Mohamed
Hussein
21
يونيو 2018·
عشان تعرفو احنا
مؤثرين قد ايه ؟ الدستور الأرجنتيني اتغير من كام يوم و تم اعتماد ماده دستوريه بتقول
إن خطة اللعب في عموم البلاد هي أرنابيطا زوراتوس.
.........................................................................................................
Mohamed
Hussein
21
يونيو 2018·
فيه فرق كبير جدا
بين الطيبه و حسن النيه و بين السذاجه و الحموريه , لما تنضرب قلم على سهوه أو تنخدع
مره تبقى طيبه و حسن نيه إنما لما تنضرب 19000 قلم بنفس الطريقه و ورا بعض تبقى سذاجه
و حموريه .
.
اللي خطط لليله
بتاعة الشرق الأوسط أكيد مش متفاجئ باللي حصل في اخر 7 سنين , هو لعب على وتر ان جزء
كبير من شعوبنا العربيه بيعشق الغباوه زي عنيه أو زي عيل من عياله .
.
المستعمر الجديد
مابيختلفش اطلاقا عن المستعمر القديم , الإتنين لعبو على نفس الوتر ,عارفين إن أخرنا
نقطة ضعف و شوية إشاعات و مصطلحات براقه يودونا و يجيبونا و يهشتكونا و يشألبونا.
.
زمان نابليون بونابرت
لما دخل مصر قال لمساعديه ايه اكتر حاجه ممكن نضحك بيها عالناس اللي هنا ؟ قالو له
الدين , قال لهم طيب انشرو في البلاد خبر إني أعلنت إسلامي , و هوبا نابليون بونابرت
أسلم , هوبا بدأت الناس تحبه , هوبا يا دين النبي , ايه الحلاوه دي .
.
المستعمر الجديد
لعب عالشعوب بإسم الحريه و الديموقراطيه ( نقطة الضعف التانيه ) , و يا سيدي لو مانفعتش
لعبة الحريه و الديموقراطيه أهو الدين لسه موجود برضه , بلاها ناديه خد سوسو , و فجأه
يا مؤمن تلاقي حرب سنيه ضد الشيعه ولاد الحرام بتقودها الولايات المتحده الامريكيه,
اه و عهد اللي زي مابقولك كده , يابني هو مش نابليون بونابرت أسلم و بقى إسمه علي ؟
يبقى باراك أوباما هو خليفة المسلمين السنه , دي حاجه معروفه زي سلامو عليكو عليكو
السلام .
.
الغريبه انك لما
تجيب واحد من المساطيل و الصيع دول و تقوله انت حمار و مركوب من 7 سنين و عمال تردد
في إشاعات مايصدقهاش عيل في تالته ابتدائي , يقولك فشر , دانا أينشتاين بس وداني هي
اللي طويله شويه .
.....................................................................................................................
Mohamed
Hussein
21
يونيو 2018·
عقلك في راسك ولا
في راس ابن خالتك ؟
.
الناس اتجننت أقسم
بالله , و أصعب حاجه في الدنيا إنك تضطر تشرح لواحد تركيبة دوا فيها حته هيتيروسايكليك
و حته أليسيكلك و حته أورجانيك و حته مش أورجانيك و هو أصلا مش عارف رمز الصوديوم ايه
!! .
.
من كام يوم في
مناقشه مع صديق عزيز اخوانجي قالي بالنص كده , الكوره أصلا حرام و محدش شاطر في الكوره
غير الدول المتخلفه , انما الدول المتقدمه مابتلعبش كوره , أه و عهد الله , و في نفس
ذات القاعده كانت الجمله بتاعة السيسي أمه يهوديه و أردوغان مسلف فلوس لصندوق النقد
الدولي , هو يتحمس و يقول و عروقه تبان و انا ابتسم و أقوله تشرب ايه ؟.
.
صديقه عزيزه جدا
شافت ان كلامي عن مستوى روسيا في الكوره من كام يوم و اننا نقدر نفوز عليها و بعد الماتش
لما قلت قدر الله و ماشاء فعل , إني كده كنت ببرر و دلوأتي بزمر , طب أرد أقول ايه
, اشرح ايه لناس مش عارفه أبجديات الحياه و الأمل و الأماني و أبجديات تشجيع فريق في
الكوره , طب خلاص يا خالتي ماتزعليش نفسك , بما اني كنت متحمس و متوقع نفوز على روسيا
و مافوزناش فانا عقابا ليا و عشان ماكونشي بطبل و بزمر هجيب موس و أشرّح راسي أو هرمي
نفسي تحت أتوبيس سياحي فاخر .
.
عيل صايع برياله
نشر اشاعه ان محمد صلاح اتخانق مع المسئولين عن بعثة المنتخب و لعن جدود اللي خلفوهم
و الإشاعه انتشرت زي ماكل اشاعه عبيطه بتنتشر, و لما صلاح نفسه كتب بإيده ان مفيش اي
حاجه صح من الكلام ده ظهر الأشاوس يردو على صلاح و يقولو له مين قالك تكتب كده ؟ انت
بتنفذ التعليمات ؟ هههههههههه فهل أغروه ؟ فهل هددوه ؟ .
.
و أخيرا , قالك
ايه بقى ؟ خير اللهم اجعله خير إن هاشتاج ارحل يا سيسي بيتصدر تويتر , قلبي الصغير
لا يحتمل , ياهبل يابن الاهبل , صافيناز لو اعلنت ترشحها للرئاسه على تويتر هتفوز باكتساح
في الانتخابات الروسيه والمصريه في نفس واحد , يعني هتكسب بوتين و السيسي و هي قاعده
بتشرب سيجاره في الأنتريه , انا ذات نفسي هنتخبها على تويتر و أقول لها انت الفارس
و انت الحارس و انت مفجّر ثورة مارس , طب مش يمكن لما صافيناز تنجح نلاقي الصدر الحنين
؟! ليه لأ ؟ يا سيدي تاخد فرصتها و لو مانفعتش اهي غاده عبد الرازق موجوده , قصدي الميدان
موجود .
.........................................................................................................................
Mohamed
Hussein
20
يونيو 2018·
رسميا المغرب و
السعوديه و مصر خارج المونديال , العرب حققو رقم مميز جدا و انجاز تاريخي في المونديال
ده , ايه هو الرقم المميز و الانجاز ؟ ماهو الكلام اللي فات يابني , إن أول 3 منتخبات
تغادر المونديال على الإطلاق هي المنتخبات العربيه , انجاز ده ولا مش انجاز يا متعلمين
يا بتوع المدارس ؟
.
طب ليه كده ؟ ليه
العرب بيلعبو في كاس العالم و كأنهم فراخ بيضا مفرهده و مجمده و ميته اكلينيكيا ؟ مممممممم
بص عشان نجاوب عالسؤال ده محتاجين قاعده طويله و نجيب حلة محشي من الحجم الكبير و نقعد
نفكر في الحل , ناكل محشي و نفكر و ناكل و نفكر , و في النهايه و بعد تفكير عميق مانلاقيش
حل في دماغنا ولا نلاقي محشي في الحله .
...............................................................................................................
Mohamed
Hussein
20
يونيو 2018·
لو سمحت لو سمحت
- نعم يا حبيبي
؟
.
ظباط الشرطه و
الجيش مرتباتهم بتزيد كل يوم تلات .
- ها ؟ و ايه كمان
.
.
و سد النهضه خزن
المايه عشان كده منسوب النيل قل و التماسيح و الديناصورات ظهرت في شوراع مدينة نصر
.
- ممممممم ايوه
انا اصلا جيت من البيت للشغل و انا راكب ديناصور بس ابن الحرام مكانش مشغل العدّاد
.
.
و مره كنت مسافر
في ميكروباص و أمين شرطه وقفنا في الكمين و طلع طبنجته و ضربنا كلنا بالنار بس انا
بقيت احسن دلواتي .
- ألف حمد الله
على سلامتك يا حبيبي .
.
و السيسي اصلا
اخوان لكن امه يهوديه .
- ايوه و له عمه
بوذيه بس تخينه شويه .
.
و مصر هتعلن افلاسها
نهاية 2016 .
- صح و هنشحت عالقهاوي
كلنا .
.
و مفيش ارهاب في
سينا ولا حاجه دي فزاعه عاملها النظام .
صح مفيش ارهاب
.
.
لا بقى فيه ارهاب
بس احنا مش عارفين نحاربه .
- صح مش عارفين
نحاربه .
.
لا فيه ارهاب و
عارفين نحاربه بس تنمية الانسان اهم .
- صح تنمية الانسان
اهم .
.
و الأستاذ خالد
علي لولا الدوله الفاشيه وقفت في طريقه و منعته من الترشح كان هيكتسح الانتخابات و
يزنزن الزنازين .
- صح يزنزن الزنازين
, كلمني أكتر عن الحب .
.
واااااا
- لو سمحت يا حبيبي
, هو انا ممكن أمشي ؟
.
اه ممكن , ولا
اقولك استنى
- خير , فيه ايه
تاني ؟
.
خد الحته دي
- طب هات .
.
بيقولك محمد صلاح
انفعل على المسئولين عن بعثة المنتخب بسبب وجود فنانين و اعضاء برلمان و مشاهير في
الفندق , و لعن جدود ابوهم و قال لهم ده مستحيل يكون معسكر كاس عالم , ده مش محصل مركز
شباب , يا بهايم يا بهايم .
- ايوه حصل , و
راح جاب دبابه و داس عليهم كلهم , ممكن أمشي بقى ؟
.
عايز تمشي ليه
؟ هتروح فين ؟
- مفيش , أصلي
حابس أسدين في اوضه الفيران و حابس معاهم هتلر و موسوليني و أبو لهب و ريهام سعيد
, و عايز أروح اشوف مين فيهم اللي خلص عالتاني .
.............................................................................................................
Mohamed
Hussein
20
يونيو 2018·
بهدوء
.
البطولات مابتنتهيش
, بتخلص بطوله و تيجي وراها بطوله , عندنا بعد كام شهر امم أفريقيا , و بعدها بكام
شهر تصفيات كاس العالم , هنحلم تاني , لو بطلنا نحلم نموت .
.
فيه منتخبات كبيره
جدا ماوصلتش كاس العالم بتاع روسيا , زي ايطاليا و هولندا , و منتخبات كبيره جدا مش
هتوصل دور ال 16 غالبا , زي الأرجنتين و بولندا و احتمال ألمانيا .
.
صادفنا سوء حظ
في ماتش أورجواي لما دخل فينا جون في الدقيقه 90 , و سوء حظ لما دخل فينا اول جون بخطأ
دفاعي في ماتش امبارح , بس المغرب دخل فيها هدف عكسي في الدقيقه 94 و خسرت 3 نقاط قدام
ايران , و تونس عملت ماتش العمر قدام انجلترا و اتغلبت في الدقيقه 90 , بلاش نتكلم
كتير عن سوء الحظ لأننا لما نلعب في بطولة كبيره المفروض نكون مستعدين لكل الاحتمالات
.
.
لاعيبه مصر مش
وحشين , بالعكس , كانو ممكن يعملو نتايج افضل من كده بكتير , مشكلتنا الأبديه في طريقة
لعب كوبر , الدفاع العقيم , الطريقه اللي اتلغت من كتب كره القدم من 30 سنه , الطريقه
اللي ممكن بالزق توصلك نهائي بطولة أفريقيا لكن في كاس العالم يبقى من الحماقه انك
تلعب بيها , هقول تاني , ده مش عيب لاعيبه , ده عيب طريقة لعب , انت بالظبط عامل زي
الملاكم اللي بينزل مستسلم و رامي قفازه و واقف في ركن الحلبه و كل خطته و فكرته هي
انه يحمي وشه طول المباراه , صلاة النبي احسن .
.
هيكتور كوبر مشكور
انه صعد بمنتخب مصر لكاس العالم , لكن و الله و الله كنت اتمنى اللي يمسك المنتخب قبل
المونديال واحد زي حسن شحاته او حسام حسن , بيعرفو يخلو للفرقه شكل هجومي , خصوصا في
البطولات المجمعه اللي فيها فترة اعداد كويسه , و بيعرفو يزرعو روح التعاون و الحماس
بين اللاعيبه .
.
ألف شكر هيكتور
كوبر , متشكرين جدا , بس مع السلامه , لاعيبه مصر في 2006 و 2008 و 2010 مكانوش أفضل
بكتير من الموجودين حاليا لكن كان لهم شكل و طعم و لون , مكانوش بيقعدونا على اعصابنا
طول الماتش حتى لو بنلاعب جزر القمر زي مانت بتعمل , كان فريق له هيبه و دي مش سببها
اللاعيبه انما طريقة اللعب .
.
اكتر حد اتظلم
على الاطلاق و حظه كان سئ للغايه هو نجمنا محمد صلاح , اتظلم مرتين , مره لما أصيب
عمدا على إيد الحيوان راموس , و مره لما لقى نفسه بيلعب في فريق بطريقة دفاعيه عقيمه
عكس لعبه في ليفربول , صلاح كانت قدامه فرصه كبيره جدا ان المونديال ده يقرّبه من البالون
دور , لو كان سليم و لعب من اول ماتش و بطريقه هجوميه كان عمل اللي محدش يعمله , انما
معلش يابو صلاح , ان شاء الله تفوز بيها , لو مكانش السنادي يبقى السنه الجايه , اوعى
تبطل تحلم .
.
.....................................................................................................
Mohamed
Hussein
19
يونيو 2018·
طب الحل ايه ؟
الجزء الأول .
.
قطمه أحسن من نحته
, و قطع العربيه الخربانه لازم تتصلح كلها مع بعض في نفس التوقيت .
.
البوست ده ممنوع
على الساده أصحاب القلوب الضعيفه , و الساده بتوع ( خُلقنا لنعترض و نصلح ولاعات )
و الساده بتوع ( هذا ما وجدنا عليه أباءنا ) و الساده بتوع ( أنا و من بعدي الطوفان
) .
.
ايه اكتر حاجه
تاعبه الناس في حكاية رفع الدعم و زياده الأسعار ؟ أكتر حاجه هي احساسهم بالظلم , و
ان الغالبيه الساحقه من الشعب بيدفع فاتورة أجيال فاتت و في نفس الوقت بيلاقي غيره
عايش في الفخفخينا .
.
ايه الحلول بقى
اللي لازم تاخدها الحكومه في نفس التوقيت و نضرب كذا عصفور بحجر واحد و نتخلص من كذا
حقل ألغام من حقول التركه الهباب ( ماهي أكيد مش أمي الله يرحمها اللي حكمت مصر 30
سنه و جابت دورفها ) .
.
نفكر بهدوء كبني
أدمين بيتكلمو في المصلحه العامه ( مصلحة الجماعه مقدمه على مصلحة الفرد ) , ايه الحل
؟
.
1 - الحكومه تعمل
للأسره المصريه زي مابتعمل لها بالظبط , ازاي يعني ؟ مش هما بيرفعو الدعم عشان يوفرو
ربع ميزانية الدوله اللي كان طاير في الدعم ؟ صح , يعملو لنا نفس الشئ , لأن ربع ميزانية
الأسره المصريه طاير في الدروس الخصوصيه , مفيش بيت في مصر مش بيصرف ألف و اتنين و
تلاته عالدروس , طب الحل ؟ قرار رئاسي بتجريم الدروس الخصوصيه و سجن المدرس و ولي الأمر
اللي يعملو كده .
.
طب المدرس نعوضه
ازاي ؟ نعوضه بزيادة المرتب الأساسي بقيمة 2000 جنيه , و يبقى مرتب المدرس 4000 جنيه
فما فوق ( الحكايه دي تكلف الدوله 10 مليار جنيه سنويا , مبلغ عبيط , اقل من 1 % من
ميزانية مصر ) .
.
انا شخصيا موافق
جدا اشتغل مدرس ب 4000 جنيه لمدة 7 ساعات يوميا و يومين اجازه , و عزة جلال الله موافق
, و انا شخصيا اول شخص هيستجيب لقرار الدوله بتجريم الدروس الخصوصيه , أه و الله ,
طب الطلبه اللي مش بيفهمو من مدرس المدرسه ؟ هنعمل لهم قنوات فضائيه مخصوص في ماسبيرو
مخصصه للتعليم من أولى ابتدائي لتالته ثانوي وفي كل المواد و بنفس جدول الحصص بتاع
المدرسه و نجيب حوت الكيميا و جهبذ العربي و اخطبوط الساينس يشرحو في التلفزيون .
.
المدرس مش مكفيه
4000 راتب شهري أول تعيينه ؟ يطلع بعد الشغل يشتغل مهنه تانيه بعيد عن التدريس و التعليم
و يحسن دخله زي ماكل الناس بتشتغل شغلتين و تلاته , طب مش موافق و هيدي دروس غصب عن
دماغ التخين ؟ تتقطم رقبته .
.
الحكايه دي هتوفر
ايه ؟ هتوفر أكتر من 100 مليار جنيه لجيوب المصريين , كل بيت هيوفر ألف و اتنين يشتري
بيهم اكل و شرب و يستعين بيهم على غلاء المعيشه .
.
بس أصل الدكتور
بيشتغل في مستشفى الصبح و عياده بالليل اشمعنى المدرس بقى ؟ ده اسمه هبل و هطل , عشان
البني أدم بيتعب 8 الصبح و 4 العصر و 12 بالليل , لازم طول الوقت يلاقي دكتور , لكن
مفيش طالب بيتزنق في معادلة كيميا وش الفجر و لا تقف معاه مسألة حساب ولازم يحلها بعد
المغرب .
.
المدرس كمان لو
اتطبق قرار زي كده هيتعفي من انه يدي لولاده دروس , و بالتالي هيوفر على نفسه ألف و
اتنين .
.
بوست الحل محتاج
يكون على جزئين تلاته , انا مواطن مصري بيفكر بشكل مطلق بعيد عن أي مصالح شخصيه , مش
خبير ولا حاجه , بفضفض معاكو , و الله من وراء القصد .
....................................................................................................................
Mohamed
Hussein
18
يونيو 2018·
العرب معمول لهم
عمل في كاس العالم , عرب أفريقيا تحديدا , و العمل مربوط على عقرب الساعه بتاع الدقيقه
90 , مصر تخسر من أورجواي 1/0 في الدقيقه 90 , المغرب تخسر من إيران 1/0 في الدقيقه
94 , تونس تخسر من انجلترا 2/1 في الدقيقه 90 .
.
محتاجين عفاريت
شبراخيت كلهم يسافرو روسيا فورا و ياخدو معاهم مرتضى منصور عشان نلاقي حل للمشكله دي
, اهو عالأقل يوقفو عقرب الساعه عند الدقيقه 89 و بعدها أضمن لكو إن نهائي المونديال
هيكون بين مصر و تونس .
...........................................................................................................
Mohamed
Hussein
18
يونيو 2018·
مين اللي أكل الجبنه
؟
.
هو قرار زياده
سعر البنزين ده مفاجئ ؟ لا خالص , دي سياسه ماشيه عليها الدوله من سنتين , رفع تدريجي
للدعم على الوقود و الكهربا لحد مانوصل لرقم صفر في الدعم , طب ليه ؟ عشان نوفر في
ميزانية الدوله مبلغ محترم , أكتر من 200 مليار جنيه , هنعمل ايه بالفلوس دي ؟ أكيد
هنستخدمها في بنية تحتيه و تعليم و وصحه و علاج مشاكل متراكمه , مش هنشتري بيها بمب
العيد , طب هو نرفع الدعم تدريجي و نوفر مليارات ولا نوفر مصانع و فرص عمل الأول و
بعدين نرفع الدعم ؟ اهي دي قصة البيضه الأول ولا الفرخه , و احنا عشنا 30 سنه بمبدأ
إن الفرخه الأول لحد مالفرخه كانت قربت تموت و قطعت البيض .
.
عبد الناصر هو
السبب في الليله دي ؟ لا والله يا محترم , عبد الناصر مات من نص قرن و ماكتبش وصيه
ملزمه للي بعده انهم يعملو زي ماعمل و إلا هيطلع من قبره و يغزهم بالمطوه , عبد الناصر
كان له توقيت معين و ظروف معينه و عدد سكان معين يسمح بكده و في نفس الوقت كان بدأ
في قاعده صناعيه محترمه , فيه بقى اتنين حكمو مصر بعده لمدة 40 سنه , ماتعرفش القاعده
الصناعيه دي راحت فين و قراراتهم كانت ايه ؟ معقوله كانو مترددين ياخدو قرارات حاسمه
عشان خايفين من عبد الناصر في قبره ؟!.
.
الناس تعبت من
الغلا و المعيشه و اللي واللي ؟ أه تعبت جدا , الناس جابت جاز , الناس بقت بتكح تراب
و انا منهم , الطبقه المتوسطه أوشكت على الدخول في زمرة ( لا يسألون الناس إلحافا
) , و ( يحسبهم الجاهل أغنياء من التعفف ) .
.
طب بيعملو ايه
؟ كاتمين صرختهم و صابرين , رابطين الحزام و صابرين , صابرين عالسيسي ؟ لأ , صابرين
عالبلد , على ظروف بلدهم , اعتبرنا نفسنا زي الأجيال بتاعة 67 و 73 و حرب الإستنزاف
لأننا فعلا في حالة حرب , حرب على الإرهاب و حرب على الفساد و التركه الهباب .
.
طب برضه ليه صابرين
عالسيسي ؟ ممممممممم بالنسبالي انا شخصيا و لناس كتير اوي , عشان فيه كلمة سر , كلمة
السر مش بس الأمان و البلد اللي كانت مخطوفه و رجعت لنا , كلمة السر مش بس نجاحه في
الحرب على الإرهاب اللي أسقط دول كان لها شنه و رنه , كلمة السر الأهم في الموقف ده
هي باختصار شديد جدا , إنه مش حرامي , السيسي مش حرامي , شهاده هيشهد بيها اعداؤه قبل
أصدقاؤه , الراجل ده مش حرامي ولا لامم حواليه شلة منتفعين و زلنطحيه زي اللي سبقوه
.
.
طب ايه الحل و
هل فيه حلول ؟ أه كتير اوي , بس كلها حقول ألغام لازم ندوس فيها بقلب جامد , العربيه
لازم تمشي بكل إجزائها في نفس الوقت و نفس الإتجاه , حلول تحت عنوان ( قطمه أحسن من
نحته ) , و اهي كلها تركة مولانا الهباب , احنا مش أسفين يا مولانا , و عهد الله مش
أسفين .
.
فين الحلول ؟ البوست
الجاي بإذن الله لو كان لنا عمر , حلول و اقتراحات من مواطن مصري بسيط , لا خبير اقتصاد
ولا ساحر وبيمشي عالحيط .
......................................................................................................................
ليست هناك تعليقات:
إرسال تعليق