Mohamed
Hussein
12
أبريل 2018·
شارع عرضه 30 متر
تقريبا , اتعمل اتجاهين و بينهم عازل في النص , المفروض ان كل اتجاه يعمل 3 حارات او
حارتين مستريحين , الساده البياعين خدو حارتين و سابو حاره للعربيات ( ظُلما و اقتدارا
) , أستاذ سواق الميكروباص شايف الشارع اتجاهين بس قرر انه يمشي عكس السير ( مزاجه
كده ) و يقفل الحاره الوحيده الموجوده , و وراه استاذ سواق توكتوك ( اكيد مزاجه كده
برضه ) , قام الحاج صاحب العربيه الربع نقل قال يعني هي جت عليا ؟ هما احسن مني في
ايه ولا كانو احسن مني في ايه ؟ و عمل زيهم .
.
في الشارع تقاطعات
عشان اللي عايز يدخل شمال أو يلف يوتيرن , ضربت في دماغ الساده الباعه الجائلين بتوع
الخضار و الفاكهه و الشباشب البلاستيك و الريموتات و إبر بوابير الجاز إن أفضل مكان
يقفو فيه بعربياتهم الخشب و أقفاصهم هو في وش التقاطعات بالظبط , عشان العربيات ماتعرفش
تلف , يعني تيجي حضرتك تلف تلاقي عربيه خشب عليها كنتالوب في وشك , أو عليها شوية توت
و عيل صغير اسمه حماده , و صاحبها واقف مبتسم ( أكيد ده أبو حماده ) , و تضطر تاخدها
على 7 مرات عشان تعرف تلف وطبعا قافل الشارع في الاتجاهين , و في المره الخامسه هتسمع
صاحب عربية التوت و هو بيقولك ( ماهي واسعه يا استاذ اهي ؟ ) , و مش بعيد حماده نفسه
اللي عمره سنه و نص ينطق و يقولك ( لما انتو مابتعرفوش تسوقو بتركبو عربيات ليه ؟
) .
.
محمود و حسن و
سعيد 3 شباب زي الورد قررو انهم يمشو بعرض الشارع ( الحاره اللي باقيه للعربيات ) و
يقفو و يتناقشو في حاجات مهمه ( تقريبا بيتكلمو في أسباب انهيار الاتحاد السوفيتي
, و أهم الطرق و الأليات التي يمكن استخدامها لمعالجة ثقب الأوزون و حب الشباب ) ,
و أم سلوى قابلت أبله سعاد بالصدفه في الشارع و هاتك يا أحضان و بوس و كلام , ماهي
حضرتك ماشافتهاش من ساعتين بحالهم .
.
باختصار :
الحقيقه العلميه
بتقول , إن الخروج من شارع جمال عبد الناصر اللي في الحرفيين بدون إصابات جسيمه لا
يشبه الخروج من عنق الزجاجه , ولكن يشبه خروج طفل وزنه 9 كيلو من رحم أم عمرها 16 سنه
و وزنها 34 كيلو و عندها أنيميا و بتولد طبيعي ولاده بكريه على إيد دكتور اول مره يولّد
واحده ست .
.
لقد نجوت و رب
الكعبه , أنا و عربيتي , واتكتب لنا عمر جديد , اه و عهد الله .
..................................................................................................................
Mohamed
Hussein
11
أبريل 2018·
شادي الغزالي حرب
: نظام السيسي يبتز أوبر و كريم للحصول على بيانات الركاب الشخصيه , كجزء من التضييق
المستمر على الحريات !! .
..................................
ده ياولاد أيقونه
من أيقونات يناير اللي كانو عايزين يحكمو مصر , و دي اخر قواهم و قدراتهم العقليه
, و عهد الله ماينفعو حتى يشتغلو في طابونة عيش .
.
طب تعالو نشوف
كده خطة السيسي الجهنميه في ابتزاز أوبر وكريم بحسب وجهة نظر( الأيقونه بتاع الطابونه
) .
...................................
مدام نيرمين اتصلت
بأوبر عشان يوصلّها من مدينة نصر للرحاب , سوّاق من أوبر وصل تحت البيت و نزلت مدام
نيرمين , ركبت العربيه و السواق فضل واقف مابيتحركش , و ماسك في ايده ورقه و قلم
.
مدام نيرمين :
هو حضرتك مش هتتحرك ولا ايه ؟
السواق : لا يا
مدام , لازم نملى البيانات الأول .
.
نعم ياخويا ؟؟
- لو سمحتي يا
مدام تعاوني معايا عشان نخلص بسرعه , ده بناء على تعليمات من الحكومه و الرئيس السيسي
شخصيا و بيبتزونا بالحكايه دي .
.
اللهم طولك يا
روح , خير ؟ اتفضل
- اسم حضرتك ايه
و ساكنه في الدور الكام و رايحه الرحاب ليه ؟
.
اسمي نيرمين عبدربه
جاد الحق عويس شبرا , و رايحه ازور اختي لأنها بعيد عنك صحيت من النوم الصبح لقت عندها
( حب شباب ) , و ساكنه في الدور ال 37 .
- 37 ازاي يا مدام
, دي العماره 10 ادوار .
.
يابني مش انت بتسألني
؟ تبقى تكتب الإجابه اللي بقولك عليها .
- ايوه معاكي حق
, طب حضرتك الشقه بتاعتك كام اوضه و كام حمام وعندك تلاجه كام قدم و كام قطه ؟
.
أه , طب اكتب عندك
بقى , الشقه 3 اوض و حمامين و التلاجه 57 قدم و نص و عندي 4 قطط شيرازي و معزه صغيره
, و بلبس شوز مقاس 39 و وزني كان 75 كيلو بس انا عملت ريجيم من شهرين و الحمد لله نزلت
150 جرام , و بشجع الزمالك و بحب عمرو دياب و المسقعه و البطيخ , و اختي عايشه في الرحاب
و لنا عمه تخينه شويه , و أبويا الله يرحمه لما كان بياكل المانجه كان لازم يكون لابس
فانله حمالات و صفحتي عالفيس بوك بإسم طائر الأحزان الزمخشري و عندي ولد واحد بيحب
البت زميلته في الفصل اللي اسمها جاكلين بس انا مش موافقه لأن امها سمّاويه و وشها
يقطع الخميره من البيت , اه نسيت اقولك , جوزي سي الأستاذ حسن بيشتغل موظف كبير في
الضرايب و بيقبض 8 ألاف جنيه و 250 مليم , و عاملين جمعيه هنقبضها الرابع عشان عقبال
أملتك ناويين نشتري أنتريه جديد .
- يا مدام يا مدام
؟
.
نعم يا حبيبي ؟
- ليه كل المعلومات
الكتير دي ؟.
.
عشان يابني أنا
مواطنه مصريه و أي حاجه تطلبها الحكومه هوافق عليها , و في نهاية البرنامج نحب نسمع
أغنية تسلم الأيادي .
- بس حضرتك المعلومات
دي فيهم 5 معلومات مهمه و الحكومه أصلا عارفاهم ( موجودين عادي في قاعده البيانات
) و الباقي مش مهمين خالص و مايلزموش الحكومه في حاجه , هتستفيد ايه الحكومه من حكاية
عمتك التخينه و الأنتريه و حب الشباب و المعزه و البت جاكلين ؟
.
مممممممممم ماتقول
لنفسك يا حيوان ؟! .
- والله مانا اللي
طلبت الكلام ده , ده الأستاذ شادي الغزالي حرب أيقونة من بتوع يناير هو اللي قال لنا
الحكومه هتعمل كده عشان تستبزنا , لأنها حكومه مستبزه .
.
اااه , قولتي لي
بقى , طب عموما الورقه معاك اهي , بعد ماتوصّلني تروح للأستاذ أيقونه بتاعك و تبرمها
كده و تحطها في عينه أو في أي حته تانيه تعجبك .
.........................................................................................................................
Mohamed
Hussein
11
أبريل 2018·
أمريكا , روسيا
, بريطانيا , إيران , اسرائيل , تركيا !! .
.
فيه 5 حقايق ماينفعش
يختلف عليها اتنين في موضوع سوريا :
1- سوريا أخر سنتين
تلاته اتحولّت لأرض معركه مش اكتر من كده , أرض اتجمع عليها عربجية التاريخ و القوى
الإستعماريه القديمه و الحديثه .
.
2- أي دولتين عايزين
يحاربو بعض أو يعملو لوي دراع لبعض أو يضغطو على بعض في ملفات تانيه , او يستعرضو أسلحتهم
و يروّجو ليها و يفردو عضلاتهم أو عالاقل يشوّشو على مشاكل داخليه في بلادهم أو يحضرو
تقسيم التورته , يروحو سوريا , الأرض المستباحه .
.
3- على مدار السنين
السبعه اللي فاتت هنكتشف إن سوريا اتدمرت و مع ذلك مفيش طلقه رصاص ولا صاروخ واحد انضرب
في واشنطن ولا موسكو ولا لندن ولا طهران و لا تل أبيب ولا أنقره , ولا حتى لمبة كهربا
اتحرقت عندهم , و دي طبيعة الحروب الحديثه , مفهاش مواجهات مباشرة بين كلاب السكك
, انما يواجهو بعض على أرض ( مستباحه ).
.
4- عربجية التاريخ
كانو مستحيل يدخلو سوريا إلا بشروط أهمها على الأطلاق الغطاء العربي , أو بمعنى أصح
الخيانه العربيه و تحديدا من عربان الخليج , طبعا بجانب استعانة بشار بالروس و الإيرانيين
و حزب الله ( كالمستجير من الرمضاء بالنار ) .
.
5- مصر الدوله
الكبيره الوحيده في المنطقه اللي ماوسختش ايديها في سوريا ولا اعتبرتها أرض مستباحه
, ولا شاركت تحالف أمريكا بريطانيا السعوديه تركيا ولا شاركت التحالف المقابل , رغم
كل الإغراءات و رغم كل الضغوط , و هي دي باختصار طبيعة مصر , في وقت الطوفان بتكون
أقوى و أنضف , أقوى من انها تكون فريسه للديابه , و أنضف من إنها تكون ديب بينهش في
لحم اخواته .
..........................................................................................................
Mohamed
Hussein
11
ابريل 2018·
يا الله على شعور
مواطن سوري و هو بيقرا خبر زي ده ( أنباء عن تغيير مسار الطائرات فوق المتوسط بسبب
ضربه جويه محتمله على سوريا ) !! .
.
و كأن سوريا لسه
فيها حته سليمه عشان تنضرب , و كأن الضرب في الميت بقى حلال , و الناس تحبس أنفاسها
و يا ترى الضربه هتكون من مين ولا مين ولا مين و هتكون فين و لا فين ولا فين .
.
أكتر حاجه بتوجعني
على سوريا مش إنها اتدمرت , اكتر حاجه بتوجعني هو احساس انها بتتعذّب , بيقتلوها بالبطئ
ولاد الأفاعي , سوريا الدوله و الكيان و التاريخ أشبه بست وقعت في إيد عصابه , العصابه
عايزه تقتلها بس قررت انها تعذبها الأول , تقطع ايديها , تقطع ثديها , ترمي على وشها
ماية نار , تقطع رجلها , تغتصبها , يمكن لو كانت طلقه في الراس من البدايه كانت تبقى
أرحم .
.
ربنا ينتقم من
كل واحد إرهابي قذر و كل دوله و كل كيان و كل جماعه شاركو في خراب دوله عظيمه اسمها
سوريا , سواء شاركو بالقتل أو بالفلوس و الدعم أو حتى بالتعاطف مع القتله و المجرمين
.
.
مصر عدّت من ايه
بقى ؟ و جيشها و شرطتها و شعبها عملو ايه السنين اللي فاتت ؟ عملو ملحمه تاريخيه ,
عملو معجزه , عملو ( بدون مبالغه ) اللي ماتعملش في 4 حروب نظاميه متتاليه .
.
يمكن دي المره
الأولى اللي نفسي فيها أشكر ناس بعينهم , أسماء محدده ,
ألف شكر سيادة
المشير محمد حسين طنطاوي , ألف شكر سيادة اللواء عمر سليمان ( و ألف رحمة و نور عليك
) , ألف شكر سيادة اللواء مجدي عبد الغفار , ألف شكر سيادة الفريق صدقي صبحي , ألف
شكر سيادة الرئيس السابق عدلي منصور , و ألف ألف شكر سيادة الرئيس عبد الفتاح السيسي
.
.
و الشكر موصول
للجميع , لكل مواطن مصري شريف و كل جندي و كل ظابط , و كل واحد دافع عن بلده بالسلاح
أو بالكلمه و الشرح و التوضيح , و لكل واحد استحمل ظروف صعبه و ربط الحزام على بطنه
و بطن عياله .
.........................................................................................................................
Mohamed
Hussein
10
أبريل 2018·
من غير هري كتير
ولا فزلكه .... ايه الفرق بين مصر و سوريا ؟! .
.
مصر دوله حضاريه
عظيمه عمرها ألاف السنين ( و سوريا زيها , مش بنت امبارح ) , مصر عندها شعب حر و أبي
و شجاع ( و سوريا زيها , مش جبانات ) , مصر عندها رجاله وقت الشده و سيدات عظيمات
( و سوريا زيها ) .
.
مصر اتعرضت لمؤامره
في 2011 زي اللي اتعرضت لها سوريا , طوفان و كان داير عالمنطقه , المؤامره في كلا الحالتين
اتعمل حسابها من قبلها بسنين طويله و خطط لها حلف الشيطان , و اتصرف عليها عشرات المليارات
و روّجت لها جرايد و قنوات عالميه .
.
بعض العرب تأمرو
على مصر و برضه تأمرو على سوريا , مصر عندها شوية خونه و سوريا عندها .
.
طب ايه الفرق ؟
و ليه مصر عدّت من الطوفان و طلعت أقوى من الأول و سوريا وقعت و انهارت ؟ الفرق في
كلمتين , مصر عندها جيش قوي متماسك له عقيده صلبه و عندها مؤسسات أمنيه و سياديه عظيمه
و رجاله بيعرفو يقودو السفينه في وقت الطوفان .
.
سوريا لا , و دي
تحسب على بشار الأسد , فين أجهزتك الامنيه و مخابراتك و جيشك يوم ماقررت انك تستمر
في الحكم ؟ فين مؤسساتك و اعمدتك و مستشارينك اللي قالو لك تعمل ايه عشان سوريا ماتقعش
و تفضل موحده ؟ .
.
أصدقائي الغاليين
- الشعوب مش مجال
للتريقه و السخريه و احنا قاعدين و مدلدلين رجلينا في ماية الترعه , و لو فيه سوريين
عايشين في مصر و بيشتمونا ف دول مش اسمهم الشعب السوري , اسمهم خرفان سوريا , اعضاء
الجماعه الارهابيه و المتعاطفين معاها , خرفان سوريا زي خرفان مصر زي خرفان تونس زي
خرفان الأردن , القطيع هو القطيع في أي دوله , لا ينتمو للدوله ولا يُحسبو عليه .
.
- و بلاش والنبي
حكاية الشعب السوري هرب من بلده و سابها تقع و تتدمر , طب حاول بس حضرتك تتخيل , وانت
قاعد في شقتك في التجمع الخامس لقيت إن الإرهابيين قافلين شارع التسعين و عاملين كماين
و على كتفهم رشاشات , و عرفت ان الخونه في مصر عملو جيش تاني سمّوه الجيش الحر و بيحتلو
مدينة نصر , و على العصر كده شوفت بعينك الطيارات (من كل الجنسيات ) طايره فوق منك
و بتضرب صواريخ , صاروخ دمر كايروفيستفال سيتي و صاروخ دمر مستشفى القوات الجويه و
صاروخ دمّر الفيلا اللي جنبك , بتتصل بأخوك في المنصوره قالك الإرهابيين محاصرين البلد
وابن اخوك انضم لهم و ابن اخوك التاني اتقتل على ايد اخوه , و اختك اللي حامل في التاسع
و عايشه في بنها مش عارفه تنزل تروح المستشفى لان الشارع مترشق مسلحين و مرتزقه من
سبعتاشر دوله مختلفه .
.
ها تخيّلت ؟ كنت
هتعمل ايه وقتها غير انك تاخد ولادك و تسيب كل حاجه وراك و تحاول تهرب حتى لو هتفضل
ماشي 3 أيام على رجليك و تدور على أي خيمة لاجئين أو بلد تترمي فيها و تستحمل الإهانات
و الذل ؟ .
.
الكلام اللي فوق
ده اسمه كلام العقل , و عشان تحكم على أي شعب لازم تحط نفسك مكانه , الحكايه مش فتحة
صدر , احنا الشعب المصري رجاله و ستات كان لنا دور عظيم في الوقوف في ضهر بلدنا , ماهربناش
ولا سيبناها لكلاب السكك , بس برضه لازم نفتكر دايما انه عندنا جيش و أجهزه أمنيه متماسكه
و قويه , تقدّمو الصفوف و ضحو بحياتهم , ممكن تقول سيمفونيه رائعه بين شعب و جيش ,
إيدين اتنين بيسأّفو اسمهم الشعب و الجيش , في سوريا كان فيه ايد واحده , من الحماقه
انك تقول لها انتي مسأفتيش ليه ؟ لأن ايد واحده مابتسأفش .
....................................................................................................................
Mohamed
Hussein
10
أبريل 2018·
الحكايه باختصار
.
.
النهارده الضهر
قلت أخد البنات أوديهم النادي و أقضى معاهم كام ساعه بمناسبة شم النسيم , واحنا ماشيين
بالعربيه وقفنا في إشاره , جت ست سوريه من اللي بيعملو أكل في البيت و يبيعوه في الإشارات
و قعدت تتحايل علينا ( ساعدونا من شان الله ) , بصيت لمراتي و قلت لها , السوريات قابلتهم
كتير في السعوديه و في مصر , الست السوريه بتقدر تعيش في أي دوله في العالم و تعمل
بيت و أسره , بتبقى زوجه و أم رائعه مهما كانت البلد اللي عايشه فيها , و الست السوريه
زي المصريه تماما , عندها عزة نفس و كرامه مش عند حد تاني , اوعي تفتكري انه بالساهل
كده تقف في اشارة مرور و تتحايل عالناس يشترو حاجه منها , عارفه الست دي فيه زيها كام
ألف في مصر ؟ و كام ألف في العالم ؟ عارفه ايه اللي يوصلهم للمرحله دي ؟ انه مبقاش
فيه دوله .
.
وصلنا النادي و
البنات لعبو و اتفرجو عالساحر و الأراجوز و اتغدو و اتنططو وسط ألاف الأطفال زيهم
.
.
و رجعت عالمغرب
أشوف الأخبار و الدنيا حصل فيها ايه ؟ لقيت الأخبار بتقول التالي , ارتفاع احتياطي
الذهب في مصر لما قيمته 50 مليار جنيه , ارتفاع الاحتياطي النقدي في مصر لحوالي 43
مليار دولار , عدد اللي زارو حدائق الحيوان فقط بيقترب من مليون بني ادم واللي زارو
الحدائق بصفه عامه عشرات الملايين , مصر اكلت رنجه و فسيخ في يوم واحد بأكتر من مليار
جنيه .
.
و في المقابل
, لقيت اخبار سوريا بتقول , اسرائيل تضرب مطار كذا السوري بموافقة أمريكا , امريكا
و الاتحاد الأوروبي يهددون بشن عدوان على سوريا , روسيا تعلن أن أمريكا و بريطانيا
يريدون محاربتها في سوريا !! .
.
ده يا سيدي اسمه
وصف الحال و الحاله , و مقارنه بسيطه خالص للتوضيح , عشان الناس بس تصدق ان الجمله
اللي بتقول ( مش احسن مانكون زي سوريا ) ماينفعش تكون مجال للسخريه و التريأه إلا من
واحد نطع أو خاين أو ( خواجه ) و أمه عارفه .
.
مصر بتعيش و تفرح
و تبني نفسها و تمشي لقدام و تحتفل و تاكل رنجه و فسيخ و العيال يتنططو في الجناين
و النوادي , و سوريا بقت مرتع و مشاع لكل كلاب السكك و عربجية التاريخ من أمريكان لبريطانيين
لصهاينه لأتراك لإيرانيين لروس بمساعدة صبيانهم من العرب الخونه و من الجماعه الإرهابيه
اللي دوسنا على دماغها بالجزمه في 2013 .
.
جيش مصر العظيم
عمل ايه بقى في السنين اللي فاتت دي ؟ اقرا البوست تاني و انت تعرف .
........................................................................................................
Mohamed
Hussein
8
أبريل 2018·
حكاية نطع
.
مره واحد كان بيشتغل
نائب رئيس في دوله عظيمه , أعظم دوله في الكون .
.
الدوله دي كان
فيه جماعه ارهابيه دوليه بتحكمها و الشعب ثار عليها و شال الإرهابيين من حكمها و رماهم
في أقرب صفيحة زباله ( يووه كنت هنسى أقول ان الحكايه دي حصلت بوجود و مباركة نفس الواحد
اللي بعد كده بقى نائب رئيس ) .
.
المهم الجماعه
الارهابيه جابت بتاع 10 الاف من أنصارها ( لا ياربي كانو 180 مليون ) و اعتصمو في ميدان
ماياخدشي اصلا اكتر من 10 الاف ( يابني لا سحر ولا شعوذه ) , و كان معاهم سلاح ( بشهادتهم
) , قصدي كان اعتصام سلمي اخر فيصل .
.
أنصار الجماعه
الإرهابيه فضلو قاعدين يوم و اتنين و تلاته و عشره و واقفين حال بلد , في الفتره دي
جت وفود من الداخل و الخارج و من المغول و البيزنطيين و السلفيين و المنفلوطيين عشان
يحاولو يقنعو الجماعه الارهابيه انها تفض اعتصامها المسلح ( بشهادتهم ) ...الإرهابيين
قالو لا , احنا عندنا خرفان كتير و مش مشكله نضحي بكام خروف .
.
المهم نرجع للواحد
اللي كان بيشتغل نائب رئيس و اللي حضر كل محاولات فض الاعتصام بالأدب و و بصبر أيوب
, مولانا أدرك بنفسه ان الناس دي مستبيعه و مش ناويه تجيبها البر و حريصه جدا انها
توقف حال بلد بحالها , و مكانشي قدام الدوله غير فض الإعتصام بممر أمن اللي عايز يروح
بيتهم , و عشان الاعتصام كان مسلح مات ظباط و جنود ( مماتوش و الله في حادثة موتوسكل
) و مات ناس من المعتصمين .
مولانا نائب الرئيس
اكتشف فجأه ان قلبه قلب خسايه و انه مرهف الحس و رومانسي و كيوت , قام مقدم استقالته
و ملبّس بلده في الحيطه قدام المجتمع الدولي ( باعتباره كان بيشغل منصب نائب الرئيس
) .
.
و سافر مولانا
لبلاد ماوراء البحار , قعد في فيلته هناك و دلدل رجليه في ماية البيسين و قرر انه يجاهد
من على تويتر , تخيل حضرتك حجم التعب لواحد مدلدل رجليه في البيسين و بيكتب تويتات
؟ مجهود خرافي طبعا .
.
فضل مولانا شغال
على كده سنين , في السنين دي بلاد وقعت و اتحرقت و خربت و جيوش اتدمرت و مدن اختفت
من عالخريطه و الصوره بقت واضحه للأعمى ,و هو على كلمة واحده , أحلام الشباب و حب الشباب
و مفيش مؤامره ( و رجليه في مايه البيسين ) .
.
بلده العظيمه اوي
دخلت حرب إراده , حرب سياده , حرب استقلاليه , أصعب حرب خاضتها في تاريخها الحديث
, و ضحت بألاف الجنود و الظباط و المدنيين و شعبها ربط الحزام على بطنه , و مولانا
على كلمة واحده , احلام الشباب و حب الشباب و مفيش مؤامره ( و رجلية في ماية البيسين
)
.
و بعد أربع سنين
يا مؤمن , و بعد انتصار الدوله و وقوفها على رجليها , افتكر مولانا ان عنده قضايا مصيريه
هناك في بلده ( اللي كانت بلده ) و افتكر سد النهضه و الجزيرتين , و قررتقريبا كده
انه يتشحتف عليهم , يا الله , قلبي الصغير لا يحتمل .
.
الحكايه دي يا
ولاد هي نوع جديد من الفروسيه , فروسيه ظهرت مابعد 25 يناير , اسمها فروسية الأنطاع
و الجبانات و الصيع و الخونه و فنجرية البؤ .
.................................................................................................................
Mohamed
Hussein
7
أبريل 2018·
الإنتماء
- في الصين بدأت
المستشفيات تشترط على المتبرعين بحيواناتهم المنويه انهم يكونو بينتمو و مؤيدين للحزب
الشيوعي الحاكم , لأنهم بيعتبرو الحكايه دي بتعني انتماء لدولة الصين ذات نفسها , و
بكده يبقو قررو انهم يبدأو في زرع الإنتماء جوه الأجيال القادمه من أول النطفه !!
.
.
التاريخ
- أمريكا اللي
طلعت من فيتنام و هي قالعه ملط , امريكا اللي تاريخها كله على بعضه 300 سنه ( يعني
بنت امبارح ) , امريكا اللي تاريخها استعماري مجرم سفاح , بتحاول دايما باستمرار تخلق
لها تاريخ شيك كده و كيوت و مليان بطولات و فراشات و حقوق الإنسان و العصافير الكناريا
, بتحاول حتى في أفلامها و ألتها السينمائيه الضخمه ( لأن الفيلم اللي حضرتك بتشوفه
النهارده بعد عشرين و 100 سنه هيبقى جزء من التاريخ ) .
.
الرموز
- الرؤساء و السياسيين
السابقين في كل دول العالم بيحظو باحترام و مكانه خاصه , حتى بعد الوفاه , الحكايه
مش بس على مستوى الحكومات , انما بتمتد و توصل كمان للأنديه , و تلاقي نادي مثلا زي
ليفربول بيوجه دعوه لواحد من نجومه يحضر مباراه , الواحد كان بيلعب كوره في النادي
من 50 سنه , و توجه له التحيه في الإذاعه الداخليه مع عاصفه من التصفيق الحاد من الجماهير
, ده اسمه احترام الرموز .
.
الكيانات
- في ايطاليا و
أوروبا , الفاتيكان له احترام بيوصل لدرجة القدسيه , على كل المستويات , حتى لو حصل
اي خلاف أو اختلاف , بيكون في نطاق احترام المؤسسه و الكيان العملاق , تأدّب فأنت في
حضرة دولة الفاتيكان .
.
الجيوش
- في روسيا و في
كتير من دول العالم , الأطفال من سن سبع سنين و خمس سنين بيخلّوهم يلبسو الزي العسكري
بتاع الجيش الروسي , بيعلموهم قيمة و اهمية جيش بلدهم , حماة الديار .
........................
ال 5 كلمات ( الإنتماء
, التاريخ , الرموز , الكيانات , الجيوش ) هما باستمرار مربط الفرس , ال key words , اللي ممكن يرفعوك لسابع سما أو ينزّلوك لسابع
أرض .
....................
...................
في مصر و دولنا
العربيه فقط بيتم تصدير العكس , عكس الصوره تماما , الإنتماء يقولو عليه تطبيل و تعري*
, الجيوش يقولو عليها عسكر و احترامها يعني انك ( عبيد البياده ) , تشويه الرموز ده
عمل بطولي و نضالي أخر فيصل , و كل ماتشوّه اكتر تبقى مناضل اكتر , تشويه التاريخ ده
اسمه العمق و البحث عن الحقيقه و تبقى مفكر و سابق كوكب الأرض بمليون فدان .
الضرب في الكيانات
و مؤسسات الدوله العملاقه ده اسمه التحرر و الألمعيه .
.
أصدقائي الغاليين
, الكلمتين دول باختصار هما جزء من حروب الجيل الرابع , الحكايه مش تأليفه ولا اختراع
ولا فنكوش ولا بص العصفوره , بالكلمتين دول سقطت دول و جيوش و انهارت و اتحوّلت لكوم
رماد , و أثر بعد عين , وبقى قدامها سبعين تمانين سنه عشان ترجع بس لنقطة الصفر , و
نقطة يعني فلستوب .
................................................................................................................
Mohamed
Hussein
7
أبريل 2018·
وزير بريطاني يعترف
بتورط بلاده في دعم الجماعات الإرهابيه اللي أسقطت القذافي في ليبيا !! .
.
شوف يابني .
- في السنين الجايه
, بريطانيا و أمريكا هيبدأو ( يسرسبو ) اعترافات عن دورهم في حاجات كتير, و ممكن يقولو
أسفين يعني ( sorry ) بالإنجليزي , أو مايقولوش .
.
- زي ماخربو العراق
بحجة وجود أسلحة دمار شامل ( و بحجّة إن صدام ديكتاتور و بياكل دراع العيال الصغيره
) , و بعد تدمير العراق ( وتدمير جيشها ) بكذا سنه قالو sorry
احنا ماكناش متأكدين و معلوماتنا ماكانتش دقيقه , احنا أسفين والله
, حقكو علينا .
.
- و بكره أمريكا
و بريطانيا يعترفو بشكل رسمي واضح و صريح ان كل الجماعات اللي بتسمي نفسها اسلاميه
و جهاديه هي من صنع ايديهم ( عمايل ايديا و حياة عنيا ) .
و إنهم أشرفو بشكل
كامل و مباشر على عملية خراب الشرق الأوسط من الألف إلى الياء ( اللي هو الكلام اللي
احنا بنصرخ و نقوله من سنين ) .
.
طب ليه يعترفو
و هيستفيدو ايه ؟ هيعترفو ل 3 أسباب مهمه جدا :
.
1- عملية الخراب
تمت خلاص يعني الهدف اتحقق , ال target
.
.
2- اعترافهم هيكون
استعراض للقوه , بمعنى احنا نقدر نقلب منطقه زي الشرق الأوسط دي رأسا على عقب في ظرف
كام شهر , و نهدم دول و جيوش و بلدان و احنا قاعدين في مكاتبنا المكيفه و من غير مانضرب
طلقة رصاص واحده .
.
3- و بالتالي الإعتراف
في حد ذاته بيكون رسالة ردع للجميع و لكل الحكومات , احنا إيدينا طايله و بنحكم و نتحكّم
في كوكب الأرض .
.
طب الأمريكان و
البريطانيين هيقولو ايه لخرفانهم اللي كانو مفهّمينهم إنهم بيحاربو الإرهاب و إن اللي
حصل في الشرق الاوسط ده كان ربيع عربي و ثورات تحرر و تخلص من الأنظمه الديكتاتوريه
؟
.
مممممممم ولا حاجه
, هيعتمدو على نفس الأله الإعلاميه الضخمه بتاعتهم في إنها تعمل عملية ( تنويم مغناطيسي
) جديده لنفس الخرفان ( عملية تنضيف ) , لا سحر ولا شعوذه , و بعد أي تصريحات بيومين
حتى لو كانت تصريحات واضحه وضوح الشمس هتلاقي الأله الإعلاميه الصهيونيه خدت خرفان
العرب و العالم في سكك تانيه خالص , حقوق انسان , اختفاء قسري , الفاشيه تطل برأسها
, كوريا الشماليه عندها نووي و بتهدد كوكب الأرض و المجموعه الشمسيه , ظهور كائنات
فضائيه في صحراء ماعرفش ايه , و أي حماده بالجنزبيل .
.
- أهم حاجه على
الإطلاق في السياسات الصهيونيه الأمريكيه البريطانيه , إننا كشعوب عالم تالت نفضل قطيع
باستمرار , يسوقونا في أي سكه هما عايزينها , و في نهاية كل سكه يتأكدو اننا بنسبح
بحمدهم و بنشرب اللبن و نغسل رجلينا و ننام
...........................................................................................................
.
Mohamed
Hussein
6
أبريل 2018·
أنا و لوجي
.
لوجي بنتي اللي
عمرها 11 سنه دخلت في مرحلة الطلبات العجيبه الغريبه .
.
بابا انا عايزه
بنطلون كاتينج
- احنا يا حبيبتي
ماعندناش الكلام ده , احنا بنجيب بنطلون جينز عادي و تي شيرت أو فستان ( و في عاشوره
بندبح وزه ).
.
بابا انا عايزه
هوت شورت و بادي ستومك .
- ايوه عارف البادي
ستومك , بيبقى جميل اوي , اللي هو لما تيجي توطي مثلا تبقى نص بطنك باينه و كده ؟ الله
, شكله بيبقى تحفه .
.
أيوه بالظبط هو
ده .
- غوري يابت من
هنا بدل مانفخك .
.
بابا أنا صاحباتي
عازمني في النادي الأهلي
- بس انا زملكاوي
, و النادي الأهلي بالنسبالي بتاع كفار قريش .
.
مانا زملكاويه
بس هنروح حمام السباحه بتاع النادي الاهلي .
- طيب خلاص روحي
( و أموالهم غنيمةُ لنا )
.
بس انا عايزه مايوه
بكيني .
- نعم ياختي ؟
.
.
يا بابا أصل اليوم
ده بيكون خاص بالستات بس ومفيش رجاله خالص و كله بيقلع ملط
- ممممممم كله
بيقلع ملط ؟ طب خديني معاكي .
.
يا بابا انا مش
بهزر , وايه يعني مايوه بكيني ؟
- شوفي يا لوجي
يا حبيبتي , انا عندي حل هيريّحك تماما .
.
حل ايه ؟
- انا اخدك البلد
يومين واسيبك هناك , تقعدي مع عمك بقى و تحكي له عن الهوت شورت و البادي الستومك و
المايوه البكيني .
.
و بعدين هيحصل
ايه لما اقعد مع عمو و احكي له ؟
- بصي , احنا عندنا
في بيت البلد حديده كده ثابته في السقف , زي خطاف يعني , بنوزن عليها الرز و الغله
و زمان كنا بنوزن عليها أكياس القطن .
.
أيوه عارفاها
, هي اللي عمو بيعلّق لنا فيها المرجيحه لما نروح و نتمرجح كلنا .
- أيوه بالظبط
كده , بس في المره دي مش هتكون فيه مرجيحه , سوف تكونين أنتي المرجيحه .
.
يعني ايه يا بابا
؟
- يعني عمك بعد
مايسمع طلباتك الجميله هيعلقك في السقف قد ساعتين تلاته لحد ما نفسيتك تتظبط و تبقى
زي الفل , و مش بعيد ترجعي من هناك و تقولي يا بابا انا عايز أتحجّب بقى , دانا اتأخرت
أوي في الموضوع ده .
....................................................................................................
ليست هناك تعليقات:
إرسال تعليق