( محمد حسين - منوع ) ( 8 يونيو 2018 - 15 يونيو 2018 )

Mohamed Hussein

14 يونيو 2018·

مندوب روسيا في مجلس الأمن راح المجلس و هو لابس تي شيرت منتخب بلاده و معاه كوره في ايده !! .

.

ليه المسئولين عندنا مايعملوش كده ؟ ليه الحكومه لو عندها اجتماع الأيام دي مايحضروش الاجتماع و هما لابسين تي شيرت منتخب مصر , سواء كانو رجاله أو ستات ؟ ليه الاعلاميين و ضيوفهم كلهم بلا استثناء مايطلعوش عالهوا و هما لابسين تي شيرت المنتخب طول فترة البطوله ؟ ليه المضيفات في شركة مصر للطيران و موظفي المطارات مايلبسوش زي موحد عليه صورة المنتخب في كاس العالم ؟ ليه اتوبيسات و ميني باصات النقل العام و قطارات مترو الأنفاق مايتحطش عليها اللوجو بتاعنا و صورة اللاعيبه ؟

.

لعبنا في كاس العالم مش حدث بيتكرر بسهوله , و تشجيعنا و دعمنا لازم يكون بكل الأشكال و على كل المستويات .

................................................................................................................

Mohamed Hussein

13 يونيو 2018·

عبقرية الدراما في تجسيد الواقع و نشر الوعي و توصيل رسايل محدده .

.

فيه مشهدين مهمين جدا و مؤثرين وناس كتير رفضتهم و قالت ليه يحصل كده ؟ مشهد استشهاد صلاح الطوخي في مسلسل كلبش الجزء التاني و مشهد استشهاد ظابط الجيش في مسلسل نسر الصعيد .

.

طب المشاهد دي صح ولا غلط ؟ في رأيي الشخصي صح جدا , ليه بقى ؟

.

بص يا سيدي , مشهد اغتيال صلاح الطوخي وراه حسن النيه , نيته الحسنه خلّته يرحب بالإرهابي ( التائب ) و يقابله من غير تفتيش , عبقرية المشهد ده في التالي , اللي خطط للعمليه هو مصطفى عميل الموساد و تربية الصهاينه , طب فين العبقريه ؟ العبقريه انه عشان تربية الصهاينه بيفكر زيهم تماما و جت له فكرة ان احسن حاجه تلعب بيها عالمصريين هي العاطفه و حبهم للخير مهما كانو برتب كبيره .

.

مشهد صلاح الطوخي فيه حسن النيه (و استغلال الصهاينه و صبيانهم لكده ) و مشهد منصور ظابط الجيش ابن عم زين القناوي فيه الحماس الشديد المبالغ فيه , مع انه كان يقدر يضرب الإرهابي طلقتين تلاته كمان من بعيد بدل مايروح عنده و يتفجر بالحزام الناسف .

.

برضه ليه المشهدين صح جدا مع ان تصرفات الإتنين اللي استشهدو المفروض غلط و المفروض يكونو عاملين حسابهم ؟ هنا مربط الفرس و النقطه المهمه , فكرة التنظير و احنا قاعدين على مكاتب و مدلدلين رجلنا في ماية البيسين , عكس الظباط اللي في ظرف كام سنه كل واحد منهم خاض خمسين ستين عمليه قتاليه مع الجماعات دي , وارد جدا بعد عمليات طويله متواصله يحصل غلطه في عمليه , حتى لو كان سببها حسن نيه مبالغ فيه أو حماس زايد , المشهدين أقرب للواقع و أكيد فيه من أولادنا اللي استشهدوا بسبب من الاتنين اللي فاتو .

.

نقطة كمان في مسلسل كلبش و نسر الصعيد الناس مافهمتهاش , حكاية ان التضحيات في صفوف الجيش و الشرطه تبقى كبيره كده و اكبر من الخساير في صفوف الإرهابيين , برضه الكلام ده صح و أقرب للواقع ولا غلط ؟ لا صح جدا , ليه صح ؟ عشان المسلسل اجمالا بيبقى عايز يجمع احداث كذا سنه في 30 حلقه , يعني جرعه مكثفه , و عشان حاجه اهم , اسمها حجم التحدي الأمني , الضحايا الكتير في صفوف الجيش و الشرطه لا يعني ضعفهم , اطلاقا , انما بيعني ان حجم التحدي الأمني كان ضخم للغايه .

.

ازاي بقى ؟ هي الحسبه بتتحسب كده يا مولانا , انت في ظرف 5 سنين ماكنتش بتواجه ابراهيم الدوكش و سيد ابو ركبه و عصابه بتسرق الغسيل , انت كنت بتواجه تنظيمات و دول و مليارات الدولارات , كام ألف ارهابي ؟ و كام ألف طن أسلحه و متفجرات , و كام جهاز مخابرات لدول بنت وسخه ؟ و كام مليار دولار ؟ و كام فاسد و عبد للمال تم استغلالهم و الاستفاده منهم ؟ ده اسمه حجم التحدي الأمني , اللي هو أسقط دول كانت لها شنه و رنه زي سوريا و العراق و ليبيا و اليمن .

.

واللي كتبت عنه مره و قلت تخيّل , حاول تتخيل , عشرات الألاف من الإرهابيين و المرتزقه من جنسيات مختلفه , و مليارات الدولارات و ترسانات أسلحه و حدود طولها 1200 كيلو بتأمنها من جانب واحد , و شبكة أنفاق بحجم مدينه و اقتصاد ضعيف جدا , لو الحيثيات دي كانت بتواجه أمريكا في يوم من الأيام , بجيشها و شرطتها و تقدمها و تكنولوجيتها , او بتواجه روسيا , يا ترى كان حالهم هيكون ازاي في 2018 ؟! .

...................................................................................................................

Mohamed Hussein.

12 يونيو 2018·

ما بين شجرة الورد و برطمان الكوله

.

- اسمحولي أشرح لكو باختصار اللي موجود في فيلم كارما بتاع خالد يوسف , أه والله ممكن اقول لكو حكايته من قبل ماشوفه , و الحكايه لا فيها سحر ولا شعوذه ولا انا بقرا الفنجان و أوشوش الودع , الحكايه حكايه عقل , قواعد العقل , و أول قاعده فيه بتقول إن برطمان الكوله بيبقى مليان كوله و شجرة الورد بتطرح ورد , ده ببساطه شديده .

.

بص يا سيدي , من فتره كده و بالصدفه البحته شوفت عاليوتيوب فيلم مصري قصير مدته 7 دقايق , كل فريق العمل بتاعه عباره عن شوية مجهولين تماما من أول المؤلف للمخرج للممثلين اللي غالبا بيشتغلو تباعين على ميكروباصات السلام و النهضه .

.

بيقول ايه الفيلم المجهول اللي محقق مليون مشاهده ؟ هقولك أهو , المشهد الأول واحد نايم مع واحده في السرير , مشهد جنسي على كيف كيفك , إبداع في التمثيل لدرجة تحس ان المشهد ده بالذات حقيقي مش تمثيل !! , الواحد ده اسم الله على مقامكو بلطجي و الواحده طبعا لامؤاخذه ( أكيد مش عالمة ذره ) .

.

المشهد التاني , مولانا البلطجي بعد ما خلص المشهد الجنسي و وصلة الأهات سمع صوت في الحاره , خناقه تقريبا و نزل يتخانق و يتكلم بلغة المبرشمين و الشمامين , يا عم مانا بقولك بلطجي , هو انا قلت لك انه أستاذ في جامعة السوربون ؟ .

.

المشهد التالت صاحبنا البلطجي بيهرب و فيه ظابط بيجري وراه , الأكاده انه تقريبا مش ظابط شرطه عادي ده ظابط مخابرات أو ظابط أمن وطني مش فاكر , و بيجري ورا واحد بلطجي بتاع نسوان ليه ؟ والنبي يابني ماعرف , اسأل الصايع اللي كتب الهري ده .

.

المشهد الرابع البلطجي بيهرب من الظابط الغبي جدا و بيقف على شط بحر و بيلعن أبو دولة الظلم اللي ماقدّرتش مواهبه الدفينه و ظلمته , اه و عهد الله زي مابقول لكو كده .

.

و بس يا سيدي , أدي كل حكاية الفيلم القصير اللي انا مش فاكر اسمه , تطلع منها بايه بقى ؟ ان مصر بلد بلطجيه و عاهرات و خناقات ليل و نهار , وان البلطجيه دول مظلومين و محدش مقدر مواهبهم , و ان ظابط الشرطه و ظابط الجيش أغبيا , و اننا عايشين في دولة الظلم , دولة الزولم .

.

ده الفيلم القصير و اللي بيعمله خالد يوسف هو نفس الحكايه بالظبط بس على طويل , فين بقى الإبداع ؟ ابقى تعالى و انا اقولك فين , ولا أقولك ماتجيش , يابني مفيش ابداع ولا بطيخ , فيه برطمان كوله لما تفتحه هتشم ريحة الكوله مش ريحه تانيه .

.

و حيث إن الشئ بالشئ يذكر , و إن الأشياء بتُعرف بعكسها , ده فيديو عاملاه قناة أبو ظبي الإماراتيه , عن مصر و وصولها لكاس العالم , فيديو بيتكلم عن مصر في عيون الإماراتيين , بيوصف بلدنا من شرقها لغربها و من ساسها لراسها , بعد ماتشوف الفيديو ممكن تسأل نفسك سؤال وجودي مهم جدا , هي الوساخه في مصر ولا في عقول الأوساخ ؟ يعني المشكله في البلد ولا في العين اللي بتشوفها ؟ الإجابه طبعا معروفه , و قناعتي التامه بتقول , إن العلم اتقدم أوي , بس لحد دلوأتي العلماء ماتوصلوش لفكرة إنهم يزرعو برطمان كوله في شوية تراب و يسقوه مايه تقوم تطلع شجرة ورد !! .

https://www.facebook.com/LiverPoolInEGYPT/videos/197732180866843/

..................................................................................................................

Mohamed Hussein

12 يونيو 2018·

فقط في مصر

.

كنيسه غرب الأقصر تعزم المسلمين عالفطار في رمضان , و المغرب يأدن في قلب الكنيسه !! .

.

و من كام يوم في صلاة الفجر اللي بتتذاع عالهوا ( كانت في الجامع الازهر أو في سيدنا الحسين تقريبا ) , الإمام في الركعه التانيه بيدعي , اللهم احفظ مصر و أرضها و جيشها و شرطتها و مساجدها و كنائسها !! .

................

................

الفتنه الطائفيه أسقطت 3 دول كانو في منتهى القوه , دمرت جيوشهم و بنيتهم التحتيه و حولتهم لأثر بعد عين , سوريا و العراق و اليمن , و نفس الفتنه الطائفيه حاولو فيها مع مصر بكل قوه من أول 2011 ( ومن قبلها ) بس فشلو , ليه فشلو ؟ عشان البهايم مايعرفوش إننا بلد ملهاش كتالوج , بلد ماينفعش تلعب في هويتها و جيناتها .

.

مشهد شيخ الازهر و بابا الكنيسه في يونيو 2013 مع وزير الدفاع مكانش مشهد اعتباطي , ولا مشهد هزلي ولا ضيوف تم اختيارهم بشكل عشوائي , ده مشهد عبقري , عمدان مصر التلاته يا مولانا , اللي لازم تشوفهم واقفين انتباه جنب بعض في وقت الخطر, الجيش و الأزهر و الكنيسه .

..............................................................................................................

Mohamed Hussein

12 يونيو 2018·

عندنا في مصر رقابه على المصنفات الفنيه بما فيها مسلسلات رمضان , و ده طبيعي و منطقي , لأن مفهوم الدوله بيختلف تماما عن مفهوم ( جُرْن الهبله ) .

.

اللي متابع من حضراتكو مسلسل كلبش الجزء التاني هيلاقي مشاهد كتير جدا لاتهامات واضحه وصريحه لتركيا و قطر و الكيان الصهيوني , بما في ذلك مكاتب عليها علم اسرائيل و علم تركيا و اتصالات مباشره بعملائهم و صور خليفة الشواذ و شتيمتهم و شتيمة صبيانهم بأوسخ الألفاظ , المشاهد دي كانت مستحيل تتذاع بدون موافقات أمنيه و سياديه و هنا الموافقة بتعني اتهامات صريحة من الدوله المصريه للدول و الدويلات التلاته بمسئوليتهم عن الإرهاب و عن خراب المنطقه .

.

الدراما لها دور كبير جدا مش بس في نشر الوعي و الإدراك عند الشعوب , إنما كمان لها دور في تمرير رسائل سياسيه

.

و الكلام ده برضه معناه اننا وصلنا لمرحله معينه من الإستقرار السياسي و الأمني ( و الإقتصادي ) بحيث نقدر نحط صباعنا في عين ولاد الوسخه و بشكل علني .

..............................................................................................................

Mohamed Hussein

11 يونيو 2018·

هنوصل دور ال 16 بإذن الله , دي قناعتي , و هنشوف فريق مختلف تماما عن اللي شوفناه في الماتشات الوديه , صلاح و تريزيجيه هيعملو الفارق معانا و عبد الله السعيد أكيد هيفوق , كل لاعب في الفريق عارف ان الماتشات دي مش هتتنسي لمدة عشرين تلاتين سنه جايين , مطلوب منهم التركيز و اللعب الجماعي مش اكتر من كده .

.

بإذن الله هنكون مفاجأة البطوله , و صلاح اللي اتحرم بفعل فاعل من التتويج بلقب دوري أبطال أوروبا ربنا هيعوضه بلقب هداف كاس العالم .

.............................................................................................................

Mohamed Hussein

11 يونيو 2018·

مشاهد عبقريه في الجزء التاني من مسلسل كلبش

.

- مشهد صلاح عبد الله و دوره , أبو الجاسوس مصطفى , اللي كان نفسه يشوف ابنه مقتول قبل مايموت , و اللي في جنازته محدش حضر غير اتنين ظباط ( عشان الراجل ده ملوش ذنب ) , و مرات مصطفى اللي بلغت عن مكانه و نفسها تشوفه مسجون او مقتول .

بنحارب إرهاب و مؤامره و طوفان , و عندنا عالمستوى الرسمي معاهدة سلام مع اسرائيل لكن على المستوى الشعبي تبقى اسرائيل هي الكيان الصهيوني المغتصب , و قمة العار انك تشتغل لحسابه .

.

- مشهد جوازات السفر اللي مع عاكف , قطري و تركي و بريطاني , و ذكر الدول بأسمائها , و انها جوازات سفر حقيقيه مش مضروبه لانه راجلهم أو الخاين بتاعهم .

- مشهد رجل الاعمال الخاين الفاسد اللي عنده جرايد و قنوات معارضه و بيقول انه لو اتعرض لاي مشكله الناس مش هتسكت لا جوه ولا بره و هيقول كمان انهم بيغتالوه معنويا !! ( جملة بيغتالوني معنويا دي بيكررها كل الصيع و الخونه من سنين , كارت و بيلعبو بيه ) .

.

- مشهد الإرهابي و هو بيوصي عاكف انه ينشر عالسوشيال ميديا انهم مختفيا قسريا !! , برضه جملة مختفي قسريا كانت كارت بيلعب بيه الصيع و جمله تتقال على كل واحد هرب من بيته عشان يروح ينضم للإرهابيين سواء جوه مصر أو براها , دي اسمها الوساخه المركّبه , تروح تشتغل ارهابي و تقتل في جنود بلدك و البلاد العربيه و في النهايه تحاول تعمل نفسك بطل و تتهم أجهزة الدوله الأمنيه بانها مخبياك و مش مخليه حد عارف يوصل لك , ده طبعا على أساس ان الدوله اللي سجنت اتنين رؤساء و وزرا و قضاه و رجال اعمال مليارديرات بتخاف لما تقبض على عيل صايع بيشتغل صبي فرارجي و خايفه من رد فعل المعلم صاحب محل الفراخ .

.

كل التحيه لمؤلف المسلسل و لكل فريق العمل على إبداعهم و اجتهادهم و نشرهم للوعي .

.........................................................................................................

Mohamed Hussein

10 يونيو 2018·

لما حبو يكرمو محمد صلاح في انجلترا حطو الكوتشي بتاعه في المتحف و اتعاملو معاه على إنه قطعه أثريه ملهاش أي تمن يقدرها .

.

بالنسبه للاعب الكوره الكوتشي اللي بيلبسه و ينزل بيه الملعب و يلمس بيه الكوره و يجيب بيه الجون هو كل حياته , و قمة الشياكه بالنسباله انه يلبس البدله على كوتشي , ماينفعش تكون كل معلوماتك عن الشياكه هي صوره بورتريه راسمها في خيالك لمندوب مبيعات في شركة الهلال و النجمه الذهبيه و تتخيل نفسك كبير خبراء الأزياء و الموضه في باريس و ضواحيها .

.

اه بالمناسبه الواد اللي لوحده في الصوره التانيه اسمه كرستيانو رونالدو , نجم ريال مدريد و منتخب البرتغال و أحسن لاعب في العالم , مش احسن مندوب مبيعات في شركة الهلال و النجمه الذهبيه .

.........................................................................................................................

Mohamed Hussein

9 يونيو 2018·

الريس قابل بعثة المنتخب لمدة ساعه كامله قبل ما يسافرو , كلّمهم عن الحلم , حلمهم و حلم 100 مليون وراهم , لما يكون وراك 100 مليون بيشجعو و يدعو لك طول الوقت يبقى مطلوب منك انك تجتهد و تاكل النجيله و تشيل سقف أحلامك ترميه .

.

السيسي قال لمحمد صلاح ان صحته اهم من اي حاجه , و صلاح أكد للريس انه هيكون جاهز للمشاركه و الحلم .

.

صورتهم هما الاتنين مع بعض و صلاح مبتسم أكيد هتحرق قلوب ناس كتير من الخونه و الأنطاع و الشمامين اللي هاجو في حكاية اتحاد الكره و شركة الرعايه و حاولو بكل الطرق يصوّرو المشهد على انه كراهيه من صلاح لبلده , الأنطاع بيوجعهم اوي انه يكون فيه شاب مصري عالمي عاشق لبلده , لا الشهره غيرته ولا النجوميه ولا المليارات , بيوجعهم انه يكون فيه رمز نضيف و قدوه حقيقيه لملايين الشباب و الأطفال .

.....................................................................................................................

Mohamed Hussein

9 يونيو 2018·

شوفت 15 حلقه من مسلسل رحيم و بطّلت , الحقيقه السيناريو ضعيف جدا للغايه , و الأدوار سيئه خصوصا دور حسن حسني و دينا و محمد رياض و الواد اخو رحيم و مراته و امها , معرفش اختيار غلط للممثلين ولا ضعف سيناريو حاول معاه الممثلين يجمّلوه بأدائهم فطلع الأداء أوفر جدا و فيك , المسلسل ده اتعمل بطريقة سلق البيض و تجميع حتت على بعض و اختراع أدوار .

.

مسلسل نسر الصعيد معقول جدا من كل الجوانب , السيناريو و الأداء و الإخراج و اختيار الممثلين , و يمكن مشكلة محمد رمضان الوحيده بتكون في تصريحاته و كتاباته على مواقع التواصل , هو شبه شيرين عبد الوهاب كده ( لما بيتكلم بيعجن ) , مع الأخذ في الاعتبار انه في نسر الصعيد بيلعب دور ظابط شرطه وطني غيور على مهنته و بلده و ان الخرفان و الشمامين أكيد عاملين حمله لتشويهه .

.

أما مسلسل كلبش 2 فكنت مش بشوفه من اول رمضان وبدأت اشوفه , تابعت 5 حلقات و اقدر اقول انه مسلسل فخم بمعنى الكلمه , يستاهل انه يكون الأعلى مشاهده , المؤلف و السيناريست عاجبني جدا و المخرج و الممثلين , المسلسل شرح حاجات كتير كانت بتغيب عن الناس , و حاجات يمكن اتكلمنا عنها هنا , زي علاقه الارهاب بتجارة المخدرات و السلاح و البلطجيه و ليبيا و السبوبه و العيال الصيع اللي بيربو دقنهم و يقولو قال الله و قال الرسول و يعيشو في الدور , و نشطاء حقوق الانسان والخونه اللي بيبقى معاهم جنسيات اجنبيه , حتى الجنسيه الصهيونيه .

.

الدراما اجمالا بتكون جزء من التاريخ , اللي بيتعمل النهارده هيبقى تاريخ بكره , و الدراما و السينما بيكون دورهم في نشر الوعي أهم بكتير من ألف صحفي و ألف إعلامي , و معنى ان كلبش 2 و نسر الصعيد يكونو الأعلى مشاهده يبقى الناس فهمت و فاقت من الغيبوبه .

.

مش كل ظباط الشرطه محترمين و وطنيين لكن الغالبيه الكاسحه كده و اللي يغلط ينضرب بالجزمه عشان مايبقاش عار على زمايله اللي بيضحو بحياتهم و راحتهم عشانا , مبقاش حد فوق القانون , الكارثه الكبري كانت في التعميم , و انكار انه زي مافيه ظابط فاسد او مجرم او بيتاجر في المخدرات أو أو , فيه طبيب فاسد و صيدلي فاسد و مدرس فاسد و مهندس فاسد , الحمد لله الناس فاقت و ماوقعناش في الفخ .

.......................................................................................................