Mohamed
Hussein
31
مايو 2018·
البنت اللبنانيه
القذره اللي عملت فيديو فيه كل أنواع السباب و الإهانه للمصريين رجاله و ستات , اتقبض
عليها النهارده , عايزين نشوفها بقى و هي سبع رجاله في بعض قدام النيابه .
.
الحقيقه من اول
حكاية الفيديو ده وانا ماكتبتش عنه ولا كان يعنيني , انما فيه حاجات مهمه جدا ماينفعش
تقع من إيد الناس ولا من عقولهم و تفكيرهم
.
1- حكاية ان بنت
لبنانيه تبقى بالقذاره دي مش معناها التعميم , الشعوب خارج المعادله , كل بلد فيها
الكويس و القذر , يبقى الجمله تتقال كده , بنت لبنانيه قذره و عار على الشعب اللبناني
, ولد تونسي خروف و عار على الشعب التونسي , لو سمحتو اوعو تقعو في الفخ .
.
2- مش بتفاجئ أنا
بفيديوهات وبوستات زي دي لاني عارف و متأكد , عارف ايه بقى ؟ بص يا سيدي , مصر دي بصفتها
الكبيره , الكبيره أوي , بتكون دايما في عقول المرضى و مجانين الشهره في الوطن العربي
هي السلم اللي بيطلعو عليه , يطلعو عليه بالمدح أو بالقدح , لو واحد كويتي مثلا كتب
بيتين شعر مدح في مصر هيرفعوه لسابع سما , و هيتشهر جدا , مع انه قبلها كتب ألف ديوان
في مدح الكويت بس محدش كان يعرفه , و العكس , برضه اللي عايز يشتم مصر و يخبط ( في
الكبير أوي ) بيتشهر بشكل سلبي , بيتشهر حتى لو بطريقة إنه يتهان و يتلعن جدود أبوه
95 مليون مره يوميا .
.
3- عندي أصدقاء
لبنانيين بحبهم جدا و ماخيبوش ظني فيهم و لما ظهر الفيديو بتاع البنت القذره كانو أول
ناس لعنو جدود أبوها , و قالو لها مصر خط أحمر يا بنت التيييييييييييت .
.
4- اللبنانيه هتتحاكم
و يتحقق معاها بموجب القانون المصري , ماحنا في بلد قانون سيادتك , و لو كانت في لبنان
كان التعامل هيتم عن طريق الخارجيه المصريه لان مصر مش بتسيب حقها ولا حق شعبها و رجالتها
و ستاتها , فيه جريمه بتقول كده ؟ أه يا مولانا , جريمة اسمها السب و القذف , احنا
مش بنخترع قوانين , دي موجوده على فكره في كل دول العالم , تتنفخ بقى أو تتعلق على
عمود نور , مش مهم , المهم و المهم جدا إنه يبقى دائما للشعب اللبناني الشقيق كل الاحترام
.
......................................................................................................
Mohamed
Hussein
31
مايو 2018·
تخاريف
.
مصر اللي بحبها
جدا من ورا مراتي ( على رأي الله يرحمه جلال عامر ) , مش بشوفها أبدا لابسه عبايه سوده
و نقاب , ولا بشوفها لابسه بنطلون كاتينج او بنطلون ستريتش مفسر جسمها .
.
مصر اللي بحبها
مش بلاقي طعمها في كنتاكي و تشيليز و الفراخ المجمده و اكياس الكاتشب والايموشنز بتاعة
الفيس بوك , ولا بلاقيها في المولات , مصر بلاقيها في الجبنه القريش و المش و السريس
و في ضحكة الغلابه اللي طالعه من القلب و في تجاعيد وشهم , و في الشوارع و الحواري
و على شط الترعه .
.
مصر اللي بحبها
ماسمهاش أم معاذ ولا أم حمزه ولا اسمها جاكلين , مصر اسمها مريم أو فاطمه ( فاطنه
) , بنت جميله أوي عمرها 16 سنه , عامله شعرها ضفيرتين , بتلبس جيبه و بلوزه , و ماسكه
كتاب حاضناه على صدرها , عودها مفرود , مبتسمه و قوية و عنيها دايما بتلمع , و لما
الكتاب بيقع من ايديها بتقعد عشان تجيبه , مش بتوطي , ولا بتحني ضهرها أبدا إلا و هي
بتصلي .
....................................................................................................
Mohamed
Hussein
30
مايو 2018·
على فكره حضرتك
- نعم يا حبيبي
.
مهاتير محمد أول
مامسك رئاسة الوزرا في ماليزيا من كام يوم رجّع 50 مليار دولار و سجن 400 فاسد , يادوب
بعد مامسك الحكم بساعتين زمن .
- بجد والنبي ؟
الراجل اللي عمره 92 سنه شال سيفه على كتفه و عمل كده على طول ؟
.
ايوه زي مابقولك
كده و عماد صاحبي مأكد لي , و على فكره كمان
- نعم يا حبيبي
.
أردوغان مسلف صندوق
النقد الدولي و وصل باستثماراته لكوكب المريخ , يعني حاجز نص المجموعه الشمسيه بإسم
تركيا و بيخلّص حاليا في النص التاني .
- عماد برضه اللي
مأكد لك ؟
.
أيوه طبعا , عماد
صاحبي ده عارف كل حاجه
- مممممممم على
فكره يا حبيبي .
.
نعم حضرتك
- وانا جاي من
البيت لقيت أسد ضخم قد الفيل بيجري ورا العيال الصغيره و عامل رعب وقلبانه في الشارع
.
ها و بعدين ؟ عملت
ايه ؟
ولا حاجه , ناديت
عليه وقلت له خد ياض انت هنا
- ناديت على مين
حضرتك ؟
.
عالأسد يا حيوان
- و بعدين ؟
.
و بعدين كان في
ايدي سيجاره داريتها و مسكت الأسد من ودنه , ملّصتهاله , وقلت له عارف لو شوفتك هنا
تاني هعلقك من رجليك دي على عمود النور , قالي خلاص يا عم محمد انا ماشي اهو و مش هرجع
تاني , دانت زعلك وحش اوي .
- يا سلام , الأسد
قالك خلاص يا عم محمد ؟!
.
أومال يابني انت
فاكر ايه ؟
- طب هو حضرتك
داريت السيجاره ليه ؟
.
يابني هي دي محتاجه
مفهوميه ؟ عشان الأسد لو شاف السيجاره كان هيقولي هات نفس .
- يا سلام ؟!!
.
و على فكره كمان
- نعم حضرتك
.
مهاتير محمد عامل
حمله يلم تبرعات من الشعب لإنقاذ الإقتصاد الماليزي , و مولاك خليفة الشواذ اقتصاده
بينهار مع إنهيار الليره التركيه و أسيادك الخرفان عاملين حمله مماثله لشراء بضاعة
الشواذ عشان ينقذو السفاح البلطجي أمير المدمنين .
- طب و فين ال
50 مليار دولار و ال 400 فاسد و فين الفلوس اللي مسلفينها لصندوق النقد و فين استثمارات
تركيا في المجموعه الشمسيه ؟
.
ابقى تعالي وانا
اقولك فين
........................................................................................................
Mohamed
Hussein
29
مايو 2018·
بعد 2011 مصر دخلها
أكتر من مليون سوري , شباب و رجاله و اطفال و ستات , هربو من الجحيم لبلد يحسو فيها
بالأمان , المليون سوري مش بنقول عليهم لاجئين , أصلا في جيناتنا و تركيبتنا و قاموسنا
كلمة لاجئ مش موجوده , مش هتلاقيها في أي صفحه , خصوصا لو كان عربي , و خصوصا جدا لو
كان سوري , لان الشعب السوري هو الشعب الأقرب لنا في الحضاره و في التاريخ المشترك
, ده كلام حقيقي مش شعارات دبلوماسيه .
.
المليون سوري محدش
فيهم قعد في بيته يومين , كل اللي كان بيوصل من سوريا لمصر كان تاني يوم بيلاقي شغل
, و بعد شهرين تلاته من شغله تلاقيه فتح شغل خاص , اللي جاي بفلوسه و اللي جاي بصحته
و مهنته و خبرته في أي مجال , و ده كان درس مهم جدا و قاسي للشباب المصري اللي قاعد
يشرب معسل عالقهوه لحد مانفسه اتقطع و كل ما تسأله مابتشتغلش ليه ؟ يقولك هي البلد
دي فيها شغل ؟.
.
المهم , و احقاقا
للحق , السوريين زي المصريين و زي كل الشعوب العربيه في المرحله دي , بيكونو نوعين
مالهمش تالت , إما نوع عنده شوية عقل أو نوع ( حُمّيري ) , مركوب من سبع سنين و لسه
هيتركب شويه كمان لحد مايفهم .
.
النوع التاني ده
لما جه مصر هتلاقيه بيشتم فينا عالفيس بوك و في أي مكان يقعد فيه , ممكن يطول لسانه
و يهري و يهبد , زيه زي الخرفان و شمامين الكوله عندنا , النوع ده مش بيضايقني أوي
ولا بقلق منه , إنما بيصعب عليا, , ليه ؟ عشان هو بالظبط نفس النوع اللي بيرحب بالقوات
الأمريكيه و البريطانيه في بلاده , اللي بيرحب بقوات خليفة الشواذ لما تقتحم الأراضي
السوريه , اللي بيقعد قدام الخنزيره 24 ساعه , اللي فاهم ان أردوغان السفاح شايل زكايب
الخير لسوريا , اللي متخيل إنه فيه تحالف إسلامي لمحاربة ( الشيعه ) ولاد الحرام ,
و التحالف الإسلامي السني ده بتقوده أمريكا و بريطانيا و اسرائيل , مش بقولك نوع حُمّيري
؟! .
.
طب بالنسبالنا
احنا كمصريين ؟ ولا حاجه يا مولانا , اقعد في بيتك و في شغلك و حط في بطنك بطيخه صيفي
, المليون سوري بخيرهم ( و بشرهم ) تحت أعيننا , في قبضة يد الدوله المصريه , قاعدة
البيانات مابتخليش , و الإقامه مش بتتجدد عشوائي, عايز تعيش و تعمل بيت و أسره و تلتحم
مع الشعب المصري العظيم هتبقى على راسنا من فوق , فكّرت مجرد تفكير أو عقلك وزّك تمشي
في سكة شمال هتتعلق على عمود نور , زيك زي المصري اللي بيعمل كده ( حتى لو كان وزير
) , عبد الفتاح السيسي مفيش عليه فواتير لحد ولا الشعب المصري عليه فواتير لحد .
.
أنا كمان مش من
هواة ( المن) على الشعوب و على خلق الله , إنما من هواة الجمله دي ( ارحمو عزيز قوم
ذل ) .
.
و في النهايه عايز
أقول باختصار , أهلا وسهلا وألف مرحب بكل أشقائنا السوريين اللي بيفهمو , لو مشالتكوش
الأرض نشيلكو في عنينا , و أهلا وسهلا بالنوع الحُمّيري لحد مايفهم أو لحد مايتعلق
على عمود نور .
...............................................................................................................
Mohamed
Hussein
28
مايو 2018·
احنا بعون الله
خلينا الحيوان راموس يقفل حسابه بتاع الواتس , و لو عايزين نجيبه في شوال هنجيبه حتى
لو كان في بلاد تركب الأفيال .
.
أي عيل صغير عمره
سبع سنين لعب كوره يومين تلاته في الشارع هيعرف إن اللي عمله الحيوان راموس كان مقصود
و متعمد ( يعني مؤامره لابعاد صلاح عن الماتش ) , لدرجة ان اتحاد الجودو الأوروبي نزل
بيان ان الحركه دي كانت موجوده عندهم في الجودو و اتمنعت بسبب خطورتها !! .
.
حد والنبي يقول
لمولانا ابراهيم عيسى إن اللي بيعمله المصريين اسمه المحبه , مش عنف ولا بطيخ , و المحبه
دي من عند ربنا , محمد صلاح لا بيصرف علينا ولا بيغرف و يدينا ولا ماسك لنا الكرباج
, لا في إيده سيف ولا تحت منه فرس , دي طاقه نور أو ملو حفان من الخير بيرميهم ربنا
في حجر وقلوب الناس ناحية ناس تانيين , و مش ضروري يكون فيه سبب
.
حد يقوله و النبي
بلاش فزلكه , مش ضروري تتفزلك في كل حاجه و مش ضروري تتفزلك 3 مرات يوميا بعد الأكل
, عرفنا يا سيدي انك مثقف و عميق و قراري و سابق كوكب الأرض بمليون فدان انت وشلة الصيع
اللي معاك , شلّة المتفزلكون في المدينه , أعضاء حزب ( خُلقنا لنفتكس )
........................................................................................................
Mohamed
Hussein
27
مايو 2018·
عبد الفتاح السيسي
: (( تواصلت مع ابن مصر البار وابنى محمد صلاح للاطمئنان عليه بعد إصابته.. وكما توقعت
وجدته بطلاً أقوى من الإصابة ومتحمساً لإستكمال مسيرة البطولة والتميز، وقد أكدت له
أنه أصبح رمزاً مصرياً يبعث على الفخر والإعتزاز وأننى أدعو الله له دعاء الأب لإبنه
بأن يحفظه ويتم شفائه على خير، ويكفيه فخراً بأنه أصبح مثالاً يُحتذى به للشباب فى
مصر والعالم كله )) .
.
و بس يا سيدي
, البطل الكبير بيدعم البطل الصغير و يتصل بيه و يتطمن عليه , و يقوله الرجاله لما
بتقع بتقوم بسرعه , عشان ورانا شغل كتير , و علم مصر لازم يترفع في روسيا .
.
من امبارح وانا
متوقع المكالمه دي , توقعت كمان إن الريس يكون عرض على صلاح إنه يبعت له فريق من أكبر
دكاترة العظام في مستشفياتنا العسكريه , بس الإمكانيات في انجلترا تكفي جدا , يعني
مش محتاجين , و رئيس نادي ليفربول مستعد يجيب لصلاح أطباء من المريخ لو تطلب الأمر
.
................................................................................................................
Mohamed
Hussein
27
مايو 2018·
الحمد لله , إصابة
صلاح هتبعده اسبوعين تلاته بالكتير , هيلحق كاس العالم بإذن الله , دعوات 100 مليون
مصري مابتخيبش أبدا .
.
في السنين اللي
فاتت كنت بشوف ناس كتير جدا بتشجع فرق أوروبا الكبيره , انا مش واحد من الناس دي ,
خالص , و شجعت ليفربول و قبله روما عشان بس صلاح بيلعب معاهم , و لحد النهارده ماكنتش
اعرف كتير عن ريال مدريد و برشلونه غير انهم فرق بطولات و فيهم كرستيانو و ميسي , بس
بعد اللي شوفته النهارده من ريال مدريد و زيدان و كرستيانو و الحيوان راموس أقدر أقول
و أبصم بالعشره , إن كرة القدم العالميه و الأوروبيه لما بقت الإستثمارات فيها بالمليارات
, اتحولت لمافيا , مافيا مباح فيها كل أنواع القذاره و الإنحطاط , و عشان الفوز ببطوله
و نكسب 100 مليون ولا 200 مليون يورو ممكن الأوساخ يعملو أي حاجه .
.
معلش و النبي ابقو
كلموني عن أم التحضر الأوروبي بعدين عشان أنا داخل على صيام و مش عايز أفطر على حد
.
...........................................................................................................
Mohamed
Hussein
25
مايو 2018·
ماتشنا اللي خلص
مع الكويت , عشان نلم الدور بقى و نلم التعابين , الوقت يداهمنا
.
- منتخب الكويت
لما تقدم 15 مركز في تصنيف الفيفا , بقى في المركز ال 160 , يعني بعد جيبوتي و مورشيوس
و قبائل الكوتوموتو الأفريقيه .
.
- مصر من غير محمد
صلاح عامله زي عربيه شكلها حلوه بس من غير موتور , اه و عهد الله , يعني بالموتور تمشي
, من غير موتور تبقى بالكتير نبيع فيها خضار و نجيب اتنين حمير يشدوها .
.
- تشكيلة منتخب
مصر اللي ممكن تنفعنا كالتالي
حراسة المرمى
( كلهم زفت بس الحضري عنده شوية خبره يعني زفت بس مش زفت أوي ) , البدلاء أي حد , اكرامي
, الشناوي ولا عواد و لا حتى عبد الفتاح القصري الله يرحمه .
.
- باك يمين أحمد
فتحي ( بدلاء عمر جابر و المحمدي )
- باك شمال عبد
الشافي ( كريم حافظ بديل ) .
- في القلب حجازي
و جبر ( و سعد سمير و الونش بدلاء ) .
- قدامهم طارق
حامد و النني ( زيزو بتاع الزمالك معقول و ينفع بديل ) .
- في الهجوم نلعب
بأربعه من غير راس حربه عشان مانضحكش على نفسنا , احنا عندنا عيب خلقي يا مولانا ,
مفيش راس حربه ينفع ولا راس كرنبه حتى , نلعب زي ليفربول كده من غير راس حربه صريح
, الأربعه صلاح و شيكا و عبد الله و تريزيجه ( البدلاء رمضان و كهربا و عمرو ورده
) .
.
ملاحظات مهمه جدا
عشان مفيش وقت
- كهربا و رمضان
صبحي يتربطو في عمود نور و يتجلدو 50 جلده عشان يفهمو ان الكوره لعبه جماعيه , و ده
كاس عالم مش دوره رمضانيه , يعني بيجيلك فيه فرصتين تلاته طول الماتش مش اكتر .
.
- عبد الله السعيد
, الله يحرقك بجاز , انت ضيعت نفسك و ضيعتنا معاك في وقت قاتل , فنلندا دي يابني بتاعة
موبايلات نوكيا , مش بتاعة كوره خالص .
.
- عمر جابر , أمريكا
بتاعة باسكت بول يا عمر , ملهاش علاقه بكرة القدم , يعني لو احترفت في فريق باسكت هناك
ممكن تفيد منتخبنا بتاع مونديال روسيا أكتر .
.
- هيكتور كوبر
, الفريق تحت ايدك من سنين و ملوش شكل ولا طعم ولا لون ولا قصه ولا مناظر , انت بتلعب
بطريقة ( وسّع و صلي عالنبي ) و ( عك و ليّس , كله كويس ) , بس اهو ربنا ساترنا بدعاوي
100 مليون .
....................................................................................................
Mohamed
Hussein
25
مايو 2018·
تركيا اللي ماكانتشي
دوله من الدول اللي تأمر عليها كلاب السكك , بالعكس , كانت كلب من كلاب السكك , نهشت
في لحم العرب مع الأمريكان و البريطانيين و الجماعات الارهابيه .
.
تركيا اللي دعمت
الارهاب في مصر و ليبيا و سوريا بالمال و السلاح و دخلت بقواتها في شمال العراق و شمال
سوريا و سرقت و نهبت بترول و غاز و حتى الحلل النحاس كانو بيسرقوها .
.
تركيا اللي فتحت
قنوات و جرايد للخونه و الصيع اللي هربو من مصر و الوطن العربي و بقو يصرفو عليهم و
يعلفوهم عشان يقعدو 24 ساعه يوميا يشتمو في بلادهم و ينشرو اشاعات و يروّجو للحرق و
الخراب و بالمره يهتفو لخليفة الشواذ و المثليين .
.
و مع ذلك تركيا
بتعاني من أزمة اقتصاديه رهيبه , الليره التركيه بتنهار , أو زي ما قالو زمان , دخل
الحرامُ على الحلال ليكثره , أخدَ الحرامُ الحلال و بعثره .
.
الخرفان و الجماعه
الإرهابيه عايشين بمبدأ ( اللي ياكل عيش اليهودي يضرب بسيفه ) و بالتالي عاملين مناحه
على موضوع انهيار الاقتصاد التركي , و بيدعو ( المسلمين ) لشراء البضائع التركيه ,
عشان أصل دي حرب أمريكيه بريطانيه على أردوغان خليفة المسلمين , لا تخرج قبل أن تقول
قحّه , قولها بالفم المليان , قولها حتى في نهار رمضان , بقى أمريكا و بريطانيا بيتأمرو
على الدوله اللي فيها أكبر قاعده عسكريه أمريكيه , بيتأمرو عالدوله اللي هي معاهم في
حلف الناتو , بيتأمرو عالدوله اللي فتحت أراضيها لتدريب و تمويل الإرهابيين لخراب الوطن
العربي, بيتأمرو عالدوله اللي هي عضو في تحالف ( كلاب السكك ) , بيتأمرو عالدوله اللي
بتطبّع مع الكيان الصهيوني حتى في المجالات العسكريه , بيتأمرو عالدوله العلمانيه اللي
فيها بيوت للدعاره و الشواذ أكتر من عدد الجوامع .
.
مصر أزمتها الإقتصاديه
كانت تركة سنين طويله هباب , بنعمل هيكلة اقتصاد و نبني بلدنا من جديد بما يرضي الله
, مصر ماوسختش ايديها ولا شاركت في الحرق و الخراب و النهب و لا ضربت رصاصه واحده على
شقيق عربي , بنبني بلدنا بإيد و بنواجه الطوفان و نحارب الإرهاب بالإيد التانيه , عشان
كده الخير قادم لا محاله , ده مش كلامي ولا كلام عبد الفتاح السيسي , ده كلام رب العزه
اللي خلق الخلق و اللي معاه الكتالوج بتاعهم , الكتالوج اللي بيقول إن النصر دايما
في ركاب الحق .
.......................................................................................................
Mohamed
Hussein
25
مايو 2018·
شوفت يا صاحبي
اللي حصل ؟ شوفت اللي حصل ؟ شوفت اللي حصل ؟
- خير يابني حصل
ايه , قول بسرعه .
.
قبضو على وائل
عباس , وائل عباس قبضو عليه , قبضو عليه وائل عباس
- معقوله ؟ يا
نهار أبيض , قبضو عالمطرب وائل عباس ؟
.
لا يا عم , مطرب
ايه , التاني اسمه هشام عباس .
- أومال مين وائل
عباس ده ؟
.
ده واحد عنده صفحه
عالفيس و تويتر
- اه يعني حد معروف
و مهم و كده ؟
.
لا خالص , و خالته
ذات نفسها بتتلخبط في اسمه , بس البي بي سي كتبت عنه و الجزيره و مش بعيد البيت الأبيض
يطلّع بيان .
- اه طبعا ما دول
حبايبنا , و أصلا لو سمعو ان فيه صرصار محشور جوه بلاعه في مصر هيعملو من الصرصار ده
بطل و أيقونه و يعملو عنه فيلم وثائقي تحت عنوان ( بطولة صرصار ) .
.
مانا جايلك بقى
عشان كده , عايزين احنا كمان نهري و نهبد في الموضوع ده .
- أكيد هنهري و
نهبد , بص يا سيدي , احنا نقول قبضو عليه مع انه كان الأول عالثانويه العامه , دولة
تحارب العلماء .
.
لا ده هو مش كده
خالص , و غالبا عواطلي .
- خلاص نقول قبضو
عليه مع انه حافظ القرأن الكريم و حج بيت الله 400 مره و اعتقلوه و هو ساجد في الصلاه
.
.
يا عم ساجد ايه
بس , ده عمره ما ركعها .
- طب نقول انهم
بعد ما قبضو عليه حطوه في أوضه معزوله و منعوه حتى من انه يستحمى .
.
لا ماهما لو عملو
كده يبقى بيحققو له أمنيته .
- خلاص خلاص ,
كده بقى مفيش غير اننا نقول إنه بيعاني من شلل رعاش و انزلاق في الفقره التالته و الرابعه
على التوازي , وبياخد أدوية ضغط و سكر و كوليسترول و عنده كساح و حب شباب و حمى الفونكيش
.
- ممممممممم و
أنكلستوما ؟
.
أه صح , و انكلستوما
.
..............................................................................................
ليست هناك تعليقات:
إرسال تعليق