره , و إنك تسيب شغلك
مرتين في الإسبوع عشان تعزي في خال الأستاذ عبد ربه اللي بيموت كل حد و خميس .
.
الكلام ده معناه
ايه ؟ معناه يا محترم ان الفساد ده في بيت حضرتك و حضرتها , ماهما الفاسدين دول مش
مخلوقات نازله من السما تمارس الفساد عندنا وترجع تاني , لا والله ناس من بيوتنا و
أهالينا و جيرانا , حضرتك مستعد لمحاربة الفساد حتى لو على أخوك و خالك و ابن عمك ؟
حضرتك مستعد لتطبيق قول سيدنا النبي ( لو أن فاطمه بنت محمد سرقت لقطع محمد يدها ؟
) , طبعا لا مش مستعد , أومال مستعد لإيه ؟ مستعد تدخل عالفيس كل يوم و تقول الفساد
منتشر و بيخرب البلد مع إنك ممكن ببساطه شديده يكون التابلت اللي بتكتب منه جابهولك
بابا من فلوس رشوه .
.
مانحاربشي الفساد
بقى , عارف ليه كمان ؟ هقولك برضه , عشان الموظفين اللي خدو
أرض الدوله من عشره خمستاشر سنه و بلّطو عليها أو نهبو مليارت من مال الشعب
لو جينا احنا نرجع الحاجات اللي نهبوها سواء كانت أرض أو فلوس لخزينة الدوله ( يعني
للشعب ) هتبقى الحكايه أشبه بعملية التأميم اللي عملها عبد الناصر ( مفيش فرق بين انك
تسرق أرض و فلوس أو انك تاخدهم منحه من مولانا المعظم جلالة الملك الصايع ابن الصايعه
) , طيب عبد الناصر مات من نص قرن و لسه الناس بتشتمه لحد النهارده , حتى أحفاد الكلافين
( اللي زي حالاتي ) فيهم ناس بتشتم عبد الناصر
!! .
.
يبقى علينا بإيه
وجع الدماغ ده , خلي الفساد زي ماهو ياريس , ماتوجعش دماغك ,
ليست هناك تعليقات:
إرسال تعليق